ثمانية رسائل وصلت من العصيان المدني مع الشكر لساعي البريد

10:40 AM December, 20 2016

سودانيز اون لاين
عبدالله ود البوش-الرياض _ السعودية
مكتبتى
رابط مختصر

الرسالة الاولى
إتضح ان السواد الاعظم من الشعب السوداني ان لم يكن كله عدا الكيزان يريدون اسقاط النظام
الرسالة الثانية
تم تقديم نموذج راقي للعالم اجمع اسمه العصيان المدني
الرسالة الثالثة
إتضح أن الحكومة مرعوبة جدا من صوت الشعب
الرسالة الرابعة
يوجد شباب وطني غيور على بلاده ويمكنه تغيير النظام باساليب مبتكرة ومن غير قيادة الاحزاب
الرسالة الخامسة
زال التخوف من المواطن وعلم انه يمكنه التغيير قريبا
الرسالة السادسة
زال التخوف من البديل وتبلورت الافكار باللجؤ لحكومة المؤسسات
الرسالة السابعة
لاصوت يعلو على صوت الشعب
الرسالة الثامنة
علم الحزب الحاكم مكانته الطبيعية عند الشعب السوداني

لاحظوا فرحة الكيزان اليوم
يا دوب طلع ليهم حس وكأنهن ولدوا من جديد
ما قايلين روحم بشوفوا يوم عشرين دا
.
.
التجربة ناجحة
وبتكرارها باسلوب شبابي مبتكر بردلب تقع

تحليل سليم

تسلم من كل شر يا الحبيب الباقر عثمان
تعرف التمانية رسائل دي وليدة لحظة ملهمة من اتصال هاتفي قبل قليل
مع الزول الماسك لي بهائمي في الخلا
حسب حساباتي عندي نعجة بتلد تيمان ومتوقعها تلد الليلة ول بكرة
اتصلت عشان اطمئن على سلامة ولداتها ويبشرني الراعي بالتيمان
ودي المكالمة بضبانتها حمالتك علي كان بعرف اسجل كنت سجلتها
السلام عليكم
عليكم السلام يا عمي عبدالله
كيفك يا الضؤ ان شا ء الله طيبين
بسط طااااب
اها بشر ام التيمان ولدت ؟
والله يا عمي الليلة انا ما سرحت مع البهائم سرح كركاسة وشايفا تسبي ساقا مع البهائم
امس قال لي الليلة عصيان مدني هو عصى امس وانا عصياني الليلة
ههههههههههههههههه
يا زول شن خبرك بالعصيان
ها عمي الواتساب دا خلى حاجة
وحينها تنزلت فكرة البوست على الهواء مباشرة

مؤكد المكاسب كتيرة الزعيم ودالبوش
ثوحد الشباب وأتجاههم نحو العمل الجمعي السلمي
والمبادرة في الفعل والإبداع في وسائله
كلها من بركات هؤلاء الشباب
الثائرين لغد افضل

لهم التحية والتجلة
ومؤكد الفورة ألف حتى الصباح

والتحية ليك ايضا

الحبيب جمال مصطفى بالتاكيد المكاسب كثيرا
وستظهر نتائجها قريبا
هؤلاء الشباب عليهم الرك فهم نصف الحاضر وكل المستقبل
فهم اهل الوجعة الحقيقيين لان المستقبل لهم
وبدأت بوادر نضالهم تأتي اكلها وهم عارفين نفسهم بعملوا في شنو
مؤكد سوف يشيعون هذا النظام لمسواهو الاخير وسيديرون دولة الحضارة والعلم
بس الله يكفيهم شر الديناصورات
تحياتي وتقديري

فووووووووووووق

دائما انت يا يابا فوق من عالي لاعلى من الدرجات العلا
تحياتي ومودتي التي تعلم الحبيب احمد حمودي

