◘يوميات بكّور◘

03:54 PM February, 23 2017

سودانيز اون لاين
جلالدونا-
مكتبتى
رابط مختصر

غايتو الاتنين عليهو
هبيش و شليق
و معاهن واحدات تانيات
امّو بت خالة عم ابوهو واخت ام ابوهو
ما قريبى لكن نديدى فى الرضاعة
من زمن الجهل متزاملين
الخلوة,البحر و المدرسةو القراعة و حش القش
من نضميهو و كلامو الكتر حبوبتو مسمياهو ود الباقير
ما الباقير بتاع كلام الطير داك
ده واحدن تانى بتعرفو براها

مرّة الدنيا ليل, مولعين لمبة الجاز و قاعدين يتعشّو
هو و ابوهو و اخوانو
جا داخل عليهم عتود
ابوهو قاليهو يا بكور قوم اربط العتود ده ما يكشح لينا العشا
بكور قام على حيلو و بى كراعو اليمن دقش اللمبة
عاوز يلحق اللمبة كراعو الشمال دخلت فى الصحن
فقد توازنو و راح واقع فى عب ابوهو
ابوهوقال لى اخوانو
خلّو العتود و اربطو بكور

جنس عكلتة

اها قول اللمبة خاتينها في تربيزة وهم بياكلو في الاكليم بتاع الصوف البقرص داك
اللمبة وراهم بدقشها بتمشي قدام كيف كراعو خشت في الصحن
ازيك جلالدونا وضيوفه
عندي طاقة عكلتة زايدة داير افرغها
اتا مش صحبي وتسمح لي بحرية التعبير

قال له يا نطاسى ,, لى أمٌ إقحَئنَّة أصابها الإمِصال والإستِبْرقشاش.
قال له النطاسى: عليك بإثنان من شعاع الشمس واثنان من شعاع القمر
واخلِطْهُما واخلِط خليط الخليط فى هُونْ بلا قَعَر واسْقِهما ,, تشفى بإذن الله.

يا الف مرحب حبيبنا احمد

Quote: جنس عكلتة

ياخى بكور ده زول لذيذ خلاس
مرّة كان عندنا كورة مع ناس حلة تحت
عندهم ولد فرفارة و جراى و حريف
مدربنا يوم الكورة قال شوف لى بكور وين
بكور صاح جراى و جسمو قوى لكن ما عندو اى علاقة بى التيوة
اها جابوهو لى المدرب و المدرب يشيل و يوصّى فيهو
الليلة انا ح ألعّبك و كل الدايرو منك تعطل لينا الزول ده
اها الكورة بدت واول هجمة مسكا الود الحريف ده و حاور الجماعة و جابا قون
بكور الوكت داك كان مقهى
المدرب جاط فوقو : ما قلت ليك عطّل الزول ده
اها الباص البعدو رموها طويلة قدام الولد و بكور فتح معاهو
وصلو الكورة سوا و اتعاصرو فوقا
الولد ضرب الواطا بفتفت
بكور ركّب ليهو المطوة فى جنبتو
الجماعة قالوليهوده شنو العملتو ده
قال ليهم مش قلتو لى عطّلو

Quote: مرّة كان عندنا كورة مع ناس حلة تحت عندهم ولد فرفارة و جراى و حريف مدربنا يوم الكورة قال شوف لى بكور وين بكور صاح جراى و جسمو قوى لكن ما عندو اى علاقة بى التيوة اها جابوهو لى المدرب و المدرب يشيل و يوصّى فيهو الليلة انا ح ألعّبك و كل الدايرو منك تعطل لينا الزول ده اها الكورة بدت واول هجمة مسكا الود الحريف ده و حاور الجماعة و جابا قون بكور الوكت داك كان مقهى المدرب جاط فوقو : ما قلت ليك عطّل الزول ده اها الباص البعدو رموها طويلة قدام الولد و بكور فتح معاهو وصلو الكورة سوا و اتعاصرو فوقا الولد ضرب الواطا بفتفت بكور ركّب ليهو المطوة فى جنبتو الجماعة قالوليهوده شنو العملتو ده قال ليهم مش قلتو لى عطّلو ·

كاااااااك

أرجو من الأخ بكري أبوبكر حذف هذا البوست الطفولي

Quote: أرجو من الأخ بكري أبوبكر حذف هذا البوست الطفولي

أده ماسبب كافى ,, بعدين شنو دليلك انو قاصد بكور المعانا هنا؟
*******
بعدين سعال ياجلالدونا بما انك خبير وكده:
بقيت لما اجى انسخ Text من المنبر واعمل ليه Paste فى المنبر
يجينى بالطريقة دى ,, ياربى يكون السبب شنو؟
*******

رجو من الأخ بكري أبوبكر حذف هذا البوست الطفولي
المصدر : http://sudaneseonline.com/board/490/msg/%e2%97%98%d9%8a%d9%88%d9%85%d9%8a%d8%a7%d8%aa-%d8%a8%d9%83%d9%91%d9%88%d8%b1%e2%97%98-1487865285.html

عندي دليل يا فاضلابي:
سبب فتح البوست دا انو أنا حذفت مداخلته المقتبسة هنا من بوستي
كحق إداري ولطفولتها
لا يحق له أن يفتح بوست باسمي
متأكد انو بكري سوف يقفل البوست
صحي بكرة الجمعة بعد الصلاة باريزونا ح يجننو،
لكن القانون قانون
غايو لو بكري حذف البوست؛ يكون الخروف ولّ العجل الصوروهو داك راح ساكت

Quote: عندي دليل يا فاضلابي: سبب فتح البوست دا انو أنا حذفت مداخلته المقتبسة هنا من بوستي كحق إداري ولطفولتها

بكور انت وجلادونا فاكهة المنبر فـ بالله
ماتقعدوا تتلايقو وتخربوا لينا متعة المناكفة

ياجلال بكورنا ده اضبح ليهو
ان شاء الله يعفص الصحن ويشتت المرارة
نحن راضين :))

اول حاجة يا ود اب سن بسم الله ما شا الله صورة ولدك الحلوة و معبرة دى بتقول ليك
سيب قراية بالاضنين و الدليل ... الولد خاتّى ايدو فوق اضانو
اول حاجة زمن حدوث هذه الواقعة لم يكن هناك ترابيز كان فى حاجة اسما طقاطيق و مفردها طقطوقة و ككاكير و مفردها ككر
و طبالى و مفردها طبلية و الطبلية دى ذات قرص دائرى خشبى كبير يقوم فوق ارجل قصيرة
لا يتعدّى طولها طول المسطرة ام تلاتين سنت متر مربع
اخونا بكور لامن قام على حيلو اترتع و دقش اللمبة بى كراعو اليمين.. داير يلحق اللمبة تانى اترتع و كراعو الشمال دخلت فى الصحى .
داير يرفع كراعو من الصحن بقن كرعينو الاتنين بقن فوق بالنتيجة راح واقع فى عب ابوهو
و تجدنى فى غاية الاسف للاسهاب فى سرد تفاصيل الواقعة حتى تمارس عكلتك بعقل منفتح و مستنير
ثم برضو ..
هنا للديمقراطية براحات تحتمل الكل و مفتوحة للكل .. انت قايلنى بقيت ذى المدعو محمد حيدر المشرّف

Quote: أده ماسبب كافى ,, بعدين شنو دليلك انو قاصد بكور المعانا هنا؟

القالك مِنو ما سبب كافي ؟، يا كافي البلا بس تجو ناطين، هسّع حكاية بكور
دي دايرالآ دليل !، الوحيد اللِسم الدلع بتاعوا بكور في منبرنا دا هو صديق
المنبر أبو بكر عباس (المستنير).
عايز تدافع عن جلالدونا بطريقتك بس دفاعك لآزم يكون مبني علي أُسُس
وقواعد متينة، عليك الله ما تبقالنا زي ود البشرى إنت كمان.

مودتي...

Quote: غايو لو بكري حذف البوست؛ يكون الخروف ولّ العجل الصوروهو داك راح ساكت

Quote: القالك مِنو ما سبب كافي ؟، يا كافي البلا بس تجو ناطين، هسّع حكاية بكور دي دايرالآ دليل !، الوحيد اللِسم الدلع بتاعوا بكور في منبرنا دا هو صديق المنبر أبو بكر عباس (المستنير). عايز تدافع عن جلالدونا بطريقتك بس دفاعك لآزم يكون مبني علي أُسُس وقواعد متينة، عليك الله ما تبقالنا زي ود البشرى إنت كمان.

قول واحد يا بكور.
واصل يا جلال هو براهو مش قال العايز يشتهر يجيب اسمو؟ تيب.

Quote: عليك الله ما تبقالنا زي ود البشرى إنت كمان.

سلام ياقريبى
الشر بره وبعيد ,, يمين تعترينى عكلتة ودالبشرى دى بكرى عِلا يبيع موقعو دا ... ,,
انا كان قمت على العكلتة ختر خلاس ,, قبل كدى فى قاضى فى سنجة شافنى ومعاى محامى تانى ماشين على محكمتو ,,
مشى اندسا مننا مع قاضى المديرية قال والله انا مابقدر على عكلتة الفاضلابى وعبدالغفار (الله يرحمه)

Quote: سلام ياقريبى الشر بره وبعيد ,, يمين تعترينى عكلتة ودالبشرى دى بكرى عِلا يبيع موقعو دا ... ,, انا كان قمت على العكلتة ختر خلاس ,, قبل كدى فى قاضى فى سنجة شافنى ومعاى محامى تانى ماشين على محكمتو ,, مشى اندسا مننا مع قاضى المديرية قال والله انا مابقدر على عكلتة الفاضلابى وعبدالغفار (الله يرحمه)

هوّي يا الفاضلابي أعقِل،
نحن لرقبتنا ود البشرى دا قاعدين معاهو علي الحُرُكرُك...

Quote: قول واحد يا بكور. واصل يا جلال هو براهو مش قال العايز يشتهر يجيب اسمو؟ تيب.

يا ملك الحق حق. جلالدونا غلتان ياخُد فوق صنقوعوا، وابو صلعة
يجب أن يستجيب ويقوم بسحب هذا المنشور.
يا حليلك يا قصي...

Quote: كحق إداري ولطفولتها

حق إدارى كيف يعنى؟ إنت مدير فى الموقع ده؟
بعدين لطفولتها كيف يعنى؟ مابلغت سن الحضانة ولا شنو؟
شفت ياود المدير دى المناظر ,, الملك سلامات ياخ.

الله يسلمك يا لفضلابي ..
يا ود المدير ما قلنا بلاش من حذف البوستات ..
جلالدونا غلطان يقعد قدامنا هنا فارش جلابيو ..
أي زول شليفلو غلط يكبو ليهو في حجرو..
بعد داك يا قام نفض جلابيتو ووقف نضيف ..
أو خمموا غلطاتوا ؤ مرق بيهن..
ولّ كيف؟

اها بى نفس حاجاتك دى
جماعتك ناس القعدات و جلسات الاستماع يوم راسن انقطع
جاهم بكور و بى شعاعين شمش و شعاعين قمر و لألأة نجمتين
خلط خلطيهو و كباه فى صفيحة ... طلع عرقى
ناس الجلسلت شربوهو قايلنو صودا
و دى كان اول و آخر حاجة يعملا صاح

يا فاضلابي، يا تعبان، يا كيشة،
حق اداري من إدارة البوست
فرقك شنو هسع من ديل؟
فاضل ليك بعد التلاوة تقول لي أطلع معاي الخلا

يا ملك، خليك دقيق،
أنا ما قلت أي زول داير يشتهر؛ يجيب اسمي.
قلت أي مغمور داير يشتهر؛ يعمل بوست باسمي.
مغمور وليس زول
بوستاتو القديمة في شهر عدد الكلكات بكونن ١٣١ ودا بعد تلفونات مع اصحابو!
أرجو من بكري حذف البوست بعد صلاة الجمعة

صباح الخير

تطرد المغمورين من بوستاتك،
كرد فعل طفولي وطلبا للشهرة؛ يجي جاري يفتح بوست باسمك
تجي تسرح وتمرح فيهو،
ما حدش يقوليك حاجة

مداخلتك الأخيرة دي عايزه تفكيك ؤ فرز
ضمير متكلم وضمير مخاطب وضمير غايب
شِبكة شديدة

حباب حامد

Quote: كاااااااك

اقعد كاكى لينا كده لامن تستنير
تعرف يا حامد صاحبنا بكور ده كل حاجاتو ما ياها
عندو مثل كده يحشرو ليك فى اى حاجة
مرّة قاعد مع حبوبتو يتونس
اها فى اخر نضميها قالتلو شفت محن الدنيا دى يا ولدى
قالّها كلام صُح يمّة
الماب تشبّعو الرجلة ماب ترويهو الملوخية
اها من اليوم داك سمّتو ود باقير

واضح انو المسألة وما فيها اختلافات أجيال وغياب مجايلة ..
انظر المقردات التالية تيوه, اترتع, ككاريك و لمبة الجاز كنماذج ..

.....
يا بكؤي ياخ شيلل امانتك دي ياخ..
ديل من زمن الواحد بدخل يلعب الكورة ومعاهو مطوة !!

لا اعني بالامانة التي يجب ان يشيلها بكري هذا البوست فحسب وانما اليوزرنيمز ذاتم ..
ما مكن ياخ حملة المطاوي في ميادين لعب الكرة ايام الطفولة البريئة يتحولوا بقدرة قادرة لحملة اقلام للاستنارة ..

ده انتهاك لقانون السبب والنتيجة .. والله صحي !!

