مناضله ساقطه تزود اجهزة الامن بارقام هواتف شرفاء وشريفات بلادنا

01:10 AM January, 03 2017

سودانيز اون لاين
WAD ELGAALI#4-
مكتبتى
رابط مختصر

منتهى الانحطات والله مش بس ارقام التلفوات بل بعض العناوين والاسماء المستعاره البكتبو بيها فى الفضاء الاسفيرى مش كده وبس نبزه مختصره عن الاهل والمكان فى السودان الموسف انو بعض المعلومات عن ابنائهم الذين ارسلوهم للدراسه بالسودان وفعلا الاجهزه الامنيه راصداهم واكيد ح يستغلو الحكايه دى ايضا بعض الاكاذيب من ضمنها احد اصدقائ الذى اعرفه تماما هنا فى امريكا بتقول النبزه التعريفيه عنو انو عايش على المساعدات والفود استام والله الكلام ماصاح الراجل دخلو ودخل زوجتو بفوت الميتين الف دولار وماحصل قدم لاى نوع من المساعدات مش كده وبس حتى لو قدم مابدوهو يعنى ممكن كل المعلومات تكون مغلوطه المصيبه هى نفسها عايشه على المساعدات المهم بعض الناس بقو يستلمو رسائل من ارقام غريبه فيها ابتزازوشوية قلة ادب وتهديد واوصل

واصل يا WAD ELGAALI

فى ناس دخلوك بيوتهم وبحسن نية سودانيه اجلسوك على موائدهم لكنك خنتى كل هذه الثقه ومن اجل شوية اوهام والله ناسك البعتيلم ديل مابستاهلو وسوف يسقونك من نفس الكاس وقريبا جدا لانو كرتك خلاص اتحرق

سلام يا ود الجعلي
هو لو زول قاعد برة في دولة اوروبية او في امريكا و يحمل جواز الدولة دي
ليه مهتم بانه معلوماته الشخصية لدى الامن؟
ما الذي يقلق من هذه الناحية؟
المسألة دي ممكن تسبب مشاكل للمغتربين السودانيين في الخليج مثلا و مع ذلك ياهم
شوف عينك ماخايفين و بعبروا عن ارائهم بكل وضوح.
لا اعتقد انو في داعي للقلق و خليها تسوي الدايراهو و لو متأكد من كلامك و عندك اثباتات
اكتب اسمها هنا عشان كلنا نحذرها و ما نديها فرصة للمتاجرة بسيرتنا.

سلام ود الجعلي, من هي المعنية؟

سلامات دكتور سيف, شوف المقتبس ادناه

Quote: نبزه مختصره عن الاهل والمكان فى السودان الموسف انو بعض المعلومات عن ابنائهم الذين ارسلوهم للدراسه بالسودان

لو صح فعلا معناها الموضوع خطير وسخيف ولهم حق ينزعجوا رغم حصولهم على جوازات اجنبية

سلام يا محمد
معاك حق فعلا.

سجمنا كان كدي لانها مناضله وليس مناضلا

و نان دي مناضلة كيفن البتبيع معلومات الشرفاء لكلاب الامن؟

ممكن لو سمحت تنشر الحرفين الأوائل من إسمها .
وبالعدم الحرف الأول .
علشان الإتهام يكون محدد أكثر وما يبقى طاقية لافة .

بعيدا عن موضوع البوست أو قريبا منه لا أدري!
كتبت:-
أبواق النظام الإسفيرية فشلت ولم تعد مؤثرة علي الرغم من الأموال المغدقة والثروات المهدرة فما الحل ياتري ؟
ربما إعتقدوا الحل أن هو محاولة شراء ذمم ضعاف النفوس والمرتزقة ـ وربما فهم البعض الرسالة وشرع في عرض نفسه في السوق ! بينما تجد البعض قد كرس قلمه ومواقفه ـ للتقرب من السلطة وفتات الموائد علي حساب المعارضة المحزبة ـ بإمتطاء موجة العداء للمعارضة ـ علي أمل أن يقربهم ذلك ممن يهيمن علي السلطة والثروة ـ ( شوفوني مجنن ليكم المعارضة كيف !) ويحاولون بكل جهد وإسترخاص للنفس ـ لفت إنتباه السلطة لهم ـ عارضين أنفسهم في سوق النخاسة السياسي ! ** نقد المعارضةد مطلوب ومرغوب وإخفاقته ولكن المرفوض هو أن يتخذ من العداء والهجوم علي المعارضةوسيلة للتقرب من السلطة! **وللأسف فإن هذه اللوثة العدائية هذه تعدت المعارضة المحزبة للطعن في كل من يعارض النظام وفي أدوات النضال الجماهيري كالعصيان المدني ! ..

مهم جدا اسمها مربع..
و عايشة وين..
وشغالة شنو..
وو ضعها الاجتماعى شنو.. الخ
و صورتها ك مان..
...
زى ماهى بتجمع معلومات عن الناس وتضيف ليها أكاذيب وتلفيق لزوم أزعاج الناس..
يبقى جيبها لينا هنا..
عشان نوريها أن الله حق..

هي حصلت!!!!!
من المقبول طبعا ان كل شخص له مطلق الحرية
في معارضة او تاييد حكومة اللصوص والحرامية
الذين يسرقون قوت الشعب المغلوب على امره...
ولكن ليس من المقبول ابدا ان يتجسس على الاخرين
ويقدم معلومات عن المعارضين كي تعتقلهم حكومة
اللصوص والحرامية....
والله هذا الفعل ،اذا صح، يعتبر خسة ونذالة لا يمكن وصفها...
والله يديكم الصحة والعافية....وعدم الوقوع في براثن الجاسوسة
النذلة...

كل المرور نشكر لكم غيرتكم على بلدكم واخوانكم كمال عباس كالعاده جبتها من الاخر ود البشرى بالضبط دا القصدتو شكرا لقرايتك لما وراءالحروف ودا السبب الاساسى للنشر
على اليمين الكلام دا ممكن يقطع عيشى لكن اتوكلت على الله وغمضت ونزلتو ما بقدر انزل اسما ويا امنه مختار انت زوله صحفيه شاطره ما اظنها تفوت عليك
دكتور سيف لك التحيه جلت منك الحكايه فى البدايه لانو صدقنى بكل جوازاتنا والحمايه برضو بلدنا مابنخليها للغجر

Quote: على اليمين الكلام دا ممكن يقطع عيشى لكن اتوكلت على الله وغمضت ونزلتو ما بقدر انزل اسما ويا امنه مختار انت زوله صحفيه شاطره ما اظنها تفوت عليك

لا والله بتفوت علي يا ود الجعلي تصدق .
أختك بقت ما بتثق في زول .
علشان كدا قلت ليك ممكن تكرمنا بالحرف الأول لو ملاوز .
وإنت أصلا كاتب لقبك وليس إسمك فملاوز من شنو ؟

بعدين شنو قصة الصحافة الماسكنها لي دي .
دي كانت تجربة ضمن تجارب عديدة ..ولكن لي فترة متفرغة لتخصصي الأصل .

