يا كبر .. بتعرف الأغنية دي ؟

يا كبر .. بتعرف الأغنية دي ؟


01-22-2017, 06:52 AM


  » http://sudaneseonline.com/cgi-bin/sdb/2bb.cgi?seq=msg&board=490&msg=1485064342&rn=2


Post: #1
Title: يا كبر .. بتعرف الأغنية دي ؟
Author: يحي قباني
Date: 01-22-2017, 06:52 AM
Parent: #0

05:52 AM January, 22 2017

سودانيز اون لاين
يحي قباني-فى الدنيا العجيبة
مكتبتى
رابط مختصر

اول اغنية يغنيها الاستاذ شرحبيل في الاذاعة السودانية

وهي من كلمات الشاعر رضا محمد عثمان والحان شرحبيل أحمد ...

و التحية للصديق ود النصري الذي زين بها مكتبة الأغنية السودانية اليوم ..


Post: #2
Title: Re: يا كبر .. بتعرف الأغنية دي ؟
Author: جلالدونا
Date: 01-22-2017, 07:18 AM
Parent: #1

ما بعرفا
يا ريت لو يعرف مجلة الصبيان
و شخصية عمك تنقو
و لو لاقى فى يوم شرحبيل خليهو يسألو
عن شخصية اسمها
عبد الحميد محمد سرور رستم
ناس خلف الكواليس
امتعوا طفولتنا بجهد المقل
شكلو كبر ده داير الدق
كدى ال ندقو بى دى بعدين نشوف الفى الكتاب
من غناوى امسودان



Post: #3
Title: Re: يا كبر .. بتعرف الأغنية دي ؟
Author: يحي قباني
Date: 01-22-2017, 07:28 AM

جلي يا جلي ...

كبر مش داير الدق ... كدي يجي يقول لي ما بعرفها ...

شرحبيل ده يا جلال الشعب السوداني ماخدو ( فور جرانتد ) زي ما بقولوا اهلك الهنا ...

الله يطول في عمره ... غنا بالعود ... جنن الجيتار جن ... امتعنا حد الثمالة ...

سجلت اللقاء ده من تلفزيون السودان قبل 4 سنوات تقريبا ...

فيهو شي من لا شي عن شرحبيل ...


Post: #4
Title: Re: يا كبر .. بتعرف الأغنية دي ؟
Author: يحي قباني
Date: 01-22-2017, 08:00 AM
Parent: #3

تعرف يا جلي ... اخوك شافع يافع ...

بتذكر ... لكن طشاش ... شرحبيل بغني في زواج شقيقتي في بورتسودان في الستينات ...

الستينات دي لقيتها كيف ؟ رايك شنو كمان في نصها الأول ... :)


Post: #5
Title: Re: يا كبر .. بتعرف الأغنية دي ؟
Author: MOHAMMED ELSHEIKH
Date: 01-22-2017, 11:40 AM
Parent: #4

انا معجب شرحبيلي رقم (1)

لكن يا ود قباني "الأنا" برضها عجبتني
وذكرتني هاشم شقيقي يقول ليك:
" المرا(المرأة) كلما كتر دهبا , كلما قل فهما


وخلونا مع ابو الشرح دا وتحياتنا

Post: #6
Title: Re: يا كبر .. بتعرف الأغنية دي ؟
Author: يحي قباني
Date: 01-22-2017, 10:26 PM
Parent: #5

Quote: انا معجب شرحبيلي رقم (1)

لكن يا ود قباني "الأنا" برضها عجبتني
وذكرتني هاشم شقيقي يقول ليك:
" المرا(المرأة) كلما كتر دهبا , كلما قل فهما


وخلونا مع ابو الشرح دا وتحياتنا

أبو الشيخ يا صديقي ...

فهمها هي و لا فهم البجيبوا ليها ... :)
_______________________________

لما غنا الليل الهادي للمصريين ... بعد ما محمد فؤاد ( البكاي ) سرقها و غناها ...



