حبوبة نور تاور (صور)

00:06 AM January, 13 2017

سودانيز اون لاين
معاوية عبيد الصائم-
مكتبتى
رابط مختصر

نتااااااابع

ربنا يحفظم ليك ي مواطنة

ما شاء الله عسلات والله ربنا يحفظهم ..
تحية لي حبوبتهم وامهم وابوهم ..

ربنا يحفظم ليك ي مواطنة
ما اجمل ابتسامة الاطفال في زمننا هذا الاغبر

ما شاء الله ربنا يحفظ الحلوات ويحفظ والوالدين والحبوبة الجميلة

يا جماعة الخير قولوا بسم الله ماشاء الله ..... ديل بنات نوبة حفيدات الملكة نور حفظها الله وعلا مقامها ...... انتو يا الجلابة عيونكم طائرة ..... الداير يعرس من بناتنا الايوزنها بالدهب عيار ٢٤ .... تانى عرس بى اخوى واخوك مافى ...... كرهتونا البلد.

احلى امورات وربنا يحفظهم ما شاء الله

.. ديل بنات نوبة حفيدات الملكة نور حفظها الله وعلا مقامها ..

----------------------------------------------------------------

السلام عليكم
اخوي نواي ...

ديل بنات السودان ، حفيدات تاور الكبير ... ترباية حبوبتن أكان د. عفاف أكان الملكة نور ...

حاجزين من اسع يا نور ....

ألف شكر يا معاوية ويا جماعة الخير..
و الله العظيم فرحتونى كتير..

ربنا يحفظهم ما شاء الله

الأخت الراسية الراقية نور
لك الإحترام كله و المودة
ما شاء الله تبارك الله.
الله يحفظهم و يغطيهم و يديكو يديهم العافية

يا سلااااام يا حلاااااااتم يانور الله يحفظم ليكم ويحققوا كل الأماني
المال والبنون زينة الحياة الدنيا

ربنا يحفظهن وتشوف احفاد احفادهن

ما طالبنى حليفة يا معاوية..
لما شفت الصورة كنت داير افتح بيها بوست
من روعتها...مشاء الله...ربنا يحفظ ويوفقهن...

تحية عبرك لحبوبة نور تاور...

كل الآعزاء فى المنبر...


و الله فرحتى بيكم زى فرحتى بعيالى تمام..
و أن شا الله العقبال عندكم..
لآنه نعمة الاحفاد دى من أكبر نعم الله سبحانه وتعالى..
تشعر بالراحة والحب..
وكان ليك مراد ما تكشر فى وش زول..
و لا زول يزعل منك..
حقيقى الاحفاد من أكبر نعم المولى عز وجل..

ماشاء الله تبارك الله

انحنا بنات النوبة بتاعتنا كلهن مخطوبات ..... وفى كشف حجز احتياطى .....من هسى كلمناكم عشان مافى زول يزعل ...... ويقول دى عنصرية وكدا ..... لكن العايز يسجل فى كشف الاحتطاطى ممكن يسجل....... لكن ما يعشم حتى كشف الحبوبات ما فيهو فرقة ...... شطبنا خلاص ..... اغلى شئ نمتلكه بنات النوبة السنونهن بيض تقول لبن بقارة ..... اقيم من الارض والمال ..... وسر جازبيتهن ابتسامتهن النابعة من القلب .... وقفت قدامها داير اقول ليها احكيلها عن ريدى طار الكلام منى....... الاصلو فى الجوف اندفن لا بتمحى ولا بينتهى منه الحريق يا ضلنا ......هى الشجرة المخضرة الوارفة الظليلة التى تستظل بها من عنت الحياة......مهما كتبنا عنها لا نستوفيها حقها ايتها المليكلات الجميلات تبر الارض.

ماشاء الله يا حبوبة نور ربنا يحفظم ويغطي عليهن. آمييين

نور
حفيدات عسل والله
والله يديهن الصحة والعافية ومستقبل باهر في وطن
حدادي مدادي ويشاركن في ازدهاره ومجده..
والله يديكي الصحة والعافية

بعد ما شاء الله و لا قوة الا بالله ..

انحنا ناس عمليين ...

ممكن نحجز ؟

ربنا يحفظهم و يفرحكم بيهم جميع ... و يديم عليهم حضن حبوبتهم ان شاء الله ...

قلبي بتهرد يا نور لما اشوف صغارنا محرومين من تراب الوطن ...

لا كدو دوم ... لا نقوا ضريسة من كرعينهم ... لا مزمزوا قنقليز لا قراصة نبق ...

