Post: #1
Title: If you want to remain credible, remain consistent
Author: محمد البشرى الخضر
Date: 02-02-2017, 05:55 AM
Parent: #0
04:55 AM February, 02 2017 سودانيز اون لاين
محمد البشرى الخضر-العين-الإمارات
مكتبتى
رابط مختصر و العبارة من عنوان بوست قديم لملاسي, تذكّرتها أمس في بوست - للأسف مطبول - لود اب سن
المهم...
بدون تفاصيل و بتاع, العبارة في العنوان تكفي
يا الله مافي (تعالى عن ذلك علوا كبيرا) و الوحي مختلق من النبي محمد صلى الله عليه وسلّم (استغفر الله) يا كمان الله في و أوحى للنبي الوحي.
دي الكونسيستانتي البنعرفها, قناعاتك ثابتة في مختلف السياقات
لكن لكل حالة لبوسها ولكل سياق قناعاته حسب الظروف و الحالة المزاجية حينها, دا محض حراق روح ومسك زمن بالناس ساي.
يمكن البوست يتقفل أو يرحل للمكتبة, لكن على الأقل قلت رايي, حرية تعبير وكدا :)
|
Post: #2
Title: Re: If you want to remain credible, remain consistent
Author: جمال ود القوز
Date: 02-02-2017, 06:18 AM
Parent: #1
عارف أغلب من يتعاطى الافكار الالحادية ويسب الأديان والمعتقدات..
وتجده دائم التمرد على القيم المجتمعية وغير متصالح معها ..
أصلا ما بيمرق من اتنين ..
يا عنده مشكلة طبقية في مجتمعه وبيعاني من عقدة اضهاد إثني ..
يا بيكون عايز يلفت الانظار ورافض إنه يكون بعيد ..
عن اهتمام الآخرين ومحط أنظارهم ..
والاثنين ما بعيدات من حتة الاتساق دي .. وبرضو بينهم ارتباط ..
|
Post: #3
Title: Re: If you want to remain credible, remain consistent
Author: أيمن محمود
Date: 02-02-2017, 06:27 AM
Parent: #1
يا الله مافي (تعالى عن ذلك علوا كبيرا) و الوحي مختلق من النبي محمد صلى الله عليه وسلّم (استغفر الله) يا كمان الله في و أوحى للنبي الوحي. دي الكونسيستانتي البنعرفها, قناعاتك ثابتة في مختلف السياقات
يا حليل الرمادية 
من ليس معنا فهو ضدنا
|
Post: #4
Title: Re: If you want to remain credible, remain consistent
Author: محمد البشرى الخضر
Date: 02-02-2017, 06:43 AM
اهلا ود القوز و أبويمن
مع اني لا أحبّذ التعميم يا ود القوز في التناول لكن إلى حد ما اتفق مع الفرضية الثانية في مسالة لفت النظر و اضف عليها نيل الرضا كما وردت على قلم زميل
كونها حاضرة عند كثيرين ممّن قابلتهم سواء في البورد هنا أو في غيره وواضح تأثيرها على مواقفهم.
أيمن أوف بوينت كالعادة, يبني أقرأ ثم اعد القراءة مرّة و اتنين, ما ضروري تكتب اي حاجة و السلام :)
|
Post: #5
Title: Re: If you want to remain credible, remain consistent
Author: علي دفع الله
Date: 02-02-2017, 06:53 AM
Parent: #4
الكريدابيلتي ما بناباها بس الفيك اتعرفت 😃😃😃
ابو حتوت ازيك يا اخي
|
Post: #6
Title: Re: If you want to remain credible, remain consistent
Author: محمد البشرى الخضر
Date: 02-02-2017, 07:18 AM
Parent: #5
هلا ابوعلوة الحمد لله نحن بخير انتو كيف و الزراعة كيف ان شا الله الأمور طيبة
الكريديبيلتي تاباها كيف!! وهل يسوى الرجل شيئا بدونها
___________________
هسّي يخلّو اي شي ويمسكوا في الرجل دي يقول ليك ذكوري و بتاع هههههههه
|
Post: #7
Title: Re: If you want to remain credible, remain consistent
Author: علي عبدالوهاب عثمان
Date: 02-02-2017, 07:44 AM
Parent: #6
ود البشرى .. مودتي ..
زمان عندنا هناك في ضواحي الدنيا كان ( سب الدين ) الجريمة الكبرى .. ثم التبول واقفاً .. كنا نقول عديل الزول ده كافر .. رغم عدم إنتظام الناس في ذلك الزمان في أمور دينهم وخاصة الصلاة .. وشرب الخمر كان عادي ( عرقي ، دكاي ، نبيذ ) ولكن مع كل ذلك ( سب الدين وكمان البنقو) كان خط أحمر .. ليس فقط شرعاً ولكن حتى إجتماعياً .. أذكر ذلك الشاب في القرية المجاورة كان يعمل في اللواري السفرية زمن الفورد أبو اربعة .. آخر تسريحة ابراهيم عوض وسن دهب .. ولكن إشتهر بين الناس وطبقت شهرته آفاق في كل القرى ووسط ترابلة ( صعلوق ويسب الدين ) وكنا نحن في مقتبل العمر نتجمع حوله عندما يصل اللوري من أمدرمان ربما كان يعرف قصدنا وبدون أي مقدمات نجده يشهر بسب الدين لمساعدين اللوري .. مما كان يجعلنا نغرق في الدهشة والاستغراب وبعدها كان ينزل من اللوري ويمشي الخيلاء وكان يشار إليه في أي مكان .. حتى من يأتينا من خارج القرية كنا نطلعه على هذا الشاب ( أهو ده الزول الكافر) فصار أشهر من وردي من جكسا .. ربما هي نظرية ( خالف تذكر) .. لأن الشهرة سهلة جداً من خلال التدين المتشدد .. أو من خلال الخروج عن الدين .. كلا الحالتين تجلب نوع من التميز للشخص ..