دا كلام خطير يا ود الجعلي لأننا كسودانيين نتميز بالكرم والثقة في كل من يزورنا او يظهر لنا الود
وخيانة الملح والملاح أكعب خيانة
إنتهز هذه الفرصة لأحي الصنديدة آمنة مختار فهي من دون الكثيرين منا ظلت رغم وجودها المتكرر في السودان تصدع بكلمة الحق ولا تخاف فيها لومة لائم
ومثلها هم من يستحقون قيادة التنظيمات التي تدافع عن حقوق أهلنا في شرق السودان

Quote: ما بقدر انزل اسما

بالغت معانا يا قريبك!
الليلة الشمار بحمينا الشغل هههه

مرحب بصاحب البوست ورفاقه
اعتقد الزولة هي المدعوة اشتياق خضر


هناك دلائل على انها هي ذلك الشخص في اماكن اسفيرية أخري

مودتي

لااتفق معك ياهيثم فى اشارتك للسيدة اشتياق خضر. نتفق او نختلف مع تحليلها لوقائع العصيان الاخير و حركة 27 نوفمبر, الاانها شخصيةلها مساهماتها فى التصدى لنظام الحركة الاسلامية منذ صباها الباكر داخل السودان, وفى خارج السودان. اقول قولى هذا وانا لاانتمى لحزبها السياسى

سلامات ياود الجعلى
كل عام وانت بخير
واضح ان الانسانه التى تعنيها فى خيطك تلعب ادوار مدمره. لكنك بصراحه كان عليك عدم فتح الخيط مادمت لاتجرؤ على ذكر اسمها لحساباتك الخاصه بك وبالتالى لاتستطيع ذكر حيثيات واضحه ومحدده لاتهامك لها.
مع ودى

السلام عليكم جميعا

Quote: بالغت معانا يا قريبك!الليلة الشمار بحمينا الشغل هههه

غايتو يا ود البشرى في مداخلة (ود الجعلي) التانية في Hint كده ودت البوصلة حقتي لي شخصيتين
أما عدم رغبتو في الإفصاح عن الحرف الأول برضو Hint تاني بيحصر المسألة في زولة واحدة
لأنو الحرف الأول بتاعها قليل في أسامي البنات
هههههه أرسين لوبين شخصيا


التعديل من (ود الغالي) ل (ود الجعلي)
وشكرا للأستاذة دومه

مكرر

غايتو وهدبتنا يا ود الجعلي . ويا امنه خليك واثقه فيني
والحمد لله انا في اوربا وما بعرف زول سوداني هنا عنده اولاد في السودان ولا حصل دخلت بيت زول اكلت عنده .
الناس البتودي اولادها للجامعات في السودان اعتقد هم ناس الاغتراب في الدول العربيه خاصه السعوديه .

Quote: نبزه مختصره عن الاهل والمكان فى السودان الموسف انو بعض المعلومات عن ابنائهم الذين ارسلوهم للدراسه بالسودان
لو صح فعلا معناها الموضوع خطير وسخيف ولهم حق ينزعجوا رغم حصولهم على جوازات اجنبية ________________________
_________________________________________________________
سلام يا ود البشرى
اول مره اعرف ان مالكي الجوازات الاجنبيه يرسلون ابنائهم للدراسه بالسودان؟؟؟؟؟
كلام محير شويه لاننا نعلم الفرق بين جامعات الدول المتقدمه وجامعات السودان حاليا .

ما وقعت لي الهينتات يا كمال, كدي قول انت و شيل و اللوم عن ود الجعلي

يا دوما كيفك, تذّكري المجموعة المشت لداعش من مامون حميدة! فيهم أكتر من واحد وواحدة يحملون جوازات بريطانية و اهلهم هناك
دا مثال, ما تعرفي الفهم شنو وليه يفضل بعض الآباء حملة الجوازات الأجنبية دراسة ابناؤهم بالسودان لكن أكيد عندهم اعتبارات غايبة عننا

حبابك يا ود البشرى بخير والحمد لله . شكرا للتوضيح. ولكني اجد ان التمويل عن طريق القروض والدراسه بالغرب افضل وهذا ما فعله ابنائي

( علي اليمين الكلام ده ممكن يقطع عيشي)..


بالله ده إسلوب - ياخي الأولاد بيقطعوا رقابهم وأجهزتهم التناسلية !!
انت خايف علي قطع عيشك!!
هذا بوست غير موفق،، وملئ بالجِبنِ والإسفاف ، ،
ويجب حذفه ،،
تجرأت بوصفها بالسقوط،،
وعجزتّ عن ذِكرّ إسمها !!!
حاولت الدخول علي بروفايل صاحب البوست ووجدته - blocked ,,!!

و نان دي مناضلة كيفن البتبيع معلومات الشرفاء لكلاب الامن؟
-------------------------------------------
يا سناء فتشو تاريخا لى وراء وبتلقوها امنجية مؤصلة ..
تحياتى.

Quote: على اليمين الكلام دا ممكن يقطع عيشى لكن اتوكلت على الله وغمضت ونزلتو ما بقدر انزل اسما

ود الجعلي سلام
انت زول لذيذ
بوستك زي الفات الفات في دينو وسبع لفات في دينو .....الخ ولب لب لب والزول اقوم جاري
كان يا تفتح عينك وتنزل و ل مافي داعي
طيب المناضله لوح التلج كما ذكرت الناس تعرفا كيف هناك عشان تعمل حسابها
المهم ما نستعجل بجي زول بشوتا ليك هنا وانت فتحت البوست مسئوليتك قطع العيش الخايف منو بجيك
والله الا تلحق بكري اشيلو بره

بوست شربان





.

عزيزي الفاضل بلال زكريا ا
نت مفتكر قطع العيش ده ساهل...
واسال الناس القطعوا عيشهم في السودان كيف طلعوا بره السودان
واتبهدلوا بهدلة السواد لايجاد لقمة العيش لاسرهم واولادهم لغاية ما استقرت
امورهم..
.قطع العيش صعب يا بلال....واخير منه التعذيب..
.وزول عاطل بدون شغل وما قادر يوفر لقمة العيش لاسرته وكانه شخص ميت..
.وله الخيار المر الامر من العلقم وهو سؤال الناس....
ويا جماعة الخير كاتب البوست عاوز يعمل فيكم خير ويحذركم من جاسوسة تنقل
اخباركم للسلطات عشان ما تثقوا في زول يجيكم داخل البيت كضيف عزيز وهو يقصد الشر..
..وهذا النظام القمئ نشر فينا عادات سيئة لم تكن موجودةمن قبل في سماحة ومروءة ونخوة الشخصية
السودانية ونشر الفتنة في الاسرة الواحدة ناهيك عن زملاء مهنة اواصدقاء اسافير..
.فلا تظلموا الرجل ظلم الحسن والحسين..
..والله يديكم الصحة والعافية

أميرة السيد...


وهذا النظام القمئ نشر فينا عادات سيئة لم تكن موجودة
من قبل في سماحة ومروءة ونخوة الشخصية السودانية
ونشر الفتنة في الاسرة الواحدة ناهيك عن زملاء مهنة او
اصدقاء اسافير...

سلام ود الجعلي ليس هناك ضرورة لذكر إسماء أو أسماءَ ،،،
فقط علينا أن نعي حقيقة أن هناك من إسترخص نفسه وباع إنسانيته وضميره للنظام وهناك حقا من كرس قلمه ومواقفه ـ للتقرب من السلطة وفتات الموائد علي حساب المعارضة المحزبة ـ بإمتطاء موجة العداء للمعارضة ـ علي أمل أن يقربهم ذلك ممن يهيمن علي السلطة والثروة ـ ( شوفوني مجنن ليكم المعارضة كيف !) ويحاولون بكل جهد وإسترخاص للنفس ـ لفت إنتباه السلطة لهم ـ عارضين أنفسهم في سوق النخاسة السياسي !))
من هانت عليه نفسه هكذا من من الطبيعي هكذا أن يشتغل ك snitcher وinformant ! * هذا الكلام لاينطبق علي المخمومين والمخدوعين ومن أنضم للنظام بقناعة ـ مجردة من الغرض والمطامع الخسيسة!!
من يبصق علي تاريخه ويدوس علي مبادئيه ويفجر في الخصومة مع زملاء دربه السابقيين عرضة لأن يلعب هذا الدور هذا إن كان مرتزقا من وراء المواقف السياسية أو عارضا نفسه في سوق النخاسة السياسية ! والشاهد في هذا أن علينا الحذر من تجار المواقف وكل من يعرض خدماته علي السلطان ويسترزق من وراء ذلك

Quote: سلام ود الجعلي ليس هناك ضرورة لذكر إسماء أو أسماءَ ،،

كيف مافي ضرورة لذكر أسماء ؟!
إسماء الأولى دا ما فهمتها ..!!

