السودان يوم 20 ديسمبر، بعد انتهاء (العصيان) ..

04:57 PM December, 18 2016

سودانيز اون لاين
وائل فحل-
مكتبتى
رابط مختصر

دولة امنية لا يمكن التعامل معها باساليب النضال المدني من عصيان وخلافه. جلوس الناس في بيوتهم ليوم او يومين او اكثر لن يضر الحكومة القائمة الان – فعليا-
قد يتضرر منه المعتصمون – تعطل مصالح، وتلقاها الحكومة فرصة للفصل والتشريد... وتصفية الحسابات.
ستشرق الشمس على السودان يوم 20 بلا تغيير – او بالاصح – الخرطوم لانها المدينة التي جعلها المعتصمون مسرحا رئيسيا لحملتهم –
ستخرج دعوة جديدة لعصيان جديد بتاريخ جديد – ربما يوم 26 ذكرى تحرير الخرطوم ، او يوم 2 يناير (بعد عطلة الاستقلال)، وسيكون مصيرها الفشل ايضا- ببساطة لان معظم الداعين للعصيان والمنظرين له غير موجودين في الواقع على الارض في السودان ، ولم يدركوا بعد، ان اسلوب العصيان لن يجدي مع النظام الحاكم الان ، وان لكل معركة سلاحها المناسب.

اسوأ ما في دعوة العصيان الحالية محاولة مصادرة حرية الاخرين في اتخاذ ما يرونه مناسبا من مواقف ، يعني اذا انت ضد العصيان معناها انت (كوز) ، ومحاولة تصوير المنابر الاعلامية على الانترنت على انها منابر خاصة بالمعارضة فقط ( زي الحاصل في سودانيزاونلاين الان).
يبدو – وعليه العوض- ان الشخصية السودانية – حكومة او معارضة- مبنية على الاقصاء ومحاولة فرض ما تراه صوابا على الاخرين.
شخصيا اتمنى ان يمر يوم 19 ، فقط ليرى بعده المتحمسون للعصيان مواقفهم بعيدا عن الحماس، وبعين واقعية.
نلتقي هنا يوم 20 ان شاء الله، للاجابة على سؤال واحد : وماذا بعد؟

يا راعي البوست
إذا كنت تعتقد أن العصيان لن يسقط الديكتاتورية
فما هو إقتراحك لإسقاطها؟؟؟؟؟
قول لينا رأيك عشان نتناقش

وعليك السلام نصر ..
انا ما طرحت مقترحات لاسقاط الدكتاتورية ، انما قلت رايي في الحاصل

سلامات يا وائل
لمّا تقول الإعتصام نجح او فشل شنو المعايير الاستندت عليها, عادة هم عاملين أساسيين أولا مدى استجابة الناس مقارنة بالمجهود المبذول في الإعلام و القدرة على الحشد - المعنوي لا المادي - مع الوضع في الاعتبار الظروف التي تواجه الاعلام من تقييد المنابر المعروفة و الاساسية من صحف و اذاعة وتلفزيون في وجه الدعوة
العامل التاني هو الهدف الموضوع ومدى تحققه
النقطة الأولى واضحة طبعا ويسهل تقييمها
المشكلة في النقطة الثانية: هل قال أحد ان الهدف اسقاط النظام يوم 20 مثلا؟ لا بالطبع
الهدف بالضبط شنو ما بقدر اقول ولا غيري لكن ممكن اقول ليك احد الاهداف انه الناس اثبتت لنفسها وللحكومة قدرتها على الفعل على التجمع على قولة "لا" الغابت سبعة وعشرين سنة حتى استهان المؤتمر بالناس ووصل الحال بمسؤوليه ان يستهينوا بالناس ويستفزوهم
ليأتي يوم عشرين و يتفقوا الناس على يوم 26 م يأتي يوم 27 ويتفقوا على 2 يناير مافي مشكلة, كلها روافد صغير تتجمع في نهر كبير سيفيض حينما ياتي اوانه

فاتني التعليق على النقطة دي

Quote: اسوأ ما في دعوة العصيان الحالية محاولة مصادرة حرية الاخرين في اتخاذ ما يرونه مناسبا من مواقف ، يعني اذا انت ضد العصيان معناها انت (كوز) ، ومحاولة تصوير المنابر الاعلامية على الانترنت على انها منابر خاصة بالمعارضة فقط ( زي الحاصل في سودانيزاونلاين الان).

لا من الناحية دي اطمئن, مجاهدات الرعيل الأول ادت لتحرير سودانيزاونلاين من الفكرة القاصرة دي
نعم لا زالت هناك جيوب متكلسة عايشة جواها وما قادرة تواكب الحاصل وتفارق ثقافة القطيع لكن أأكد ليك وبثقة وعن تجارب شخصية الوعي في البورد ارتفع و تجاوز مسالة محاكم التفتيش وحملات التخوين و صلب الناس حسب آرائهم المخالفة

مرحبا محمد البشرى ..
ما بقدر اعتبر العصيان ناجح لمجرد انو استجابو ليهو ناس ( بغض النظر عن عددهم) وذلك لسببين :
اولا ما عندنا آلية قياس حقيقية عشان نقول الاستجابة للعصيان كانت بنسبة كذا . وانا قلت فوق انو موضوع التعبئة والاعلام كلو محصور على الخرطوم ، والخرطوم ما هي السودان
تانيا لا اعتبر ان مجرد احتشاد الناس ( معنويا) هو مبرر او عزاء كافي ممكن تقدمو للناس البتضررو (فعليا) من العصيان دا

.. بالاضافة لغياب الهدف الحقيقي الممكن تقيس عليهو نسبة النجاح ، زي ما قلت انت . خصوصا انو معظم دعوات العصيان شعارها شبه الرسمي هو (اسقاط انظام)

مرحبا محمد البشرى

كفيت و وفيت

مكنة تضرر الناس من العصيان ما جايبه همها .
في سبنمبر 2013 الجماهير بذلت ارواحها رخيصة للوطن لكي يتحرر ..
اي ثمن يدفع في سبيل تحرير الوطن يعتبر ثمن رخيص ..

اذا كان العصيان لن يؤثر فهو رسالة للعالم بان جماهير الشعب السوداني قد قرفت من النظام ..
وان لم يكن مؤثرا فلماذا يبطبط رموز النظام !!

