Post: #2
Title: Re: اليومين ديّل أخلآقنا هِنا. والله صحي ...
Author: عبدالحفيظ ابوسن
Date: 12-24-2016, 12:43 PM
Parent: #1
شوف المُطفح
|
Post: #3
Title: Re: اليومين ديّل أخلآقنا هِنا. والله صحي ...
Author: معاوية المدير
Date: 12-24-2016, 01:03 PM
إنت كمان ما تصبُر، أصبُر، أصبُر،
الصبُر دا ما قسمولك مِنّو شي ؟!.
فترنا أها...
|
Post: #4
Title: Re: اليومين ديّل أخلآقنا هِنا. والله صحي ...
Author: معاوية المدير
Date: 12-24-2016, 01:05 PM
Parent: #3
يعني أكان دآير تمشي الكِنتِيّن تتناولك كروسة اللًت كِبريت ؤ قزازة
فانوس ؤ رُبُع رطُل طحينيّة الهم دا يكُتلك...
|
Post: #5
Title: Re: اليومين ديّل أخلآقنا هِنا. والله صحي ...
Author: اميرة السيد
Date: 12-24-2016, 01:10 PM
اتلمينا اول امس مع بنيتكم بت الاتبراوي بسمات في عاصمة
البهرجة والانوار لوس انجلوس بمناسبة الاعياد والسنة الجديدة
والرايحة من العمر....
ونريد ان نعرف السبب في ضيق الاخلاق في هذه الايام السعيدة
والناس كلها فرحانة في الشوارع وتغني باعياد الكريسماس...
...مع ان الاخبار البنقراها عن السودان بتسد النفس...وخاصة انتقام
مؤيدي النظام الهالك في ادارات الدولة من مؤيدي الاعتصام وفصلهم
من العمل لغيابهم ليوم واحد(حكم قراقوش)...لكن بنجبر نفسنا نفرح
مع خلق الله...
والعمر قصير واذا قضينا نصفه في الهم والغم وضيق الاخلاق فالنصف
الثاني بيقصر ويبقى ربع...
والله يديك الصحة والعافية
وكل سنة وانتو طيبين..
|
Post: #6
Title: Re: اليومين ديّل أخلآقنا هِنا. والله صحي ...
Author: معاوية المدير
Date: 12-24-2016, 01:18 PM
Parent: #5
يعني الزول أكان داير يمرُقلوا مشوار 10 دقايق ؤ بالعربية ما بكرعينوا كمان
لآزِم يلبسلُو طُرشُميّة حاجة لحدي ما يبقى زي القنقرة، حتي يقدر يعتِب علي
خشم الباب.
القنقرة مياها القنقرة الوآحدة دي،
يعني أنا أبقالكُم قاموس كمان !...
|
Post: #7
Title: Re: اليومين ديّل أخلآقنا هِنا. والله صحي ...
Author: معاوية المدير
Date: 12-24-2016, 01:24 PM
Parent: #6
/
هسّع دي ينضفوها كيّفِن، مع الرطوبة ؤ وجع الضهر دا ؟...
|
Post: #9
Title: Re: اليومين ديّل أخلآقنا هِنا. والله صحي ...
Author: معاوية المدير
Date: 12-24-2016, 01:39 PM
Parent: #7
Quote: اتلمينا اول امس مع بنيتكم بت الاتبراوي بسمات في عاصمة
البهرجة والانوار لوس انجلوس بمناسبة الاعياد والسنة الجديدة
والرايحة من العمر....
ونريد ان نعرف السبب في ضيق الاخلاق في هذه الايام السعيدة
والناس كلها فرحانة في الشوارع وتغني باعياد الكريسماس...
...مع ان الاخبار البنقراها عن السودان بتسد النفس...وخاصة انتقام
مؤيدي النظام الهالك في ادارات الدولة من مؤيدي الاعتصام وفصلهم
من العمل لغيابهم ليوم واحد(حكم قراقوش)...لكن بنجبر نفسنا نفرح
مع خلق الله...
والعمر قصير واذا قضينا نصفه في الهم والغم وضيق الاخلاق فالنصف
الثاني بيقصر ويبقى ربع...
والله يديك الصحة والعافية
وكل سنة وانتو طيبين.. |
أميرة اللميّرة.
طايح فوقكن سعد بِت المِنى يا قول أهلنا.
