مقال أعجبني.. (طبعا منقول حيكون شنو يعني)

07:25 AM January, 19 2017

سودانيز اون لاين
معاوية الزبير-الدوحة
مكتبتى
رابط مختصر

غيبونة
د.محمد عبد الله الريح

18 يناير
هذا اليوم ربما لا يمثل للكثيرين أية مؤشرات ذات أهمية بالرغم من أنه هو اليوم الذي (شقلب) حياتكم رأساً على عقب.
ففي هذا اليوم يكون ليل الشتاء هو الأطول في كل الليالي ولذلك اعتمد عليه الدكتور عصام صديق المستشار أو الوزير السابق في إقناع الحكومة أن تعتمد سياسة البكور
و(تجر) عقارب الساعة ستين دقيقة للإمام وأصبح هناك ما يعرّفه الدكتور بجرينتش + 3 بدلاً عن جرينتش +2 التي هي توقيت السودان الجغرافي الذي أوجد الله عليه السودان.
ولهذا تم تقديم الساعة في 17 يناير من عام 2000م.

لقد مضت على تجربة البكور أربعة عشرة عاماً من عمر الاستقلال ولم يتوقف الناس ليحسبوا كم زاد الإنتاج أو كم نقص. (قدموا الساعة وخلاص).
وقد تم تكوين لجنة برئاسة الأستاذ عبد الدافع الخطيب ورفعت تقريرها وذلك في بداية التجربة وأوصت بعدم اعتماد تقديم الساعة ولكن يمكن اعتماد توقيت صيفي وتوقيت شتوي.
تقرير اللجنة لم يعمل به.
ودخلت في مناظرات عديدة مع الدكتور عصام صديق الذي يحمل دكتوراة في علم الهندسة الكيميائية وليس في علم سلوك الكائنات
لأبين له عدم صواب توصيته التي في نظري كانت مضرة وليس فيها ما يفيد.
وهو الآن يعمل خارج السودان وأنكر إنه لم يوص بجر عقارب الساعة للأمام ولكنه فقط قال (إعتمدوا جرينتش +3) وأنا لا أعرف ماذا يعني هذا.

المهم في الموضوع أن الله سبحانه وتعالى نظم الكون في نظام دقيق وكذلك ضبط الساعة البيولوجية لأي كائن حي حسب وضعه الجغرافي الذي تحدده خطوط الطول.
وهو قد قال في محكم تنزيله في سورة يس (لا الشمس ينبغي لها أن تدرك القمر ولا الليل سابق النهار وكل في فلك يسبحون).
ولو تمعنت في (كل في فلك) لوجدت إنك يمكن أن تقرأها من الشمال لليمين ومن اليمين للشمال وتلك حكمة الله وبديع تدبيره في حركة الكواكب والمجرات
و(النهار إذا تجلى والليل إذا يغشى) فالنهار يتجلى لأنه يمثل نسبة واحد بالمائة من ظلمة الكون والليل يغشى لأنه يمثل النسبة الأعلى.
والسودان يسبح في فلك جرينتش +2 وليس جرينتش + 3 التي وضعتنا في توقيت مماثل لتوقيت المملكة العربية السعودية في حين إننا لا نصلي مع السعودية في وقت واحد.
وكل مكان في هذه الأرض له توقيته الجغرافي وتوقيته البيولوجي بالنسبة للكائنات الحية.
فمثلاً في جزيرة ديوميد الصغرى التي تقع في أمريكا يكون الوقت الساعة الثانية عشر ظهراً مثلاً يوم السبت بينما يكون الساعة الثانية عشر ظهراً يوم الأحد في ديوميد الكبرى
التي تقع في روسيا بينما لا تفصل بينها إلا مسافة عدة كيلومترات. هي المسافة التي يقع فيها خط التوقيت الدولي International Date Line

ولو كان الأمر متروكاً لنفعل به ما نشاء لجعلنا شهر رمضان الكريم يقع في شهور الشتاء عندنا ولكن هذه هي إرادة الله
التي فطن لها الشاعر محمد ود الرضي بفطرته السليمة فقال: تدري أو لا تدري .. الكون منظم بدري.

