اي مغترب عندو إمكانيات حقو يرجع السودان . في فلوس

07:00 AM February, 10 2017

سودانيز اون لاين
Osman Musa-
مكتبتى
رابط مختصر

طبعا القصة ما ساهلة . خت في بالك ح تقابلك جبال من البلاوي و المصاعب .
الحكومة ح توريكك النجم بالنهار بس انت لازم تكرب بطنك . في شغل ت قيل
وفي مال أحمر ما موجود في أي بلد في العالم .

كيف حالك عثمان ..
امكانيات كم وقدر شنو !!..
عن معرفة بقول ليك الناس الجوه شغالين بي رؤوس أموال لا قبل للمغتربين بها ..
وحتى لو اغتربوا في بلاد الواغ واغ ..
الشغلة ما بلاوي الحكومة بس .. بلاوي السوق أنكى وأضل ..
أحكي ليك قصة حاصلة لي زول من جماعتنا ..
الكلام ده زمن ال400 مليون قروش ..
مشى لي قريبه ومن جماعتنا في السوق ..
وقال ليهم عايز اخلي الغربة واخش السوق معاكم ..
الزول ضحك وقال ليهو معاك كم يعني عايز تخش بيها السوق ..
فزولنا ملا خشمو وقال ليهو عندي 400 مليون ..
على أساس إنها بالنسبة لي زول مغترب مبلغ ضحم الوقت داك ..
قال ليهو شوف القروش العندك دي الاولاد السماسرة القدام دكاكينا عندهم المبلغ ده ..
زولنا ما صدق .. قال ليهو معقول أولادنا ديل عندهم مبالغ قدر دي ..
فعمل ليهو بيان بالعمل جاب واحد من الاولاد الشباب قرايبنا ..
وقال ليهو هل انت معاك 400 مليون ..
قال ليهو نعم عندي .. سألوا تاني هل قروشك دي بتدخلك السوق كتاجر..
قال ليهو .. لا .. لسه كمان شوية ..
زولنا طوالي من دربه داك مشى اشترى ليهو بيت وأجره ..
ورجع الغربة تاني ..
القروش كان بقت شوية يا عثمان بتتماص مع تماسيح السوق وبتروح منك ..
يا تبدأ من الصفر تشاشي وسمساري في السوق ..
لامن تعرف الحاصل شنو والوقت داك قروشك بتكون فقدت قيمتها ..
أو تسربت من بين يديك .. يا كمان تجي بي قروش تراب ..
تتحمل الدقيش .. لامن تعرف دروب السوق تمام ..
وقروش قدر دي في الاغتراب مافي ..
ناس السوق عندنا شغالين بي قروش مهولة وتدعمهم خبرة تعامل ..
وفهم للسوق ودروبه وعارفين متين ووين يوجهوا قروشهم ..
ومتين ووين يسردبوا ويدسوها وفي نفس الوقت تكون قيمتها محفوظة ..
وده هو التحدي كيف تحفظ لرأس مالك قيمته ..
و 400 مليون زمان هسه كنتين زي الناس ما بتفتحو ليكـ ..
تبدأ صغير معناتها تدس قروشك ..وتدردر في السوق ..
يا كمان تعمل دراسة جدوى لي شغلة تصنيع سلعة بيحتاجها السوق ..
وتكون عارف إنت حتقدر تسوق بضاعتك ولا لا ..
خلاف ذلك قروش الغربة للمعايش وسترة الحال ما للتجارة ..
ولازم يكون معاك ما يمكنك من دخول المجال ده ..

ما داير اكسر مقاديفك وكلامي ما قاعدة تنطبق على أي زول ..
لكن بتديك صورة عن انه السوق عندنا صعب ودروبه كثيرة ..
وتماسيحه كتار وعندهم قروش متلتلة ..
وفوق ده تدعمهم خبرات لا يستهان بها ..
أغلب الخبرات دي لا يدعمها المنطق ..
بي فهم زول من بره السوق وما عنده خبرة ..
لكن دي لغة السوق الاتقنوها ..

عليك بالتصنيع وبس ..
ولازم تعرف كيف تجيب الخامات أول ..
وكيف تسوّق بضاعتك تاني ..
غير كده خليكـ في غربتكـ ساي .. ههههه ..