يا ألف مرحب بالديمقراطية ذات الانياب
يحدثونك عن كمكمة الافواه بحسرة تلهب المشاعر
و يمنوك بدنيا الحرية و دوحها الفيحاء و سوحها البيضاء العامرة بالسلام و الحب
حديث المجايلة لا يعنى شى فى زمن تقاربت فيه المسافات فما بال الاغمار
ثم ان التيوة والتُرّة و التمر اصل ثقافة مخاطبتنا وحديثنا و منبع تكويننا
اللوم لا على الذى يجاهد فى الحفاظ عليها بل اللوم على من هرب و باسم الثقافة
الى مفردات أُحر و لا ادرى ان كان استلابا او انكارا لواقع يهرب منه
اخر مداخلتين ليك فى هذا الخيط تنبئ عى استعلاء لا احبذ الرد عليه
و ضيق بالاخر لا ينبغى ان يأتى من داعية حوار
بالنتيجة انت ما محتاج لى بكرى عشان يشيل امانتو
خليناهو ليك
و مارس استنارة الاحباط التى احاط سوارها بقيم احلامك فى ديمقراطية الانياب
اما انا سأبحث عنها فى واد غير ذى زرع و حتماً سألاقيها و مبرأة من كل عيب
و ....السلام عليكم

أنا المحيرني اشمعنى اتحذفت مداخلة جلالدونا وتركت مداخلة ود المدير !

غايتو يا جلال يا انت حساسيتك زايده
يا انا جلدي تخين
يفصل بينا ود المشرف بتوضيح مداخلاتو

انت كمان يا احمد م عمر سيب البراءة بتاعتك دي

Quote: اما انا سأبحث عنها فى واد غير ذى زرع

وأظنك من الهالكين :)

يا معاوية جلالدونا مسالة التركيز على انهم زمان كانوا بلعبوا التيوه وشالين مطاويهم دي اكلت معاهم جنبه وانستهم استخدام الوجوه الضاحكة ..

والله دي مصيبةً ضكرة

موضوع الاستكة دا بدأ يجيبلو حديث عن المطاوي كمان


ثم التحايا لكم جميعاً مُقبقِبين ومُقبقَبين

انتو جلال دة زعل
زي الشايف نفسو حار في بوست لا يستوجب الحرارة
فتحو بي مزاج غير ولا شنو

لا يا ود اب سن نَفَسو ما حار, دي قومة نَفَس ساي سببها محاولة مجاراة لغة ود المشرف المعسّمة ديك,
زي قومة نفس الغراب الحاول يقلّد مشية الطاووس

لحد هسه أربعة في حجر جلالدونا ..
بتاعات المستنير ما محسوبات لإنو طرف ما محايد..

جلالدونا كيفك
هاردلك ياخ تكالب عليك الأصدقاء قبل الأعداء الوش الأخد دا للضمان

لو المدخل بتاعك اختلف المباراة دي كانت حتكون آخر مباراة لبكور

ختاما
من حق أي عضو إنو مداخلتو تظل موجودة بالبورد إلا إذا رأى صاحبه أنها تسيء وتؤثر على مسار البورد

انا مع ود البشرى في مسالة الطاؤوس دي ..
لكن -صراحة- ما معاهو في قصة معسمة :)

جلالدونا وشركاه
المشهد الجميل والميلودرامي الاتكيفت منو لحد بعيد
وصراحة المشهد دا ملىء بالاخيلة المتتابعة والمتنوعة
بتاع
خلو العتود ... واربطو بكور

أخر مباراة يا حمد؟!!
وحاتك، وما طالبني حليفة
أنا بعتبر نفسي لم ألعب مباراة هنا في سودانيز حتى الآن،
لسع شايل كورتي وبدقل بيها في خط التماس
شغال مع ناس سودانيز ديل بربع تفكير
آل أخر مباراة آل!!!!!!

فضل لي اتنين ما ضقلت معاهم هنا:
معاوية الزبير والملك
الباقين كلهم
دقلت بيهم ورفضت أدخل معاهم مباراة رسمية

يا ابوبكر صدقني المستويات متقاربة بتختلف طريقة التوصيل بس
في ناس بدوك ليها هوم دليفري وفي ناي بجبروك تمشي المطعم

هو انت إسمك بكور واللا أبو بكر يا ما عارف الله وين ؟؟

وبعدين يا دكتور محمد المشرف متين كانت في كورة فيها
مطاوي ؟؟؟؟
بصراحة الواحد احتار معاكم .

سوري يا دوك لخبطت بينك وبين ابوجودة, قصدي متحذلقة مش معسّمة :)

السلام.
يا جلالدونا اكان بقيت صح زميل خلوة ومدارس كتاتيب مع بكور ورينا بالضبط حكاية( بابكر )دي.
ماتجي تقول لي عمر نملة وبتاع دي قيلت قبل كدى.
انتهى

البوست دا مدورة فيهو حرب باردة

لكن الممكن يقلبا زي ناس ود البشرى البجي داخل

ويبدا يلطش من طرف 😂😂

وطلحتوف البجيب حاجات البوستات التانية دا برضو خطر

شنوو يااا شباب روقو المنقة ياخ 😂😂😂

Quote: أنا المحيرني اشمعنى اتحذفت مداخلة جلالدونا وتركت مداخلة ود المدير !

يا جماعة بكوّر والعتود اللِتنين خلُوّهُم أمسكوا أحمد محمد عمر دا.
يا زول أنا ما صدقت علاقتي إصلّحت مع بكور الدكتور إنت جاي
تسوطا !.

مع كامل مودتي لمعاوية الزبير...

يا غالي ما تبالغ ياخ حرب باردة شنو
شفت لمّا يكون في كورنر ح يتعكس مش لعيبة الفريقين بكونوا متكوّمين في منطقة الجزاء بكون في عفّيص و قرّيص و لكّيز خفي كدا بعيد عن الحكم
بس دا ياهو الحاصل هنا لا يرقى لمستوى الحرب باردة أو ساخنة كانت .

يا محمد المشرّف معليش يااخ و تجدنى من الاسفين
ممكن اسحب مداخلتى المهببة دى

Quote: ياجلال بكورنا ده اضبح ليهو ان شاء الله يعفص الصحن ويشتت المرارة نحن راضين :))

و مالو يا حيدر ... نضبح ليهو كديس عشان كان عفص الصحن ... و ده الاكيد ....
تبقى مافى ندامة

هوي يا جماعة انا طشيت والله ..
البوست ده مشفر ولا شنو ؟!

لو مشفر وانا دخلت غلط فاحتمال انو كلام جلال يكون -بالفعل - نفسو حار .. إحتمال !!

في الحالة دي الواحد يكون دخل في ذلك المكان من الوزة ..
تعتذر ما حلوة مع الاصحاب وما بيناتنا ..
تطنش ما طبعك ..
تحذف مداخلاتك يقولو عليك زعلان ..

والاهم من كده الواحد ذاتو ما عارف انو الاحتمال ده ذاتو صاح ولا غلط ..

احسن حاجة اعمل فرش متاع وارمي الكورة في ملعب الاصدقاء واعمل ارسال للمداخلة

..

طلحة تحياتي .. قصة المطوة دي ذكرها جلال في قصتو .. واحببت ان أمازحه بها ليس الا

مرّة كده جانى و قال لى
اسمع يا ياخى سمعت حاجة جديدة و بدور اسعلك منّها
.... دى دايماّ عادتو لامن تستغلق عليهو كلمة, قبل داك اليوم سألنى من انتهازى و امبريالى ...
اها قتلو سِمعّ شنو .. قال حاجةكدة زى مثلى الجنس , باى هوك وكركروك شرحتها ليهو
الكلام عجبو و قالّى يا زول بدور اجرّب الشغلة دى
قدر ما هديتو حلف بى دين امّو ما يتراجع و تبريرو انو انا البسوِّيها مو بسووها لى
و بقى علم على راسو نار فى الحتة دى
الزمن ساقو و اشتغل ممرض .. اجمل حاجة كان بحبها فى الشغل عمليات البواسير
مديرالمستشفى و احتراماّ لى حقو فى العمل .. قرر انّو حقن الملاريا تانى
يطعنوها فى اصبع الكراع الكبير

وقسما بالله ما فاهم حاجة يا جلال ..
ومداخلتك الاخيرة الانت وصفت فيها واحدة من مداخلاتك بالمهببة ما قريتها الا بعد ارسلت مداخلتي الاخيرة .. وبرضك ما فهمت اي حاجة ..

المهم يا صديقي ..
مودتي الخالصة

كل المودة ليك يا ود المشرف
كل القصة يا صاحب عن بكور و يومياتو
حتّة الفى بطنو حرقص دى ما تشتغل بيها كتير
و خليهو يرقص على كيفو
دايرين رايك فى اليوميات دى
تنفع بداية لة مشروع استنارى!؟

ههههها
تبيعنى بى مداخلة يا ود المدير يا خرونق !!!
اهو رشّوك وجابو ليك سيرة التلاوة و طلوع الخلا
عيبك انّو المرّة دى طلعت الخلا من غبر ابريق
هسى فى ضمّتك دى سيد الحوش مش بكور برضو !!!!

جلال
سلام واشتياق وكده
انت لسة مع حنبرة
ما قلنا ما تعملوا للحنابر قنابر
كان تسمى البوست يوميات حنبرة

معاوية الزبير
ان شاء الله خلاص اتعافيت وقدلتا

*

يا معاوبة الزبير، لو علاقتك بالزولة دي استمرت ودّية؛ أنا ح أقطع علاقتي بيك
فشنو؟
اختار بين الشبح والملاك

مرحبتين حباب الملك

Quote: واصل يا جلال هو براهو مش قال العايز يشتهر يجيب اسمو؟ تيب.

هى الشهرة دى شنو مو ياهو عدّاد المشاهدات ولّ حاجة تانيةالبوست النكتب فيهو ده اتفتح بعد بوستيهو بى كم ساعة كدهاها هاك قارن ... قال 131قال
[IMG]

خلاص يا حلالدونا خليني أقول ( للكيشه ) البطالب بالحذف دا ..
شهرتك ما بتبنيها بوستاتك وحدها بل أيضا ببوستات الآخرين حتى لو ناقدة أو ساخرة.

سؤالك وجيه يا أحمد عمر،
ليش أنا حذفت مداخلة دا؟ وتركت مداخلة داك؟
تركت مداخلة داك لسبب بسيط:
المهنة علمتني كيف أحافظ على الخزف!
لاحظ لبوست زهير بتاع الرحيل
ولا واحد من المتداخلين جاب سيرة داك؟؟؟!!!
هو بكون مفتكرم خائفين منو
أبدا
هم خائفين على الخرف

Quote: خلاص يا حلالدونا خليني أقول ( للكيشه ) البطالب بالحذف دا .. شهرتك ما بتبنيها بوستاتك وحدها بل أيضا ببوستات الآخرين حتى لو ناقدة أو ساخرة.

حسب نظرية طيب الذكر شيقوق ياملك : البوست لازم تَدُعْلو وتسهر فوقو

وكمان

Quote: طبالى و مفردها طبلية و الطبلية دى ذات قرص دائرى خشبى كبير يقوم فوق ارجل قصيرةلا يتعدّى طولها طول المسطرة ام تلاتين سنت متر مربع

آن لبكور أن يمد رجليه وينتعل الكسره .... غايتو عريبى الكمير جاتو مقشره

Quote: معاوية الزبير ان شاء الله خلاص اتعافيت وقدلتا

شكرا دكتورة وضاحة
أقدّر لك زيارتك الكريمة ومتابعتك الهاتفية الهميمة حتى من وراء البحار،
وكذلك توصيتك لطاقم جراحة العظام برعايتنا بمزيد من الاهتمام
دمتي ذخرًا للمُكَسّرين

----
بكور
وما يعلم جنود ربك إلا هو

المداخلة مكررة بسبب الاضطراب
انتو قايلين الثبات دا ساهل

غايتو يا معاوية، انضميت لجوقة التلّآجة
آل زيارتك الكريمة آل!!
ما بتخاف عذاب القبر؟
جيب صورة

هذا فراق بيني وبينك

يوم بالصدفة لاقانى فى موقف المواصلات
حسيت بيهو زعلان كاضم
فى داخل نفسى قلت الليلة الزول ده اصلو ما ابرّد ليهو بطن
و طوالى استعملت نظرية الهجوم خير وسيلة للدفاع
قلت ليه بصراحة ما دام مصر على حاجاتك ديك
انتا تانى ماب تنفع معاى و ما داير ذاتو اشوفك خلّىِ اتكلم معاك
طأطأ راسو الى الارضو هو يقول: حالتى الليلة نويت امشى معاك البيت
و اشيل و اخت فى اللوم و العتاب..
يا جاليلو عشان عارف ما عندى فى الدنيا دى اخو غيرك
تقوم تحقر بى جنس الحقارة دى
حنيت عليهو لامن دموعى جرت
دايرين الكضب ولّ الجنبو ؟!!!!!
كسر فينى ضلعة
قتلو مالك يا زول ؟؟؟ انا ذاتى حاسى بى نفس الشعور
اها قول كلامك
قال لى فلانة ديك
قلتّلو يا سلام عليها مالا ؟!!!
قالى الزولة دى بت ام بعلّو عديل كدى
و انا جنى و جن ناس بسم الله الرحمن الرحيم ديل
فدحين يا اخوى
يا انا يا هى
ضربتنى حيرة شديد خلاص
و بقيت آكل فى البارغروزنى ولّ الاسمو شنو داك
فى رجا اخوى ود المدير عشتن يحلّنى من الشبكة لبكة دى
ود المدير عليك ذات الاستنارة ما تبخل على بى شورتك

معاوية المدير أها المستنير لخاك وعجبني ليك

لكن النحدثك
علي الحلال أنا أمشي لجلالدونا دة ويضبح لي وناكل برتكان بكري سواء تاني يحذفوا ليه مداخلة أحلف على سيد البوست حرام إنه يحذفني أنا برضو وكان ما حذفني بحذف روحي براي
وهي الخوة شن طعمها وقتين تتفرج على صاحبك بتعامت مع زول تاني وكتاحتهم واصلة السماء وتقول والله انا ما صدقت علاقتي بالبتشاكل معاهو صاحبي دة اتصلحت!