يعني عايز التهمة دي تكون طاقية لافة لتشويه سمعة المعارضات للنظام الفي الخارج كلهم وللا شنو ؟
ولا عايز الناس البره تقعد تتلفت وتقفل بيوتها في وش بعض وتشك في بعض ..وأعتقد دا الهدف الأساسي .
هو أصلا ود الجعلي عرف المعلومة دي كيف ؟
الأمنجية الإتصلوا عليهم قالوا ليهم إنه فلانة الفلانية أدتنا رقمكم وللا شنو ؟!
بعدين من المنطقي ناس الأمن بيعرفوا أرقام وعناوين ناس كتار خارج السودان بوسائلهم العديدة عن طريق السفارات وغيرها ..ليه ما إتجرأوا إتصلوا عليهم وهددوهم ؟!!
وصاحب البوست خايف من قطع عيشه كيف وهو قاعد في أمريكا حسب ما فهمت ..
هي أمريكا دي بقت السعودية وللا شنو ؟!!

_____

بعدين يا كمال عباس أعتقد كل صاحب عقل بيقدر يميز بين النقد الحادب للمعارضة بغرض الإصلاح حتى لو كان حاد وقاسي ..وهو مطلوب جدا وطبيعي .
وبين أسلوب التشويه المغرض لصورة (جل أو كل ) المعارضة والتركيز عليها وتجنب نقد النظام ، فيما يسمى بمعارضة المعارضة ( المصطلح أعتقد يعود للكوزة بيان نجاة محمود ) .

فأوعى تفتكر إنك بتكرارك لإكليشيهاتك الفوق دي ..حا تقدر تخرس معارضين شرفاء ربما أشرف منك بمراااحل ..كي لا ينتقدوا فلان أو علان من زعامات المعارضة أو تنظيماتها أو منسوبيها .

نوعك دا يا كمال عباس زي النوع البتوصفه إنت فوق دا الهدفه يعرض بضاعته للإنقاذ .
فكلاكما ( مغرض وبلا ضمير ..وغير منحاز للحق المجرد في عضمه ومع ذلك يدعي العقلانية.. ) .
علشان كدا بأكد ليك إنه الشباب جوه السودان القاموا بالحراك الأخير كافرين بنوعينكم ديل لدرجة ما تتخيلها ..
لأنكم الإتنين دقة قديمة عفى عليها الدهر وأكل وشرب وتمخط .
باختصار إنتو نموذجين خارج التاريخ ..وخارج العصر . بتمثلوا السودان القديم بكل سوءاته السياسية وكل قصور نخبه المحنطة في أساليب الماضي التي أثبتت فشلها ..وجعلت الشعب يكفر بالجهتين حكومة ومعارضة معا ، ولا يثق في المعارضة بدرجة كادت أن تقارب عدم ثقته في الحكومة .
فهو يراها معارضة فاقدة الفعالية تماما ..والكلام دا أنا جوه السودان هسه وبقولوا ليك عن دراسة وتأمل ونقاشات عديدة عن الأوضاع .
فخلينا بالله من البضاعة القديمة السافرت بيها معاك من زمان وقعدت بيها بره السودان لما عتتت وبقت خرق بالية ..وخليك مواكب للتغيير وغير أسلحتك الصدئة .
وحاول تثقف نفسك بالواقع الحاصل جوه السودان هسه ..الواقع الفعلي مش الخيالي .
وحاول تقعد مع الشباب وتسمعهم بدل النقة الكتيرة المحنطة والمكررة .
إتعلم تسمع المرة دي بدل تتكلم وتفتي بتعالم وتكبر كأنك أبو العريف ..صدقني حا تتعلم كل جديد ومفيد عن الواقع السوداني المعاصر .
وكمان حاول تصلح لغتك وأسلوبك وطريقتك في الكتابة العاملة زي الصندوق المغلق من أركانه ..
حاول تفتح الصندوق دا ..وتوسع جوانبه وتكتب برشاقة.. ومساااحات ..وبدون تكرار ممل وتعديلات أكثر مللا .
فربما يقرأ لك الشباب ويسمعونك .
.........

دي برضها على فكرة مداخلة ربما قريبة أو بعيدة عن موضوع البوست .
لكن ما قدرت أقاوم نفسي لأني بصراااحة صرت لا أطيق الناس المحنطين .

،،،،،،،،

وتحياتي للأعزاء رفاق الصمود عبد الصمد ودوما ..فالنفوس الحرة بطبيعتها غير قابلة للبيع ..لذلك لا يمكن تعرض نفسها في سوق النخاسة السياسية ..لأنها أصلا لا تقدر بثمن .

......

.
.....
كتبت السيدة آمنة مختار لها التحية

Quote: بعدين يا كمال عباس أعتقد كل صاحب عقل بيقدر يميز بين النقد الحادب للمعارضة بغرض الإصلاح حتى لو كان حاد وقاسي ..وهو مطلوب جدا وطبيعي . وبين أسلوب التشويه المغرض لصورة (جل أو كل ) المعارضة والتركيز عليها وتجنب نقد النظام ، فيما يسمى بمعارضة المعارضة ( المصطلح أعتقد يعود للكوزة بيان نجاة محمود ) . فأوعى تفتكر إنك بتكرارك لإكليشيهاتك الفوق دي ..حا تقدر تخرس معارضين شرفاء ربما أشرف منك بمراااحل ..كي لا ينتقدوا فلان أو علان من زعامات المعارضة أو تنظيماتها أو منسوبيها .

. لا أدري مالذي أغضبك في كلامي هذا؟
ولماذا أخرس ألسن المعارضيين الشرفاء؟ لامصلحة لي في إخراس ألسن الشرفاء ومن يسعي لإخراس ألسن الشرفاء يخدم النظام بوعي أو دونه ! لست أنا ممن يحاول ألسن الشرفاء لأنهم في خندقي !
ثانيا أن مع النقد الهادف والموضوعي للمعارضة وقد قلتها في مداخلاتي الأولي

Quote: نقد المعارضةد مطلوب ومرغوب وإخفاقته ولكن المرفوض هو أن يتخذ من العداء والهجوم علي المعارضةوسيلة للتقرب من السلطة! **وللأسف فإن هذه اللوثة العدائية هذه تعدت المعارضة المحزبة للطعن في كل من يعارض النظام وفي أدوات النضال الجماهيري كالعصيان المدني ! ..