فى الحقيقة يا ودقبانى ....انت ما عصرت علينا شديد..... ما عارف اقول ليك شنو .... انتو ناس كويسين ومرهفين الوجدان و بتعرفوا تقعدوا الكلام غير أنه شعركم سبيبى ولونكم فاتح لكن الواحد ما عارف يقول شنو ...... لكن اهلنا ديل صعبين خلاس.....ا نحنا ما شفنا منك الاخير ....احييييي راسى دا مالو واجعنى ....... طبعا لكن الواحد ما عارف يشرحا ليك كيف .... لكن الزمن دا انت براك عارف ..... الكلمة عند صاحبة الشأن ...... لكن يا ود قبانى ما دخلت الواحد فى اضافرينو .... الخير فيما يختار الله.
انت يا حمد من هسى فى دربك دا ابدا فتش لى لبن الطير شروطنا كدا ...... كلمة ورد غطاء انحنا ما فاضين ما تعمل لينا دوشة و وجع الراس ..... نحنا رجال عندنا كلمة..... جبت لبن الطير اهلا وسهلا ..... ما جبت لبن الطير يفتح الله ويستر الله ..... والباب يفوت جمل ...... انحنا ورانا مشاغل وما فاضين...... الكلام لى هنا خلاص انتهى.

ربنا يسعدك بيهم ويسعدهم بيك يا ستي نور

ربنا يحفظهم في دينهم وأخلاقهم وأنفسهم ,,,

ويرزقكم برهم إن شاء الله...

اجمل تحية و باقة زهر ليك يا نور و لحفيداتك الحلوات .

والتحية لصاحب البوست و ضيوفه الكرام .

سلامة قلبك يا باشمهندس قباني .

شكرا يا معاوية
والتحايا لك ولحبوبة نور

ربنا يحفظهن ويسعدهن بك ويسعدك بهن ويسعد أبويهن.

ما شاء الله تبارك الرحمن
حلوين .. ربنا يحفظهم ويغطي عليهم ...
وهذه من حسنات الزواج المبكر .. الواحد يشوف احفادو ..
حسي انا الحمد لله عندي خمسة من الاحفاد ربنا يخليهم

تحياتي ليك حبوبة نور ...

الميزة الحقيقية للمنبر العام..
هى أنك بتتعرف على ناس حقيقيين..
يقيفوا معاك فى الشدة..
ويفرحوا ليك أذا فرحت...
ألف شكر لكل المتداخلين..
ويا ريت معاوية ينزل صور الآولاد كمان..

ويا مجيدو على ايامنا كانت الآحوال عال..
الدراسة وتخلص بدرى بدرى...
و الزواج يتم بدرى بدرى..
وكمان البت تعّزل من كتر الخطاب..
و الخلفة بدرى بدرى..
لغاية ما تشوف أحفادك..

لكين هسى دى..
الله يكون فى عون الشباب...

عسولات شديد ربنا يحفظم ويستر عليهم.
شكرا معاوية وصادق الأمنيات موصولة للأستاذة نور تاور.


محبتي

ويا ريت معاوية ينزل صور الآولاد كمان..
......................................................................
نزلتهم وتانى بنزلم هسى دى..تحياتى

شكرا معاوية
والتحايا لك ولحبوبة نور

ربنا يحفظهن ويسعدهن بك ويسعدك بهن ويسعد أبويهن.

السلام عليكم
أخوي نواي ...

بعد ده اكان طلبتوا مني لين "نملة أو حتى جرادة" بقول ليك الغالي يرخص ل بنات الفارس تاور ... أبشششششر بالخير ...



اهااااا تاني عندكم كلام ؟

----------------------

اكيد احترامي وودي لصاحب البوست ود الصايم، رغم المماحكات السياسية بيناتنا التي لا تشبع ولا تغني من جوع...!

[url=[/url]
عويد بخور
تعويذة من العين العنية
ربنا يحفظهن ويعلي من مقامهن

جميلات ربنا يحفظهن جميعاً ووالديهما وست الكل ست الذوق نور تاور ..

وجوه مليئة بالثقة والعز والمهابة ..

ما شاء الله تبارك الله
اجمل الاطفال قادمون
الكتكوته الصغيرة دي حجزتها
لي ولدي يا حبوبه نور