قبل أسابيع كنت في إجازة في قريتنا وجدت منافسة شديدة جداً بين شباب الدعوة والسفليين أن تصبح شيخ يشار إليك بالبنان ويفسح لك المنبر يوم الجمعة وتكون مميز إجتماعياً وفي مقدمة المدعوين ما في داعي تكون دكتور أو مهندس وتتعب لسنوات .. فقط أذهب إلى ضواحي الدنيا هناك وقبل صلاة الظهر أقرأ قليلا في سيرة أحد الصحابة مثال ( مصعب بن عمير رضي الله عنه ) وبعض الاحاديث التي فيها الوعيد للكافرين .. ( كلها نصف ساعة فقط ) ولكن فقط يكون صوتك جهوري وشكلك الخارجي مناسب ومن خطبة واحدة تكون سيد الموقف في القرية حتى ظهور منافس آخر وهذا جلب نوع من الخلاف بين الشباب ..
وهنا نستحضر قصة الكاتب المصري مصطفى محمود الذي صار في مصاف أكبر الكتاب العرب
وأشتهر أكثر منهم في فترة قياسية بمجرد إعلانه للالحاد وقد رجع بعد ذلك ( رحلتي من الشك إلى اليقين ) وغيرهم ..
ود البشرى حبيبنا .. هل هنا أشهر من أقربائي عثمان وهشام ؟ بوست واحد فقط جعلهم من أشهر الناس ..
صدقني إذا حضرا إلى جمعيات أهلنا في جدة فقط السلام والمقابلة تكون بالتذاكر ..
واحد من الشباب قال لي ( ديل معاهم حق .. مش جدنا الكبير قال – دخل من هنا وسوف يخرج من هنا ) بالنوبة ( أنقون تورو إنقون ها فلي ) ..
ود البشري مودتي خلينا مع الموضوع خارج نطاق الامور التشريعية المعقدة يعني كده من ناحية إجتماعية .. نتناول الموضوع على سبيل الونسة والاخوانيات ربما يأتي بنتيجة ..
على طريقة محمد جلال الاخيرة
نحن خلاص بقينا في الزمن الضائع ما في فرصة ونسأل الله حسن الخاتمة .
آسف للاخطاء الاملائية ..
شكراً للبوست وآسف كمان للاطالة
|
Post: #8
Title: Re: If you want to remain credible, remain consistent
Author: أيمن محمود
Date: 02-02-2017, 08:16 AM
Parent: #7
مسألة الاتساق المرتبطة بتصنيف مؤمن او غير مؤمن دي ياها ذاتا مسألة من ليس معنا فهو ضدنا!
قصة انو مواقف شخص ما في امور مختلفة والتي "تبدو" للبعض انها غير متسقة مع "التصنيف" مؤمن وغير مؤمن - فهي قصة مكررة وبايخة
العايز ياخد المسألة lump-sum هو حر تماما والعايز يقيف عند كل صغيرة وكبيرة ويشكك ومن ثم يؤمن او ما يؤمن فهو حر كذلك
لكن نعمل شنو مع ناس من ليس معنا فهو ضدنا وناس ده معانا وده ضدنا وده رمادي
-
. طبعا طبعا الواحد لازم يقرأ مرة ومرتين وتلاتة لكل كلام عميق متشعب متبحر متقعر شائك المعاني والمرامي
. بعدين الحدة في الرد انا شايفها كانها مبنية على "اصطفاف" وغير متسقة الحال الريلاكس
|
Post: #9
Title: Re: If you want to remain credible, remain consistent
Author: محمد البشرى الخضر
Date: 02-02-2017, 08:53 AM
Parent: #8
سلامات يا عمّك علي عبد الوهاب, أمس لاقتني تغريدة كاتبها واحد سعودي عن أحد الشيخ في الفرق بين المتشدد و غير المتشدد
قال المسلم المتشدد يهتم بإيمانك بينما العادي يهتم بإيمانه هو , المتشدد يجتهد ليثبت أنك سوف تدخل النار بينما العادي يجتهد ليدخل هو الجنة!
يلّا اقرا نفس الكلام دا بس شيل من المتشدد وخت بدلها الملحد - طبعا الملحد بتاع التحشيش ونيل الرضا - ح تلقى نفس الحكاية منطبقة بشكل غريب
فعلا المتشدد و الملحد المحشش وجهين لعملة واحدة!
يا ابويمن حدة شنو الله يهديك! قولة "يبني" والعلامة دي ":)" ما كفاية؟ يعني لازم الوجه الضاحك سيد الإسم حتى تقتنع, طيب ما مشكلة هاك:
أيمن  أوف بوينت كالعادة, يبني أقرأ ثم اعد القراءة مرّة و اتنين, ما ضروري تكتب اي حاجة و السلام :)
أها! قصّرت معاك.. الأصفر دا عزيز وغالي وما بجيبه إلاّ للحبايب :)
|
|