. ثالثا أنا لا أعني أو إستهدف أي معارض للنظام ـأيا كان موقعه وأسلوب معارضه كما أنا لا أعني حتي من إنخرط في صفوف الإنقاذ بقناعة قلت لاينطبق كلامي علي المخمومين والمخدوعين ومن أنضم للنظام بقناعة ـ مجردة من الغرض والمطامع الخسيسة!!
رابعا أنا لا أقصد أي معارض وإنما أعني نوعية لاعلاقة بالمعارضة ـ وإنما هي الأقرب لحضن النظام قلت تحديدا

Quote: من إسترخص نفسه وباع إنسانيته وضميره للنظام وهناك حقا من كرس قلمه ومواقفه ـ للتقرب من السلطة وفتات الموائد علي حساب المعارضة المحزبة ـ بإمتطاء موجة العداء للمعارضة ـ علي أمل أن يقربهم ذلك ممن يهيمن علي السلطة والثروة ـ ( شوفوني مجنن ليكم المعارضة كيف !) ويحاولون بكل جهد وإسترخاص للنفس ـ لفت إنتباه السلطة لهم ـ عارضين أنفسهم في سوق النخاسة السياسي !)

. .
..........

.....أعود للسيدة آمنة مختار

Quote: فأوعى تفتكر إنك بتكرارك لإكليشيهاتك الفوق دي ..حا تقدر تخرس معارضين شرفاء ربما أشرف منك بمراااحل ..كي لا ينتقدوا فلان أو علان من زعامات المعارضة أو تنظيماتها أو منسوبيها . نوعك دا يا كمال عباس زي النوع البتوصفه إنت فوق دا الهدفه يعرض بضاعته للإنقاذ . فكلاكما ( مغرض وبلا ضمير ..وغير منحاز للحق المجرد في عضمه ومع ذلك يدعي العقلانية.. ) . علشان كدا بأكد ليك إنه الشباب جوه السودان القاموا بالحراك الأخير كافرين بنوعينكم ديل لدرجة ما تتخيلها .. لأنكم الإتنين دقة قديمة عفى عليها الدهر وأكل وشرب وتمخط . باختصار إنتو نموذجين خارج التاريخ ..وخارج العصر . بتمثلوا السودان القديم بكل سوءاته السياسية وكل قصور نخبه المحنطة في أساليب الماضي التي أثبتت فشلها ..وجعلت الشعب يكفر بالجهتين حكومة ومعارضة معا ، ولا يثق في المعارضة بدرجة كادت أن تقارب عدم ثقته في الحكومة . فهو يراها معارضة فاقدة الفعالية تماما ..والكلام دا أنا جوه السودان هسه وبقولوا ليك عن دراسة وتأمل ونقاشات عديدة عن الأوضاع . فخلينا بالله من البضاعة القديمة السافرت بيها معاك من زمان وقعدت بيها بره السودان لما عتتت وبقت خرق بالية ..وخليك مواكب للتغيير وغير أسلحتك الصدئة . وحاول تثقف نفسك بالواقع الحاصل جوه السودان هسه ..الواقع الفعلي مش الخيالي . وحاول تقعد مع الشباب وتسمعهم بدل النقة الكتيرة المحنطة والمكررة . ! ..

* لم أتعرض لك بسوء ولم أقم بتقيم أو نقد إسلوبك كتباتك أو مواقفك السياسية ولم أشكك في جدوي معارضتك للإنقاذ أوجديتك ولم أطعن ـ في شرفك ونزاهتك لسبب بسيط هو أني لا أحتكر صكوك المعارضة وسندات المعرفة ولا أمسك بقلم التصحيح الأحمر أتتبع به كتابات أو مواقف من يعارض الإنقاذ ! * رأيك في شخصي ـ إعتبره رأي آخر ولكني أثق في ذاتي ومواقفي وخطي الفكري ـ لذا لا أعبي بالسباب والشتائم والتعدي ـ والهجوم المغرض وأحترم أي نقد هادف وأستفيد منه !
* مع إحترامي لكل وطني شريف ـ فانا لاإعتقد ـ إنك من يفوقني في درجة الشرف هذه فأنا لم إسترزق من موقف سياسي ولم إبيع ضميري وإنسانيتي طمعا في سلطة أو ثروة أو موقع معارض ! ـ لم إمارس السياسة كمهنة أو تفرغ . ولست ممن ينتهجون أسلوب الغاية تبرر الوسيلة ـ فنبل الغاية عندي يفرض نبل الوسيلة عندي ولست ممن إنتهجوا المهاترات والتجريح والسباب والشخصنة المفرطة! إحترم ذاتي إحترم محاوريوأحترم المتلقي!
** ولست ممن تحركهم عصبية الشلليات وعقلية القطيع وما تفرضه من مداهنة ومجاملات عقيمة!! ـ الموقف السياسي ومعارضة النظام واجب ي يمليه ضميري وطنيتي وإنسايتي ! أتحرك حسب قدراتي وإمكاناتي وإعي تماما أن الدور الأساسي في إسقاط النظام تقوم جماهير الداخل !! .....

سلام يا ودالجـــعلي، وسلام للكل، وكل عام وأنتم بخير،

والله آ ودالجــعلي، قريت بوستك ده، فخرجتُ من مولّده بكم حُمّصايا مشوشوة، دون أن تكون منها حُمّصايا
عزّ النضاج (النجاض!) .. وبي أمانة، ما داير أقوللك: ال في بوستك انعرفتْ! لكن الجوباك الحاصل بالبوست،
ردّني ببساطة للكلمة الشعبية: ال بتسوّيهو بي إيدك، يغلِــب أجاويدك ..!! وعلى كل حال، ومع حُبي للشمار،
إلّا أنني في ذاك الحُب، الذي ربما، يقتُل عديل كدا، لستُ في طبقة الباشمهندس ودالبشرى! ولا في حِذَر السيدة/بت
مختــار، بل أقــَلْ، وبمراحل ..! ولسان حذري: curiosity killed the cat

عزيزي كمال عباس،
عَمْ مساءاً، أو نهارك سعيد لعلّه، غايتو الجاتك في (سياستك) سامحتك آ زول!
ومع ذلك تجدني قائلاً: عــَجــبني للمرقوت


...............
بإمكانك أخي ود الجعلي أن تقول للّائي يلححنَ - كما جرت العادة - لمعرفة حرف أو حرفَيْن!: دا بُعدَكن! أو ممكن تقول: كان جبنا اسمو .. الهوا يقسمو Cut

ي فى اسم واضح ومحدد ي ماف اصلا مناضلة ساقطة وللا متجلة

المواطن سيد البوست ..هات الاسم


تحياتى

Quote: ولست ممن ينتهجون أسلوب الغاية تبرر الوسيلة ـ فنبل الغاية عندي يفرض نبل الوسيلة عندي

والله عدم نبل الغاية والوسيلة عندك يا كمال ظهر في البوست دا
في قولك لصاحبه أن لا ضرورة لذكر الإسم !!
فهذا إن دل على شئ ..فإنما يدل على أنك لا تمانع بأن يلقي هذا الإتهام المطلوق في هذا البوست بظلال الشك على عشرات النساء البريئات . فقط لأن هذا الإتهام المطلوق صادف هوى في نفسك ..

آمنه مختار كتبت الكلام ده كلو عن كمال عباس لانو في رأيو انو مافي داعي لكتابة الاسماء ؟!!

ما بقدر انزل اسما
------------------
طيب يشيلو منك اسمك الكبير ده

،،،،،،،كتبت السيدة آمنة مختار

Quote: والله عدم نبل الغاية والوسيلة عندك يا كمال ظهر في البوست دا في قولك لصاحبه أن لا ضرورة لذكر الإسم !! فهذا إن دل على شئ ..فإنما يدل على أنك لا تمانع بأن يلقي هذا الإتهام المطلوق في هذا البوست بظلال الشك على عشرات النساء البريئات . فقط لأن هذا الإتهام المطلوق صادف هوى في نفسك ..

