جـــــــــــــاك ســـــــــــــبارو

07:33 AM February, 22 2017

سودانيز اون لاين
عماد كرار-السودان/الخرطوم
مكتبتى
رابط مختصر

أداء اسطوري للرائع جوني ديب في شخصية "جاك سبارو" في سلسلة "قراصنة الكاريبي"
صنفت الشخصية الاشد تأثيراً في العقد باكمله - جاك سبارو

الهمني لكتابة هذا البوست في حق الظاهرة ديب مشاهدتي لفلم Benny and Joon
وكعادته ابدع فيه ويظهر فيه في ريعان صباه

يجعلك تعيش اللحظة بكل حواسك وكانك احد سكان شارع فليت
في "الحلاق الشيطاني لشارع فليت"

بأختصار مشاهدة فلم لجوني
كفنجان قهوة مكرب
يعدل مزاجك

ياعماد ازيك
الزول دا شدة ما تقمص الشخصية لمن طشا
شايفو في حفل جوائز قبال شهر شكلو اتغير
ويديك احساس انو لافيها ليهو بوب مارلي صاروخ
اثرت عليهو الشخصية

هههههههه
ياهلا صديق
حتي وهو داخل الفلم كأنو لافيها بكرتين
وخصوصا لما يمسك ببوصلتو العجيبة ديك ويتمتم بكلمات مبهمة

مصنع الشوكولاتة
الرجل الميت
ادوارد ذو الايدي المقصات
والكتير من الجواهر الثمينة ف هوليوود

من اجمل اعماله الخيرية
شرائه لقطعة ارض بقيمة 4 مليون دولار
واعادتها لاصحابها من الهنود الحمر والتي سلبت منهم منذ عقود بعيدة

طبعا الهنود الحمر اجداده من ناحية امه تقريبا

معلم كبير

أنا عندي مشكلة في حفظ أسماء الافلام لكن عندو فيلم بمثل فيه عميل فيدرالي يتخفى على عصابات المافيا مع المعلم الكبير ال باتشينو
وحضرت ليه فيلم برضو قبل أيام فيلم بمثل فيه رجل عصابات أخوهو سياسي وعندهم صديق طفولة جابوهو ضابط شرطة في منطقتهم بمرض فيه ولده ويموت
رغم كبر السن الظاهر عليه لكن جضم فيه دور غريب .. أكتر لقطة عجبتني فيه لما قعد مع ولده وزوجته في الغداء قامت زوجته قالت لي ولدها يلا أحكي المشكلة لي ابوك
قال ليه في الطالب فلان الفلاني ضايقني كم مرة قمت قشطتو بنية في وشه والمعلم والطلاب شافوني وبلغوا الاسرة .. قام جوني ديب المعلم قال ليه وهسة انت شاعر بإنك في مشكلة عشان ضربت الولد بنية ؟ الولد قال ليه ايوة .. جوني ديب قال ليه لا لا انت ما في مشكلة عشان ضربت الولد انت في مشكلة عشان شافوك الاساتذة والطلاب .. أها كدة استفدت شنو من الدرس ؟ الولد قال ليه عرفت إنه المرة الجاية بسوقه ملف ميت حتى اقشطو البنية

شخصية جاك اسبارو خطيرة شديد وأجادها بشكل جنوني وأثرت في شباك السينما شديد يعني في شبه اجماع على تأثيرها
لكن ماااااا عارف في الشخصية فيها حاجة كدة بتديك احساس إنه عاضاو نعجة عاضاهو نعجة كدة

Benny and joon

عندما ينتصر الحب علي الجنون

هههههههههه
حبابك احمد

طبعا من الحاجات المحببة فيهو
حبه الشديد للاطفال وحرصه دائماً علي اسعادهم
وده واضح في افلامه مثل فلم : شارلي ومصنع الشوكولاته

بكل المقاييس جوني ديب فلتة
واعماله لافتة ومتميزة
وله طريقته الخاصة والمحببة والغريبة لدي البعض احيانا كثيرة

اعتقد لايضاهيه ف ذلك الا النجم الكوميديان "جيم كاري"

سلام للجميع الاخ كرار والاخوة المشاركين.

شايفكم بتتكلمو اكتر عن جوني دِب . خشيت البوست عشان اشوف جاك سبارو لقيت عمك جوني .

