المنبر مالو زي الماياهو كدي ؟!!!

07:53 PM February, 27 2017

سودانيز اون لاين
ناذر محمد الخليفة-www.nazirkhalifa.com
مكتبتى
رابط مختصر

إنت بس تعال... وهو حيبقى "كدي"
.......................................
حمداً لله ع السلامة.

الله يسلمك يا محجوب

والله جيت داخل لقيت اسامي كتيرة جديدة وقريت لي كم واحد ناس مبدعة وكتابة بالجد ..
في المقابل في اقلام قديمة كانت مالية صفحة المنبر الاولى زمان هسي ما شايفا ..

وهكذا المنبر .. نهر لا يتغير ولكن تختلف الامواج وما عليها بتغير السنون والازمان ..

مرحب با اخونا ناذر ورينا ديارك وين

اوووو ناذر
الذي اغترب
وينك
خلعتني والله
الماياهو قريتها ذهنيا كدة غلط لامن اتخلعت

هلا ياناذر يافنان
قلنا ننزل نضقل شويه كده مع الناس الفطاحلة الهنا ديل لغاية ماينزل اللعيبه الاساسيين الباقيين ونطلع نقعد بره نلقط ليهم الكوره

هلا اخونا اسامة
كيف اخبارك ؟!

Quote: مرحب با اخونا ناذر ورينا ديارك وين

في غربة لا النفس راضية بها ولا الملتقي من شيعتي كثب
فلا رفيق تسر النفس طلعته ولا عدو يرى ما بي فيكتئب ..

هلا هلا ود اب سن ..

كيفك وكيف اراضيك .. يسرني انك من القابضين عللى جمر قضية هذا المنبر وتذود عن بالسنان وبالبيان ..

Quote: اوووو ناذر الذي اغترب وينك خلعتني والله الماياهو قريتها ذهنيا كدة غلط لامن اتخلعت

هههههههههههه اوع يكون بالك مشى لقبائل المايا ههههههه

عمدة قريش كيفك ياخي ..

Quote: هلا ياناذر يافنان قلنا ننزل نضقل شويه كده مع الناس الفطاحلة الهنا ديل لغاية ماينزل اللعيبه الاساسيين الباقيين ونطلع نقعد بره نلقط ليهم الكوره

فطاحلة ايه الجاي تقول عليه هههه نحن خلاص نزلنا معاشات وام جركم ما بتاكل خريفين ..

الكلام دا بتحس بيو لمن تقضي 16 سنة في المنبر خدمة متواصلة بعد عمر مديد باذن الله هههههه

سلامات عزيز نا ن. الخليفة
شنو يازول نجي البلد انت تمرق ؟ كيف حال غربتك الجديدة .
تحياتي

أهلا أهلا باشمهندس

ناذر محمد الخليفة لمن لاا يعرفه

فنان بأنفاس القرنفل ومبدع وصحافي لا يشق له غبار

وأخيرا بوردابي مغترب من الذين ... عمروا الأرض حيثما قطنوا

رفيق الرحلات الطويلة ذو الحكايات والشجـون

تصدق كنت مفتكرك مشارك في مؤتمر المغتربين الخبراء

بالله يا ناذر وانت رائد تقنية الـ ثري دي بانيل في السودان وصاحب تجربة عملية في تطبيقها لصالح بناء مساكن المغتربين وأولهم سيد الحوش بكري أبو بكر

وصاحب أشهر موقع ثري دي بانيل في الشرق الأوسط والإخوة الخليجيين تعرفوا عليك من موقعك واسهاماتك واصروا على استقدامك لتصبح الان رائد تطبيق الانشاءات بنظام الـ ثري دي بانيل في الخليج

وعلى قائمة عملاءك وزارات حكومية وجهات رسمية تأخذ من أعمالك كود الانشاءات الحديثة الجديدة