ود الجعلي يتحدث عن الأسافير بصورة عامة ـ مواقع / واتس آب ـ الفايبر ـ الفيس بوك الخ والكلام يلقي بظلاله ويمس فقط كل باع ضميره ونفسه للنظام ـ ولم يعد يعارضه ! وقد قلت (والشاهد في هذا أن علينا الحذر من تجار المواقف وكل من يعرض خدماته علي السلطان ويسترزق من وراء ذلك) إنا أتحدث كل مرتزق من وراء المواقف السياسية أو عارضا نفسه في سوق النخاسة السياسية * ود الجعلي قد يكون إستند علي شواهد ومؤشرات يثق في مصدرها ولكن هذه المؤشرات قد لاتصلح كأدلة قضائية وقانونية ـ ذكر الإسم تترتب عليه تبعات كثيرة علي كل الأطراف لذا يجب الحذر في التسمية ! * هذا تقديري وقد يكون خطأ يعني ليس قطعيا وقد يأتي رأي آخر أكثر منطقية من رأي وفي النهاية القرار لود الجعلي وليس لأحد منا ! ** ولكن كل هذا يعطيك الحق في كلامك دا

Quote: وعك دا يا كمال عباس زي النوع البتوصفه إنت فوق دا الهدفه يعرض بضاعته للإنقاذ . فكلاكما ( مغرض وبلا ضمير

...
.......

Quote: علشان كدا بأكد ليك إنه الشباب جوه السودان القاموا بالحراك الأخير كافرين بنوعينكم ديل لدرجة ما تتخيلها

.......

Quote: .حا تقدر تخرس معارضين شرفاء ربما أشرف منك بمراااحل !!

،،،،، هل هذا يعطيك الحق في الإساءات والشتائم والتجريح لمن لم يتعرض لك بسوء ؟ ،،،،،،،

بوست غير موفق نوهائيا ..
حتي وان كان المقصد التحذير من هذه الغواصة الا انك وسعت دائرة الشك وسط النساء ..
ايه البعيد انك تكون انت ذاتك غواصة ومنزل البوست لبلبلة مجتمع السودانيين في المهجر ..
من الافضل ان تحذف هذا البوست ..
الفضيحة والسترة متباريات ..

Quote: كل المرور نشكر لكم غيرتكم على بلدكم واخوانكم كمال عباس كالعاده جبتها من الاخر ود البشرى بالضبط دا القصدتو شكرا لقرايتك لما وراءالحروف ودا السبب الاساسى للنشر على اليمين الكلام دا ممكن يقطع عيشى لكن اتوكلت على الله وغمضت ونزلتو ما بقدر انزل اسما ويا امنه مختار انت زوله صحفيه شاطره ما اظنها تفوت عليك دكتور سيف لك التحيه جلت منك الحكايه فى البدايه لانو صدقنى بكل جوازاتنا والحمايه برضو بلدنا مابنخليها للغجر

بعد كلامك دا، اسي أنا بقيت شاكي في أمنة مختار.

معظم الاسماء من نورث اميركا كندا واوروبا الشرقيه وفعلا ياجماعه والله صعب اقول اسم ويابوجوده والله مش الهواء يقسمو ياامنه مختار
اذا قلنا اول حرف فيهو اخير نقولو كلو وزى ماقالك اخونا كمال حسن صعب ود البشرى والله كنت مفتكر انت اول زول يجيب خبرا لكن يااخوى
كورتك فكت ول شنو الناس الزعلانين ياخى امسحوها لى فى وشى الطوربيد ياخى فى زول كان قاعد اسعلك من مصادرك بعدين صاحبك جادات
لو سعى فى الموضوع دا على اليمين يجيب اخرو حبوبه دوما الطب فى امريكا الشفع ديل بخلصو فى تمانيه سنه يعنى لو ماعندك بكلاريوس
وامتحنت الامكات وكمان جبت فيها من خمسه وعشرين ولى فوق مابقبلوك داغير تكلفتو الممكن تصل لى نص مليون دولار ترسل ولدك
ول بنيتك يطقطقو فى خمسه سنوات فى جامعة الجزيره بى عشر القروش وشويه اكتر من نص الزمن

اختنا اميره السيد شكرا على اهتمامك بعيشنا والله يديك العافيه وكذلك نور تاور شكر خاص واحيك

Arif Nashed
انا برضو قلت كدى عليك الله كان بعرفلك زول حذاف شوفو لينا

ود الجعلي
حكاية يرسلوا الاولاد يطقطقو الطب في خمسة سنوات في الجامعات السودانية
بدل الثمانية سنوات في امريكا دي ما بوافقك فيها ...ليه؟؟؟؟
انت ما بتسمع بكثرة الاخطاء الطبية في المستشفيات الخاصة في السودان
والناس بتموت من عمليات جراحية بسيطة جدا ..
.والسبب الدراسات النظرية في كليات الطب وبدون تطبيقات عملية بسبب
عدم وجود معدات وامكانيات.
.والله يديك الصحة والعافية...
تخريمة
بالمناسبة الشخصية البتتكلم عنها دي عرفناها.....لكن برضه ما بنصرح بيها هنا
حتى لا نرمي الناس الابرياء جزافا..اذا كان التخمين غلط ...ولغاية ما صلاح جادات
يجينا بالخبر اليقين...

خلاص يا أخواننا ما قالوا ليكم الهواء يقسموا يعني إلا يقولوا ليك ظافر يا ظافر ياحرف الشين
بس بصراحة يا أستاذ الجعلي بوستيك دا تنفيسة زعل لأنه كله كلام في كلام لا أدلة ولا أسماء
المهم انت طلعت الهواء الكان كاتم نفسك ولو في شيء زي دا الزمن طول ولا قصر حيكشفوا

ما بعتقد إنه المقصودة إشتياق خضر والبقرا البوست كويس بيصل لفهم محدد عن من هي المقصودة
بالنسبة لأرسال الأبناء للدراسة في السودان فدي حكاية منتشرة جداً في أوروبا وكندا وإمريكا لعدة أسباب منها
كل واحد عاوز ولده يطلع دكتور وقراية الطب في السودان أصبحت أسهل من إستخراج رخصة قيادة سيارة
الدراسة في الغرب غير التكلفة المنافسة عالية وفي إمتحانات كتيرة تسبق القبول
الدراسة في السودان رخيصة جداً جداً بسبب تدني العملة والفقر
للأسف معظم التجارب دي كانت صعبة على الطلاب لأنه حتى الدكاترة هناك إنجليزيهم ما مفهوم للأولاد ديل

اميره وصباح والله فى تجارب ناجحه جدا فالطالب لغة مظبطه وبمشى هناك دابختصرلو زمن كتير وبخليهو يركز فى لب الموضوع ولمن يجو
راجعين برضو بطقطقو اليو اس ام ايل اى USMLE ويمتشو بصوره مبهره والله انا بعرف اكتر من خمسه مشو خلصو ورجعو
وامتحنو البورد والخمسه هسي بعملو/ن فى الرزدنسي فى امانة الله

منشور

كبو هنا عليك الله ريحنى وتكون فكيتنى من وعسه كبيره ويكون ليك على واحده

كبو هنا عليك الله ريحنى وتكون فكيتنى من وعسه كبيره ويكون ليك على واحده
..........................................................................................................................