ماشاء الله ربنا يحفظهم ويغطيهم
غايتو من هسي ختونا في الكشف حاجزين
محبتى وودى

وعليكم السلام حمد
الخوة شئ والنسب شئ تانى ......كلفة النسب عندنا عالية حتى الملك بنتنازل منه من أجل النسب.......اذا طلبت المال يمكن أن نمدك .....واذا طلبت الفزعة فى عز الهجعة يمكن أن نفزعك ....لكن اميراتنا الجميلات كانك تقطع من أجسادنا اللحم وخشيت فى العضم....... يا حمد ما تخش لينا بى خوجلى وتطلع بى حمد ...... عشان اللولوة دى انحنا عندنا رائ ....... انحنا نقول ليك لبن الطير الطير الضكر ..... اتا تقول لينا احلبوا ...... كلامنا واضح والواضح ما فاضح ....... كان قلتكم خايفكم تضايقوا ...... بس علا الله لاجاب الضيق .... اصلوا العلى باقى من قبال تجينى ..... لا يلدق المؤمن من جحر مرتين ..... اولاد دار بحر زمان اديناهم حبوباتنا نكرونا حطب ...... الضاق لدضغ الدبيب بخاف من جر الحبل ...... مضارة المؤمن لى نفسه حسنة .

مكتول هواك انا يا كردفان .....مكتول هواك انا من زمان.

في البداية تحياتي معاوية
وكذلك للجميلات أرق التحيا
أنتم للدنيا معني أخر
وما شاء الله ربنا يحفظ الحلوات ويحفظ والوالدين والحبوبة الجميلة

يا جماعة صلوا على النبى .....شايف الطلبات كترت ..... والكترة بتغلب الشجاعة ...... انتو يا جماعة ما موحدين ...... وحدوا الله اى واحد يمشى يغطى قدحوا ...... باقى الحكمة العندنا دى قربت تخلص ....... يعنى انتوا عاجبكم الواحد يفلس بعد العمر دا ...... يعنى الواحد يفك اخروا ويفقد وقاره ...... يسب ويشتم ويقفلوا ليهو حسابه فى المنبر بطلوا الحسادة ..... يعنى الواحد ما ياكل معاكم عيش ولا شنوا ...... ناكلوا اخوان ونفرزوا الكيمان ..... ما تخلطوا دى بى دى ......كل شوكة بتمرق بى دربها ........ الله ذاتوا قال القبيلة القبيلة القبيلة ما لكم يا ناس دايرين نحافظ على نسلنا الملوكى .

ما شاء الله .. تبارك الله
زهرات
جميلات
حفظهن الله .. وجعلهن قرة أعين لكم يا نور
وشوفو دنيتنا الجميلة

مودتي يا مواطن

ماشاء الله ربنا يحفظ لك الزهرات الجميلات يا دكتورة

وووالدهم واخوانهم

شكرا معاوية على اللفته البارعة وتغيير المود في كل مرة

يا سلااااااااام ياخ
ربنّا يحفظم ويُبارك فيهم وبهم .. وما أســعدها من حــَبـّوبة، هذه الأخت الكريمة
والناشطة السياسية الواعية ومتحمّسة لتقدّم وطنها السودان .. وكتّر خيرَك يا معاوية الطرائبي
على طوربيديّتك المعهودة في فقئها عيون العِمي السياسويين من بني جلدتنا ال كي شـان..! لا بارك
الله لهم، في رفع العقوبات الأمريكية التي هلكونا بيها، وإن شاء الله ما تنفعهم! إنْ لَم يُغيّروا طرائقهم
الفاشلة العاجزة التّالفة في إدارة شؤون البلد كــ حاجة حقّتم براهم! وها هُم بعوراهم فيها، يتخشلعون ..!

العزيزة المكـّة نور بت المك تاور، اللّتاريك حبّوبة بقيتي ..؟ لكن ما شــاء الله، على أولاتي الأمّورات
الزّهرات السودانيات الواثقات بسيماء وجوههنّ المُبارَكــة، وما شاء الله على الأشبال الحفــــداء
( مع أنّي لم أرَ صُوَرَهم بعد) .. ويا عزيزنا أيمن نــواي، والله ما عارف أبداك من وين يا مان؟
ياخي داري على شَمْعة هويّتنا السودانية الجَمعية، تقيد ..! يعني إشــمعنا كنتَ راقد بهذا الرّوح
السودانوي الهتّان وُ "طَرَّاب" وانت قادر على إزالة ما تراكم من توجّسات في نفوس كثير من السودانيين
بشأن الهُــوية الســودانية الجامعة و مانــعة..؟ فشكراً لتناولك الجميل، وأتمنى أن أقرأ لك تصوّراتك
ومفهوماتك عن تواريخ واجتماع وجغرافيا وتقاليد وتراث المنطقة التي شهدت مسقط راسك، أهلها ومكوّناتها
وأحداثها التاريخية وسِماتها الثقافية و.. و... و.. و... إلخ,,, مُقارَناً مــع مــَا يتسيِّد الساحة الآن من تداحر
وتشاحُن حول ذات الهوية الواحدة، وقد تناقضت مفاهيم الناس جـَرّاء تناقُض الآيدلوجيــّات.