Post: #7
Title: Re: يا كبر .. بتعرف الأغنية دي ؟
Author: Kabar
Date: 01-23-2017, 08:00 AM
Parent: #6


يحي..حبابك ياصديقي
وحباب الصديقات والأصدقاء ،

ياليالينا على الرمل النضير ،
وملاهينا على شط الغدير ،
في عروس الرمل حسناء الصحارى
روضة العشاق ، جنات العذارى
عارف ، زمان ، ونحن في المرحلة المتوسطة بمدرسة الدلنج الأميرية ، كانت عندنا عادة لذيذة للغاية ، بنقوم نجمع الكراسات ونلصقها مع بعض ، ونعمل دفتر كبير وسمين ، اها في الدفتر ده بنكتب كلمات الأغاني ، لأنو عندنا استاذنا واحد الله يطراهو بالخير قال لينا اوعكم تعتمدوا على (زهرة الأغاني) واخواتها لأنها مرات بتكتب الأغاني بصورة غير سليمة ،
اها الدفاتر دي كانت لذيذة للغاية ، لأنها بتكون مدورة بين البنات والأولاد ، احد الصديقات كانت عندها دفتر جميل وقع في يدنا ذات صدفة ، وفيهو اغنية ليالي كردفان ، حتى اللحظة متذكر العنوان مكتوب بقلم بيك اخضر ، واسم استاذنا شرحبيل مكتوب باللون الأزرق ، واسم استاذ رضا مكتوب باللون الأحمر ، واشارة الى انها اول اغنية لشرحبيل ، ومعلومة بسيطة بتقول (حينما كان شرحبيل يغني بالأوركسترا)..ثم النص كاملا..!
اها الكلام ده ، ايام تصريحات استاذنا الجيلاني الواثق من شاكلة (انا ملك ملوك الجاز) ، اها نحن طبعا عاملين فيها مقرمين وقعدنا نتغالط (اوركسترا شنو ياخي ، شرحبيل بتاع جاز وكده) وثم (ياخي شرحبيل ما قاعد يغني بالفصحى وشنو كده ما عارف) ، اها النقة امتدت ، لغاية ما لمينا في الزولة بتاعة الكراس عشان نقنعها انها بتنشر معلومة خاطئة..شفت المحن دي كيف يا يحي..؟..لاحظ ديل طلبة متوسطة ..؟!!
والزولة كانت مصرة للغاية ، وقالت سمعت تسجيل للغنية لكن ما بتقدر تسمعنا ليهو..!
اها ، من باب الفضول سألنا كم من اساتذنا في معهد التربية الدلنج (ده الحي القمنا فيهو ، حي المعهد ، والآن صار حي الجامعة) وكلهم قالوا يطرشنا ، وشرحبيل ما قاعد يشتغل غنا باوركسترا (كمان ، اوكورديون ، عود ..الخ)..زول واحد فقط ، وهو استاذنا الحاج عبد الرحمن الطيب ، وكان استاذ الفنون وتشكيلي ليهو اعمال كثيرة ، قام قال لينا فعلا الأغنية بتاعة شرحبيل ، وهي اول اغنية غناها ، والظريفة فتش دفاترو القديمة وطلع لينا النص كما كتبته الزولة صاحبتنا..!!
لاحظ فكرة الترويج السياحي لمدينة الأبيض (عروس الصحارى) ولو كنت مسئول في تلك المدينة لأعتمدت هذا الإسم ، اسوة باسمها المعروف (عروس الرمال)..لأنو الخواجات لو قلت ليهم (عروس الصحاري) العميان ح يشيل المكسر..لأنو اسم رنان وحميم وجميل..!
وناس مدينة الأبيض زمان كان بيمشوا رحلات خارج المدينة ، واشهر منطقة هي البان جديد (وبالطبع البان ليست هي شجرة البان ، وانم فعل ماضي من بان أي ظهر)..وهي منطقة تم تخليد ذكرها كثيرا ، خصوصا في اغاني الثنائي الأستاذ محمد عوض الكريم القرشي والأستاذ الفنان عثمان الشفيع ، عليهما الرحمة..
كلما اتأمل كلمات اغاني امسودان ، احمد الله انو اختراع الكاميرات الديجيتال اتأخر شوية ، لأنو اهلنا ديل كانوا شوافيين شديد..!
هي جزء من شريط اقتنيتو قبل سنوات لشرحبيل ، وفيه اغنية (ليالي كردفان)..
كتر خيرك يا صاحب..
كبر