الله يسعلك ما ياهو ....الكب ساهل يعلم الله

معذرة شنو اليو اسن لي دا يا أستاذ الجعلي وهل هو إمتحان بعد الجامعة لأني بعرف السات والأكت والتوفل وديل قبل الجامعة
معذرة لو خرجتك من الموضوع

دا الامتحان البمتحنوهو كل الاطباء المتخرجين من برا امريكا عشان يقدرو ينافسو فى الحصول على رزدنسى هنا والزمن دا لازم يجيبو تسعينات عشان يلقو فرصه

ود الصايم ياطوربيد قرين لايت فكنا من الورطه دى بعدين انت بتحملا زى مااهلنا بقولو وانا زول مسكين زول الله ساكت ما بقدر على القهاره

اِبْيان اِبانة اِستبانَ اِستبيَنَ اِستبيان اِستبيانيّة إِبّان إِبانة أَبانَ أبْيَان أبْيِنَاءُ بَيَّنَ بَيِّنة بَيّان بَيانيّ بَينا بَيون بُيَناءُ بانَ بايَنَ بائِن بيانات بيانيّة بينونة بينيّة

اعرفها كيف يا ود الجعلي وانت ما اديت اي معطيات كافية او معقولة لتوجيه التفكير نحو شخصية معينة, بعدين قصّة انّها هي نفسها عايشة على المساعدات دي معلومة إلى حد ما شخصية وصعب يعرفها اللهم إلاّ شخص لصيق أو قريب بالمعنيّة عبى الأقل جغرافيا وهي معلومة محدّدة أيضا
عشان كدا اي محاولة تنظير او لصق الشبهة بآخرين ح تكون محض هبل و مطاعنة خايسة ساي ما أكثر
اتفق مع الأخوان الطالبوا بسحب البوست طالما لا تستطيع الإدلاء بالمعلومة الحقيقية لتجنب اتاحة الفرصة للمرضى ومتسخّي الدواخل لأخذ الأبرياء بالشبهات
و يمكنك انت صاحب البوست سحبه او تعديله بنفسك

الضرس

الموضوعات الزي دي ما بتستحمل المواربة و الدسدسة
كان يمكن التنبيه بشكل عام لي ممارسات بيقوم بيها بعض الساقطين/ات
الخطورة إنو الممارسات التم الإشارة ليها في البوست ده تتعدى الناشطين لي بعض أفراد أسرهم بالسودان
القلق الممكن يسببو بوست زي ده لأسر الناشطين ديل بيكون أكثر ضرر من حجب إسم المعنية
إضافة للشك الممكن يتولد حول أي واحدة في محيطهم ، و تبدأ المطاعنات و الهمز و الغمز
كان يمكن لأخونا ود الجعلي طالما مالي يدو من الموضوع ده و واثق منو تماااام يمررو لأي واحد ثقة عشان ينشرو

Quote: هي أمريكا دي بقت السعودية وللا شنو ؟!!

ود الجعلي
سلام
اسمع كلام ود البشري واسحب البوست بتاع المطاعنات
عيب منك امنة مختار زولة دغريه كبت ليك كلامك كان غلبك ترد مافي داعي للاساليب الرخيصة
اسلوبك دا البنات المعانا في البورد ما بعملوهو
عايز الجد ياهو اسلوب الكيزان

يادسيس ياخى امنه دى وين انا غلطه عليها ياخى انا وكت اغلط اغلط فى امنه مختار ياخى غير بدل حرام عليك ياشيخ
بعدين اسلوب كيزان عديل كدا الله يسامحك

يا ود البشرى والله ندمان ساف التراب بفتح البوست دا لكن فى ناس حتما استفادت منو

( إنت مفتكر قطع العيش ده ساهل )
أميرة السيد،
إذاً،، علي كُلّ المنُاضلات في هذا الموقع،،
أن يتحسسنّ مسدساتَهن،،
فكُلِهنّ تحت دائرة الاتهام، والشك،،
ّ حتي يُعلِنّ صاحب البوست،،
إسم ّ من يعني من المِناضلات ،
هذا إسفافٌ وضَعفٌ وخلط ،
أما أن تكون شُجاعاً - وتُعلنّ مالديك ،،
أو لاداعٍ لنشر مثل هذه التُرهاتّ،،
واستعجبّ للذي يقولّ لا داعي لنشر أسماء!!!
اِذاً ماذا ينشِرّ ؟
خشب مهوقني ،،!!
إذا كُنتي ترينّ أن ( قطع العيش صَعبّ)-.
فِإن إطلاق الإتهامات جِذافاً وعلي عواهِنها ،،
هو( الصُعوبة)- ذات نفسِها،،
لا يخاف صاحب البوست علي ( قطع عيشه )-
وهو بدولةٍ من دول الاستنارة - الا اذا كان:-
( طباخاً او سائقاً) لدي الست ( الهانم ).
مع الاعتذار لاصحاب المِهنة الشريفة،،
ونحن من أصلابهم ،،

خيط سئ يجب ان يسحب كما ذكر العديد منا اذا لم يذكر ود الجعلى الانسانه التى يتهمها وبحيثيات محدده. مالداعى لفتح الخيط من اساسه اذا لم تملك الشجاعه الادبيه لذكر الشخصية التى تتهمها!!!!

بدل سف التراب يا ود الجعلي ادخل على رابط موجود في اليمين تحت بروفايلك اسمه كيف احذف مداخلة من بوستي بتلقى شرح لكيفية سحب البوست أو على الأقل اغلاقه
وريّح بالك و ما تاؤاخذ بذنب الأخوات الفضليات اللاتي يقوم الساقط بمطاعنتهن و الإيحاء أنهن المعنيات

حارة يا اخوانا رسيل الاسماء والمعلومات للجهات الامنيه ؟وتعمل ليكم شنو الجهات الامنيه وانتو فى امريكا واوربا حامين نفسكم بالجواز والجنسيهوالغريب دى بس رسيل معلومات ساكت لسه مافى اتهامات ولا يحزنون خلا الناس تفرفر والله صحىوتتكلموا عن قطع العيش والبهدله وقرايه الاولاد اطيب انتو ماشفتو البوست النازل هنا بتاع قوائم التسعين المرسل للجهات الامنيه فى السعوديه وبتهم الاسماء بالداعشيه وتجارة العمله وتفويج المجاهديناى تهمه كفيله بقص الرقبهوالغريب كل الاسماء المكتوبه مضرووووووبه يعنى ممكن زول يروح فى داهيه عشان ( مناضل ) فاضى قام الف قائمة مدفوعه الثمنخيبه الله على هكذا نضال

ب النسبة لى ...البوست ي دوب وقع لى .
ياود الجعلى انا غيرت رائى تماما ..لانو كتابة الاسم ..طوالى علان المعكلالاتى ح يقول ليك اثبت لينا ..ياها شغلتو .وتانى يحلك الحله بله وعبد الله وجاد الله.ودام الود وتحياتى ي مواطن ليك والضيوف الا واحد لاتشملو التحايا ..هو عارف نفسو...

ود الجعلي ..

كلامك دا كله يفقد المنطق ولا يحتوي الأ علي تشكيك في كل الاخوات العاملات في مجال المعارضه

بعدين اول مرة اشوف جعلي قاعد في امريكا وفي يده الجواز .. يقول ليك خايف يقطعوا رزقي

ويناشد احد المقيمين في الخليج ..بان يحمل عنه عبء الافصاح عن الاسم ..شوفوا الغلوتيه دي ..

يا ود الجعلي .. امامك خيارين لا ثالث لهما ..

اما ان تكون شجاع ..وتتحمل مسؤليه كلمتك وتفصح عن الأسم

اوتسحب البوست دا وتعتذر ...

حليل الجعليين البأكلوا الناريا يابا

Quote: حليل الجعليين البأكلوا الناريا يابا

سلام عزيزنا أحمد حنين، وووينك آزول؟ إن شاء الله طيّب..