إذا لم تكن في صدارة العلماء المغتربين .. فمن يكون ؟

قصدنا الترحيب بيك يا زعيـم فرحاً بالإطلالة النادرة مع مشاغلكم المتكاثرة

ولك من الود الذي تعرف

أحمد الشايقي

زي ما قال ليك الشايقي

لقينا اللعيبة الأساسيين مرقوا وخلو لينا الكورة والأستاد

أها نسوي شنو يعني .. نحرد

على صعيد آخر .. كنت ولا زلت واحد من الذين تمنيت أن ألتقيهم في هذا المنبر
دام صفاك مشمول

وانا كمان بقول ليك زي ما قال ليك احمد الشايقي..
...وبعدين سؤالك ان المنبر مالو زي الماياهو...اظنك
لاحظت في غياب لعدد من ادباء وعلماء وشعراء وسياسيين
ومثقفين...وكمان غياب بسيط للشكلات الاسفيرية....
انت مريت على بوست نعمات !!
ودمت بالف خير وصحة وعافية

Quote: الماياهو قريتها ذهنيا كدة غلط

في البـرِد دا؟

شايف بعض العجزة والمسنين
جاين يجددو شبابهم فاتكم القطار فاتكم القطار







تنهدات: ياجادات تعال استلم واحد امنجى عاد للمنبر

ذكرتني يا باشمهندس حكاية واقعية حدثت معي وتطابقت مع موقفك الأسفيري الحالي دا .
طيلة طفولتي قضيتها في بيت جدي لأمي بغرب كسلا قبل دخول المدرسة ونحن نسكن بالشرق . بعدها لم اعتاد على سكنة الشرق كنت أنتهز أقل اجازة وأروح أقضيها هناك . بعد مرور الزمن وتزوج الخالات والخيلان وتفرقوا في ربوع السودان .أصغرهم تزوج غريبة من بنات المدينة وليس لها أي قرابة بأهلنا وسكن بها مع والديه .. . في إجازة العيد ركبت العجلة وجريت بها على الغرب كالمعتاد .. طرقت الباب أول من فتح لي الباب شخص غريب أول مرة أشوفه دعاني للدخول .. وجدت البيت مليان بأناس كثر ما شاء الله لكن لا اعرف فيهم أحد .. جلست في كرسي مطرف بعد تبادل التحايا العادية وهم يرحبون بي ويقدمون لي المشروبات والحلويات كأي ضيف ويعزمون علي وأنا صاحب البيت .. لمدة خمسة أو عشرة دقايق لم يظهر أحد من أقاربي يعرفني بهؤلاء أو يعرفهم بي .. وحتى هم لم يسألوني وواصلوا عادي في ونستهم .. وهم من الناطقين بغير العربية .. الرطانة شغالة عادي .. وكل ما أطلقوا كلام مضحك يبدو أنها نكتة أو شئ مشابه ينظرون الي لأشاركهم الضحك . ويجدوني أنظر ببلاهة ظاهرة . ويعودوا لحوارهم . في الأخير ودعتهم ركبت عجلتي وتخارجت عائدا .. مؤمنا بتقلب حال الدنيا و مودعا ذكرياتي في هذا المكان ..
لكن أنت حالك زين ولغتنا واحدة ممكن تشارك ونضيفك عادي
بس ما تركب عجلتك وتغادر من جديد .

سلامات يا ناذر,,,

بعد أقل من سنة ..

Quote: في غربة لا النفس راضية بها ولا الملتقي من شيعتي كثب فلا رفيق تسر النفس طلعته ولا عدو يرى ما بي فيكتئب ..

لو واصلت بالطريقة دى كلها كم شهر وبلقاك قلبت الدرب.



