ود البوش ود ابسن ود الطيب و ملامح من البادية

07:41 AM January, 17 2017

سودانيز اون لاين
درديري كباشي-
مكتبتى
رابط مختصر

حكم من البادية
قيل في زمن بدايات تنظيم الخدمة المدنية وتوزيع الموظفين اللامركزي .موظفين من أبناء العاصمة وزعوهم على الأرياف . بكل نظافتهم وعلمهم وحضاراتهم وشهادتهم وثقافتهم . ضابط إداري وقع نصيبه في منطقة البطانة .. وكان مفتري من أول يوم اشتغل استفذاذا في الأهالي بعبارات من نوع يا جهلة يا متخلفين .. وأنتو ما بتتعلموا .. وكلام من هذا النوع .
الأهالي غضبوا منه وبلغوا العمدة .. العمدة لبس قفطانه وعمته وشال عصاته ركب حماره الأبيض العالي وراح مكتب البلدية .
دخل بالحمارة ( توووش) الى مشارف مكتب الموظف الجديد .في الصالة . شافه الضابط الاداري وهاج من الداخل .( دا شنو دا يا راجل يا متخلف أطلع بالحماره دي بره أنت ما بتفهم ؟) صغار الموظفين نبهوه قالوا له ( دا العمدة يا سعادتك .. ) ( لا بعرف عمده و لا بعرف زفت ).
العمده نزل من الحمار ربطه في عمود الصالة ودخل عنده في المكتب . ولا زال هو هائجا . بعد ما هدأ قليلا . جلس العمدة في الكرسي الذي يقابل مكتبه وبدأ يتحدث :
كيفك يا ولدنا .. ومبروك عليك الوظيفة ومبروك علينا كلنا جيتك .طبعا أنت زول متلعم ومثقف .. عشت واتربيت في بلد نظيفة وأكلت أكل نظيف وشربت موية نظيفة ..
بعد ما سمع لغة العمدة بدأ يهدأ ويتبسم . واصل العمدة .
تلاقيك قريت الجامعة واتوظفت بدون تعب لأنك مؤهل .. واترقيت لغاية ما وصلت لمنصب كبير ضباط البلدية ونقلوك لينا هنا.
لا زال هو صامتا بدا عليه الارتياح يسمع في كلام العمدة .. الذي واصل .
وأكيد راتبك كمان بدأ يزيد بالتدريج . ويمكن يكون كمان وصل ميتين جنيه في الشهر .. صاح ؟
هز رأسه مؤمنا وهو لا زال يبتسم .
العمده وقف على حيله وواصل
شايف حماري الأنا رابطه بره دا ؟
هز رأسه مؤمنا .
قال العمدة : علي بالطلاق عليقته في الشهر أكثر من ميتين جنيه .
وخرج العمدة فك حماره وركب عليه وخرج .
صاحبنا وقف صامتا فاغرا فاه مندهشا
تاني يوم سمعوا به طلب نقلية للعاصمة أو يستغيل
ههههههههه

الحكمة
( لا يهم من تكون وكم تصرف الأهم ماذا تقدم للناس و هل نفعك أكثر أم ضررك )

حبالك درديري
خطتك تجيب قصة شيخ العرب التانية ديك تدخلنا في دحشة ووالده
اتمني أن أكون عند حسن وطني
وما أكتبه هنا يكون دراية في خور البلد دي ويدفع الأمر للأمام ولو قليلا
أخوك زول خلا ساي والله
اهتماماتي بسيطة
إياها قفة الملاح دي
لمن ألقاها بظمبر
قال أحدهم
لابد للإنسان
من مأكل
ومسكن
ومشرب
حتي يمكنه ان يتفلسف
اها نحن لسة في اسفل هرم ماسيلو

يا سلام يا الحبيب درديري
اشكرك على فتح طاقة الهمبريب دي
نحكي وندوبي فيها
نحكي عن انسان هذه المنطقة البسيط وجميل وذكي
نعرض ونصوقر وسط هذه الطبيعة الخلابة
نتابع بمهل

ياسلام يادرديري ياخ
كان تضيف ود شيقوق لتكتمل مضارب البداوة المبدعة في ربوعنا العظيمة

ياسلام يادرديري ياخ
كان تضيف ود شيقوق لتكتمل مضارب البداوة المبدعة في ربوعنا العظيمة
--------------------------------------

تشكر يا حيدر
خطر ببالي هولاء البدو المعتزين ببداوتهم وما لهم من احتكاك مباشر

وأكيد هم رموز فقط لكل من يأنس في نفسه الكفاءه ويعنيه الأمر

حيدر حسن الزول السمح ذو الاذن البدوية المرهفة
خليك متابع
تحياتي

تعرف يا ود البوش

ناس كثيرين يخلطوا بين الذكاء والعلم ويفتكروهم وجهان لعملة واحدة .

يفوتهم أنه في ناس حظهم من الذكاء أكبر مما يتخيل البشر غير أن قطار التعليم فاتهم دون أسفا عليه

هذه هي ما قصدته وافترعت له هذا البوست وواثق أنه الثلاثة لكم منه حظ وافر

المعالجات البسيطة لمشاكل عظيمة ربما يعجز عن حلها حتى المتعلمين

شكرا يادرديرى يامبدع

ناس كثيرين يخلطوا بين الذكاء والعلم ويفتكروهم وجهان لعملة واحدة . يفوتهم أنه في ناس حظهم من الذكاء أكبر مما يتخيل البشر غير أن قطار التعليم فاتهم دون أسفا عليه هذه هي ما قصدته وافترعت له هذا البوست وواثق أنه الثلاثة لكم منه حظ وافر المعالجات البسيطة لمشاكل عظيمة ربما يعجز عن حلها حتى المتعلمين

وقديما قالوا (القلم مابزيل بلم)

وقديما قالوا (القلم مابزيل بلم)
-----------------------------

صدقت يا عمدة وتشكر على الطلة والاطراء

هي دي

وبالمقابل كيف يزيل عدم القلم هذا البلم المعني

اسمحوا لي اوزع ليكم اختصاصات البوست دا عشان يكون ممتع وجاذب
انت يا درديري زول شاعر ومرهف اقع لينا فيهو شعر
ود اب سن زول عمدة يحكي علينا حكايات العمد
عبيد ود الطيب دا مبالغة في وصف البطانة شعرا ونثرا
انا زول عميكة ساكت بحكي ليكم عن انسان البطانة البسيط
وبلفخ ساهي من طرف ما خساني
والله يستر علي من الحساسين والحساسات

اوووو العبيد دة حاجة براهو
زول موسوعة
نضقل معاكم

اوووو العبيد دة حاجة براهو
زول موسوعة
نضقل معاكم
-------------------------
حباب ود شيخ العرب

شوف الحكمة المركبة بتاعة عمك في الحكاية الأولى دي

شوف حلل الزول المفتري دا كيف اذا كان عايز تتباهى علينا بحياتك النظيفة فهذا واجبك ووظيفتك المفروض تعلمه للناس وتقودهم له مش تسخر بسببه من حياتهم و اذا تتفاخر بشهاداتك وعلمك ما قيمتها اذا تسببت في تعاسة الناس بدل إسعادهم وإذا تعتبر نفسك صاحب اعلى راتب في المدينة نحن ما ناس مرتبات كلنا تجار ورعاة لكن للمقارنة حمارنا دا في الشهر راتبه اعلى من راتبك .....باقي لك تاني في حاجة تخليه يقعد المهم هو فهم الدرس جيدا هههههههههه

درديري عاين لي جاي احكي ليك الحكاية الحقيقية دي
عن العلم والثقافة وحلاوة جكسا وملاح اللوبا بالشعيرية
عندي ود عمتي اسمو ود الجعيص زول امي لكن علي الجزيمة يحير البروف في راسو
كان شغال راعي هنا في اصقاع السعودية ومعاهو راعي زميلو بنغالي
ومشى السودان نهائي
جابوا محلو سوداني تاني
قام البنغالي الغتيت يحكي للسوداني الجديد
قاليهو
كل نفر يتصل بذورة ( اولادو ) يقول حرمة كيف بذورة كيف
لكن جعيص كلام بقر كيف قصب كيف مافي حرمة كيف بذورة كيف
اخونا السوداني روج كلام البنغالي
واخر اجازة مشيت السوداني لاقيت جعيص في بيت عزاء والناس كلها مجتمعة للغداء
ودار بيننا الحوار التالي
يا جعيص صاحبك البنغالي قال كيت كيت الكلام دا صاح ؟
عدل من جلسته
برم طاقيته
تنحنح
وقال
آي صاح
وصر عينو وقال لي بصوت جهور تتبعه غنة
اتو قريتو المدارس والجامعات لكن ما بتفهموا تحفظوا وتنجوا وتتخرجوا
لكن ما فاهمين الشئ القريتو
الله قال شنو ؟
آآآآآ
قال المال والبنون زينة الحياة الدنيا
دا الله قال كدا
قال المال اول حاجة
وكان ما فهمت كلام الله انقول ليك كلام تفهوا
اسع معتصم ولدي دا واشار اليه وهو يحمل عمود الغدا
كان قلت ليهو تعال ابني معاي حوش البهائم دا ح يقول لي ماش التمرين
لكن كان ربطت بقرتي من قرونا ووديتا السوق بتقول لي ما ماشة معاك ؟
اتوا ناس طير ساكت زي البنغالي واحد
وجر عمود معتصم ولدوا وفتحو وعطس عطسة قوية عندما فتح الطاسة الفوق ملانة جرجير
وقال الحمد لله .. اها دا اياهو المال الجاب الجرجير
وضحك ضحكة المنتصر وانا ولا كلمة غير اني قمت غسلت يدي وقعدت بعيد منو
قال بعر بقر قال

هههههههههه حلوة يا ود البوش

لسع واصل

الأخ درديري وضيوفه الكرام
لكم التحية جميعا ومن زمن المنبر لم يتناول هذه الضروب أو انقطع هذا النوع من الادب باعتباره شق من أدب الرسائل. وبخصوص المعوتل العبيد ود المقدم أرجو عدم حصره في البطانة فقط وياريته يتدفق من البادية الغربية وجنوب الصحراء.
أحمد

شاكر جدا يا أحمد التجاني على الطلة

أكيد هو مقصود به كل بوادي السودان

حيث تنبت الحكمة فطريا وتنتشر

الغريبة في السودان دا معظم أكلنا وشربنا وعلاجنا نباتات فطريه لا يزرعها أحد

أمسك من القضيم ووالقنقليز والدليب في الغرب

الموليتا والتمليكة والتبش في الوسط

النبق والدوم واللالوب في الشرق

وكذلك في الشمال نباتات برية كثيرة تدخل في الأكل والشرب كالحرجل والمحريب

طبيعي أن تكون الحكمة فطرية من اناس لا يعرفون التعليم النظامي رغما عن ذلك حياتهم منظمة ونظامهم الاجتماعي متماسك وقوي جدا

السقا جاع
كان يحمل جردل الماء المبرد وكوبي الالمونيوم يطرقهما مع بعض مع عبارة ( برد برد) تقوده قدماه لاحد المطاعم الفارهة التي غزت العاصمة .. لفت نظره الشواية الزجاجية الضخمة أمام المطعم مرصوص بها حبات الدجاج .. تتقلب في النار كأنها بهلوانات في سيرك يؤدون حركات اكروباتية ..وقف يتأمل اختلطت مشاعره بين التعجب والتشهي .. والدجاجات تكتسي لونا ذهبيا مائلا للبني .. يقطر منها الدهن مثل لعابه الذي بدأ يسيل ... تذكر آخر مرة تناول فيها دجاجة منذ عدة سنوات عندما كان مريضا بالملاريا في القرية ذبحت له الوالدة الديك الوحيد بالقفص . بالرغم من مشاركة أخوته له في تلك الوجبة أذ لم يخرج منها الا بالصدر .. ولطالما حسده عليه أخوته رغم الحمى التي كادت أن تشويه .. لكن هنا عالم آخر .. هو لم يرى مثل هذا العدد من الدجاج مذبوحا قط ... حتى التي شاهدها فكن حيات يتلمسن ارزاقهن من خشاش الارض ..اخيرا قرر أن يسأل الطباخ .. ربما كان سعرها في مقدوره .. وعندها سيكون أول شخص من قريتهم أنفرد بدجاجة كاملة ..
و بلكنته القروية بدأ يسأل في الطباخ :
؟ يا اللخو اللخو هنا الجدادة المشوية عندكم الحبة بكم .
نظر له الطباخ بإحتقار ذاك الذي يرتدي تلك الطاقية البيضاء العجيبة التي تشبه علبة الحليب المجفف , دون أن يعره أي اهتماما ثم التفت الى عمله .
- يا اللخو ما بناضمك أنا الجدادة عندكم بكم .
- يا زول أمشي بعيد أنت لو بعت صهريج موية ما راح تقدر تشتريها .
استفزاه رد الطباخ وزاد عاملا جديدا من عوامل رغبته اضافة للشهوة والتعجب وهو الأصرار .. لا بد أن يشتريها كيدا أو ( كيتا كما يقول ) في الطباخ .. لاحظ لقائمة الاسعار وجد سعر الحبة دجاج شواية ثلاثين ألف جنيه .. حفظ الرقم ثم مضى .. ..
ضرب حساباته وقرر أن يفتح حصالة في السكن يودع فيه الف جنيه يوميا هو ما يجب أن يوفره كل يوم .. ايتها الدجاجة موعدنا الشهر وليس الشهر ببعيد . ..
أصبح كل يوم يفتح الحصالة يعد المبلغ ويغشى المطعم يطمئن على الدجاجة وسعرها حتى قارب الشهر على الانتهاء .. ..
لكن في صباح اليوم الثلاثون يغشاه أحد أقاربهم من القرية ويخبره بأن والدته مريضة وكتب لها الدكتور وصفة أدوية تكلف ثلاثين ألف وقالوا له يغشاه في العاصمة ويأخذ منه ثمن الدواء .. لم يتردد في أخذ الوصفة و شراء الدواء بنفسه .. ولم يندم على الحلم الصغير الذي تبدد .. طارت الدجاجة يا ولدي .. قالها في نفسه غير متحسرا . ..
الصدمة والاحباط لم تضعف رغبته وتوهن شهيته تجاه تلك السمراء الساحرة .. مر على المطعم ليلقي نظرة وداع ... وجد الطباخ أنزل من الشواية إحداهن ووضعها على الطاولة في طبق استعدادا لتقديمها الى أحد الزبائن .. هنا جاء دور الشيطان وشطارته فلتت الرغبة عن عقال الوقار ... دون تردد أختطف الدجاجة وشرع في الجري .. وكما هو معهود في تلك المواقف يكثر المتطوعون .. شرع العمال والعطالة يجرون خلفه .. خاف أن يتم القبض عليه دون أن يشبع رغبته منها فكان يمنحها قضمات ومضغ وبلع وهو جاري .. أخيرا خارت قواه وبدأ قفص الدجاجة الصدري يبين من بين صوابعه.. حس بالشبع رقم الجري والنفس الهائج .. ارخى من جريه قليلا حتى توقف مستسلما ..أدركه الطباخون والمتطوعون وأخيرا صاحب المطعم نفسه حضر .. لكن قبل أن يبدأوا في ضربه يقف صاحب أحد السيارات الفارهة المظلله .. ويأمرهم بتركه بعد ان سمع الحكاية و تبرع بثمن الدجاجة على الا يمسه أحد . .
صاحب المطعم قال : (منافقا ) .نحن ما كنا حا نضربه هو فقط لو كان قالعايز جدادة وما عنده ثمنها انا كان أديته ليها معززا مكرما وهو جالس على التربيزة .. .
أما هو فاكتفى بالنظر الى صاحب المطعم بغيظ .. والنفاق بائن في كلامه لو كان الأمر بهذه السهولة لما انطلق خلفه هذا الجيش من المطاردين .. ..
قال له صاحب المطعم :خلاص عفيناك ارجع للمطعم واقعد على طاولة براحتك .. وقادوه فعلا .. لكن تبعهم صاحب السيارة ليطمئن على سلامته أجلسوه على طاولة .. وطلب صاحب المطعم من الطباخ أن يقدم له ادام مع الدجاجة يغمس فيه الخبز وطبق فاضي بضع عليه دجاجته .واعطوه ماءا بارد ..أما فهو فظل ممسكا بالدجاجة لم يتركها ولم يضعها على الصحن .. الطباخ أحضر له صحن فول مع رغيفة .لم يمسهم بل لم ينزل الدجاجة من يديه حتى تركها عظاما نخره . شرب الماء وقام بغسل يديه في المغسلة.. وقبل أن يغادر عاد لصاحب المطعم الذي يجلس معه بعض الأصدقاء وكانوا يراقبونه من بعيد ..وقال لهم :
كلكم منافقين وكذابين أنت قلت لسيد العربية السمحة لو كان طلب مني الجدادة كان أديته ياها مجانا و قعدته على كرسي .. ياخ أنت الآن وحتى بعد ما تنازلت وبعد ما قبضت ثمن الجدادة تقدم لي صحن فول ؟ وتقول كمان كان ممكن تديني لها مجانا ..؟