ربنا يحفظ حفيداتك حبّوبة نور تاور، ويحفظ أحفادك ويسعدهم بيكم ويسعدكم بيهم ويسعد بهم السودان ..
شكراً ود الصائم..
وتحايا للجميع

مرحب ابوجودة
الشئ بالشئ يذكر ..... اصلو القصة وما فيها ..... فى يوم من الايام والدنيا خريف الارض وسفوح الجبال تكسوها الخضرة والسماء صافية الا من بعض السحب تحجب أشعة الشمس والهدوء يخيم عليها الا من بعض شقشقة العصافير وصوت الدواب ......فى هذا الجو الشاعرى كنا نختئ خلف صخور الجبال نراقب حسناوات الجبال وهن يذهبن للدونكى لى جلب الماء نراقبهن يمشين الهوينى يختالن بين قصون الاشجار ونحن بين الصخور رغم سخانتها لكن لا نشعر بها كل ذلك من اجل اختيار شريكة الحياة مستقبلا.....عملا بحكمة ود البدرى سمين و الا تكون فى كشف الاحتطاطى مع اهلنا الطيبين ..... فى لحظة الترقب واللهفة والشوق لرؤية المحبوبه والحذر ان لا يراك احد مختبئ خلف الصخور زى الضب ...... فجاء اسمع صوت جوعار يشق السكون والهدوء ...... بسم الله جدى دا شوطن ..... مالك ياجدى تبكى ..... دا ما بكاء ياولدى .... دا بيقولو ليهو جر النم فى الدوباى ..... ديل ناس اهلك فى دار بحر ..... الواحد لمن يفيض بيهو الحنين بطلع الهواء الساخن من الصدر ..... يا جدى اهلنا ناس دار بحر ديل لاشفناهم فى فرح ولاكره ...... يبقوا اهلنا كيف ..... يا ولدى اهلنا الكبار زمان قالو زوجوا ليهم حبوباتكم ..... لكن الغشامة كاتلاهم لكن برضوا فيهم شوية طيبة .

الأستاذة نور تاور تحيتى ومحبتى
ما شاء الله ربنا يحفظ الحلوات ويحفظ والوالدين والحبوبة الرائعة
يا نور كلنا فجأة بقينا حبوبات زيك

تبارك الرحمن
ربنا يحفظكم جميعاً من كل شر
وتفرحوا ببعضكم

صباح الورد و الياسمين على الجميع..
و مرة تانية بشكر كل المتداخلين و المتداخلات الكريمات...
حقيقة شرفتونا كتير..
وعقبال اللى لسه ما حصلوا المرحلة دى..
و الله يبارك لكل أحفادكم يا اللى بلغوا المرحلة دى..
و يا دكتور احمد الحسين..
كلامك صحى..
فجأة تلقى نفسك بقيت جد وبقينا حبوبات..
الزمن سرقنا وأحنا قاعدين نعافر فى الما تتسمى الانقاذ..
الشكر مكرر للجميع...

كتر خيرك يا معاوية..
وكل الحب للورود الجميلة دي ، ياريتها تكبر وما تنسى تنثر العطر حواليها..!
عارف يا معاوية.. الياسمين اصلا شدرة كبيرة وجميلة..!!

ويا نور تاور بطــــلي الجرسة ياااااااااااااااخ..!!
وصدق من قال (الدهب عمرو ما بيصدأ)..!!


وللحبوبة (الداخلة في الشخصية ياها)..

الوسيم..ياااااااااااااااخ..!!



لوووووووووب..!

غايتو يا معاوية لو جابت ليها غرامة بقر ، ياكا الضحك شرطك زي صاحبك واحد..!!

كبر

للصغيرات الحلوات الدعاء بالعافية والنجاح، ولك يا أختنا نور تاور التحية وألف مبروك دور الحبوبة . وزي ما قال دكتوراحمد الحسين كلنا موعودون بهذا الشرف. وأهلنا في السودان دايما بقولوا: ما في احلى من الجنا إلا جنا الجنا. أمد الله في عمرك يا نور وأسعدك بجديدهن.بعدين نرجع لأخونا وحبيبنا نواي الشايل عكازو وواقف ديدبان في الباب..حامي البنيات الطلوع وحامي الخطاب الدخول..قال أيه ؟ قال ناس البحر ما يجوا بي جاي! إنت من زمن ناس غرب وناس بحر؟ ياخ ديل بنات (السودان الجديد ).. سودان "ديموكرات"! الكيمان اختلطت يا نواي يا ود عمي .بعدين شايفك رخيت الكلام مع حبيبنا الفنان يحي قباني ..يا ربي الحكاية فيها (غمدة) من هسي وللا شنو؟ بقول الكلام دا وأنا من المعجبين بإسهامات الأستاذ يحي قباني في هذا المنبر وخاصة ما يتعلق بفن الغناء السوداني. كما إن للرجل اسلوبه الممتع والمريح والمهذب في الكتابة!أمنياتنا لك يا أستاذة نور بالصحة والعمر المديد وللحفيدات بالنجاح في مستقبل يسوده السلام والحب والوئام.

