العصيان حا يفشل

11:32 AM December, 11 2016

سودانيز اون لاين
ناصر جامع-
مكتبتى
رابط مختصر

الا اذا كان مستدام حتي سقوط النظام

اعتصام يوم يومين ما ينفع
مافي زول شغال في مؤسسة حكومية، يعتصم يوم يومين و يرجع شغلوا عادي بدون عقاب و محاسبة
و مافي زول عندو مسؤوليات وأطفال عايز يربيهم و جاري ورا أرزاقهم يدخل رهان زي دا

الحل:
الاعلان عن إعتصام دائم حتي سقوط النظام
و يتم الترتيب له قبل فترة كافية عشان الناس ترتب امورها

كدا الواحد ممكن يقامر علي امل زوال النظام
هذه حالة كلاسيكية تعرف ب معضلة السجين "prisoner's dilemma" و هي باب من ابواب ال game theory
طبيعة الانسان دائما هي حساب الربح و الخسارة
تعتصم يوم و ترجع بكره لي مديرك في العمل، اللي هو في غالب الاحوال كوز عشان يذلك، انت كدا خسران خسران، و مافي زول يمشي للخسارة بي كرعيهو
لكن لو كان الغرض و الهدف المعلن هو زوال النظام، و نجح اليوم الاول نجاح معقول، سوف يتشجع المترددون للاعتصام في الايام التالية، و يزداد المعتصمون يوما بعد يوم حتي يتحول الي سيل جارف يلقي بالانقاذ و نظام الكيزان في مزبلة التاريخ

كلام عقل اخ ناصر
فعلا سألت السؤال ده: ثم ماذا بعد يوم 19؟

Quote: العصيان حا يفشل

خليه يفشل..... وين المشكلة ..
غايتو جنس تنظير وعوارات وعبط ...
قال حا يفشل ..خلاص يا ابو التحليل الدولي ...
لو فشل تاني حا نخلق حاجة تزعزع دين اهل الكيزان ...وما حا نستسلم للتنظير الساذج بتاعك دا ...
انت وقت بتعرف قدر دا ما تمشي تلحق جماعتك بي هناك
غايتو جنس محن ...
الزعلة دي كلها عشان العنوان .يا اخي اكتب عنوان محفز مش العصيان حا يفشل عشان تزداد قراية موضوعك ..
عبط ثم هبل ..

عزيزي الفاضل ناصر جامع..
والله العنوان بيفقع المرارة...وانا بقترح
تضيف في العنوان كلمة واحدة...وهي كلمة.." الا اذا....."
لانه بصراحة العنوان محبط للهمم...
واي واحد يقرا العنوان وكان عنده نية يشارك في العصيان
حيتردد...ونرجو تعديل العنوان ليتماشى مع حرص الناس لانجاح
العصيان المدني...
واضافة اخرى...بان الناس ما حتشارك في العصيان يوم ١٩ ديسمبر
عشان متوقعة تشوف حكومة جديدة يوم ٢٠ ديسمبر...ولكن تاكد
ان نجاح العصيان المدني بنسبة .٩٠ في الميه يعني بلا شك سقوط
نظام الحرامية واللصوص في ظرف وجيز جدا...لن تتخيله ابدا..
لان خطوة العصيان المدني ستتبعه خطوات اخرى مؤلمة ستجعل
نظام اللصوص والحرامية ينهار ...
عدل العنوان..
والله يديك الصحة والعافية

شوف يا ناصر مافي حاجة اسمها فشل في مقاومة الطغيان

اي خطوة ...اي يافطة...اي هتاف يهز الطاغية وعصابته

المهم هو كسر حاجز الخوف

ودا تم كسرو تماما في نجاح عصيان الايام الثلاثة

والاهم من دا كلو...انو شباب العصيان ديل هم من يملك الحدث/الفعل الان...

