Post: #1
Title: حزموني و لزموني وخلوني النغادر المنبر ...
Author: يحي قباني
Date: 12-28-2016, 03:37 AM
Parent: #0
02:37 AM December, 28 2016 سودانيز اون لاين
يحي قباني-فى الدنيا العجيبة
مكتبتى
رابط مختصر ما تزعل مني يا فاضلابي ...
و طبعا انحنا ما دايرين أي زول يغادر لاي سبب كان ...
الزول بس يقع و يقوم هنا ... ...
زمان قلت التسمم الأسفيري ده علاجه الزول يعمل ( حمية ) بالغياب كم يوم لغاية ما يشفى و يجي راجع ...
و الله انا بقيت ما عارف ...
هل الصاح الزول الداير يغادر ... يكتب بوست انيق ده زي بوست عبد العزيز ... و الناس تحترم رأيه و ما تقعد تحنس لأنه صادق ...
و لا بس تف كف يمشي و ما يجي تاني ؟
لانه ما كل الناس بتشعر انهم صادقين في كلامهم زي الفاضلابي هنا ...
حتى معاوية لما دار المغادرة لازم أتوقع منه كلام لانه زول صادق ...
المشكلة بتبقى في ناس الحزموني و لزموني و خلوني النغادر ...
فما عارفين ...
نحترم زي ناس عبد العزيز ونقول ليهم ده قراركم دون تحنيس ... لانو عارفين هم ما دايرين التحنيس ...
و لا نجمع زي ناس حزموني ؟
كده نكون ظلمناهم و لا شنو ؟؟
بالجد حيرتونا ...
|
Post: #2
Title: Re: حزموني و لزموني وخلوني النغادر المنبر ...
Author: يحي قباني
Date: 12-28-2016, 03:41 AM
Parent: #1
انا غايتو كان الفاضلابي و معاوية فاتو ...
بضرب عن الدخول الى حين عودتهم ...
لكن ما بغادر ... دمي تقيل جدا في الحتة دي ...
|
Post: #3
Title: Re: حزموني و لزموني وخلوني النغادر المنبر ...
Author: محمد البشرى الخضر
Date: 12-28-2016, 04:17 AM
Parent: #2
| Quote: دمي تقيل جدا في الحتة دي |
هههه و غيرها ...
معليش يا حبة النكتة حبكت ما تتحسّس الله يرضى عليك
|
Post: #4
Title: Re: حزموني و لزموني وخلوني النغادر المنبر ...
Author: يحي قباني
Date: 12-28-2016, 04:19 AM
و حاة غلاوتك متوقعها منك ههههههههههه
و بعد ما كتبت انا اغادر و اخلي الملاحظ ده لي منو ...
بعد داك حسيت بي جدية البوست قمت مسحتها ..هههه
حلوة منك لكن يا ود البشري ...
خصوصا انا شلت صورتك البتأشر فوقها و ظبطت الألوان و آخر وجاهة ...
|
Post: #5
Title: Re: حزموني و لزموني وخلوني النغادر المنبر ...
Author: أحمد محمد عمر
Date: 12-28-2016, 04:48 AM
Parent: #4
الواحد لو قدر يموضع سودانيز اونلاين في مكانه الحقيقي كمنبر رأي ما بتكون مشاكله كتيرة
لكن المشكلة في الناس البتغرق في المنبر لحدي ما يبقوهو بيت اخوان أو حتى ساحة حرابة
مهما غرقت في حالات الحب أو الحرب حيجي يوم تكتشف إنه أخوك المفترض دة مختلف عنك وخصيمك المفترض قريب ليك
مهما حاولت الناس تصنع من سودانيز اونلاين عالم حقيقي يظل عالم افتراضي كامل الافتراضية تكتب فيه الناس أمانيها وليس حقيقتها وما يدريك لعل الحقيقة أبعد
قعدت في الاونلاين فترة كافية خلتني عاصرت تجارب كتيرة .. من التجارب المتكررة عضو يغلط على عضو تاني غلط شنيع ممكن يدخلو السجن بإشانة سمعة في العالم الحقيقي
يجو اصحابه يدافعو عنه بي إنه الراجل دة في الحقيقة زول طيب شديد وأخو اخوان وبتاع لكن التقول في شيطان بركبه اثناء الكتابة
_________
اتخيل لي زي المرقت برة الموضوع كدة
|
Post: #6
Title: Re: حزموني و لزموني وخلوني النغادر المنبر ...
Author: محمد البشرى الخضر
Date: 12-28-2016, 04:58 AM
Parent: #4
أيوة كدا خلّيك فرايحي وروحك رياضيّة
هاك دي بالمناسبة السعيدة دي:
واحدة جنّها مراسيل وجيب لي معاك و كدا, ماشي وين يا راجل ماشي الشهدا جيب لي معاك الكريم الفلاني, انت وين في السوق جيب معاك خضار إنت وين في الاستاد جيب لينا معاك تسالي
يوم الراجل في جنازة ضربت ليه انت وين قال ليها في المقابر اها ما حاجة اجيبها ليك قالت ليه اغشى قبر أمي اقرا ليها معاك الفاتحة :)
_________
كدي نزّل الصورة النشوفها
|
Post: #7
Title: Re: حزموني و لزموني وخلوني النغادر المنبر ...