اين المواطن أيمن نواى على

ليس أجمل من تعليقات ايمن نواي في البوست الا موضوع البوست: نور وحفيداتها

التحية لحبوبة نور تاور


وآسف يا مواطن على تأخير تنزيل الصور

وال ابا كبر الموسوعة الهداى ..... اذا حضر الماء بطل التيمم ..... الجماعة عملوها غمتى .... كتلوا الجدادة وخموا بيضها ..... اسف ضبحوا التور و وزعوا اللحم ....التور انا شفتوا بى عينى الياكلم الدود .....برتكان ما خلو كابلى ما خلو ..... قضوا على الاخضر واليابس .....قالوا حديد يلاقى حديد .....قالوا دهب ما معانا و هبوب ما يغشانا ..... شفت الكلام دا كيف .....تانى كان عزموك فى استاربكس ما تمشى الايضبحوا ليك تور .... انحنا هينين ولا لينين ...... العاجبوا عاجبوا والما عاجبوا يقع البحر .... تانى استاربكس ما تمشى سمح.

الاستاذ القامة الاديب فضيلى جماع
الناس كلهم اذا كانوا ذى يحى و ود قبانى ..... ما كان ما رفعنا عصاية فى وش زول ...... كان نكونوا ذى الكسرة بالموية لا بنوسخ يد زول ولا بنغلط على زول ......الا تقول شنو ....... هسى ما فات شئ اذا السودان الجديد فيهو رقشة يعينو وزيرين للثقافة والإعلام ويختاروا قبانى و وال ابا كبر رغم أن الوزارة اقل من مقدراتهم لكن المودر ليهو بيفتش فى خشم البقرة .....ما فى حاجة تانى تناسبهم .

الاخ ود حيدر المشرفبنحاول نعكس الواقع وشكرا ليك والعاقبة عندكم فى المسرات.

ود الصائم
شكرا ليك على البوست .... والمحتفى بها الملكة نور ..... واسف اذا كان الواحد دخل غلط ..... وشكرا شعبى للمتداخلين.

شكرا ليك على البوست .... والمحتفى بها الملكة نور ..... واسف اذا كان الواحد دخل غلط ..... وشكرا شعبى للمتداخلين.
...............................................................................................................................................................
ي مواطن والله تمرق من هنا ..تانى انا .ما برجع ي زول ات اجمل زول فى البوست ..اردم ردمك النبيل دا ساااى
تحياتى ي مواطن ي جميل وعبرك للاخت نور تاور

ود الصائم
تب بنرجع ورجلنا فوق راسنا ..... نظرة بس ياود الصائم تكفينا خليك من حليفة بى حالها .

بسم الله ماشاء الله وتبارك الله يحفظهن الحافظ
التحية للحبوبة نور تاور وليك يا مواطن

سودانيز دى ما بقت وطن من لا وطن له و بس..
بقت كمان تشكل نفسية الواحد..
يعنى يومك يبدا بالمنبر..
وأت وحظك...
يا قعدت مبسوط طول اليوم..
يا يومك أتنكد عليك وبقى زى القطران..


ألف مليون شكر لكل من مّر من هنا..
وأهل البيت ما محتاجين شكر..
و الحكاية زى ما قال وّل أّبا كبر..
جرسة وحاصلة..
ولمن أقول للشفع من ورا أمهم وابوهم..
ما تقولوا حبوبة نور..
قولوا ماما نور... أحلى..
يردوا بى خشم واحد...
لا..لا....لا... أتى حبوبة..

بناءا علية..
قررت أمشى الحج هذا العام وأخّلص الموضوع..
صدر هذا القرار تحت توقيعى بالمنبر العام..
وشهادة بكرى أبوبكر..
و العاقبة عندكم فى المسرات..

