عمود الاسبتالية

10:26 AM December, 28 2016

سودانيز اون لاين
طارق جبريل-المغرب
مكتبتى
رابط مختصر

https://www.0zz0.com

عمي الأمين الله يرحمه كان راقد في الاسبتالية في الجنوبي.. أنا ما كنت عارف عنده شنو.. بس كان عاجباني حكاية أقوم أمشي مع امي للاسبتالية وشايلين «العمود» و«تيرمس» الشاي..
كنا بنقابل عمتي الزهرة وعمتي عشة خليل علي لفة العشش.. بننتظر الباص «التيمس» ولا «البعيو» هناك ونركب كلنا ونحن ماشين الاسبتالية..
كانت بتعجبني طقطقة الكمساري لي اصابعينه عشان يشيل القروش من الركاب ويديهم التذاكر..
عمتي الزهرة كانت دايما بتعمل معاهو شمطة لانها بتتاخر لمن تطلع محفضتها من تحت هدومها وتقعد تسب وتلعن: الله يقلع بصاتكم إن كان مجارطاتني ماني قادري أفتح فشقيني...
مرة الكمساري لمن اتأخر في إنها تلقى محفضتها الكمساري قام سألها: قَطَعتي يا حاجة.. قامت اتلفتت عليه وهي مدردمة سفتها ولسانها يلملم في البزاق وقالت ليه: قَطَعت أمك يا ود الهرمة أنا لليلي بَلِد..
البص دة كله انفقع ضحك وعمتي عشة خليل وأمي غتوا وشياتن بي طرف تيابن وبقن يضحكن وعشة خليل دنقرت علي أمي في اضانها وقالتلها: ماها مرة شي لكن آآآبنقدر نقول شى الراقد في اللسبتالية دة ياهو عمها آآآبنقدر نخليها نمشي...
كانت بتصِر تركب جمب الشباك عشان الصعوط.. وكانت كلما الكمساري يكورك: حجازي حجازي حجازي... الغالي الغالي الغالي.. كانت بتنقنق: هي اللسبتالية دي مالها بقت بعيدي كدي..
وتقعد تداعي في السواق: يا خرابة سوق شيتك دة فسراع فسراع لاحقين زيارة اللسبتالية اليودوك ليها كاضم.. وطبعا البص كله كان بيكون مبسوط من السينما حقت عمتي الزهرة دي..
أها أول ما الكمساري يقعد يكورك: اللسبتالية اللسبتالية اللسبتالية.. كانت بتكورك لي أمي وعمتي: عااااشة بت ابو دية... عاااااشة بت خليل لا تنسيلكن شي في الباص العلي مراح بت بغداد دة...
أها نقوم ننزل مخمخمين حاجاتنا دي وتلتين الباص بيكون نزل جمب اللسبتالية دي.. والناس كلها شايلة «العمدان» و«الترامس» وواحدين تلقاهم شايللهم ملايات وبروش..
أها أول ما نصل جمب باب اللسبتالية غالبا بيكون الوكت لسة حق الزيارة... عمتي بتقومها شمطة مع الغفير: إنت ما تدخلنا الله لا كسبك... هو كان بيرد عليها: أأأو لسسسسسسسسة..
تاني ترد عليه: يدينا فترن من اللكل الشايلنه دة يشيلوك فيها علي مقابر فاروق شاحدي ربي... في اللحظة دي الناس كلها بتكون رقدت كاويق من الضحك...
طبعا قدام باب اللسبتالية دة كان بيكون عبارة عن سوق صغووووير كدة شي برتكان وشي عيش وشي ضفارات ومرايات وشي مجلات وجرايد... موووولد عدييييييل..
أها وكتين يفتحوا الباب الناس دي تتجارى من هني لااااهني في شوارع اللسبتالية وكل زول تلقاهو لقى العنبر الفيهو المرضان أليلو..
وكان منظر الممرضات وهن لابسات أبيض والسسترات لابسات أزرق منظر مهيب كدة... بتحس إنه عندهم قيمة كبييييري..
أها تلقانا كلنا اتكومنا في سرير عمي اللمين ونلقى اعمامي وولاد اعمامي وعماتي هناك كلهم جوا من شغلهم علي اللسبتالية..
ويسألوا في عمي الأمين.. وواحدين يسألوا في السسترات: إن شاء الله بقى كويس.. اللخصائي ما قالكم شي.. وهن يردن عليهم: عمكم دة كويس ياخ يوم يومين وبيكتبوا بيطلعوهوا...
بعداك كنا بننزل عمي الامين من العنبر ونمشي علي النجيلة الفي اللسبتالية ويفرشوا الملايات والبروش ويفتحوا العمدان ألات اللكل..
كانت النجيلة بتكون مليانيي تقول وااااضيقي من البشر الفوقها يتغدوا.. تحلف تقول الخرتوم كلها جات في اسبتالية الجن دي..
وتسمع في النسوان «يخصمن في بعضن: النبي فيك يا بت امي تجي تدخلي يدك معانا انتو باقيلي جايين من بعيد..
يضريك أن ما بقيتي جيتي تاكلي معانا.. الناس كانت كلها بتاكل حتى الما عندهم زول جاهم ولا جايين من بعيد ولا محولنهم من مدينة بعيييدي..
وبعد الغدا تلقى الترامس دة تكب في الشاي تحلف تقول قهوة «جقدول»...
مشية اللسبتالية دي بالنسبة لينا ونحن صغار كانت فسحة وفيها فوائد مادية كبيرة غالبا ما الاعمام «يغمتوا» ليك «فريني» ولا «شلن» ولا «ريال» وإن بقى الله بيحبك تلقى نفسك ماشي البيت بي «طرادة» عديييييل...
وطبعا الاولاد الكبار الببيتوا مع المريض و«الجكس» الممارضين أهلهم.. دي براها فيلم هندي هههههههههههههههههههههههههه...
ياخ بلدكم دي كانت سمحة حتى لو عندك زول عيان..
إنا لله ياخ

