Post: #1
Title: ماشين ام فكوا ..!! بقلم سهير عبد الرحيم
Author: زهير عثمان حمد
Date: 01-10-2017, 06:12 PM
05:12 PM January, 10 2017 سودانيز اون لاين
زهير عثمان حمد-السودان الخرطوم
مكتبتى
رابط مختصر صديقي أحمد الشايقي عاد مؤخراً من كوريا وسألني سهير الحاصل في البلد شنو؟ ، سافرت قبل 3 شهور خليت الدولار بـ 13 جيت لقيتو بقى 20.. في شنو؟!..
أجبته لا تستغرب كثيرا أنت في السودان.. كل شيء متوقع….. أنا كمان غبت من الكتابة أسبوعين جيت لقيت أن سورة الضحى أصبحت حديثا شريفا ، وأن قول الله تعالى (فَأَمَّا الْيَتِيمَ فَلَا تَقْهَرْ (9) وَأَمَّا السَّائِلَ فَلَا تَنْهَرْ (10) وَأَمَّا بِنِعْمَةِ رَبِّكَ فَحَدِّثْ) (11)، أصبح حديثا للرسول- صلى الله عليه وسلم- ذلك طبعا على ذمة المذيعة نسرين النمر ، والتي لا ألومها في خلطها بين الحديث الشريف والقرآن الكريم ؛ لأن انشغالها بالبحث عن البشرة البيضاء يأخذ منها جل وقتها.
وغبت أسبوعين وجيت لقيت تجار التمباك في شمال دارفور قد تبرعوا بــ (10) قناطير تمباك دعما للمؤتمر الوطني، لم أستغرب في التبرع، وكسير الثلج، لكني استغربت في حزب يقبل تبرعا يساهم في تدهور صحة الفرد، ويعد سببا أساسيا لسرطان الفم.. وتعمل وزارة صحته على محاربته، ومنع انتشاره بكافة الوسائل….. فكيف رضي أهل المؤتمر الوطني بقبول تبرع يساهم في قتل المواطنين بالعرض البطيء؟.. هذا طبعا فضلا عن التمباك- نفسه- والأسلوب المقزز في استخدامه، وتأثيره على المظهر العام.
وغبت أسبوعين وعدت فوجدت مساعد رئيس الجمهورية ابراهيم محمود يقول إن الإنقاذ هي من جعلت من الشعب السوداني أغنياء، ده برضو لا تلوموه؛ لأنه يرى أننا أغنياء فحين ينتقل المرء من النوم على الحصير إلى النوم في القصور دفعة واحدة يحدث له خلل نفسي…….وقديما” قيل المافي بيت ابوك بخلعك.
غبت أسبوعين عن الكتابة فعدت ووجدت وزير الداخلية والجيش والدعم السريع وجهاز الامن بتغالطوا يا أخوانا في أجانب في جبل عامر ولا مافي؟.. ناس يقولوا في، وناس يقولوا ما في.. طيب إذا كان انتوا ما عارفين ومجهجهين طيب الحايعرف منو؟-
يعني الأجانب متوهطين وسطنا وانتو في سابع نومة؟. كان كده الضحك شرطنا ونحنا متكولين علي حيطة مايلة ……اقول ليكم حاجة اسألوا امريكا او اسرائيل قولوا ليهم في اجانب في جبل عامر ولا لا …..صدقوني بفيدوكم …….وماعيب ياخي الناس لي بعض.
غبت أسبوعين عن الكتابة وعدت فوجدت أن هناك أخطاء جديدة لنج اكتشفت في المدينة الرياضية ستكلف الدولة 17 مليارا.. ولو سألت وزير الشباب والرياضة يرد ليك من تحت نخرتو وكأنه ح يستضيف كأس العالم.
غبت أسبوعين عن الكتابة وعدت فوجدت ان ماترتديه النساء من ملابس أصبح الشغل الشاغل للدولة …وان الذي اقعد بالبلاد عن النهضة هو تونكات النساء والبودي وان كل مشاكل السودان وهواجسه سببها (اسكيرتاتنا) …….البسمع الكلام ده يقول نسوان السودان هاملات و ماشات ام فكوا .
خارج السور:
تحكي الطرفة أن أحدهم نام وسعر الخبز نصف جنيه، وحين استيقظ علم أن السعر أصبح واحد جنيه.. فقال يعني الواحد تاني ما ينوم ولا شنو؟.. عشان كده الواحد تاني ما يغيب أسبوعين.
*نقلا عن التيار
|
Post: #2
Title: Re: ماشين ام فكوا ..!! بقلم سهير عبد الرحيم
Author: nour tawir
Date: 01-12-2017, 12:46 PM
Parent: #1
يا زهير...
نعم سهير دى كّتابة..
ولها مستوى جيد فى الصحافة..
ولكن مشكلتك هى أنها لو (قحت)..
أت تجيب القحة وتفتح بيها بوست..
الموضوع شنو ؟
|
Post: #3
Title: Re: ماشين ام فكوا ..!! بقلم سهير عبد الرحيم
Author: عبدالعزيز الفاضلابى
Date: 01-13-2017, 00:18 AM
Parent: #2
الخازوق يا ابوالزوز تغيب لسبوع كمان تجى تلقى
حوش الرجال فى دولة وحوش النسوان فى دولة.
Quote: ولكن مشكلتك هى أنها لو (قحت)..
أت تجيب القحة وتفتح بيها بوست..
الموضوع شنو ؟ |
يعنى يانور الا تحكيها مع صاحبى ابوالزوز كده؟ يعنى ما يحِب؟
عالم بطَّالة زى مابقول مجيدو.
|
Post: #4
Title: Re: ماشين ام فكوا ..!! بقلم سهير عبد الرحيم
Author: nour tawir
Date: 01-13-2017, 00:29 AM
Parent: #3
عبدالعزيز...
عالم بطَّالة زى مابقول مجيدو.
أضحك الله ايامك...
...
البنى ادم دا جاب لينا وجع وش..
وهى زاتا لو كان عندها باسويرد...
ما بتسوى فى روحها كدى..
الزول دا منبرش عديل كدى...
مش حب وبس..
|
Post: #5
Title: Re: ماشين ام فكوا ..!! بقلم سهير عبد الرحيم
Author: اميرة السيد
Date: 01-13-2017, 01:31 AM
Parent: #4
يا نور
عليكي الله مقالات سهير الرائعة دي مش بتخلي الدنيا دي كلها تحبها
خليكي من ابو الزهور.....
وكان جينا للحقيقة ما كنا حنقرا مقالات سهير اذا ما ابو الزهور نزلها لينا
هنا...
والله يديكي الصحة والعافية
ود الفاضلاب
اضحك الله سنك....غايتو قولك ...تغيب اسبوعين تلقى حوش النسوان
في دولة وحوش الرجال في دولة تانية..ما سبقك عليها زول...وزي
نكتة المسنوح ود ابو سن الشرقتنا وخلت الموية تطلع بنخرينا...دي كمان
خلتنا نقع في الواطة من هستيريا الضحك..
والله يديك الصحة والعافية
ابو الزهور..
عليك الله ما تسمع كلام نور وخليك مواصل في نقل مقالات سهير الرائعة...
والله يديك الصحة والعافية
|
|