مرحبا يا عارف..انت اذن مع الاتجاه القائل انو هدف العصيان تحرير الوطن من النظام الحاكم ؟ لكل معركة سلاحها. انت بتفتكر انو العصيان حيغير النظام ، وانا ما بتفق معاك.اما قصة بطبطة رموز النظام فدا كلام انشاء ما اعتقد حيفوت عليك، وما تقول لي الدليل كلام البشير في كسلا ، ثم انو ما اعتقد انو هدف العصيان ان يجعل رموز النظام يبطبطو ...

قال راعي البوست
"انت بتفتكر انو العصيان حيغير النظام ، وانا ما بتفق معاك"
طيب سؤالنا
إنت متفق مع فكرة تغيير النظام من أساسه ؟؟؟؟؟
بكلام آخر
هل أنت مع إسقاط الديكتاتورية أم مع بقاءها
عذرا
ما تفتيش ضمير
بس في فرق بين ناس بتحاوروا عن أنجع الوسائل لإسقاط الديكتاتورية
وفي ناس بشتتوا في مثل هذا الجهود حفاظا علي الديكتاتورية

فمتي فهمنا إنك من ناس أي الوسائل أنجع حاورناك
ومتي فهمنا إنك من ناس ما تسقطوا الديكتاتور
برضو حاورناك
بس المحاورات بتفرق متي ما عرفنا المقاصد

يا اخ نصر :
انا قلت رايي في العصيان بالتحديد . اما اسقاط الدكتاتورية ووسائل ذلك ، فهو موضوع اخر

لكن ممكن اقول ليك احد الاهداف انه الناس اثبتت لنفسها وللحكومة قدرتها على الفعل على التجمع على قولة "لا" الغابت سبعة وعشرين سنة حتى استهان المؤتمر بالناس ووصل الحال بمسؤوليه ان يستهينوا بالناس ويستفزوهم :
____________________________________________________
شكرا ود البشرى
نعم انه كذلك وهذا كافي يا وائل الفحل
ويعتبر نجاح للعصيان.
لا احد منا يتوقع ان يصبح يوم عشرين ويجد هؤلاء الاوغاد قد تبخروا

مرحبا يا doma
اذا كان (احد ) الاهداف هو اثبات قدرة الناس على قول (لا) - دون الحديث عن اسقاط النظام - فالموضوع - قد- يكون مبرر ( اذا نظرنا ليهو بعيدا عن اضرارو على المشاركين فعليا) ، ولكن يبقى السؤال قائما عن جدوى الوسيلة نفسها في مواجهة -هذه- الحكومة ، بصفاتها المعروفة.
.. مرة تانية : لكل معركة سلاحها

سلام للجميع

ود البشرى كالعادة ما خلى لينا شي نقولو كلام موزون وفي الصميم تماماً
بس عايز اضيف حاجة بسيطة لي كلام ود البشرى يا وائل
الانقاذ من جات واغتصبت الحكم في سنينها الاولى ايام التمكين وما ادراك ما التمكين
استطاع المفكرين فيها وهم عرابها الترابي ومساعده علي عثمان
استطاعوا تفكيك كل الاتحادات والنقابات الموجودة في البلد ودا تخطيط خبيث جداً
يرمي الى المدى البعيد ودي هي فكرة التمكين الاساسية حيث لا يخفى على احد
ان هذه الاتحادات والنقابات هي الاجسام المنظمة التي تستطيع تحريك قطاعات واسعة
من الشعب بكل يسر وسهولة
اها يا وائل من الزمن داك والشعب ما قادر يلقى قيادة توحد كلمتو وتعبر عن رأيو
الا هذه الايام التي قاد فيها شباب العصيان شعبهم بكل جدارة الى الاصطفاف والتوحد
تحت كلمة واحدة وبطريقة منظمة دون تحديد اي قيادة واضحة لهذا العمل
اكيد مافي عاقل يظن ان العصيان سيغير النظام بين يوم وليلة
لكن يا وائل البنيان ببدأ من طوبة واهي الطوبة اتختت ونحنا مصرين نكمل بنياننا
وباذن الله لن توقفنا سفصطة المرجفين ولا تخزيل المخزلين

اتمنى انو الصورة تكون وضحت

رغم غياب الاحصاءات الدقيقة لكم مجرد تنفيذ العصيان ولو بنسبة بسيطة لكن ملاحظة لا يمكن تجاهلها فيه نجاح مقارنة بسبعة وعشرين سنة جهة واحدة متاحة لها الإمكانيات للتحشيد و اطلاق الحملات و فبركتها
مع احترامي لنظرتك و انت الأقرب وبالتاكيد أقدر على التقييم لكن لو غيرت الزاوية ح تلقى الإيجابيات و النصف المليئ من الكوب
بالنسبة لموضوع الضرر الواقع على من يستجيب لنداء العصيان بالتأكيد من يستجيب بكامل ارادته وهو يعلم العواقب التي قد تعود عليه بقراره هذا فهو الأدرى والأقدر على التقييم
واكيد شايف انه الضرر الحقيقي في استمرار الوضع دون ان يقول أو يوصل رفضه له ما قد يقود لتدهور و ضرر أكبر من الحاصل فعلا
الناس شايفة الهاوية الماشة عليها البلد, والعصيان ربما اضعف الإيمان - حاليا - لإنقاذ البلد من اللإنقاذ
ما معروف بكرة ح يبقى شنو بعد الجماهير تلامس مكمن قوتها وتعرف قدراتها
متفائلين و ادعوك للتفاؤل يا وائل و أمر الشعب كله خير بإذن الله طالما يسعى في حقه.

