إعتذار واجب بخصوص نقل خبر وفاة المناضلة فاطمة احمد ابراهيم

09:48 AM January, 04 2017

سودانيز اون لاين
علي دفع الله-سنار
مكتبتى
رابط مختصر

اعتذر لكم جميعا داخل البورد وخارجة...
اتصل علي زميل المنبر الاستاذ عثمان عووضة صباح اليوم وذكر خبر وفاة الام فاطمة ..واكد لي الخبر وطالبني بنشر النعي .رجعت ليه ان يتأكد ورجع لي بعد عشرة دقايق وقال انو اتأكد من صحة الخبر ..
كل هذه المعلومات على التلفون ورسايل الواتساب ..وبعد نشر خبر الوفاة استقبلت مكالمات من داخل وخارج السودان بعدم صحة الخبر ..رجعت لعم عثمان نقلت ليه انو الخبر غير صحيح ..وسوف اقوم بحزف البوست واعتذر .. قال لي اصبر شوية عندي اتصالات بلندن وانا ايضا اتصلت بي ببعض الزملاء في لندن واكدوا لي انو الزميلة فاطمة بخير ..
واخيرا تاكدت من عدم صحة الخبر وايضا اكد لي العم عثمان عووضة عدم الصحة ..عليه حزفت البوست واقدم اعتذاري لكل الاصدقاء والصديقات داخل وخارج السودان بسبب ازعاجي لهم ..
كامل الصحة والعافية للوالدة فاطنة السمحة ..
****العم عثمان عووضة رقم الدخول ضايع منو يا ليت الاخ بكري ت
ابو بكر يفعل ليه الدخول حتى يعضد ما كتبت اعلاه..

سلام ياعلي دفع الله،

لأنت مصدق في الحالتين عندما اذعت خبر الوفاة، والآن وانت تنفيه.
لفاطمة أتمنى العافية وطول العمر..

ياجماعة الخير،

اكتب من موبايلي الدلقون لاكسبه الله. وقد لاحظت بعد ان ارسلت ردي اعلاه ان ثمة وجه ينفث نار الغضب قد لازمه. ولست ادري من اين جاء وكيف اتخلص منه حتى لايظن بردي عكس المراد به.

طول العمر لام احمد

الرحمة تجوز علي الاحياء والاموات ..
بعد عمر طويل ي ام احمد

شكرا ي مواطنالصحة والعافية ل ام الرفاق

سلام يا صاحب
لاكا خفيف ولاكا لفيف
لك حسن الظن
اتصل بي عثمان عووضة وحملني رسالة شفيهة
إنه لا يستطيع الدخول
وهو يتحمل كامل مسؤولية إذاعة خبر فاطمة ويتحمل عبء اللوم والخطأ
وهو من اتصل ب علي دفع الله وبل طلب منه كتابة بوست

لا عليك...لا عليك يا علي دفع الله
فلست انت الملام هنا...لانك فقط نقلت
ما طلب منك...ونتمنى من عثمان عووضة
ان ياتي هنا ويكتب لنا من الذي اكد عليه الخبر
الهباب ده....فربما هناك تفسير ..فالموت فعلا
حق علينا جميعا ..ولكن التريث في نشر خبر وفاة
الشخصيات العامة واجب...
ونتمنى للاستاذة فاطمة الصحة والعافية..
والله يديك الصحة والعافية

وتظل فاطمة احمد ابراهيم ايقونة المرأة السودانية

مع الامنيات لها بدوام الصحة والعافية

والموت مدينة كلنا داخلوها

لا عليك يا رفيق؛
الاخطاء تحصل...
طول العمر والصحة لامنا فاطمة؛
تملكتني حالة من الحزن بعد قراءة الخبر مباشرة؛
ولم افتح اي وسيلة خبرية؛ لساعات؛
توي فعلت؛
وقد اصابتي حالة من الفرح الطاغي؛
شكرا يا شفيف....
ولا منا فاطمة طول العمر؛
وتسلم ما عدمناك ولا عدمناها...

التحيّه لك أخي الصادق الصدوق
علي دفع الله.

عُمر مديد...
نتمناهو، لأُمنا الدكتوره فاطمه
عبدالمحمود.
.

