Post: #1
Title: مسدار العصيان: اليوم الموعود 19 ديسمبر 2016 يوم شباب السودان الفحول
Author: سيف الدين بابكر
Date: 12-11-2016, 07:34 PM
Parent: #0
06:34 PM December, 11 2016 سودانيز اون لاين
سيف الدين بابكر-السعودية - الرياض
مكتبتى
رابط مختصر
الليلة آآ بلد جيتك محزم وكارب ومخلاية غناي ماليها جن ..جن وعقارب
وحاتك يا با يا بعز الفتلت شوارب ات عارفني من زمن الدراسة مشغاب
****
الليلة آآ بلد ليك الرويحة هديتها وقدااام الخطر شلتها وختيتها
سكيني البتمرق كل يوم من بيتها تحرم يا با الليلة أكان صديتها
يا الولد البتنتح في الموادع وسوقها بقت أحلامنا عند الكاكي تهف مخنوقة
الدُرناها من خشم الأسد بنضوقها والناباها بخيط الوجع بنسوقها
****
بقت الحكومة زي القماش مهرودة تراه رئيسها انبوبة هواء ومقدودة
أحلامنا آآ شباب الكان مخدر عودها الليلة تب زردوها ليك بالبودة
*****
يا ريسنا يا ريسنا كان فكرت سهلت الوظيفة قبيل ما كنا اغتربنا وضقنا عيشة الويل
ما دام انت الشباب لا وزن لا كيل لا بقيموك لا ببقوا جمل الشيل
***********
تراه شبابنا قاعد عطال عزابة لا حق عرس لا قهوة لا ركابة
بعد ما كانت الحرية فينا مهابة اسع شارع الموت وشارع الغابة
**********
بكلمة حوار أوعاك لا يغشوك ... ديل أهل النفاق بمالنا سووا بنوكا
العقول الشاذة من زمااان مدكوكة اللي الأباها القلب قالوا اللسان ما بلوكها
************
إن عندك واسطة من غير جناح بتطير وإن خاتيها يا الهاجرت ما بتسير
الوجع البكاتل في شبابنا كتير انغشينا يوم قلنا سير يا بشير
وشبابنا الطفش بالبحر والبر كان فحول وسكينهم بتشرط كرررر
عايشين أسر شالين هموم بالجر ... معليش يا ضراع راكب الصعاب مضطر
*****
يا المغترب عندي ليك وصية...أوع الرجوع بقت البلد فقرية
الألف الزمان الكان بجيبلو وقية ...الليلة آ جني كان طار بجيبك طعمية
*****
ما ليّ آمنة ما ليّ آمنة التقول معها شوطن ...وضراعتنا المخدرة يا المحوجرة عضن
اساتك الوجع الفي الضمير بنمطن العلينا صوتن مالن بقن ما بوطن
*****
لا قريت جامعة ولا مسكت شهادة ... إلا المخ البشغل والضراع جبادة
الحفرة البتزلق كل مصيبة قصادة والدابي البتنال عندي قلادة
*****
كرعينا آ ولد من المحن انقدن إلا (أفكارنا حية) بصبرنا بيودن
الخلا الهموم جوه الفؤاد ينشقن بلد المك نمر قادوها لينا كوزن
****
أنا في الشعر صقر وما ني حدية والرقبة المزرقنة فيها طابق الكية
وحات المرق المصايب رية لا برجع وراء لا يوم بسوي النيبة
مسدار العصيان
محمد سليمان ود الرفاعي
|
|