سكت صاحب المطعم وظل ينظر له بأندهاش حتى غادر المطعم وأختفى شبحه في الافق ..

واقعية بتصرف

وبخصوص المعوتل العبيد ود المقدم أرجو عدم حصره في البطانة فقط وياريته يتدفق من البادية الغربية وجنوب الصحراء.
--------------------------------------------
حباب الحبيب احمد التجاني ماهل في بادية السودان
فعلا المقصود بادية السودان كله وليس البطانة
آسف انا ذكرت البطانه فوق بالخطأ
.
.
تحياتي

تذكر آخر مرة تناول فيها دجاجة منذ عدة سنوات عندما كان مريضا بالملاريا في القرية ذبحت له الوالدة الديك الوحيد بالقفص
----------------------------------------------------
عليك الله شوف المرة الغبيانة دي ضبحت الديك
كان تضبح ليهو فروجة معنقدة
حرقتني ضبحة الديك الوحيد ... تاني الجداد ابيض ليكم بشنو ؟
.
.
بضبحوا الجدادة للزول العيان وبضحوا الجدادة العيانة للزول الشديد ههههه

تذكر آخر مرة تناول فيها دجاجة منذ عدة سنوات عندما كان مريضا بالملاريا في القرية ذبحت له الوالدة الديك الوحيد بالقفص
----------------------------------------------------
عليك الله شوف المرة الغبيانة دي ضبحت الديك
كان تضبح ليهو فروجة معنقدة
حرقتني ضبحة الديك الوحيد ... تاني الجداد ابيض ليكم بشنو ؟
.
.
بضبحوا الجدادة للزول العيان وبضحوا الجدادة العيانة للزول الشديد ههههه
-----------------------------------

الجداد يبيض بشنو والله أنت صحي بدوي

ما بتشوف مزارع الجداد دي كلها ما فيها ديوك .

الا كميات بسيطة محصورة للتفقيس ودي بيختاروها بعناية يعني تكون خرقاء ولادة


بعدين ذكرتني حكاية أخونا القال نحن ما بناكل الجدا الا يكون هو عيان أو نحن العيانيين

مرض ينتهي بأكل

ما بتشوف مزارع الجداد دي كلها ما فيها ديوك
----------------------------------------------
يعني اسع البيض البناكل فيهو دا مافيهو فسوة ديك ؟ ههههههه
عشان كدا مسييييييييخ
يا حليل البيض الطاعم الستو الجدادة تكاكي يوم وتفط يوم وتبيض يوم
حليل المحنة راحت مع القمل
.
.
قال فسوة قال هههههههههههههه

الحكاية دي حكيتا هنا قبل كدا لكن تاني بحكيها
زمااااااان عندنا بتنا بتقرا في جامعة الخرطوم
جات معاها صاحبتها الحلة
قالوا دي بت خرتوم فطورا بيض كوسو الحلة جيبوا لينا بيضتين تلاتة
بت البطحاني عندها جدادة معنقدة لقوا عندها بيضا
ود الباع جملو حور قصبو فيهو جدادة مبيضة جابو منها بيضتين
وسوا البيض للضيفة ودخلوها جوة العوضة الجوانية
وباقي الحلة في الحوش والشفع يدخلوا ويمرقو
شافع مصلط جا مارق من العوضة الجوانية ومرق خاتي يدو فوق قدومو ماسك الضحكة
عند العتنبة انفجر ضحك وقحة
وقال دي ما من الخرتوم عرفتها ليكم
قالوا ليهو من وين
قال من التكلة الفكي حامد
قول والله
قال والله
عرفتها كيف ؟
قالت ما باكل الحير
وناس التكلة الفكي حامد الوحيدين الفي صقيعة سلامة البقول للبيض محير

تحياتي وسلامي الزول السمح درديري كباشي
وسلااام مطبوق للأخوة العزاز بلحيل
ودأب سن
وودالبوش
و أحمد التجاني ماهل
وسلااام منفل لكل الأخوة بخيمتك الممدودة طنائبها سماحةً ونفلا
شكرا للقصة الهادفة جدا، والجراب مملوء،بالرغم من قوارض الهجرة،التي أتلفت ذاكرته....
إن سمح زمننا الممحوق، ومنبرنا المغبون، سوف أحكي لكم طرائف،بعضها(أفندي) وبعضها إجتماعي و.....الخ
وقريبا من قصة العمدة الفوق،مع الضابط (المتفقلص)
زعيم الكبابيش الراحل، الشيخ المُر ،(محمد علي التوم)
له قصة طريفة مع كتائب مايو في منطقته، وقصّته مشهورة، مع الرئيس الرَّاحل، جعفر نميري
أخبرني أحد أساتذتي، وهو إبن عم الشيخ، قال: عندما أنشأنا كتائب مايو، كان الشيخ غائبا، وتحديدا في المخارف، وفي منطقة جبال"طرَّوم "
وما أروع الشَّاعرة المجيدة حقا، فرحتنا بت الفكي حين تقول فيه وفي ظعنه ومن غنا الجراري:
يا مفتاح السَّجر
الكازاك ما تَجَر
بشوف مُضعانك كَجَر
فوق طرُّوم الحجَرْ
قال محدِّثي :عندما وصل الشيخ إلي مقره بالحمراء، حيث محكمته في أعلي تلال الحمراء، سمع من بعض الشيوخ الخبر،
وقد صادف، حمارٌ من حميري ،عضَّ حمار أحدهم، ومثل هذا لا يلتفت له أحدٌ بالبادية مُطلقا، ولكن كما قالت شاعرته:
" ولي الأسباب بدوِّر"
أراد الشيخ سببا، فأومأَ لصاحب الحمار أن : قدِّم شكوي في مسؤول كتائب مايو، فقال مُحدثي وأستاذي وهو إبن عم الشيخ، بعد حضوري للشيخ ، إبتدر الشيخ الحديث قائلا:
إمَّهِل...يا فلان أخوي....
حمارك البِعَضْعِضْ حمير المساكين دي..حتي هو من كتائب مايو....!
ومن يومها لم تقُم لكتائب مايو ببوادي الكبابيش قائمة ...
سافر الشيخ المُر للبقعة، وقابل الرئيس ، وإنتهي أمر الكتائب
فقالت شاعرته فضل الراجيه طربا:
عَوَايِدْ فِيكْ بِتْعَوِّرْ
وبِتْقُرْض المِنوَّرْ
بي الرَّينَجَرْ بِتْكَوِّرْ
ولى اللَّسباب بِتْدَوِّرْ
زعيم كواهلة الغرب الشيخ محمد فضل الله الإعيسر:
قيل هذا أن الناظر الإعيسر، ضرب موعدا ،مع نائب الرئيس الراحل نميري، ابو القاسم محمد ابراهيم ،وحين وصل المكتب منعته السكرتيرة من الدخول ،
وكان في عجلة من امره ،وهو يريد مقابلة،نائب الرئيس، لأمرٍ هام،وهو في طريقه ،لمغادرة البقعة، لأم بادر،وسوف لايعود إلا بعد الخريف(درت)
لذا إستعمل دهاءه المعروف ،فعندما هم بالمغادرة وقف بالقرب من النافذةوصاح بصوته الجهوري قائلا:
(ها بَنُّوت قُولَنْ لي نائب الرئيس عمك الشيخ محمد فضل الله جي وما لقي طريقة يقابلك وودعك الله راجع البلد لي ام بادر) فسمع السيد ابو القاسم صوته فأتاه مهرولا وعانقه وادخله،وأكرم نزله....
هذا الناظر الحكيم عندما عاد احد اقاربه من السعودية (ابوعرقوب)بعد غياب دام اكثر من خمسة سنوات وذهب ليسلم علي الشيخ فسأله الشيخ قائلا:
( هسع جيت بعد كم سنة؟
ليرد حامد: بعد خمس سنين.
فيقول له الشيخ :ما إتطولو الطُوَل فيها الهُول...
إتَّ ما شفت البدوية، الرسَّل ليها ابوعيالها الشنطة والمصاريف من ليبيا ومارجع قالت ليهو شنو:
وَد الناس الكُسَّر
ؤخيرك ما يتبسَّر
مُرسَالَك تَبْ ما قصَّر
لكن وين الما بِترسَّل
والله سؤال ونُص يا اهل المهجر..!
معزتي بلا حدود

حينما يحكي العبيد ود الطيب حكاية يضعك في مكان الحدث تماما
المكان
الشخوص
الحركة
والكلمات عنده فيها روح ونفس
.
.
تمتعوا بالرحلة سياداتي آنساتي سادتي وندع القيادة له
كل الحب والود ولهفة الشوق للقاك يا الحبيب

اطالب بشدة حضور شيقوق الحبيب
ود المنسي الجميل
موسى العجب الرقم الصعب
عبدالعزيز الفاضلابي الساخر
وكل ناس الخلا والصي

ههههه والله يا العبيد بقيت ممسوخ خلاس
قلت لي المابترسل
حبابك والله وحرم جلسة تفقدك خربانة
الحكاوي تتري في الذهن ويعجزني الامساك بها
الحكي ليهو رافع
الواحد من عيك وعاك ذاكرتو خربت
غايتو يا ود البوش طاحونتك مسكت البوست حقي تب

تحياتي ومعزتي الزول الفنجري عبدالله ودالبوش وشيخ العرب المنفل ودأب سن
وتحيات منفلات لكم
والله يا ود أب سن عمنا الراحل الناظر الإعيسر ، كان رجل حكيم وصاحب طرف ، كل إنسان عنده له مفتاح .....
مرة وفي الخريف والناس راجعين من رحلة النشوغ ،حكومة السودان أصدرت أمر بتمشيط السلاح وجمعه ، أها وصلت لفرقانه ،كوامر الشرطة ،وعرف أمرهم وأراد
أن يوصل لأهله الخبر وخاصة الناس المع البهائم فقال بصوته الجهور، وماتنسي مع الندي وصدي الصوت فصاح قائلا:
ها بذّور...أجرو كلموا الناس قولوا ليهم جانا الأُمباشي...........
فههم الناس مراده وركبوا جمالعهم وذهب إلي أهل البهائم فأخبروهم
فضحك ضابط الشرطة وقال: ياعم الشيخ تاني مأموريتنا فشلت ما أظن تاني في زول مابدس سلاحو؟
معزتي بلا حدود

يا سلام عليك يا ود الطيب

امتعت وهيجت الذاكرة

بحكاوي بقت تترى زي رسائل الواتس بعد يدخل الموبايل الشبكة هههههههههههه

من حكاوي الزمن الجميل
حكانا الوالد عن عمنا ود عطا عليهما الرحمة جميعا .. كان رئيس إتحاد المزارعين منذ زمن الرئيس نميري حتى رحل عن الدنيا .. وشخص يتميز بشجاعة وذكاء ودهاء .
في زمن النميري قرر الرئيس نميري زيارة منطقة كسلا
وفعلا بدأت التحضيرات والمهرجانات .
ومن ضمنها قرر اتحاد المزراعين عمل إفطار للسيد الرئيس مع وفده وفرصة لطرح مشاكلهم وحاجياتهم للرئيس في هذا الإفطار .
بعد ما جهزوا البرنامج وحددوا الساقية التي ستقام عليها الدعوى .
المحافظ أعلى سلطة مسؤولة في ذاك الزمن وبصورة انتهازية فجة قبل زيارة الرئيس بيومين طلب من اتحاد المزراعين ان تقام دعوة الافطار ( خاصتهم ) في الساقية الحكومية بل أمرهم وألزمهم بذلك .. كانت هناك جنينة حكومية ضخمة تابعة لإدارة السجن عادة ما يقوم بفلاحتها وتنسيقها المساجين كجزء من عقوبتهم وكانت جميلة وفخمة جدا... الظاهر المحافظ وجد أن برنامجه ناقصا ليس بطموح الرئيس فقرر يستغل جهد هؤلاء الغلابة وينسبه لنفسه .. هاج المزارعون وغضبوا إلا أن زعيمهم ود عطا أمرهم بالهدوء وقال لهم خلوه (أنا بعرف بنظمه) . وأمن على برنامج المحافظ ..
قبل جية الرئيس بيوم ركب سيارته وذهب للمحافظ وقال له .. يا سيادة المحافظ نحن المزارعين غيرنا رأينا أكتشفنا أنه ميزانيتنا ما تسمح بدعوة الرئيس والوفد المرافق .( فشنو بالله عليك شيلنا من البرنامج ) وخرج تركه في مكتبه محتارا .لأنه البرنامج وصل الرئيس ونميري معروف أنه لا يحب المسخرة ولا يتهاون في هذه الأمور ..
المحافظ بعد ساعة حصله في البيت يتصبب عرقا وطلب منهم أن يقيموا أفطارهم في أي مكان يختاروه هم ..
في النهاية حتى يأدبه أختار ساقية محشورة في زقاق ..الطريق لها صعب جدا زقاق ضيق محاط بالمسكيت بالكاد يمرر سيارة واحدة ..قال للمحافظ أن كل السواقي الموجودة على الشارع الرئيسي شربانة موية ومليانة طين .. لا يوجد غير هذه )..
المحافظ أضطر يستعين بناس البلدية و تفاجأ الناس بالكراكات والجرافات شغالة تحفر وتسوي في الطريق طيلة الليل والقلابات تردم في الرمل .أول مرة تشهد المدينة أصلاح طريق يتم ليلا بالكشافات مع الكهرباء الممحوقة دي ..
أدبة من أمها
ههههههههه

**

يا سلاااام يا ابو الدر نافذة مريحة
مودتي يا صديقي

بالفعل نافذه مريحه ومهمه
نلجأ لمثلها هربا من دواعش المنبر
شكرا مره أخرى لصاحب البوست ولضيوفه الاكارم

درديري وضيوفه
لكم التحية
بوست مريح ووريف
واهلنا عندهم كثير من القصص الفيها الحكمه والتدبير والذكاء وسعة الافق
ومن القصص التي رويت عن شيخ العرب
اتنو البوليس جاء برجل وامرأة الى المحكمة الشعبية، وقال لرئيسها شيخ العرب: لقد وجدتهما داخل منزل في وضع مخل بالآداب والاخلاق..
سأله شيخ العرب: وهل كان هنالك نزاع بينهما أو خلاف.. قال: لا يا مولانا.
فرد عليه شيخ العرب: دعهما يذهبان فنحن هنا لفض الاشتباك ما بين المتنازعين والمختلفين .. أمثال هؤلاء دعهم لربهم.
ضرب البوليس تعظيم وقال في استغراب «والله برضو منطق»
فرد عليه شيخ العرب ده مش منطق يا جنابو.. دا فقه.