ها زول علي الحلف انت خفت
املص نعلاتك وجلابيتك ديل وسل سكين الضراع وأبقى داخل مع صاحبك جقدو المستنير دة ومعاهو معاوية الزبير هوادة فوق البيعة

Quote: فى رجا اخوى ود المدير عشتن يحلّنى من الشبكة لبكة دى ود المدير عليك ذات الاستنارة ما تبخل على بى شورتك

شُوّف يا جلالدونا،
أولاً بالتبادي صديقي المستنير دا أنا شايفوا ماشي بخطوات إيمانية مستقيمة
نحو الحقيقة، وهاهو يُقر بعذاب القبر، لكن الشي المطلّع زيتي علاقتو التي
تكاد تكون موروثة لِشدّة ماهي وثيقة العُرى بود الزبير كيف تسقط وتجعله
يشك صرآحةً في مصداقية الرجل !. يأخي دا المفروض ود الزبير لو قالوا،
البارح إتغديت مع ود المدير بملآح خُدرّة بايتة ؤ حصلت صلآة المغرب في
بيتنا، يقولوا، صدقت والذي رفع السماء بِلآ عمد.

كامل مودتي.
مافي داعي أتمها...

Quote: شكرا دكتورة وضاحة أقدّر لك زيارتك الكريمة ومتابعتك الهاتفية الهميمة حتى من وراء البحار، وكذلك توصيتك لطاقم جراحة العظام برعايتنا بمزيد من الاهتمام دمتي ذخرًا للمُكَسّرين

العزيز ود الزبير
الف حمد لله على السلامة والعافية
دا واجب انا حاضرة فى اى وقت
اخوا عزيز وغالي
تحياتى لك ولى اسرتك الكريمة

كسرة بالريال القطرى :

اجش يا حمبرة البوم
حرقكك وووين
قال جيب الصورة

كااااااك

ههههههههههههههههههههههه

البوست دا ممتع جداً

😂😂😂😂

الشبح، أين تعلمتي هذه الألفاظ السوقية من شاكلة "حمبِرّة"؟

Quote: خلاص يا حلالدونا خليني أقول ( للكيشه ) البطالب بالحذف دا .. شهرتك ما بتبنيها بوستاتك وحدها بل أيضا ببوستات الآخرين حتى لو ناقدة أو ساخرة.

يا سلام عليك يا ملك
و كمان قوليهو البوست ده لا يعنيك لا من بعيد و لا من قريب
و ان تشابهت اسماء انما هى محض قصد ليس إلّا

مرحب بالغالى حمد الذى لبد

Quote: جلالدونا كيفك هاردلك ياخ تكالب عليك الأصدقاء قبل الأعداء الوش الأخد دا للضمان لو المدخل بتاعك اختلف المباراة دي كانت حتكون آخر مباراة لبكور ختاما من حق أي عضو إنو مداخلتو تظل موجودة بالبورد إلا إذا رأى صاحبه أنها تسيء وتؤثر على مسار البورد

اول بالتبادى ياخى انت مضمون و مبرشم كمان و من غير وشوش
تانى بالتبادى الاعداء و الاصدقاء دايرين يسوقو البوست لى حتّة هناى داك و العياز بالله
لأشياء فى نفوس يعاقيبهم و على رأسهم الزعموط ود المدير
قلنا ليهم يا اخوانا كلامكم ما صاح قالو عندهم ادّلة
خلّيتم و هم و ادلتهم فى خيالاتهم بعمهون
تالت بالتبادى حصل شفت ليك زول يلعب مباراةبراهو و يطلع مغلوب
اها ده ياهو هنايك ده
غابتو فات ود البشري و بقى يضقلل بى روحو

اهلين هانى

Quote: صباح الخير

صباحات خير و نور

Quote: صدقني المستويات متقاربة بتختلف طريقة التوصيل بس في ناس بدوك ليها هوم دليفري وفي ناس بجبروك تمشي المطعم

نقول شنو با حمد .... غايتو بكّور حقى ده فهمّتو القصة دى من زمان .. هسى ماشى زى الترتيب
غايتو الله يعينك فى الحتّة دى

معقولة دى !!!
من الصباح شغال فى الردود لامن نفسى قام!!!
انعل ابو الشهرة ذاتو ياااخ

يا جلالدونا اتا مع المستجير واللا ضدو واللا شنو ؟
اقرارك بانو البوست فيهو مداخلاتك كتيرة دا يعني
انو مزاعم المستجير بانو اسمو بجيب الشهرة صحيحة
وانت هنا بتأكد عليها ..

كتب المستجير :

Quote: الشبح، أين تعلمتي هذه الألفاظ السوقية من شاكلة "حمبِرّة"؟

شبح كيف اذا كان اتا عارف انها بنت وما بتعرف الألفاظ السوقية ..
يا زول هوي قول جلا ما تعذب الباندويث ساي .
..............

اتوا بكور دا منو ؟ هل هو شخصية حقيقية أم من نسج خيال الكاتب ؟

اشمعنا ود البشرى كنسك وما فتحت ليهو بوست؟!

طلحة، شفتك رفعت البوست، لكن وحات الله، ما قريتها
لكن قريت مداخلتك في بوست: "هذا بيان للناس"

يعنى يابكور بكور الكبير ما حذف البوست؟
بكور أختا بت عمى دى ,,

يا طلحة ياخى بتكلم عن شهرتى انا ما شهرة الهنايين التانين
ديلاك ما عندى بيهم شغلة و هو ذاتن ما مشهورين
بعدين الكُتّاب الكبار الزى حالى دى ... زى ما قالى اخونا صلاح جادات ....
دورهم فى الحياة دى يكتبو و بس
و التفسير و التأويل دى مهمة القارئ و كل حسب مقدراتو الذهنية

Quote: يا معاوبة الزبير، لو علاقتك بالزولة دي استمرت ودّية؛ أنا ح أقطع علاقتي بيك فشنو؟ اختار بين الشبح والملاك

طفولة مباللغة
حالة تحنن

والله، يا علي الفكي، وما طالبني حليفة،
من معاوية قال ليها:
" شكرا على الزيارة الكريمة"
بحاول أتذكر الزول السحب حليفتو داك منو، وما قادر اتذكر!!

الزهايمر حصل

Quote: والله، يا علي الفكي، وما طالبني حليفة، من معاوية قال ليها: " شكرا على الزيارة الكريمة" بحاول أتذكر الزول السحب حليفتو داك منو، وما قادر اتذكر!!

قلت لي خيرتو لازم يحاربه
يا ابوبكر اشكرك لقد صنعت يومي
انا بضحك من الظهر
اتذكرت ايام روضة ماما منى

بكور اتصلت عليهو المدام وهو في الشغل وقالت
(اولادك تعبانين تعال بسرعة وديهم المستشفي)
وهو راجع للبيت شاف لوحة استرشادية مكتوب عليها ( لاتسرع ابناءك في انتظارك)
اتصل عليها وقال ( الله ينعل نقتك دي الخلت الناس كلها تعرف مرض اولادي)


تحياتي يا جلجل ، بكور الهنا واحد تاني صاحبي، قلنا نسلم ونرجع بيه البوست لمجراه ..

المداخلة التي أضحكتم دي يا علي الفكي، سرها باتع
ومشاركتك في البوست دا سرها باتع
الواحد بقى يعرف كيف يحرك الناس

هسع البوست دا فتحتو أنا
ولمان علقت على الزيارة كنت دايرك تظهر
النصيحة ما كنت متذكرك منو بالظبط
لكن متذكر طيف محامي

التحية لكل الشباب الهنا بما فيكم بكور ذات نفسو
ومعليش يا شباب
شغال لى فى شو مع الما بعرف يمسح مداخلات داك
شو وِش لى وِش
و يا وِشّى يا وِشّو
و بجبكم صاد بعد ما اوشوشو كويس

Quote: المداخلة التي أضحكتم دي يا علي الفكي، سرها باتع ومشاركتك في البوست دا سرها باتع الواحد بقى يعرف كيف يحرك الناس هسع البوست دا فتحتو أنا ولمان علقت على الزيارة كنت دايرك تظهر النصيحة ما كنت متذكرك منو بالظبط لكن متذكر طيف محامي

ابوبكر عباس
مداخلتك الضحكتنا ما بتتخيط اصلاً
شملة ثلاثية وقدها رباعي
فما تتعب نفسك اقبله سيك
وحظ اوفر المرات الجايه

معليش يا شباب
حاجة مستعجلة جابتنى صاد
بكور المقصود بالتحية فى مداخلت الفوق دى
هو بكور بطل البوميات ما هناى داك
بخيكم راجع
ود البشرى شكلو بدا يدوخ و دى فرصة مابلقاها تانى

داير لي مدخل ..ما لاقي ..
في فرز عيشة 👇👇
المستنير via معاوية الزبير
جلالدوناvia معاوية المدير
وفي تقارب بين المستنير و ود المدير .
اتمنى في 2017 دي يكون في شكة وتوزيعة جديدة ..
احسن يا اخي انا غايتو عندي مشروع بتاع خصام مع واحد صاحبي 😃😃😃
الروتين ممل ..

يا فكي، لو دي قرايتك النهائية لمداخلتي؛ أنا بخليك
كنت متخيل جلادونا في آخر التصنيف،
لكن "حوا والدة"

هههههههههها
على الطيش
الف مبروك ياخ
غايتو الضحك علينا و الذنب عليكم

تضحك شنو يا جلالدونا ؟
المنك ما يضحك لإنو المستنير إستلم البوست واحتكر الآكشن وخلاك في الردود.

واحد ح يقول لي:
اشمعنا اتا ما طالبت دينا خالد تظهر حقيقتها؟
بقول ليهو:
شن غاب لغاب؟!
دينا لمان تظهر هنا زي نسمة، تُحي الجميع ببسمة
من مداخلة واحدة تترك زوادة بهجة اسبوع بالمنبر.

أما دي، فهي - إن صحّ ضمير المؤنث- شماشية تعود لسانها على الشتيمة والتخصص في الألفاظ السوقية،
ممكن نقتنع بكثرة مالها، الله في الحتّة دي زي ما بقول المؤمنين لا يشترط الحجى،
لكني اتراجع عن دفاعي القديم من كونها تمتهن الطب

آل حنبرّة آل!!!

يا بكور بقيت اشك في جعلنتك.

متابعين
وبس دا

Quote: إن صحّ ضمير المؤنث-

نعتبرو تصحيح لاحد المداخلات؟

الجعلنة هينة يا مولانا, الكلام الإستنارة!! انتهيت منّها يا بكّور و ضرر زي دا ما بنجبر بي ناس "جك الفول"
عايزين قصة يكون فيها اتحاد مدني ضد الهلال أقل شي و تكون حاضراها دينا و لما الكورة انتهت المهدي دمّع عين واحدة :)

Quote: عايزين قصة يكون فيها اتحاد مدني ضد الهلال أقل شي و تكون حاضراها دينا و لما الكورة انتهت المهدي دمّع عين واحدة :)

طيب انت فضلت فيها شنو؟؟؟؟

ما خلاص حكيتا

ههههههههههههههه

لا يا غالي انا بس عملت هايلايت للثيمات الرئيسة, الكلام على الحبكة تقرأ: الرصة :)

إذا كان مصدر شكك يا ملك، مقولة "رفقا بالقوارير"
أقول لك:
نحن لو أدينا المرأة حقوقها؛ ساويناها في الشكل، وما بعيد نجلدها في حفلات بطانا

اما إذا كان الشك مصدره مراجعتي لشيء أعطيته بخصوص المهنة، واشكلت عليك مقولة جدنا العباس:
"إنّا لا نعود في شيء أعطيناهو"
فإنني أقول لك مقولة المفكر الدنقلاوي العظيم:
"الثورة تراجع ولا تتراجع"

والأمر في الأول والأخير يا ملك، مكاواة غليظة
فوضاحة إن فقط اتصلت بمعاوية؛ أكرمنا نحن علي الفكي بقية العمر

لا يا بكور

حبيبنا ود المك قاصد يقولك مافي داعي دا حسب فهمي انا

Quote: كنت متخيل جلادونا في آخر التصنيف، لكن "حوا والدة"

جاء شايل ختم الاعلان الجاهز وطاخ
اعلن افلاسه
بالله فرقك من الجماعة اياهم شنو ؟
لكن شقي الحال يقع في القيد

جلال
لله درك يا اخ
البوست عمل تعرية وتصحر كشف كل الغطاء الاخضر
والهدام انتهى من الجزيرة اداها البحر
الناس قعدت في السهلة
والكتاحة ما قصرت تمت الناقصة طفت كل اللمبات
خلت الناس في ظلام دامس
مدد مدد يا شيخ جلالدونا

جلالدونا
تاني الطيش اشطر من الطيش صااح
عاوزك تشرح لي حمبره يعني شنو
ثم اني مبسوط وشمتان في ود المدير ما دخل التصنيف

حباب ود الزبير

Quote: غايتو يا جلال يا انت حساسيتك زايده يا انا جلدي تخينيفصل بينا ود المشرف بتوضيح مداخلاتو

حاشاك الجلد التخين يا معاوية... ما عارف من وين جانى احساسانو الصديق العزيز المشرف ركّب مكنة مستنير
لكن فى ذمّتك دى .. محاولة مجاراة طريقة كتابتو مش ناجحة %200
كدى عاين للكلمات دى دوح, فيحاءو, سوح , فما بال و استارة الاحباط
ياخى الطاؤوس ذاتو ح يجى يجارينى

Quote: المشهد الجميل والميلودرامي الاتكيفت منو لحد بعيد وصراحة المشهد دا ملىء بالاخيلة المتتابعة والمتنوعة بتاع خلو العتود ... واربطو بكور

ياخى المشهد ده انا خففت مستوى الدهشة لى مستواهو الادنى
بى سحب بقبقة اللمبة و كركبة الصحن و الموسيقى التصويرية المصاحبة
و من التخفيفات الحاصلة نظرة الاستغراب فى عينين العتود لامن كان بعاين لى بكور
وذلك حفاظاً على حياة الجمهور

ود الشيخ حبابك الف

Quote: السلام. يا جلالدونا اكان بقيت صح زميل خلوة ومدارس كتاتيب مع بكور ورينا بالضبط حكاية( بابكر )دي. ماتجي تقول لي عمر نملة وبتاع دي قيلت قبل كدى. انتهى

بعد ما اصّر يلبس طاقية البوست ده قلت اعمل شوية تعديلات قى اليوميات
بكور ح يخلّى التمريض و يرجع المدرسة
ويمتحن الشهادة
ويخش الجامعة كلية البيطرة
وحكاية الملاية الصفرا القانية
حكاية بابكر دى إلّا اشوف واحد من اصحابو يأكّدا لى
سألتو منّها نكرا حطب

يوميات بشارة
ده عنوان جانبى عشان العدل و المساواه و كده
بشارة ده كمان ميكانيكى بتاع عربات
اهلو جننوهو بى غرّس عرّس دى
قامو عرسوليهو عربية
بشارة رقد تحتا
___
نرجع لى موضوعنا

__

غايتو ياملكة جلادونا اخد ليك حقك تالت ومتلَّت
عمل فى بكور عملية نجار فى عود ماعملها.
بكور انا كنت متعاطف معاك بس وكت هبشت
بت عمى دى انت الجبتو لى رقبتك ,,
جلادونا إيدك والبركة ود المدير وود الزبير والملك
إن جو حجازين بباصِرُن ليك.

