Post: #1
Title: بوست عبد الحفيظ أبو سن الهادئ
Author: معاوية الزبير
Date: 02-02-2017, 07:46 AM
Parent: #0
06:46 AM February, 02 2017 سودانيز اون لاين
معاوية الزبير-الدوحة
مكتبتى
رابط مختصر طبعا الهادئ صفة لعبد الحفيظ، لكنها أيضا للبوست الذي افترعه بعنوان
في موضوع عثمان م صالح
|
Post: #2
Title: Re: بوست عبد الحفيظ أبو سن الهادئ
Author: معاوية الزبير
Date: 02-02-2017, 07:52 AM
Parent: #1
رأيته واحدا من أهدأ البوستات التي كُتبت في الموضوع
قلت فرصة أكتب رأيي البسيط في القضية
شجعني على ذلك قوله:
Quote: واتتني الجرأة لافتراع البوست
ارجو ان تلازمني حتي أكتب فكرتي
فأنا عضو هنا
والشأن يخصنا كلنا |
|
Post: #3
Title: Re: بوست عبد الحفيظ أبو سن الهادئ
Author: عبدالحفيظ ابوسن
Date: 02-02-2017, 07:55 AM
Parent: #1
حولاااا
ما طالبني حليفة . لكن ماعرفت اغلاق البوست إلا منك
انا مواطن مطيع جدا للقوانين والضوابط
تلك القوانين المكتوبة والواضحة والجلية
ماعندي مانع فليغلق البوست
اول بوست لي يغلق منذ إلتحاقي بالمنبر
ذكرني احتفل بسنويته
ماعندي مانع
بس افهم
ليه!!!
|
Post: #4
Title: Re: بوست عبد الحفيظ أبو سن الهادئ
Author: معاوية الزبير
Date: 02-02-2017, 08:00 AM
Parent: #3
حاولت أدخل على البوست صباح اليوم لإعادة كتابة مداخلة لم أتمكن من إرسالها أمس
فوجدت أيقونة (خاصية) الرد لا تعمل
استغربت ذلك، لماذا يُغلق هذا البوست (الهادئ) بالذات بينما يعج المنبر بالبوستات (الثائرة) في نفس الموضوع؟
هل من سبب؟ معيار؟ ولّ الحكاية شنو ما عارف
|
Post: #5
Title: Re: بوست عبد الحفيظ أبو سن الهادئ
Author: معاوية الزبير
Date: 02-02-2017, 08:18 AM
Parent: #4
عموما وحتى ينجلي الأمر أعيد هنا مداخلتي قبل أن يلحق البوست أمات طه
مثلك لم أشارك في تلك البوستات رغم إنو أحد الأعضاء قال من لم يتدخل ويدافع عن المصطفى صلى الله عليه وسلم
ح يخش النار! بيني وبينكم خُفتَ: نار شنو في السقط دا
المهم، لم أشارك لقناعتي بأن الدين دا زي الشامة في أجساد البشر يستحسن عدم هبشها
وإلا فقد نعرّض هذه الشامة لخطر التحول إلى سرطان كما هو شائع علميا
أما أدبيا فدونكم صاحبنا عبد القادر الكتيابي كتب ومصطفى غنى:
قطع شامة هواك من قلبو إلا هواك نبت تاني وملا الساحات
مالي ومالي ومال كدا ياخ
|
Post: #6
Title: Re: بوست عبد الحفيظ أبو سن الهادئ
Author: عماد قريش
Date: 02-02-2017, 08:22 AM
Parent: #5
نتمى أن يكون ماحدث خطأ تقنى ويتم معالجته
لأن البوست أكثر من عادى ومنطقى وعقلانى
ولأن الأخ أبوسن من الناس الذين لاتوصد الأبواب فى وجوههم
شكرا ليك أخى معاويه للتنبيه ولفت النظر
|
Post: #7
Title: Re: بوست عبد الحفيظ أبو سن الهادئ
Author: حيدر حسن ميرغني
Date: 02-02-2017, 08:29 AM
Parent: #6
غايتو بكرينا ده عندو جنس حاجات 
يسحب بوست لود ابوسن
ويزعَل معاوية
دي موبقة عديل ياخ
-
تشكرات يامعاوية على تعليقك الرزين عن البوست
ورغم اني ماشفتو.. لكن أصدقك
|
Post: #9
Title: Re: بوست عبد الحفيظ أبو سن الهادئ
Author: فرح الطاهر ابو روضة
Date: 02-02-2017, 08:43 AM
والله بوست جميل
ومستف وعي
كامل التضامن حتى عودة الأيقونة
كسرة
رب ضارة نافعة لو ما الأيقونة دي
كان حتلقى حكاوي
شامة هواك دي من وين
|
Post: #10
Title: Re: بوست عبد الحفيظ أبو سن الهادئ
Author: محمد البشرى الخضر
Date: 02-02-2017, 09:03 AM
Parent: #9
تحياتي ود الزبير و اب سن وكفارة على اغلاق البوست
أمس وبناء على رجائي لثمان إن كان يتابع البوست أن يعلّق عبر أحد المراسيل على نقطة تناقض مقولته التي جلبها صلاح الزبير من احد البوستات في الصفحات الخلفية فيها أن الله أنزل الوحي على محمد, تناقضها مع كلامه الأخير أن الرسول عليه الصلاة و السلام اخترع أو توهّم الوحي (أستغفر الله)
كان عثمان قد ارسل تعليقا مع احد الاعضاء قرأته في حينه من التلفون و الوقت داك كورة مصر و بوركينا فاسو ماشة على البلنتيات قلت اعلق على رده الصباح إن شاء الله, يا مؤمن يا مصدّق الصباح لقيت عمّك حذف الرد و نفّس لساتك البوست.
