حيرتوني يا بورداب

تنبيه هام
لي مع المسلمي علاقة شخصية معه . واستأذنته في فتح البوست .
البوست ليس عن المسلمي
بل عننا نحن كبورداب
نحن في تقيماتنا للزملاء
ارجو شاكرا ان لا نلجأ لذكر تناقض المواقف او استباق قراءتها
البوست عننا نحن
توجد نماذج كثيرة ولكن نموذج المسلمي هو الاظهر
وسأقوم بحذف البوست هذا او أي بوست يكون وسيلة للهجوم الشخصي علي اي زميل now or then
مع أكيد الاعتزاز بكم جميعا هنا
والاحترام

معتصم الطاهر سلامات وكيف الحال ..

نعم هي مقدسة بالمنظور الذي اتطلع من خلاله ..
وبطبيعة او جوهر الحقيقة نفسها ..

الحصل انو محمد المسلمي المعروف بانتماءه جهة النظام .. شاف حقيقة قدامو متعلقة بعصيان 19 ديسمبر ونقلها كما هي ..تم افتراع اكتر من بوست حولذاك .. وحقيقة لم اقرأ ولا واحد من تلك البوستات ولذلك صدرت تعليقي باني اكتب من مدخل شخصي وعن بوستي الكتبت فيهو جملة واحدة عن المسلمي وهي ( شكرا المسلمي ) الموجودة في العنوان ..

بهذا الوصف .. انا على يقين من انني لست مشمولا فيمن تحدث عنهم هذا البوست للصديق عبدالحقيظ .. فانا لم احول المسلمي من جهة الى جهة .. ولا خلعت عليه صك وطنية انطباعي ولا يحزنون ولا اي حاجه والحمدلله .. وانما الكلام جاب الكلام ... وتذكرت موضوع قداسة الحقيقة التي عارضني فيها حفيظ بدعوى النسبية والمنظور ..

احترم كثيرا اختلاف الناس حول الحقيقة يا صديقي ... من يقول مثلا بفشل العصيان او نجاحه .. هذه مسالة نسبية ولكن مسالة انعكاس فعل العصيان على حركة السير في الشارع الفلاني في رأيي تقبل النفي او الاثبات .. نعم ولا زي ما بقولوا .. زمن الوصول من النقطة الف الي باء في العادة وفي هذه الساعة من الصباح كانت 20 دقيقة فاصبحت 10 دفائق مثلا .. هذه حقيقة لا نسبية فيها ويجب ان تكون مقدسة لاي زول انبرى لمهمة الرصد... واما ان ينسب ذلك للعصيان او لغيره .. او ان نعد ذلك نجاحا ام فشلا .. فهنا بتجي النسبية .. أو كما اتصور بعقلي البسيط هذه الاشياء.

مودتي التي تعلم ..

تحياتي ودالمشرف
حبابك يا صاحب
اذكر قولي وقتها ردا عليك
لكن إن صدقتني
ابدا لم أكن اقصد ذلك ابدا
او انني لا اتذكر دافعي الأن حينها
فقط كفهم راسخا عندي
ان لا قداسة عندي للاشياء
بل تُقرأ الحقيقة في مكانها وظرفها وقابلة للجدل حتي تلك الحقيقة التي اظنها حقيقة راسخة . فلو كانت مقدسة لصارت طوطم
اتمسك بها جدا مالم يستبن خطلها
وان استبان ذلك لدي الشجاعة في التراجع عنها

تحياتى الاخ / عبدالحفيظ

انا احد الذين اكبروا فى الشيخ / محمد المسلمى موقفه فى نقل الحقيقة مجردة
واكبارى له كان فى صدعه بالحـــق والجهـر به دون خــوف او وجــل وهذا لعمرى من اكبر مكارم الاخلاق
وهذا هو المطلوب من الجانبين المعارضة والحكومة لان الحقيقة وان كانت حارة الا انها مفيدة ..

والشكر للاخ / ابراهيم والذى اورد ما كنت اود الاشارة اليه فى المقتبس ادناه

Quote: نرفض الراي المخالف لنا وان كان صحيحا وذو وجاهة ، ونحتفى بمن معانا وان كان خطاءاً شكرا اخ / ابراهيم

كيفن ما يصدقك يا حفيظ ؟!!

واما بعد ..
المشكلة ما هنا ..
المشكلة في دراويش القراية ام أضنين كبار كبار ديلاك ..
بكون بقرأ فوق بوستيك وبالو في عنوان بوستي


واصل يا حبيب ..
انا ذاتي جملة (شكرا المسلمي) ديك عرفتها جايبالها لَوَزْ تقيل "من ملاوزات" ..
مع انو اكتر زول مفروض يزعل هو المسلمي البقى الناس بقولوا ليهو شكرا لعدم الكذب .. وكقى بذلك من سوء ظن عريض .. الا انو الامر لم يكن كذاك .

Quote: المشكلة في دراويش القراية ام أضنين كبار كبار ديلاك .. بكون بقرأ فوق بوستيك وبالو في عنوان بوستي

يا صديقي ...you used a very big brush

انا ما بعرف اضنيني قدر كيف ههه

لكن فهمي لكلام حفيظ كان في احتفالية الناس في بوست ود المسلمي ... و كان بعيد عن أي بوست آخر ناهيك عن بوستك انت ...