إنكرب يا زول إنكرب

تحياتى يا حبيب

ناذر
يا فنان في بلد المطاوعة
غربتك غربتين والله

يا سلااااااام ياخ

ما تتصورو كيف انا سعيد بالترحيب الشايفو دا من جانبكم قدامى وجدد .. سناير وبراليم هههه

كدي قبل اجي ارد عليكم واحد واحد بسال عن التعليقات بتاعة الفيس بوك .. ما شايفا .. وشايف بقت زي مداخلة حريفة كدة بيعملا صاحب البوست في
نص البوست ومنها الضيوف بيتمكنو من المشاركة بالتعليقات ..


انا من زمان بقول انو المشاركين من الفيس بوك ديل ما كلهم اشرار وما كل مداخلاتم وتعليقاتم مسيئة والعكس انا شخصيا استفدت منهم ومن ملاحظاتم كتير .. لهم التحية والتجلة ..


اها يا جماعة الخير .. وروني بيعملوها كيف الشغلانية دي .. او الكود البيعملا وينوبكم ثواب ..

وبالمرة كمان يا ناذر اسأل لينا عن منح صاحب البوست خاصية حذف
المداخلات التي لا تروقه في بوسته وخاصية إغلاق بوسته متى شاء
وأخيرا حذف أي مداخلة من أي بوست في المنبر
بل حذف أي بوست في المنبر زاتو
يا حليل غنّايكم يا أبو النذ

مرحب بيك الاخ نادر و سعيدين بى عودتك و نتمنّاها من دون انقطاع
كود مشاركات الفبس بوك
بتلقاهو قى صفحة الاكواد و قاعد فى اعلى الصفحة
كل المطلوب لامن تجى تكتب مداخلة بتلقى كود مكتوبة بالاحمر,
تصغط عليها بتظهر ليك صفحة الاكواد تنسخو و تجيبو على مداخلتك
محل الكتابة بالعربى تمسحا و تخت رابط البوست بتاعك
و ده شكل الكود

حبيبنا جلالدونا

Quote: بتلقاهو قى صفحة الاكواد و قاعد فى اعلى الصفحة

والله فتشتها قريب ربع ساعة ما لقيت صفحة الاكواد دي !!! !!

الفنان ناذر الخليفة .. وشركاه
زمان الغربة والتبريح بسيبو
انت عارف الغربة دي لا بتشبهك لا بتشبه عادل الصديق
زي ما كانت مابتشبه مجاهد عمر ...
عارف يا ناذر ... من فترة لقيتك بتطلع من جوة صوت وردي الصادح
وهو يجسد كلام الدوش في (الود)
وفى عينينا كان بكبر حنانا زاد وفات الحد
ويقترب منك اكثر ...ويقول:
زمان ما عشنا فى غربة ولا قاسينا نتوحد
وهسع رحنا نتوجع
ويستمر صوت وردي التينور
ونتأسف على الماضى اللى ما برجع
ويصل الى :
على الفرقة الزمانها طويل
على الصبر اللى عشناهو مع طول الألم والليل
ويتواصل ذلك البوح .. الى ان يصل اليك هنا ياناذر ايها الجميل ومع الفرح
أحبك .. أحبك .. أحبك
أحبك لا الزمن حولنى عن حبك ولا الحسرة
وخوفى عليك يمنعنى وطول الإلفة والعشرة
وشوقى ال ليكا طول لسه معاى
شوقى لسة معاى
لى بكرة لسة معاى
لى بكرة لسة معاى

ظبطت ...

اشكرك حتى تستغيث يا جلالدونا ..


تسلم كتير


بعد دا نتفرغ للرد علي الضيوف الاعزااء

حبيبنا عثمان كيفك ...

Quote: سلامات عزيز نا ن. الخليفة شنو يازول نجي البلد انت تمرق ؟ كيف حال غربتك الجديدة . تحياتي

بالله جيت البلد بي قفاي !!!

ان شالله الاهل طيبين وزينين

جيتك بعد مروقي بتذكرني المقولة نكورك ليكم ما تجو نجيكم تكوركو هههههه

مولانا احمد الشايقي ..

كيفك يا عظيم ..