___________________

تحياتي رمضان ودوما

يا راعي البوست
بعد ما فهمناك أحسن شوية
قلنا نرجع نفلفل كلامك شوية

نبدأ بالنقطة دي
"ببساطة لان معظم الداعين للعصيان والمنظرين له غير موجودين في الواقع على الارض في السودان ، "
ودا ببساطة كلام ما صاح
معظم الداعين للعصيان موجودين علي أرض الواقع وفي السودان
ولأنك تقول أن العصيان سيفشل لأنه الداعين له خارج السودان
نقول لك أن العصيان سينجح لأن الداعين له ومنفذوه في السودان
بس نذكرك أنه خطوة في طريق يؤدي إلي إسقاط الديكتاتورية
في نهاية الامر
ما تستعجل علي الشعب السوداني
فقد صبر لأكثر من ربع قرن ليجمع قواه
كما قال شاعره:
إن هزمت بجمع قواي

"ولم يدركوا بعد، ان اسلوب العصيان لن يجدي مع النظام الحاكم الان ، وان لكل معركة سلاحها المناسب"
العصيان مجدي جدا ومجرب
ولو شفت الخلعة والبلبلة التي أدخلها العصيان السابق في الديكتاتورية
لعرفت أهميته
ولو عرفت كم تصرف الحكومة في "الإستعداد" من أموال هي أصلا لا تملكها
لعرفت أهميته
لو شفت كمية البطبطة في خطب الديكتاتور
وفي بوستات أنصاره هنا لعرفت أهميته
لو علمت كم تحطم حاجز الخوف لدي الناس
لعرفت أهميته
ولو عرفت كم الناس الذين يرغبون فعلا في المشاركة في العصيان
لعرفت أهميته

"ستشرق الشمس على السودان يوم 20 بلا تغيير – او بالاصح – الخرطوم لانها المدينة التي جعلها المعتصمون مسرحا رئيسيا لحملتهم –"
منو القال ليك ؟؟؟؟؟
من أحلامك أم من توقعاتك ؟؟؟؟؟؟؟
القال ليك منو إنه الديكتاتورية ما حستقط؟؟؟؟
لأنك داير كدا ولا لأنك عارف كدا؟؟؟؟
الشاهد
منظمو العصيان لم يقولوا أبدا أنهم حيصحوا صباح يوم 20
والديكتاتورية قد تبخرت لسماء الخرطوم المرصعة بالنجوم ؟؟؟
لم يقولوا بذلك ولكنهم قالوا أنها خطوة في مشوار
ولأنهم رأوا ما فعله العصيان السابق بالديكتاتور
لذلك قرروا هذا العصيان والذي يليه من عصيانات وخطوات لإسقاط الديكتاتور

هذا ما يرون
لكن بالشايفه دا من بطبطة الديكتاتورية وأعوانها
الأوغاد ديل بيكون بتسابقوا للهروب من السودان

"اسوأ ما في دعوة العصيان الحالية محاولة مصادرة حرية الاخرين في اتخاذ ما يرونه مناسبا من مواقف ،
يعني اذا انت ضد العصيان معناها انت (كوز) ، ومحاولة تصوير المنابر الاعلامية على الانترنت على
انها منابر خاصة بالمعارضة فقط ( زي الحاصل في سودانيزاونلاين الان). "
منو الصادر حقك ؟؟؟؟
ما هو إنت قاعد تكتب زي ما إنت عاوز
مجرد الإختلاف معاك ما معناها مصادرة حريتك

بعدين إنت رأيك إنه العصيان ليس بسلاح ناجع
كويس جدا
لكن شوية كدا وفضحت نفسك
إنك ضد العصيان
"عني اذا انت ضد العصيان معناها انت (كوز) "

طبعا عارف إنه في فرق بين أن تكون عندك وجهة نظر
في لا جدوي العصيان
وأن تكون ضده !!!
إذا كنت تراه سلاح غير مناسب
فوريهم السلاح المناسب
ولا شنو؟؟؟؟
إلا إذا كانت كل الاسلحة لإسقاط الديكتاتورية غير مناسبة لديك

فزي ما قلت ليك سابقا
في فرق بين ان تكون مع هذه الوسيلة أو تلك
(عصيان، إضراب سياسي، مظاهرات سلمية ...إلخ)
وبين أن تكون ضد الغاية بذات نفسها
(إسقاط الديكتاتور )

وبنواصل في النقاش

مرحب هيثم الغالي ، بتفق معاك في معظم كلامك الاوردتو فوق .
محمد البشرى ، برضو قدرت افهم وجهة نظرك ،
احتمال نقطة الخلاف الاساسية بالنسبة لي هي جدوى الاعتصام (دا بالذات) في مواجهة (الحكومة دي) بالذات ... للاسباب الذكرتها فوق
..

اخونا نصر..انا ما قلت انو العصيان حيفشل لانو الداعين ليهو من خارج السودان ( فقط) .. انا عدددت جملة اسباب بتلقاها فوقاما بالنسبة لمصادرة وجهة النظر الاخرى، فانا ما بتكلم عن نفسي هنا - مافي زول بقدر يصادر وجهة نظري- انا بتكلم عن الحاصل في المنبر العام دا طوال الايام الفاتت والدعوات لمنع معارضي العصيان من الكتابة ، ودونك البوستات الموجودة هنا- اما بالنسبة لسؤالك بتاع ( من احلامك ام من توقعاتك) ، فالافضل ان نناقش الموضوع المطروح بعيدا عن المواقف والقناعات الشخصية ، وانا اصلا وضحت ليك ليه انا شايف كده ... وانت رديت علي النقاط..مرة تانية ، انا اتكلمت عن العصيان بالتحديد ، اما اسقاط الدكتاتورية ووسائلها ، فدا موضوع تاني ياخي

ثم ان تعليقك - يا نصر - بتاع (فضحت نفسك بانك ضد العصيان) فالافضل اني اعتبر نفسي ما قريتو ، لاني اربأ بيك ان تفترض ان اتخاذ موقف ضد العصيان هو (فضيحة) .. ودي سياسة الاقصاء الانا قلتها فوق.
انا قلت انو العصيان كوسيلة (حيفشل) ، وطبيبعي ان اكون ضده طالما اني شايف انو فاشل ، والبوست كلو انا بقول كده ... يبقى وين الفضيحة هنا؟
يعني يا تكون مع العصيان، يا تكون فضحت نفسك..؟
انت شايف انو العصيان كويس ، خلاص دا رايك انت ، وانا بختلف معاك فيهو ميه وتمانين درجة. المشكلة وين؟

على اي حال الليل عندنا انتصف ، والعصيان حيبدا بكرة ، فننتظر ونناقش الحاصل بكرة ان شاء الله

اذن ، اليوم هو 20 ديسمبر بعد انتهاء حالة العصيان
كما توقعت في بداية البوست : (ستشرق الشمس على السودان يوم 20 بلا تغيير)
لم ينجح العصيان في العمل - اتحدث عن مشاهداتي الشخصية ، الحياة كانت عادية ولم تتعطل اي من المرافق عن العمل ( لا المرافق العامة ، ولا المحلات الخاصة - اطلاقا)، ولا يمكن لاي احد ان يقول انه عجز عن اداء اي تعامل رسمي او تجاري بسبب العصيان ، على الاطلاق.
ولكن ليس هذا مربط الفرس بالنسبة لي ، فمن البداية كنت متوقع ان العصيان لن ينجح ، فهو ليس السلاح المناسب في معركة المعارضة ضد الحكومة ، لاسباب كثيرة ذكرت بعضها بالاعلى.