انت الهبشت رقبتك براك يا حبيب ... :)

انا قايل ما تدخل اغرق من كده في الفكرة ...

الشكل العام بس كان غريب ...

موالاة المسلمي للانقاذ عبر السنين ظاهرة و هو واقف فيها موقف هو مقتنع بيهو ... و الاحترام دائما متبادل ...

لكن التفاف الناس حوله و ردودهم ليهم كانت هي موضع الاستغراب ... على الأقل بالنسبة لي ...

لأنه المبدأ مبدأ ... و إن نقل لنا المسلمي صورة ما رآه في الشارع كما هي ...

مرحبا ابراهيم
وحبابك
تشكر
تلك هي القصة ليس احتفاءا فقط بل ومرحبا به في الجانب الآخر وسخطا عليه في الجانب المضاد كما يقول نيوتن بذات القوة ولكن في الاتجاه المعاكس ليس ردا فقط بل عناوين اعلي البوستات

لعلك وغيرك تلاحظ مساككة البعض واتهامهم بالكوزنة او الشيوعية او العمالة او او رغما عن انكارهم ..
تعرف الاشكالية وين يا ابراهيم اننا لا نقرأ المكتوب إلا لنضيف الكاتب للمجموعة ألف او باء

اوووو معلم
حبابك احمد
دائما اسعد بك في بوستاتي
تشرف يا صاحب

سلام
عبد الحفيظ يجدك بخير

حقيقي البورد بحيّر لي اكتر من اسبوع بفكر في البحصل دا٫ بعض المحسوبين دغري مع الحكومة والنظام بوستاتهم نشيطة جدا ويتم التعامل معهم بود وخفة دم
واخرين يتهموا فقط بانهم رمادين يتم التعامل معهم بعنف غريب لا تشفع لهم تصريحاتهم عن لا علاقة لهم بتنظيم سياسي او حزبية
دخلني الموضوع في عموميته ما عارف الشخص الاسمو اتذكر هنا هو قال شنو
مسالة عجيبة

ودوورد

أنا محيراني عبارة ود الشيوخ البشكرو بيها في سلفي دي

الحاصل إنه كل الناس دي عايشة برة السودان ومنتظرة زول يقول ليها العصيان نجح
المسلمي أداهم الحاجة العايزينها
مفترض تكون شهادتو عادية تتخت وتتقارن مع بقية الشهادات التانية .. أنا ما تابعت البورد الأيام ديك لكن شايف منير ألمح لإنو ملاسي قال رأي مغاير
لأنه المسلمي دغدغ أمانيهم فجأة نسو منو البتكلم وبقى أي واحد يجيهو شاويل بوكيه ورد نضال مصلح ويلبسو ليه
نسو إنه ذات المسلمي مؤتمر وطني منظم ممكن يغير مواقفه المعلنة عادي بأمر التنظيم زي موقفه تجاه تراجي مثالاً وإنه سلفي تكفيري لا يحترم معتقدات الغير كالصوفية ومجند نفسه لمحاربة الشيعة وتكفيرهم .. ولا يتورع عن استخدام أوسخ الوسائل في محاربة من يختلفون معه زي محاولتو لتأليب السلطات السعودية على أبو روضة بربط اسمه بالمعارض الذي تم اعدامه وخباثته في ربطه بموقع الراكوبة وقت اعتقال وليد الحسين

المسلمي ما بطل .. مافي مؤتمر وطني بطل أساساً
لسة ما أعلن انسلاخه عن الحزب الحاكم عشان نجري نقالدو ونفرح برجوعه
زول بدعم الحكومة دي وحيظل يدعمها طالما هو مؤتمر وطني



__________
ما قصدي طبعاً أتكلم في شخصية المسلمي أو خياراته السياسية والعقدية
لكن داير اقول إنه لسة ما بقى البطل الاتخيلتوهو



.

ولله يا حفيظ ما قلت إلا الحق . الواحد بستغرب في إنه إذا كان دي معايير معارضة انتمى ليها وبعتز بيها فهل كان غلطان عمره دا كله وهل هؤلاء الذين يلبسهم التناقض من أخمص قدميهم حتى سبايب شعرهم ممكن يمثلوه في يوم من الأيام
المهم بقولوا إذا كان بيتك من زجاج فلا ترمي الناس بالحجارة
ومن كان منكم بلا خطيئة فليرمها بحجر

مرحبا علاء الدين
بلاشك الصدق مكرمة ما كانت عند شخص إلا زانته

مرحب معتصم
إذا إنتفت تلك القداسة

حبابك حامد
فعلا امر محير
يزعجني جدا وصف رمادي ازعاج حتي ردود المزاح الساخرة
ياخ اقبل من الزول ردو القالوا وبين تناقضو بشكل موضوعي ما كل ما فتح خشمو مرقت ليهو مسدسك
وخطورة الامر دة ممكن تُفقد بعض الناس موضوعيتهم في سبيل نفي ما وصِفوا به من رمادية