Quote: أهلا أهلا باشمهندس ناذر محمد الخليفة لمن لاا يعرفه فنان بأنفاس القرنفل ومبدع وصحافي لا يشق له غبار وأخيرا بوردابي مغترب من الذين ... عمروا الأرض حيثما قطنوا رفيق الرحلات الطويلة ذو الحكايات والشجـون تصدق كنت مفتكرك مشارك في مؤتمر المغتربين الخبراء بالله يا ناذر وانت رائد تقنية الـ ثري دي بانيل في السودان وصاحب تجربة عملية في تطبيقها لصالح بناء مساكن المغتربين وأولهم سيد الحوش بكري أبو بكر وصاحب أشهر موقع ثري دي بانيل في الشرق الأوسط والإخوة الخليجيين تعرفوا عليك من موقعك واسهاماتك واصروا على استقدامك لتصبح الان رائد تطبيق الانشاءات بنظام الـ ثري دي بانيل في الخليج وعلى قائمة عملاءك وزارات حكومية وجهات رسمية تأخذ من أعمالك كود الانشاءات الحديثة الجديدة إذا لم تكن في صدارة العلماء المغتربين .. فمن يكون ؟ قصدنا الترحيب بيك يا زعيـم فرحاً بالإطلالة النادرة مع مشاغلكم المتكاثرة ولك من الود الذي تعرف أحمد الشايقي

اخجلت تواضعي والله بكتابتك هذه .. ولكن اجمل ما فيها جملة عمرو الارض حيثما قطنو ....

فان ضاقت علينا بلادنا وعجزنا عن التعمير بسبب انهم دسو علينا المحافير .. فلنهاجر لبلاد اخرى نعمرها ونفيدها بما علمنا الله به . والاعمار ليس شرطا ان نخص به بلادنا
طالما هنالك حوجة له في دول اخرى قدمت لنا يد العون وهيات لنا كل اسباب العمل والياته .. لعمري ليس هناك ما يمنع وما اعظم ان نفيد الناس ونعلمهم بما اتاه لنا ربنا ..

تسلم يا الحبيب

تسلم يا دكتور ..

Quote: زي ما قال ليك الشايقي

ولك زي ما قلت انا للشايقي فوق ...

هلا عمر ابو عاقلة

كيفنك يا رجل وكيف اخبارك وامورك

Quote: لقينا اللعيبة الأساسيين مرقوا وخلو لينا الكورة والأستاد أها نسوي شنو يعني .. نحرد على صعيد آخر .. كنت ولا زلت واحد من الذين تمنيت أن ألتقيهم في هذا المنبر دام صفاك مشمول

اكيد ما في حردان يا حبيب وفي المنبر دا مافي لعيبة اساسيين ولعيبة احتياطيين والكل سواء طالما عندهم كلمة دخول وباصويرد ومن ثم الحشاش يملا شبكتو ..

وانا كذلك اتمنى ان نتقابل فوق اي ارض وتحت اي سماء وسنتقابل ان شاء الله ان مد الله في الاجال ..

تحيادتي ومودتي يا حبيب ..

سلام الاميرة بسمات

كيفنك يا زولة ونعلك طيبة ...

Quote: وانا كمان بقول ليك زي ما قال ليك احمد الشايقي.. ...وبعدين سؤالك ان المنبر مالو زي الماياهو...اظنك لاحظت في غياب لعدد من ادباء وعلماء وشعراء وسياسيين ومثقفين...وكمان غياب بسيط للشكلات الاسفيرية.... انت مريت على بوست نعمات !! ودمت بالف خير وصحة وعافية

فعلا في غياب واضح ويبدو ان وسائل التواصل الجديدة ساهمت بفعالية في غياب الكثيرين . فلازلت تصلني بين الفينة والاخرى منتوجات
الغائبين عن حوشنا هذا عبر الوسائط الاخرى ولكن يبقى رغم كل ذلك المنبر محافظا على القه وبريقه ومحاربيه القدامى والجدد لما له من طعم خاص
لن نجده في اي وسيلة تواصل اخرى ..