في رايي - الما ح يشتغل بيه بكري كالعادة - أن هذا إجحاف, ايقاف عثمان مفترض انه لسبب محدد, هذا لا يعني منعه من الرد على ما يوجه له أو يكتب عنه وهذا حق يكفله العرف, لو مثلا ابو سن كان فتح نافذة فيس بوك كيف كان سيمنعه من التداخل
|
Post: #11
Title: Re: بوست عبد الحفيظ أبو سن الهادئ
Author: أحمد الشايقي
Date: 02-02-2017, 09:05 AM
Parent: #9
شكرا أخ معاوية
وجود العضو الزميل عبد الحفيظ أبو سن وكتاباته في المنبر العام هي أفضل (دعاية) لاستجلاب المزيد من القراء ومن شرائح القراء المميزين
اضم صوتي لصوتك بضرورة تفعيل البوست
لك التحية
احمد الشايقي
|
Post: #12
Title: Re: بوست عبد الحفيظ أبو سن الهادئ
Author: عبدالحفيظ ابوسن
Date: 02-02-2017, 09:52 AM
Parent: #11
كتر خيركم
لحسن ظنكم
ارجو ان أكون عند حسن ظن وظني
اهو نكرس لا نعرف
|
Post: #13
Title: Re: بوست عبد الحفيظ أبو سن الهادئ
Author: عبدالحفيظ ابوسن
Date: 02-02-2017, 02:47 PM
Parent: #12
فوق راي
|
Post: #14
Title: Re: بوست عبد الحفيظ أبو سن الهادئ
Author: معاوية الزبير
Date: 02-02-2017, 03:32 PM
Parent: #13
أها .. سيد الحوش ما مرّ من هنا ؟
تلقاهو في البرد دا يضرب في البرتكان ساااكت ما جايب خبر (صحة وعافية ياخ)
|
Post: #16
Title: Re: بوست عبد الحفيظ أبو سن الهادئ
Author: جلالدونا
Date: 02-02-2017, 04:40 PM
Parent: #14
هههههههه
لم يمر بعد ... و لكن لا بد من الطبل و ان طال البوست
متل التكنو لسعيتى غرقانلو فى نومة
ف شنو بوستيك ده حدّو قريب
___
مسكين ود اب سن
حتى قانون هواهو الجابو من ألفين و ستاشر طبلوهو
كامل التضامن و الله ... معاهو ... و معاك باعتبار ما سيكون
|
Post: #17
Title: Re: بوست عبد الحفيظ أبو سن الهادئ
Author: جلالدونا
Date: 02-02-2017, 04:51 PM
Parent: #14
| Quote: اول بوست لي يغلق منذ إلتحاقي بالمنبرذكرني احتفل بسنويته |
لالا يا ود اسن
فى واحد تانى برضو بتاع ورينى قانون هواك لحق الزينين
بساعته و تاريخه فى الصفحة الاولى سبع بوستات مطبولة
يا ود ابسن عندك فيهن اتنين
غايتو سويتا شينه تب
|
Post: #15
Title: Re: بوست عبد الحفيظ أبو سن الهادئ
Author: عمر أبوعاقلة
Date: 02-02-2017, 04:33 PM
Parent: #1
تصدق يا معاوية .. قلت في نفسي انه أنسب مكان أنداح فيه هو بوست حفيظ
في بعض البوستات الخاصة بموضوع عثمان خفت أعفص لي لغم وتقوم فيني القيامة
لكن نعمل إيه .. آدي حفيظ وآدي حكمة سيد الحوش
مودتي لكما
|
Post: #18
Title: Re: بوست عبد الحفيظ أبو سن الهادئ
Author: معاوية الزبير
Date: 02-02-2017, 05:00 PM
Parent: #15
TEST
|
Post: #19
Title: Re: بوست عبد الحفيظ أبو سن الهادئ
Author: جلالدونا
Date: 02-02-2017, 05:10 PM
Parent: #18
طال ماك قاعد و بترد .. اقترح تعديل عنوان البوست الى:
ليل ود اب سن الهادى
الفكرة دى قد تساعد فى اندياح ود اب عاقلة
و قد ننداح نحنا برضو
و نرجع لى قميص عثمان
___
بالنسبة للحتة ال باللحمر دى
الصحيح تساعد فى وللا تساعد على
|
Post: #20
Title: Re: بوست عبد الحفيظ أبو سن الهادئ
Author: عبدالحفيظ ابوسن
Date: 02-02-2017, 05:31 PM
Parent: #19
هههه
قرحت تب
|
Post: #21
Title: Re: بوست عبد الحفيظ أبو سن الهادئ
Author: معاوية الزبير
Date: 02-02-2017, 05:36 PM
Parent: #19
TEST!