تحياتي اصدقاءي الجميلين :-

عثمان محمد صالح
محمد الشيخ
عارف ناشد
معاوية عبيد
عبد الحفيظ ابو سن
اميرة السيد
عمر الفاروق
عبد المنعم الطيب
محمد ادم
تحياتي لكم شاكر حسن ظنكم ..
لكم عميق مودتكم

وسميّ عثمان عووضة، رضي الله عنه، هو الآخر مصدَّق وغير ملام. فلنمض إلى الإمام.

الله يطول في عمرها ويمتعها بالصحة والعافية

ما عليك يا صاحب

نعلم انه لم يحركك الأ الفذع وهول النبأ

ربنا يعطيها العافية ويمد فى ايامها ام احمد

علي دفع الله المرة دي فوتناها ليك
ماتجي المرة الجاية وتقول عم عثمان قال لي
وخالي عمر مسكل لي
انت قايل لقب طوربيد ساهل

داخل النص.....
اخبارك يا حبيبنا
لفاطمة طولت العمر والصحة
وربنا اديك العافية في الحالتين صدقناك ما عهدنا فيك اللولوة
خالص التحايا والتقدير

شكرا عوضة شكرا اب سن....شكرا تانى ود اليعقوباب

كتب الأخ عبد الحفيظ أبوسن له التحية
سلام يا صاحب لاكا خفيف ولاكا لفيف لك حسن الظن اتصل بي عثمان عووضة وحملني رسالة شفيهة إنه لا يستطيع الدخول وهو يتحمل كامل مسؤولية إذاعة خبر فاطمة ويتحمل عبء اللوم والخطأ وهو من اتصل ب علي دفع الله وبل طلب منه كتابة بوست

عمنا وأخونا عثمان عووضة رجل رزين ـ ومتريث ـ وأكيد أنه تلقي الخبر ممن يثق فيه
ـ وأستاذ عووضة ممن يقدرون إسهام وتاريخ الأستاذة فاطمة ويعتبرها رائدة ومناضلة
بحق ـ وأكيد أنه تلقي الخبر وأبلغه وهو في غاية الألم والأسي ـ
- وفي النهاية الأمر هنة غير مقصود ـ وهو لم ولن يقدح في مصداقية ـ الأخوان عووضة
وعلي دفع الله ــ

الاصدقاء الاعزاء
درديري كباشي
حسن فرح
عباس الدسيس
كمال عباس
تحياتي ومودتي
-------------------
للعلم لمن ذكرت اسم عمنا الجميل عثمان عووضة ليس هروبا من المسؤولية والباسها للعم عووضة بل لتوضيح حالة تمت ..واعلم جيدا ان العم عووضة ما دعاه للاتصال بي وبالاخ ابوسن علمه التام بان خبر وفاة الوالدة فاطنة ليس خبر عادي...
ولكن المعلومة التي ملكت له كانت غير صحيحة ..وهو ما اكدها لي لاحقا مشفوعة باعتذار ...
عباس السيس المسخوت ههههههه شكيت محنك...

تسلموا
علي ومعاوية الصايم وكمال عباس
عووضة ضرب لي وطلب مني انزال الخبر .. انا شغال بي واي فاي وكنت بعيد منو .. اعتذرت ليهو ورجع لي تاني وقال كلم علي
فاطمة ليست مثل كل النساء . فهي رمز سوداني للنضال وايقونة الصمود والصلابة
خبر موتها ليس خبرا سعيدا ولكنها الحياة
عووضة يحدوه امل ان نعلم بخبرها .. ف
من شاء ليترحم عليها
ومن شاء ليلحق الدافنة
ومن شاء ليعزي اهلها
ومن شاء ليمارس حزنه الخاص عليها
بعض الناس يتحرجون من نقل اخبار الوفاة رغم ان نقل الخبر لازم .
ندر جدا ان يسمع من يجب ان يسمع خبر الوفاة من النت . قد تسمع الاطراف الاخري بالخبر . الاطراف البعيدة .. وكثيرا جدا لا مجال لها ان تسمع إلا من خلال النت
من يُصدم بالخبر الآن سيُصدم به آجلاً .. فالموت هو الموت هو الفقد
عووضة و علي مما لا يُقدح في مصداقيتهم بالنسبة لي . ولم اعلم عنهم سبهللية ولا سوء تقدير
اليوم او غداً إن طلب مني علي او عووضة انزال خبر سأنزله دون تردد او ريبة
فمكان صدقهم رسخ في داخلي
علي ود دفع الله
اركز ما تتملص لاك متهم ولا شامت