أفكار للثوار

08:33 AM December, 09 2016

سودانيز اون لاين
عليش الريدة-
مكتبتى
رابط مختصر

اعتذر مبدئيا عن الرد على المداخلات إن حدثت..
أود طرح اقتراحات محددة على من يتولون إدارة الكفاح المدني الميداني ..
اكتب في هذا البوست بالطريقة المعهودة ــــ رزق اليوم باليوم ـــــ لذلك لن تكون الأفكار بالترتيب المرجو..
كل من لديه فكرة عملية وبسيطة وقابلة للتنفيذ ،أكون شاكرا له لو أنزلها في هذا البوست..
نأمل في أن تصل هذه الأفكار بطريقة أو أخرى للمعنيين وتجد حظها من النقاش قبولا ورفضا..

قناعتي الأساسية أن النظام الحاكم يمتاز بالمكر الشديد وليس لديه خطوط حمراء..
أعني يجب أن نضع في اعتبارنا أن هناك ورش ضخمة معقودة الان لإفشال وضرب وتمزيق كل التحركات
الجارية،ولن يستقبح القائمون عليها أي وسيلة توصلهم لغايتهم..

نخش في الموضوع

الشعار
مهم جدا يكون في شعار محدد للعصيان المدني (كلمة ومظهر) ، الشعارات بتدي دافع كبير جدا لمسألة النضال،
وأقترح كلمة أو جملة محددة عدائية أو وسطية أو سلمية (حسب اتفاق المعنيين)..
واقترح أيضا زي بلون محدد ،وطالما هم شباب ممكن تكون فنيلة بلون أسود مثلا عشان تكون ظاهرة، مكتوب عليها كلمة الشعار بالأبيض،
المغتربين ممكن يساهموا في الدعم المادي لعمل الفنائل (إن شاء الله من الدموية)..وتتوزع بطريقة آمنة..
الشعار دا لونجح بعد شوية ح يتكتب في الحافلات والركشات وأغاني البنات ....إلخ
لحدي مايصبح أيقونة وبجنّد تلقائيا ناس تانيين..

شكرا أخ عليش

الشعار كلما كان ممكن تمثيله حركيا افضل

مثل اليد المقبوضة

لأنه لو تعذر كتابته في مكان او اظهاره يسهل التأشير به

مع التحية

زي موحد أسود كيف وهم قاعدين في بيوتهم
هم أصلهم حادّين ولّ (حلفاوِين)

اعتذر مبدئيا عن الرد على المداخلات إن حدثت..
ــــــــــــــــــــــــــــــــــــــــــــــــــــ

عدا مداخلتي احمد ومعاوية ههه

مشكور الأخ أحمد على المرور والإضافة المفيدة..

مرحب يا معاوية..
حسب فهمي الاعتصام والعصيان دي مرحلة محددة ولها مابعدها..
ح تتطور أكيد لي مراحل وحاجات تانية حامياني..والمعركة طويلة جدا..
الشعار بكون لامي كل المراحل دي..إت قايل الكيزان ديل حساسيين لدرجة إنو يشتتوا من الاعتصام بس..

*وييين صاحبك المستنير،أضربليهو رضيهو ،خلو اليجي تاني..مالاقين زول نتلادح معاهو الأيام دي..