درديري وضيوفه
لكم التحية
بوست مريح ووريف
واهلنا عندهم كثير من القصص الفيها الحكمه والتدبير والذكاء وسعة الافق
ومن القصص التي رويت عن شيخ العرب
اتنو البوليس جاء برجل وامرأة الى المحكمة الشعبية، وقال لرئيسها شيخ العرب: لقد وجدتهما داخل منزل في وضع مخل بالآداب والاخلاق..
سأله شيخ العرب: وهل كان هنالك نزاع بينهما أو خلاف.. قال: لا يا مولانا.
فرد عليه شيخ العرب: دعهما يذهبان فنحن هنا لفض الاشتباك ما بين المتنازعين والمختلفين .. أمثال هؤلاء دعهم لربهم.
ضرب البوليس تعظيم وقال في استغراب «والله برضو منطق»
فرد عليه شيخ العرب ده مش منطق يا جنابو.. دا فقه.
-----------------------------------

نشكرك على الطلة يا علي والاضافة الجميلة
كن بخير وكن قريب

يا سلاااام يا ابو الدر نافذة مريحة
مودتي يا صديقي
-------------------------

تسلم يا ابو الدفاع يا رائع

أنت كمان ماك جنا بادية متلنا

راجنك تتجلى

زمن الزمن زين برضو
وزمن القراية في التزامات كتيرة رغم أنها تحير لكن تحس فيها روح أبوية صادقة من الدولة والمجتمع والاسرة و كلها تصب تجاه الطلاب .. فكان الطالب إبن الكل .
من ضمن تجليات تلك الفترة وهي أن سكن الداخلية كان الزامي حتى لمن كان بيته مجاورا للجامعة وأعتقد حتى بعض المدارس الثانوية مثل حنتوب وخور طقت ووادي سيدنا . الكل يريد ان يفرغ ذهن الطالب للدراسة تماما لا يشيل هم مواصلات لا أكل ولا شرب .. بل فترة من الفترات في جامعة الخرطوم حتى الغسيل والمكوة كان على حساب الجامعة .
رغم أن هذه الفترة أفرزت هذا الجيل المسؤول الآن الذي يتحكم في الرقاب ويسوم الشعب أنواع العذاب .. لكن ما هو موضوعنا .. خلوهم لوقتهم .
المهم
واحد بلدياتنا جا من البادية الى داخليات جامعة الخرطوم مزودا بخيرات الريف . وزعوه في الداخلية وجد نفسه رفيقا لطلاب من أسر غنية من العاصمة ( حناكيش ) عاشرهم وعاشروه وقاسمهم لقمتهم الطرية .. كل يوم واحد فيهم يروح بيتهم يجي حامل شي له طعم مدهش أول مرة يتذوقه حتى يكاد يحول شي جاتوه ومرة طورطة وكنافة وبسبوسة . هو صاحبنا عنده مخزونه من الزوادة لكن استحى يستخرجه مع هذه الطيبات .. يوم ما نفسه تاقت للقرقوش .. خلاص قرف من هذا الأكل الطري الشهي عايز يقرمش شوية .أيام الامتحانات صعب الخروج من الداخلية وتوقفت الواردات الطرية اكتفوا بوجبة السفرة . والجوع تمكن خاصة بعد وجبة العشاء المبكرة جدا أخيرا لم يستطع مقاومة رغبته وشهيته للقرقوش اتغطى بالبطانية ومعه ( خمشة) من القرقوش وبدأ عمليه التكسير ..
الجماعة يسمعوا ( كع كرع وتعقبها كروك كروم كروم ) يتلفتوا ما عرفوا الصوت جايي من وين .. أخيرا :
حمد ؟؟؟ أنت قعد تاكل في شنو .؟ .
بعد تكرار النداء بانفعال فتح البطانية غاضبا وأخرج يده محملة بالقرقوش
( حق رجال دا مالكم .. حق رجال )
هههههههههه

تعرف يا ابو الدر البوست البدوي دا ح احكي فيهو مواجع شديدة خلاص
عايشتها جراء حياتي القهرية في المدينة
صدقني تعبان تعب الموت في حياة المدينة
وتمنيت اني ما دخلت مدرسة ولا شفتها بعيني دي
وبحسد الرواعية الفي الخلا والصي ودائما بقول بنفسي اريتني كان راعي
وحياة خوتك اول ما دخلت الثانوي في حنتوب الثانوية بديت اعاني
بمشي مدني اخر الاسبوع ومستغرب في الناس ديل عايشين بشنو ؟
لا حواشات
لا بلديات
لا بهائم
الناس ديل عايشين كيف يا ربي
واتلف قدام حلة مدني وقدر ما اتلف لا بشوف حواشة ولا بشوف بلاد
لابشوف مراح بقر ولا حتى راعي معزة ساهي مافي
ديل ناس شنو ديل العولق ديل
والعجب العجيب لمن مشيت الختوم
توب عليهم العولق
وللساعة العلينا دي العيشة دي اصلها ما عاجباني
بشوفا عيشة مسارقة ساهي وحرامية
.
.
يا حليل المحَنَة راحت مع القمل

موسى الراجل عوووووووووووووووووووك
تعال ميرق معاي يا اللعسر اب سفروق
.
.
غايتو البوست دا بجيب المحن

يا حليل المحَنَة راحت مع القمل
هههههههههههههههههههههه

ما عرفت المحنة حقة القمل دي

بعرف المحنة الراحت مع المرقوت
مشيت البلد .. وبيت مع واحد من اهلنا
اوضة براي راقد فيها .. نزلو لي لحاف معلق في راس الدولاب
عليك امان الله عديت الليل كلو اكتل في المرقوت .. والمرقوت عضتو حارة خلاس
من ديك تاني ما بيت معاهم
صحي
موسي العجب
او
موسي الراجل وين
ودالمنسي بقا زول واتس اب ساي

الله يقطع المرقوت وزمنو
المرقوت كعب يا زول
لكن القمل حنين
قول لي كيف ؟
تلقى فيهو الاخوات متحانات ... الواحدة تقول لاختيها اقعدي انفليك
تتفن ليها في الوطا وديك فوق العنقريب وكع تصقع ليها القملة ومعاها تجة
اختها تقوليها حي يا بت امي
وهكذا كانت الجلسات الحنينة بسبب القمل
ولذلك قالت حبوبة ود المنسي حليل المحنة راحت مع القمل
.
.
ود اب سن بتتذكر الحشن ؟ ههههههههههههههه
ولا تفسر وكان داير تفسر فسر بالتلاويح
وذلك حفاظا على مشاعر الحساسين والحساسات
.
.
اطالب بحضور شيقوق فورا

هاكم بدويات الشرق الجميل

سخرية الأدروبات اللازعة

طبيب من مدينة ثانية تم نقله الى مدينة كسلا
لم يندمج في المجتمع تماما حتى مع زملائه في المستشفى يبدو أنه شخص خجول أو انطوائي .
قرر يتزوج وكعادة ذاك الزمان قرر يعمل حفل مرطبات في نادي الاسعاف نادي ملحق بمباني المستشفى للعاملين بها .
طبع كمية كبيرة من كروت .. وبما أنه علاقته ليست متينة مع الزملاء العاملين والموظفين بالمستشفى لدرجة أنه يكلفهم يساعدوه في توزيع هذه الكروت اضطر يأخذها ويلف بها على المكاتب .
يدخل مكتب تلو الآخر يسأل الموظفين ( لو سمحت أنت أسمك منو ؟ ) يقول له فلان الفلاني يعبي الاسم في الكرت ويصرفه لصاحبه وهكذا .. في حوش المستشفى لقى واحد من الموظفين مشهور بالسخرية .. صرف له الكرت بنفس الطريقة . واثناء لفه على المكاتب مر بذات الموظف يجلس على مكتبه ونسي أنه سلمه كرته . ومرة ثانية ناداه ( يا أخينا يا أخينا لو سمحت أنت اسمك منه .؟)
صاحبنا هاج فيه .
( ياخ أنت هسع في الحوش ما أديتني كرت ؟ هو أنت عريس ولا حكم ياخ )
ههههههههههههههه

يلوحو ليها كيف هسة
مرة سايق العربية نصة نهار .. خشت لي شحموطة جوة البنطلون في الورك. هجرتها في محلها .. تاني لحقتني .. هجرت محلها والمحال المجاورة
تقرص وطالعة
لا عرفتها واحدة ولا مية
عليك امان الله دون اشعر وقفت في نص الزلط وبحتها
وكيلك الله الشارع كلو غبا لي

هههههههههههههههههههههههههههههههههههههههههههالله يجازي محنك يا ود ابسن ضحكت لمن وجع النوايط قطع نفسي كان ذكرتني صاحبي ود عراك لمن نتونس ونضحك كل من حولنا لايفرز علا الضحك في شنو ؟مافي زول عارف
لكن خرفك كعب هههههههههههههههههههههههههههههههههههههو

( يجازي محنك يا ود ابسن ضحكت لمن وجع النوايط قطع نفسي )
تحياني سمحين النافلة درديري وودأب سن وود البوش ،وجميع أهل فرقان درديري ورباعته
ياودالبوش أخوي قلت:
(ضحكت لمن وجع النوايط قطع نفسي)

ياخ خلنا النتونس في منبرنا أبو جضوم دي......!
أهل البادية يقولون:
قطع نايطنا..!
ومرقنا في نايط السروج...
ولقيت ديفة أم نايِط....!
أها أيّام الزمان بعُرْفِه وعَرفه،(إنتونست) مع الشاعر مُحمَّد ودالمِصايد العطوي الكباشي، زول رهيف بلحيل، وفي سيماء وجهه، بُهرة من وادي عبقر،وفي صوته بحَّة من الحُزن الرزين،يبتسم من قلبه،وهو يرسم بالمفردة الشاعرة:
لولا قبيل حضِرْ قبل الصُّفاح والعايِطْ
كُنتَ بحجنِك آ عَنْز الدُّباغ أُم نايِطْ
نِقدِّم شكوي يا الصورة الملانِي زبايِطْ
ونستلِم القضيِّي ونبْقا فيها عَبايِطْ
وِقِفتْ ..والهولي صاطدني....! صادتني.. وقنصت لأم نايِطْ..وقِمِح كلبي....!

شاعرنا الراحل ودالمصايد حجن (عنز الدباغ أم نايط)
نحن هنا نحجن مفردة
(النايط)"أم نايِط"
ونعرف، هل هي وصف ل لون او خط، كما يقولون:
أم سوح، أم قرباب،أم شورة...الخ
أو وصف لعنق أو دوف، كما يقولون:
(أُم رقبة أم وريد أم حقيبة أم قنفة....الخ
أم هي وصف لفعل مقرون بالغزال "حصري" يقولون عفط..... قنين
أم شي حسّي....!
عند العرب(النيط)
وهو العرق الذي القلب متعلق به وروي عن علي كرم الله وجهه قال (لود معاويه انه ما بقي من بني هاشم نافخ ضرمة الا طعن في نيطه)
وعندنا في الباديه اذا اراد احد ان يدعي عليك يقولك :
(ينقطع نايطك) وهو علاقة القلب،بتشديد اللام
وفي كتب المعاجم هو عرق علق به القلب من الوتين وهذا نطق به القرآن (ثم لقطعنا منه الوتين) والعرب إذا دعوا عليك يقولون: (رماه الله بالنيط) اي الموت
وأهل البادية إذا (دعُّوك) يقولون:
(ينقطع نايطك)
إذا كان (النايط هو عرق من الصلب وحتي قرب الكتف ، أو حتي العرقوب، أها شفت ليك غزال، أهل البادية بسموها
(الحمرة/الحمارية) عندها سوح أسود يزيدها جمالا ويزينها، يمتد من مؤخرة الكتف، إلي الورك
لذا يقولون لها (أم نايط) (أم سوح)، ايضا للغزال خط أسوا يتدلي من جفن عين الغزال حتي (الكُزَّامة)
عن السوح قال محمدأحمد ودسعيد:
ام طوق كفل الحجولها كبار
عاليبة البراوح رقو في الضهار
ام سوح التخز من نقرة الدوار
كف ضربتني بالمصري اب عباية نار
أهلنا المسيرية والرزيقات، يقولون النايط (للجنب) ،والسوح عند جميع أهل البوادي...
والمسنوح مقطوع الطاري الشنفرا يقول:
(هتوف من الملس المتون يزينها .. رصائع قد نيطت اليها و محمل)
وشيخ العرب الحاردلو في مسدار الصيد،ورد إسم موضع بالبطانة، إسمه (نايط السروج):
جاهن منقلب وقتاً عصير وشفاف
وكاسب ليلو بيهن من صدف ماخاف
ديل الطبعهن دايم الأبد عياف
وفي نايط السروج لقين بقيلاً جاف
غايتو مابعرف لكن ،ياودالبوش أخوي،أشك أن أهل البادية قديما، لهم لغة،إندثرت ولم يُدركها أهل المعاجم ،لأن أصحاب المعاجم حضر.....
وخوفي دي تبقي علينا أيضا لهجتنا العامية، تندثر بها مفردات لم أجدها في قواميس لهجتنا العامية
المهم نتونس لي مولانا ......