قررت أمشى الحج هذا العام وأخّلص الموضوع..
..........................................................................
خدمة الحجاج والحبوبات تهمة لا ننكرها وشرف لا ندعيها مرحب بيك ي حاجة نور ومرحب بكل البورداب واسر البورداب

مواظب على قراءة سودانيز اون لاين منذ العام ٢٠٠٩، وفي كل هذه المدة لم اجد بوست اجمل من هذا البوست ،المليان حنية.
شكراً ود الصائم، وربنا يحفظ نور تاور وحفيداتها ويوفقها في اداء مناسك الحج.
تحياتي

انتو يا جدى لمن عارفين الغشامة بتاعتهم دى ليه مدينهم حبوباتنا ...... ياولدى من عاداتنا من زمان اذا جاءك ضيف عزيز تكرمة اذا كان راجل تديهو من واحد من اولادك رمز للخوة ..... وان كان مراه تديرها بنت ...... لكن هم بيمشوا يقولو للولد عبد وللبنت خادمة الناس ديل فهمم بالقلابة ..... انحنا عارفنهم كويس ......الكلام دا من زمن الانبياء ...... هسى بيت الله الحرام دا بيت حبوبتكم الفارسه الكلسه تعبت وربت وشفت ..... و قفت فى وش الاعراب ورتهم العين الحمراء .... ربنا ما قصر معاها كرمها احسن تكريم خطواتها بقت عبادة للناس شفت كيف ياولدى بنت سليلة الملوك .

ي جماعة ممكن تنزلو غنية مكتول هواك انا ي كردفان ب صوت غير صوت عبد القادر سالم

سمح ممكن ب صوت عبد القادر سالم

.
.
نورٌ ...... على نور .

التحية مرة تاني للحبوبة نور ...

و لأستاذي البديع فضيلي جماع ...

و الحبيبة نعمات عماد و الشقيق ايمن نواي ...

و للطوربيد شخصيا و كل الأحبة ...

و مكتول هواكِ انا من زمان ...

ألف شكر يا قبانى..
و نردها ليك فى الافراح أن شاء الله..
حكاية حبوبة دى كانت مخوفانى..
لكين بعد تعليقات الحبايب هنا..
أطمأنيت...

تحياتي يا مواطن
وربنا يحفظ العسولات


وبما انو انا وحبوبة نور زملاء فلس ومشي كداري في شوارع الخرطوم عندي حق الفيتو



خالص الود

يا ياسر بيناوى...
بقيت سمح ومسمسم ولابس أخدر كمان..
حصل شنو ؟
يكون يا ربى وقعت ليك فى بير دهب ؟
طبعا المعارضة غير الفلس و الجوع و المقس ما عندها حاجة..

تحياتى..

حفيد نور حريف كورة ربنا يحفظو ويمشى ريال مدريد اميييييييين

IMG]https://gm1.ggpht.com/S0GpCach1R0GF37zdA7mYqXbEXlWtlUZdVZMQ3tkMrgAbzzZMLsb3KvF8yc84wKVMgZyy8xUVLR7LbfrGAOjIVGBb1QZvLkjhP7Ry8_sIKExGTllQMemDWrFq9SWYiu4SMeVGDhlnbCLWNRBEz5VPjjb8qDOPAtQzZ1tmKtiCbuIMl7aHtm6tT9Tm094LMYP-kbhi4tY0DbSeuOH8EtLg7lDzk3-xQZHLET9T7O9dBXA_1h98YRanbSeRopmD5a8f5cYIjxMDyl999XkZDu4T6PTCh4i6ad4M3DiDVe8MvU7Qb5apDSeeCNNeYZHcNYY-SuqLeUjrgyeFhI6tnbwS6YaaBGQT4gcOdyS4NyKg43h-eVq6SgHWuSH_GccqcbiEmq16Q3XwTMVb0NIcaBna5YDvpqiYGa47FwcQupe3MSISYteaq66F2cXbhd4tS-3U_xoL4Ch2TfBT0gmNXoVag-Bjfaol103YBG9AEb06MXuHyeoK-v_m8cofzN2SJAm3e2yDupqhCvZhF_sHDkLenqrFzfiRA0XvRlgEPIMX0JCZY4u6RtPkYwBHXUbwpDuPG1ic6tPJYViaCiO2M_5mbZPWrxmC6yAP3qQI1kQAhFHT_fz3AAQWEjEKAgCyMIGjbGA4455bAFGpwuhtGb1SgsL8y52pyyQjM-mND8ddSpFB7YbstamLFkNRiI-iPRr3du0cb8up_933w=w1014-h760-l75-ft[/IMGhttps://gm1.ggpht.com/S0GpCach1R0GF37zdA7mYqXbEXlWtlUZdVZMQ3tkMrgAbzzZMLsb3KvF8yc84wKVMgZyy8xUVLR7LbfrGAOjIVGBb1QZvLkjhP7Ry8_sIKExGTllQMemDW...014-h760-l75-ft[/IMG]

بعد أن طال الغياب سامحونى غلطان بعتزر ..... كنا نتفقد اميرات الجبال ...... الزمن العلينا دا بقى صعب ..... اذا الواحد ما اتفقدهم كل يوم تبقى مشكلة ....... وصيناهم ما تخافوا الا من ثلاث .... الله ..... والنار ... والولد الشعرو سبيبى.....هسى شايف الملكة مركزة على شعر الولد المشيناها خطى .... عشان كدا اخاف عليهم الناس نصبح نلقاهم عرسوهم كلهم والفاس وقع فى الراس حينها لا ينفع الدواس ...... الا ان نغنى ظلمونى الناس ..... انحنا الفينا مكفينا ..... ما كفاية الشفتوا منكم ..... ليه كل العذاب وكل الالم ..... كل امانينا نطلع بى امان فوق فى الجبل ونسهر اخر سهر ..... دى كتيرة علينا يا جماعة.