والله شغال لسع
----
كدي انت يا جلال أول شوف لينا (الهادئ) دي كده صاح ولّ نكتبها الهادي
مثال:
الهادي الجبل
أم
الهادئ الجبل
|
Post: #22
Title: Re: بوست عبد الحفيظ أبو سن الهادئ
Author: معاوية الزبير
Date: 02-02-2017, 05:43 PM
Parent: #21
قلنا نضحّك سيد الحوش يمكن يرتالنا
رتى يرتو أي حنّ عليه أو رثى لحاله (من قاموس الرباطاب)
|
Post: #23
Title: Re: بوست عبد الحفيظ أبو سن الهادئ
Author: جلالدونا
Date: 02-02-2017, 06:00 PM
Parent: #22
مافى أى مشكلة انو الواحد يديك جرعة استنارة فى الحتة دى
الهادئ الموصوف بها هذا البوست مشتقة من الهدوء
و اسم فاعل للفعل هدأ فهى صحيحة و لا غبار عليها
اما الهادى فهى مشتقة من الفعل هدى و اسم فاعل له
و من معانيها الواهب بدون مقابل
بمعتى الهدية
كدى اشرح لينا ... قرحت ... بتاعت المطبول ود اب سن ده
|
Post: #24
Title: Re: بوست عبد الحفيظ أبو سن الهادئ
Author: عبدالحفيظ ابوسن
Date: 02-02-2017, 06:03 PM
Parent: #22
تعرف
واحد عتالي في السوق
زمن المحطة .. محطة القطر .. قطر عطبرة .. عطبرة بلد الحديد .. الحديد والنار .. نار القطر
المهم
واحد شيلو قفة . وشايل القفة البوليس مسكو
تراهو فيها زول ميت ومقطع
القفف الكبيرة ديك العندها اضنين . لامن اهلنا يسافروا بستفوها ويخيطوها
القفة ماعندها سيد
مسكو العتالي قريب سنة حتي طلعوهو
اها
تكورك عتالي تعال شيل القفة ولا الكرتونة دي
يقول ليك
تاني إلا عنكوليب ولا قصب سكر
اها
تاني
😆😆😆
|
Post: #25
Title: Re: بوست عبد الحفيظ أبو سن الهادئ
Author: حمد عبد الغفار عمر
Date: 02-02-2017, 06:49 PM
Parent: #24
سلام يا شباب
نحن زماااااااااااااان كنا بنشيل الود
بوستات وأزاهر دي بشيلها بكري 
بكري لما يوقف زول ما تكتب اسمو في عنوان بوست
اعتقد دي مادة ضمنية في اللائحة.
|
Post: #26
Title: Re: بوست عبد الحفيظ أبو سن الهادئ
Author: عبدالعزيز الفاضلابى
Date: 02-02-2017, 07:53 PM
Parent: #25
سلام ودالزبير ,,
اولاً انا جيت راجع عشان خاطر ناس سمحين زيك وزى ودابسن شيخ العرب ولا أريد كتابة كل الاسماء ,, لكى لاننسى احد.
ود قبانى كتب بوست بمعنى عميق بشأن اعلانى الإنسحاب وكلماتكم فيه لم تترك لى مجال للفرفصة يضاف اليها مراسلة
الحبيب ودابسن عبر وسائط اخرى .
ثانياً بالنسبة لكلامك فى المقتبس ادناه
| Quote: استغربت ذلك، لماذا يُغلق هذا البوست (الهادئ) بالذات بينما يعج المنبر بالبوستات (الثائرة) في نفس الموضوع؟ |
انا زمان قلتها ليكم,, بكرى البِدورو بسميهو بخيت
والمابدورو بسميهو قِنِّيط.
|
Post: #27
Title: Re: بوست عبد الحفيظ أبو سن الهادئ
Author: علاء سيداحمد
Date: 02-02-2017, 08:18 PM
Parent: #26
Quote: اول بوست لي يغلق منذ إلتحاقي بالمنبرذكرني احتفل بسنويته
|
يا ود الزبير كامل التضامن مع حـفيظ
|
Post: #28
Title: Re: بوست عبد الحفيظ أبو سن الهادئ
Author: معاوية الزبير
Date: 02-03-2017, 02:27 AM
Parent: #27
هههها سنويتو شنو يا علاء، سأذكِّرو بصبحيتو .. رايت ناو
|
Post: #29
Title: Re: بوست عبد الحفيظ أبو سن الهادئ
Author: معاوية الزبير
Date: 02-03-2017, 02:39 AM
Parent: #28
(كدى اشرح لينا ... قرحت ... بتاعت المطبول ود اب سن ده)
شكرا للإنارة يا جُلّه
قرحت؟! ناقص تقولي ما الفرق بين العنكوليب وقصب السكر
(قرحت) دي اسال منها الفاضلابي أو الذي مِنّو من ناس الضهاري
نحن ناس مدن ساكت
أو كما غال الأمير
|
Post: #30
Title: Re: بوست عبد الحفيظ أبو سن الهادئ
Author: معاوية الزبير
Date: 02-03-2017, 02:48 AM
Parent: #29
شعار أبو سن الجديد
لا أرى لا أسمع لا أتكلم (أو المشي جنب حيط بكري)
اها
تاني
😆😆😆
|
Post: #31
Title: Re: بوست عبد الحفيظ أبو سن الهادئ
Author: يحي قباني
Date: 02-03-2017, 03:02 AM
Parent: #30
طبلنا و انطبلنا .. لكن طبِل زي ده اصلوا ما شفنا
حفيظ ... قبلك وحدك ... :)
ما يهمك يا صاحب ... جوز ما يخسر ...