الشكلات الاسفيرية هي ملح خذا المنبر وفاكهته مهما بلغ بها التطرف والشطط لانها في النهاية تقدم حراكا وصراعا حول الطرح والفكرة وفي رايي ليس بها خاسر ولا مهزوم
ومنتوجها يفيد اطراف الصراع والجميع ..

الشكلات الاسفيرية القديمية في هذا المنبر انتجت الان اشخاصا في مواقع حكومية متميزة وانتجت لنا وفود منافي وحوار واستوزار نتفق فيه او نختلف .. المهم ان بعضا من هؤلاء لم يكن
لهم ان يظهرو ويلمع نجمهم الا بهذا الدواس الذي دار هنا وتمكنهم من ايصال رايهم وصوتهم من بين اصوات العكاكيز والمفاريك الاسفيرية ..

واتمنى عودة الصراعات والمشاحنات الايجابية مرة اخرى لتثير فينا الحماس والمشاركة ..

سلام محجوب البيلي ..

Quote: في البـرِد دا؟

انت يا زول لسع في مغارزك دي

هههههههههههههه يا بدر الدين ...

Quote: شايف بعض العجزة والمسنين جاين يجددو شبابهم فاتكم القطار فاتكم القطار تنهدات: ياجادات تعال استلم واحد امنجى عاد للمنبر

يا عمك لو انا من العجزة والمسنين في المبر دا انت يختوك تحت ياتو تصنيف وتنهداتك سارت بها الرهبان على مدى جيل اسفيري كامل هههههه

بعدين ياخ جادات دا صحبي ووقعنا اتفاق هدنة غير مكتوب هو وصديقي اللدود القديم مصطفى محمود الذي لم يات لحوار هههه

يا سلام يا الدرديري على الكتابة دي ..

Quote: ذكرتني يا باشمهندس حكاية واقعية حدثت معي وتطابقت مع موقفك الأسفيري الحالي دا . طيلة طفولتي قضيتها في بيت جدي لأمي بغرب كسلا قبل دخول المدرسة ونحن نسكن بالشرق . بعدها لم اعتاد على سكنة الشرق كنت أنتهز أقل اجازة وأروح أقضيها هناك . بعد مرور الزمن وتزوج الخالات والخيلان وتفرقوا في ربوع السودان .أصغرهم تزوج غريبة من بنات المدينة وليس لها أي قرابة بأهلنا وسكن بها مع والديه .. . في إجازة العيد ركبت العجلة وجريت بها على الغرب كالمعتاد .. طرقت الباب أول من فتح لي الباب شخص غريب أول مرة أشوفه دعاني للدخول .. وجدت البيت مليان بأناس كثر ما شاء الله لكن لا اعرف فيهم أحد .. جلست في كرسي مطرف بعد تبادل التحايا العادية وهم يرحبون بي ويقدمون لي المشروبات والحلويات كأي ضيف ويعزمون علي وأنا صاحب البيت .. لمدة خمسة أو عشرة دقايق لم يظهر أحد من أقاربي يعرفني بهؤلاء أو يعرفهم بي .. وحتى هم لم يسألوني وواصلوا عادي في ونستهم .. وهم من الناطقين بغير العربية .. الرطانة شغالة عادي .. وكل ما أطلقوا كلام مضحك يبدو أنها نكتة أو شئ مشابه ينظرون الي لأشاركهم الضحك . ويجدوني أنظر ببلاهة ظاهرة . ويعودوا لحوارهم . في الأخير ودعتهم ركبت عجلتي وتخارجت عائدا .. مؤمنا بتقلب حال الدنيا و مودعا ذكرياتي في هذا المكان .. لكن أنت حالك زين ولغتنا واحدة ممكن تشارك ونضيفك عادي بس ما تركب عجلتك وتغادر من جديد .

هاك السر دا ...