ياحبة
يوميات بشارة دي احسن تعمل ليها
بوست منفصل براهو
هل يستوي الذين يعلمون والذين لايعلمون

يا جلّي أهديك قصّة الزول الشاف الهلال الجماعة شكّروه شالته الهاشمية قال وأهوداك هلال تاني عسى ولعّل تقعلك الحكمة الفيها!
يا شيخ اتظارفت مرّة ومشت و الجماعة جاملوك فا ما تسوق فيها وتعيدها تاني
أو على الأقل جدّد و غيّر شوية هو أصلا انت ممل بدون تكرار فما بالك مع التكرار, قاتل عديل كدا :)

انت ما ترجع الفيس ابرك لك :)

Quote: والله، يا علي الفكي، وما طالبني حليفة، من معاوية قال ليها: " شكرا على الزيارة الكريمة" بحاول أتذكر الزول السحب حليفتو داك منو، وما قادر اتذكر!!

كِدي دا كُووووولو كوووووم واللقاء الدار بين وضاحة ؤ معاوية
الزبير كوووووم، يا بكوّر إنت رايك شِنو في كلآم معاوية الزبير
دا، هل صحيح واللآ معاوية الزبير كضاب ؟، يعني هل بتصدق
إنوا وضاحة دي ما شبح ؤ قابلت معاوية الزبير واللآ ما بتصدق.
أكان صدقت معناتا وضاحة ما شبح، وأكان ما صدقت معناتا
بتتهم معاوية الزبير صاحبك بالكذب.
مع كامل مودتي لمعاوية الزبير.

Quote: الله يسلمك يا لفضلابي .. يا ود المدير ما قلنا بلاش من حذف البوستات .. جلالدونا غلطان يقعد قدامنا هنا فارش جلابيو .. أي زول شليفلو غلط يكبو ليهو في حجرو.. بعد داك يا قام نفض جلابيتو ووقف نضيف .. أو خمموا غلطاتوا ؤ مرق بيهن.. ولّ كيف؟

يا ملك كلآمك دا إياهو البيعشر ؤ يلِد،
حذف مافي ؤ جلآلدونا دا لآزم يترشا رش الضب فوق الحيطة،
فإعتداؤه علي المستنير بائن بينونة قدر الليلة ؤ باكر...

معطيات الشوفة العندنا:
١/ حليفة علي الفكي المسحوبة
٢/ شكر معاوية الزبير للزيارة
شهادة أبو علوة بعد سحب الحليفة اصبحت مجروحة.
شكر معاوية الزبير فيهو دروب مخارجة وغير مباشر
مثلا:
ممكن يتلولو ويقول لينا:
جات لقتني نائم، ختت بوكيه الورد وعلبة شوكولاتة النسمة وكرت كتبت فيهو رسالة رقيقة
أو لقت الباب مكتوب فوقو يرجى عدم الازعاج، قامت بكششت الممرضة عشان تاخد بالها منو كويس، ورسلت معاها البوكيه والنسمة

المهم شهادة معاوية، ممكن ناخد منها الشيء الوحيد المأكد؛ صوت انثى عبر التلفون
فير كدا ما اضاف هللة

يا ود المدير، شكلتنا في محلها

Quote: المهم شهادة معاوية، ممكن ناخد منها الشيء الوحيد المأكد؛ صوت انثى عبر التلفون

الجمله دى حفزتنى أدخل وسط الفطاحله ديل وربنا يستر ماتجينى عفصه منهم
بالنسبه لى وضاحه ماشبح وسمعت صوتها بأضانى دى
وبعد الإتصال جات عقبت على الموضوع فى المنبر ده(عشان مايجى واحد يقول لى أمكن ماهى)
والله على ما أقول شهيد

بقششت

الشبح بكتب وبتكلم
زمان كنا بنسمع اصوات مت شدرة اللالوب جنب بيوت الصناعية،
ومرات بجدعوا باللالوب
لكن ما شفناهم

Quote: الشبح بكتب وبتكلم

شبح شنو يا زول قول بسم الله!!!!
وين الأشباح ديل؟؟؟

______________
يخلق من الشبح اربعين

سلامات يا جلالدوكم...

Quote: في الحالة دي الواحد يكون دخل في ذلك المكان من الوزة ..

نفسها دى ولا واحدة تانية

أفرز يا زول أفرز,,,

بكور وينو؟

ههههها
مرحباب ود الطيّب
ياها ذاتا بس الدكتور لِعِبا بى شفافية
حتى اسأل جِدّنا عثمان ود عوووضة

سبحان في هذا المنبر أزعم اني شاهدتها وجها لوجه
دينا ووضاحة.. ولو ابوبكر ولا ابكر بتاع اليوميات اقدر عايز الفيديو ماعليه الا يفتح سطر جديد نقطة.
وحسب رغبة بعض الجمهور (ود البشرى وصحبه) نحكي يوميات بكور عن مباراة الهلال الأخيرة
قالو ابكر مشي لدكتور عيون قال ليهو عيني فيها وجع الدكتور اداهو قطره وقال ليهو كل أسبوع نقطه قال ليهو أنت دكتور ولا مدرب الهلال .
ياجلجل ماترجع البوست لمجراه ياخي

Quote: يا ود المدير، شكلتنا في محلها

يأخ إنت مالك زول كعب كدي،
البارِح القريبة دي ما اصالحنا !...

يا ميتين مرحب حبيبنا ود التاج
ارجّعوا كيف و السيد الدكتور لواء اركان منبر
حايم فى البوست اكتر منّى
المهم
عديت لى سنتين ما نزلت البلد
وصلتى كده سلمت على ناس البيت و مشيت على بيت صاحبى بكور
لا قتنى حبوبتو واقفة جم زريبة البهايم
اها مع السلام و حنان الاستقبال بكور جا مارق من اوضتو
الساعة الاشوف ليك التيس ناطّى من الزريبة و جرى على بكور
و بكور دق خلف و جرى على الاوضة و قفل الباب وراهو
و التيس يشيل و ينطح فى الباب و بى غِل كمان
قالتلى :عرفت ده ؟
قتلها :ما عرفتو
قالتلى :ده ما العتود الكان فاتح خشمو داك اليوم و بعاين لى بكور عين ما ياها
عقبت عليها و انا اهز فى راسى :اهاااا ما شاء الله بقى تيس ليهو ضقل
طيّب مالو مع بكور
قالتلى : من ما الله تيّسو دى حالتو مع بكور .. محرّم عليهو دخول الزريبة
قتلها : مالو و قال خبرو شنو
قالتلى : شن خبّرنى بيهو ... يمكن قايلو تيس زيّو

الله يريحك يا بالجل .. اليومية الاخيرة دي اعادت الامور لنصابها ، خاصة بعد يومية الشبح والميكانيكي الرقد تحت الترلة داك ..
المهم بكور صاحبي ضاق نطحة تيس السرة اب قرون داك ، ومن يومها بقي يخاف من التيوس ويبعد من دربها ..
أها يوم (قرقنا) عليهو وقلنا ليهو ماترجل يا اخي، الراجل البخاف من التيس عشوشة ما بتعرسو ...
الراجل انحرق وقام شال سيف جدي الكنقار ، طلع الشارع خمسة دقايق .. وجانا سيفو يقطر دم ..
- سويت شنو يابكور ؟ قال قتلت لي تيسا غليد.
- قتلتو كيف؟ قال جيتو براااحة (أدبا) ، وكع ضربت ليك في كراعو اليمين .. وطفرت لي ورا؟
- أها وتاني؟ جيتو تاني قريب وضربت كراعو التانية لامن انكسر عضمها
- اها وبعدين ؟ رجعت لي ورا وجتيو جاري المرة دي، وكع ضربت ضنبو لامن الدم طار وملا السيف وجيتكم جاري..
- طيب يا بكور مالك ما قطعت رقبتو؟
- والله كنت داير اقطعها لكن لقيتها مقطوعة.


..
بالمناسبة عندي رواية قديمة اسمها يوميات أبكر ، لو بتنفع أكبها ليك في البوست ده قول ما تتحرج

اوووو حبيبنا احمد
ياخى اعذرنى فى الفط فى الرد .. اها دى واحدة من مشاكل الشهرة

Quote: معاوية المدير أها المستنير لخاك وعجبني ليك لكن النحدثك علي الحلال أنا أمشي لجلالدونا دة ويضبح لي وناكل برتكان بكري سواء تاني يحذفوا ليه مداخلة أحلف على سيد البوس حرام إنه يحذفني أنا برضو وكان ما حذفني بحذف روحي براي وهي الخوة شن طعمها وقتين تتفرج على صاحبك بتعامت مع زول تاني وكتاحتهم واصلة السماء وتقول والله انا ما صدقت علاقتي بالبتشاكل معاهو صاحبي دة اتصلحت! ها زول علي الحلف انت خفت املص نعلاتك وجلابيتك ديل وسل سكين الضراع وأبقى داخل مع صاحبك جقدو المستنير دة ومعاهو معاوية الزبير هوادة فوق البيعة

يا حليلك يا احمد .... منّو العوض و عليهو العوض
تصدّق !!!
ود المدير طلع غواصة ... و نووية كمان
مرّة بكور سمعا فى نشرة الاخبار بتاعت تلاتة
جانى طاير و سعلنى منها
قالّى : نووية دى يعنى شنو
قتلو سمعتها وين
قالّى :فى المدياع
ضربت اخماس فى اسداس و غلبنى اللقولو ليهو
قمت خشيت ليهو بالغواصة
و قتلو : الغواصة دى حاجة بتعوم تحت الموية
قالّى خلّها دى عارفا ... انا فى نووية دى
قتلو : شفت نوانا الليل التمر ده
قالى :كيف ما شفتو
قتلو :بس ياهو ذاتو
مرقتو من عندى شال خرتايتو بدا يلقّط فى حصا التمر
اهل الحلة سألوهو يا زول خبرك شنو
قالهم : بدور اسويلى غواصة نووية

Quote: بالمناسبة عندي رواية قديمة اسمها يوميات أبكر

أكيد بتكون رواية عنصرية
في طفولتي المستمرّة لحدي الآن، كنت زول كاواي، أندادي كانوا بحاولوا ينالوا مني بتسميتي أبكر الفلاتي ولزمن طويل كان لقبي الكزو وبدلعوها كزونا.
فشنو يا عمر التاج، يا بجّة، لو نزلت روايتك؛ بسوقها ليك لدرب عنصرية لا وعي الجلابة

المداخلة دي بمثابة بخرة ليك
وأتحداك تنزلها يا عنصري

هنضبة ذي الهنضبة أمها بت عم أبوها ..
اشمعنى ما هنضبت جلالو دا ..
أوع تكون حاريلك حنيذ؟

حبيبنا أبوبكر ( بالهمزة علي الألف) .. تحية لك يامستنير
مالي أراك يا أشعب تحكم علي شئ غائب ؟
وكيف حدثتك نفسك بأن روايتي عنصرية قبل أن انشرها ،
أوع تكون لمبة الاستنارة عندك طفت؟

يا اخي أنا اسم ابوبكر وابكر وبابكر عندي سيان لافرق بينهم ،
حتي اخوي اسمه ابوبكر بقول ليه يا شيخ بكري ويا خليفة أبكر عادي
ملاحظتي التي كتبتها لك من قبل ، أن اسمك اسم صحابة وخلفاء وشيوخ، وبث.
وبعدين تتحداني ليه يا أخ؟ البوست حق جلالدونا وهو صاحب الحق في القبول والرفض
وأنا روايتي دي مشكلتها فيها سبعمائة يومية ، خايف أكان نزلتها كل الابوبكرات يجرو يخلو المنبر
عشان كده استشرت صاحب البوست وصاحب المنبر (عشان اسمه ابوبكر برضه)، الراجل ماعايزين نقفل منبره ..
وبعدين زي ما اتحديتني انا بتحداك برضه ..
أكيد بتكون رواية عنصرية في طفولتي المستمرّة لحدي الآن، كنت زول كاواي، أندادي كانوا بحاولوا ينالوا مني بتسميتي أبكر الفلاتي ولزمن طويل كان لقبي الكزو وبدلعوها كزونا. فشنو يا عمر التاج، يا بجّة، لو نزلت روايتك؛ بسوقها ليك لدرب عنصرية لا وعي الجلابة المداخلة دي بمثابة بخرة ليك وأتحداك تنزلها يا عنصري المصدر : ◘يوميات بكّور◘◘يوميات بكّور◘]
أنك تثبت إني عنصري .
والمصدر ده يا (ود أبوبكر) لموا عليك ، لا أنا جبتو ولا بمسحو ولا عايزو زاتو..