ما لاحظته من كل ما حدث هو :

- المعارضون ، والنشطاء ، وغيرهم .. بااااالغوا في توقعاتهم لمفعول العصيان ، ووضعوا سقفا عاليا جدا له ، وتوقعات خيالية ، مما جعلهم يبدون وكأنهم في عزلة عن متابعة ومعرفة كيف تسير الامور في السودان ( وهذه ستسبب اضرارا معنوية للمعارضة يصعب تداركها قريبا)

- ما ينجح في دولة ليس بالضرورة ان ينجح في اخرى ، فنموذج الثورة المصرية التي انطلقت من الانترنت، كان هو المعيار الذي وضعه دعاة العصيان امامهم ، وهذا لا يعمل ، فشبكة الانترنت رديئة ومقيدة في معظم مناطق السودان كما ان الكثير من المواطنين العاديين لا يتعاملون بالانترنت، ولا يأخذونها مأخذ الجدية

- كثيرون من المشاركين في دعوة العصيان من فئة الشباب شاركوا ( كهواة سياسة) ، دون حماس حقيقي، وتعاملوا مع الانضمام لمجموعات العصيان على الفيسبوك تماما مثل الانضمام لمجموعات تشجيع كرة القدم او خلافها ( موضة العصيان - ان صح التعبير) وبالتالي عندما جاء وقت التنفيذ، لم يلتزموا بالمشاركة الفعلية ، لانهم ليسوا على دراية وقناعة كاملة بالفعل السياسي الذي يقدمون عليه ( فالدولة دمرت قطاع التعليم، وخلقت للشباب اهتمامات هامشية ، لا تنطبق عليهم معايير الوعي التي سادت في الاجيال السابقة ) وهذه حقيقة على المعارضة ان تدركها، ولا تأخذ فقط بنموذج مجموعات الناشطين الشباب.

- كانت دعوة العصيان فرصة للحكومة لتنشيط العمل الشعبي وسط قواعدها، فجمعت منسوبيها واقامت لهم لقاءات ( يوجد ترحيل بعد العرض ) ،ولم تلجأ لقطع الانترنت كما كان متوقعا ( او مثلما فعل نظام مبارك في مصر)


- المدافعون عن الحكومة على الانترنت كان خطابهم بائسا، بلغة عقيمة وشعارات مكررة، والعصيان لم يفشل بسبب ادارة الحكومة لخطة اعلامية على الانترنت ، بل لانه كسلاح لا يناسب الشارع السوداني والظروف السودانية الحالية.

- عدم مشاركة الناس في العصيان لا يعني انهم يحبون الحكومة، فشعبيتها في ادنى مستوياتها ان كانت لها شعبية بعد ان ضيقت على الناس في معاشهم اليومي

- اي دعوة لعصيان جديد ، ستظهر الامر على انه عبث، ولو كانت الحكومة ذكية فستنشر -هي- دعوة اخرى لاعتصام جديد.

- القائمة مفتوحة للاضافات

اخونا وائل
حقيقتين فقط أفضت بهما بوستاتك دي كلها
أولاً مهدّف، ونلت، إنك تستلم الجو بمناقشتك الفردية دي، وما قادر تلاحظ إنه ما في حدا متفق معاك ولو قليل
ثانياً ما تنظّر في أرض إنت ما بتعرف فيها حاجة: لأنه بيبفى طقش عمياني أو حديث تمنّي

تحليل النتائج ليس مسألة خبط عشواء تستشهد فيه بما لديك بغض النظر عن علاقته بالموضوع، وتغيير الكلمات لن يغير لك موضوع الحوار، فتقنية تقييم النتائج عملية علمية معمول بها في كل العالم "المتحضّر"، وبتترسم بيها رسومات بيانية وجداول تحكي الكثير وهي من وسائل بناء قصر أو قبر بدون مواد
نتيجة الخرطوم تحكي ما يكفي، أكيد النظام ما كان داير الخرطوم تتشلّ ويحتفل بباقي السودان أنه ما اتشلّ، هذا هو غذاء النتائج وهو ما يغذي الرأي العام العالمي (وما بيغذيه هذيان وأحلام جنود الظلام)
وأما تفكير التمني وأحلام اليقظة فهي تدعو للرثاء وليس الإستقراء
ومسيرة الميل تبدأ بخطوة، ولكنها تسمى مسيرة

اخونا وائل
حقيقتين فقط أفضت بهما بوستاتك دي كلها
أولاً مهدّف، ونلت، إنك تستلم الجو بمناقشتك الفردية دي، وما قادر تلاحظ إنه ما في حدا متفق معاك ولو قليل
ثانياً ما تنظّر في أرض إنت ما بتعرف فيها حاجة: لأنه بيبفى طقش عمياني أو حديث تمنّي

تحليل النتائج ليس مسألة خبط عشواء تستشهد فيه بما لديك بغض النظر عن علاقته بالموضوع، وتغيير الكلمات لن يغير لك موضوع الحوار، فتقنية تقييم النتائج عملية علمية معمول بها في كل العالم "المتحضّر"، وبتترسم بيها رسومات بيانية وجداول تحكي الكثير وهي من وسائل بناء قصر أو قبر بدون مواد
نتيجة الخرطوم تحكي ما يكفي، أكيد النظام ما كان داير الخرطوم تتشلّ ويحتفل بباقي السودان أنه ما اتشلّ، هذا هو غذاء النتائج وهو ما يغذي الرأي العام العالمي (وما بيغذيه هذيان وأحلام جنود الظلام)
وأما تفكير التمني وأحلام اليقظة فهي تدعو للرثاء وليس الإستقراء
ومسيرة الميل تبدأ بخطوة، ولكنها تسمى مسيرة