قال
شرفت المطيرق بقيتها زي الزان
وذلك في مسدار المطيرق المشهور
غايتو يا العبيد
شرفت النايط شرف جد
النايط عندنا الضهر البراني عموما
حسب معرفتي
لكن اضفت لي معاني أخر
الضحك البقطع النايط ويدلي الشرشوف

ود الطيب جنن النوايط جن
زول متبحر خلاس في العلم
لكن ناس نحن بنلشغوا ساهي ومرات نجيبو ملان
.
.
النوايط عندنا الصفحات ( جمع صفحة البشيلو فيها الشافع هههه ) والسري والجنبات

لكن يا ود الطيب ملاحظ الدعاء عند ناس البداية دائما بكون سجع
او شئ من هذا القبيل
عندي خالتي ولدها اسمو سماعين ما نادته يوما والا قالت
سماعين تسمع الطرش
.
.
عبدالله عضلة العد
احمد الحمو اللفسخك
يا ولد تلد الضنقل والفار ينقل هههههههههه
يا ولد ما تطق تطق لمن حَمَارك يشق

قلنا اخيرا نتحول من البوستات البتسد النفس وتفقع المرارة
الى هذا البوست بل قولوا النفاج البيفرح المهموم والمكدور
ونستمع الى هذا الحكي الطاعم....وجمعكم الفريد هذا بينقصه
اسحق ود بلة الهجر المنبر...
والله يا ود كباشي ما قصرت..
وجاياكم بمهلة..
والله يديكم الصحة والعافية

هلا بالأميرة بنت الأمرة شرفتني ونورتي

والله ود الطيب دا رجل بمواصفات موسوعة ثرية ..

ياخ أنت لو عندنا أعلام ( فير) يراعي مصالحه ومصلحة المشاهد .. مثلك كان يكون عنده برنامج ثابت في النلفزيون يعيد لنا أيام صور شعبية حقة الراحل الطيب محمد الطيب عليه الرحمة

زي ما قلت يا ود كباشي ، انا برضه شايفة ان عبيد ود الطيب موسوعة علمية في حكاوي التراث الشعبي
ويستاهل يكون مقدم برنامج في التلفزيون ويقدم لينا التراث الشعبي السوداني ويكون معاهو ود البوش
وود الفاضلاب...
ومرة تانية نؤكد ليك ان هذا البوست اوسكار...
لكن مصارينا اتقطعت من حكاية العريس البوزع كروت الدعوة بنفسه
والتعليق الاوسكار:::انت عريس ولا حكم..
والله يديك الصحة والعافية

شفت البوست عقل مرحاتو ودابو ما رست العجة
ود ابسن وود البوش ولعوا جمر البوست وجة
ديل صقور الخلا فردوا جنحاتم وعمو الفجة
وريحة الجمال مع الطيب ود عبيد وقفت قجة
احنا يا ود الكباشي اهل صي بلا خوف بنقع اللجة
وبنحب السمح من الكلام وللحكي الطاعم بنعقر دجة




النخلس الفي ايدي وبجيكم صاد

شحموطة

الشحموطة دي شنو ؟

(شفت البوست عقل مرحاتو ودابو ما رست العجة
ود ابسن وود البوش ولعوا جمر البوست وجة
ديل صقور الخلا فردوا جنحاتم وعمو الفجة
وريحة الجمال مع الطيب ود عبيد وقفت قجة
احنا يا ود الكباشي اهل صي بلا خوف بنقع اللجة
وبنحب السمح من الكلام وللحكي الطاعم بنعقر دجة)
تحياتي ومسلامي دكتور السنوسي بدر، ربيع الزينة والنفل السمح ، ولأنك من هاتيك النجوع أهديك من نفس قافية غنوتك

الدَّليل الشاعر الرائع النور ود الشَّايب الدِّويحي حين يبدع في الوصف:-
علي الحوسَة أُم دبار ما بقبل الحجَّه
ؤ بشوف حَزْ الغروز قابلني في رجَّه
ؤ بَدَّرت النِّجوع فوق دربي جات عجَّه
ؤحدَّدَت الصّعيد بي مشيت أُم قُجَّة
ؤخليت دقس العيون بي ورايا تِتهَجَّا
(حزالغروز اي سرات الناقة- أُم قجة ايضا من اسماء الناقة- تتهجا اي تلهج بذكره)

شرفتنا يا دكتور السنوسي وفي انتظار رفدك الثمين

يا ود ابسن اشرح لجبرة دا معنا شحموطة شنو .. وبعدين أعملوا لكتاباتكم حاشية زي ود الطيب دا لشرح المفردات .

عندي مدخل تاني لود الطيب أبداه بموقف طريف

من سلسلة مفارقات الاغتراب
أهلنا في البادية ربنا حباهم بحسن الخلق والتهذيب حتى في كلامهم .. ومن ضمن حديثهم العادي كنوا عن بعض الكلمات الخادشة في عرفهم بكلمات يرونها أكثر تهذيبا أما من الشرع أو من الكلام العادي مثل ( طالع الخلا .. قاطع الجمار .. وهكذا ) وهي كلها تدل على الحوجة للحمام .
طبيبة بنت مغتربين كل دراستها خارج السودان بالتالي أتت الى السودان لتقضي فترة الامتياز . في أحد مستشفيات العاصمة .. يوم ما وهي في قسم الطواري مع ساعات الصباح الأولى تقف سيارة بكس ينزل منها رجال قرويون يحملون شيخا كبيرا في حالة غيبوبة ..أدخلوه عند الطبيبة أرقدوه في الكنبة وخرجوا ينتظرون في الصالة .أما هي اجتهدت في ايقاظ الشيخ من الغيبوبة ونجحت فعلا .. فتح عينية تلفت عرف نفسه في المستشفى وقال لها ( يا بتي انا عايز أقطع الجمار ) .. هي ردت ( حاضر يا عمو ) رغم أنها ما عرفت ما هو هذا الجمار الذي يريد أن يقطعه العم . تلفتت حولها في الاجهزة هل توجد آلة يقطع بها هذا الشئ الذي ذكره لم تعرف . . بعد ما غلبت حيلة خرجت للحاضرين في الصالة ..( يا جماعة فيكم واحد بيعرف يقطع الجمار ؟؟) تلفتوا بحيرة لبعض الى أن رد واحد فيهم ( بالحيل يا بتي كلنا بنعرف ) ...( خلاص لو سمحتوا تعالوا اقطعوا الجمار لعمكم دا )
*******************

عايزين يا ود الطيب أمثله من نوع كناية أهلنا في البادية لعبارات خادشة للحياء بأخرى مستساغة

ياااسلام يااود المقدم ياخ

جبتلنا سيرة الدليل والخبير النور ود حمد الدِّويحي وناسنا البتكرفو الخلا اللصم
اها يا ود المقدم في مرة من المرات عندنا دبوقه بنلم عقابا من جهاتكم ديك ومتوسدين المنشاق جهة دراو في مصر المؤمنه باهل الله
وخبير الدبابيق عمنا علي ودعكام من اهلك الجعليين الفوق وادي راهب من اهلك البرارة
وعمنا ودعكام زول اصم وما بطبق الكلمة

وكان معانا جابر من اهلك الشنابلة بحب المشي اللقروب
وودعكام ما بريد التاخير

قطعنا وادي الاراك
اشوفلك جابر جاري سرررر تحت ألبل
اظنو شافلو راس جمل مارق بين العتامير

وكان معانا مانقستو مشلخ وبلجيك جديد ماشم ريحة البارود

ودعكام تنسرت من الجمل ووصف لجابر بيدو ما تفوت البل وناديني بصوتو الفخيم بالاستاذ

لكيت الجمل عنيتو وكان بنضف في ماسورة المنقستو

وقال لي الجماعة ديل من اهلك المحاميد ومعاهم كبابيش نوراب عرفم من الوسم همباته

مشينا عليهم
واحد فيهم عرفني وقال لي ود الشيخ حبابك
وكان زولا احمر ليهو دلزات
دخل ايدو في مخلايتو وملاها تمر وماهو لي وملاها تانيومداها للخبير وقال لنا ما عندكم ملح!

شوف العربي المهلوك ده في الخلا ابو سعنا مقدود تسعلنا من ملح !!
قلنا ليهم في واتفضلو لقدام
قرعنا البل
وجابر الاقروب منسرت بعيد

العربي لحس الصحن بصباعو الملوي

ويقول لي خالك كان نديدي شلنا ابل قرعان من جبال تبستي ونزلناهن اسوان

وفارقناهم في دنقلا العرضي

البل نشقت وعنت بلاد الريح
وجات بالعرضي وقطعن لمصر تصريح



ا

يا سلام .... يا سلام ..... يا سلاااااام
لمتكم السمحة دي ذكرتني عمي احمد ود سكين الجوع الله يرحمو
زول كريم كرم لمن عميكة وكان ما خليتو يركرمك بدقك ويكرمك بالغصب
ويوم سعدو وفرحتو يجوهم ضيوف في الحلة تلقاهو زي المجنون يجري يمين وشمال حفيان
يوم ناس الحلة ماشين فاتحة وهو معاهم واللوري انقلب بيهم
طقتو السيخة ودخل في غيبوبة خفيفة لمن صحى وشاف الناس حولو
قام يكورك اتفضلوا اتفضلوا حرم تتفضلوا جيتو متين ؟
.
.
أميرة اميرة الشباب حبابك في دارك وشرفتيها
محمد جبرة الجميل جيتك متوقعة وجميلة حبابك ..... الشمحوطة هي القملة هههههههه
دكتور السنوسي بدر وبالجد شرفتنا وفرحتنا .. حبابك في دارك

تحياتي وسلامي الأخت أميرة السيد والأخ محمد جبرة
ياوداب سن ياخ شحموطتك دي مسنوحة خلاااااس
إنت عارف أهل البادية من سخريتهم أحيانا في صنف من العذاري، بسموهن (الشحموطة/الرِّتيلة)
بمناسبة شحموطتك دي....
مرة بعد نهاية اليوم الدراسي، أمتطيت مطيتي وعرجت علي صديق صاحب دكان، أها البرندة مرشوشة وهيفها يضرب،مع زنق التريَّا، جابلنا جبنة وقعدنا نتونس، وفي شباب بنزلوا في ذرة في المخزن، أها في واحد مع الزنق، لابس سروال رهيِّف خلااااااس، وهو منهمك في(العتالة) دخلُّو أبوالضب في السروال وإتلصَّق علي داخل الورك، وأهل البادية عندهم تشاؤم ومقولة .....بقولوا:
(اي زول بدخل ليهو أبوالضب بين كرعيهو...
دي بجُر شفاطة تب، يعني تاني بمسح نهائي)
أها صاحبي نيتو في العرس، وخايف يسمح...
وفجأة قلع ومرح ومرق الجبة...، وقفل المخزن...، والباب فتحو الهواء ولم يلتفت له...ومرق السريويل... فت... والضب متلصِّق علي وركو....متعسِّم ولابد.... وقول يامرحييييب
أها قلعو ب إيدو وضرب بيهو الحيطة كف.........
أها زولك..لبس سروالو مقلوب وموجايب خبر.....
و جي قعد جنبي ومسك الإبريق قعد يغسل في إيدو..
ناولتو كباية بانتيل، وبعد ماجبد نفسو قتلو يا فلان:
ترا إنت نيتك الشهر الجاي تعرس..... صاح..!
معلم الله ينف وقال لي أي اي....
قتلو: أها ترا أمش جيب لك حجر عطرون وغسِّل مكان أبوالضب الكان مقيِّل فيهو في وركك.....
وقبل ما أكمل ونستي نطَّر عيونو وقال لي:
صح ابوالضب دي سيدو بمسح....!
قلتلو: لا لا كان غسلتو ودرشتو بي حجر عطرون خلااااس
ونظرية حجر العطرون دي نجرتها ليهو من عندي لمواساته.
أها قبل زولك مايقوم..قتلو: يا اللَّخوي سروالك مقلوب.....!

يا سلاااااام يا السنوسي أخوي
ودعكام دي عندو أخوه إبن عمه من أهلك البرارة شاعر مجيد ورجل صاحب طرف
وأهديك من طرائفه:
لشاعر ودعكَّام البرِّي،له قصة مع الشيخ المر
حيث إشتكت بعض الفرقان، من شاعر الدوبيت الرائع ودعكّضام ، لأن لودعكام البري بعير مثل ناقة طرفة بن العبد في العدو، ولكن البعير وصاحبه، أصبحا يُشكلان خطرا في فتق النسيج الإجتماعي، وأظنه أصبح كبعير المنخل اليشكري، ذلكم البدويُّ الذي بلغ به الوجد شؤا بعيدا، حتي تجرأ علي "الخزنة الزِّقاقها مطبَّل"
والتي بسببها دُفن حيّا
(أحبّها وتُحُبني ويُحبِّ ناقتها بعيري
ياهندُ: من لمتيمٍ ياهندُ: للعاني الأسير)
أرسل الشيخ خفراءه، لجلب البعير، لاحظوا هنا: أن الشيخ طلب البعير وترك صاحبه،ومن يومه لم يذهب الشاعر إلي عُرسٍ أو ختانٍ أو اي مناسبة فرح،لأن بعيره الذي أخذه الشيخ كان سلاحه، وجلبابه وعمامته وملحفته، وهو موضع حديث البدو في مجالسِ أنْسهِم، لجماله وسرعته، وكان له حظٌّ وافِرا من أغاني الحسان، لأن أكثر شدوهنَّ للإبل، وأصحابها الفرسان الأدِلّة،جمع دليل، وهو الرجل الخبير بمناهل المياه ومراعي الإبل والفلوات، إن كانت في رحلة النشوق أو رحلة الجزو، أو للصفات الحميدة، كالمروءة والكرم والسَّماحة والإقدام، ومن يومه اصبح الشاعر أعزل وبلا سلاح، ولقد ترك الأفراح والمناسبات مطلقا، وفي إحدي الأيَّامِ، وذات أصيلٍ، والفصل خريف، والبادية بالمَخارِفِ، أناخ الشاعر مطيّته، أمام مضارب خيام الشيخ المُر، وسرق النَّظر إلي بعيره، حيث يرعي علي مشارف الفريق، فتذكَّر صولاته و"شيومه" وهو علي ذروة سنامه، وبعد أن سلَّم علي الشيخ أنشد قائلا:
وَدْ إبْل العَكَاكِيمْ الضِّراعُو مَشنَّقْ
طيرَنْ عكَّم الرَّبدة وقعَدْ بِتخنَّقْ
اللّيلة آالرَّقَلْ قلب المِشارِف رَنَّقْ
علي قِصيبْةْ الدَّهَارِيب الصَّبيبُو نَقنَّقْ
**********************
*الضراعو مشنَّق اي زنده من كوعه واسعٌ، والطير يقصد به الإضليم، ذكر النِّعام، وعكَّم اي يقرعها من الأمام ويستنُّها، والرَّبدة اي الرَّبداء وهي أُنثي النِّعام، و"بِتخنَّق" يُحدثُ صوتا من خياشيمه وحُلقومه، سبحان الله العظيم، الكلُّ مسعورٌ بالشبقِ، والنِّعام تشبه الإبل في ذلك أو كما يقول شيخ جامع ،وهو يصف إبله "بنات دعتورة"وإجتماعها حول الفحل تُريد التزاوج "اللِّقاح"
قَطَعَنْ وادِي الملَوَّي وخبَّنْ
وبنات دَعتورة في ود العنانيف رَبَّنْ
قشْ السَّافِل أ سَّاعْ يا اُم عَراقِيب لَبَّنْ
وليهُو ليالي من يوم الأشابيب صبَّنْ
الرَّقَلْ إسم بعيره، وقلب المِشارِف رنَّق اي حنَّ وإشتاق وتاق، والدَّهارِيب هي أمطار اللّيل ،السَّواري المصحوبة بالرِّياح والرَّعد،
صبيبو نقنَّق من نقنَاقة اي تمطِرُ ثم تتوقف ثم تعاود الهطول مرة أخري، وإلي شُعاع الشّمس، ولقد كان الشيخ المُر شاعرا مُجيدا،
فصاح مخاطبا الشاعر وقائلا: "أقسِم إن لم تأتي بغنوة بيضا ، سوف لا تمطيه ابدا" فقال الشاعر وفي الحال:
"بيضا علينا كيف سنون أُم عَاج
وكيف تبر الضّحي وقمر العِشِي الوجَّاج
خيطَن تَمْ حِسابو واقَعْ النَّسَّاجْ
وقطْنَنْ فوق فِروعُو مِفَقِّع النُّبَّاجْ
الشَّاعر علي قدْر التَّحْدِّي، مربوعة بيضاء تماما، والشيخ أوفا بوعْدِه، سلمه بعيره وأهداه فروة وسوط، ثمَّ أوصاه قائلا: (المرة الجاية فوقك إنت ماها في الجَمل)
غنوة بيضا علينا ايضا سمعت في قصة أخري نسبة لشاعر من نهر النيل ونسبة لشاعر من البطانة، فلا أدري شاعرها يقينا،
ولكنني قصة الشاعر الكباشي ودعكام حقيقية وسمعتها من راو حصيف في منطقة أبوزعيمة بوادي الملك،
وكنت سابقا نسبتها لإبن عمه الشاعر محمدودحامد البري وكلاهما من البرارة فخذ(فرع) من قبيلة الكبابيش
معزتي بلا حدود