جلالدونا
اسم بكور دا مدعي ولا شنو
كل الاسمو بكور بتاع كفاوي وعدو نفسو
يا اخ عندنا بكور الخالق الناظر من صاحبك دا يا جلال
يوم لقيتو ليك مكتح ويتردق بالواطه و يكورك
انا تاني ما بجي
انا الوداني شنو
الشافه منو
وانا شفت الشافه
قربته منو لامن اتعوذت من حالتو وخلقتو الفيها
وشو يلعن قفاهو والشعر كل واحده واقفه براها تقول راسو مغنطيس
المهم بعد اتعوذت وبسملته سالتو يا زول مالك
قال لي الكتاحه طفت لمباتي وحرقت انواري
قلت ليهو الكتاحة لقيته وين
قال لي جابته لي شلاقتي
ضحكت وقلت ليهو كويس عرفت نفسك شليق
مشيت منو وجيت اليوم التاني لقيتو في ذات الحالة يهضرب ويتردق
ويغني في ما شفتوها يا خلاني

بكور بتاعنا اداري في فريق الجاموس
والفريق دا تعبان وملطشة لي كل الفرق
يوم لاعب مع فريق النجمه البعيده
النتيجة كالعادة انتهت لصالح فريق النجمة البعيدة 6 صفر
الحكم كان ابو يزيد الرباطابي
وصاحبنا بداء يكورك في الاستاد التحكيم فاشل
ابو يزيد بايعه ابو يزيد ما عندو ذمة
قلت ليهو يا اخ ابو يزيد دا مش صاحبك
قال لي ولا صاحبي ولا بعرفو الصحبه من اليوم فرتقت معاهو
يقيف مع فريق النجمه البعيده ويبيع الكورة عشان يهزم الجاموس
قلت ليهو بيع شنو النتيجة 6 صفر يعني جاموسك دا مريض ودوهو البيطري
عاين كده وقال لي فكرة لازم اقراء بيطرة واتخصص بعارين
استغربت
ولسه ما عارف علاقة الجاموس بالبعارين شنو لكن شطحات بكور وشلاقتو

المستجير عليك دينك قوم لف
دا شنو المعاط دا ياخ ...
.............................
يا جماعة بكور دا شخصية حقيقية واللا من نسج الخيال ؟

علووووووووووووووووى يا قلب
بالله اديه بالحتة الفيها الحديدة
جوك جوك تشكرال

الست وضاحة
أسمحي لي أشكرك بحرارة عالية ياخ
سيف الجامعة زول بديع بحق ربنا يخليهو

Quote: الست وضاحة أسمحي لي أشكرك بحرارة عالية ياخ سيف الجامعة زول بديع بحق ربنا يخليهو

طلحة يا جميل مشتاقين
ووو وينك من ديك وكيييييك
عساك عافية
سيف رائع بالجد وصوتوا جميل والاجمل حروف الاغنية
البتوصف جمال امنة السودانية بت القبائل الاصيلة
جمال طبيعى بدون فاونديش وزيف




كسرة بالريال القطرى : الاغنية فيها رقصة كمان تهبل تهبل

تحيات وتعظيم سلام ليك يامك
واسمح لي في البداية أن اجرب الاقتباس بالاحمر في تعليقك السابق
هنضبة ذي الهنضبة أمها بت عم أبوها ..
كويس انها نجحت لانه المرة الفاتت أكواد أبكر التاني الجديدة لخبطت الاقتباس مع الرد ، والصحيح ان التحدي يقرأ بهذه الطريقة ..

Quote: وبعدين زي ما اتحديتني انا بتحداك برضه: أكيد بتكون رواية عنصرية في طفولتي المستمرّة لحدي الآن، كنت زول كاواي، أندادي كانوا بحاولوا ينالوا مني بتسميتي أبكر الفلاتي ولزمن طويل كان لقبي الكزو وبدلعوها كزونا. فشنو يا عمر التاج، يا بجّة، لو نزلت روايتك؛ بسوقها ليك لدرب عنصرية لا وعي الجلابة المداخلة دي بمثابة بخرة ليك وأتحداك تنزلها يا عنصري أنك تثبت إني عنصري المصدر

والمايك الان عند الأخ (ابوبكر الاخر ) ليثبت عنصريتي من يومياتي التي سابثها في المستقبل عن أبكر ..
اسع يامك في زمتك (أبكر) دي فيها عنصرية ، خليها العنصرية فيها أي تمييز ديني أو عرقي أو مجتمعي ،
خليه التمييز ، فيها أي اساءة أو نبز ، يعني كعبة في رأيك كلمة أبكر ولا بجة؟
أسع انا لو قلت لك يا (أمحمد) بضم الألف الفيهو الهمزة فيها حاجة ،
أمي الله يحفظها بتنادي خالي محمد بكل ريدة الدنيا بقولها (يا أمحمد أخوي) ، وعادي برد عليها ( لبيك يا خيتي)
ما زي ناس كده بتحسسوا من أبطال الروايات وبفضحوا أنفسهم بحكاية ماضيهم وطفولتهم الغير بريئة
ويقولوليك فلاتي وعبد الزمار .. يا اخ الفلاتي مالو ؟ وبكور مالها ؟
يعني خلاص الحكومة لغت البكور نقوم نحن نتحسس من اسم بكور
ولا دي العنصرية المضادة البقولوا عليها؟

تقول شنو يا التاج ..
حالتو قرشي..
لكين بعد خاتم اللؤلؤ دا ما ظنيتو يتلولو .

المداخلة دى ماعارف الختاها فوق شنو؟
انا كنت قايل جلادون ااستكا جيت جارى شايل عكَّازى ,, ربنا مرققك.
المداخلة دى تشوين لبت عمى ,, اللاَّمتنى قبل كدى وتحذير لبكُّور.
***********
غايتو ياملكة جلادونا اخد ليك حقك تالت ومتلَّت عمل فى بكور عملية نجار فى عود ماعملها. ب
كور انا كنت متعاطف معاك بس وكت هبشت بت عمى دى انت الجبتو لى رقبتك ,,
جلادونا إيدك والبركة ود المدير وود الزبير والملك إن جو حجازين بباصِرُن ليك.

يا أخينا، سيبنا من اللولوة البدون خاتم دي
اسم أبوبكر وأبكر عندك سيان ما سيان، ما بعرف
التحدي معاك تنزل الرواية
رواية شنو كمان؟!
يتكون حجوة ساكت
نزل الحجوة وبعدين نتفاهم

إتّا يا طلحة ما لك؟
أهو البوست أداك فرصة تعبر عن شعورك وتهدي

ناس الجزيرة بحبوا ليك برنامج ما يطلبه المستمعون بتاع إذاعة أم درمان حب شديد،

اليوم كلو تلقاهم معلقين ليك مع اسراء زين العابدين
ممكن أهدي؟
أهدي يا زول، ما أصلك متصل عشان تهدي من أحببت

شنو يا جماعة التكالب دا!!!

شايفكم اصطفيتو ون سايد .. مع انو بكور ادها وادود لكن مهمن كان دا صاحبي

انا كنت متفرج ومستمتع وبضحك لكن الظاهر بعد دا اجيب عكازي المضبب واجيكم .. الله

بس يا بكور وحات خوتنا الاسفيرية الوثيقة دي رجاءً ابعد من وضاحة

ياخ فجر المشارق دي ياها ايقونة هذا المكان وفاكهته بالله عليك مافي داعي تخت علاقتنا في حتة ضيقة

اسع انت براك ما ملاحظ ود الزبير اختفى من البوست

بعدين يا ابكر ياخ لقب الكزو دا لو شافو ود الصايم وحاة طلحتوف دا الا يقولك اصل اللقب الكوز انت قلبت الواو والزاي

يا ابو الجل

شنو ياخ... رشة ود البشرى دي ما عايز تردها

ما تخليهو ياخ الزول دا مدوخكم طواااالي



ثم تحيات لكم واشواقي لود المدير

المنتصر بكرى
انتصار نضيف دون منازع
احييك وحياة الخوة

النتيجة 5/ لي مافيش

تكالبوا عليه تكالب الاكلة على القصعة

قريبا اديكن حكاية بكور بتاعنا وسندوك البرنجي

يا غالي وفاضلابي،
ما عندي مانع أخليها ونضمكم للستة الشرف بتاعت ناس معاوية الزبير، علي الفكي وطلحة
بس
هي تعتذر لي عن حمبرة

أنا أصلا فاتح ليها ورافع القزاز من زمان

Quote: ناس الجزيرة بحبوا ليك برنامج ما يطلبه المستمعون بتاع إذاعة أم درمان حب شديد،

سبحان الله
نفس المحاولات المستميتة للتظارف السمج ..
بديت أشك انك فعلا اللخت بتاعت المسواك ..

..............
يا جماعة بكور دا شخصية حقيقية واللا محض خيال الكاتب ؟

في ناس ررءوسها خفيفة وتصدق أي حاجة.
وأكيد البعض صدق الصورة الفوق حتى انسكبت ريالته فوق جلابيته ههههه

الصورة ملطوشة من بروفايل واحدة جزائرية في التويتر:

البوست دة فيهو معركة شرسة من اقوى المعارك في تاريخ البورد.
أتمنى ان تتوقف كافة الأطراف هنا.
من خلال خبرتي الطويلة هذا السجال الرائع سيتحول بعد قليل إلى مناوشات وعداوات.
وربما ابتعاد اطراف نهائيا من المنبر.

لا شيء يستحق. ويكفي أن كل طرف أبان عن نفسه وقناعاتع وافكاره
وليس ملزما بأي حال من الاحوال أن نغير قناعات الناس وافكارهم ونظرتهم للحياة خاصة إذا كانا لا تؤذي الاخرين.

مناشدة اتمني تجد آذان صاغية.
والسلام

بكري مشكلته الأولى هي نفس مشكله المريخ، عنده روح قتالية عالية ولكن تنقصه اللياقة والمهارة
بذكرني العوض ود خالتي ، ولد شليق وجنو سكر ، ومستعد يشاكل ناس الحلة كلهم
ورغم كده كل يوم بجي البيت مدقوق ودمه سايل ..
ومشكلة بكري التانية انه مشتنير ( ثلاثة نقاط علي السين)،
يعني بتكلم ساكت وكان طار مابقدر يثبت كلامه عن عنصريتي
نعود إل بكور في بعض طرائفه اليومية ( من يوميات) .
حكى لي يوم أنه عنده أرق وما بقدر ينوم ..
قلت ليهو بسيطة ، تقوم وانت راقد في السرير تعد من واحد لحدي 100وحاتلقى نفسك نمت ..
بكره جاني عيونه حمر من السهر ، قلت ليه شكلك ما اشتغلت بي نصيحتي .. قال لي:
- كل مرة أبدأ أعد ألقي نفسي نعست قبل احصل مية ،
أقوم أغسل وشي وأبدأ من جديد لامن الشمس شرقت مانمت.
ويوم سمعته بحنك في عشوشة :
-تعرفي يا عشة أنا ناوي أبني ليك عمارة تلاتة أدوار.
- يعني بتبني لي بيتي عمدان يا بكور؟
- لا العمدان بعملن في الطابق التالت بس؟
- وليه ماتخليها من تحت عمدان
- يعني عايزاني أرمي قروشي في الواطة ؟

أها بعد يومين جاني و قال لي دايرك تمشي معاي تخطب لي نفيسة بت كرار
قلت ليهو لكن انت ما كنت بتحب عشوشة اختها ، قال لي :
- ماكدة بقدر أشوف عشوشة كل يوم .

وقبل الخطوبة بي يوم بكور كان شادي عربية تعبانة كدة بتاعة واحد صحبه
مع المغرب كده قال لي: ارح نسوق العربية نبيتها في قلعة شنان (قلعة قديمة مهجورة)
قلت ليه؟ قال لي :
-عايز أقوم الصباح ألقاها بقت عربية شبح .. كع انا اخوك يالشبح
وحاك اللولوة البي خاتم دي


..
ملحوظة : تلك بعض الأحاجي قلنا نسهم بها في موضوع البوست
أما الرواية فهي جاهزة للبث وفي انتظار اذن ابو الجل،
ولا أقولك ، أفتح انت بوست سري، وليك علي أنزلها ليك كاملة ، وبدون عنصرية كمان.

بكري مشكلته الأولى هي نفس مشكله المريخ
ياعمر بكرينا الفايت الناس مسافة ده مابحب تضرب ليهو مثل بفرق العاصمة من شدة تعصبه لاندية مدني وناس مدني
-
ماتضغطوا على صاحبي ده يقوم يفر من البورض الخالي من المستنيرين .

خخخخخخخ
قوية يا عمر التاج ..شكرا لقد صنعت لحظتنا ..

يا حيدر حسن ميرغني شوق عظيم.. غاتس وين انت ؟
............................

نفسي أعرف بكور دا منو ؟؟

Quote: البوست دة فيهو معركة شرسة من اقوى المعارك في تاريخ البورد. أتمنى ان تتوقف كافة الأطراف هنا. من خلال خبرتي الطويلة هذا السجال الرائع سيتحول بعد قليل إلى مناوشات وعداوات. وربما ابتعاد اطراف نهائيا من المنبر. لا شيء يستحق. ويكفي أن كل طرف أبان عن نفسه وقناعاتع وافكاره وليس ملزما بأي حال من الاحوال أن نغير قناعات الناس وافكارهم ونظرتهم للحياة خاصة إذا كانا لا تؤذي الاخرين. مناشدة اتمني تجد آذان صاغية. والسلام

سلام ياحبيب
ياخ بوست رائع جدا وفيهو إبداع غير طبيعى وياليت لو تكون خلافاتنا وارائنا مغلفه بالطريقه دى بدل المهاترات والسب المباشر والجارح
معظم الادويه مرة الطعم ولاتستساغ ولكن يتم تغليفها بمواد محلاة حتى يسهل بلعها

سلام يا جلالدونا وبكوره وصحبه

كل يوم أحوم حول البوست دا من بره أصل الباب أرجع أقول خليه يسخن شوية

ويكفي أنه جمع كل الأخوة الحيويين حاليا بالمنبر

لكنه أصبح يشبه ثمرة اللالوب مرة تجيب طعم حلو ومرة مر

لكن كل ما مرت تحلو

عندي فكرة في شكل نصيحة أكثر من كونها توصية

لأخونا المستنير ابوبكر عباس

خروجه من بوستاته المفتوحة والدخول في بوستات الآخرين كان خصما عليه وعلى المتعة في المنبر

هو كما ذكر عن نفسه يحب المكاواة وإغاظة الآخرين ورفع ضغطتهم

لكن حتى هذه لها ناسها ولهم اسلوبهم

تنمى لو يعود للمنبر عمر الفاروق واساسي وعلاء تمبس وأبو حسين وود الموج

هم ملوك الأكشن مافي شك ..