ود البوشاريت الكيزان يطيروا فى السما....فرررررررررررجيب رنة تلفونى بى ارقامو طار

جيب رنة تلفونى بى ارقامو طار
------------------------------
ههههههههههههههه دي زي جيب قدوم
عاين لي جاي
كلما اشوف صورتك دي بتذكر المجنون الفي مستشفى التيجاني المحامي
بشرك للسمك في بلاعة المستشفى
جاهو طبيب داير اشاغلو قاليهو قبضت كم سمكة
فرد عليه المريض وقاليهو اتا مجنون هنا في سمك ؟
.
.
كنارك البتشرك فيهو دا فيهو بلابيط بس والبلابيط زي القديلو ما بتتقبض باخوي واخوك
البلبوط ما بنقبض بجبادة كلو كلو
.
.
سمح اسع بديك رنة ... وكدا بكون طالبك ضربتين ونص
كل الاشواق الحبيب حسن مكاوي

سلام الله عليك ياود البوش اخوى

علا ولدك الماسك بهايمك دة طلع نجيض تب

وكمان بوتسب بالواتساب

وحمدالله فى وصول الرسايل ديل

وعقبان تجينا رسالة : بلا وانجلا

قريب ياود امى

طالبك

طالبك
------------
كمان داير تتعلم الغلات يا ود اب سن
حتى الان طالبك ضربتين وتلاتة واتسبات ونص
.
.
كل الاشواق يا جميل

شكرا أخ عبد الله ود البوش,

العصيان المدني نجح ولأول مرة وبمساعدة قوية من حكومة الانقاذ نفسها من خلال قراراتها الاقتصادية القاسية, نجح في أن يضع الشعب

في مواجهة حكومة الانقاذ

لا أقل من نصف عدد سكان البلاد الآن دخلوا إلى دوائر الفعل السياسي والاهتمام بالقضية العامة وهم في ذلك ذوي دواعي خاصة بهم وشخصية

ولا علاقة لها بأي تحريض من جهات سياسية معارضة أو غيره

ملايين المواطنين تحرروا أخيرا من ربقة الدعاية والاعلام الحكومي ووصلتهم المعاناة في أنفسهم وانشطتهم الاقتصادية وحتى الخدمات الصحية

لم تكن بمأمن من تسعير أسعارها وتعقيد طرق تقديمها مما أقنعهم أخيراً بضرورة ابتدار طرق المواجهة

الأسوأ يا عزيزي أن شعب السودان أخيراً فقد الثقة تماماً في حكومته وطريقة تطبيقها للقانون والتزامها بما هو منصوص عليه في القوانين

التي كتبتها وشرعتها فلم يخرج إلى الشوارع حتى بعد أن دعاه فخامة الرئيس للمنازلة ... فتجربة سبتمبر 2013 خير هادي ومبين

الشعب للأسف فقد الثقة في ائتمان الحاكمين على سلامة أبناءه لذا لجأ لخيار العصيان وطبقه بنسبة نجاح كاملة

كل هذا التراكم له ما بعده ... بكل تأكيد ..

لك التحية

أحمد الشايقي

ود البوش
صاحب الايادي البيضاء
وقد جئتنا اليوم بهذه الرسائل البيضاء التي وصلت من العصيان
المدني وهي تبشر بأن هؤلاء الشباب الذين قادوا عملية العصيان المدنيد
لإرسال هذه الرسائل التحذيرية لنظام الانقاذ الغير وطني والذين ولدوا
وترعرعوا في عهد الانقاذ قد علموا الآن الحقيقة المرة وهي ان مسؤولي
هذا النظام لا يعملون من اجل الوطن ولا من اجل جميع الشعب السوداني ولكن
من اجل مصلحة فئة معينة فقط وهي فئة افراد الحزب الحاكم الوحيد ، وعرفوا
ان رموز هذا النظام قد اغتنوا وكونوا الثروات المهولة لبناء القصور ....
ويا عجبا لهم لهؤلاء كيف يأخذون العزة باثمهم .. إثم السرقة والنهب ، إثم الظلم..
ظلم الناس بدون جريرة وذنب سوى مطالبتهم بحقوق اساسية ...
والله يديك الصحة والعافية

