يــــا مــوصلـــي هل ممكن؟

08:37 AM December, 11 2016

سودانيز اون لاين
د.محمد حسن-
مكتبتى
رابط مختصر

هل ممكن تلحن النص ده؟



هتافاتا كما زغرودة الفجر
صباحاتك بشارات الامل والفال
يا بلد العديل والصح
جنياتك
عشا البايتات
كتوفا ليك متراصة
ايادي ليك متشابكة
عشان تحلق تجز
دقن الفساد وضلال
خلاص نجضت
وما بنديها لي طيرا بعد
لبن حشاها هدير
صباحاتك
سنى الفجر المخرف يوت
سحاباتا ملانة الخير
غماما ليك اتراكم
تقيل ومطير
خلاص
وقفت صفوف اولادك الصابرين
علي ضيم الاضاعو الدين
وخلو بلدنا غرقان دين
يا عثمان
يا فتحي
ويا زهرة
ونجم الدين
ياحاج الفضل ما تخاف
ويا باشكاتب الدولة
اعصى ووكل ربك الشواف
كمان يا ظابط التمنة
الفي الحلة ديل اعمامك
الشالوك زمن جهلك
وديل خالاتك اليوم فرحتك
كانت زغاريدهم تشق الكون
يا الدياشي خليك واعي ديل ناسك
صحاب الشلة والفرقان
اوع تخون
يا فتحية ما تمشي
تخافي كمان من الرفدية
نحن خلاص وقفنا ترس
بلدنا نشيلها زندية
صباحاتك صباحات فال
عشان كرامة غالية ما بتنداس
نثور بي صمت
نعلم كل شعوب الدنيا اننا ناس
من زمن تهراقا ما هينين
تاريخا كما فلق الصباح باين
ونيلا بحكي عن روعة بطولاتنا
وشعبا للعروض صاين
والثورة انطلقت
كل الاناشيد ليك يا اجمل وطن
كل الكلام ثورة
وكل الشعور ثورة
وانتهى العهد الفساد
والضياع كان التمن
صباح الخير والثورة
صباح الفال
خلاص ولى
زمن تلك الدقون وضلال

فوق

شكرا يا دكتور النص جميل جدا
يحتاج لي شغل موضب

ةيشرفني جدا كغنان مواطن ومواطن فنان
انا داخل الاستديو بعد يومين
لتنفيذ عمل صغير يلحق العصيان
اسمو ياجمرة يامعصوبة العينين وبتشوفي
تحياتي وباذن الله نبقى عشرة

موفق يا انسان يا وطن

تسلم حبيبنا د محمد