|
Post: #32
Title: Re: بوست عبد الحفيظ أبو سن الهادئ
Author: معاوية الزبير
Date: 02-03-2017, 03:23 AM
Parent: #31
حلوه يا قبه
يقدر طبلكم يطبل طبلنا زي ما طبلنا طبل أبو سن
بالله (جوز ما يخسر) دي من السبعينات تاني ما سمعتها
عليك الله احكي لينا حكايتها
اصلو البوست معمول للمرح، لا فيهو شكية ولا احتجاج
(وجه غامز بتاع حبيبنا الغايب عووضه)
|
Post: #33
Title: Re: بوست عبد الحفيظ أبو سن الهادئ
Author: معاوية الزبير
Date: 02-03-2017, 03:39 AM
Parent: #32
بكري لما يوقف زول ما تكتب اسمو في عنوان بوست
اعتقد دي مادة ضمنية في اللائحة.
ولا للمرح ساكت يا حمد؟
أنا ما زعلان إلا لصاحبنا عمر أبو عاقله قال كان عايز ينداح في بوست أبو سن
يا لها من اندياحة ما تمت
|
Post: #34
Title: Re: بوست عبد الحفيظ أبو سن الهادئ
Author: معاوية الزبير
Date: 02-03-2017, 04:09 AM
Parent: #33
انا جيت راجع عشان خاطر ناس سمحين
كلنا رجعنا عشان خاطر ناس حلوين تلقى عندهم ومعاهم هنيهة للضحك
الضحك انتقاما من جدية الحياة
هذا رغم أن رؤية اسمك ساكت أصبحت تعيدني إلى تلك اللحظات الحزينة
مكّنتني مكالمتك يومها داك من الانتقال إلى حالة من الرضا وتطييب الخاطر كنت أحتاجها للتماسك
ثم إنو هنا بتعرف الناس والما بتعرفو بتعرف البعرفو وممكن تشتكيهو ليهو
ذلك أنني حاولت أنشط في الفيسبوك مؤخرا فوصلتني رسالة في الخاص أكاد أتقيأ عندما أتذكرها
قلت هسع صاحب الرسالة دا يلموا فيهو كيف ويشكوهوا لمنو
والمشكلة ما بعرف الحظر بتم كيف هناك ولا هنا زاتو
و.. اهو قاعد في (قائمة الأصدقاء)!
نسوي شنو
|
Post: #35
Title: Re: بوست عبد الحفيظ أبو سن الهادئ
Author: عبدالحفيظ ابوسن
Date: 02-03-2017, 04:49 AM
Parent: #34
اها الزول دة منو خبر
الفاضلابي ومثلك من يستحق الاحتفاء
لو قفل البوستات بجيبك كان جبتك زمان
|
Post: #37
Title: Re: بوست عبد الحفيظ أبو سن الهادئ
Author: يحي قباني
Date: 02-03-2017, 05:10 AM
Parent: #32
Quote: حلوه يا قبه
يقدر طبلكم يطبل طبلنا زي ما طبلنا طبل أبو سن
بالله (جوز ما يخسر) دي من السبعينات تاني ما سمعتها
عليك الله احكي لينا حكايتها
اصلو البوست معمول للمرح، لا فيهو شكية ولا احتجاج
(وجه غامز بتاع حبيبنا الغايب عووضه)
|
انا الجابني للسبعينات شنو كمان يا مِعا ؟
خالى عم عووضة يجي يحكي لينا القصة كلنا ...
|
Post: #36
Title: Re: بوست عبد الحفيظ أبو سن الهادئ
Author: يحي قباني
Date: 02-03-2017, 05:04 AM
Parent: #26
Quote: ود قبانى كتب بوست بمعنى عميق بشأن اعلانى الإنسحاب وكلماتكم فيه لم تترك لى مجال للفرفصة يضاف اليها مراسلة
الحبيب ودابسن عبر وسائط اخرى .
|
الفاضلابي يا زول يا حلو ... بركة الشفناك تاني ياخي ...
ام بنايا قش دي ما تسوى ...
بعدين نتفق مرات و نختلف مرات .. لكن ياخ نطمئن بوجود امثالك و الله ...