أميرة السيد
أميرة الشباب بت المدن يا الواعية يا الدارسة الكتاب
شكرا على مرورك العليل دائما ومريح وخاصة بهاتيك الدعوة النابعة من القلب النضيف
الله يديك الصحة والعافية
تحياتي لك وللاميرات بسمات وامتثال
وهانت واقتربت ساعة الخلاصة وابشرن بالخير
والله يديكن الصحة والعافية

مولانا احمد الشايقي يا حبيب
كلامك في الصميم وعميق ودقيق
نحن ناس رواعية ساهي بنديكم ليهو درااااااش انتو خلوهو دقااااااق
شكري وتقديري واحترامي الذي تعلم

وعليكم السلام الاخت مهيرة يا ثورة الماضي والحاضر والمستقبل
.
.
.
علا ولدك الماسك بهايمك دة طلع نجيض تب
--------------------------------------------
اولادنا اصلن من شفع نجاض محرقين عديل
راعي الغنم والطبيب في صقيعة سلامة ما بفرقن علا الكرم من عدمو
وعلا المروة من عدما ..... اها كان العميكة اكرم من الطبيب يبقى هو الافلح
وجت عليهم بتفنوا في الواطا في ضل ضحا وجت بقوموا افطروا في البيت القاعدين في ضلو
كان بملاح لبن ول كان حتى ام شعيفة الكتلت المرة الضيفة ..... اخخخخخخ يا بلد

.
.
شكرا مهيرة ومن كيبوردك لباب السودان قريبا جدا نسمع بلا وانجلا
تحياتي واحترامي الشديد

شكراً قريبي على هذه القراءة الدقيقة والأنيقة

كسرة:
مبروك التيمان مقدماَ .. وانا حاجز (اللبا) عشاء للوليدات

مودتي

قراءة حصيفة وواقعية ..

-------------------------------------------
ود البوش أتاريك في السياسة " جَنَباَ تَقلب البيعة " http://www.sudaneseonline.com/db/attention/010_Smile.gif عليك امان الله ما كنت خابرك كدي !

يجبرك العنوان ان تتابع المكتوب فتجد المكتوب بقامة الكاتب
كلاهما
يسوى الوطن


لك التحيه ياود البوش وربنا يزيدك من نعيمه توائم كثيرة لامجدوعه ولامبيوعه

Quote: يجبرك العنوان ان تتابع المكتوب فتجد المكتوب بقامة الكاتب كلاهما يسوى الوطن

كتلتو طاااب يا ملهم ,, عبدالله ده عينو نجيييصة
مما كانو سْغار ,, تلقاهن يخدموا الناس الـبتتلم للصلح .. ياولد جيب موية ,, ياولد جيب شاى ,, ياولد املا اللِّبريق
وبعد المساسقة دى كلها تلقاهو حفظ محضر الصلح بى ضبانتو وعرف منو الكان مكاجِر ومنو الكان أَلْوَتْ
ومنو الكان عامل فيها عشرة بى قرش وكيفن اهلو اتعاملو مع كل هذه المتناقضات ونجحوا فى تغيير الخصام الى وئام ,,
عشان كدى زى عبدالله ده اتربى على قوة الملاحظة فطنة وفطرة .

علي الحلف ان ما النعجة دي كان قلت عزمي بشارة دا الجابو هنا شنو ,....

يا وبوش المكسب الكبير انه الخانات اتبدلت ...الشعب بقى هو الشايل السوط ...كل شهر يدي الحكومة محطة وهي شغالة رديف

......
الله يحل النعجة بالسلامة

عزمي بشارة
----------------
عزمي بشارة دا منو ؟ ههههههههههه
عندو نعاج برضو ؟
.
.
المكسب الكبير انه الخانات اتبدلت ...الشعب بقى هو الشايل السوط ...كل شهر يدي الحكومة محطة وهي شغالة رديف
-------------------------------------
والعجب العجيب بعد تنقلب ... هاها ها جلد جد
.
.
الله يحل النعجة بالسلامة
----------------------
ستة ونص والطلبة خشو الدش كما ذكرت اعلاه
تيمان ضكر ونتاية
واسع دي اخر مداخلة واقوم اشوف مشاهدي كان باريت المنبر دا بنهمل الرزق
.
.
محمد جبره يا حبيب خالص التحيات وكل الود والتقدير مرفق طيه