ده كلام شنو دا يا آآحمد؟

يعني ببساطة ختّيتا على بلاطة، وتكاد تقول الجعليين ال كانوا بياكلو النار، ماتوا بي نارُم الأكلوها ..!
ثم أهلّ علينا عصر الجعليين أكّالين الـــ Hotطــــوق،
بالطريقة دي يا أباحُميد، هاعتبرك قاصد صاحبك/صاحبنا داك، ال كان معارض فأصبح بنعمة أطيانه
من كِبار داعمي النظام الآيل!

يا ودّ المُشرّف، بالله شوفتا ال "وقع" فيها كمال عباس؟
والله حَنَّنّنني عديل! لدرجة أني قرّبت أعملو فيها " جودويكليس" فأقول ليهو أسأل الأخت الكريمة
عن سِرّ زعلتها تلك (يجي قبل 10 ســنوات) لمّا زميلة أخت أخت! قاللتلها : اللتاريك فوق ال40.


غايتو يا ودالجعلي، ومع أنك طلعت جعلي أمركاني، ما فيك أصالة جعولية الإنجليز، إلّا أن بوستك
مرق منّنا، ما لم يك يمرُق بالسّاهل كدا (ولكنه الكَدر ال ماشّي بي عجلات قَطَر!)، وآخر وصاياي لك: إيّاك أن تقع في الشّرَك! طالما أنك غير جاهز للمُدافَعَة!
وبس امسك في قولة فصحاء العَرَب (المُعارضين): العِيال مُجَبِّــنَة.




....................
والتحايا للجميع

يا احمد حنين
يعني بكلام ده عاوز ود الجعلي يتحمق ويقوم ينشر اسم
المسخوطة دي ويبقى في حيص بيص(والله كان سالتني
حيص بيص يعني شنو ما بقدر ارد ليك) وبعد داك يبقى
في حكاية جيب المصدر وجيب الدليل على حسب قول
ود الصايم...!!
دي ما بتفوت عليه....والجعليين الزمان كانوا بياكلوا النار
كانوا بيدخلوا نفسهم في متاهات ومشاكل كثيرة هم في غنى
عنها..اما جعلية اليوم فهم نصاح وبيفهموا الامور بحصافة
شديدة وهم ما زالوا في نفس شهامتهم ومروءتهم...ما تجي
المسنوحة الجعلية بسمات تتشعلق في رقبتي...(وش ضاحك)
..المهم البوست ادى غرضه وهو تحذيركم من الوثوق بالكل
والله يديك الصحة والعافية

.......* إذا كان ود الجعلي أو غيره قد تلقي هذه المعلومة ـ ممن يثق فيهم ومن لهم مصداقية عالية وبحسب شواهد ومؤشرات عديدة ـ فإنه وحسب ثقته هذه سيأخذ بالمعلومة ـ ولكن كل هذه الثقة لاتمكنه من إيراد إسم بشكل علني ـ لأسباب عديدة ـ منها أن المتلقي غير ملزم بثقة ود الجعلي في مصادره ولن يأخذ بها كمسلمة ــ تكفي لإدانة أو حرق شخص بعينه ـ سيطالب بأدلة مادية ملموسة ـ أو الإعتذار وسيوصف بالتعدي والكذب والتلفيق ـ وسيعامل الشخص الآخر كضحية تعرض لإغتيال شخصية وأستهداف الخ * هل هناك ضرورة لذكر هذه الواقعة بصورة معممة ؟ أم أنها ستضر وتلقي بظلاله حول كثيرات ؟ أولا الخبر ذكر ( البكتبو بيها فى الفضاء الاسفيرى ) أي أنه يتحدث عن الأسافير بصورة عامة ـ مواقع / واتس آب ـ الفايبر ـ الفيس بوك الخ وهذا الفضاء الإسفيري يكتب فيه مئيات الآلاف من السودانيات وبالتالي لا إعتقد أنه وسط كل هذا الكم الهائل سيكون هناك ضررا مباشرا يستدعي كل هذا الهلع !
* شخصيا إعتبر أن هذا البوست يشكل رسالة وجرس أنذار! فقد يكون هناك أكثر من فرد ـ رجل أو أمراة ـ يتبعون لجهاز الأمن وهو مندسون وسط المعارضون! إذا علينا الا نتعامل بعفوية مع كل قال أنه معارض لاتفشي أسرارك وخصوصياتك لشخص ما لمجرد أنه معارض للنظام يجب أن تعرفه وتكشف معدنه وتثق في شخصه ـ وأخلاقه ـ ومن ناحية أخري تنبه الرسالة كل من تعامل بثقة وعفوية مع عناصر ـ وأعني تحديدا تجار المواقف وكل من يعرض خدماته علي السلطان ويسترزق من وراء ذلك) إنا أتحدث كل مرتزق من وراء المواقف السياسية أو عارضا نفسه في سوق النخاسة السياسية ـتنبه الرسالة كل من تعامل بثقة وعفوية مع مثل هذه النوعية أن يضع في الإعتبار ـ إحتمال أن تكون معلوماته مع الأجهزة الأمنية أو أنها أصبحت أداة لآبتزازه وإخراسه ! .......

بالله بطلو التنظير على اليمين كل الناس ديل الدخلو هنا دا عارفين المقصوده منو
هو عليك الله فى كم معارضه يا ابوجوده خلت المعارضه وبقت ما معارضه لحدى هنا وكفايه البوست دا قفل قومو لغلاطم يرحمكم الله
وتفتكرو لو كانت لسه معارضه شريفه بين قوسين ما ارتدت كنت نزلت البوست من اساسو ما كنت اتصلت عليها وعرفت الحاصل
وهل هى بطوعها رسلت الناس ديل ول اتهكر تلفونا
بعدين اى زول فى اللسته المكونه من اربعة عشر شخص اتصلت عليهم
وابدو عدم اهتمامهم بالحكايه لا تلاته غالبا ما الم فيهم خلال الايام القادمه
وزول من الحركات المسلحه بلاقيهو بعد فتره لانو حتى تلفون غيرو
لكن هو اصلا مارق للربا والتلاف
والله يا ابو نوره انت زول غريب ياخى مع انك راجل ما ساهل فى حقوق البشر مالك ياشيخ هل خار عزمك زى ما بقول الشاعر
كلكم عارفين انها زوله عكليتا ودايرين تورطونى
ياود البشرى غلبنى اقفلو لكن تانى ح احاول لانو الغرض منو اتحقق لكن اكتشفت انو البورد دا فيهو ناس مستهبلين بشششششااااااكل
يا احمد حنين ياصاحبى انت بالله لسه ما اقتنعت انو الجعلين كلهم بقو خشم بيوت والبمرق من البلد كلو تانى مافوقو رجا
تحياتى لكل المتداخلين
بالمناسبه البوست دا مافيهو اى مطاعنات ولا يحزنون عليك الفاضى ليهو لى كلام فارغ منو فى ظروف البلد دى

حليل صفحة الفيس التحت القفلوها بالشمع الاحمر
كان قبيييييل جابو اسم المسنوحة دي لسابع جد و اصولا الاجنبية كمان

يابروف اى والله نطالب بكور بعدم فتحها تانى عشان خاطر كل المناضلات الشريفات وعشان حاجات تانيه كمان
احيك يابروف واحى اصولك الما اجنبيه
والله البلد دى علمتنا الجبانات او كما غال ابوجوده فى تصديه لاحمد حنين صاحبنا زمان

ياود الجعلى كلامك ده ماسبقك ليه زول. الخارت عزيمته منو وخاف؟ انا وله انت؟. هل تريد الاخربن ان يحاربو معاركك التى فتحتها بنفسك وبدون اسماء وحيثيات!!!! صدقنى انا حاقيف معاك للنهايه اذا اقتنعت بصحة معلوماتك وانت تعلم ذلك.
قلنا ليك اقفل الخيط مادم مابتقدر تصرح ومابتبوح للناس باسمها. مع ودى