نتنمى لو يعود المستنير لبوستاته ويضيف أخر

يا عمر التاج كان تثبت لينا على (أبكر) وتخوضوا نقاش العنصرية وما أدراك ما العنصرية
لكن انت نطيت من ابكر ومسكت في بكور اسم الدلع اللذيذ الما فيه مشكلة

بس عارف المعضلة الكبرى وين!
إني ما عارف رد الفعل المفترض على بتاعاتك الفوق ديل شنو !
يعني مفترض بعد ما قريتهم أضحك وكدة ؟

مرحبا احمد عمر (نيابة عن جلالدونا طبعا)
بكور ده بطل البوست يا احمد ، حسب رواية صاحب البوست طبعا
ابكر ده موضوع بوست اخر لم يفتح ، ولم يرد في البوست غير اشارة عابرة اليه
أبوبكر هو أول من أدخل العنصرية للبوست، ويحاول جاهدا لاثباتها
بكري هو صاحب المنبر وابوه اسمه ابوبكر برضه )بدون همزة علي الالف)

يعني مفترض بعد ما قريتهم أضحك وكدة ؟
الفي البوست دي كلها مجرد يوميات يا أحمد ،
من الله خلقك سمعت بيوميات بتضحك؟
اللهم إلا تكون برضك مستنير


..
وعشان ما ينط فيني واحد تاني يقول لي ضحكني ولا كلكني
اليوميات دي كلها ملطوشة ، وأبكر ده صاحب واحد تاني خارج المنبر.
والتحية ليكم اخوتي طلحة وود ميرغني وكل من قرأ ففهم

يا تاج أنت قول كايسلك شهره ساي ..
هسه ياتو خريف بوستات جلالالدونا ضربت الأربعة تالاف؟

و تانى حاصية الاقتباس قامت وفقت
الشكية لى اب إيدن قوية
ده كلّو من الغواصة ود المدير
_____
و ين يا فاضلابى .. بصراحة ما شايف شغلك ,, تعال شوف مولانا الملك و عمايلو
ماسك فى الحساب و يشيل و يرمى فى حجرى لامن وِصلن اربعة
اول ما جات الضربات الفنية القاضية و حياتك جلّى الحساب و مسك فى حاجات تانية
هسى شوف الضربة الفنية القاضية بتاعت وضاحة كلاى دى
يمين الله شدّة ما قوية لامن ود الزبير ذاتو اتّرتع و غلبو الثبات
بتاعت على الطيش ما اشتغل بيها الشغلة و قام سوّاها لينا قوارير و جعلنة
اما بتاعت تاجو الماشا عليهو تقدل مولانا قال فيها لؤلؤ
___
بالمناسبة دى يا تاجو ... البوست ده انا فاتحو سبيل فما محتاج لى إذن منّى
لُخ و اعجن على كيفيك و مرحب بى بكّورك فى اى بوست و مكان و زمان
____
غايتو يا ود اب سن بالغتا فوكا دى
كمان بقيت ماب تعرف تفرز الطربقة من الرش
ياخى من قولة تيت شال كورتو و جرى على سيد الاستاد عشان يلغى مبارة
هو اصلاّ ما طرف فيها
داير يشيل الكورة و يطلع زى بتاعت ريكو الهلالابى قدام المريخ ديك
.... هسّى الزول الفى بالى يجى ناطّى , لكن لو جا بأسّتكو ليكم استيكة الجن
اصلو بينى و بينو تار بايت .... ما علينا نرجع لى موضوعنا
قلت لى غالب كم و غالب منو
كدى فى اللّول اسعلو .. هو لاعب ضد منو ؟
____
طلحتوف .. كيفك يا عريبى عرب الجزيرة
ياخى لو سمحت قلل لينا من شغل الانتينوف القاتل ده
اشتغل معانا بى شغل الدغدغة داك .. طبّيز فى العيون و تشتشة فى الملاين
____
ود الشيخ حبابك ألِف ياخ
يا ريت لو تلحقنا بيها سريع
عندى اقتراح ليك ياخ ... بدل سندوك البرنجى خلّيها سندوك بحّارى
و يا ريت لو بى كرتونتو كمان
____
شفت حركات مولانا يا فاضلابى
قال من بتين جاليلو دقش الاربع تالاف مشاهدة
ياخى عايزك ترفع لى عليهو قضية فى محكمة عطبرة الجزئية
ايييييوة بس عطبرة ... عشان الجماهير تفلّعو بالبيض
يا مولانا شكلك كده لامن فتحت بوست النقنتود برضك كنت كايس الشهرة
السطر الاخير ده براهو 7 فى حجرك
يلّا ابقى مارق
يعنى شنو محكمة جزئية يا مولانا ... الوصف القانونى ...

كلامك صاح يا درديري بخصوص الفائدة،
لكن كمان الكتابة في بوستات الأوباش (تشمل المذكر والمؤنث) والونسة معاهم، فيها متعة فلكلورية كبيرة بتزيد المخزون الخيالي للأدباء.

Quote: هسى شوف الضربة الفنية القاضية بتاعت وضاحة كلاى دى

وحاتك ناقشا إلا مبسوط منها ..
ياخي ما مكن ود البشرى كمين سنة سارح بينا بدون رفيق..
انت منو القال قراية الإضان ؟ أطنو كوستاوي المطموس.

عسللّى المنبر وضاحة كلاى
كيفك يا زينة الصبايا

Quote: جلال سلام واشتياق وكده انت لسة مع حنبرة ما قلنا ما تعملوا للحنابر قنابر كان تسمى البوست يوميات حنبرة .‏..

يمين الله الشى دى ما لكمة نصاح
دى ام دلدوم عديل كدى
يا مولانا الملك يا ريت تجى تحصر اينا الخساير
مع شوية من ملاحيظك
وياريت كمان تستصحب معاك الطربقة و لفة الراس
الحاصلة على اللاعب الكحيان ده

مكرر

لماذا تسرق "الست وضاحة" "العسللّي" صورة اصابعين الناس من صفحات وشوشم للإشارة لتحت؟
أرجو من "الست" تصوير أصابعها للمقارنة، لأنو دا انتحال أصابع!
بالمناسبة، أنا برضو بحب سيف الجامعة

سبب التعديل: سحب الحليفة بتاعت حقيقة الاصابع الراسما القلب

قالت ولّ قال ليهو:
"طلحة يا جميل"
كدي عليك الله، نزل لينا صورة نشوفك فعلا حلو

بوست تحفة، لمّ لينا عرب الجزيرة مع اشباح، واحد جديد قال عندو رواية اسمها يوميات أبكر كتبها زمان!!
أي زول يكتب ليهو مداخلة مداخلتين، يقول ليك عندي رواية!!

صورة أوضح




نحسن الظن بالناس ونفترض انه الامازيغية هي اللاطشة الصورة

سلام للجميع
يا حليل كيكي, ماتشات زي دي كنّا بنزبط ليها أجدع ستديو تحليلي نتناول فيه اللقطات المميزة ونناقش الاستراتيجيّات المختلفة ونقاط ضعف وقوّة المتنافسين لأجل المحافظة على نظافة و متعة الآكشن
فا شنو.. شكلي ح احلّل براي في الاستديو دا.

حبيبنا دكتور أمبدة كيفك ياخي

Quote: البوست دة فيهو معركة شرسة من اقوى المعارك في تاريخ البورد. أتمنى ان تتوقف كافة الأطراف هنا. من خلال خبرتي الطويلة هذا السجال الرائع سيتحول بعد قليل إلى مناوشات وعداوات. وربما ابتعاد اطراف نهائيا من المنبر.

يا دكتور ما للدرجة دي, شكلك ما حضرت المعارك التاريخية هنا على سبيل المثال الدرويشة و بوكرامي و صور أبكرشولا و "المليور" دولار الأكلوها المنظمات و الصداع العملو صلاح بندر و غيرها عشان تصف التيلي ماتش دا بأقوى المعارك!!
ياخي دا لعب بلّي عديل كدا بالمقارنة, اي نعم في عفّيص تحت تحت كدا وبعض الضربات توجه تحت الحزام لكن أغلبه مجلّي وبدون يسجّل نقاط.
لكن عموما اللعب ودّي ونضيف إلى حد ما, حتى الشايفه تحت الحزام أغلبه شراك خدّاعية ودردقة ما عارف ليه بقع فيها اغلب المتنافسين مع إنّها واضحة زي شمس يونيو.
فما تشيل هم لن يحدث ما تخاف منه ولا عداوات هناك ولا ابتعاد نهائي سيحدث

من الاهمية ان يعرف الجميع ان اقل مستنير عارف حركة الاصابع دى شنو
بصرف النظر عن كون انها ملطوشة او ما ملطوشة
فال تحت قال
____
هسى يا ود الخدر جايى نفسك فاتحة عشان تفتحلك استوديو و تحليلى كمان
انتا قايل الملشور ده هامل و ما عندو سيد
ح تتأستك يعنى ح تتأستك و لو تأرقنت مداخلاتك
أى وساطات و تحنيس و اعتذرات ماب تقسّم معاى
يا اخوانّا كفارة الحليفة فى المنبر ده شنو

Quote: ود الشيخ حبابك ألِف ياخ يا ريت لو تلحقنا بيها سريع عندى اقتراح ليك ياخ ... بدل سندوك البرنجى خلّيها سندوك بحّارى و يا ريت لو بى كرتونتو كمان

حاضر

اهااا

صاحبنا بكور واسمع الدلع "بنيش الفاخوري"
اشترى علبة "البحاري" جديدة لنج وكنا ماشين على الحفلة في الحلة القدام . . المواصلات طبعا حمير ( اكرم الله القارئيين).
يازول وصلنا الحلة القدام وربطنا حميرنا في دومة بت حاج النافع(ود المدير ماكان معانا للعلم).
يازول سالنا من الفنان منو؟ قالوا لينا والله الجماعة ديل ماعندهم حفلة.
نط بكور :" طيب في رقيص عروس؟"
اجابه احدهم :" والله برضو مافي"

بكور اللهو بنيش الفاخوري كشح "دين"

وقل ليهم :" طيب علبة البحاري دي نشربها ليكن وين"؟

اتفق مع بشرى إنّو الموضوع لا يتعدى كونو ماتش تلفزيوني.

احسب إنّو أبوسن حكم جيد، لكن تنقصة مصادمة كيكي، فهو مثل الملك ما بحب يغلط علي زول

هجومي القادم موجه لمحمد الشيخ من دقن مشاركاتو الركيكة

الأوباش
وطالما المقام مقام روايات ومذكرات
أكيد بكورنا قاصد الحرافيش
ياريت يضع امثلة لواحد او اثنين منهم بين قوسين
عشان الواحد يقدر يعرف نفسو واقف في ياتو زقاق
-
إزيك ياطلحة

Quote: هجومي القادم موجه لمحمد الشيخ من دقن مشاركاتو الركيكة

ابشر يا دكتورفي انتظارك بصدر واسع جدا
بس دقن دي ما وقعت لي

وشكرا لعدم ال IGNORANCE

لانو الزول الركيك دايما بيتجاهلوهو؟
ما قريت لملكة الاقنور طيبة الذكر الدكتورة نجاة ؟

آآآآآآآآآآآآآه

والله الزمن داك ماكنت لاعب

حكمة اليوم

المستيرين لما يغرقوا بتعلقوا بي صورة

بكور بتاعنا من النوعية البتطبز عينه بي اصبعه
ولو حد تاني خت لي بكور اصبعو جوه عينو
بكور بحرك الاصبع جوه عينو
...........
الصورة مبذولة في النت وفي اكثر من مكان
وتستخدم كصورة تعبيرية برمز الحركة الفيها
زي ما استخدمتها وضاحه كلاي على قول جلالدونا هنا
وما في اي اشارة لي نسبة الصورة ليها

امثال ماسورة
الفيك ارمي بيهو الناس
سيد الرايحة بفتح خشم قوقل

سلام يا على,,

Quote: بكور بتاعنا من النوعية البتطبز عينه بي اصبعه ولو حد تاني خت لي بكور اصبعو جوه عينو بكور بحرك الاصبع جوه عينو

إتو المنبر دا فيهم كم بكور؟؟
والبوست دا فيهو كم منهم!!!

الأبكرات اتخلبتو علينا والله,,

تحياتى..

Quote: الأوباش وطالما المقام مقام روايات ومذكرات أكيد بكورنا قاصد الحرافيش ياريت يضع امثلة لواحد او اثنين منهم بين قوسين عشان الواحد يقدر يعرف نفسو واقف في ياتو زقاق - إزيك ياطلحة

وآقف في زقاق السينما الجمهورية، أها.
الزول دا لخبات طلِعُو مِن هنا، طلحة في عينك .

الجبان الوقّف خاسية الإقتباس دا منو ؟

إزيّك يا أيمن الطيّب ...

معاوية المدير كيفنك يا خ,,

مشتاقين والله يا حبيب,,

إنت خاصية الواتساب عندك واقفة ولا شغالة!!!