بعدين في قاعدة ذهبية نسيت أقولها ليك .. ودي بتهدم كلامي الفوق داك كله ..
في حالة عزمت على انك تخش السوق وما حتتراجع مهما كانت النتائج ..
وما خايف تتجهجه وتروح قروشكـ في السوق ..
ما تستعين بي أي زول مهما كان قريبك ولا تسمع أي نصيحة ومن أي زول ..
عشان انت براك تتحمل نتائج الحاجة الجاياك ..
كان خير تملا جيبك .. وكان دقيت الدلجة وفلست ما تقول أح .. ههههههه ..
لانه عندنا برضو نماذج لي ناس ضيعتهم نصائح الأقربين من تماسيح السوق ..
وأكلوا قروشهم وفكوهم عكس الهوا ولم يراعوا لصلة القرابة ولا بطيخ ..
لانه ديل حيكونوا اكبر الشمات عليك ..
ويقولوا لي الجماعة زولنا رجع للغربة حانف وشه .. هههه ..

دمت ياخ ..
وموضوعك ده جميل جداً وفيه فؤائد عظيمة فواصل وماتنقطع ..

سلامات كابتن ود القوز
انا معاك قدامي كفاتير الشاي و حلة العصيدة في قلب عتامير العبيدية . الصورة
قريبة لي صورة ولاية كلفورنيا عند اكتشاف الدهب قبل حوالي 300 سنة . بس الفرق
في القانون والحماية . الموضوع طويل و القصة محتاجة إمكانيات تقيلة . بس اقولك
حاجة . في فلوس بي الهبل .

شركات الحفارات الكوماتسو و ال cat شغا لات بيع شديد . مافي حفار بعدي يوم في
عطبرة . قبل يومين جات حبشية من بنات كسلا التي أشرقت بها شمس وجدي . البت
دفعت كاش 850 مليون في حفار . وده خلاف التشادي بتاع الكسارة و خلاف السوري
موزع البطانيات في قبقبة و خلاف اللبناني البشتري تراب الدهب . و خلاف الهندي
تاجر الكواشف .

طبقة الدهابة أو الدهبنجية ودي هي طبقة جديدة لنج طلعت من تحت رماد الأحباط و
الفلس وتجارب رعاية الجمال في براري تهامة و خميس مشيط و أطراف المدينة المنورة
وأم القيوين في دولة الإمارات . و الطبقة نصها مليانة بتجارب الغربة و الدقش وشق
الصحاري . الطبقة دي الليلة نصها راكب 2017 ونصها ينتظر .

إمكانيات و عزيمة و توكل و تخت في بالك خلاف صعوبة الجهات الحكومية صعوبة
الماء النظيف و كتر الملاريا و الهيبو الخطير . لو القصة جرت أصبر . ح تفرج اكيد
طالما الأرض حامل بي الدهب .

سلام يا دهابى ..

لا حولاااااااااااااااااااااااااا
بعد جهاد أمريكا وقصص دبى وغرب أفريقيا والعروض والموبايلات والسيارات المستخدمة مرقت بالعتمور؟
الله يغنيك ويكرمك بخرباشة اليوم قبل غد..
اها الماعندو اليات يشتغل بشنو؟ أبو راسين ينفع

..

الأخ فؤاد سلامات
عل الدنيا خير ؟ الامكانيات ح تر يحك سريع و ح تدخل عالم الكندشة
سريع .

ات ياعثمان من وين جابوكا
الزول يلوك السم كلمتك مايلوكا

معليش المداخلة مكررة

الأخ أبو حرا ز سلامات
بتنا الحبشة محظوظة وقعت في حفار كوماتسو استعمال ديترويت . استعمال
خفيف . حاول يا ابوحراز يا اخوي لملم خيمتك و طب الريالات دي
وقبل جاي .

تحية وتقدير
الحفارات دي في السعودية غالية
خاصة ال cat
يمكن كوماتسو وفولفو يكونوا اقل
اعتقد سعر حفار الحبشية مستعمل وللا انا غلطان
القروش الموجودة في السودان
اكثر من القروش بتاعت الخليج
اسوا شريحة قابلتني في السودان هي شريحة المغتربين
مرة اتى الينا احدهم من السعودية معاهو 250 مليون بالقديم
فرحان بيها فرح شديد
وعمك قال عاوز بيت في مربع 24 حي الجامعة الاسلامية
في حين ان القطعة داخل المخطط من 700 الى 900 مليون
وعمك لو عرف القطعة في الظلت سعرها كم
كان ح نجيب ليهو الاسعاف

الأخ sadig سلامات
الف شكر

كلام مهم شديد ... يحتاج عزيمة وتوكل .

الاخ عثمان وضيوفك الكرم
السلام عليكم
موضوعكم مهم خاصة بعض دول الاغتراب أصبحت طاردة
والعرجاء الى مراحها

كثير من المغتربين لا يستطعيون دخول السوق السوداني فرادى كتلك المستثمرة الأجنبية الحبشية
لكنهم يمكنهم دخول السوق في شكل مجموعات
الاخ عثمان ما هي الاليات المطلوبة للدخول في محال الاستثمار في البحث عن الذهب
وهل هذه الاليات ليس عليها جمارك حسب علمك
ولكم شكري وتقديري

دهب برضو يا عثمان؟

مع ناس حميدتي و ادريس دبي وصقور الحكومة انت جادي؟
شايف الموضوع دة م جادي والله اعذرني .

