ﺃﻏﺮﺏ ﻗﺼﺔ ﺯﻭﺍﺝ

10:28 AM February, 22 2017

سودانيز اون لاين
تاج الاصفياء عبدالمنعم-
مكتبتى
رابط مختصر

ﺛﻼﺛﺔ ﺑﻨﺎﺕ ﺃﺧﻮﺍﺕ ﻣﺴﺎﻫﺮﺍﺕ ﻓﻲ ﺗﻠﻔﻮﻧﺎﺗﻬﻢ ﺍﻟﻰ ﺍﻟﺴﺎﻋﻪ 3 ﺻﺒﺎﺣﺎ .. ﻧﻌﺴﻮﺍ ﺍﺗﻨﻴﻦ ﺟﺮﻭ ﺍﻏﻄﻴﺘﻬﻢ ﻭﻧﺎﻣﻮ ... ﺑﺲ ﺍﺧﺘﻬﻢ ﺍﻟﺜﺎﻟﺜﺔ ﻗﺎﻣﺖ ﺿﺎﻳﺮﺕ ﺍﻟﺒﻴﺖ ﻭﻣﺸﺖ ﻋﻠﻲ ﺍﻟﻤﻄﺒﺦ ﻧﻈﻔﺘﻪ ﻭﻟﻤﺖ ﺍﻟﻨﻔﺎﻳﺎﺕ ﻓﻲ ﻛﻴﺲ ﻭﻃﻠﻌﺖ ﻳﺪﻫﺎ ﻣﻦ ﺍﻟﺒﺎﺏ ﻋﻠﺸﺎﻥ ﺗﺮﻣﻴﻪ ... ﻟﻜﻦ ﻓﺠﺄﺓ ﺍﺗﺸﺠﻌﺖ ﻭﻗﺎﻟﺖ ﺍﺣﺴﻦ ﺍﺭﻣﻴﻪ ﻓﻲ ﺑﺮﻣﻴﻞ ﺍﻟﻘﻤﺎﻣﻪ ﻣﺮﻩ ﻭﺍﺣﺪﻩ ﺃﺻﻼ ﺍﻟﺸﺎﺭﻉ ﻓﻰ ﺍﻟﻮﻗﺖ ﺩﻩ ﻓﺎﺿﻲ .. ﺍﻟﻤﻬﻢ ﺍﻭﻝ ﻣﺎﻭﺻﻠﺖ ﺑﺮﻣﻴﻞ ﺍﻟﻘﻤﺎﻣﻪ ﺍﻟﻬﻮﺍﺀ ﻗﻔﻞ ﺍﻟﺒﺎﺏ ﻋﻠﻴﻬ ﻭﻫﻲ ﺑﺮﻩ ﺧﺎﻓﺖ ﺧﻮﻑ ﺷﺪﻳﺪ ﻭﻣﺎﻋﺮﻓﺖ ﺗﻌﻤﻞ ﺷﻨﻮ ﻷﻧﻪ ﺍﺑﻮﻫﺎ ﺭﺍﺟﻞ ﺻﻌﺐ ﻣﻮﻟﻊ ﻧﺎﺭ .... ﻟﻮ ﺩﻗﺖ ﺍﻟﺠﺮﺱ ﻭﺟﺎ ﻓﺘﺡ ﺍﻟﺒﺎﺏ ﻣﻮﺕ ﺃﺣﻤﺮ ﺟﺎﻫﺰ ﻭﻣﺶ ﺣﻴﺼﺪﻗﺍ .. ﻟﺬﻟﻚ ﻗﺮﺭﺕ ﺗﺒﻘﻲ ﻋﻠﻲ ﺣﺎﻟﻬﺎ ﻛﺪﻩ ﺭﻏﻢ ﺧﻮﻓﻬﺎ ﻣﻦ ﺍﻟﺸﺎﺭﻉ ﺍﻟﺼﺎﻧﻲ ... ﺍﺛﻨﺎﺀ ﻣﺎﻫﻲ ﻋﻠﻲ ﻫﺬﻩ ﺍﻟﺤﺎﻟﻪ ﺳﻤﻌﺖ ﺻﻮﺕ ﺳﻴﺎﺭﻩ ﻳﻘﺘﺮﺏ ﻣﻨﻬﺎ ﻓﻤﺎ ﻛﺎﻥ ﺍﻣﺎﻣﻬﺎ ﺗﺼﺮﻑ ﻏﻴﺮ ﺗﺪﺧﻞ ﻓﻲ ﺑﺮﻣﻴﻞ ﺍﻟﻘﻤﺎﻣﻪ ﻭﺗﻐﻄﻲ ﻧﻔﺴﻬﺎ ﺑﺎﻻﻭﺳﺎﺥ . ﻻﻧﻬﺎ ﻻﺑﺴﻪ ﺑﺠﺎﻣﻪ ﻧﻮﻡ . ﻋﻨﺪﻣﺎ ﻭﺻﻠﺖ ﺍﻟﺴﻴﺎﺭﺓ ﻟﺒﺎﺏ ﺍﻟﻌﻤﺎﺭﻩ ﺍﻟﻤﺠﺎﻭﺭﻩ ﻟﻤﻨﺰﻟﻬﻢ ﺗﻮﻗﻔﺖ ﻓﺎﺧﺮﺟﺖ ﺭﺃﺳﻬﺎ ﻓﺎﺫﺍ ﻫﻮ ﺍﺑﻦ ﺍﻟﺠﻴﺮﺍﻥ ﻓﻨﺎﺩﺗﻪ ﻣﻦ ﺩﺍﺧﻞ ﺍﻟﺒﺮﻣﻴﻞ ﻭﻫﻰ ﺗﺮﺗﺠﻒ ﺧﻮﻓﺎ ﻓﺘﻘﺪﻡ ﺍﻟﻴﻬﺎ ﻭﺳﺃﻟﻬﺎ ﺍﻧﺘﻲ ﺟﺎﻥ ﻭﻻ ﺍﻧﺴﺎﻥ؟؟ ﻓﻘﺎﻟﺖ ﺍﻧﺎ ﺍﻧﺴﺎﻥ ﻣﻦ ﻭﺭﺍﺀ ﺩﻣﻮﻋﻬﺎ .. ﻓﺤﻜﺖ ﻟﻪ ﻗﺼﺘﻬﺎ ﻭﺗﺮﺟﺘﻪ ﺍﻥ ﻳﺴﺎﻋﺪﻫﺎ ﺑﺎﻟﺪﺧﻮﻝ ﻻﻥ ﺍﺑﻮﻫﺎ ﺳﻴﻘﺘﻠﻬﺎ ﻟﻮ ﻭﺟﺪﻫﺎ ﺑﻬﺬﻩ ﺍﻟﻄﺮﻳﻘﻪ .. ﺗﻔﻬﻢ ﺍﻟﻮﻟﺪ ﺍﻟﻤﻮﻗﻒ ﺗﻤﺎﻣﺎ ﻭﺗﺴﻠﻖ ﺑﻄﺮﻳﻘﻪ ﻣﺎ .... ﺍﻟﻲ ﺩﺍﺧﻞ ﺍﻟﻤﻨﺰﻝ ﻭﻓﺘﺢ ﻟﻬﺎ ﺍﻟﺒﺎﺏ ﻭﺩﺧﻠﺖ ﻭﺍﻟﺨﺠﻞ ﻳﻜﺴﻮﻫﺎ ﻭﺍﻟﺪﻣﻮﻉ ﻻ ﺗﻔﺎﺭﻗﻬﺎ . ﻋﻨﺪﻣﺎ ﺍﺻﺒﺢ ﺍﻟﺼﺒﺢ ﺍﺗﻲ ﺍﻟﻮﻟﺪ ﺍﻟﻲ ﻭﺍﻟﺪ ﺍﻟﻔﺘﺎﺓ ﻭﻃﻠﺒﻬﺎ ﻟﻠﺰﻭﺍﺝ ﻓﻲ ﻧﻔﺲ ﺍﻟﻴﻮﻡ ﻻﻧﻪ ﺍﺗﻲ ﻓﻲ ﺍﺟﺎﺯﺓ ﻟﻠﺰﻭﺍﺝ ﻭﻟﻢ ﻳﻮﻓﻖ ﻓﻲ ﺍﻻﺧﺘﻴﺎﺭ ﺍﻻ ﻓﻲ ﻫﺬﺍ ﺍﻟﺒﺮﻣﻴﻞ ﻓﻬﻮ ﻃﻴﻠﻪ ﻭﺟﻮﺩﻩ ﻟﻢ ﻳﺮﻱ ﻫﺬﻩ ﺍﻟﺒﻨﺖ ﺭﻏﻢ ﺍﻧﻬﺎ ﺟﺎﺭﺗﻬﻢ .. ﻓﺘﻢ ﺍﻟﺰﻭﺍﺝ ﻭﺳﺎﻓﺮﺕ ﺍﻟﻌﺮﻭﺳﻪ ﻣﻦ ﺍﻟﺒﺮﻣﻴﻞ ﺍﻟﻲ ﺑﺮﻟﻴﻦ ﻓﻲ ﻧﻔﺲ ﺍﻟﻤﺴﺎﺀ