اول ما انت سجلت في المنبر وبقيت تكتب انا كنت مقطوع ومشغول عن المنبر وما كان عندي وكت ولا حتى لمجرد المطالعة .. صديقي العزيز سفيان نابري رد الله غربته وغربتنا اتصل
علي يوم بيسال من اخباري وسالني قال لي قاعد تقرا المنبر اليومين ديل ؟! قلت ليهو لا والله طولت جدا .. قال لي عليك الله ارجع بس واقرا للزول المجنون الاسمو درديري كباشي دا .. دا حاجة عجيبة ومختلفة
وحا يبهرك تماما ..

ولاني عارف صحبي سفيان دا مجنون والكتابة الطاعمة بيركز معاها وما بيجامل في ذائقتو الادبية الانا بثق فيها .. طوالي دخلت المنبر وععملت سيرش بي اسمك وفي الاول فاجاني الانتاج الفزير مقارنة مع تاريخ تسجيلك وقريت ليك تقريبا
كل الكتبتو في فترة تسجيلك الاولى واستمتعت جدا ..

ولاني ما من الناس البياكلو ويقشو خشمم حبيت اشكرك على الامتاع الجميل داك وان كان الشكر تاخر تلاتة او اربعة سنوات والان تذكرت الموقف بمداخلتك الطاعمة هنا

ويسعدني والله انك جددت دماء المنبر ومواصل على ذات الدرب ..

دم بخير يا حبيب ..

هههههههههه يا ايمن الطيب ...

Quote: لو واصلت بالطريقة دى كلها كم شهر وبلقاك قلبت الدرب. إنكرب يا زول إنكرب تحياتى يا حبيب

اهو انكربت لكن صدقني الوضع لسع ما واقع لي ههههههه

هلا يا علي ...

Quote: ناذر يا فنان في بلد المطاوعة غربتك غربتين والله

ههههههههههههههههههههههههههههههههههههههه

والله زي ما قلت غربة بي غربتين .. ربنا يلزمنا الصبر بس ..

حبيبنا معاوية ...

Quote: وبالمرة كمان يا ناذر اسأل لينا عن منح صاحب البوست خاصية حذف المداخلات التي لا تروقه في بوسته وخاصية إغلاق بوسته متى شاء وأخيرا حذف أي مداخلة من أي بوست في المنبر بل حذف أي بوست في المنبر زاتو يا حليل غنّايكم يا أبو النذ

الخواص دي من اجمل الاضافات العملا بكري في المنبر ربنا يديهو العافية وقللت كتير من الشكية والبكية البيعملوها الناس لمن يتجرسو ويسخن معاهم ههههههه

غايتو عندي كلها شغالة زعملت ليها تستات .. عندك مافي ولا شنو ؟!

تسلم يا حبيب ..

يا سلام يا احمد ياسين ..

مالك داير تبكيني في الصقط دا ياخ ..!!

Quote: الفنان ناذر الخليفة .. وشركاه زمان الغربة والتبريح بسيبو انت عارف الغربة دي لا بتشبهك لا بتشبه عادل الصديق زي ما كانت مابتشبه مجاهد عمر ... عارف يا ناذر ... من فترة لقيتك بتطلع من جوة صوت وردي الصادح وهو يجسد كلام الدوش في (الود)

اهو كتبت علينا خطى وها نحن نمشيها ..

والتحية لمجاهد عمر وللدمبعلو عادل الصول ..

الدمبعلو دا لقب اطلقو الموصلي علي عادل الصول لتمكنه من العزف على العود وتقليده لبعض عظماء الفنانين وادائه الاغاني الصعبة جدا ..

انا لي هسي مستغرب عادل الصول دا كيف قدر يعزف ويغني اغنية اسالي الشوق في عيوني للموصلي !! الموصلي زاتو لو قالو ليهو غنيها مرة تانية حا يحتاج لي انبوبتين اكسجين وجردل محريب وجك جنزبيل ههههه