Author: عبدالحفيظ ابوسن
Date: 12-28-2016, 06:08 AM
Parent: #6
اها النجرب فيك نسخ المداخلات
فتر ياخ من الكتابة هناك لكن بجيك راجع
ما ننوم يعني
شنو العوارة دي
اياها الدنيا دي مرة تقفل معاك للطيش
ومرات تكون منبسط زي دوار جمل نسيبو
قال سند
لاتحدث القساة بالهوان حين يعتريك
فالذي يحس ضعفك
الذي تحس
يزرع المدي موانعاً
قطيعةً
كي يتقيك
ف شنو يا حبيب
أكرزْ
وزي ما قلت لي ود المدير
شوف المُطفح
وكرشني كرشة لكن انا عبيط كملتها معاهو لي النهاية
نحكي لي دي وبتكون فايته اضانك
لكن النقول عشان بسمات وبقية المسنوحات
المداحين مدورين في نص السوق .. والقريشات واقعه فيهم هبطرش . الزول يجي يتنقز وياخد ليهو عرضة ويرمي الريال والريالين
لامن الدارة تحما تب والقروش يكترن في قطعة القماش حقت الدمورية الخاتنها في الواطة
يجيهم زول يعرض ويتنقز وبعد شوية يترجم ويتهيج .. يشوت القروش يشتتها كلها ويمرقوا خشمهم ملح ملح
يوماتي زي دة
مرة واحد مانع من المداحين الموضوع زعلو
ونوي عليهو
من ما الدارة عِمرت وزولنا جا خاشي .. خلا المديح وخت عينو عليهو
ومباريهو بي الطِوالة
من ما داير يتهيج تلب فوق رقبتو وهجرو تحتو
ومسك في زُمارة رقبتو لامن الزول زبد
الحجازين كترو
وبدوا يقولوا للمداح الخانق الزول
فكو ياخ .. الزول غرقان
المداح قال ليهم
فتشو المُطفح
اها يا الفاضلابي
إن كان حلاوة كل الناس البتريدهم ما قادرة تطعم ليك مساخة ما يضايقونك
غادر
غادر طوالي
وبحسبها كدة
ان من تحاول ارضاءهم افضل من تحاول اسعادهم
ثم
تحسبهم اصدقاء
تطير الصداقة الجنس دي
حرم حرام من بيتي
لولا وجود بعض من احبهم هنا لغادرت
ولو وجد واحد فقط من الذين احبهم
واحد فقط
لن اغادر
فمن احبهم واحد فيهم بس قادر علي تحلية كل سخف الاخرين
بسمات يا مسنوحة سلمي علي البنيات
|
Post: #8
Title: Re: حزموني و لزموني وخلوني النغادر المنبر ...
Author: عبدالحفيظ ابوسن
Date: 12-28-2016, 06:22 AM
Parent: #7
خشيت المنبر الصباح .. انخلعت
مرقت قلت امكن خشيت بيت الجيران
الرصة ما اياها
التقول علي كان في زير تحت شدرة النيم الفي الحوش
لا لقيت النيمة لا الزير
يا ربي خشيت غلط
مرقت وخشيت تاني
الواطة كلها مقلبة
بوستات سادت ثم بادت
وبقا اثرها
كان شالو ما بنشال
بوستات انشالت وفضلت بوستات صدي لتلك البوستات
يعني حقو وقت دايرين تقطعو الشدرة بعد تجزوها فهوت في النار تستعرو .. تقلعو الجذور والدُقل حكاها ما يعتر لي زول
والله الحياة دي قصيرة خلاس
اياها مجموعة غلطاتنا ونجاحتنا
ف شنو زي ما بقولو
ما نبقا زي النعامة
|
Post: #9
Title: Re: حزموني و لزموني وخلوني النغادر المنبر ...
Author: مني عمسيب
Date: 12-28-2016, 11:00 AM
Parent: #8
التحية لكم يا اصلي وضيوفك ....
والله عجبتني .
لكن ما بغادر ... دمي تقيل جدا في الحتة دي ...
انت عارف يا اصلي الشئ الوحيد القررت اسيب هذا الوطن
لما قرروا ارجاع الفيسبوك وحقيقة كنت حا اسيبه ما عشان
فقط ارجاعه عشان تغيير الرأي انا ما بقدر اتعامل مع ناس
ما عندهم مبدآ وكلمة واحدة يعني لما اوقفو الفيسبوك كان
لسبب واضح وسبب موضوعي لا التباس فيه ! حقيقة اندهشت
جدآ لرجوعه تاني !!! فكان قراري واضح وما كنت بتراجع منه
ولا محتاجة تحانيس ولا مراجعة لموقفي لانه موضوع مبدآ لرفض
البذاءات والمهاترات !من خلال هذه النافذة لكن احرد ولا اسيبه دي
يلغوها الاعداء عند الغافل .. والله نحن نرحل بلد ونقعد .
ولكم الشكر وان شاء الله يوم وقوفكم ما يجي .
|
|