وليد محمد المبارك يكتب عن العصيان المدني

09:24 AM December, 23 2016

سودانيز اون لاين
عبدالله محمد احمد بلة-كوستي
مكتبتى
رابط مختصر

وليد محمد المبارك يكتب عن العصيان المدني علي صفحته بالفيس بوك


طارت السكرة.. وبانت الفكرة .. عن عصيان ضارب احكي

منذ الاعلان عن العصيان الاول.. عارضته وتوقعت فشله، فاسباب نجاحه غير متوفرة فيه.
فالعصيان ليس عمل ناشطين.. هو عمل خاملين 😊 (بهظر)
بل ان معناه ضد النشاط تماما.. هو حالة من الخمول والركلسة ..
ثم انه مدني لارتباطه بمنظومة المجتمع المدني من منظمات وتجمعات واهمها على الاطلاق هي الخدمة المدنية.

الخدمة المدنية بشقيها الحكومية والخاصة هي عماد العصيان واساس نجاحه.. وخصوصا الشق الحكومي.. وزارات هيئات وحدات.. الخ

يعني بالواضح كده
تجمع المغتربين والمهاجرين غير المتواجدين على ارض المعركة
وكذلك الطبقة المخملية داخل السودان اصحاب الاعمال الخاصة غير المرتبطة باحتياجات اساسية للبشر.. المرتبط نشاطهم بكماليات وحلي تجمل وتكمل الحياة وتجعلها افضل لكن بانعدامها تستمر ولا تقف .. من مصورين ورسامين ومخرجين وكتاب مدونات ومترجمين وناشطين سياسين.. ما بسوي عصيان مدني ناجح.. ممكن يسوي عصيان اسفيري ناجح جدا

العصيان المدني يعني ان تقيف الحياة في المدينة دوت..
والحياة تقيف اذا تعطلت الضروريات وليس الكماليات
الحياة تقيف ان تمرد من هم على ارض المعركة
الحياة تقيف وكت تكون ماشي تقلع ضرس وشبطك ينقطع وما تلقى نقلتي يخيطه.. ولو لقيت النقلتي ما تلقى بتاع حافلة او ركشة يوديك المستشفى.. ولو وصلت المستشفى تلقى بابها مقفول بطبلة والغفير مافيش.. ولو تلبت الحيطة ما تلقى بتاع الصيدلية يديك البنج.. ولو قررت تقلعه بدون بنج ما تلقى طبيبة الاسنان السمحة الفي مستشفى الاسنان عشان تلقلعه ليك..
ديل كلهم ما لقيتهم ليه؟
عشان عاصيييييييين

العصيان بنجح وكت الموظفين في دواوين الدولة يعصوا
وكت المواصلات تقيف
وكت بتاع الخدار ما يفرش
وكت بتاع اللبن ما يجي
وكت الصرافات الالية ما تصرف عشان العمال ما ملوها قروش
وكن زين تقطع عشان مهندسين الصيانة ما جو

وكده

عصيان موظفين الشركات الخاصة التي تعمل في الكماليات لن يجدي
عصيان المغتربين في الاسافير ما بحل
عصيان المهاجرين ووقفاتهم الاحتجاجية ايام السبوت والاحاد (ايام اجازتهم😀) وهمة في شكل وردة

بالاختصار.. لو ما اعتصمنا نحن ديل مافي اعتصام
نحن معشر الرمادييييييين

ونحن ما حا نفكر في الاعتصام من اساسه لو ما زحيتوا لينا من الشاشة.. لو ما اديتونا فرصة معاكم في الكادر حق الكاميرا..

كرهتونا البلي ذاتو

ازيك يا عبد الله
أخونا وليد فقد باسووردو ولّ شنو؟
هو عضو قديم ومخضرم في المنبر ومرشح سابق لرئاسة جمهورية السودان الديمقراطية
يا ريت يجيء بنفسو عشان نناقشوا في كيفية الوصول إلى هذه المرحلة:
العصيان بنجح وكت الموظفين في دواوين الدولة يعصوا
وكت المواصلات تقيف
وكت بتاع الخدار ما يفرش
وكت بتاع اللبن ما يجي
وكت الصرافات الالية ما تصرف عشان العمال ما ملوها قروش
وكت زين تقطع عشان مهندسين الصيانة ما جو
وكده
عصيان موظفين الشركات الخاصة التي تعمل في الكماليات لن يجدي
عصيان المغتربين في الاسافير ما بحل
عصيان المهاجرين ووقفاتهم الاحتجاجية ايام السبوت والاحاد (ايام اجازتهم😀) وهمة في شكل وردة
بالاختصار.. لو ما اعتصمنا نحن ديل مافي اعتصام
نحن معشر الرمادييييييين

الأخ عبد الله محمد،

وليد محمد المبارك عرفناهو لا في السما لا في الأرض.فماذا عن موقفك انت من العصيان المدني؟ هل تؤيده كوسيلة اطللإطاحة بسلطة الانقاذ؟، وهل انت من حيث المبدأ مع الإطاحة بالانقاذ، ام مع الإبقاء عليها؟.