السبب طبعاً اليومين ديّل بلدنا دي يقعد فيها العدو. قِرّة شديدة بالحيل والجليد مالي
الشوارع والناس دي تشيّل ؤ تطُص في بعض، ؤ نحنا أصلنا وكِت الشي دا يبدأ
ينزل بنتلبّش.
حليل اتبرا، وحات الله لآمِن فارقتتها ما لبست فنيلة تحت القميص، صيف شتاء
بنطلون ؤ قميص ؤ سفنجة فقطاً. عِز الشتاء مرقنا انا وأمين ود عبد السيد من
السيالة لآبسين بناطلين ؤ قمصان فقطاً ؤ كداري لآمن مرقناها في السوق الفوق،
مسافة بتاعت 4 كيلو ضربنا فول مصلّح ؤ كل وآحد عيشتين من العيشة أم قرشين،
ؤ قلنا كدي مشينا علي القوصي ضربنا كل وآحد قزازتين حليب ؤ ستة قطع
باسطة وِ إتنين سِرين دبل، ؤ قلنا كدي رجعنا السيالة.
هسّع عايشين في اللباش دا قربنا للتلآتين سنة، ؤ يجي البشير يكورك قاعدين
في الفنادق ؤ تطقطقوا في الكيبورد !، تطُقك الملآريا الما تصحيك إلا في
لآهاي يا بركة اللآ نام لآ أكل الطعام.
العيد يتبارك عليكن...
|
Post: #8
Title: Re: اليومين ديّل أخلآقنا هِنا. والله صحي ...
Author: Mahjob Abdalla
Date: 12-24-2016, 01:30 PM
Parent: #6
يعني الزول أكان داير يمرُقلوا مشوار 10 دقايق ؤ بالعربية ما بكرعينوا كمان
لآزِم يلبسلُو طُرشُميّة حاجة لحدي ما يبقى زي القنقرة
==================
الان فهمتك يا معاويه
و ان شاء الله تكون قرشت السفنجة لغاية الصيف الجاي
______________
ياخي مفروض تقشر بالدبابة حقة الشتاء و تصور بيها عشان الناس ديلك يعرفو انو في كندا التطقيم حسب الجو Fashionista
|
Post: #10
Title: Re: اليومين ديّل أخلآقنا هِنا. والله صحي ...
Author: مني عمسيب
Date: 12-24-2016, 01:44 PM
Parent: #8
صاحبي ود المدير .. لك سلام ولضيوفك الكرام ..
والله كلنا اخلاقنا بقت نتشة بس ابعدوا في الفترة
دي عننا ههههههههه .
|
Post: #11
Title: Re: اليومين ديّل أخلآقنا هِنا. والله صحي ...
Author: معاوية المدير
Date: 12-24-2016, 01:55 PM
Parent: #10
Quote: الان فهمتك يا معاويه
و ان شاء الله تكون قرشت السفنجة لغاية الصيف الجاي
______________
ياخي مفروض تقشر بالدبابة حقة الشتاء و تصور بيها عشان الناس
ديلك يعرفو انو في كندا التطقيم حسب الجو Fashionista |
حبيبنا يا محجوب،
البتاعة قرشناها وإحتمال الصيف الجاي زاتو ما نلبسا، مع الشايفو دا كان رِجينا
الصيف الجاي حفيانين بس.
تصدق فكرت أقشر بالدبابة لكن خُفت علي ذوي القلوب الخفيفة.
يأخي العالم دي ما بترحم، بعد خمّة النفس دي يجيك وآحد يقولك التعديلآت الدستورية
ؤ صلآحيات الرئيس ؤ وِس، وِس، وِس، يعني عالم قُرآد بس !...
|
Post: #12
Title: Re: اليومين ديّل أخلآقنا هِنا. والله صحي ...
Author: جلالدونا
Date: 12-24-2016, 02:05 PM
Parent: #11
هسّى يجى ود الخدر و يقولّك و ين سهيل يا سحويل
____
يمين الله يا ود المدير اليومين ديل النوم فى الحوش
و المقيل تحت الشدرة الفى نصّو
ناقض حمّالة الخوص و الزير القناوى و بالعدم قربة
ماب تلقاهن لى فى ضهارى كندا دى
|
Post: #13
Title: Re: اليومين ديّل أخلآقنا هِنا. والله صحي ...