عزيزي وائل
العصيان المدني لا يسقط النظام بفعل السحر
ولكنه فعل تعبوي وتراكمي يؤدي الي ما تتحدث عنه
الان من عدم جدوى الممارسة
افتح الجرايد الحكومة وحتعرف المقياس اللي نحن استندنا عليهو في
مجابهة النظام
من السهل النقد ولكن العمل صعب
الشعب ليست لديه الامكانيات او التنظيم الكافي
لذا ما يحدث الان هو اننا نعيد ترتيب البيت الداخلي ورص الصفوف وجس النبض من اجل خطوات عمليه اوسع واشمل وليس الدخول في عصيانات فقط
كما اننا نثمن) المبادرات الفردية(
وهناك عمل تنظيمي لابد من الاحزاب لقيادته وليس اي احد اخر

مرحبا الاخ سعيد عدنان ..
- مانو القال ليك مافي زول متفق مع رايي؟ ، بالمفهوم دا كان مفروض السودانيين كلهم يكون قاعدين في بيوتهم يوم 19 امس .. لو انهم ما متفقين معاي وشايفين انو العصيان فعل مجدي ! لكن انت بتعاين للامور من منظارك الشخصي ، ودا رايك انت.
- قولك بتاع ( ما تنظر في ارض انت ما بتعرف فيها حاجة) ما مناسب انك تقولو ، ومعرفتي بالانا بتكلم عنو ما بتحددها انت ، اهو نتايج تنظيرك - انت وغيرك - في البتفهمو فيهو ظهرت امس وقبلها ، وخلت الانقاذ تحكم 27 سنة ولسه باين حتكم كتير، لانو بتحكم الارض الانت بتعرف فيها كل حاجة :)
- طيب وين النتائج العلمية وتحليلاتها الطلعت بيها من نتائج العصيان امس ؟ ورينا حاجة علمية ملموسة عشان نعرف نناقشك
- عن اي احلام يقظة تتحدث يا عزيزي ؟ انا طرحت راي ، وليس احلام .
- صحيح مسيرة الالف ميل تبدأ بخطوة ، ولكن لو الخطوة دي كانت في الاتجاه الغلط، فالمسيرة ما حتصل نهايتها التي تأملها.......

الاخ صادق مرغني ..
فعلا قد يكون العصيان فعل تراكمي زي ما قلت ، لكن بالنسبة لي يظل غير مجدي في السودان في الظروف الحالية

مهام ما بعدعصيان 19 ديسمبر الظافر.
التحية الإحترام لمجموعات الشباب، الطلاب، النساء و الناشطين في منظمات المجتمع المدني والأحزاب ممن تنادوا في وسائط التواصل الإجتماعي لتنفيذ عصيان نوفمبر في الايام 27-29 منه و عصيان يوم19 ديسمبر 2016م. الآثار المهمة للعصيان المدني تتلخص في الآتي:
اولاً:حرمان النظام الفاسد من جزء مهم من ريع الإيرادات المتحصلة من أكمال الإجراءات الحكومية في أيام العصيان المدني و بما أن النظام فاسد و مجرم و الجميع يعلمون أن معظم هذه الإيرادات تذهب لجيوب منتسيبي حزب المؤتمر الوطني الفاسد فسيخلق العصيان المدني مجموعة من الخاسرين في صفوف المؤتمر الوطني و إذا ظننا خيراً بالنظام الفاسد و أعوانه فإن هذه الإيرادات تذهب للصرف علي جهازي الأمن الرسمي والأمن الشعبي ( الربّاطة) و قوات الدعم السريع (الجنجويد) بذلك يكون الأثر مهماً فلقد حرمنا النظام المجرم من أموال مهمة يصرفها ليظل في الحكم.
ثانياً: إذا كان للنظام المجرم الفاسد من موارد مالية فلقد تسبب العصيان المدني في زيادة صرف النظام علي أجهزته الأمنية و كما اسلفت فهي جهاز الأمن الشعبي (الربّاطة) و جهاز الأمن الرسمي و الشرطة لأنجاز مجموعة من الممارسات العبثية الهادفة لأظهار العصيان بمظهر الفاشل و لا ننسي الصرف البذخي علي الجداد الإلكتروني و المنصرفات اللازمة لإنجاز مزيد من الإعتقالات و المراقبة و ما يتم صرفه علي ما يسمي بوضع الإجهزة الأمنية في حالة إستنفار تام. العصيان ينهك النظام المجرم مالياً و يستنزفه.
ثالثاً: فتح العصيان المدني باب توحيد قوي معارضة النظام علي مصراعيه حيث تسابقت كما شهدنا في الأيام الفائتة القوي السياسية السلمي منها و المسلح و منظمات المجتمع المدني و التكوينات الفئوية للمهنيين و الكتّاب، الصحفيين و الموسيقيين و الشعراء و الفنانيين التشكيليين و الدراميين. هذه الوحدة ضرورية من أجل أظهار ملامح البديل السياسي للنظام المجرم و هذا البديل هو ببساطة نحن و المقصود جميع الذين اقترحوا أو نظموا أو نشطوا في انجاح أو دعموا و ساندوا العصيان المدني. لقد توحدت المعارضة و تأكدت عزلة نظام السرّاق الفاسدين مجرمي الإسلام السياسي.
رابعاً: للعصيان المدني أثر غير مباشر علي المستوي الإقتصادي و ذلك بتقليل عمليات التداول في السوق المالي ( البورصة) و تقليل المداخيل من المعاملات المصرفية مما سيضعف إيرادات البنوك. و أثر آخر بتقليل قوة الشراء و البيع في الأسواق للبضائع و الخدمات. تقليل إيرادات شركات النقل و الترحيل و المواصلات العامة.
لقد ورد في آداب التصوف السوداني أثر مفاده أن الصبر هو ضُلّ النبي " الصَبُر ضُلّ النبي" يرافق الصبر الأنبياء مرافقة الظل لأحدنا. المطلوب الآن هو الصبر و مزيد من العصيان المدني إلي أن نجبر النظام علي التحلل و السقوط.مزيداً من العصيان لتجفيف موارد الدولة الفاشلة و الفاسدة من أموال تدرها رسوم المعاملات مزيداً من العصيان لتأكيد عزلة المؤتمر الوطني الحزب الفاسد و المجرم.مزيداً من العصيان لبناء البديل الحر الديمقراطي للنظام المجرم. فلتتواصل حملاتنا بالدعوة لمزيد من أيام العصيان المدني و للتواصل مساعينا لتوحيد القوي الداعية لتغيير النظام و اسقاطه و محاسبة رموزه و إسترداد الأموال التي نهبوها و حازوها فساداً و إفساداً. ببساطة يا كيزان الفورة مليون!