داركم عامرة
وديوانكم مليان
الشحموطة ياها النملة السوداء الصغيرة .. الرتيلا ياها النملة .. قرصة النملة مع الريم زي قرصة العقرب
قرصتها في الملاين نار الله الموقدة
عما لينا قال لي
الزول لو لدغتو عقرب بسو ليهم موية ليمون ومديدة حلبة . اها مشيت افتش لي عقرب عشان شربات الليمون ومديدة الحلبة .. لا تلج ولا خلاطة . بعصرو الليمونة في موية الزير بس
فتشت في حطب العواسة لامن لقيت لي عقرب . مديت ليها كراعي
الساعة النتحتني تقول وطيت لي جمرة
عليك امان موية الليمون ومديدة الحلبة مصنقرات جمبي اسبوع لا سكت لا لكت

هههههه عفوا ود جبرة الشحموطة الرتيلة او النملة
ولمن الشافع تقرصو النملة بقولوا
يا شحموطة يا ماحوطة دسي سمك في ...... تقرصي فلان الاصغر منك ؟

تحيات منفلات لفرقان درديري المتتوتلة، علي تلال الأُنس المعافي، الفناجرة ودأب سن وودالبوش،المنبر الأيام دي جضومو مصفطات ....ماجضَّم أظن حُقَّتُو راحت...
أها نتونس في الزمن الممحوق
(من جرابي)
كنت معلما ببوادي الكبابيش،وتحديدا بمدرسة " أبو بسمة" حيث وادي جميل ينحدر من سلسة جبال الحتّان التي خلدها شعرا شيخنا العباسي:
(يابرق طالع رُبا الحمراوزهرتها واسق المنازل غيداقا فغيداقا
وان مررت على الحتّان حي به من المناشط قيصوما وطبّاقا
ومن اذا سمعوا من نحونا خبرا والليل داج اقاموا الليل إيراقا
إنّا محيوك يا أيّام ذي سلمٍ وإن جنى القلب من ذكراك أعلاقا)
ويرفده وادي "حمورة"ووادي عنقور "النويقة"وإيد"السّيال
وهي الوديان التي تسابق فيها إثنان من عشاق رمالها فألفيّا باب الشعر ولم يقد لأحدهما قميص .. محمد شريف العباسي و علي سالم علي التوم
قال الأول:
الوادي الغزير شِقلو وغديرو مسرَّف
ياريت إن قبيل بيهو الزمان ما عرَّف
الضَّيب العلي راس القلع بتشرَّف
رزم وإتشابا لي ريم الصعيد بتكرَّف
************************
وقال الثّاني
"عنقور النويقة اللَّيلة شوفتو جميلة
بي صباحو وصعيد لي أُم سنطة نازلة قبيلة
تُفَّاح البلد تِسلاتْنَا بيهو قليلة
في شان الطويل عُنقو وبِسُك التَّيلة"
(2)
وعلي مشارف الوادي
ضُربت خيام مدرسة البدو الرُحَّل ،وبجوارها فرقان مشايخي العلماء "الشناقيط"، حياهم الغمام الأربد، وبجوارهم إمتدت طنائب بيوت فرقان العرب البدو،
وعذاراهم اللائي إتخذن من "رغام الصحاري" أديما، ومن دُرع جآذره عنقا وجيدا، ومن نيران تلالها التي تشبُّ في العُلو أنفة وشموخا ومن ندوة سحابة أُم بشارها وضوحا وفالا....
ذات أصيل عرّجتُ علي أحد مشايخي الشناقيط للسَّلام وتناول كأس او كاسين من الشَّاي الأخضر كما يحلو لهم:
"ثاني الكؤوس من الكرام ...
عادة جري بها عكس اللِّئام"
لفت نظري تيس جميل ينبُّ ويصيح ، والوقت رشاش وهو وقت لقاح الماعز ،واللطيف في الأمر بالرغم من جفاف الرِّشاش إلاّ ان نسمات الجنوب (الدِّعَاش)
تفعل فعل الطّلح والفياجرا علي الماعز والضأن، فتجعلها مسعورة بالشَّبق، حتي ان الأتياس بنبيبها (صياحها) تستضيف المُدْلجين ليلا كالكلاب النوابِح او كما يقول طَرفة:
(ملك النّهار ولعبه بفحولةٍ يَعلُونه بالّليل عَلْو الأتيسِ)
فقلت للشيخ : أاشتريتُ لك تيسا جديدا؟
ليأتي رده سريعا قائلا بلهجته:
(يقصِّر عمير التّيس .....
ويقصِّر عمير صاحبه...
ويقصِّر عمير الشّاعر إبن الرُومي)
فقلت: مان الله..! لما؟ وهي من لهجة الشناقيط للتعجب!
فقال : باعني إيّاه مقصُور العُمر ..
الكباشي المتَّاوي...
بثمن كثير ووجدته خدعني
فتيسه ينبُّ ،لكنه كالعنِّين لا يعشر المعيز...!
فقلت : عرفت لماذا دعوت علي التّيس
وعلي الكباشي الذي باعك التيس
ولكن لماذا إبن الرومي !؟
فضحك الشيخ حتي بانت نواجذه وقال:
ألم تعرف ماذا قال إبن الرومي
فقلت : لا ...
فقال : ويْ كأنه يخاطبني حين قال:
(عكست أمري الخطوب فعنزي حائل أبدا وتيسي حلُوب)
فضحكت كثيرا وقلت له:
إن كان لك عزاء ففي تيس أُم عزين
فقال: وما تيس أُم عزين ...؟
فقلت: قيل
ذهب نائب الرئيس اللواء الزبير محمد صالح الي منطقة الرباطاب ، وكان معه احد أبنائهم فسأل الزبير الرباطاب عن ثورة الإنقاذ ، ليرد أحد شيخوهم قائلا:
(الإنقاذ تشبه تيس اُم عزين)
فسأل الزبير أحدهم عن تيس أُم عزين
فضحك شيخ الرباطاب كثيرا وأخبره
"أن تيس أُم عزين جابو يِعشِّر الماعز قعد يرضع فيها"
بالمناسبة قصة تيس(ام عزين) وصلتنا بالبادية الغربية،في أوائل الإنقاذ،ولا أدري صحتها

فتشت في حطب العواسة لامن لقيت لي عقرب . مديت ليها كراعي الساعة النتحتني تقول وطيت لي جمرة عليك امان موية الليمون ومديدة الحلبة مصنقرات جمبي اسبوع لا سكت لا لكت

ياكافى البلا وحايد المحن انت سم العقرب ده ماجاب خبرك
بقت عليك حكاية الهندى اللدغو الدبيب ...
الدبيب مات

الشحموطه هي النمله ام ريش

بخصوص الضب

علي ود مساعد زول شليق ومتقندف وروحو عاجبوهو من زمن كان صبي
الجماعة القدرو قالو اصلن ما بقي لنقيب!
وصابونتو (الفنيك) في جيبو هيل الساعة ما بتفارقو شبر
سوق التلاثاء بعيد من فرقانهم زي يوم وضحوية
اها زولك جلابيتو بلبسا لامن يمرق من الفريق وطاقيتو شانقا لامن بتغطي رشرشو
جنب السوق بمسافة ساعتين في غابة كتر وسيال بيعقبها الوادي
زولنا نزل في الغابه وقربتو مليانه
عندو سروالو حق ترفيلا جابو ليهو ود دحلوب من الكفره
ملصو ودرعو في سياله قصيرونه
قوم يالضب اندرع في السروال
اها ود مساعد اتلبب السروال
والضب انطبق في السرول من جوه
وزولنا دخلتو للسوق الضب اظنو السخانه لحقتو وبدور امرق
والضب النوع الاخشن داك بتاع السيال والكتر داك
اها مع الحركة وزولنا انجمع لفوق
ورجلينو قصرن من الارض
والضب اتكامل العده
وزولنا انجمع تاني لفوق
ولحق طرف السوق
والجماعة الشافوهو قالو
ود مساعد انبطح في التبريب(حوض الموية البتشرب منو البل)
والضب اظنو الموية خنقتو ومات مكنكش في العدة
ود مساعد ما جاتو الحبه
هسع بتو اظنها دكتورة نساء

ههههه
ودبدر ياخ اسعدتني جدا بي حكاويك
اشكرك

وانتهز هذه الفرصة
وارحب بالمسنوحة
اللميرة بت اللمير

ود ابوسن
شكرا للترحيب..
واذا ما حكاويكم دي ما كنا صبرنا على الغربة اكتر من كده
ومقسمين وقتنا في اليوم....ثلاثة ارباع الوقت مع سودانيز
اون لاين ، والربع الباقي للشغل والقراية والنوم...ومن الثلاثة
ارباع الوقت بتاعة سودانيز اون لاين ربعين لبوستات البادية
والريف وحكاوي ناس القرى الطيبين...بس ما قادرين نعلق عشان
ما عندنا قدرات ود البوش وود عبيد في وود كباشي في الحكاوي
البتقطع المصارين من الضحك..مثل العريس الماعارفينه عريس
ولا حكم كورة....
وشكرا ليكم فقد جعلتم غربتنا القساية نزهة في ربوع بوادينا المزدهرة..

والله يديك الصحة والعافية

اما الطبيبة بت المغترب الما عرفت قطع الجمار يا ود كباشي...
اذا انت ما شرحتها في معرض كلامك كنت بخاف
حاخاف اقول ليك اشرحها....وقلت امتحن المسنوحة
بسمات اذا بتعرف المعنى...وسالتها وقالت : انا العطبراوية
١٠٠% ما بعرف قطع الجمار!! ولقيتها فعلا قروية وبدوية
وكانها ما شافت البرجزة يوم واحد ....
ومنكم نتعلم ...
والله يديكم الصحة والعافية..

شكرا يا لأميرة على ملازمة هذه الدوحة الوريفة

ولسع في أنتظار تجليات البدو وذاكرتهم

من خرب حياتنا
كنا سعيدين بعاداتنا وتقاليدنا والموجود من أكلنا وشربنا الحلو منها والحامض والمالح المخمر والمعتق ..
الفواكه قاموسنا لها ليس فيه سوى الموز البرتقال واليوسفي والقريب فروت والمنقة والجوافة والبطيخ والشمام والتمر..
لا نعرف تفاح ولا كمثرى ولا خوخ ولا مشمش ولا فراولة ولا كيوي ولا كاكا ولا افوكاتو ولا عنب الا من شجيرات عنب ورمان في بعض البيوت ومن باب الزينة فقط ..
الحلا عندنا الباسطة والشعيرية والسكسكانية والطحنية وحتى خصصنا حلا للنساء فقط تعينهم على النفاس كتعويض الدم وارضاع الصغير مثل مديدة الحلبة والنشاء وغيرها .. كما كان يعاب على الرجال تناولها إلا بالدس .. حاليا تباع في الكافتريات في السوق مثلها ومثل العصائر الباقية . بالتالي كانت أمراض مثل ضغط الدم والسكري نادرة ..
ومن الأملاح نعرف الجبنة البيضاء فقط هذا بالاضافة للملح نفسه . والزيتون هذا سمعناه في سورة التين والزيتون لكن لغاية ما حفظنا السورة لا نعرف ما هو هذا الزيتون . غير مدرج اطلاقا على قائمة طعامنا ولا في الأدوية وحتى الشيوخ الدجالين الذين يطلبون منك المستحيلات (ديك أعور وأرنب أشولنجي ) لم يخطر على بال أحدهم أن يطلب من المتعالجين معه إحضار زيتون ..
و الزيتون عندي معه حكاية أنا لغاية ما وصلت ثالثة ابتدائي لم أكن قد رأيت زيتونا قط . يوم ما حضر عمنا عليه الرحمة الى كسلا وأخذنا في جولة بالسوق لزيارة بعض أصحابه ..أحد اصحابه كان عنده سوبر ماركت ضخم من النوع الذي لا يوجد في الأحياء عمنا الراحل أحمد عثمان اليماني ( الديزل) عليه الرحمة .. وأنا واقف اتفرج في فترينا زجاجية فيها أحواض بها كرات سوداء صغيرة لامعه وأشياء أخرى .. جاء أحد الزبائن وطلب من البائع أن يوزن له نص كيلو .. وأنا اشاهد و اشوف الزبون أخذ حبة حشرها في فمه ومضغها بنهم وهو يهز في رأسها إعجابا ومتعة .
- أنت دا شنو ؟ سألت البائع .
- دا ما زيتون .
- بالها هو دا الزيتون ؟
- أديك حبة تضوقه ؟
- هات .
وحشرتها بسرعة في فمي وبنفس السرعة جري على الباب ( تفووو) تفلتها ..
دا شنو دا أصلا هو مر كدا (قلت في نفسي يمكن أنا وقعت في واحدة مرة )..لأنه من شكله خطر في بالي الكرز والعنب وهي ثمار تشبهه في الشكل لكن طعمها حلو .
- طبعا الزيتون أصلا مالح .أديك واحدة تانية ؟
- لا لا لا يا أخوي شكرا يفتح الله .
..
غايتو الحمد لله بعداك وبعد الغربة تصاحبنا أنا والزيتون بعدما فهمنا بعض

حجة كبيرة مشت السعودية .. ولدها اداها زيتونة اول مرة تشوفو
ضاقتو وبزغتو
بري ما بدورو
ولدها داير يحنكها
قال ليها
ده ذاكرو الله في القرآن
قالت ليهو
ضنيتو ما ضاقا

بوست غاية في الروعة
نطمح في المزيد من مداخلات ناس البوادي ، بدر وعبيد والبوش ، حياة البادية دائما مثيرة وحافلة بالتجارب
تحياتي جميعا

سلام يا حبان شكرا على شرح كلمة شحموطة ....\يا ود ابوسن على ذكر العقرب ...عندنا واحد يصحي البول بالليل بدخل الزقاق يسرسر ويتجمر بالحيطة و يرجع ينوم
اها يوم جاء يجمر بالحيطة اتجمر للعقرب في ضنبها و الكواريك صحت الحلة كلها قدر ما سالوه العقرب ضربتك وين يقول ما عارف ....جيرانهم عندهم دواء بختو في محل اللدغة بمرق السم ..جابو الدواء يسالو فيه وهو ما قادر يوريهم ..بس اتوحوح و يهيز في وراكينو وقالو ليه سمح الحتة البتنتح وين ...قال ليهم شلوفتي الفوق

بابكر ود النور زول عواااف شديد

بيعاف حتي الطعام من يد امو!