Post: #8
Title: Re: يا كبر .. بتعرف الأغنية دي ؟
Author: Kabar
Date: 01-23-2017, 08:15 AM
Parent: #7


الى نعود ،
الليجند ايقونة الجيتارالسودانية ، الأستاذة زكية ابو القاسم ،
خلي بالك يا يحي من تقاسيم وش استاذنا شرحبيل وهو يستغرق في الجيتار الأكوستيك..!!
شغل عجيب ياااااااااخ..





كبر

Post: #9
Title: Re: يا كبر .. بتعرف الأغنية دي ؟
Author: يحي قباني
Date: 01-24-2017, 05:16 AM
Parent: #8

كلام يسوي في القلب تححححح يا صديقي ...

بالله عندي كم نسخة من زهرة الأغاني ...

واحده منهم عليها صورة زيدان ...

ورق بسيط و طباعة بسيطة ... و الصورة ذاتها على لون الكتابة البمبية ..

لكن لما امرق النسخة دي من مكتبتي ... ارجع لي تاريخ ما عادي ...

و ذكريات مع أبو الزوز ... و اهل الفن و الطرب ...

يا سلام عليك يا كبر و انت تتحفنا بالكلام الما مسطر و ما منمق ...

من القلب للقلب ... ما محتاج لا وسيط لا مترجم ...

Post: #10
Title: Re: يا كبر .. بتعرف الأغنية دي ؟
Author: Hamid Elsawi
Date: 01-24-2017, 10:35 PM
Parent: #9

شكرا يحي
واصل مع كبر كده طوالي عشان يطلع
اجمل ما عندو و يومك ال توقف بِديك بالحِتَه الفيها الحديدة
(( ارجو ان ياخذ كبر كلامي ده من باب الهِظار))
نرجع لي موضوع البوست
الميزة التي يتميز بها شرحبيل من دون الفنانين انه بجانب
الغناء و العزف علي اكثر من آله موسيقية انه بارع في
فنون اخري كالنحت و الرسم و يتميز بخيال واسع رَسَخه
في اذهاننا بشخصية عمك تنقو و العازة و مش كدة و بس
بل شارك في ادوار مسرحية خلال مسيرته الفنية
الله يديهو الصحة و العافية
دعني يا يحي اعيد هنا رد الشاعر الجميل هاشم صديق
في حوار صحفي اداره صديق دلاي فيما يعرف ب
الحوار (الضجة) حول الدراما

لماذا اذن يحاربون الدراما ؟

لانها المدخل للحرية والديمقراطية لأنها رأي ورأي آخر ،
لاحظ خلق الله ابليس فابي السجود لآدام .. أعطاه الله فرصة
أخري يقول رأيه .. دي كلها دراما .. وربنا ربط بين الحرية
والمسئولية … أعطي ابليس الحرية علي أن يكون مسؤولاً
أمامه يو القيامة علي أفعاله .. فهل يريد بعض الاسلاميين
أن يكونوا أكثر تقديراً للحرية والرأي الآخر
من الله سبحانه وتعالي نفسه ؟!!


رد الشاعر هاشم علي السؤال ب سؤال
آخر و لم بُجِيب و ترك للقارئ حريه الاختيار
و يا له من اسلوب راقي ان يفتح المبدع
للقارئ نوافذ للتأمل و التفكير
الف تحية لهاشم صديق
الحوار ده فيه كلام كثير سمح من استاذنا هاشم
و يستحق ان ينشر مرات و مرات