وّل أّبا أيمن نواى....

مرحبا بالعودة..
ومنور ومشرف..
ديل برضو عيالك..
علا حكاية الزواج دى..
ما بنقدر نتدخل فيها..
الزمن تغير..
وحاجات كتيرة أتغيرت..
بس الحمد لله..
فخورين بى سودانيتهم..
و متابعين الحاصل...
وعندهم أحلام للسودان..
لو كبروا ونفذوها..
ياهم البّردوا قلبنا..
علا أحنا شغل الحكومات و الحركات والاحزاب المتكّلسه دا ما خلى لينا صفحة نرقد عليها..
ديل شالوا عمر الواحد كلو..
و مافضلوا لينا احنا تحديدا شئ..
أنتوا لسه قدامكم كتير..
أنا دى عزة جلال الله بشعر بالتعب ليل نهار...
من كترة تراكمات الغبن و المعافرة مع الانقاذ..

تسلمى يا الملكة من التعب والاكل الكعب والله يجازى الكان السبب ..... وقطر الانقاذ الشال عمركم ان شاءالله يتكسر حتة حتة ..... ذي قطر ناس ود المدير يدعو فيه ليل نهار لمن لحقوه امات طه وقعدوا محتارين ...... هسى عايشين على الزكريات وصور القطر فى البروفايل بس ...... الانقاذ سوف تصبح ذكريات ذى قطر ناس ود المدير ...... نعلم كل من ناس ديلا ديلا بس ما تشيلى هم .......الصبر مفتاح الفرج .

والله انتو يا جماعة دايرين الكضب ولا الصاح ...... انحنا لينا الحق نفتخر بى بنات النوبة السنونهن بيض ..... زمن الناس يدفنوا بناتهم احياء من العار ...... انحنا كنا نتوجهن ملكات لى بلائهن و مواقفهن المشرفات ....... ما تعرضنا له من حملات شرسة من قبل الإمبراطورية العظمى انجلترا فى ذلك الزمان... من تهجير الى يوغندا وكينيا وجنوب امريكا وحرب شرسة ٣٧ ثورة حتى خرج الانجليز منهزمين .....لم يتم هذا الا بفضل وقفاتهن الصلبة امثال مندى بت السلطان ورابحة وكيكى ومتوكا وكاكا بنت السلطان ...... اما ما نتعرض له اليوم من حملةانقاذية لا تسوى شئ من ما واجهناهو فى السابق ...... بنت النوبة لم تكل او تمل باعت الشاى والمريسة و شالت البندقية من اجل ان لا ننكسر لها التحية اينما كانت واين ما تكون والحديث عنها ذات شجون بها نكون او لا نكون ........ صدق من قال عندنا لا يظلم احد

والله انتو يا جماعة دايرين الكضب ولا الصاح ...... انحنا لينا الحق نفتخر بى بنات النوبة السنونهن بيض
.................................................................................................................................................

شكرا يا مواطن للدعم والمؤازرة .....الله لاجاب يوم شكرك.... لولا هؤلاء لما تحررنا من الحكم التركى ..... ولا من الاستعمار البريطاني .....ولا كان شموها ناس المؤتمر الوطنى المفلقصين ديل....... دى رقصة كشكشيهو لى كان فيها شئ قوليهو لى ....... اجمل النساء تلك التى لونها اسود من شدة اللمعان يتحول لى purple نسميها لون الهوية .....يكمن فيها السر والجاذبية مريم الاخرى......واخرين يسمونها البنفسج واعتلاء الهوية.......هكذا قد خبرونى ثم قالوا لى ترجل .......حجل بى الرجل فى الباردة والحارة ...... أثبتت جدارتها فى العالم الاول والعالم الثالث هيع السمحة ام ولدى .