فاطنة بت اللبيح اخت ام بابكر قالت: الخريز (لقب لبابكر) لامن ولدوهو كان خاتي يدو في نخرتو!

بابكر لامن كبر اظنو عندو (ام الصبيان) كبرت معاهو

وكان بيقوم بالليل جاري يقابضو فيهو من طرف الحلة

وبالنهار يتم اليوم كلو يغسل في يدينو

امو ودتو لفقير جنب دنقلا العرضي

الفقير عندو واحد من حيران(ريالتو) ما بتقيف اصلا

الخريز لامن شاف الزول ده ابا ينزل من العربية نهائي

الفقير سال امو الجنا ده خبارو
امو قالت ما بعرفو خبارو علا (بيزاول) بالليل وفترنا من المقابضة
والزول ده كملنا لينا الموية

الفقير جمع الحيران وعملولو رقية

الحوار الريالتو سيالة جابولو الكوره يمين وكت ريالو عملت (جلق) في موية الكورة
يمين الخريز جفل لامن خالو انبطح

موية الكورة سقوها للخريز بالقوه وهو مريط (ورببوهو) بيها زي العتوت

فطومة مرة حاج عبدالرؤوف قالت عملت ليهم ملاح تقلية وقطعت البصل بالسكين (المشمشت) بيها ولدها التوم
وذكر الحاضرون ان بابكر الخريز يمين لحس الصحن لامن قرب يمرق (الطلص)

يقول دكتور حامد ود جبارة انو بابكر كان عندو وسواس النظافة Obsessive-Compulsive Disorder

جادالمولي ضرب لي تلفوني وقال عاوز ليهو حبوب يعالجنو هو وجملو من مرض بابكر الخريز لانو يدينو بقن خشنات من كترة الغسيل وجملو بقي يعاف القش

قلت ليهو امشي للفقير بتاع العرضي قفل التلفون واصلو تاني ما ضرب لي

ههههههههههههههههههههه

متعك الله بالعافية يا دكتور

شوف معاك قصة العقرب بتاعة جبرة خلتني أضحك زي المجنون

ههه والله يا جبرة والسنوسي ضحكتوني ضحك شديد
يا جبرة عندي واحدة قريبة لي حقتك لكن ما بتنحكي
السنوسي
اللبيح الفي البطانة جدي خال ابوي ولا تشابه اسماء

ههه والله يا جبرة والسنوسي ضحكتوني ضحك شديد
يا جبرة عندي واحدة قريبة لي حقتك لكن ما بتنحكي
السنوسي
اللبيح الفي البطانة جدي خال ابوي ولا تشابه اسماء

حبابك يا دو اب سن

العرب دي اسماءها بتتشابه وهم زياتم في خلقم بتشابهو

الناس ديل في البادية الغربية علي جهة وداي الملك ووادي الاراك واتا نازل علي جهة ابوقسي والدبة علي النيل من الجهة الغربية

لكيين الناس ديل دربهم اصلو ما انقطع من البطانة

الناس ماشة وجاية واصر النسب اظنها برضو متشابكة

كلامكم سمح آ خلق

السلام للأساتذة الكرام....

وسلام خاص للحبيب درديري... ومرة ثانية أرجو أن ترسل لي عنوانك البريدي ويمكن أن تضعه علي إيميلي:
[email protected]

السلام للأساتذة الكرام....

وسلام خاص للحبيب درديري... ومرة ثانية أرجو أن ترسل لي عنوانك البريدي ويمكن أن تضعه علي إيميلي:
[email protected]
---------------------------------------------
حمد لله على السلامة يا دكتور شرفتنا كتير وليك وحشة والله
أنشاء الله يصلك

السنوسي وجبرة
حكايات مبالغات
ههههههههههههههههههههههههههههه
السنوسي ...... قلت لي سكين البصل سوت بيها شنو ؟ مبالغة
زمان انا كتبت بوست في ازمة الموية في الخرتوم وسميتو يتمششون هههههههه
اتخيل الحساسين والحساسات يتمششون ... مبالغات
.
.
جبرة ... مبالغة ولا تعليق ... الحكايات المشابهة كتيرة لكن دايرة اتلباجة وحرفنة خلي ود اب سن يتحرفن ليك
.
.
منصور المفتاح حبابك والبيت بيتك وانت زول حكاي .. ارحكاكا
.
.
وسلام عليكم جت

تحياتي وسلامي يا رباعة الزينة والأنس المعافي:
عندنا زول في البادية، جبَّار خلااااس، وعندو إبل ماشاء الله لكن اصلو بريدهن ريد عجيب، أها عندو ودأعمو شيخ إسمو
(حمَّاد الجوع) زول شوم مرة
أها حمَّاد بجمع في طلبة القطعان، وقام لقي (الكيك) مافي وإبلو ورادات قام عقل منهن قعود مانع،وساقو جلبو
الكيك جي الدكة، كلموه وقام لحق حمَّاد وقال ليهو:رجع لي قعودي ..دي داير أهدُّو في ألبل..........
حماد رفض تب، والليل كلو يحنس فيهو...
أها الدنيا برد والكيك ماقدر ينوم الليل كلو مغبون..
أها الدغش قام يقطع الجمار ،والموية صاقطة وهو ليهونفيف مغبون، كب الموية من الإبريق تسمعو (طوووووووط)
ضحك بي غبينة وقال هموووو، كان شيخك حمَّاد الجوع
أيَّاها دي حالك والله يستر عليك من...............!

ههههه يا العبيد زولك مليان هوا
لي الليلة ممغسين الناس وبقو موظفين عديل وسموهم ناس القطعان بضم القاف
ود البوش نلوج لمن نقع في المحظور 😐
حلات لقلق

لسع في الانتظار يا رواع

سلام يا ناس
الدرديري وضيوفه الكرام
ود ابسن وشيخ العرب العبيد ود والطيب و ود البوش وكل الناس
الا ا ود البوش الفيك اتعرفت البقجه ما وصلتها
بتغلبك نطه ابو سته والجراي ولا قايل بتحندكنا بعدم الزامله

بركة بالشوفة يا موسى اخوي
اللوم بجي بالغفلات وصيتك وصلتني طاااااب لكن علا مشاغل الدنيا
بركة بكري الفك ليك زاملتك من الزريبة
تاني عاد امسك قوي في كلمة سر الزاملة
عشان ما نفقدك
.
.
اكرر اعتذاري
اخوكم موسى دا كان فاقد كلمة المرور واعتذر لي عشان ابلغكم اعتذاري
لكن شغلني الشديد الاقوي
واسع اهو تراهو جا .. حبابك في دارك

نرحب بالأخ موسى نورت البوست وفي أنتظار بداوتك مع ود البوش

درديري وضيوفه الكرام سلام
ود البوش ودابسن الطيب ناس حلوين
تصدق وتأمن بالله يا ابوالدر ود البوش مرة لا عرفتا اضحك لا اكتم الضحكه
زول زميل لينا في البنك بالسودان وصديق وليهو علاقة بود البوش جاء السعودية
اي والله جاء في الزمن الصعب لما كلمني ود البوش قلت ليهو الزول دا الجايبو حسي شنو
ود البوش اداهو جوالي وقال لي بنجيك زيارة في البيت الزول دا بفتش لي شغل بدرعو فيك وقفل الخط
يوم الخميس قال لي بنجيك بكرة عايزين شاي لبن بلقيمات
جاني ومعاهو صاحبنا قعدنا نعيد في الزكريات
الراجل قال لي الحمام بوين قلت ليهو امشي يمينك هناك
دخلتو الحمام عاينت لي عبدالله عايز اقول ليهو كلام
قبل ما افتح خشمي ود البوش قال لي الزول دا كبير ما تتعب روحك تفتش ليهو شغلمافي زول بشغلو
ياخ الراجل لما طلع من الحمام قعدته اعاين لي تجاعيد وشو واقول ليهو والله محافظ لسع الشبيب عندك ما كثير نظام بطمن فيهو
وهو شابكني القعده هنا مملة ولازم تشوفو لي شغل بسرعه وانا اعاين بقعر عيني لي ود البوش ..... غايتو ود البوش يوم بكتل ليهو زول بحركاتو

منور يا عبس وآسفين على الانقطاع

زمن يا كورة
زمان عندما كنا صغارا ما كان عندنا قدرة لشراء كرة قدم منفردين الا بعد جمع اشتراك ( شيرنق) ويمكن بعد زمن طويل يكتمل النصاب أي قيمة الكرة وبعدها جري نحو الدكان أو السوق لشراء الكرة وفي الغالب كرة من المطاط القاسي التي بها حبوب لو أصابتك في وجهك لن يتعرف عليك أهل البيت الا بإحضار شهودين عدلين ..وفي العدم البحث عن فردة شراب قديم وحتى هذه صعبة لأنه أصحاب الجزم والشرابات كانوا نادرين وقليلين بالذات في الأقاليم الا العساكر وموظفي البنوك وهم ملزمين بحكم الوظيفة .. أما باقي الشعب كله كاشت بالشباشب والصنادل .. أذكر مرة جاتني هدايا من قريب مغترب من ضمنها شراب فاخر وأنا لا أملك جزمه له .. رحت للوالد عليه الرحمة وقلت له عايز جزمة قال ( المناسبة شنو لا في عيد قريب ولا مدارس فاتحة ؟).. قلت لأنه جاني شراب هدية وما عايز أخسره ..قال (أول مرة اشوف زول يشتري جزمة لشراب هههههه ) لكن الحمد لله في النهاية اشتريت الجزمة وبعد فترة سئمت حبس قدمي فيها وسرعان ما تحول الشراب لكرتين جميليتين تسر المدفرين ( أهل الدافوري ) .. لكن أطرف موقف أنه ونحن صغارا صادف أن أجر الدكان الذي يتصدر ناصية بيتنا بكسلا محطة الحجر أحد الأعمام الطيبين و حوله لمحل أواني منزلية .. ولأنه في ذاك الوقت كانت حالة نادرة لمثل هذا المحل في الأحياء الشعبية. عادة نوع هذه المحلات تفتح في الأسواق فقط .. وعمنا صاحب الدكان عم محمد عليه الرحمة رجل نزل معاش وفتح له ابنائه هذا المحل ليملأ فراغه . أبناء الحي أنتدبوني لاسأله إن كان عنده ضمن بضاعته كور .. حتى نشتري واحدة ونرحم أقدامنا من كرة الشراب التي كثيرا ما ركلنا (شتنا) الحجارة بدلا عنها خاصة قريب المغرب و يامى طار الدم بقلب الوادي .. ورحت فرحا بالفكرة والإقتراح سألته ( عم محمد عندك كور في بضاعتك دي ؟؟؟؟) وهو لازال معظم بضاعته محفوظة في كراتينها قال لي : كيف ياخ عندنا كمان كور ملونة وجميلة لسع ما فتحنا كراتينها .. وسعرها بكم ؟ ..قال في حدود خمسة وعشرين كدا ( ما حد يقول خمسة وعشرين شنو ) جريت نحو الأصحاب فرحا لأبشرهم وبدأنا عملية تجميع القروش ونحن نحلم بالكور الملونة .. بعد اسبوع اكتمل المبلغ واخذناه جريا نحو المحل .. عم محمد خلاص فتحت كراتين الكور ؟؟ .. أيوه فتحتها هاكم .. وبدأ يرص لنا الكور في بنك الدكان .. وكل ما ينظر لنظرات الإحباط في عيوننا يفتح كرتونة أخرى .. بها أشكال أخرى ..
ونظرات احباطنا كانت بسبب أن الكور الملونة التي يعنيها هي الأواني التي تسمى كورة في السودان (بفتح الراء) وتستخدم لتقديم العصيدة والنشاء والحلومر في رمضان ..
وهاكم دي كمان مكتوب فيها رمضان كريم ..
أنسحبنا بلفوسنا من أمامه دون رد .. نجرجر أذيال الخيبة والإحباط ..
تعالوا أنتو عاوزنها بغطا ولا بدون غطا ؟
يا عم فكنا ياخ الله يرحم والديك ..
هههههههههه