والدكتور عصام صديق استطاع بقوة الدولة أن يجعلنا (نجر) ساعاتنا للأمام ولكنه فشل فشلاً ذريعاً أن يجعل الديك (يعوعي) في جرينتش +3 .
ولا حتى ود أبرق أو عشوشة بت أبرق أن يصحيا في غير زمن ساعتهما البيولوجية التي ضبطها الله لهما أن تعمل على النحو الذي يريده.
والدكتور عصام أفلح في إجبارنا على الصحيان في غير وقتنا وأطفالنا لم يكملوا نومهم
وأطلق علينا اسم (النخب المتثاقلة) كلما مرت علينا ذكرى (جر الساعة للأمام) في 18 يناير الذي ظل يستخدمه حتى هاجر من السودان.
والأغرب من ذلك إنه نشر مقالاً ورسم فيه دائرة قسمها لأربع وعشرين ساعة. قال فيها
إن الزمن من الساعة الخامسة صباحاً هو زمن الله وهو الذي نتلو فيه القرآن ونصلي فيه
ثم من الساعة الثامنة صباحاً إلى الساعة الثانية بعد الظهر هو وقت العمل
وإن الزمن الذي يأتي من الساعة الثالثة ظهراً وحتى السادسة مساء خصصه (للطعام والرفث والنوم)
غير أنه لم يقل لنا بأيها نبدأ.. هل نأكل ثم نرفث فننام أم ننام فنرفث ثم نأكل أم لا يضرنا بأيها نبدأ. وقد ظل هذا الموضوع معلقاً إلى يومنا هذا.

والأغرب من ذلك كله إن الجنوبيين عندما انفصلوا لم يتطرقوا لذلك في أي بروتوكول يتعلق بالمواقيت مع إنهم يتمتعون بدولة كاملة الدسم
وكان بإمكانهم ألا يتبعوا خيار الدكتور عصام صديق ولكنهم لابد أن يكونوا قد ظنوا أن الأمر كذلك فلم يفطنوا لهذا الأمر
مع إنهم يقعون قريباً من خط الإستواء حيث يتساوى الليل والنهار .

ولذلك فإذا كان التغيير ممكناً قبل أربعة عشرة عاماً فهو الآن أوجب لتستقيم المواقيت مع سنن الله الكونية.
فالسودان لم يستفد شيئاً من تقديم الزمن ساعة التي هي بكل المقاييس لا تنسجم مع (كل في فلك). ولنا عودة بإذن الله.
#رجعوا_الساعة_في_السودان
----
منقول بي هاشتاغو من صفحة Hussam Makki بالفيسبوك

ليومك دا يا معاوية الموضوع دا ما وقع لي
كيف تجر الساعة كدا، عشان تتساوى مع دولة أخرى لا علاقة لمواقيتها إلا الروحية بك؟
أنه التماهي فحسب، التماهي والتبعية بلا معنى حقيقي

((ولو تمعنت في (كل في فلك) لوجدت إنك يمكن أن تقرأها من الشمال لليمين ومن اليمين للشمال وتلك حكمة الله وبديع تدبيره في حركة الكواكب والمجرات))

كويس إنه الموضوع دا اتناولوا ود الريح
مقنع ومبهج في آن

ولك التحايا والمحبة دائماً

الزمن داك جاري كوز راكب لاندكروزر
حرررم يصلي الصبح بعد الشمس تلمس اطراف غطاهو
ديل ناس ترطيبة وعاوزننا نشقى
الله يكتلم ياخ
لابكور لا سد لا مجاري الخريف نفعت

-
إزيك يامعاوية

الجنوب، المناطق الحدودية، قروش بترولنا، قيمنا السمحة، السنوات الضاعت من تاريخ البلد.. الخ الخ كلو خليناهو
اليرجّعوا التوقيت طيب
صعبة دي!