هسي أبو طبلة ده لما يغيب كم يوم كده ننكرش نكوس ليو ...
|
Post: #38
Title: Re: بوست عبد الحفيظ أبو سن الهادئ
Author: عبدالحفيظ ابوسن
Date: 02-03-2017, 05:18 AM
Parent: #36
هههه
حلوة قباني
من اجل الاصدقاء نتحمل
ياخ نحن متحملين عمر البشير وطاقمه الفريد من اجل نكهة الكتاحة والغبار
ما شين ودشن
شن الحبك فيهو
الحب في زاتو مبرر كافي
كما قال الفنان الصاعط!
مثل الفاضلابي ذكرني حكاية الزول المشي يطلع اوراق ثبوتية
اسمو حسن علي قنيط
الضابط قال ليهو اسمك شين غيرو
جا راجع تاني قال غيرو
بلة حسن قنيط
مش قلت ليكم
قرحت
|
Post: #39
Title: Re: بوست عبد الحفيظ أبو سن الهادئ
Author: معاوية الزبير
Date: 02-03-2017, 05:57 AM
Parent: #38
خلاص وكت جيت يا مطبول تعال امسك البوست دا أنا صاحي قبل الفجر
والله عندنا جنس صقط في الدوحة، 8 درجات فوق الصفر (طبعا)
صقط بس ما معاهو أي حاجة، صافي ومصقول زي البلور
صقط صامت ينتظرك تطلع تختبرو
طلعت اسخن العربية قلت لو زول فكر يسوقها
جيت راجع من الشارع خشبة بس
والحوض إياهُ ينتح
البرد عدو العضام
هسع ناس كندا يجوا يقولوا ليك خلّو الدلع دا يا بتاعين الخليج
كندا شنو، الطيب عباس المعانا في الدوحة دا يجي يقول ليك: البرد دا عادي يا شاب
وناسي نحن أيام شبابنا في التمانينات قعدنا نتونس كتف بكتف مع والده
ربنا يرحمه ويغفر ليه ويعوضو شبابو بالجنة
|
Post: #40
Title: Re: بوست عبد الحفيظ أبو سن الهادئ
Author: عبدالحفيظ ابوسن
Date: 02-03-2017, 06:24 AM
Parent: #39
قالوا المسكين صقطو قدر لحافو
ودة تحوير للمقولة السودانية
المسكين الله بيديهو صقط قدر لحافو
ف شنو
لاوزت من حكاية يجيك زول يخلي كل كلامك دة وبشبكك في نقاش قتلوه المعتزلة والمرجئة والجهمية قتلا .. قتلا دي حال ولا مفعول مطلق هسة .. بالضمة ما يقراها واحد بكسر اللام يدخلنا في قانون الشخصية
عندنا صقط ولا صقط خمر ولا خمر
صقط صباح والضهر تفتش محل تخت سويترك وشالك وين
من زمن المدرسة جني وجن عوارة الصقط دي .. بعتذر سونبهار ما يكون الصقط دة قريب واحد ويدخلنا كما قال المهدي داك
المهم
تمشي المدرسة متلفح الحصة التالتة الصقط يطير
ما تعرف تودي فنيلتك وين
تشيل الفنيلة ولا الشنطة
الزمن داك لم يخترع السويتر
ولم تخترع ربطة الفنيلة في النص
اها كنا بنقول في شنو
|
Post: #41
Title: Re: بوست عبد الحفيظ أبو سن الهادئ
Author: جلالدونا
Date: 02-03-2017, 01:01 PM
Parent: #40
على ذكر الصقط قالوا اعمامنا قاعدين فى شمس الضحى كايسين الدفو و متلفحين
شالاتن و يضربو فى الشاى اب لين و راجين الفطور اب قراريص
اليوم جمعة و البرد شديد و الونسة الفارغة هم اسيادا
عمنا الفضل ود العباس اتلفت على عمنا حُمّد خير و قالّو مالك ساكت
باقيلى شايلّك همّاً تقيل
عمنا ود الباهى لفح الكلام و بى ضحكة قال :
فى الباقلى غلبتو السنة .. انت البوديك تهابش فى الصقط ده شنو
حاج على قالّو : ام بقى كدى لا تشيل هم دى خشة برد ساكت
إت ماك عارف البرد بعقّل الكرعين ؟
قالّو عارف بس كمان مو قدر كدى
قالولو خلاص : خشّة البرد علاجا الكى
قالّهم تكويونى وين
قالولو فى البكان داك
قالّهم كان كدى اخير خشة البرد
|
Post: #42
Title: Re: بوست عبد الحفيظ أبو سن الهادئ
Author: محمد البشرى الخضر
Date: 02-03-2017, 01:04 PM
Parent: #41
خخخخخخ
بايخة بوخ !
|
Post: #43
Title: Re: بوست عبد الحفيظ أبو سن الهادئ
Author: جلالدونا
Date: 02-03-2017, 01:10 PM
Parent: #42
خلاص نحلّيها ليك
فضحك القوم حتى اٌغمى عليهم و هم ,,,,
|
Post: #44
Title: Re: بوست عبد الحفيظ أبو سن الهادئ
Author: Basamat Alsheikh
Date: 02-03-2017, 05:59 PM
Parent: #43
معاوية
في اتنين في المنبر العام ما بيزعلوا ابدا إلا اذا بلغ السيل الزبى..