الأخ صلاح سلامات
حتي لو الواحد ما عندو الحفارات برضو في فرص . و سوق التعدين أصبح عالم واسع .
مهاجرين من بلدان كتيرة كابين في مناطق فتوحات المعادن . يعني عندك فرصة تبيع
و تشتري أي سلعة وسط الأمة دي . والناس كلهم عندهم فلوس . و شوية شوية لأمن
تلحق ركب أصحاب الحفارات ههههها

الأخ صلاح سلامات
ارجع ليك تاني
الاليات المطلوبة لوري و حفار و جهاز كاشف ذهب وخيمة و مصاريف عمال
يجوز تكون محتاج ليك لي مبلغ 2 مليار و
شوية .

الأخ دكتور يوسف سلامات ا ها لو ما جيت الليلة ما ح تلاقي ولا جرام بعد دفق البنقالة الموضوع في منتهي الخطورة . شركة إرياب الفرنسية طلعت من البلاد بعد ما نهبت 90 في المية من دهب شمال بورتسودان و ما خلت إلا النحاس والنحاس برضو عندو سوق حار .

الأخ أسامة سلامات جد جد جا دي . طبعا ما ح تتخيل سعر ايجار دكان 4 متر في 4 متر و بدون كهرباء كم في الشهر . ولا ح تصدق سعر حقنة العقرب وصلت كم ولا الناموسية ولا البطارية . يا أسامة ياخ الله بحب الشعب السوداني فوق عين المحافظين وفوق عين العاملين فيها عشرة بي قرش . القصة فتحت يا اخوي تعال .
أسعار الإيجارات في ابو حمد ما بتتهبش ولو ما مصدق أسأل الباكستاني السمسار .
ولا ست الشاي الموريتانية الجمبووو.

العجلة للعودة مطلوبة و خاصة لو كان المغترب من أبناء مناطق العبيدية و
ابو حمد و دنقلا و الخناق في منطقة المحس و مناطق أبو زعيمة في كردفان و مناطق
شنقلي طوباية في الغرب و مناطق البحر الأحمر . يعني لو كنت من دنقلا أو من الخناق
ح تكون شغال في مسافات قريبة من مكان أهلك .

العجلة للعودة مطلوبة و خاصة لو كان المغترب من أبناء مناطق العبيدية و ابو حمد و دنقلا و الخناق في منطقة المحس و مناطق أبو زعيمة في كردفان و مناطق شنقلي طوباية في الغرب و مناطق البحر الأحمر . يعني لو كنت من دنقلا أو من الخناق ح تكون شغال في مسافات قريبة من مكان أهلك

وتانى فضل شنو؟
إنت شكلك عايز ترجع كل المغتربين

السودان لاشك ذاخر بالخيرات ولكن الفساد وتقصير الحكام فيما وصل له الحال من تردى وإنعدام الخدمات مما ذاد من أخطار الإصابة بلأمراض المعديه(ملاريا ونزلات معويه وكل الأمراض الناتجة من القصور فى صحة البيئة)
يالإضافة لإرتفاع حلالت الإصابة بالسرطانات والفشل الكلوى نتيجة لإنعدام الضمائر والتوعية والرقابة

نحن مجبورين على الإغتراب لأنه بالنسبة لنا سترة حال وحياة كريمة إفتقدناها للأسف الشديد فى وطننا الحبيب
نسال الله تعالى أن ينصلح الحال ويرد غربتنا جميعا فى وطن يسع الجميع

الأخ عماد سلامات المناطق المذكورة فوق دي هي الأماكن المكتشفة . فيها فتوحات جديدة وفيها القديم شوية . القصد انو أهالي المناطق دي العودة بالنسبة ليهم ح تكون أسهل نسبة لي قرب مكان التعدين من مكان الإقامة . واكيد ح تكون تجربة صعبة . بس لو ربنا وفقك ح تتبسط . يا اخ عماد تعال شوف الشركات الأجنبية والخم .

من أول ما تدخل ح تلاحظ كميات الدهب المستخرجة الموجودة في
المحلات و حركة التعدين و حركة البيع والشراء و فورا ن السوق .

يا جماعة في بزنس ممتاز جداً .. وكثير من المغتربين ما جايبين ليهو خبر .. خاصة المغتربين العايشين في الدول الأوربية وأميركا وكندا وأستراليا ونيوزيلندا

البزنس هو : تصدير المنتجات السودانية إلى أسواق أوربا والولايات المتحدة الأمريكية وكندا وأستراليا ونيوزيلندا ..