راجع ياخ راجع بالله,,

يا محمد الشيخ
انت ما سمعت ب من دقنو وافتلو

ازيكم يا ورور

يا حمد دا مثل عنصري لاينطبق على الجندريات
والاداريج( جمع ادروج) برضو

عذرا عزيزي القارئ للعودة .. اعجبتني ( واحد جديد) دي.. فقلت ازور البوست للمرة الأخيرة نسبة لمشغولياتي التي تعلو عن الصغائر ..
وبالمرة اعترف باني لم أقرأ بدايات البوست ولست ملما بحيثيات خلفياته .. فقط جابني درب اليوميات وشدني اسم حبيبي جلال صاحب الكلكات والمواضيع المميزة ففتحت مكان علقت .. وحتى اسم بكور افضله اكثر من بكري وأقل من اسم الصديق .. وليس لاي منهم أو ابكر دلالة عندي خارج اطار الحكاوى ..
ثم انتهز الفرصة لاقر باني جديد على المنبر .. سجلت في عام ٢٠٠٠ عندما كنت طالبا .. ثم عدت باسمي الاعتباري اعتبارا من ٢٠٠٨ .. تفرغت بعدها لما هو اهم من المكاواه.. وحتى الحكاوي ابتعدت عنها ولم اسجل الكترونيا غير القديم جدا .. قصة ابكر احتفظت بها رغم إني كتبتها وانا برلوم لانها فازت بجائزة القصة في اكبر مهرجان ثقافي في الجامعة.. تفرغت بعدها لاستنارة حقيقية لا زيف فيها ولا لبط منتديات .. واخيرا ها نحن بكل تواضع نتداخل مع عامة المستنارين ونحكي لهم بعض يومياتهم ..
وانا اختم مداخلتي وصلتني للتو يومية جديدة انتهز السانحة لرفد موضوع البوست بها واستبعد بها اسم بكور.. ويمكن لغير المستنيرين أن يبكوا او يبتسموا اذا بريدوا..
حاج ابكر عمره 89 سنة إختفى شهر من صاحبو حاج الطريفي وبعد الشهر شافو حاج الطريفي و سألو: وينك يا راجل ليك شهر لا حس ولا خبر !!!؟؟حاج ابكر قال ليه: كنت في السجن والله ،،!!حاج الطريفي: يا زول في شنو ؟
حاج ابكر: الخدّامة الشغالة معانا قالت إنّي اتحرشت بيها.. ولمّا جابوني للقاضي في المحكمة إعترفت بالتهمة من باب الإفتخار يعنى ..
وإنت زى ما عارف عمري 89 سنة والتهمة تشرّف أي واحد في سنّي !!!
حاج الطريفي: والقاضي الأهبل دا صدّقك ؟
حاج ابكر : أبداً .. ود الحرام دا حكم علّي بشهر سجن بتهمة الكذب وتضليل العدالة..
.
.
حبيبنا جلجل بعد ما اداني الاوكي .. انت يا ابكرات حدكم معاي الصفحة العاشرة.. او الأرشفة ايهما اولا.. هههه

اتا يا مستجير خليك متشعبط وطالع في مسرح
التفكه اللزج دا كدا لغاية ما تقع تكسر حوضك ..
ياخ لو مصر على الشعبطة في التظارف والتذاكي الما
عندك ليهو رأس دا ألجأ لعمك قوقل يمكن تتعلم الطريقة
والأسلوب وفكنا من النمط بتاع العصور الوسطي من زمن
السحارة والقطيع والمشلعيب .
عرب جزيرة يلموا فيك يملصوك اللابسو
قول الله أكبر .
..................
ينوبكم ثواب ورونا بكور شخصية من الواقع واللا وهم ساي ؟

م

هسى يعنى يا بكور عشان عارفنى ما بمسح مداخلة زميل
تقوم تدرع مداخلتك دى هنا
خلاص بشوف صبرى يشوتا ليك
ولّ اقوليك
يا خى نخليها و يقوم كدى صاحبى تاجو
يعمل فيها يومية كاربة من يوميات ابكر
اهو نحنا كده
دايماَ بنحول الفسيخ شربات

المشكلة إنّو أنا شايفها مداخلة عظيمة جدا

ما قلنا حاحة فى عظمتا
بس المشكلة نحنا ما عندنا كديسات هنا
دى كل الفكرة
وينك يا تاجو
تعال شوف لينا كديس بكور و كديسة ابكر ديل مالن

دا بوست بتاع لجوء سياسي للمداخلات المكنوسة

اضحكتني مداخلة معاوية الصائم الجاب فبها سوط العنج لمداخلتي المسحوبة، لحدي ما دمعت.

قلت في سري:
المساكين في نعيم

بوست من لا بوست له
سبيل يعني
عندي بوست عن تصريح مامون حميدة بنات عمو ما سمعن بيهو
كشف وزير الصحة ولاية الخرطوم بروفيسور مأمون حميدة عن تلوث بكتيري صاحب عملية تحضير عقار (الأفاستين) الذي حقن به مرضى في مستشفى مكة للعيون بأم درمان مما أدى الى أصابتهم بالتهاب بكتيري. واكد عدم وجود أي اختلال مهني في الحادثة.
وقال حميده في تقرير قدمه أمس الى مجلس تشريعي ولاية الخرطوم حول حالات العمى التي أصابت (34) شخصاً قبل أسبوعين. قال إن عقار الافاستين (مسجل وجيد يستخدم في علاج بعض حالات السرطان إلى جانب علاج أمراض العين)، مبينا أن الشركة التي تستورده (شركة معتمدة ومضمونة وساري الصلاحية).
وأوضح ان الوزارة أصدرت توجيهاً للمستشفى بمتابعة المرضى لفترة ستة أسابيع حتى تستقر حالتهم الصحية، مشددا على ضرورة إعادة النظر في عملية تحضير العقار لضمان خلوه من التلوث البكتري، و إنشاء معمل صيدلاني مرجعي لضبط فعاليات الأدوية وإنشاء غرفة تحضير متخصصة.
كتبتو
ولا مافي زول شافو
يكون بوست شبح

بفتش لي يا أبسن، في مناسبة أشكرك فيها، حاولت اكتب بيتين شعر، جبت عدة الكلمات، لكن غلبني أخيطن:
برق
عبير
سماء
ندى
قبس
بحر
رونق
في الأخير قلت أهديك عجز أجمل بيت شعر حسيتو:
ابرتين من العبير وخيط ماء

اليوميات دي كدي ناجلها شوية يا ابو الجل لحدي مانشوف نهاية ابابكر الأول (بكري) شنو؟
انا قبيل ماتابعت للنهاية وماعرفت الحذف بوستك بتاع الاعتذار لصبري منو ..
لكني خشيت قبل شوية لقيت المنبر نضيف وما في كلام عن الموضوع غير بوست ابوسن..
رجعت للخاصية لقيتها شغالها ، فعلقت لابي سن بقولي (الخاصية موجودة يا اخ عبد الحفيظ..
ولكن حذفت الايقونة فقط) ولكي اثبت له كلامي حذفت له بوست جديد يا دوب مشاهدتين
وجدعت له الرابط في بوستو بتاع الموضوع ..
رجعت للبوستين مالقيتن، وبكري لسه شغال يتستس TEST TEST،
عليه أخلي طرفي من حذف أي مداخلة غير بتاعة هيثم وياسر وقد اعتذرت لهما في بوست صبري الذي حذفه جلال واعتذر عن حذفه، وبوست وعبد الحفيظ الذي سأل عنه الآن وها أنذا أعتذر له أشد الاعتذار ومعا لفتح بوست حميدة جديد..
أما بوستك الأخير يا جلال وبوست عبد الحفيظ قبل الاخير عن شكر بكري لا اعرف من حذفهما
واسه الله يستر على بوستك ده .. وربنا يغطيه عشان نتم بقية اليوميات..
أخونا ابوبكر ( بالهمزة على الألف واثبات الواو) تحية ثم تحيات تحيات
مداخلتك ما خادشة ، لكنها متل النكتة في بيت البكا
يعني بوست ود البوش ما مكانها .. وهنا .. برضه ما مكانها ،
تسمح لي احذف يا جلجل؟

طبعن يا بن عباس عارفني من حبي ليك مرة ضحكت في عسير ود البشرى سمعني في نواحي الخليج الفارسي.
طبعا ما اكضب عليك قلت الزول دا حايوجه على صواريخ من نوع كانت هنا مدينة لذا جهزت نفسي بسواريخ عينة كانت هنا..............

ال.....معناها مادة تخويرية لاتصلح الا في الخاس. وعشان كمان مانزيد الطين كدسة

نسيت يا ابسن،
من عدة الكلمات:
دعاش وهالة

نفس الإهداء موجه للحبيب الرفيق حيدر حسن ميرغني

سؤالي الفوق قايم
تعرف يا بكرى رجعتني تانية ثانوي عام . اول مرة اقرأ مصطفي سند ومن ديك علقت فيهو
تعرف مصطفي سند كاتب لي ابيات في اهداء الكتاب ما مضمنة في قصيدة البحر القديم
عابوا عليك صداقة الاعمي
نديم الفقر
وال####################
والخلق الكفيف
كيف التجاؤك للبصيص
وهذه زهر النجوم
تهم حولك بالنزول
بعدينك وصفه للانتظار مبالغة ولا الحمي
ياخ اشكرك

يا تاجو كدى احذف مدخلتى دى على سبيل التجربة

توسلها تان تلداها ..

..
ياصبري كلم بكري، وسؤالي عن كود اللون بتاع البلوك ده قائم .

Quote: في الأخير قلت أهديك عجز أجمل بيت شعر حسيتو: ابرتين من العبير وخيط ماء

اب سن هيِّن
كدي جيب لينا صدر البيت دا قبل ما يجي ود البشرى يقول ليك: إبرتان

ياسلام عليكم ..

Quote: ياصندل الليل المضاء أفرد قميص الشوق حين تطل سيدة النساء وتناثر الأحد الصبي يهز أعمدة الغناء لو ذندها إحتمل الندى لكسوت ذندك ماتشاء ثوبا من العشب العطري وأبرتين من العبير وخيط ماء بلور ضلعك ياعصير الريح سال على النوافذ والزجاج مطرا كدمع الشمع يغسل مدخل الكوخ العتيق من السياج إلى السياج

:
فلتستمر الريالات على الرغم من محاولات بكور التخويرية الفاشلة..

Riyals

Quote: علووووووووووووووووى يا قلب بالله اديه بالحتة الفيها الحديدة جوك جوك تشكرال

بالعنجاوي البسوقو بيهو النوق

اطمئني تمام وضاحة يا شمس الشموس و ياسمينة الروح
جوك جوك سيفيوروم

ارضاء لرغبة المستنيرين والمشتنيرين وغيرهم
وبعد اذن صاحب البوست نواصل يوميات بكور هنا ،
ونحول روايات ابكر واشياء اخرى لبوست آخر..
على ان تكون الكتابة هناك بالحبر السري فقط..
هنا

بكور بتاعنا اشتر شتاره مباالغه
وعامل فيها انو بفهم في كل حاجه
فيوم واحده من نسوان البلد عندها تيرموس شاي ما قدرت تفتحه
وبكور قاعد في ضل الصالون قال ليها ناوليني ليها
ادتو الثيرموس زولك يمين شمال مرة بالمفك ومرة بالزرديه مره بالشاكوش
الترموس اتكسر
رفع ليها الترموس بالحيطه وقال ليها فتحتها لكن للاسف اتكسرت

بكور بتاعنا متلقي حجج ويفتي في البعرفو والما بعرفو
وما يسمع ليهو بي مشكله ولا نقاش الا ويستلمه
يوم واحد من اولاد البلد طالع بي عربيتو ضرب حمار حاج الزين قتلو
المهم حاج الزين وكعادة اهل البلد عفى وانتهى الموضوع في لحظتو
وبكور ما حاضر كان في السوق
جاء العصر سمع الخبر طوااالي على بيت حاج الزين
يا حاج الزين صحي عبد القادر ضرب حمارك بالعربية
ايوا يا بكور
والحمار مات
ايوا يا بكور
وعملت لي عبد القادر شنو
يعني ح اعمل ليهو شنو قضاء وقدر
كيف يعني قضاء وقدر
ايوا قضاء وقدر
لالا لازم توديهو القاضي
يا بكور اوديهو القاضي عشان صدم الحمار معقول الكلام دا
لازم ياخذ جزاهو البلد ما سايبه
يا بكور الله يرضى عليك الحمار حماري وانا عافي
بكور طلع وتاني جاء داخل
يا حاج الزين بيع لي حمارك المات انا بشتري منك

تصدق يا علي, سحاب الحلايف،
ياسمينة الروح دي
قريتها
يا سمينة الروح
----
التعديل: اضافة لقب علي الفكي بالمنبر

كدي شوف الحمي دي ..
الطبل حمى الطبل في رأسي ,

شرايني تفح بلا إن إنقطاع

جسمي عليه عقارب العرق السخين

كأن

الاف الأفاعي

في الصدر تنهشني. . . دوارك ياسهول

وياجروف ويامراعي

أنا من وثاق العرف محلول الشراع

أبكي وأضحك لا يبين تبذلي العاري

ولا يبدو الضياع

أنا في جحيم الغاب في أبد التلاحم

والصراع

غنيت للسود الغلاظ و العبيد والرعاع

للحاملين غشاوة الجهل الضرير حقائقا

تعلو على صنم الحقائق

للعائدين من الحدود... لكل كذاب

وصادق

للشمس تغسل بيتنا العالي علو

الشمس

من مطر البنادق

للجاهلين الهاربين وللذين أحبهم

ماتوا بأيدهم, ومن يبسوا بأعواد

المشانق
ولا شوف وصف الانتظار


بلور ضلعك ياعصير الريح سال على

النوافذ والزجاج

مطرا كدمع الشمع يغسل مدخل

الكوخ

العتيق من السياج إلى السياج

قلبي تعلق بالرتاج.

أتدق لحظة قربها حانت شراييني

ارتوت

قلقا وكدت من الهياج

أهوي أمزق زركات ستائري الجزلى

وأعصف بالسراج

الساخر المجنون يرمقني ويضحك في..