مما كانو سْغار ,, تلقاهن يخدموا الناس الـبتتلم للصلح
----------------------------------------------------
ههههههههههههههههه
خطرت على بالي هذه المحاكمة السريعة والناجزة وكنا صغارا حضورا
جحفر ود الناير الملقلب بزنبار قداد الهبوب طلق مرتو
المرة نجيضة جدعت ليهو الشافع الرضيع ومشت اهلها في قرية مجاورة
بالليل الشافع يبكي داير امو
اتلموا حولو الناس يا زول امش رجع المرة وجيبا لولدها
قال لا لا ما بدورا ختيت ليها السودا
اها والشافع البجض دا تسوي ليهو شنو ؟
والله غلا اوديهو لخالتي التومة
وغلا ادويهو تمبول لاختي عجبت
وغلا
وغلا
وفي غلغلتو دي يجيهو جدي اب كريق
وجبطك صوط زي السم في نص ضهرو
قوم تقوم قيامتك .... يلا قدامي علي الدرب
حمالتك علي ولا بغم ........
.
.
هكذا كانت تحكم الامور يا صديقي عبدالعزيز الفاضلابي
وقد اثرت جواي الشجن وهاتيك الذكريات وليت من الوقت براح للحكي
تحياتي والود الذي تعلم

العزيز والجميل ملهم كردفان الفنان الجميل
كلامك بجبر الخاطر وبفرح النفس ولكنه مكلف جدا اتمنى ارقى لمستواه
واكون عند حسن الظن
.
.
وجزيل الشكر للدعوة المريحة بولادة التيمان والرزق كيمان
ولك اضعافها
عاطر التحايا مرفق طيها

عبدالله ادريس يا جميل
.
.
قراءة حصيفة وواقعية ..
-----------------------------
واقعية من قلب المناطق الروعية اذن فعلا واقعية كما تفضلت اخي الكريم ... حلوة دي ؟
اما حصيفة دي بتكون عجبتك قصة النعجة ام التيمان
.
.
ومن ناحية قلبان البيعة وقلبان الحكومة السفيهة دي بقت قبض ايد

.

عاطر التحايا والود

شكراً قريبي على هذه القراءة الدقيقة والأنيقة
---------------------------------------------
الحالة دي ام دعسي ساكت من طرف سرج الثورة
.
.
كسرة:
مبروك التيمان مقدماَ .. وانا حاجز (اللبا) عشاء للوليدات
------------------------------------------
دي ما كسرة دا لب الموضوع ولباهو
هههههههههههههههههه
تصدق ولدت الساعة ستة ونص والطلبة خشو الدش هههههههه
وكمان تيمان ابشرك ضكر ونتاية شفت البخت دا كيف ؟
وين يا عشاي الشفع البياكلو (اللبا) في الزمن دا
على الجزيمة كان بتضمن لي واحد من عيالك بياكل اللبا .... اضمن ليك وصول اللبا لي بطن بيتك
وهذا مع عاطر التحايا والاشواق

حيبنا ود البوش
اولاً بشّرنا ان شاء النعجة انحلت
و التيمان وصلوا تامين و سالمين و غانمين
و ان شاء الله يتربوا في عزك
و تشوف جديدهم
في سودان بدون كيزان
و ما نحتاج للعصيان
قول آمين

الحكومة بقت زي نعجتك دي يا ود البوش
وإن شاء الله ما تنحل

النشمي حبيب الكل .. صباح الرضا والنصر ..


ودي من اهم النقاط يا نشمي .
الرسالة الثالثة إتضح أن الحكومة مرعوبة جدا من صوت الشعب
تصدق يا ود البوش الدخلت فيهم تاني ما بتطلع
الا بزوالهم ههههه شفت التصريحات والحاجات
التانية حامياني دي ؟ ههههه غايتو الكيزان اجمل
شئ لما تشوف جقلبتهم وجرستهم ..

ولك التقدير يا كلس ..