في لقاء مع مقدم البرنامج الحواري ديفيد لترمان ولقاءات اخرى ف امريكا حصل الاتي
المذيع : طيب ممكن تورينا انت كيف بتقييم نفسك بعد الفلم ما ينتهي تصويرو ؟
جوني دِب :- منو ؟ انا دة؟ ( قرب يقول بري بري بري) .
المذيع: ايوة ، يعني لمن تشوف فلم مثلتو ف التلفزيون او السينما ؟
جوني : الموضوع دة شوية كدة معقد بس انا ح اتكلم بصراحة.
المذيع ( يضحك ) : معقد ( عيونو لفت 360 درجة) ؟ وحالة اندهاش تامة حلت على المذيع
جوني : ايوة ، انا ما عندي اي دخل بالبعلمو الزول داك ، داك براهو ودة براهو ( يأشر لنفسه) وبعدين بحس باحساس م كويس
بعد م اخلص اي تصوير يا عمك تاني ما بشوفو ، ما بحب اشوف الزول داك ببساطة كدة . اول م اخلص التصوير بشتت
وما عندي اي شغلة بالبحصل بعدها . بحاول ابعد بقدر الامكان من الموضوع دة لانو ما بحب اتفرج على نفسي . اولادي شافو افلامي اكتر مني.
------------------------------------------------------------
هو راجل مبدع مافي شك بس عنوانكم لخبطني .

اما جاك اسبارو فققصو الحقيقية كتيرة ... يقال انو هرب من اسبانيا لتونس واسلم وسموهو جاك عصفور ( جابر عصفور؟) او يوسف ريس
وبكان بساعد المضهدين المسلمين واليهود ف اسبانيا اواخر رالعصور الوسطى لكي يهربو من اسبانيا ( حيث كانوا يعاملون معاملة رقيق ) الى افريقيا و
شرق اوربا وربما امريكا
لكم الود

مرحبا اسامة كتر خيرك علي المعلومات ولاول مرة اعرف ان جاك اسباروشخصية حقيقية
الزول ده اأكيد بكون "منتشي"وضارب "الماريجوانا" الوقت داك هههههه


أسف تعديل ف الاسم

شكرا اخ عماد
اولا كلها مزاعم من بعض العلماء والباحثين المسلمين لا ادري ان كانت صحيحة ولا لأ. ( لموضوع جاك او جابر عصفور)
يعني الحقيقة انو ممكن تكون مستوحاة فقط ( تم بناء الشخصية الخيالية ف القصة على خبر او ربما سطر ف خبر )
في مؤتمر تقديم الشخصية للاعلام ( شخصية اسبارو ) 2002- قدم المؤلفان تيد إليوت وتيري روسيو Ted Elliott and Terry Rossio
الشخصية على انها خيالية محضة 0 لكن بالنظر للصورة الكاريكاتورية نجد شخصية اسبارو اقرب للعرب من (او) الاسبان انظر الصورة ادناه


اما عمك جوني فالكلام دة حقيقي انو ما بحب يشوف روحو بمثل ( دة لا ينفي انو بيركب الفيل بعد جزيرة الفيل ) خههههههههههه

الشكر ليك يااسامة

صاح انا في الاول كنت قايل اصولو اسبانية لانو بشبههم
لكن وجدت اصله الماني من ناحية ابيه تقريباً
وهندي احمر من جانب امه

ممكن تكون غريبة حكاية مابحب يشوف
نفسو يمثل دي لكن ياهو ده حال كثير من المبدعين
هناك جوانب في حياتهم ممكن نشوفها نحن غامضة وغريبة

سام ف عنفوان شبابه يحب جون المختلة عقليا
وبفضل ذلك الحب تشفي جون
وتترك السكن مع اخيها بيني
لتسكن في شقتها الخاصة مع سام

ف Beeny and joon

من اعماله الجميلة ذات اللمسة الرومانسية دور الغجري في فلم Chocolate وهو عموما من الفنانين المتميزين في جيله واعتاد في اغلب اعماله على تقديم أدوار ضمن أفلام تبدو غريبه للكثير ولكنها تقدم رساله للمتابع بعمق منها أدائه فى Benny and Joon

حبابك عاصم

Chocolate رهيب طبعاً وقصته جميلة جداً

ممثل كبير اضاف اسطورته الشخصية لاسطورة جاك سبارو ، عمل شغل مبالغ فيه ، الزول ده خيالو واسع جدا ، الحركات الغريبة وطريقة الكلام وطريقة الحركة كلها من خيالو هو ..
عندو برضو فيلم " The brave " مع مارلون براندو وفيلم تاني مع براندو ظريف جدا اسمو دون جوان ..

مرحبا عبدالاله
علي ذكر مارلون براندو او العراب
كان صديقه المقرب
واختير كثاني افضل ممثل ف التاريخ يتقدمه صديقه براندو
ولقب كذلك بملك هوليوود