Author: Mahjob Abdalla
Date: 12-24-2016, 03:34 PM
Parent: #12
سلام معاوية
يا اخي خليك متفائل مع الشئ ده
الامورة الصغيرونة مما بدا الجليد و اصرت لي اطلعها برة عشان تبني الاسنومان. قلت انتظري الصباح لمن يقيف. اها الصباح ان بنضف في الواطة و هي تبني في الشغلانة دي
|
Post: #14
Title: Re: اليومين ديّل أخلآقنا هِنا. والله صحي ...
Author: محمد البشرى الخضر
Date: 12-24-2016, 09:34 PM
Parent: #13
لا يا سهيل دا بوست - على غير العادة - جينيوين تقرا من بنات أفكاره ههههه
ما أظنه يستهويك وكدا
|
Post: #15
Title: Re: اليومين ديّل أخلآقنا هِنا. والله صحي ...
Author: Hamid Elsawi
Date: 12-24-2016, 10:38 PM
Parent: #14
معاوية بطل جرسة
دي جرسة دوليه
و خليني استلف من قاموس دينق
بمناسبة اعياد الميلاد و اقول ليك
معاوية اختشي
و كل سنة و اخونا دينق بخير
و اقول ليهو عبر هذا البوست
نتلاقي و الحب الكبير
وحد هلالنا مع الصليب
-------------------
|
Post: #16
Title: Re: اليومين ديّل أخلآقنا هِنا. والله صحي ...
Author: معاوية المدير
Date: 12-25-2016, 01:30 AM
Parent: #15
Quote:
صاحبي ود المدير .. لك سلام ولضيوفك الكرام ..
والله كلنا اخلاقنا بقت نتشة بس ابعدوا في الفترة
دي عننا ههههههههه . |
أصُبروا يا صديقة.
ثم وفي غمرة هذا الجو الخانق يسألك الكوز حمد ابراهيم عن كلمة (السٍلى) هل هي فُصحي
أم عامية ؟، يا زول إنت قايلني انا عبد الله الطيّب !. أها أقولك، هي فُصحي ؤ نحن بنستعملها
في العامية، بس يا أخوي حليل زمن السعيّة ؤ حليل (اللِبا) دي ما تسعلني منها، حليل زمن
الدُرآر. كانوا يقولونا شيلوا السلى أجدعوهو فوق شُدرة السُنُط، وكنا نفعل لكن لي يوم الليلة
ما عارف إشمعنا شُدرة السُنُط ؟!. الغِنيمات كانن جزء مِننا والزمن كان زمن زين قبُل
يجونا التتار يشردونا. مرقنا ماشين صلآة العشاء أنا ؤ همزة ود خالتي الله يرحموا، أها
لقينا حُمارة الكجر جناها مدلدل مع السِلى، طوالي مسكناها ولدناها، بعد إتحلّت وِارتاحت
جبنالآ موية سقيناها ؤ مشينا الجامع، الجماعة سعلونا، إتأخرتو مالكُم ؟، إتلفت علي
الكجر قُتلو يا خال، ألف مبروك جابولك دِحيشة سماحة الدنيا عليها. دحين يا حمد أخوي
سوقوا ناسكم ديّل وِإضايروا علي جنبة خلّو الحياة تِندآح، فقد إنقطع السِلى في البطن
وما أنتم أيها الكيزان إلا أكِلي أسلاء...
|
Post: #17
Title: Re: اليومين ديّل أخلآقنا هِنا. والله صحي ...
Author: معاوية المدير
Date: 12-25-2016, 01:51 AM
Parent: #16
Quote: هسّى يجى ود الخدر و يقولّك و ين سهيل يا سحويل
____
يمين الله يا ود المدير اليومين ديل النوم فى الحوش
و المقيل تحت الشدرة الفى نصّو
ناقض حمّالة الخوص و الزير القناوى و بالعدم قربة
ماب تلقاهن لى فى ضهارى كندا دى |
يا صديق، يا حِليل ابو حسين.