ههههه سلام تاج الأصفياء
رغم غرابة القصّة لكن بشكل أو بآخر ممكن تحصل ماعدا الجزء الأخير عن زواجها وسفرها لبرلين في نفس اليوم
حتى لو فوّتنا حكاية الفيزا من الإستحالة بمكان أن تقبل الأم أن تزف ابنتها دون تجهيزات العروس المعتادة من حنة وكبرتة و تسمين ما إلى ذلك :)

Quote: ﻣﻦ ﺍﻟﺒﺮﻣﻴﻞ ﺍﻟﻲ ﺑﺮﻟﻴﻦ

هههههههههههههه

على وزن من التميراب للآداب ...



حللت أهلا ونزلت سهلاً ....



.

ﺍﻟﺴﺎﻋﻪ 3 ﺻﺒﺎﺣﺎ .ﻗﺎﻣﺖ ﺿﺎﻳﺮﺕ ﺍﻟﺒﻴﺖ ﻭﻣﺸﺖ ﻋﻠﻲ ﺍﻟﻤﻄﺒﺦ ﻧﻈﻔﺘﻪ ﻭﻟﻤﺖ ﺍﻟﻨﻔﺎﻳﺎﺕ ﻓﻲ ﻛﻴﺲ
ودخلت البرميل
----------
بدأت تضاير البيت الساعة 3 صباحا قول اخد معاها نص ساعة
نظافة المطبخ ولم القمامة وقول ساعة ونص
طلعت البرميل واتكتحت بالزبالة والاوساخ قول ربع ساعة
وانتظرت جوة البرميل قول ربع ساعة ورفعت راسها شافت ود الجيران
اها كل دا اخد منها ساعتين
يعني الساعة بقت 5 صباحا .. اصلا ابوها دا ما بصلي الصبح حاضر؟
ولا العرسها دا برضو ما بصلي افجر؟

تحياتى للجميع
هذا النوع من القصص لا يقصد به إثبات أن القصة حقيقية أم لا ، بل هو من النوع الذى يقصد به ال Moral of the story

.....

Quote: ههههه سلام تاج الأصفياء رغم غرابة القصّة لكن بشكل أو بآخر ممكن تحصل ماعدا الجزء الأخير عن زواجها وسفرها لبرلين في نفس اليوم حتى لو فوّتنا حكاية الفيزا من الإستحالة بمكان أن تقبل الأم أن تزف ابنتها دون تجهيزات العروس المعتادة من حنة وكبرتة و تسمين ما إلى ذلك :)

Quote: يعني الساعة بقت 5 صباحا .. اصلا ابوها دا ما بصلي الصبح حاضر؟ ولا العرسها دا برضو ما بصلي افجر؟

تاج الاصفياء
مرحب بيك في الديار
قصتك حلوة زي بتاعت فاطنة السمحه

يا عوز بالله والنيتي لله
عليك الله شوف الناس ديل ؟ الزول جاكم ضيف وقال ما بيدخل يدو فاضية
قاليكم قصة تقوموا تلموا فيهو كدايا من كدايا وكدايا من كدايا وكذا كذا وكذا كذا ؟
اصلكم اتوا بواليص ول قاضي ؟
اصلوا شنو هو ؟
قصة وخلاص وكمان لذيذة وممتعة
.
.
التاج حبابك ...... واصلك ما تعلم كيبوردك الهوبان ألفخ ساهي من طرف
الهواء دا حق زول اكتب اي حاجة تعجبك وما تشتغل بجنوي البندر ديل اصلم كدا

ملحوظة : ود البشرى كان اتلحك بمرق ليك قصصك وحكاويك كلها صفر معاك الواحد
كرهنا الحكايات ذاتو
انا مرة حكيت حكاية لمحدثي قال لي كان طرت السما ودقيت الدلجة دا ما محدثك دا اتا ذاتك
وعشان اتخارج منو قلت اي دا انا بالكضب ساكت اخير من التنحة
ومن يومها بقى ما تلحني عشان كونو مافي فائدة
.
.
وبرضو بريدو ريدة الله والرسول دي
لانو زول ممتاز تيزة جد