الاخ عبد الله محمد أحمد بلة،

السلام عليكم. وشكرا لايرادك مكتوب الاخ وليد محمد المبارك عن العصيان المدني. وليت وليدا يكون من متابعي المنبر ليطلع على سؤالي:
كيف عرف الاخ وليد ان العصيان الاول في نوفمبر سوف يفشل؟بينما المعلوم انه لم يفشل وهو الامر الذي تجلى بوضوح في ارتباك السلطة وزاد من سعار خطابها الاعلامي ووحشية أجهزتها الامنية.

وليد محمد المبارك لم يكن من "العصاة" فحسب بل كان معارضا للعصيان حفاظا على وظيفته من ان يمسسها سوء وليس لأنه رأي بعينين نافذتين عبر الحجب كزرقاء اليمامة مآل الفشل الذي ينتظر العصيان.

كان العصيان الاول ناجحا بنسبة تفوق الستين بالمائة بينما راوح العصيان الثاني على الصراط الفاصل بين الاخفاق والنجاح حيث لعبت آلة الإعلام والتهديد دورا كبيرا في تنفير الناس من فكرة العصيان. ومعظمهم من الذين خافوا كالوليد محمد المبارك على وظائفهم. وهناك من اغراهم جهاز الامن بعدم العصيان. وهناك قسم توجس خيفة من هوية قادة العصيان الذين حاول الإعلام الحكومي ربطهم بالحركة الشعبية والحزب الشيوعي.

ههههه يا جماعة اخونا وليد دا هادي حالتو من زمنه الفي المنبر.
معارض للمعارضة. لاهو بعارض و بخلى بالعارض يعارض.

ونحن ما حا نفكر في الاعتصام من اساسه لو ما زحيتوا لينا من الشاشة.. لو ما اديتونا فرصة معاكم في الكادر حق الكاميرا..يا شفت انت اصلك ما ح تفكر ياخي قوم لف.
يا ولي ليه مادخلت مع ناس الحوار ياخ ؟؟؟

Quote: ونحن ما حا نفكر في الاعتصام من اساسه لو ما زحيتوا لينا من الشاشة.. لو ما اديتونا فرصة معاكم في الكادر حق الكاميرا..

الحراك الحاصل فى الفترة الفاتت دي ما عملوا زول محدد او مجموعة سياسية بعينها عشان تقول زحوا لينا من الشاشة او ادونا فرصة فى الكاميرا. حصل بشغل جماعي و بادوات متوفرة لاي زول. حساب فى الفيس بووك بس و تبقى منطلق مع الجماهير. تقول رايك و تناقش و تناقر و تروج و تعترض و تقترح بكامل الحرية و على قدم المساواة مع الاخرين. ما كان عندو رئيس ولا زعيم ولا لجنة محددة. حاجة كده كبيرة ماشة بالدفع الجماعي. حتى لمن فى ناس حاول يفرضوا اجندة غير واقعة سقطت ساكت باهمال الناس لها. مثلا كانت فى مجموعة بتحاول تروج لعصيان لمدة ٣ ايام من ١٩ الي ٢١ ديسمبر. لكنه لانو بحسابات كتيرة كان فى ناس كتير مقتنعين انو ما ممكن ينجز عصيان اكثر من يوم فى الظروف الراهن و خلونا نتدرج فى عملنا لمن يدخلوا ناس كتار فى دائرة العصيان. فى الاخر مر خيار اليوم الواحد لانو الناس كافراد روجوا لعصيان يوم واحد و تركوا الكلام الاتكتب فى بيان من مجموعات حاولت تتزعم ادارة العصيان. ضربت المثال دا عشان اقول انو المسالة دي شغلة جماااااعية خالص و مفتوحه لمساهمة اي شخص.

لكن وليد دا دي حالتو كما ذكرت. معارض للمعارضة، غض النظر عن انو منو العمل الفعل المعارض. اذا عملتو جهة حزبية هو ضدها اذا عملوه الناس ساكت برضو هو ضدهم. و المتسبل تبكيهو الريشة.