أخونا وائل
مرة أخرى مداخلتك السابقة تتلخص في "مانو القال ليك مافي زول متفق مع رايي؟ ، بالمفهوم دا كان مفروض السودانيين كلهم يكون قاعدين في بيوتهم يوم 19 امس .. لو انهم ما متفقين معاي وشايفين انو العصيان فعل مجدي ! لكن انت بتعاين للامور من منظارك الشخصي ، ودا رايك انت".
عدم قيام البعض بإضراب لا يعني أنه لم يقم، بل يعني ان الحكومة لم تنجح في منعه
وعدم قيام البعض بالإضراب لا يعني أنه لم ينجح: ولا بقاء البشير في الحكم معناه أنه لم يتأثر، فدخول الحمام ليس كالطلوع منه
وماعدا السرقة بليلٍ مثلما فعل البشير والأخوان باغتصاب السلطة، لاتتداول السلطة إلا بمجهود وصبر وزمن، سواءاً كانت بالثورة: كثورة فرنسا أو ثورة إيران، أو بالديمقراطية أي بنشر ومناقشة برنامج الإنتخاب حتى تقتنع الغالبية به
والدليل العلمي الذي تطلبه هو بين يديك ولكنك لا تراه لأنك لا تبصر والعلم نور: وعد الشعب بالعصيان فنجح، لم يعِد بعصيان 100%، وأما السند المعنوي فعالي جداً ويكاد يكون 100%
فالذي لا يعلم ..ينتظر,,,,,,,,, لحد ما يعلم....والا إيه أخي وائل؟

يا استاذ سعيد ، اختلافنا مش في مفهوم المقاومة والثورة ، قد يكون العصيان كاسلوب ناجح في ظروف مختلفة، وهو كذلك. لكن ما اريد قوله انا هو : العصيان المدني لن ينفع في السودان مع الحكومة الحالية. وانا في بداية هذا البوست قلت ما يلي :
(( دولة امنية لا يمكن التعامل معها باساليب النضال المدني من عصيان وخلافه. جلوس الناس في بيوتهم ليوم او يومين او اكثر لن يضر الحكومة القائمة الان – فعليا- قد يتضرر منه المعتصمون – تعطل مصالح، وتلقاها الحكومة فرصة للفصل والتشريد... وتصفية الحسابات.))

وائل سلامات

كونك شايف انو العصيان فشل عشان تدعم توقعاتك فدي قراءتك الشخصية ولا تخصنا بشيء
انظر الى وجه المنبر ستجد الكثير من البوستات التي تعكس مدى نجاح العصيان
قلتها لك في مداخلتي السابقة انه لا يوجد عاقل يفكر بان العصيان سيزيل الحكومة بين يوم وليلة
ولكنه كما افادك الزملاء فعل تراكمي وقد بدأ يحدث وهذه حقيقة لن تنكرها
هذا بالاضافة الى ان معيار نجاح العصيان بالنسبة لي هو قوة الاعلام التي اوصلته لدرجة
تحدث بعض القنوات العالمية عنه وصدور بيان من الخارجية الامريكية بما يحدث من حراك داخل السودان
هذا فضلاً عن الاسباب التي قادت الشعب لتبني مثل هذا النمط الجديد في المقاومة ضد هؤلاء المجرمين
وهذه الاسباب ذكرتها في مداخلتي الاولى وهي تدور حول الحوجة للتنظيم الذي فقده الشعب بعد
ان فكك هذا النظام بقيادة الترابي كل اتحاداته ونقاباته التي كانت تقوده وتحركه في رمش البصر

فيا وائل لن تستطيع فرض قرائتك على نتايج العصيان فليس المقياس بعدد المحلات المغلقة
وانما المقياس هل كان للعصيان صدىً واسع بين جماهير الشعب والحكومة والعالم
بالتأكيد الاجابة نعم

تحياتي

مرحبا هيثم ..
طبعا انا قلت رايي فقط ، ولا احاول فرضه على احد
وجود صدى للعصيان في الاعلام العالمي او بيانات الخارجية الامريكية لا يهمنا في شيء ، فاهتمام الاعلام العالمي لا يعني نجاح العصيان داخليا. كل يغني على ليلاه
اما بين الجماهير ، فالاستجابة كانت محدودة جدا جدا . انظر للحماس الذي كان في صفحة هذا الموقع قبل العصيان وانظر اليها اليوم ، ستكتشف الاحباط العام من الحاصل.
الاعلام مهم ، ولكن مشكلته انه سلاح ذو حدين ، والحصل في مسألة العصيان انه تم تضخيمه بصورة مبالغ فيها وتصويره على انه الخلاص من نظام الانقاذ.

لك التحية وائل ولضيوفك الكرام ..

اتمني يا وائل وقبل ما اخوض معاك في معركة
لاداعي لها ان اعرف رأيك هل انت مع الاغلبية
من الشعب ام انت مع الاقلية من الحكومة التي
وجب كنسها ؟

ولي عودة في الحالتين .

مرحبا يا منى..
معركة لي شنو ؟ :)
واحدة من مشاكلنا الاساسية في السودان يا منى هي التنميط : يعني نناقش الواحد بناء على توجهو السياسي او الجهوي او القبلي او ... الخ ونترك الفكرة او الموضوع .
في البوست دا يا منى ، انا قلت رايي حول اداة الاعتصام ، وذكرت الاسباب القادتني للراي دا
ممكن تناقشيني في فكرتي الطرحتها للنقاش، بعيدا عن مبدأ ( انت مع الشعب ام مع الحكومة ) ده، لانو ممكن يكون عندي راي زاتو في تصنيفك للناس الى شعب وحكومة ، المانع شنو؟

سلام يا وائل ..