مرحب بالعضو تاج الأصفياء...
لا حولااااااااا.... حتى القصص تفلفلوها كده بالغتوا :)
العروس ماشة برلين دي أظن جات مع الموسيقى برميل و برلين...
و زي ما قال الأخ أحمد فوق... العبرة من القصة ما من صحتها و حرفيتها " بالحرف يعني" تكون صاح هههه

و من حيث المُحتوى غايتو من وجهة نظر جندرية .... قصة بائسة (ده نقد بناء ما تتعقد).

يعني حسع البنات يساهروا عشان ينظفوا و يمشوا القمامة عشان يلقوا عرسان هناك هههه

...................................
قلت أواصل فلفلة و كده

تحياتي لكم جميعاً

وحاة الله يا ود البوش أنا لامن قريت القصة من شدة ما عجبتني ما انتبهت أنو دي المشاركة الأولى للتاج ولا إنو عضو جديد حتى ما رحبّت بيه سلّمت بس وخشيت توش, بعدين انا هيّن وقفت في نهاية القصة أحمد ياسين من وقف فيها من قولة تيت من تلاتة صباحا هههه

مرحب بيك يا التاج و اعفي لينا عدم الانتباه و الترحيب, بيني وبينك الأعضاء الجدد عوّدونا على فرمالة عضو جديد هل من مرحّب و بتاع, انت دخلتك مختلفة ومميّزة النصيحة لله

تاجو يا جميل الف مرحب بيك ياخ
عجبنى شركك ياخى الرميتو لى ناس الغلات ده .. ما كضّبو ...
جوك جارين عاضّين طرف الجلابية فى الخشم

هههههههههههه

انا لله ياخ
شنو يا جماعة براحة براحة ياخ
والله قربتو تطالبو بالقسيمة والڤيزا والتذكرة وتقارنو التواريخ😂😂😂


مرحبابك يا التاج في حوش بكري دا ونتمنى ان يطيب لك المقام
وخليك صبور مع القبقبة المنتشرة داخل الحوش دا😂😂

غايتو يا تجتوج بالغتا فوكا
والله ما إحترمت عقولنا بالمرة
ما هكذا تورد الإبل يا تجو

عموماً ،،، مشاركتك دي قبلناها منك
إلا الفيك إتعرفت !!!!!

الف مرحب بالاخ التاج بيننا


اهاااا

عندي ليكم قصة اغرب من دي

واحدة تطبخ وتكنس وتغسل وتكوي وروحها دي مارقة
قدر ما مرقت على السهلة دي تودى الوساخة الشارع مافي زول جاها .

ما ينط ود البشرى يقول لي ماعندهم برميل ولا بتاع وهناي

هو من ناحية ح ينط ح ينط يا ود الشيخ
بعدين زولتك دى وكت ما عندها برميل, التعب لزومو شنو
و ح تمشى برلين كيف
كامل تضامنى مع الاخ التاج
و العار و الشنار لى ود البشري و ود ياسين

والله ودالبوش وودالبشرى
هههههههههههههههه
كلامكم طلع احسن من القصة زاتا
قبل يومين جاي من حفلة حوالي الساعة تلاتة صباحا
وقفت العربية ... نزلت ماشي على البيت سمعت لي كركبة اتلفت
مافي شىء قبلت على البيت اسمع ليك تاني كركبة ومعاها (بيس ..بيس)
ووقفت اتلفت واعاين مصدر الصوت .. لقيتو جاي من اتجاه (الكوشة) قصدي برميل القمامة
قلت بسم الله الرحمن الرحيم .... دا اكيد شيطان ولا جني قريت لي كم سورة وانا ماشي على البرميل
قربت ارجع واقول انا مالي ومال ركوب الجن .. بس اتذكرت القصة دي شعرت بى راحة واطمئنان
لانه فيها عرس وبرلين ...قويت قلبي واتجهت صوب الكوشة ..عاينت من فوق البرميل .. الا حاجة جات
طايرة ..فووووو
علي الحرام الخلعة الدخلت فيني بعد الوقعة الوقعتها .. ما اظن تاني تطلع بالساهل