وحتى اذا زعلوا فاسلوبهم يفرح وهما عبد الحفيظ ابو سن ويحى قباني
وعبد الحفيظ ابو سن زعل من صاحب الحوش عشان قفل البوست..
بس بنقول لعبد الحفيظ : انت الخلاك تمشي تهبش في عش الدبابير شنو؟..
وما دام جيتو للنكات.. اها دي نكتة سمعتها الصباح ده من واحدة شايقية بتنكت
على الحلفاويين...
وقالت ان حلفاوي كان متعود يصلي في قريته ورا امام بيقرأ فقط السور القصيرة
في الصلاة.. ولكن يوم جا المسجد لقى امام جديد .. ووقف الامام وبدأ الركعة الاولى
بسورة البقرة... وبعدما قرا 20 آية قرأ: يا ايها الناس.. يا ايها الناس... ونسى باقي
ألآية ومنتظر واحد من المصلين يوريه باقي الآية .. وهنا صاح الحلفاوي: اوعا واحد
يوريه .. اسكتو ساكت... الخلاه يمشي يهبش في الغريق شنو!!
عبد الحفيظ ابو سن ما تهبش في عش الدبابير.. مع انه بوستاتك كلها رائعة وسمحة
حتى اذا مشيت تهبش في عش الدبابير.
ودمتم بالف خير وصحة وعافية
|
Post: #45
Title: Re: بوست عبد الحفيظ أبو سن الهادئ
Author: عبدالعزيز الفاضلابى
Date: 02-03-2017, 09:50 PM
Parent: #44
| Quote: في اتنين في المنبر العام ما بيزعلوا ابدا إلا اذا بلغ السيل الزبى. |
سلام يابسمات ,, بما إنّ معنى (الزُّبَى) كما يقول صاحب لسان العرب:
« جمع زُبْيَة، وهي الرابية لا يعلوها الماء » [لسان العرب / باب الواو والياء من المعتل، فصل الزاي]،
والرابية: هي كل ما ارتفع عن الأرض. [راجع: لسان العرب]، وقيل أيضًا في معناها: أنها حفرة تحفر للأسد بقصد اصطياده،
ولا تحفر إلا في مكانٍ عالٍ من الأرض؛ حتى لا يبلغها السيل. [راجع: لسان العرب].
والله يابسمات يابتى ,, فى ناس هنا مش يخلو السيل يبلغ الزُبَى ديل يخلوهو يبلغ قمة ايفريست ذاتا ,,
والله يابنتى قدر ماطولت روحى من الفين وتمانية وانا احاحى فى الناس
دى لكن فى النهاية حبل الجَدَّاعة بتاعى انقطع فاخدت المسألة ضراع
واهو وقعنا فى الغلت ,, فامسحَنَّها لى فى وشِّى والله خاتركن غالى عندى
شديد وكثيراً ما اضَعَكُنَّ فى الاعتبار قبل ما اكتب مداخلة عشان ما أغَلِّت
عليكَن انتى واخواتك ,, حتى اختكن منى عمسيب لمان غلتَت فى حقى
ووصفتنى بانى ضال ومضِل ماحبيت ارد عليها واكتفيت بأن احترمها صمتاً
لأنها فى ذات يوم قالت لى انها تراعى فى مداخلاتها الا تُغضب
نفراً ذكرتهم وكنت منهم حتى إنها لتَضطر لتعديل مداخلة مراعاة لهم.
فأكبرت فيها ذلك ولم استغربه من مثلها لأنها وإن اخطأت فى حقى
فالجمال عندها يُذهب ما ساءنى منها.
او كما قال الرندى:
هي الأيامُ كما شاهدتها دُولٌ مَن سَرَّهُ زَمنٌ ساءَتهُ أزمانُ
فقد كنت اتمَثَّل قول القائل:
ألا لايجهلَنَّ أحد علينا ,, فنجهل فوق جهل الجاهلينا
وقتها كان الغضب قد غلب الحلم ,, وتذكرت وقتها
من استُغضِب ولم يغضب فهو حمار ,, ارجو ان أكون
قد وفيت حقَّكُن علىَّ.
|
Post: #46
Title: Re: بوست عبد الحفيظ أبو سن الهادئ
Author: Basamat Alsheikh
Date: 02-04-2017, 03:12 AM
Parent: #45
ود الفاضلاب
عداك العيب..زي ما بيقولو المصريين..انت من الارقام الصعبه في المنبر العام وحكيم المنبر زي ما بتوصفك بت السيد..وكلامك كله تهذيب ومنطقي....واذا رديت بقسوة غبس للشديد القوي
ودمت بالف خير
|
Post: #47
Title: Re: بوست عبد الحفيظ أبو سن الهادئ
Author: معاوية الزبير
Date: 02-04-2017, 04:02 AM
Parent: #46
(في اتنين في المنبر العام ما بيزعلوا ابدا إلا اذا بلغ السيل الزبى..