يأخي عنقريب جنبك، شكلي كدي حأقوم أخرتِم الطيارة واملآلآ خُرتايتا عَلوّق وانهرا علي
فريقكم. ابراهيم ناصر من يوم ولدو أخدوا صاحبوا ناس (شلسي) الجنا حالف ما يلعب
عِلآ في (برشلونة)، عشان كدي ابراهيم قال ما بيقدر يجي معاي عشان حا يكون في
برج المراقبة، عارف، أكان الجنا دا لِعِب في برشلونة بنضوق اللِسترليني. أما فطومة
قالت مواعدة صاحباتا في إدمنتون ؤ لآزم تمشيلِن، قُتلها يا سجمانة يا رمدانة أخيرلك
تمشي تنجمي من الصقط والزهج دا، قالت لي، يا أبوي ما بقدر أخلف وعدي !،
قتلها خلآس يا ابو ذر الغفاري، أما صاحبك كبر فزي ماك عارف ختاهو معانا قرض.
وِلآد الـكلب قالوا جابولنا الـكلب الساخن، يأخي أكان خلونا مع الزير القيناوي
نكرشوا بالطوب اللحمر ؤ تِحتوا بِتِيّخة ؤ زرزور مستمتع بموية النُقاع، والوآحد
مستمتع بالمنظر دا في البرندة الهباب بالسروال الطويل والعراقي والهمبريب ضاربك
في جميع الأماكن الحساسة وغير الحساسة، عليك أمان الله هسّع السروال والعراقي
العِتة لِحقتِن، الله يازآهم يأخ عليك الله شُفت نفر الوهدبة السونا فيها دي !...
|
Post: #18
Title: Re: اليومين ديّل أخلآقنا هِنا. والله صحي ...
Author: Mahjob Abdalla
Date: 12-25-2016, 06:10 AM
Parent: #17
كلمة (السٍلى)
==============
تعرف يا معاوية الكلام ده قلتو ليك قبال كدا و تاني بقولو. انت ما من اتبرا. انت قوازي من نواحي عطبرة
الكلمة دي ما سمعتها لاكثر من 30 سنه و لدرجة انها اتمسحت من ذاكرتي تقريبا و بننظقها بنفس الطريقة و كنت قايلها عجمية محلية عندنا فقط.
اما كلمة لبا هذه فجبنا سيرتها قبل يومين في البيت.
قاعد اشتري الحليب (whole milk) و بعمل البركيب في البيت و معاهو جبنا سيرة الفرصة والسمن و الروب وفي اخر السلسلة جات سيرة اللبا.
ربنا يديك العافية
|
Post: #19
Title: Re: اليومين ديّل أخلآقنا هِنا. والله صحي ...
Author: عبدالحفيظ ابوسن
Date: 12-25-2016, 06:47 AM
Parent: #18
بردك قدر بطانيتك
وعُقبان تاني شوف المطفح
نحن بنقول ليهو السِلا
مرات بكتل البهيمة
سرين دبل
وحات ابوي الشيخ داك اتا قديم قُدم
غِلا اربعين سنة لا سمعتها لا قلتها لي زول اتذكرها معاي لامن قلت امكن اكون انا الماجيت
|
Post: #20
Title: Re: اليومين ديّل أخلآقنا هِنا. والله صحي ...
Author: معاوية المدير
Date: 12-26-2016, 02:04 PM
Parent: #19
Quote: سلام معاوية
يا اخي خليك متفائل مع الشئ ده
الامورة الصغيرونة مما بدا الجليد و اصرت لي اطلعها برة عشان تبني الاسنومان.
قلت انتظري الصباح لمن يقيف. اها الصباح ان بنضف في الواطة و هي تبني في الشغلانة دي |
سلآمات يا محجوب.
يأخي بوسة بوستين ؤ كمان وآحدة تالتة للأمورة السغيرونة المبدعة
ؤ زي ما قلت عزانا إنّو الشي دا بيسعدهم.
اللصوص الكبار يا محجوب لا يتورعون ان يسرقوا أسورة والعاب الأطفال الصغار والأفظع
من ذلك أنهم يسرقون أحلآمهم، لكن المصيبة الكُبرى هي أن يسرقوا وطنهم، وطنهم حيث لا
جليّد ولا صقيع بل براحات وحيشان وأُفُق تسبح فيه عقولهم الصغيرة مع الحبوبات وكل منهم
يتخيل في دواخله الصغيرة أنه محمد أخو البنات، ويتخيلن الصغيرات في دواخلهِن فاطنة
السمحة، تطربهم أُغنيات شليل وينو، وهودنا يا هودنا وتفرحهم حبات حلآوة كرم الله، وتحفظ
لهم كل هذه الأشياء مجتمعة هويتهم.