.والنظام لاول مرة في تاريخه يكون في خانة "رد الفعل" وانتظار الفعل...ولذلك مسالة سقوط النظام اصبحت مسالة وقت ليس الا

الزعلة دي كلها عشان العنوان .يا اخي اكتب عنوان محفز مش العصيان حا يفشل عشان تزداد قراية موضوعك ..
هههههههههههه
تصدق و تآمن بالله انا فعلا كاتب العنوان دا عشان زيادة قراية الموضوع، اهو جاب سيادتك
ياخ شكرا علي المرور بس سيب الكلام الفارغ بتاع جماعتك و ما جماعتك

كلام عقل اخ ناصر فعلا سألت السؤال ده: ثم ماذا بعد يوم 19؟
محجوب كيفك يا حبيب
اوعي تغلط و تسأل تاني حا يطلعوك مع الخيانة

وما حا نستسلم للتنظير الساذج بتاعك دا ...
يا علي ياخ ما تتكلم ساي
تنظيري دا ما ساذج
دا تنظير متعوب عليهو و الله
ياخ اتصلح معانا شوية

اديلو
وبالحتة الفيها الحديدة كمان


يستاهل الكوز

قال حا يفشل قال



والله انا مبسوط حلاة بسطة

والله انا مبسوط حلاة بسطة


جاكم ورجاغغغغغغغغغغغ

اميرة السيد يا هلا و الف مرحب بيك
عدل العنوان.. والله يديك الصحة والعافية
يا اميرة لو عدلتو باقي ليك ناس علي دفع الله ديل بهببو لي
ياخ ديل بي اخوي و اخوك كدا ساي ما بجو، الا يزعلوهم و ينرفزوهم
واي واحد يقرا العنوان وكان عنده نية يشارك في العصيان حيتردد
ابدا يا اميرة، مافي زول حا يغير رايو عشان عنوان بوست في سودانيزاونلاين

سودانيزاونلاين ما مركز الكون، دى واحدة

الناس بتخاف من المجهول....اها لو اعتصمت الليلة، بكره حا يحصل شنو؟ خصم يوم من الماهية و لا رفدية؟

البوست عشان المرة الجاية الدعوة تكون لي عصيان مفتوح، و الهدف يكون اسقاط النظام

رايك شنوا يا علي دفع الله في التنظير دا

اديلو وبالحتة الفيها الحديدة كمان

يستاهل الكوز

قال حا يفشل قال
هههههههههههههههههههه
و الله يا الشفيع ضحكت جنس ضحك
الحجة عاينت لي كدا قالت لي في شنو

الأخ ناصركلنا يعرف من انت،
لكن العنوان ذي ما قالت الأميرة فاقع للمرارة
ولأن هنالك من ليس لهم وقت أو صبر ليقرأوا محتوى بالبوستات ويكتفون بالعناوين فقط
وهنا تكون قد أوصلت رسالة ما قصدتها أبداً
أخي الظرف ظرف حساس
عشان كدا أنا بحاول مع نفسي ممارسة أكبر قدر من الإنضباط في كتابتي
واضح انك كنت عاوز توصل رسالتك لأكبر عدد
لكن أحياناً الوسيلة بتكون أخطر من الغاية
تمنياتي لو غيرت العنوان يا حبيب

جاكم ورجاغغغغغغغغغغغ
------------------------

اخونا الزماااان

حتى انت يا بروتس
والله كنت قايلك افهم من كده، وبتقرأ كلمة اعتصام مظبوط


من ما غيرت يوسرك، كورتك فكت وبقيت تجليها واقفة
الدوام لله

يا مراحب يا عبدالصمد
تمنياتي لو غيرت العنوان يا حبيب
هسي يا عبدالصمد، علي دفع الله دا لو احترم الناس و اتكلم بي طريقة راقية كدا، كان الله حاسبو؟
بي خصوص تغير العنوان كدي شوف تنظيري الفوق للاخت اميرة