اسمعني كلامي دا واضح ليك ولا لا؟
لانو ممكن يكون عندي راي زاتو في
تصنيفك للناس الى شعب وحكومة ، المانع شنو؟
انت مع منو مع الحكومة ولا المعارضين ليها ؟
افهمني زي ما داير لانه دا ما موضوعي ولا بهمني البهمني
اشوفك عشان اقدر ارد عليك ويمـــكن مــــا ارد برضـــــو
هل انت مع المظلومين العزل من اغلبيـــة الشعب ولا مــــع
الظالمين من قادة النظام المسلح ؟

بمعني آخر انت مع الظالم ولا المظلوم ؟
منتظرة ردك .

انا مع منو دا ما موضوع النقاش يا منى، لانو دا شي بخصني انا ، وما عندو علاقة بي موضوع النقاش
الناس القبلك في البوست كلهم قالو رايهم بوضوح في كلامي بدون ما يحتاجو يشخصنو النقاش
اسلوب انت مع الظالم وللا المظلوم دا ما بشتغل معاي ، للاسف

ما يحتاجو يشخصنو النقاش
عشان يعرف الجميع انت ما جدير بالحوار ولاقدر
الحوار ! من متين الانتماء السياسي كان شئ شخصي
ما بسأله عنه ؟ انا سالتك من حياتك الخاصة ؟ اهو
الناس كلها داخلة بانتماءاتها فقط الوطنية ناهيك عن
الحزبية ! ولو الانتماء السياسي شخصي قبل ما تفتح
هذا البوست ليه ما فتحت بوست ادنت فيه اعتقالات قادة
العمل السياسي ؟ ولا ديل عام وانت شخصي ؟! عمومآ
كنت اقل شئ اسمع منك حزبك الوطن ولا الوطنية لكن
عشان تعرف نفسك اعداء الشعب الكيزان هم ممكن يمكن
محاورتهم لكن امثالك المتضاري دا خجلان ولا خايف دا
هو المشكلة الاساسية في تقدم الوطن !!! عمومآ قبل ما
اقادر العصيان ما بسقط النظام فورآ والما طلعوا زيك
وبفتخر يا جبان يا مصلجي وما دايرة ليها اتنين تلاتة !!!!!
قول ما شئت ولكن في كل حرف تخطه يؤكد انك من انت
ومن اي صنف !

متابعة برضو .

كل اناء ينضح بما فيه يا منى.
شكرا على رايك

مرحبا هيثم ..
طبعا انا قلت رايي فقط ، ولا احاول فرضه على احد
وجود صدى للعصيان في الاعلام العالمي او بيانات الخارجية الامريكية لا يهمنا في شيء ، فاهتمام الاعلام العالمي لا يعني نجاح العصيان داخليا. كل يغني على ليلاه
---------
معقولة يا وائل بيانات الخارجية الامريكية وصدى العصيان في القنوات الفضائية العالمية ما يهمكم في شيء؟؟؟؟
اقرب مثال لنجاح دعوات العصيان وفوائد القنوات الاعلامية العالمية هو بيان الخارجية الامريكية
العلقت فيهو على كلام الزول الاشتر المجرم المتفلت الاسمو البشير
وتهديدو الواضح للشعب بالقتل في حالة الخروج في مظاهرات ضد نظامه البائس
يبقى الفائدة بعد دا كلو هي وضع هذا التهديد تحت مراقبة المجتمع الدولي ويومو التطلع مظاهرة يا وائل
والمجرمين ديل يطلقو فيها طلقة واحدة في المليان تشوف براك ردة الفعل من العالم كلو لأنو حا يعرف انو دا تنفيذ
للتهديد القبيل قالو العوقة البشير في كسلا عشان كدا يا وائل الاعلام العالمي يعمنا كتير
نحنا ما عندنا اعلام يتحدث عننا بصدق كل القنوات السودانية كاذبة وعنيلة للنظام بما فيها الصحف

دا كلللو وتقول لي الصدى الاعلامي العالمية وبيانات الخارجية الامريكية ما يهمنا في شي

اسع لو جبنا سيرة العقوبات تقولو هي السبب في الحاصل
البخلي دي تهمنا ودا ما يهمنا شنو

طبعا ضمير (نا) دا ما تفهم منو اني بتكلم باسم الحكومة يا هيثم :)
اشرح ليك النقطة دي بتفصيل:
الاعلام العالمي طبيعي انو يهتم باي حدث بمواصفات معينة ، لكن كونو الاعلام العالمي اهتم بحدث العصيان ، فدا ما معناهو العصيان نجح
ولاحظ انو جزء كبير من تغطية الاعلام العالمي للعصيان امس كانت بتتكلم عن ضعف الاستجابة ليهو ..
يعني الاعلام العالمي بتناول الحدث كحدث ، وتناولو لقضية محددة ليس دليلا على نجاحها او اهميتها _ ولا يجب ان يكون هدف العصيان هو الوصول للاعلام العالمي (كهدف في حد زاتو)
..
اما بالنسبة للخارجية الامريكية، فامريكا لديها اكبر سفارة في افريقيا بالخرطوم ، وتتعامل مع الحكومة في السر والعلن
ولم يفتح الله على امريكا باي موقف قوي حينما قتلت الحكومة المتظاهرين الابرياء في سبتمبر ، لذلك فبيانها عن العصيان مثل عدمه

صباح النصر القادم باذن الله والشعب .