الأستبالة


دحين مو كدى؟

ياخ بلدكم دي كانت سمحة حتى لو عندك زول عيان.. إنا لله ياخ
قصصك ترد الروح يا استاذ

قصصك ترد الروح يا استاذ
ــــــــــــــــــــــــــــــــــــــــــــ
يغتي عليك يا حبيب

الأستبالة


دحين مو كدى؟
ـــــــــــــــــــــــ
نان وينها الياء حقت الشوايقة هههههههه

الموت ذاتو كان سمح خليهو العيا
.
.
زمان جماعتنا كانوا ماشين فاتحة راكبين لوري
وعمك اب سروال بوصي في الناس
يا ناس هوي ما تاخرونا وتدونا الليل
الفاتحة والشاهي واللوري
وكل شوية شوية يكرر فيها
يا ود المرضي سامع كلامي دا
الفاتحة
الشاهي واللوري
.
.
وصلوا الحلة
عمك اب سرول خت عكازو في اباطو ورفع يديهو وبطول حسو
الشاااااااهي
.
.
طارق يا جميل بركة بالشوفة

تصدق يا ودجبرين لي الليلة عمدانا تطاقش في كوستي
آي والله
عمدان زمان و حلل ساخن بارد
ولي الليلا ترامس الشاي والجبنة ماشة جاية
ما ناس اقاليم لسة نحن
ام العيال عندها عمودين شغالات شدة في الحلة

تصدق يا ودجبرين لي الليلة عمدانا تطاقش في كوستي
آي والله
عمدان زمان و حلل ساخن بارد
ولي الليلا ترامس الشاي والجبنة ماشة جاية
ما ناس اقاليم لسة نحن
ام العيال عندها عمودين شغالات شدة في الحلة
ــــــــــــــــــ
والله حالكم زين يا الحبيب
احب كوستي ذاتها انا ياخ

الموت ذاتو كان سمح خليهو العيا
.
.
زمان جماعتنا كانوا ماشين فاتحة راكبين لوري
وعمك اب سروال بوصي في الناس
يا ناس هوي ما تاخرونا وتدونا الليل
الفاتحة والشاهي واللوري
وكل شوية شوية يكرر فيها
يا ود المرضي سامع كلامي دا
الفاتحة
الشاهي واللوري
.
.
وصلوا الحلة
عمك اب سرول خت عكازو في اباطو ورفع يديهو وبطول حسو
الشاااااااهي
.
.
طارق يا جميل بركة بالشوفة
ـــــــــــــــــــــــــــــــــــــــــــــــــــــــــــــــــــــــــــــــــــــــــــ
هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
ههههههههههههههههههههههههههههههههههههههههههههههههههههههههههههههههههههههههههههههههه
ازيك يا حبيب
عمك بالغ ياخ

مقطوع الطاري،
وحات الله مِشتهيّك يأخ...

مقطوع الطاري،
وحات الله مِشتهيّك يأخ...
ـــــــــــــــــــــــــــــــ
يا حبيب كيفنك ياخ