وحتى اذا زعلوا فاسلوبهم يفرح وهما عبد الحفيظ ابو سن ويحى قباني)
صاح يا بسمات غضبهم جميل زي بسمتهم
هكذا كتب الشاعر العظيم حميدة أبو عشر
غضبك جميل زى بسمتك
(في) كل حال شكلك بديع
|
Post: #48
Title: Re: بوست عبد الحفيظ أبو سن الهادئ
Author: عبدالحفيظ ابوسن
Date: 02-04-2017, 05:25 AM
Parent: #47
تسلمي بسمات
وكتر خيركم كلكم
الغرب الذي يعجب به الناس من انضباط في مؤسسات حكمه . وشفافية ونزاهة
الغرب الذي يرفض فيه قضاته اوامر رئيسه . ذات الرئيس الذي تركع له دولا أخري بواسطة ركوع رؤساؤه
ذلك الغرب الذي نراه الآن كان تتويجا لصراعات دموية وفكرية ونضالا طويلا
ونحن
حتي الآن لا نبارح منصة الرأي الواحد رغم كل تلك التجربة الانسانية
نصادر حق الغير في ان يقولوا لنرد عليهم
نستجيب للابتزاز والتهديد والوعيد
ونغلق كل كوة امل
الواقع التاريخي يقول
لن يستمر الامر هكذا
|
Post: #49
Title: Re: بوست عبد الحفيظ أبو سن الهادئ
Author: يحي قباني
Date: 02-04-2017, 06:39 AM
Parent: #48
Quote: المهم، لم أشارك لقناعتي بأن الدين دا زي الشامة في أجساد البشر يستحسن عدم هبشها
وإلا فقد نعرّض هذه الشامة لخطر التحول إلى سرطان كما هو شائع علميا
أما أدبيا فدونكم صاحبنا عبد القادر الكتيابي كتب ومصطفى غنى:
قطع شامة هواك من قلبو إلا هواك نبت تاني وملا الساحات
|
و في ( ذات ) الشامة ...
سماعين ود حد الزين حلف و قال :
وحياة صمتك انتي وحاة الشامة
الشامة الفوق خدك نايمة دليل وعلامة
تزيد حسنك بهجة تزيدو وسامة
و كم لي من ( حزن قديم ) بذات شامة يا صديقي ...
|
Post: #50
Title: Re: بوست عبد الحفيظ أبو سن الهادئ
Author: عبدالحفيظ ابوسن
Date: 02-04-2017, 09:57 AM
Parent: #49
خاض الغرب معاركه
واسس لسلطة مدنية منضبطة ونظام تعليمي راقي ومفيد وممتع
عيب الارهاب
انو بحولنا لارهابين دون وعينا
بولد في داخلنا قيمه
|
Post: #51
Title: Re: بوست عبد الحفيظ أبو سن الهادئ
Author: عبدالحفيظ ابوسن
Date: 02-04-2017, 10:03 AM
Parent: #50
قتلتنا الردة
قتلتنا ان الواحد فينا
يحمل في الداخل ضده
رحم الله مظفر
و
رحم الفيتوري
يمشون
ونجري للوراء
حتي نكمل المشوار
جري شنو في الصقط دة كما قال معاوية
كان ما قالو .. قالو
|
Post: #52
Title: Re: بوست عبد الحفيظ أبو سن الهادئ
Author: أحمد محمد عمر
Date: 02-04-2017, 10:38 AM
Parent: #51
Quote: خلاص نحلّيها ليك
فضحك القوم حتى اٌغمى عليهم و هم |
لا لا ما بحلوها كدي
بضيفوا ليها محاسن جيبي بطانية ولا محاسن جيبي فيكس
Quote: في اتنين في المنبر العام ما بيزعلوا ابدا إلا اذا بلغ السيل الزبى..
وحتى اذا زعلوا فاسلوبهم يفرح وهما عبد الحفيظ ابو سن ويحى قباني |
لا لا بختلف معاك
كلامك دة بنطبق على ابوسن لكن قباني ما بزعل بسهولة أي نعم بس لو زعل زعلو كعب برد البنية بي بنية
قبل اسبوعين كدة حسيت بي إني بقيت بتاع مشاكل .. بنشبك في الناس من طرف .. لحدي ما واحد طردني من بوست .. والله صحي قمت طوالي عملت بنظرية اب سن .. ساين آوت اسبوع أو يزيد ما فتحت سودانيز اونلاين بتاتاً لحدي ما حسيت بروحي ريلاكس وجيت داخل زي كأنه ما كنت مطرود
اتذكرت محمد عبد الله الحسين الانشبكت فيه قبل ما يطردني التاني داك .. فكرت ارسل اعتذار لمحمد بالماسينجر عن خشونتي معاهو واللي قابلها بتهذيب وطولة بال الله يديني زيها .. لكن خفتو يشكر المصريين تاني أقوم اندم على الاعتذار وألخو تاني
|
Post: #53
Title: Re: بوست عبد الحفيظ أبو سن الهادئ
Author: عبدالحفيظ ابوسن
Date: 02-04-2017, 02:39 PM
Parent: #52
اووووو معلم
تعرف يا احمد لاحظت متأبط قرجتك وبارم شنبك ههه قبل شهر او نحو ذلك
اتا قايل الزول ما بتنفخ ! والله اتنفخ وابقا تيوة
لكن ألزمت نفسي ان لا ارد وانا منفعل
حارة جمرة بس
تجيك رغبة تقول للزول
اتا والقاعد يتفرج دة
تعرف الواحد يخاف يطق بالجد .. ف شنو حقو نقلب
ريسنا مش قال
البجيك متشمر لاقيهو عريان
|
Post: #54
Title: Re: بوست عبد الحفيظ أبو سن الهادئ
Author: أحمد محمد عمر
Date: 02-04-2017, 05:44 PM
Parent: #53
| Quote: تعرف يا احمد لاحظت متأبط قرجتك وبارم شنبك ههه قبل شهر او نحو ذلك |
والله ما قلت إلا الصدق .. لمن انا ذاتي استغربت في روحي
الغريبة إني ما بتاع مشاكل كلو كلو .. والله صحي
لكن دي حراسة المنبر طول اليوم بتخليك تدخل في الموود بتاع الشكل
غايتو لقيت طريقتك حلوة ومريحة .. تتنفخ تعمل ساين اوت تنفجر برة برة اصلو الفش غبينتو خرب مدينتو
وبعدين ياخي تقعد تشاكل ليك في ناس انت ما بتعرفهم ولا بعرفوك واحتمال لحدي ما تموت ما تلاقيهم .. فوق شنو ياخ !