إرتعاش

هذا الرشاش.....

ما صدع جنح يراعة تلهو وماحبس

الفراش؟

أيعوق مقدمها النسيم وهذه السحب

العطاش؟

وألملم الحاكي وأرفع زورق التحف

الأنيقة والرياش

ليخر صرح مباهجي الواهي , ليخترق

الفراش

ود ابو سن ياخي احلى مقطع في القصيدة دي :
وطرحت قوس َ كمنجتى جسراً ببحرِ الليل. ثم هويت للقاعِ. متورم العينين تنبضُ عبرَ أسماعِى. طبولُ العالم الهدّار
قوس كمنجة
وجسر
وقاع
وعيون ورمانة
وطبول هدارة
-
دي عوالم بكورنا بي ضبانتا لو بس اضفت ليها (أستار بكس) وحاجاتو التانية ديك

دي كيف معاك يا حيدر
بلاثيبو
بلاثيبو- رجل كان صديقاً ثم.. مات فيه الاحساس بالصداقة
يُحسبُ الكذبَ الحصيفْ
يَعْرفُ العصر تماماً والخبايا
وكرفاءٍ عجوزْ
يَحبكُ الأدوار حبكاً رائعاً
ويخيط اكفاناً من الفرو الثمين
تريح أجساد الضحايا
ثم يبدأ مْنْ جديدْ

منبهلة شوية ولا احسن ترانيم حامل الاختام .. شايفو شايل ختامتو ولافي بيها

دي غايتو إلا يجي يفتي فيها شخصيا

ماشاء الله البوست وصل الصفحة التالتة وعمنا الملك لسه بتكلم عن الشهرة
وبدورنا نساهم في الصفحة 3 قبل أن تنطوي ، بعدد 2 يومية ..
1-بكور بيقول للمدام:
- لازم تعرفي ان كلمتي في البيت زي الساعه ..
المدام حدرت له بغضب فقام قالها :
- يعني لا بتقدم ولا بتأخر
.
.
2- النكتة الثانية ، ونسبة لطبيعتها المماثلة لمداخلة ابوبكر ، نبدأها عادي ونكملها بالحبر السري ..
بكور من كترة زهجان من مرته باع سرير النوم
وجاب في الغرفة اتنين سنغل ،
يوم جاته المدام مكبرته و قالت ليه ،
- أربطني في سريرك ده واعمل اللي نفسك فيه ..
قام ربطها بالسرير ومشي نام في غرفة الخادمة



..
تحياتي مجددا اخي جلال :
لتكملة اليومية الاخيرة قم بتظليل الجزء الفارغ بعد حرف الواو
كما يمكنك متابعة بوست الاستنارة المنبثق بنفس الطريقة .

يا سلام يا اسامة ياخ و القسم العطيم زارتنا البركة

Quote: آن لبكور أن يمد رجليه وينتعل الكسره .... غايتو عريبى الكمير جاتو مقشره

شكلك طولت الغيبة من البورد .. انا هنا على كيفى ,,اقول ازرق ناصع.. ابيض زرعى .. اريّع و أكّعب
مافى زول يقول لى تلت التلاتة كم
بكور مسجّنى بمسج ثم كالنى بى كول ثم فيسّا و بوّكا و توترا و يوسبا
قال يعملو ليك يومية ... قتّلو ياخى ود ابارو ده صاحبى .. قالى خلاص خلّى ابو حنيبرة بتاعو ده
يمد ضلوفو ديل فى حوش البقر

من زمن جهلو ..كرهتو فى الدنيا دى يدوهو حقنة
اها قام سألنى و ين صاحبك المدعو ود المشرف
قتلو شكلو زعلان منّى
قال لى خلاض غنى ليهو غنوة الدكتور زعلان منى
يمكن يكشحك بى عربية
فى سرى ضحكت وقتلو ياخى المدعو ده ما عندو غير الحقن
قال لى كان كده خليهو يطرشق

اتجاهات البوست دا جاطت واتلخبتت

التيم الشغال ضد بكور شغلو تعبان

وبكور زاتو فقد ملكة المطاعنة في تعليقاتو في البوست دا


دا كلو كوم الطيرة المبارية السيرة كوم تاني

ياريت تورينا الطيرة دي منو
اصلو البورض بقى كله طيور وسمبر

هههههههههههه
ما تتحسّس يا حيدرنا!
المثل يقول: طاقية حتى لو مقاسك كان ما مكتوب فيها اسمك ما تدّرعها ساي

مافي حساسية يامان ورب المجرات :))

Quote: دا كلو كوم الطيرة المبارية السيرة كوم تاني

قصدك غناية على قولة جدتى امنة العمرابية

حمبرة وغناية


تبكو بث

شد التزوير و الارتداد و تغيير المواقف

Quote: طاقية حتى لو مقاسك كان ما مكتوب فيها اسمك ما تدّرعها ساي

وين حتى لو مكتوب فيها اسمك و اسم ابوك
يا تاجو لو سمحت شاى بارد و بالملح لى اخونا ود الخدر و بالحركة ديك
ثم اسمع
البنقو ما وصلنى ... ح اكون قاعد خرمان كتير
انجز و سريع ياخ

يا سلاااااام يا امبده
سعيد بالجد بى تشريبك لليوميات

Quote: البوست دة فيهو معركة شرسة من اقوى المعارك في تاريخ البورد .أتمنى ان تتوقف كافة الأطراف هنا. من خلال خبرتي الطويلة هذا السجال الرائع سيتحول بعد قليل إلى مناوشات وعداوات. وربما ابتعاد اطراف نهائيا من المنبر.

ياخى واحدة من مهام وجودى فى المنبر ده تعريف الناس بكيفية ادارة الخلافات بمعنى محدد
او قوووول الصراعات بمعنى ارحب شوية او الازمات بمعنى اشمل بطريقة لا ضرر و لا ضرار
اديك امنلة
قول واحد ,,, ود الخدر .. بنطقطق فيهو و هو ما جايب خبر و يوم طاقيتو جايى ان شاء الله
التانى الغواضة ود المدير .. ناديتو بالاسم و اديناهو المعلوم و قال الروب
التالت الشغيل.. برضو بالاسم و قال التوبة لى حبوبة
اما دينق و كبّر ديل رفعو الراية البيضاء و عملو فيها اصحابى
فما تشيل هم .. الحردان ما معانا و لا مع الخيانة

ههههه ياخى دى بالغ فيها
ما يكون ودّى سرير الدبل هناك برضو
اسمع الطرد ما وصل ... قاعد فى ركاهو .. قلنا ليك انجز ياخى

مساءاتك حالمة بالسعادة حبيبنا جلجل ..
ود الخدر صاحبنا ده تابع لي ياتو معسكر ؟ ،
نعم هو حريف لكن باصاتو الاخيرة عملها قصيرة
باصاها زي بتاعة الملك وزي دي بتعوق المهاجم الزميل ،
أنا شايف أحسن نجتهد معاهو ونقوم ..نسجلو في فريق الكرور بتاع بريمة داك
(أكشط ياعمك ..)
البتاع رسلت لك منو صنفين ..
في واحد عدله أبكر اليوم بعد مانبهناه، وجاري عندي التعديل
أول مايظبط بديك منو عينة
والتاني شايفو ما ظبط معاك ،
حاول غير اللغة العربية بس والباقي خليهو زي ما الله خلقو
لو عايز جرعه انضف ابثها ليك فورا

وضاحتنا ازيك ..
القنابير القامت في الحنابير دي عامله كيف معاك
الوصية بالمهلة ،
رسالتك جاتني "هركرك" ..
هُركرُك دي اسالي منها معاوية المدير
شايفو جاب سيرتها في الصفحة الاولي
وماتنسي البتاع

يا عمك فريق الكرور ده انا الكابتن بتاعو
و الثيردباك على الطيش وجناحنا ود عوووضة
ف زولط ده شوف ليهو فريق تانى ... ما دايرين نتعوّق ياخ
وديهو فريق متلقى الححج ... ابرك ليهو
و الله صحى
____
و ين الطرد يا عمك ... لازمن ترسلو الان و بى علم الوصول

جمعة مباركة للمستنيرين والمامستنيرين
وبالمناسبة الجمعة المباركة بتسري علي الحيين والميتين
اقصد المصدقين الرسول واصحاب المجرات ..
أها .. فريق الكرور ده طبعا كان ساكن فيهو الشبح
وانا كنت راس الحربة ولابس 9 ، قبل ما يفرتقوا عوووضة رد الله غربته
أتمني انو نستدعي ببقية الفريق ونعمل معاهم مبارة تسخخينية
شكلوا الفريق التعبان بتاع حلة بكور ده راقد ليهو فوق راي
البتاع قرب يظبط ، لكن شكلك غيرت خانة لاعب فيهو
علي كل حال شوته جيدة
والباقي بصلك اليوم
ان شاء الله

ود المليح درويش ومن الابدال عندو متلازمة التصنيف
وينطبق عليهو المثل الجمل ما بشوف عوج رقبتو
بستغلوهو بعض المسانيح ويعزفوا ليهو على وتر انو افهم زول
ويستدرجوهو عشان يصنف اهل البلد
وتصنيفات ود المليح مرتبطة بالحيوانات وخاصة الحصان
فعندو ناس حصين
وناس بط
وناس جيش
وكل تصنيف عندو درجات
مثال حصان كارو وحصان سبق .. وحصان فاعوص .. وابيض بط
المهم مجموعة طواقي
وود المليح مصنف نفسو حصان فاعوص
فيوم واحد من المساخيت سالو يعني شنو حصان فاعوص
فرد ود المليح حصان فاعوص يعني لا يضر ولا ينفع يأكل ويشرب
ويحوم في الجزيرة من اوله لي اخره ولما يتعب يرقد مافي زول يسألو

يا جلجل تاجو دا أكبر غواصة أوعاك تصدقو ..
عامل فيها معارضة لـ بكّو لكن هو معاهو ..
أنت ماك شايف أول ما بكّو رفع الكرت اللحمر ..
شبكنا ليك المستنيرين والمستنيرات الأحياء والأموات ؤ مش عارف أيه ؟
سيبك منو ياخي.
أنت يا تاجو ..
الطرود البترسلا لجلجل ؤ كتلت حيلو دي شنو؟
بعدين بالجد كدا ..
أنا بكتب المداخلة وأقراها زي دشليون مرة في شاهد قبل الإرسال ..
لكين ما بشوف الغلتة إلا بعد الموضوع يترفع في المنبر ..
لالا أنا نضارتي جديدة إلا السمع مش ولا بد ..
يكون دا من السمع ولّ ياهو التحمٌر القلت عليهو من مصاقرة النت؟
حد يصحي ود المدير ..
ولّ بلاش خلو تحت فروتو..
ياربي يكون بكّو ساكي ليهو جمل سبق تاني؟
محبتي للجميع .

ههههها يا ملك
يعنى تاجو دى ما وقعت ليك
الا الواحد يقول طاقيتو
بعدين يمين الله بكّو ده حبيبنا
بس نعمل شنو مع المكاواه الغليظة
__
نرجع لى بكّورنا
يوم نادوهو من قعدة كاربةو قالوليهو بتّك سلفت
البت كان عمرا الوكت داك زى تمانية شهور و ياها بكريتو
اها جا جارى البيت و سكران لط
لقى نسوان الحلة قاعدات مع امّها فى الاوضة
يهدّو فيها و يخفّفو من مصابا
ما قدر يخش الاوضة ,قام جاها بالشباك
و قالّها .. ده قدر الله و وقع علينا ونحنا لازم نصبر
...فى نفسى قلت عدت على خير و حاولت اسوقو من جنب الشباك...
لكنو واصل كلامو
وده امتحان من رب العالمين و صبرنا عليهو جزاهو الجنة
... و دى برضو عدّت على خير... و واصل
نحنا المفروض نفرح بيها عشان ح تكون شفيعتنا يوم القيامة بإذن الله
اخد ليهو صنّة و دنقر راسو ثم رفعو و واصل
و ربنا ح يعوضنا بى احسن منّها
و ان شاء الله من بكرة نبدا فى الموضوع ده

عزيزنا عماد قريش
كيفك يا صاحب
شاكر مرورك و اشادتك بالبوست
و الفضل يرجع كى كل الاخوة الشاركو فيهو
انا بس فرشت ليهم السباتة و جبت ليهم الشاى بالنعناع

الدرديرى ود الكبّاشى
يمين الله سعيد بالطلّة
ياخى لازمانى خدمة منّك
يعنى لو امكن تشيل اليوميات دى
و تبّهرا و تعمل ليها الذى منّو داك من طباق و جناس و خِدع لفظية
و تلمّها فى كتاب
اقتراحى الكتاب يكون اسمو حداشر عام من العزلة
التسعة و تمانين عام من العزلة الباقيات نخليّهم لى بكور
... يمكن يكتب فيهن الرد على يومياتو ...

كيفك يا حبيب .. والله صقط وفوف..فعلاُ يا جلال الواحد مع منظومة 1067 بقى ما فاهم حاجه ... .. وأهو البركه في الطله كل عيك و نهاية وييك .
أها فوق عوسك ماك مساعل ماياها دارك و ما كا ضيف تتضاير . وغلتانه الهندسه وخاتيه وقاطعه الدرب ومتلومه كمان...
أما بعد...
لك الشكر أجزله للجهد المبذول فى التوثيف لحبيبنا المستنير الكميرابى وطبعاً لا زلنا في الجزء الأول من السلسله والذى يمثل المرحله المحليه لنجمنا وسنتابع الإقليمى بأرض الشيخ زايد والدولى عبر البحار وبلاد العم سام .. فسنكون هنا
وعلى ذكر المرحله الدوليه هنالك نيًه كان المولى هوًن آخد العيال وأزور الساحل الشرقى حيث أرض المستنير لمعايشه الأستنارة الدولية لااااااااايف .... أها مو دقش ؟؟؟
مع التحايا للمشاهدين الأعزاء
ومتابعين