عامل فيها عالم
ايام كنا ممتحنين الشهادة السودانية
عادة ناس المدرسة لمن يكون باقي للامتحانات اسبوعين أو اكثر يدوك رقم الجلوس ويقفلوا المدرسة ما عندهم شغلة بيك وخلاص تاني الله معاك نشوفك يوم الامتحان حيث يكرم المرء أو يهان .
هذين الأسبوعين يمكن تكون أكثر فترة مملة في عمر الانسان . هو صحيح ما ضروري ذاكرت وقفلت الكتب لكن تكون تشبعت تماما و الرأس ما في طريقة يشيل شي جديد .. لكن عشان يكون ضميرك مرتاح تقعد تقلب في الكتب .. ترمي واحد ورا الثاني .
طبعا ما في طريقة تقول أروح السوق أغير شوية اطلع اتمرن كورة الناس يشوفوك زي الكفرت ..
أذكر أنا قاعد بالصباح في حوش الصالون في بيتنا عامل فيها بذاكر في ضل الشتاء .
لاحظت في الأرض لجحري نمل .. عايشين متجاورين في أمان الله ..وشغالين في همة ونشاط عاملين زي بيت العرس قبل يومين من العقد .. المهم نملات داخلات ونملات مارقات واحدات شايلات عفش في راسهن .. ويتلاقى النملات الجارات يقيفوا شوية مع بعض خشم خشمين أظن تقول ليها كيف معاكم الشتاء . والله تعبنا من البرد وهكذا ويواصلوا في مشيهم ..
الجحرين كانوا مجاورين للحمام .. لاحظت من بعيد قريب باب الشارع على بعد تقريبا خمسة أمتار أو اكثر في جحر ثاني منفرد برضو فيه حركة نمل .. قلت أعمل نظرية شلت نملة من المتجاورين برفق أها وديتها عند الجماعة ديك .. ختيتها شويه .. الجماعة ديك كل مرة يجوا يشموها شوية ويمشوا بعد شوية اتلموا فيها أظن اتهموها بالتجسس وهاك يا عضعيض .. لغاية ما طفقوا ليها الصندوق الوار داك .. وخلوها بين الحياة والموت .. قمت شلتها منهم تاني ورجعتها لجماعتها .. أها جماعتها جو شموها برضو بعد شوية بدأت حركة شديدة يدخلوا ويمرقوا .. بعدها تكهرب الجو تماما واشتعلت معركة عنيفة بين الجحرين .. الظاهر عرفوا أنه الأذى الحاق بأختهم ما هو شغل بني آدمين عرفوه عضعيض نمل .. وبما أنه هم ما شايفين غير جيرانهم اتهمومهم مباشرة و الظاهر ديلك في المفاوضات قدر ما حلفوا ليهم ما صدقوهم .. والله كانت فتنة ندمان عليها حتى اليوم .. المعركة ليومين تلاتة مستمرة أجي أتاوق الاقيها مشتعلة بين الجحرين .. ما عرفت أعالجها كيف ؟؟ قاتل الله الشلاقة ومن قبلها قاتل الله الفتنة .
أتذكرت الفلم دا وانا أصبحت مدمن لقناة ناشونال جوقرفي اليومين ديل

ست شاي
أيام كنا نعمل بمطبعة كباشي كسلا المنطقية الصناعية في بداية حياتنا العملية مطلع التسعينات . كنا جالسين في ظل شجرة نيم أمام المطبعة في فسحة الفطور نتناول الشاي .. جالس قربي الصديقين إدريس ونصر الدين جكسا ..
جاءت بنت اثيوبية شابة في حدود ثمانية عشر عاما أو حتى أقل .. جميلة جمال قاطع .. ومن دون الحضور خاطبتني أنا .. لهجتها فيها مسكنة وبراءه تأسر .يبدو أنها موصية أو ارسلت مخصوص من أحد الخبثاء . قالت لي بلكنتها الأثيوبية في العربي .
( عمنا ممكن نجي نسلح شاي هنا تحت سجرة بتاعك ونبيع ؟؟).
أنا بدون تردد وتفكير طويل قلت لها ( جدا ممكن )
على هذا الرد فرحت بابتسامتها البريئة تلك ومشت مسرعة تكاد تجري لتحضر معداتها ..
جكسا : دا الشنو العملتو يا أبو الدر .؟.
قلت : مالك في شنو ؟
جكسا :أنت عاوز دي تجي تبيع شاي هنا ؟
قلت :آآآي ليه ؟
جكسا : يا زول أنت جنيت يمين الصناعية دي كلها تجي تتكوم ليك هنا قدام المطبعة ..
أنا بسرعة لحقتها قبل ما تلف بلفة ناس عمنا تجاني مليح .يا بت ... يا بت ..تعالي .
جات راجعة .
قلت لها : عمنا ساحب سجرة دي قال ما في بت تجي تبيع شاي هنا ... معليش آسفين .
- خلاس معلش مافي مشكلة .
جكسا كان مفتح الله يجازيه . بالخير طبعا .
هههههههههههههههههههه

كرااااااااامة لله
أمام مكتبة كباشي المطلة على مستشفى كسلا التعليمي .. حيث الصالة الطويلة في شكل حرف السي باللغة الانجليزية التي تضم المكتبة وعدد كبير من محلات الحلاقين والمقاهي وفوال النيل ..
هذه المنطقة بالنسبة لي تعد ملهمة ومشحونة بالذكريات تقريبا في كل مراحل العمر منذ الطفولة والمراهقة والشباب حتى بعد الزواج وانجاب ابني ابكر .
ما يميز هذه الصالة أنه مر بها وجلس فيها عدد كبير من أعيان المدينة أدبائها وشعرائها وأطباء ومحامين وقضاة ومهندسين ومحاسبين من ابناء المدينة أو مبتعثين من مدن أخرى عندما كانت الخدمة المدنية قومية وكذلك التعليم . بمعنى طالما أنك سوداني توقع نقلك الى أي مدينة داخل المليون ميل مربع . و على فترات متفاوتة .. دارت فيها مواضيع تقريبا تطرقت لكل مناحي الحياة . بعضها مواقف طريفة حفرت في الذاكرة .طرأ على خاطري هذا الموقف .
عدد من الأطباء وغيرهم أعتادوا بعد نهاية الدوام يأخذوا جلسة أمام المكتبة يتناولوا فنجان قهوة أو يتركوا سيارتهم أمام المكتبة يدخلوا السوق لأحضار بعض مقاضي البيت ثم جلسة قصيرة قبل الذهاب الى منازلهم ..
في ذاك اليوم مر على الجلسة شحاد كبير في السن رث الثياب أحدب الظهر أشعث أغبر .. وهم منهمكين في الحوار عن أحد المواضيع التي تشدهم عادة .. نادى الشحاد ( كرررررررامة لله ) كررها وبقدر ما مد حرف الألف لم يلتفت إليه أحد .. أخيرا تركهم في حالهم وجلس على البلاط في طرف الصالة فضل أن يستفيد من الظل البارد والمكان النظيف .. بدأ يفك الحزم المربوطة في وسطه ويستخرج غلة اليوم ويعيد ترتيبها وجردها وتصنيفها . تحس كأنه موظف بنك يقفل في الخزنة اليومية ...أحد الحضور التفت إليه فجأة . وجذبه المنظر ركز علي الشحاد وخرج من جو الحوار تماما .وآخر اراد أن يعيده للحوار ( ولا رأيك شنو يا دكتور فلان ) وجده خارج الشبكة تماما .. نظر إلى حيث ينظر . ولكن هو كذلك جذبه منظر و و اندمج معه وكذلك ثالث ثم انضم لهم الرابع . وأخيرا دون اتفاق أو دون ان يلفت أحدهم الآخر وجدوا أنفسهم مندمجين ومندهشين من حالة الشحاد .. الذي لم ينتبه لهم وهو منهمك في قفل صندوقه اليومي .. حزم الربط ذات الفئات الكبيرة وخبأها في مكان يعرفه هو وكذلك الفئات الصغيرة وحتى وصل مرحلة العملة المعدنية رماها في خرج خاص بها .. أراد أن يقوم رفع رأسه وجدهم ينظرون له بتركيز شديد .. دون أي تردد أو حرج مد يدهم عليهم مناديا من جديد
( كرااااااااااااااااااااااااااااااااااااااامه لله ).
أنفجروا بضحك هستيري دون أي تعليق ..
لكنها ضحكة قالت كل شئ ..
تركهم في حالهم
ثم مضى

.

عامل فيها عالم
2
طبعا بعد ما أستفدت من تجربة النمل العلمية التي ذكرتها سابقا وتعلمت منها أن النمل له وسيلة ما يعرف بعضه بعضه ويميز القريب من الغريب رغم تطابقه في الشكل واللون والمشية زاتها وقدلتو .
نجاح التجربة الفاشلة التي أنتهت بحرب ضروس بين جارين كانوا متحابين وفتنتهم (شلاقتي) أغرتني في أن أخوض تجربة علمية أخرى مدفوعا بحاسة الملل من الإنتظار القاتل للأمتحانات بعد اسبوعين .بعد أن قالت لنا إدارة المدرسة رفعت الأقلام وجفت الصحف .. البنقدر عليه عملناه معاكم بعد كدا كل واحد ( ياكل ناره براه ) .. في تلك الأيام صادف زواج بنت جيراننا . كعاداتنا السمحة في السودان في زمن لا في قاعات ولا في أندية ولا أوهام هذا الزمان العجيب . بل تفتح بيوت الجيران على بعضها البعض وتستضيف الضيوف والمعازيم كأرحب ما يكون والفرح يعم مثل الخير .. خلاصة هذه المناسبة كان من نصيبنا برميل ماء ظل قابعا في حوش الصالون عندنا .. وهي عادة كانت تبرد به المشروبات بوضع زجاج البيبسبي عليه وتغطيته بالثلج .. ظل هذا البرميل قابعا في حوش الصالون عندنا وبه ماء راكض فترة طويلة أكثر من أسبوع نسوه أهله ولم يسأل عنه أحد .
يوم ما من تلك الأيام وأنا أحمل أحد الكتب واسمع لنفسي .ألف وأدور .. القيت عليه نظرة أي البرميل لاكتشف أنه البعوض حوله لمستشفى ولادة ..به كثير من طور حياة البعوض في شكل ديدان صغيرة تسبح برشاقة أظنها اليرقة أو الشرنقه لا أذكر ( ابتعدنا من العلم زمن طويل ) .. فركت يدي فرحا وقلت هذا هو العلم ( الما خمج) وخاصة أن دورة حياة الباعوضة كانت من ضمن مقرر الشهادة في علم الأحياء .
جريت نحو المطبخ أحضرت ( مرطمان ) مربى فارغ غسلته تماما وثقبت الغطاء بمسمار عدة ثقوب وغرفت به من هذا الماء حاملا كمية لا بأس بها من هذه اليرقات .. وقفلت المرطمان .. وتركته عندي في الطاول في الصالون .. وكل يوم اثناء المذاكرة اراقب التطور الذي طرأعليها .. تسبح ثم تأتي قريب السطح لتضع فتحة التنفس معرضة للهواء وأذا أجريت أي حركة تهرب غطسا داخل الماء ثم تعود من جديد .. يعني طبقة صغيرة من الزيت ممكن تمنعها من هذه الحركة لانها ضعيفة لا تستطيع أن تخترق طبقة الزيت وتموت بالاختناق .. شوفوا مكافحة البعوض سهلة كيف ؟؟ ممكن طبقة من زيت العربات المحروق على برك مياه الأمطار تقضي على البعوض نهائيا في طور اليرقة لأنها تمنعه من الأقتراب من السطح حتى يتنفس فيموت مختنقا .. رغما عن ذلك تجد الدولة عاجزة عن مكافحته والملايا تفتك بالشعب .
المهم بعد اسبوع تحولت هذه اليرقات للون الأسود وتغير شكلها تماما في طور الشرنقة على ما أعتقد .. أصبحت عبارة عن كور سوداء صغيرة لها ذيل وتسبح من القاع للسطح بسرعة رهيبة كأنك ترمي كرة تنس طاولة على البلاط ..
ظليت أيضا اراقب فيها .. في اليوم العاشر تقريبا لاحظت لها كلها تجمعت في السطح وظلت ساكنة لفترة .. وبدأت عليها حركة تشقق ..تركت كل شئ وركزت عليها ..
بعد قليل بدأت هذه اليرقات تتفتح وتخرج منها الحشرات بصورة مذهلة ومرعبة في نفس الوقت كأنك تشاهد في فلم من أفلام الزومبي أو مصاصي الدماء ..و شكلها كأنه عمال مصنع يخلعون عنهم لبس (الأبرول) بعد دوام طويل أو رواد فضاء عادوا من رحلة خارجية .. ظليت مركزا عليها وقلبي يقرع بشدة .. لم يقل لنا أحد أن هذا الطور هو عبارة عن لبسه تخرج الحشرة من داخله أنا شخصيا كنت فاكر ان الشرنقه هي نفسها تتحول لحشرة بعد أن ينبت لها أرجل وجناحين .. بل تركت أبرولها عائما في الماء وبدأت تتطاير في الفراغ داخل المرطمان .
أصبح عندي عددت من الباعوضات الحيات تنشد الحرية وأكيد جائعة ..
بعدما فقت من الدهشة طبعا لم تجد عندي الا .....
البفباف
يلا بلا علم بلا بطيخ
كمان نربيها وتمتص دمائنا
وتبقى علينا حكاية
من دمي غذيته
ودام العلم
ودمتم

درديري كباشي..
وعشان ضميرك يكون مرتاح تقعد تقلب في الكتب وترمي كتاب ورا كتاب...
.بالضبط هذا الذي يحصل ايام الامتحانات...
رجعنا نريح اعصابنا بحكاويكم وقصصكم الشيقة .
.ومتابعة لصيقة معاكم
ودمت بالف خير وعافية

سلام يا بسمات

ربنا يوفقكم ويسهل الامتحانات

نشكرك على الطلة
وسلان للأميرة

Quote: الزول لو لدغتو عقرب بسو ليهم موية ليمون ومديدة حلبة

لاااااا حولاااااا
إنتو بى هنا مع الشحاميط وكمان معاكن ودالمقدم وانا ماجايب خبر؟
اصبروا لى الـ نَّحك قرصة الرتيلة دى واجيكن صاد.
يا ودالبوش ده سعال خاص ليك وكان غلبك يجاوِب حفيض ودالكباشى ده خلوه للَّآخِر.
عربى من نواحينا لدغتو عقرب والنسوان انكسرن فوقو يكفِّرن لو.
وكل ما يدخل فوج تقوم واحدة تسعلو: إنت يافلان العقرب قرصتك وين؟
يجاوب: فى بكانَنْ اعوج فى بكانَن اعووووووووج.
اها ياود البوش عرفتو؟

الصديقات وألأصدقاء هنا..حبابكم جميعا..

ياخي ود البوش بطريقتو دي ح يجي يقول لينا : بالله واحد مصلط يحكي لينا حكوة الثعبان والسلطة (سلطة الطماطم) ونبقى في عيييك وعااااااااااااك ( يا السنوسي تصدق الحكوة حكاها لي اخونا محمد حسن هلال ، وانا اشيل واوزع، لغاية الليلة نوايطي من امدلاديم البنيات بتوجعني..!!)..

كلام ول ابا عبيد ، عن الشيخ الشنقيطي الجاب كلام ابن الرومي ، كن ما اخاف الكضب الشاعر حميد قالو بطريقة بندرية (يفيض النيل ، نحيض نحن)..!

سكين فطومة وعقرب جبرة ،
الحوازمة عندهم ثلاثة فرسان مشهورين : غبوش تور النحلة ، الوكيل خربيز ، والحسب النصيبة ، وعن الأخير يقولون: كن انقطعت السبيبة وقعت النصيبة..!
والحسب النصيبه كان رجل شجاع للغاية ، مرة سأله احدهم عن اكتر موقف شعر فيه بالخوف ، فقال: مرة طلعت الخلا(عاد ده كلام ده، اوعي تجوا تقول لينا اشرحوا لينا طلوع الخلا..!!!) ، اول ما قعدت ، شخرت تحتي امشديقات (ثعبان الرتيلاء تقريبا) ، قال واصلت غرضي ولمن انتهيت اتمشمشت بيها..!!!

