فتشوا (ضهرية) الطيارة - مقال سهير عبدالرحيم

05:27 PM December, 20 2016

سودانيز اون لاين
زهير عثمان حمد-السودان الخرطوم
مكتبتى
رابط مختصر

حملت صحف يوم أمس خبرا مفاده أن وزير الصحة بولاية الخرطوم مأمون حميدة اتهم من وصفهم بالأصنام بتسريب شائعة إشعاعات مستشفى الذرة، وأكد حميدة ترحيل تلك الرؤوس المشعة إلى خارج البلاد عبر الخطوط الإماراتية.
طبعا نحن تابعنا كلنا ذلك التحقيق الذي تم تداوله عن تسرب إشعاعات من جهاز معطوب في مستشفى الذرة، وامتداد أثر ذلك الإشعاع إلى الشوارع المجاورة ما بين شارع القصر وامتداد شارع السيد عبد الرحمن..
حسنا ما ينبغي قوله أولا للسيد وزير الصحة: (المقعدك لغاية هسه شنو؟).. أنت مش قلت قبل شهرين: "إنك ما قاعد، وستغادر منصبك في الوزارة!"، لماذا لم تغادر حتى الآن؟.
طيب .......مافي داع للاحراج خليك قاعد .......أصلا" انتو كلكم بتقولو ماشيين ......وبتقولو دي اخر سنة ليكم ......وبرضو بتقعدو .....ومافي زول فيكم قدر كلمته...........زمان بقولو الراجل بمسكوهو من لسانو.........هسه نمسكم من شنو زاااتو بقينا ماعارفين ......يازول اقعد ...... ما فرقت......ومن شابه أباه فما ظلم .
نجيء لي موضوعنا...... حديثك عن أن هناك رؤوس مشعة سيتم ترحيلها خارج البلاد هو في حد ذاته اعتراف ضمني بوجود رؤوس مشعة ينبغي إبعادها، طبعا الرؤوس دي جات متين، وقعدت كم عليمها الله...... وكم من الأضرار لحقت بنا جراءها برضو عليمها الله.
ربما ننتظر وصول وزير غيرك إلى هذا المنصب؛ لينبش لنا الحقائق والتفاصيل على طريقة نشر الغسيل....... فالإنقاذيون يأكلون بعضهم.
يا زول ده برضو ما مهم ينبشك أو تنبشو.. المهم هسه الجهاز ده- حسب حديثك- تم ترحيله بالخطوط الإماراتية؛ يعني هسه تاني ما نسافر بالإماراتية دي ولا شنو؟!.
في الحقيقة الإماراتية خطوط محترمة وفخمة وهذا ليس إعلان لها؛ فهي لا تحتاج إلى إعلان، لكن من باب رفع الظلم عنهم؛ لأني على ثقة أن الناس (ستلاوذ) من السفر بها، وستنطلق قصص على شاكلة شوف عيني في رأس مشع نسوهو في (ضهرية) الطيارة، أو قالوا ليك الرؤوس دييل كتار في واحد وقع منهم في سير العفش.. أو في زول فتح شنطتو لقى فيها رأسين..
على العموم نحن لا نسخر، لكننا نقرأ تداعيات مثل تلك الأخبار.
نتمنى أن تصدر الإماراتية تصريحا تخبرنا فيه هل تم- فعلا- نقل الجهاز عبرها، ولا نسوهو ما شحنوهو، ولا الحاصل بالظبط شنو؟.


خارج السور:

اعذرنا يا وزير الصحة بصراحة.......بصراحة كده نحنا ما بنثق فيكم.


*نقلا عن التيار

مقال مفيد جدا من الصحفية التي اصبحت الآن مشهورة جدا جدا
وذلك بفضل الله سبحانه وتعالي ومن ثم مقالاتها الأاخيرة الرائعة
ومن ثم بجهود زهير الذي ينشر مقالاتها المفيدة هنا في المنبر العام..

غايتو مفروض وزير الصحة ما كان يعلن ان الرؤوس المشعة دي نقلوها
بالأماراتية....بعد كده حنلاوز نسافر بالاماراتية.. عشان الاسباب الاشارت ليها سهير..
.. والحمد لله الما نقلوها بالقطرية... اساسا نحن بنسافر بالقطرية..

غايتو يا ابو الزوز الاستاذة سهير عبد الرحيم يوم يا اهدتك وردة يا
كشرت ليك وشها,,,,عشان كده ركز على هذه المقالات الرائعة والمفيدة جدا..
والله يديها الصحة والعافية
والله يديك الصحة والعافية

الرائعة أميرة السيد
تحياتي
كتر خيرك يا ستي المهم أنا بالجد محتاج مساعدتك في ترجمة نص كبير ما عارف وقتك كيف
المهم دا الايميل حقي mailto:[email protected]@aol.com
للتفاكر في الامر والاتفاق علي التفاصيل
لك كل الاجلال

زهير
لك ولها التحية والتحترام