اوووو معلم
بس ياهو يا احمد
صدق المسلمي لا يصنفه سياسيا .. ولا صدق اي زول او كذبه

مرحب عبدالغني
فعلا من كان بلا خطيئة
بعض الاخطاء يجوز للفاسق الفاجر نفسه رجم مرتكبها

مرحب عبدالغني
فعلا من كان بلا خطيئة
بعض الاخطاء يجوز للفاسق الفاجر نفسه رجم مرتكبها

نعم يا مشرف
نعم يا صاحبي
هي كذلك رغم ان ذلك ليس هو القصد

مرحب تاج الدين النوبي
وتحية للشغيل
خذ من الرجل ما يقوله يا تاج دون ان تصحب معك كامل تنظيمه

Quote: وخطورة الامر دة ممكن تُفقد بعض الناس موضوعيتهم في سبيل نفي ما وصِفوا به من رمادية

دا يا عبدو في حالة كان المعنية الحالة الرمادية العادية الفي الواقع تعني عدم الوضوح مثلا
لكن رمادية سودانيز دي موضوع تاني, لا تُفقد الموضوعية على أية حال لأن رمادي بفهم سودانيز فوقه النبي, مصداقية وموضوعية و تناول عقلاني ووعي قل أن تجدهم في الجانبين الآخرين و هما بالمناسبة مازي الواقع ابيض و أسود بل أسود و أسود منه شايف كيف!
و شي تاني أغلب من يصفون - أو يصنفون - الآخرين ليسوا ممن يؤبه لهم أو لأوصافهم ودا عن تجربة شخصية استمرت قرابة العشر سنوات في البورد
فا البفقد موضوعيته بسبب أوصاف اطلقها عليه بعض سقط المتاع فاقدي الموضوعية أساسا دا متحيّل ساكت وأصلا ما عنده موضوعية :)

حبابك ود البشري
تعرف مصطلح الرمادية دة اصلو ما وقع لي .. بالجد
كيف رمادي يعني
ولزومو شنو
اكان نضال ضد السلطة ف دة غلط في ظني كون انك تدفعه دفعا لمعاداتك بدلا من كسبه او تحيده

عندك حيل للروابط ولا أجيب ليك اقتباسات أسهل يا عمك ؟

روابط في الصقط يا صاحب
المنبر بي عض الشلوفة

Quote: روابط في الصقط يا صاحب المنبر بي عض الشلوفة

هههههه صدقت والله
خلاص لا روابط لا اقتباسات, أديك تعريفين تلاتة يشرحن كيف ارى الأمر و اتمنى ينجحن في توصيل فكرتي
الفرق بين الرمادي و المناضل - في سودانيز - فرق اولويات
المناضل يرى انه لا صوت يعلو على صوت المعركة
و الرمادي يرى انه لا صوت يعلو على صوت الحقيقة *

عند المناضل الاسفيري سودانيز ارض معركة حقيقية لازم يكسبها باي هوك او كرووك
الرمادي لا يرى سودانيز إلا على حقيقته, لذا ليس له معركة يخوضها فيه وكسبها مهم بالنسبة له, ما يهمه هو الحقيقة فقط
_____________________________

* بالمناسبة ما فعله ود المسلمي في نقله للحقيقة المجردة فقط دون انحياز هنا او هناك يجعله رمادي سودانيزي كامل الدسم, هنيئا له :)

نسو إنه ذات المسلمي مؤتمر وطني منظم


للامانة والتاريخ
المسلمي ليس مؤتمر وطني
لا منظم ولا غير منظم
ولو كان مؤتمر وطني، كان اعلنها علي رؤوس الاشهاد

نحنا نراهو "زول وطني" ونحترم خياراته


مع التحيات الزاكيات لي سواق البوست والمساعدين

Quote: عند المناضل الاسفيري سودانيز ارض معركة حقيقية لازم يكسبها باي هوك او كرووك الرمادي لا يرى سودانيز إلا على حقيقته, لذا ليس له معركة يخوضها فيه وكسبها مهم بالنسبة له, ما يهمه هو الحقيقة فقط

:)

برضها كمان طريقة يا ملاحظ ...

في الحقيقة ما حبيت افسد للناس توقعاتهم لكن بوستيهو الفتحو قبل يوم من العصيان داك انا حسبتو استباق من جهاز الامن السوداني و انو الاجابة سبقا ان تكون (نجاح العصيان) و لا زلت عند شكوكي.

_______________
روح شريرة و كدا

مرحب الشفيع
وحبابك
مامهم هو ياتو حزب بالنسبة لي
هل مواقفه تخدم قضايا الوطن ام تنكص بها
نحن كلنا يجمعنا مركب واحد اقول ليك
راكبين مركب واحد لتنقلنا للشاطئ الخصب . كلنا بهمنا عدم غرق المركب
لكن في واحدين مننا لا يراعون قوانين الطفو
يشيلو ويخمو في مقتنياتهم
اها ديل اكيد بغرقوا المركب دون ان يقصدوا
والغرق مابفرز الناس
لذا لايهم الحزب