كتب وائل !
لم ينجح العصيان في العمل - اتحدث عن مشاهداتي الشخصية
، الحياة كانت عادية ولم تتعطل اي من المرافق عن العمل
مع العلم وائل بتكلم عن الاقضائية وحرية الرأي والحاجات الشخصية !
طيب يا وائل وقت العصيان فشل ولم ينجح هل نثق في كلامك فقط ونشك
في كلام شاهد من اهلها زي المسلمي الذي يعرف بانه امنجي وهو لم ينكر
ذلك وفتح بوست بهذا الخصوص واكد فيه نجاح العصيان بنسبة تفوق
الخمسين في المائة . ناهيك الثور الجاتنا دي والصور معروفة لاتكذب هل
برضو يا تري في نظرك مصدر شك واضيف اتصل بنفسي علي اقاربي
في الخرطوم ويعتبر اطول شارع فاكدوا لي بانه هذا الشارع كما يروه
نسبة العصيان فيه 80% والله علي ما اقول شهيد . هل نكذب كل هذه الادلة
ونثق فقط في كلامك ؟ الم تكن هذه الاقصائية بعيناها وان تمارسها ؟
واحد في الاتنين يا انت كذاب يا المسلمي الموالي للحكومة والصور واقاربي
كذابين اختار . سالتك بالله العظيم تحسب لي المناطق الاتجولت فيها بالضبط
وريني التحرك كان كيف ؟

ولي عودة .

مرحبا يا منى
خليك من الصور والشوارع الفاضية يا منى ، لانو دي ما نسبة قياس حقيقية ، وفي صور كتيرة بتوضح ذات الشوارع في اوقات تانية من نفس اليوم مليانة بالحركة.. وبرضو الصور ما بتكذب
هل في زول قال انو واجه مشكلة في عمل اجراء او معاملة او شراء سلعة او اي خدمة في يوم العصيان؟ انا سألت السؤال دا فوق ، ومافي زول حيقول ايوه، لانو ببساطة ما حصل يا عزيزتي.
معناها منظومة العمل كانت تعمل بصورة عادية
بالنسبة لسؤالك، انا مشيت من بحري الى امدرمان الملازمين ، ثم الى بحري، ومنها للخرطوم ثم الرياض ، وانجزت كل الاغراض الاتحركت عشانها ، ما في حاجة متعطلة والله ، وما لاحظت اي حاجة غير طبيعية.
وكمان حركتي صورتها ( صور وفيديو) ، بس للتوثيق، لكن ما نزلتها لاني ما بعتبرها مقياس ذو قيمة
وممكن انزل ليك الفيديو او الصور ، وحتلاحظي الحركة العادية وحتى الزحام الحاصل.
..
خلاصة الموضوع : العصيان المدني لا يجدي في السودان الذي نعرفه ونعيش فيه.. ولا يجدي مع الحكومة التي نراها

"- عدم مشاركة الناس في العصيان لا يعني انهم يحبون الحكومة، فشعبيتها في ادنى مستوياتها ان كانت لها شعبية بعد ان ضيقت على الناس في معاشهم اليومي"

أخي وائل، إن النقطة التي أوردتها أعلاه هي مصدر الخطر وهي تحوّر الجين P53 الذي يؤدي إلى السرطان. عندما يتوقف الناس عن حب الحكومة (بغض النظر عن درجة هذا الحب)، وعندما تتحول الحكومة من إدارة شؤون الشعب إلى قاهرة ومستعمرة وعدوة لهم، يصبح الحال كما تبدى يوم 19 ديسمبر: المعتصمون (في خانة الواقع الفعلي) والحكومة (في خانة صناعة السينما). في الواقع الفعلي تجري الأمور بطبيعتها دون أي تكلفة إضافية؛ بينما في صناعة السينما كل شيء مكلف فحتى الكومبارس يجب أن تدفع لهم. انظر كيف اقتصر دور دعاة الاعتصام على الإبلاغ والحث والتشجيع؛ بينما اضطرت الحكومة إلى التهديد والحشد مدفوع الثمن وفبركة صور حركة السير وتحفيز الأقلام والكيبوردات واعتقال بعض قادة الطرف الآخر... كل هذا الجهد المكلف لإيقاف كرة الثلج المتدحرجة.
نقطة التحول الخطيرة كذلك، تكمن في ضرورة التأقلم مع انعدام الشعبية الحقيقية التي أصبحت واضحة وفي طريقها لأن تلحق بالفساد (الذي أصبح على عينك يا تاجر)، فهل ستسير الأمور مستقبلا تحت شعار (إنما يأسى على الحب النساء) وتصبح محاولات الإيهام بالجماهيرية والشعبية التي كانت تتم من قبل المختصين، على العلن مثلما حدث في كسلا ومدني؟ هل سنصل إلى مرحلة أن تقدم للمسؤول قائمة بأصناف الجماهير التي يفضل أن تكون في استقباله أو يخطب أمامها، لينتقي منها حسب المزاج (وكلو بثمنه)؟! سمعنا بمشجعي الرياضة الذين يدفع لهم من أجل مؤازرة الفريق، فهل سنسمع بالجماهير التي يدفع لها من أجل السماع (وليس الاستماع) لحديث المسؤول؟

سلام يا وائل .


اعتبر اني صدقت فيما قلته وكذبت كل الادلة والبراهين .
خلاصة الموضوع : العصيان المدني لا يجدي في السودان
الذي نعرفه ونعيش فيه.. ولا يجدي مع الحكومة التي نراها
طيب يا وائل نحن اسه تحت وطآة حكم فاشي نازي من القتلة واللصوص
ماهي اقتراحاتك لازالة هذا النظام وباسرع ما يمكن لانقاذ الوطن المنكوب
هل لك من مقترحات لانقاذ وطنك لكي نتبعها وانت كما اوضحت بداخله ؟

ولك الشكر .

مرحبا استاذ محمد الامين..
الفساد وانعدام الفعالية واضح لدى الحكومة الحالية. المشكلة ايضا في ادوات المعارضة التي لا تلائم الواقع..(وربما تلجأ لنفس اساليب الحكومة لتمرير ما تريد)
اما الجماهير المستأجرة للخطابات السياسية ، فهي ظاهرة موجودة الان، حتى وان لم يدفع لهم اموال ، فتقدم للعامة منهم المغريات من ترحيل ووجبات وغيرها، وتقدم لمن يحشدهم المعلوم. هذه ممارسة موجودة فعليا.

عدم مشاركة الناس في العصيان لا يعني انهم يحبون الحكومة، فشعبيتها في ادنى مستوياتها ان كانت لها شعبية بعد ان ضيقت على الناس في معاشهم اليومي .