ي ود الجعلى اسمع كلام مزرور ما تسمع كلام شخبور ..يمين تخت الاسم هنا .يطارودك 4سنة و7شهور و14 يوم يقولوا ليك اها يلا اثبتنا لينا ...
ي خوى جماعة اثبت لينا ديل معروفين ياها شغلتم ومصدرك وانا كنت هناك وعيييييك يعلم الله



المهم جزاك الله خير ونتلاقا فى بوست صبير وواووووع تقول صبير دا منو..والله تسعلنى يحلك الحله بله وجاد الله

هههه ياخي ما تقول تراجي وخلاص المشكلة وين ؟ انت الجهجهتنا بي قصة قطع عيشك دي يا ود الجعلي
ياعزيزي الوضوح وتحمل مسؤولية الكتابة مافي زيه

سلامات يا كمال عباس
أنا أختلف معك في نقطة ضرورة الوضوح وذكر الإسم لأن الطريقة المبهمة دي ممكن تفتح باب لأخذ آخرين بالشبهات
وهناك الف طريقة وطريقة يمكن ارسال التحذير بها دون اي اشارات تفتح مثل ذلك الباب

الأميرة بنت السيد إنت عشان بت ناس ومتربية ما شايفة غير غرض إيجابي وألا وهو تحذير الناس
لكن الدنيا فيها كدا وكدا وفيها اصحاب الأغراض السيئة و الأمراض و الإتخذوا من البوست وسيلة للنيل من آخرين لا علاقة لهم بإيحاءات جبانة ومطاعنة خسيسة تشبههم تماما
عشان كدا ولأن دفع الضرر مقدم على جلب المصالح كقاعدة الأسلم عدم فتح باب زي دا, و الوضوح مافي زيه واي زول يقول كلام يبقى قدره ويتحمل مسؤوليته وإلاّ كان ما بقدر يلم خشمه عليه .

عافي منك يا ود البشرى كتير من الناس وصلوا للنتيجة الوصلت ليها وبس منتظرين ودالجعلي ينطق بيها وهو جاري واطي لحدي ما طلع روحنا واها حيت ذي فارس البطان وكشحتها ليهم

إتضح من أن ود الجعلي ما خايف من ناس الأمن ... لكن

ود الجعلي خايف من المناضلة و بوصفه "الساقطة" هذه ...

...

هذه المناضلة "الساقطة" .. في إعتقاد ود الجعلي ... أقوي من جهاز الأمن السوداني زاتو ... لأنها لها المقدرة (بإعتقاد ود الجعلي) .. أن تصل اليه في أمريكا برغم جوازه الامريكي .. و تقطع عيشه ..


..

بوست ضرره أكثر من نفعه

أقل ما يوصف به: بوست جبان.

البوست دا ما حيقفل بالساهل..
لان الموضوع (ساقط )...
السيدة البتوصل معلومات لاجهزة الامن..
من المفروض يجيبوا اسمها رباعى..
و أى معلومة عنها..
وبلا وجل او خوف..
ما دام هى بتدى معلومات للامن..
و الامن ممكن يعمل أى حاجة فى الناس حتى القتل..
و ان الفتنة اشد من القتل..
اذا حلال ثم حلال انها تتعّرى هنا..
عشان الناس تعرف..
ولكن حكاية ما ضرورى المصدر...و..الخ
دا كلام فاضى..
الدليل ما صعب..
ممكن مثال واحد يؤكد المعلومة دى..
أما البوست يخلى الناس فى ربما ولكن وحيث ان..
فداكلام عوج..
وضياع لى وقت الناس فى الفاضى..

Quote: والله حَنَّنّنني عديل! لدرجة أني قرّبت أعملو فيها " جودويكليس" فأقول ليهو أسأل الأخت الكريمة عن سِرّ زعلتها تلك (يجي قبل 10 ســنوات) لمّا زميلة أخت أخت! قاللتلها : اللتاريك فوق ال40.

تعرف يا أبو جودة .
رغم رأيي أعلاه في كمال عباس ، لكن لاحظت أنه ( حريص جدا ) أن لا يقع في أفخاخ التمييز العمري والنوعي والعنصري ..
وهذا خصلة نادرة جدا في السايبر السوداني..وكذلك السياسة السودانية !

بعدين التقدم في العمر حلاوته إنه بيخلي الزول يدي نفسه الحق إنه يلعب دور ( الألفة ) بارتياح ..
مع تأنيب خفيف للضمير .. :)

Quote: تعرف يا أبو جودة . رغم رأيي أعلاه في كمال عباس ، لكن لاحظت أنه ( حريص جدا ) أن لا يقع في أفخاخ التمييز العمري والنوعي والعنصري .. وهذا خصلة نادرة جدا في السايبر السوداني..وكذلك السياسة السودانية ! I know, but knowing better, that you are more respecting ours' colleague: The Comrade, Commander Kamal Abbas, so far بعدين التقدم في العمر حلاوته إنه بيخلي الزول يدي نفسه الحق إنه يلعب دور ( الألفة ) بارتياح .. مع تأنيب خفيف للضمير :) I believe you are less than FORTIES ..! So, do not maximizing your GREATHEARTED in such vain manner

سلام ليك، العزيزة آمنة،
وشكراً على هذا التدفق الطَّيِّبي الجميل، مع أنّي، بريد شَــكَــلِك ..! أكثر من توقّعي هذه الخُضرَة الدّقاقة في الثناء على كمال،
بعدما "وقعتِ فيه" بأشبه ما بقولنا: دُقّــوا واتعضــّرلو!
وبيني وبينك، كمال يستاهل، الثناء ويستاهل أكتر.
وأنا كمان!
برضو أستاهل (ما رَشَح من...) شوية شَكلَ تجاهي؛ ومنّك مقبولة تتتتتب آ بنت الأكابر.

هل أكفّر ليك في تحسُّسِك من عنونة " البوست" بالسقطيبا التي أحرجتْ حتى "راعي البوست" ذاتو ..؟! كونك "ربما"
تحسّستِ أن إحدى صديقاتك، هيَ التي شالت "الكاس" ..؟!



.....................
كما تعلمين، أنا لا أصدّق ما تقوله الأخوات الأخوات حين المغاضَبات
وكل سنة وانتِ طيبة .. وعام سعيد عليك.

إذا كانت المعنية هي التي أشار إليها ود البشرى..

فأعتقد إنو ده أمر متوقع

وما فيهو جديد..

يعنى قصدك شنو ياهادى تقصد الغاغه لزوما شنو ود البشرى عندو جنس محن غايتو
بالله بالمناسبه يا باشمهندس وين محمد ودالصايم والكورجه المعاهو ديك من العوام ناس تمبس ومعتصم دفع الله او اى كانت اسمائهم :)

غاينو الجبهجيه وصلوا الى الشئ العاوزنو اللهو الفتنه وشق الصف

تبا لهم

غايتو اذا تجاوزنا الأخطاء الإملائية الكثيرة في البوست يبقى السؤال ما هو الغرض منه؟
هل هو فضح هذه ( المناضلة)؟
اذا كان الامر كذلك فلن يصل البوست لهدفه اذا لم يعرفها الجميع
هل هو لفت نظر المتهمة بان امرها انكشف؟
لا أظن انها ستأبه للامر اذا ظل اسمها مجهولا

اخي الكريم ضرر البوست في اعتقادي اكثر من نفعه