طبعاً لا أقصد هنا المنتجات السودانية الكبيرة الضخمة التي تحتاج إلى رؤوس أموال كبيرة وتصاريح تصدير .. ولكن أقصد هنا المنتوجات البسيطة والصناعات السودانية البسيطة بقصد بيعها مباشرة في الدول الغربية وفي أسواق الويكند وفي البقالات وأيضاً يمكن بيعها على مواقع الإنترنت مثل الebay و الأمازون والetsy وshopify
يعني مثل: الفول السوداني والسمسم والدكوة والويكة والنبق واللالوب والقونقليز وأحذية المركوب والجلاليب والطواقي والبرتال وزينات الغرف .. إلخ

لو عملت في البزنس ده بإحترافية عالية يمكن بكل بساطة تدخل ليك 5 ألف دولار صافي أرباح شهرياً ..

..
جربوها سودانيين كتار..

المنتجات السودانية لا تصلح فى غرب أوربا ولا تنافس هنا فى بريطانيا تحديدا..

التجارة بين السودان وأوربا فاشلة بكل المقاييس إلى حين إشعار آخر..

لا جودة .. لا مواصلات بحرية .. ولا شبكة توزيع..

لا يقبل محل تجارى أن يعرض إنتاج السودان من أفضل أنواع المانجو أو الفول أو الفول السودانى أو التمر أو غيرها..

معايير الجودة تختلف هنا تماما..

سودانى إستورد كمية كبيرة بتاعت مانجو مستوى من السودان وصاحب المحل قالو ليهو (كبها فى الكوشة)..

الفاكهة المستوية ما بتمش هنا..

بعدين لا السودانى ولا المنتجات السودانية تستطيع أن تنافس فى أوربا ..

الفول فى .. الفول السودانى فى .. الشمار فى .. التمور فى .. زيت السمسم فى .. زيت الكوكونت فى .. لبن الطير ذاتو فى ..

شنو المافى؟

حاجة واحدة ممكن تنجح وهى مواد البناء (رملة .. خرصانة .. صخور) بس المشكلة فى النقل..


..

شكرا ليك يا فؤاد إبراهيم على هذه المداخلة القيمة ..

لكن بس أقنعني ..
إحنا لينا كم سنة في أوربا بنشتري من البقالات معلبات بامية وفاصوليا وملوخية وفول مصري من إنتاج مصر .. طيب شنو الفرق بين ملوخيتنا وملوخية مصر؟ عايز تقول لي الجودة؟ الملوخية ملوخية .. الفرق المصريين مش كسلانين زينا .. شغالين ليل نهار بيعملوا في علاقات تجارية وتصدير منتجاتهم ..

لما يجي رمضان بنشتري من البقالات التمر من إنتاج الجزائر وتونس والمغرب والسعودية .. طيب مش ممكن نحنا في السودان ننتج نفس التمور دي ونصدرها للدول الأوربية؟

..

سلام على عبد الله حسن الحمد لله إتفقت معى أن السودانى لا ينافس هنا وخاصة مع الإيرانيين والأتراك والسوريين واللبنانيين ورعايا دول آسيا وأمريكا اللاتينية متضمنا الهنود والباكستان..

أما بالنسبة للمنتجات السودانية فالإنتاج لابد أن يكون بغرض التصدير..

المانجو السودانى لا ينافس البرازيلى التعبان لأن البرازيلى ينتج ليصدر..

التمور فى السودان أفضل من تمور تونس وليبيا والجزائر بكثير ولا يوجد مقارنة أصلا لكن تمورنا بتنشف فى النخلة وتمورهم يعبأ للتصدير وهى رطبة..

الفول السودانى ومنتجات التسالى عموما تلمع فى المحلات التجارية إلا السودانى منها داكن وكأنه مغبر..

بإختصار شديد أى منتج مستوى (حتى الفاصوليا الناشفة) لا ينافس هنا..

اليوم أكلت مانجو من لدل .. المانجو دا فى السودان مجان ما ياكلو زول.. أخدر مايل للسواد .. أقوى من الطوب .. لا طعم ولا رائحة له .. لكن مقبول للسوبرماركت وممكن يقعد فى المخزن سنة كاملة وفى المحل شهر شهرين..

الرئيس اليوغندى قال قعد فى لندن كم يوم يفتش لفاكهة يأكلها .. قال حتى الموز زى (الخرا)..

..

الإخوان الكرام الأخ علي والأخ فؤاد سلامات
يا جماعة الواحد فيكم عينو في الدهب و الاحجار الكريمة يجي يمسك في الد كو ة
. بيع الفاصوليا وبيع الد كو ة دي قبلك للعاملين في التعدين وقوم بي تصدير الاحجار
الكريمة .