وليد يا معاوية ما كان مرشح لرئاسة الجمهورية كان مرشح في دائرة صغيرة محل سكنه في امدرمان ولكن حتى دي رفض الكيزان الذين ظل طيلة وجوده في الأسافير يقدم ليهم خدمات جليلة رفضوا يكرموه بيها وأخد زعلته ورجع لأنوا على الأقل موفرين ليه أكل عيش مميز في إدارة القبول للجامعات

من زمان كتبنا عن صبي الكيزان وليد المبارك وفضحناهن ولكن كان هنالك ناس من المعارضة يتعاملون معه ويطلقون عليه لقب "الشفت"

فها هي شفتنة هذا المتملق الإنتهازي ظهرت وبانت لكم جميعا.

عندما نقول لكم أن فلان كوز أو متملق للنظام فنحن ندري جيدا عن من وماذا نتحدث.

بالله في القريب الماضي ده كان في كم واحد معارض يدافع على محمد النور كبر ومنصور المفتاح؟؟؟

كلامك صاح يا عبد الصمد
كان مرشح للمجلس الوطني عن الدائرة 12 الثورة الشرقية
حسب الأرشيف
--
كانت أيام يا دينق
الرمادية كانت رمادية غامقة
حتى إنو غالبية ناس المنبر ما كانوا قادرين يشوفوا اللون الواضح المخفي وراها

السلام عليكم
شكرا لكل الذين عبروا من هنا
كنت اتمنى ان يتمحور النقاش حول افكار وليد وليس حول شخصه
هناك نفطتان اثارهم وليد نستحقان النقاش
اولا ... العصيان لم يصل للقطاعات الضرورية .. بائعي اللبن ... سائقي الركشات .. قالعي الاضراس .. مما يجعله يبدو كحراك صفوي وليس شعبي
ثانيا .. محاولة بعض المغتربين الوصاية علي الحراك الشعبي ... البعض انشا محاكم تفتيش العصيان .. والبعض نصب نفسه اية الله العصياني
من حق المغتربين ان يتفاعلوا مع الحراك .... ( ولكن ليس من حقهم ان يقلبوا السمكة وهم ما دافعين )

ختاما يبقي العصيان شكل من اشكال النضال ... ولكنه ليس خيارا مقدسا .. التجربة السابقة قابلة للنقد .. وللتحليل ... وحتي للرفض ... دون ان نخون من يفعل ذلك

ناس وليد ديل حكايتم غريبة.. يظنون إنهم سيخدعون كل العالم كل الوقت..
ياسر اب تفة فتح بوست يوصف وصف دقيق ناس وليد ديل..
على العموم الحراك مش راح يقيف و ينتظر المخذلين.. راح يستمر و راح ينجح..
وليد يكتب ما يكتب و التاريخ بسجل..

الطبقات التي تحدثت عنها من بائعي اللبن وسائقي الركشات وستات الشاي وعمال اليوميه هم اكثر الطبقات تضررا من نظام الكيزان الراسمالي الطفيلي ,يلهثون وراء لقمه العيش واصبح مجرد البقاء لهم علي قيد الحياه نعمه . ان اهلنا من هذه الطبقه الكادحه ونعلم ما يقاسون ولكن اين النقابات التي تدافع عنهم اين الاتحادات التي تتكلم باسمهم ؟؟ واين دور وليد في قيادتهم ؟؟؟؟؟!!!

السلام عليكم شكرا لكل الذين عبروا من هنا كنت اتمنى ان يتمحور النقاش حول افكار وليد وليس حول شخصه هناك نفطتان اثارهم وليد نستحقان النقاش اولا ... العصيان لم يصل للقطاعات الضرورية .. بائعي اللبن ... سائقي الركشات .. قالعي الاضراس .. مما يجعله يبدو كحراك صفوي وليس شعبي ثانيا .. محاولة بعض المغتربين الوصاية علي الحراك الشعبي ... البعض انشا محاكم تفتيش العصيان .. والبعض نصب نفسه اية الله العصياني من حق المغتربين ان يتفاعلوا مع الحراك .... ( ولكن ليس من حقهم ان يقلبوا السمكة وهم ما دافعين ) ختاما يبقي العصيان شكل من اشكال النضال ... ولكنه ليس خيارا مقدسا .. التجربة السابقة قابلة للنقد .. وللتحليل ... وحتي للرفض ... دون ان نخون من يفعل ذلك


نعم أسئلة وليد دي أسئلة واقعية ومعقولة جداً حقو تناقشوها

من يومو كوز ولما دينق كان بكورك انبروليهو م############ين كنا نحسبم شرفاء ودافعو عنو باستماته خالتو دومه ليك وحشه والله جيت الصين مرتين واتصلت على تلفونك ماجانى ردخالتو دومه ليك وحشه والله جيت الصين مرتين واتصلت على تلفونك ماجانى رد

ود الجعلي حبابك والله ليك وحشه
فارقنا بكين لينا اربعه سنوات