خط استوا الطعم المريح

06:53 AM January, 02 2017

سودانيز اون لاين
أبوذر بابكر-
مكتبتى
رابط مختصر

يا بت يا ضو
ولانك اجمل لون فى اللوحه
حتى النيل
كان داير يضحك
بنده ليك
وينادى عليك
وياخد منك طعم الفرحه
وحتى المطره
بترفع اسمك
وتلبس رسمك
زى الطرحه
ومع غيماتها
تقعد تنضم
وتقطع فيك
فى ونسات الجو
يا بت يا ضو

أجمل حاجة بتظهر فيكى
إنك شاتله
زهور البهجة فى دنيانا
وإنك غارسه
روح المعنى جوه غنانا
يا احلى بشارة بهيه
يا اسمح طله نديه
مقيل ضحويه
ونسة حلة
وريده سخيه
عسل الضحكه الدافق جاى
ومنك يسيل
عقد الدهشة الفيك منضوم
سهم مرسوم
فى نص القلب القاعد
فى طرف المنديل
يا بت يا عيد
كل ما تطلى وتانى تجينا
تخضر جيتك فينا
مناره فى الأفق الفسيح
نشوفك فينا
بهجة دفينه
بشارة للزول البعيد
سافانا من رونق بهاك
خط استوا الطعم المريح
غابات تقالد فى المطر
وديان نشيد
نشوان مليح
منقوشة بى فرح الشجر
غيمات وريح
يا ضونا
فتحتى أبواب السكات
لونتى ابواب الكلام
ترياق يشيل وجع الأرض
يسقى الفراش
نخب الرحيق
نورتى ارض الأمنيات
وزرعتى تيراب البريق
و باكر يقوم
جنة فرح
بستان مستف بالنجوم

يا بت يا نيمه
يا اجمل ُضل
يا جيتك غيمه
رذاذ ودعاش
يا ماليه الفجة حدائق فُل
يا مرتبه وقت الناس
و مهندمه حس الدنيا
رقة واحساس
و معطره صوت الغنيه
ندى وايناس
يا بت يا معنى
شايفنك طالعه 
من دهشة ناس
تعاين فيكى وتتمنى
لأنك وارده
وادى الطعم الأخدر
ولأنك شارقه
اللحظة معاكى
بتصبح أنضر
ونحن حداكى
نفرح نسكر
يا بت يا سُكر

ونفرح اكتر