هسة قبل شوية مريت على بوست معاوية الصايم العاملو في المستنير .. زعلني شديد خلاص داير اقول ليه ياخي انت مالك ومال حياة الناس الشخصية! هسة في زول بسألك لمن تمشي الخرطوم بتقعد مع منو! وجات في بالي كلمات من نوع انت ما عندك موضوع والمستنير لو جاراك يبقى ما عندو موضوع زيك
تاني قلت مالي ومالو ياخ المستنير لسانه صاقعة إن داير بدق بيه الواطة براهو .. دة غير إنه ممكن يسيب المستنير وينشبك فيني أنا
المهم شكراً أبو سن على الدرس الجميل ياخ اللي فهمتو أنا كما يلي : قبل الدخول الرجاء ترك عكازك خارج أسوار المنبر
|
Post: #55
Title: Re: بوست عبد الحفيظ أبو سن الهادئ
Author: يحي قباني
Date: 02-04-2017, 06:30 PM
Parent: #54
Quote: لا لا بختلف معاك
كلامك دة بنطبق على ابوسن لكن قباني ما بزعل بسهولة أي نعم بس لو زعل زعلو كعب برد البنية بي بنية
|
ده شنو يا احمد عمر ...
وين بنيتي دي ياخ ...
انا و الله ما بخبر زعل ... الا التسمم الاسفيري بيأذيني كم يوم كده ... حمية خفيفة و تنتهي الاعراض :) ...
لكن ما بحرد نهائياً ... و احرد من منو و احرد في شنو ( على قولة حميد مع التصرف ) ...
|
Post: #56
Title: Re: بوست عبد الحفيظ أبو سن الهادئ
Author: أحمد محمد عمر
Date: 02-04-2017, 07:14 PM
Parent: #55
غايتو لما يجيك ايمن محمود - ولا هو منو البقول ليك مستر قباني داك - بتلخو زي الما حاصل حاجة
|
Post: #57
Title: Re: بوست عبد الحفيظ أبو سن الهادئ
Author: جلالدونا
Date: 02-05-2017, 07:22 AM
Parent: #56
احمد عمر .. قبانى و ود اب سن
لو سمحتو ما تحرفوا لينا البوست
مشاعركم الفياضة دى ما بتلزم سيد البوست فى شى
و كمان ما بتخدم بنية البوست الفكرية
صقيعة البورد اهدىك قدّامكم
امشو اتمردغو فيها زى ما دايرين
وشاحد ربى يكرمكم بى احد الشريفين
الشريف ود البشرى
وللا الشريف ود دفع الله ... على ما عمر
عشان تشوفوا الاختلال العقلى و عدم ::: التئهيل ...
و معاها الحاجة الاسمها فكرية ديك
___
يا ود ابو عاقلة ياخى ما تنداح قبل ما يحصل ما لا يحمد عقباهو
الليلة لاقيت همسلف فى الدافنة بالنهار و لاقيتو تانى فى الفراش بالليل
حسيت انو عينو على البوست ده
قمت كجس نبض قلت ليهو ::: ما شاء الله البورد اليومين ديل هادئ
قال لى : هدوء ما قبل العاصفة ... تصدّقوا جاتنى زمّة فى قلبى
غايتو كان شال عدّتو بلاقيهو فى صلاة الجمعة و ارجعا
اما انتو ... شوفو ليكم حلل
حلل جى كتبت باللحمر عشان ما تفهموها غلت
|
Post: #58
Title: Re: بوست عبد الحفيظ أبو سن الهادئ
Author: عمر أبوعاقلة
Date: 02-05-2017, 09:40 AM
Parent: #1
كمان بقيتوا تقنطروها ليه بين قوسين
((غضبك جميل زى بسمتك
(في) كل حال شكلك بديع))
انت قابل ود البشر(ي) ما بشوفها يعني الا بين قوسين
حكمتك بالغة
|
|