عليش ..حبابك يا صديق
واعفي لينا المشاترة هنا ، من كل النبيح والنواح في هذا المنبر ، وجدت نفسي انحاز لصوتك هنا ، فقط بمظنة ان من جاب احراش السودان في الليالي المظلمة والنهارات القميئة ، واللحظات الحزن ، واللحظات الفرح ، واللحظات الإنكسار ، واللحظات الإنتصار ، واللحظات الهزيمة ، واللحظات التأريخ ، وكل اللحظات التي اعرف ان خيالك يستطيع ان يستولدها ويكتبها (حتى و لو لنفسه وذاته)..مثل هذا الفرد يحق له ان يتحدث ، وليتهم يا صديقي يدركون معنى الحديث وقيمته ومراميه..!!
ويا معاوية الزبير ، خلينا نجيك برندوك المثقافتية بتاعين الصوالين والحناكيش.. فهل تستطيع ان تنكر انك لا تقرأ اشعار امل دنقل وتجربته الشعرية الفالتة في تاريخ الإنسانية؟..
لمن كان دكتور الشوش (السوداني الواحد ده ) رئيس تحرير مجلة الدوحة طيبة الذكر ، كتب امل اخر قصائده ونشرها في مجلة الدوحة ، مجلة دكتور الشوش، وهي مراثي لأمل دنقل ، قبل ان تكون مراثي لحال جغرافية حضارية وثقافية..!
يا معاوية..
لون تاج الحكيمات ابيض..!!
لا ادري يا معاوية من اين جئت بان لون الحزن والحداد اسود ، ونحن حبوباتنا وامهاتنا ..في شهور الحزن (الحبس) بيلبسن توب الدمورية الأبيض..!!
بالطبع الترميز كان قاسي في اختيار الدمورية ، لأنو ده القماش الوحيد الكان انتاج سوداني خالص ، ولكن مع ذلك ، ثقافتنا يا حبيب الحزن فيها أبيض ، حتى نثبت اننا لا ننخضع بالترميز التضليلي الذي يريد ان يفرضه علينا الآخر الحضاري..كفاية الماكدونالد (هل تصدق يا معاوية قوس الماكدونالد الذهبي صممه مهندس سوداني..!!!!!!!!!!!!)..
ياخي قطعة قماش بيضة مربعة شارة على الصدر / معناها السلام والقوة والرفعة والحزن العميق والكرامة..والإصرار على يوم باكر..!!..فوكا حاجة يعني..!!
النظام ماكر يا عليش ، والتجربة السابقة بتاعة نوفمبر ، النظام دفع فيها مبالغ باهظة ليخلق عصيان مدني ، وح يدفع المبالغ الباهظة لأجل افشال التجارب القادمة ، وسوف يجلب جنده من كل الحوافي ، وسوف يتلب على الناس في بيوتها ، وسوف يستجلب خلق يضعها في مؤسساته بصورة مشوهة حتى يقول للدنيا ان المؤسسات شغالة زي الترتيب..واشغال كتيرة يا صديقي النظام ممكن يفعلها في سبيل أن يحقق انتصاره الأخير..!!
ولكن..!
عشان تهزم عدو ، اول حاجة مفروض تعرف العدو ده هو شنو وبيفكر كيف ، مش بالعاطفة والغبينة والزعل البايت..لمن تعرف الحقائق دي ممكن تعمل حاجة وحاجة كبيرة..!!
الأفكار موجودة يا صاحب ، وممكن تحل مشكلة السودان وارتريا واثيوبيا ومصر وتشاد وجنوب السودان وافريقيا الوسطى والكنغو.. لأنو لو ما قاعد تفكر في المحيط حولك ما ح تقدر تحقق انتصار ، والإ ح تعيد انتاج الأزمة زي الترتيب..!!
ولكن لمن نقول بالأفكار ، ونحن نحيا في محيط عاطفي اهوج عطل خصلة العقل والتفكير؟..
وسنندفع معهم بنفس منطقهم العاطفي ونقول: نعم للعصيان المدني ، حتى يكتمل الشوط الى نهايته ، عشان كل قرد يطلع شدرتو..!!
دمتم..
كبر

Quote: .كفاية الماكدونالد (هل تصدق يا معاوية قوس الماكدونالد الذهبي صممه مهندس سوداني..!!!!!!!!!!!!)..

يا زول انت جادي في الكلام ده

Quote: ويا معاوية الزبير ، خلينا نجيك برندوك المثقافتية بتاعين الصوالين والحناكيش.. فهل تستطيع ان تنكر انك لا تقرأ اشعار امل دنقل وتجربته الشعرية الفالتة في تاريخ الإنسانية؟..

كيف يا كبر ما قريتو! وكمان يوم بكاهو بكيناهو في شقة زميلنا معاوية أبو الجاز وهو (معاوية) يتلو لنا من أشعاره (أمل)
مرثيته لنفسه في (أوراق الغرفة 8) التي قالت عنها أرملته عبلة الرويني إنها (غرفة الاحتضار) كانت: "اول بيت حقيقي لنا.. "
وفعلا لا أظنه في حياته استقر في مكان أكثر استقرارا من تلك الغرفة، بكيناهو والله في يوم إعلان وفاته وكنا في شقة أبو الجاز في الزقازيق
و دم الجنوبي الهزيل (كلاهما: الدم والرجل أعني بالهزيل) لم يجف بعد،
قال ليك:

Quote: كلُّ هذا البياضِ يذكِّرني بالكَفَنْ! فلماذا إذا متُّ.. يأتي المعزونَ مُتَّشِحينَ.. بشاراتِ لونِ الحِدادْ؟ هل لأنَّ السوادْ.. هو لونُ النجاة من الموتِ, لونُ التميمةِ ضدّ.. الزمنْ, *** ضِدُّ منْ..؟ ومتى القلبُ -في الخَفَقَانِ- اطْمأَنْ ؟

لكن يا صديقي -يا عدو أصدقائي الما شيوعيين للأسف (للأسف مرتين.. فاهمني؟)- كنت قاصد أمارس مع ود الريدة دا مساخة أهلي الرباطاب
التي لم تدجنها المدن ولا حنكشة الشيوعيين
الحقيقة في هذا الجو الملغَّم كنت أتوقع مداخلة من حلفاوي، يقول لي يا عنصري، تصدّق!
ترى لماذا يتشح أهلنا النوبيون بالسواد وهم يجلسون على العتبات الخارجية لمنازلهم المستعارة
أحزناً على منازلهم المضاعة؟!

مشكورين كبر والفاتح ..

عشان تهزم عدو ، اول حاجة مفروض تعرف العدو ده هو شنو وبيفكر كيف ،
ــــــــــــــــــــــــــــــــــــ
دي أهم نقطة في الموضوع..ومنتظرين الأفكار والاقتراحات..

*ياود الزبير ..إتصلح معانا شوية ياخ..
ماخزمنا* وكدا..
فااااشنو..جيب لينا الزول دا

*الخطأ الإملائي لزوم التقليد