مراحب يا Hatim Alhwary
اتفق معاك 100%

.............سلام أخ ناصر
العصيان المدني كخيار (وأسلوب وأداة) مجربة نجح تماما ـ نجح تماما في 27 نوفمبر الماضي وأثبت قدرة الشعب علي التحدي والمقاومة والفعل وقوة الإرادة وأظهر ضعف النظام وقلة حيلته أمام هذا الإسلوب ــ (بعض ضرب النقابات وتنظيمات المجتمع المدني وتصفية الخدمة المدنية والنظامية والإستعداد لقتل المتظاهريين في الشوارع) أضحي للشعب سلاحا ناجعا ولايمكن نزعه وهو العصيان
* هذا السلاح سيتخدمه الشعب عند اللزوم وفي اللحظة المناسب للتخلص من جلاده وكسر قيده ـ ويعي الشعب المعلم أن اللحظة الثورية قد تفرز منطقها وخيارات أخري يتوجها العصيان المدني ! أي تطبيقات أخري محكومة بسياقها وظرفها ومعطياتها ـ قد تحقق قدرا من النجاح والتجاوب أو العزوف وقصور الإستجابة أو عدم ديمومتها ولكن سيبقي العصيان سلاح ناجح وناجع عند اللزوم وفي اللحظة الثورية الحاسمة ! * من المفهوم يا أخ نا صر أن يتناول الحادبون أمر العصيان بغرض تفعيله أو بغية الحصول علي نتائج إيجابية ـ من المفهوم أن يتناقش في أمر العصيان كل حريص علي ذهاب النظام وإعتقد أنك من ضمن هولاء
* ولكن العصيان كفكرة وتجربة هزت كوادر النظام الخفية والمعلنة ويبقي هدفهم هو وأد الفكرة والتشكيك في جدواها بل ورفضها من حيث المبدأ ـ تتنوع مواقع هولاء . من أقصي مواقع الثورية والرفض الي الحيدة والوطنية المجردة ولكن تبقي الحقيقة :-
((أننا عشنا زمنا كان أكثر دعاة الثورية والكفاح المسلح ومعاداة الإنقاذ ـ يوزعون صكوك الوطنية لمن يتفق معهم وسندات التخويين لمن يعارضهم ويقومون بالمزائدة علي الآخريين ! ثم إنتهي الحال لنجدهم في أحضان النظام ومن المدافعيين عنه ! الوزير حسن إسماعيل نموذجا وللأسافيير نماذجها ! هل صدمنا وقتها ؟ لا لم نصدم لأننا لم نراهن علي هولاء و وكنا نحس بالحقيقة!
** وليس من المستغرب أن يظهر مثل هذا من بعض دعاة الإستنارة وسدنة الديموقراطية و بعض المغاليين في دعم الحركات المسلحة وعبر إمتطاء موجة الإلحاد والعلمانية والعداء العدمي للأديان! ويقوم كل بدوره من موقعه ا لمختلف! الحقيقة أن الخطورة لاتكمن في أصحاب الأدوار المشبوهة وإنما فيمن يطبل ويبرر لهم ويدافع عنهم ويمجدهم " وينخم" بخطابهم ويروج له بسذاجة متناهية ــ ليس كل مايلمع دهبا ولتحسبوا الشحم فيمن شحمه ورما!! .............

سلامات ناصر

برصد بسيط وسريع لردة فعل الحكومة قبل بداية العصيان الذي نشر الرعب في النظام
وظهر مرتبكا وفاقدا للبوصله ... هذي أولي إشارات نجاح الخطوة قبل تطبيقها
وعصيان 19ديسمبر ليس هو الضربة القاضية وليس من أهدافه إسقاط النظام في 20ديسمبر2016
عشان من المبكر والتعجل الحكم بفشله
كافة الدلائل تشير الي نجاح كبير لحركة العصيان المدني وستعقب هذه الحركة كثير من الخطوات التصعيديه
طالما هذا الأمر ينشر الرعب في قلوب قيادات النظام فهي خطوة في الإتجاه الصحيح ويجب أن يتم تنظيمه بصورة أوسع
المكسب الأكبر يا ناصر أن الشعب السوداني إستعاد قدرته علي العمل الجماعي وكثير من الأصوات التي لم تتاح لها فرصة الإحتجاج
وجدت في العصيان طريق للرفض .... عشان من الصعب أن يحكم عليه بالفشل

تحياتي

سلام يا ناصر

خروج البشير اليوم فى كسلا عن النص دليل واضح جدا على نجاح العصيان

امثلة على نجاخ العصيان
الحضور الهزيل والمخجل للقاء البشير في الساحة الخضراء
طرد والي الجزيرة من عزاء فداسي
هتاف الحضور ضد الانقاذ في احتفال التخريج الاخير وبحضور راس النظام
الدعوة لعصيان 19 ديسمبر
امثلة فقط