ومن بلاغة البدو ، كنت مرة انا وصديقي محجوب ، في دكان احد اقربائه بالدلنج ، وجات عمتنا واحدة دخان الدروت مكنتت فيها ، وقالت لسيد الدكان اوزن لي كيت وكيت ، وقام سيد الدكان قال ليها: شكلك جيعانة..!!..
عمتك وبسرعة ودون تلفت قالت ليهو: جيعانة دارين..!!
قمنا انا وصاحبي محجوب ضحكنا بصوت عالي ، وعمك جدعنا بسنجة الرطل ونحن نفر بجلدنا من غضبه ..!!
اها واحد قاعد معاهو ، زول بندر ساكت ، قال ليهو: ده شنو يا الشريف ، الأولاد ديل مالك معاهم..؟
عمك بغضب قال ليهو: عيال قليلين ادب..!!


طبعا البدو عندهم مشكلة مع الأفندية ، خصوصا الناس البتمشي البادية وبتكون لابسة بنطالين.. واذكر عمنا زمان كان مهمتو تنظيم الناس كلما يزور لقاوة مسئول وعندو عبارة طوالي بيقولها: الطلبة والأفندية والعوين يقيفوا في الصف البي جاي ، والرجال يقيفوا في الصف البي جاي..حقارة شديدة..!!!!
وفوق ذلك عندهم مشكلة كبيرة مع المحاميين..وبيعتبروهم متلقين حجج ساكت.. والتسمية ترجع لواقعة (حقيقية) حدثت في محاكم الضعين في الثمانينات تقريبا..والشاكي عامل بلاغ سرقة لــــ (حمار) وصديقنا المحامي لم يكلف نفسه الإستفسار كثيرا ، فصار يخطب في المحكمة: سعادة القاضي، هذا المتهم قام بخداع الحمار وتقديم العلف له واستدراجه الى ان قاده بعيدا عن الفريق وليقوم بسرقته واختطافه..لب لب لب لب..!!
قام القاضي وبكل سخرية وقال ليهو: يا استاذ الحمار المسروق حمار هدوم..!
وانفقعت القاعة بالضحك..!
ومن وقتها صار اهلنا يقولون عن المحامي : متلقي حجج ساكت..!!

في ابي زبد ، ايام ادائي للخدمة الإلزامية ، قام اصدقائي الأساتذة محمد الحافظ حامد ويعقوب ابو القاسم ، بتكليفي بالإشراف على فرع مكتبهما في المدينة (مكتبهم الرئيسي كان في مدينة الفولة ، عاصمة غرب كردفان) ومتابعة مكتب ابوزبد كانت تكلفهم السفر ، وكانا يتبادلان الحضور ..والحافظ المنجوه وكتها ما صدق اني في المدينة ، واتعرف على وجودي في المدينة بحكوة طريفة ..نحكيها لاحقا..يعني اذا طلب ذلك..!
ورغم قصر المدة التي قضيتها هناك ، حدثت لي طرائف عديدة وكثيرة ومضحكة وفيها بعض العبر والدروس..!

احد القضايا كانت قضية ورثة ، والشاكية اسمها الزريقة ، وكانت تطالب بحقها الشرعي في ورثة زوجها المتوفي ، والبدو (اهلكم المسيرية) كانوا معنقدين شديد معاها ، اولا عرضوا عليها الزواج من داخل الفريق ، يعني تتزوج احد اشقاء المرحوم، وهي رفضت ، وكان عندها ولد من المرحوم ، فعشان كده باقية ليهم قاسية ان تمرق الثروة وابنهم من اياديهم..وحدثت الملاواة ، فاضطرت الى اللجوء الى المحاكم..!
وكان عرضوا اتفاق ودي ، وكنا نناقش الأتفاق في مكتبنا (ممثل الشاكية)..ياخي اعمامك سطوة ما عادية ، وحدة في النقاش..وكنت بحاول اشرح ليهم فكرة حقها الشرعي بموجب قانون الأحوال الشخصية السوداني ، واعمامك دي بطينة ودي بعجينة..!
قام عمنا واحد استفزاني وقال لي: يا وليدي دي اعراف انتو عيال البندر ما بتعرفوها.. ودي تقاليدنا..الخ..!!..الزولاية دي حقها تور شيلها ، وتاني زيادة ما عندنا ليها حق..!
اها مافي طريق الإ تستخدم حيلة من نوع ما.. والحيلة التي استخدمتها ، وقتها ، هي تغيير الموجة (اللغة) وقمت اتكلمت معاهم بالآكسنت بتاعهم (لهجة المسيرية) ..!!
طبعا البدو ، لا يخافون الحيكومة ، ولا يخافون أي شئ ، ولكنهم يخافون حينما يكتشفون انك منهم..!!
ياخي اعمامك اسكت ساكت خليهم..!!
طبعا نسوا موضوع الورثة وقعدوا يستجوبوني: اتا منينك في الأهل..!
طبعا جاوبتهم..لغاية اكبرهم سنا ، شيخ اسمو حامدين، قال لي: ام سماح ام عسكرية بت نصر السكران بتبقي ليك شنو؟..
قلت ليهو: امامتي (حبوبتي ام امي)..!
قال : امك ياتي في بنات نصر الدويد؟..
قلت ليهو: الصغرانية
قال: اتا ول للنور ملاح؟
قلت: ليهو واي..!!
عمك طوالي نط قال لي: ام سماح دي بت عمتي ، ونحن اهل ، والبتقولوا كل بيمشي يا ولدي..!
طبعا مرقتهم من المكتب ، نظام توفير خصوصية للموكلة وكده ، وسألت موكلتي وكان طلبها بسيط للغاية دايرة ليها اربعين راس من البقر (حقها الشرعي كان يتجاوز الميئتي راس.. ناهيك عن حق ولدها الذي يصل لثروة ضخمة..!!)..وحينما رات الأستغراب قالت لي: يا استاذ ، انا ماني دايرة كتير ، واعمام ولدي كعبين ح ياكلوا حقو ، وقت اخير اخت ليهو حاجة على جنب..!
قلت ليها: عندك نية تتزوجي تاني؟
دمعت عينها ، وقالت لي:مافي راجل بيخلف المرحوم..!
ناديت اعمامك ، وشرحت ليهم حق الزولة وحق ولدها ، ووضحت ليهم انها ما عندها نية تتزوج وتمرق من فريق ولدها..!!
اعمامك اتكيفوا جنس كيف..خصوصا عمي حامدين ، وقال لي: اتا ليك تور..!!

اتوا قايلين شنو؟..قبضت توري..زي الترتيب..!!
اللذيذة ، بعد داك ، أي واحد عندو قضية حولها لمكتبنا..!!
يعني من عرف لسان قوم ، امن شرهم..!!

من حكاوي ابوزبد ، وهي كثيرة ، عمتنا من اهلنا الأبالة ، اسمها بت بانقا ، وكانت عندها مشاكل مع القانون في ابي زبد (طوالي بتنقبض مزبهلة..!! زولة من ام بلبل الحادقة واتا ماشي..!!!)..اها القاضي ، غلبو اليسويهو معاها ، وبعد كم عقوبة حد قرر يسجنها ، طبعا قعدت كم شهر في السجن ، صلاة ساكت..لمن ناس السجن حسوا بانها استعدلت شوية ، ويوم جات واحدة صاحبتها ومرقتها عشان تمشي سماية ، وناس السجن عملوا ليها اذن زيارة ، طبعا عمتك توش خشت شمال ، والأغرب اتقبضت في كشه..!!
زميلنا محاميها ، قال لي عليك الله شوف لينا صرفة لعمتنا دي ، ياخي غلبنا النسويهو معاها..قلت ليهو خليني اتونس معاها..
اها مشيت ليها ، في حراسة الإنتظار ، وعرفتها بنفسي ، طبعا عملت شوية بهارات ووريتها اني سرحت بالبقر في قليصة ، اب قلب ، السعاتات ، القوز اب شعر ، الخرطوم جديد ، ام عويشة ، الطقنو..وهي اسماء مناطق حول ابوزبد..!
عمتنا اطمأنت لي ، حكت لي قصتها ، قالت لي: يا ولدي ، مشيت السماية ، وام عزين ، مقطوعة الطاري ، حلفتني بالله ، وقلت ليها ابيت انا ناس الدرك واقفين لي فوق راسي ، اها قامت المسلطة قالت: الرسول كن تعزيهو..ما بتعزي الرسول يا بت بانقا؟..اها الوضع غلبني ، وعزيت الرسول..ووقاموا ناس البوليس قبضوني..!!
طبعا لا عرفت اضحك ولا عرفت ابكي..!!
اشتغلنا شغل خاص ، وعمتنا رجعت السجن ، لكن حرمت من الزيارة لبعض الوقت..!!
قامت قالت لي: ياخي اخير يجلدوني بدل يحرموني الزيارة..!!
اكتشفت فيما بعد ، انو عمتنا كانت ، في زمن الزيارة ، بتسرق السوق طوالي ، لكن انقبضت في المرة الأخيرة..!!

ونشوفكم في حكايات تانية..

كتر خيرك يا صديقي درديري ، لميت كوكبة صعب تتلم باخوي واخوك في زمن المنبر العابس ده..!!

تحياتي..

كبر

اضافة صغيرة ساكت:

الطريفة في قصة عمتنا بت بانقا ، انو صاحباتها كانن بيقومن بدفع اتعاب المحاماة نيابة عنها..شفتو امسودان دي لذيذة كيف؟..
والأهم كان عندها فكرة غريبة في حكاية الكشة والقبض ، هي وصاحباتها.. لأنهن بيفتكرن انو القبض مفروض يكون في حالة الناس الشاربة ام بلبل والعرقي ، لكن الدكاي حاجة عادية..!!

طبعا عمتنا بت بانقا كانت مصرة ككيف يعني يحاكومها علي شراب الدكاي..!!

ولمن عصرت عليها قالت لي: شربت نص كباية عرقي..!!

وقلت ليها : الموضوع مش شربتي شنو وقدر شنو ، لكن المكان..!!

وبتكون لغاية الليلة مستغربة من فلسفة الدرك في قبض الناس..!!

كبر

لاااااا حولاااااا إنتو بى هنا مع الشحاميط وكمان معاكن ودالمقدم وانا ماجايب خبر؟ اصبروا لى الـ نَّحك قرصة الرتيلة دى واجيكن صاد. يا ودالبوش ده سعال خاص ليك وكان غلبك يجاوِب حفيض ودالكباشى ده خلوه للَّآخِر. عربى من نواحينا لدغتو عقرب والنسوان انكسرن فوقو يكفِّرن لو. وكل ما يدخل فوج تقوم واحدة تسعلو: إنت يافلان العقرب قرصتك وين؟ يجاوب: فى بكانَنْ اعوج فى بكانَن اعووووووووج. اها ياود البوش عرفتو؟
-----------
وأنت وينك يا ود الفاضلاب

فاتتك الفتة وأم فتفت والويكاب والتمليكة وأم تكشو و المرس والموليتا والكول

عالم عجيب أبقى تعال حصل الباقي

واتعرف على وجودي في المدينة بحكوة طريفة ..نحكيها لاحقا..يعني اذا طلب ذلك..
المصدر :
حباب كبر الرجل الدسم

دي كووتها عشان أذكرك بس ما تنساها

ياخ أنت زول مليان حكي شايق

كتر منه بالله

(لاااااا حولاااااا إنتو بى هنا مع الشحاميط وكمان معاكن ودالمقدم وانا ماجايب خبر؟ اصبروا لى الـ نَّحك قرصة الرتيلة دى واجيكن صاد. يا ودالبوش ده سعال خاص ليك
وكان غلبك يجاوِب حفيض ودالكباشى ده خلوه للَّآخِر. عربى من نواحينا لدغتو عقرب والنسوان انكسرن فوقو يكفِّرن لو. وكل ما يدخل فوج تقوم واحدة تسعلو:
إنت يافلان العقرب قرصتك وين؟ يجاوب: فى بكانَنْ اعوج فى بكانَن اعووووووووج. اها ياود البوش عرفتو؟)
تحياتي ومعزتي الأخ الفاضلابي وسلااام مطبوق
ياخ دي عقرب لئيمة خلااااااس والله تقول معرس فوقها "ضرَّة)

تحياتي للجميع وشكرا يادرديري وكبر ودمتم منهل للإبداع
وتحياتي تصل الأخت بسمات بت الشيخ

استاذنا كبر
التحيات النواضر
قصة الرزيقة طبعتها واديتها لاميرة ...لانها موصياني اطبع ليها بوستات
لنفر قليل من اعضاء المنبر ، واشرت اليهم في بوست اخر، وانت منهم..
فهي غادرت نهائيا ونذرت بان لا تفتح المنبر العام ولكنها مدمنة قراءة
..وقصة الرزيقة بتوضح طيبة اهل السودان وطيبة اهل القرى والبوادي
وقوة الروابط الاسرية البتتميز بيها كل السودان...
انتم تجعلون حياتنا فرحة وسرور وتجعلونها سهلة ميسورة وهناك الكثير
من فحيح الافاعي (انا معجبة بهذا التعبير واستخدمها عضو البورد بدر الدين)
وفي هذا البوست نجد العسل المصفى الممزوج باللبن الصافي ...
وبت السيد ماخدة خاطرها من الزول الجميل ود اب سن، لانه من الافراد الذين طلبت
مني بت السيد ان اطبع لها مقالاتهم، وهي لا تلوم الا الاحبة، لانه ناصر ناس بيترصدوها
لحبها وعشقها للنبي الكريم...
مقالاتك يا استاذ كبر دائما بتاكد لينا ان السودان لا يزال
بخير وما تفقد الامل...
والتحيات موصولة لعبيد الطيب...وبت السيد ما كانت
بتكتب الا عبيد ود الطيب، بلغتها الريفية البسيطة......
وراجعة تاني اكمل باقي الكلام....عن طيبة وسماحة
الريف والبوادي..
ودمتم بالف خير وصحة وعافية

الأخت بسمات سلامي وتحياتي لك وسلام ومعزة صادقة للأخت أميرة بت السيد

سلام آآآآآلكلوس .. شوقنا ليكم بحووووور ..

ان شاء الكريم مجتمعين في السمح وتامين ولامين ..
قت اجي اسلم واشوف الحاصل . واطايب ود البوش
ود ابوسن ويا ود ابو سن طالباك وردتين ههههههههه.
راجع الواتساب هيلك . ولا ورودك خلست ؟

تسلموا يا احلي واعز ناس .

بجيكم صادة .

سلام يا بت عمسيب نورتي البورد

حمد لله على سلامة العودة لبلد الزهور والورد

شايف صورك عطرت المنبر