تحياتي الأعزاء بلة وحيدر

Quote: (طبعا منقول حيكون شنو يعني)

هههه ... بالغت

أخ معاوية ..

بنشرك للبوست ، بتحاول تقلل من إنجازات الجماعة في فترة حكمهم الرشيد .

عملنا كباري
و جبنا ليكم هوت دوغ
و قدمنا ليكم الساعة

بالله نحنا ما شعب جاحد للأفضال ؟
--
كسرة
عندنا عمنا كبير في السن محتفظ إلى الآن بالزمن القديم
في ساعته القديمة ( سيكو ) ، و لمن تسألوا عن التوقيت
يقولك : الساعة 2 بتوقيتنا
و الساعة 3 بتوقيت الجماعة

مساخة بس يا ود البشرى

حبابك يا صاحب
وحمدا لله بعودتك للعمل
تعرف صحبي طبيب لي اليوم ما جر ساعتو
الشعب لم ينس
تقول للزول ياخ الزمن اتأخر الساعة حداشر هسة
يقول ليك
ما ياها دوبها عشرة
و
الجنية والألف
برضو ماشي الالف

مرحب بانضمامك للمنبر يا دوشه
تعرف من تكنيكات ناس الإنقاذ عشان (يدَوّشوا) راس السودانيين:
تغيير التوقيت، تغيير مسمى العملة، تغيير مواقف المواصلات وأسمائها ...
ساعدونا يا جماعة تاني غيّروا شنو
---
من بكرة دي الشباب حا يكتبوا اسمك (دوشة) بدل (دوشه)
شغالين بالعكسي
كان ما مصدقني اسأل ود البشر(ي)

الغريب انو دولة جنوب السودان ما غيرت البكور
ثم يا معاوية الناس ديل غيرو خريطة السودان اتسيلف

يرجعوا التوقيت كيف يعني !
نخلي توقيت مكة المكرمة ونمشي لتوقيت اورشليم اسرائيل !!



الجماعة بغنوا لسة ما صدقنا إنك بي جلالك خليتنا نزورك وانت تقول لي نفك الارتباط الزمني !

(و
الجنية والألف
برضو ماشي الالف)
دي بالذات يا أبو سن طلّعت أَيمان المغتربين

طلّعتْ أَيمانم دي بالقديم، هسع يقولوا ليك جهجهتْ حنانُم

Quote: ساعدونا يا جماعة تاني غيّروا شنو

السؤال دا مفروض يتوجه للأخت تراجي !


---------

شاكر ترحيبك أخونا معاوية ..
و قصة دوشه و دوشة دي ..
حتعمل لي علّة شكلها ..
لكن حقت ود البشر(ي) الذكرتها دي قاسية والله !

(الناس ديل غيرو خريطة السودان اتسيلف)

صدقني يا علي محمد (الفقيه)، الخريطة دي أسهل حاجة ممكن ترجع
لأنو الحاجات الوااضحة من السهل إعادتها، المشكلة في الدغمسات

(الجماعة بغنوا لسة ما صدقنا إنك بي جلالك خليتنا نزورك وانت تقول لي نفك الارتباط الزمني !

برضو يا احمد عمر أحسن من "قالوا متألم شوية"
أنا غايتو من يوم الحادث لغاية الليلة بقيت "يا معاين من الشباك"
وحياتك راقد في الصالون وكل دقيقة أتاوق من الشباك وأعاين للحوش
- الضل زاد، الضل نقص، الضل وقف ما زاد
وشابك ليك الجماعة: يا اولاد الفتح باب الشارع دا منو؟ والدخل دا منو؟ والمرق منو؟

غايتو الحمد لله جانا زمن البلي إستيشن ما بكون عندنا مشكلة وكت نجلكن