سرقوا إنتمائهم الحقيقي، سرقوا وطنهم وجعلوهم ضحية لهذه الغربة القاسية يطلون معظم
شهور السنة من النافذة لكُثبان الجليد وهم يحلمون بالحريّة.
الآ لعنة الله علي الظالمين...
|
Post: #21
Title: Re: اليومين ديّل أخلآقنا هِنا. والله صحي ...
Author: محمد مجيدو
Date: 12-26-2016, 02:51 PM
Parent: #1
اليومين ديّل أخلآقنا هِنا
----------------
ود المدير ..... هنا وووين ؟؟؟؟
واشار الى حلمة اذنه الوسطى ... كااااااااك ...
تصدق بالله .. انا كان عندي تاشيرة لكندا دي
في الثمانينات ... ولمن قالو لي فيها تلووج للركب ...
جليت الفكرة .... انا والبرد اصلو ما اصحااب ...
واموت انا في السخاانه ....
قلت لي متجرس على الاخر ... وقاعد على الهبشة ...
ياااخ ...اصبروا ورابطو ... لحدي ما تتلجوو ..
اتذكرت النكتة ديك بتاعة البرد والدخان ... بس ما حقولااا ..
طبعا انت والود جلجل تكونو عارفينها ....
عااالم بطاالــــــــــــــــــــة
|
Post: #22
Title: Re: اليومين ديّل أخلآقنا هِنا. والله صحي ...
Author: Yasir Elsharif
Date: 12-28-2016, 08:12 AM
Parent: #21
سلامات يا ود المدير والتحية لكل زوار البوست والمشاركين فيه
بوست ظريف شديد..
ياسر
|
Post: #23
Title: Re: اليومين ديّل أخلآقنا هِنا. والله صحي ...
Author: مجدي عبدالرحيم فضل
Date: 12-28-2016, 08:32 AM
Parent: #22
سلام ود المدير
أحب كندا واموت في البياااااض
بوست بديع والله يستاهل بكري يعلقوا فوق مشلعيب المنبر دا
تحياتي لك والزوار الكرام .
،،،،أبوقصي،،،،
|
Post: #24
Title: Re: اليومين ديّل أخلآقنا هِنا. والله صحي ...
Author: معاوية المدير
Date: 12-28-2016, 11:07 AM
Parent: #23
Quote: لا يا سهيل دا بوست - على غير العادة - جينيوين تقرا من بنات أفكاره ههههه
ما أظنه يستهويك وكدا |
ههههههههههه،
حِتة وآحدة كِدا يا ود البشرى !.
تعرف، ريحة الشتاء دي بترجعنا لحَجرة البحر زمن الشتاء حيث تقل الحركة وتصفو مياه النيل
بعد أن ينحسر وتخضرّ الجروف ويكثر الكُنتيب والناموس ويكون صوت البوابير اللِستر أكثر
وضوحاً مما كان عليه في موسم الصيف، سنين مضت نذكرها عندما يجعلنا شتاء هذه البلآد
نستعصم بالبيوت وعيوننا لا تخطئ الملل والسأم حتي في مزاج الأطفال فتثور دواخلنا في
وجه الطغاة ونلعنهم في صمت إذ حرمونا طيلة هذه السنين من رائحة نوار شُدر الحراز الذي
يظهر في أروع حُلّة إحتفاءً بإنحسار النيل وتحتفي معه الدنانيّن والفراشات قبل أن يتحوّل
النوار إلي (خريّم) يستهوي بهائمنا التي نخرج بها للرعيّة. كنا نسميها الرعيّة ونفرح لآمِن
غنيماتا يرتعن.
قالوا إشنو ؟، أرسله معنا غداً يرتع ويلعب. قاتلهم الله سرقوا من أطفالنا الرتوع واللعب...
|
Post: #25
Title: Re: اليومين ديّل أخلآقنا هِنا. والله صحي ...
Author: MOHAMMED ELSHEIKH
Date: 12-28-2016, 11:17 AM
Parent: #24
| Quote: يعني أكان دآير تمشي الكِنتِيّن تتناولك كروسة اللًت كِبريت |
كروسة كااااملة؟
ليه؟
عايز تولع جهنم ؟ولا داير تحرق جروف جدك احمد ود الشيخ المدريس؟
|
|