يا سلام عليك حبوبة نور
انا قائلك شابة طلعتي حبوبة

ربنا يحفظهم ويخليك يا ملكة

ود الرفاعى
ملكتنا لسع صغيرة صلاة النبى فوقا ..... عمر الزهور عمر الغرام عمر المنى ..... الكلفة مرفوعة والداير يلوك فى جاه الملوك يلوك ماعندنا مانع قرب تعال ما تبتعد .....شجرنا فوقوا الصمغ حتى الامريكان بيستوردوا مننا الصمغ الداير يتلصق فينا كلوا يتلصق تلقانا نحن يانا نحن .....لا الزمن غير ملامحنا ولا يقدر يحولنا من بلدنا..... والحجر مهما طار السماء مصيروا يرجع لى اهلو وصحابوا .

التحية و التقدير و الإحترام ،
للفاضلة خالتو نور تاور ،
إنسانة رفيعة المقام ،
ربنا يديها الصحة والعافية ،
تحياتي الأخ معاوية عبيد الصائم ،

،،،،




عزالدين عباس الفحل
ابوظبي

تحية بنكهة الشوق لجمييع الاحبة المرور ..

حلاتن القمرات والوردات الحبيبات بنات الحبيب
ود الحبيبة بت تاور . بنوت يفتحن النفس ضلفتين
بالابتسامات المشرقة ربنا يحفظ ويبارك ..

مشكور يا ود الصائم ..

وشوشة :
غايتو فتحتوا لينا باب الحبوبات دا دايرننا نعترف
لكن تلقوه عن الغافل هههههههههههههههههههه
احسن نكون عارشين علي كدا هههههههههههه

تسلموا يا احلي ناس ...

العزيز الرفاعى عبدالعاطى حجر...


يا سلام عليك حبوبة نور
انا قائلك شابة طلعتي حبوبة ربنا يحفظهم ويخليك يا ملكة...

...

خلينى أقيف مع شابة عمرها 30 سنة..
و نشوف النتيجة..
جيلنا يا أحوى ما بكبر..
لآنه قايم على اساس غذائى وفكرى وروحى ونفسى متين..
لكين هسع..الله يكون فى عونهن...
زارتنا البركة..
و العاقبة عندكم فى المسرات..

العزيز عز الدين عباس الفحل...



يعّلى مقدارك..
و العقبال عندك يا رب..
لآنه دى نعمة كبيرة من المولى عز وجل..

حبيبتنا منى..

وشوشة : غايتو فتحتوا لينا باب الحبوبات دا دايرننا نعترف لكن تلقوه عن الغافل هههههههههههههههههههه احسن نكون عارشين علي كدا هههههههههههه
...

بركة بالجية..
شفتى المنبر نور كيف ؟
و الناس مبسوطة كيف ؟
وبعدين ما تشيلى هم..
أنتى لسه بدرى عليك..
أنا الاستعجلت وعملت كل حاجة قوام قوام..
لكين بالنسبة ليكى....
الفرق بيننا كبير..
بس أختى الآنقاذ يا منى..
كا ن باريتيها..
العرس زاتو بيمسخ ليك..
الله لا أكسبهم دنيا وأخرى..

ياحلاوة

سلمت يمناك يامواطن
ياخ بوست جميل ومزيّن بصور الحلوين

ربنا يحفظهم من كل شر
وتحياتي لجدتهم ( نور)

وبختكم يا عيال طالما نور تاور حبوبتكم

لي عودة يانوارة عشان افضفض معاك هنا .

بت ابوى تاور لك كل نوافذ العشق ي حبوبة وحبيبة ويستمر النضال والصمود

ألهى يسعدك دنيا و أخرى يا معاوية..
بالجد فرحتنى وبّردت قلبى..
و عقبالك أن شاء الله..
نفتح ليك بوست حدادى مدادى (بعد عمر طويل طبعا لآنك لسه على المشوار دا..)..
عشان نحتفل بى أحفادك كمان..
الا ناس منى أختى ديل..
كان قعدوا يباروا الآنقاذ ..
الا كان تجى تستلف مننا بت ولا ولد..
و ما بنرجعها مسكورة الخاطر..

أخونا و حبيبنا ناصر حسن..

زارتنا البركة..
و عقبال عندك..
صلى كتير و قول يار رب ترزقنى بالاحفاد..
لآنها بالجد نعمة ما ساهلة..

Quote: كل الآعزاء فى المنبر... و الله فرحتى بيكم زى فرحتى بعيالى تمام.. و أن شا الله العقبال عندكم.. لآنه نعمة الاحفاد دى من أكبر نعم الله سبحانه وتعالى.. تشعر بالراحة والحب.. وكان ليك مراد ما تكشر فى وش زول.. و لا زول يزعل منك.. حقيقى الاحفاد من أكبر نعم المولى عز وجل..

تسلمى ي مواطنة

عدنا
بت ابوى تاور

التقيت نور تاور ي ناس