Post: #1
Title: للما عارفين يعني ايه الدقيقة بشلن
Author: د.محمد حسن
Date: 12-06-2016, 08:49 AM
07:49 AM December, 06 2016 سودانيز اون لاين
د.محمد حسن-
مكتبتى
رابط مختصر من هؤلاء ،من اين اتو وماذا يريدون؟!!!!!
ونحن في زمن الحاج ادم بتاع الكبريتة
ونافع بتاع قال ما بنعرف الكهربا
ومصطفي عثمان الطلعنا شحادين
حقائق كتيرة انطمست
وقبل يومين تذكرت مقولة الدقيقة بشلن
والعبارة دي اظن معظم ساكني الاحياء القديمة في العاصمة تحديدا امدرمان والخرطوم بيكونو بعرفوها
ومتداولة بينهم لما واحد يتساذن من الاخر ويقول ليه دقيقة الاخر برد بسرعة ويقول ليه الدقيقة بشلن
فما هي قصة الدقيقة بشلن
وحتى الثمانينات كان للبصات الاهلية دور كبير في تواصل النسيج الاجتماعي ونقل البشر
فمثال امدرمان
كان الموقف الرئيس لبصات امبدة والثورات وودنوباوي والقماير هو غرب البوستة في سوق امدرمان
وكانت معظم الباصات بتركن في العرضة جنوب شرق استاد الهلال
وكل بص بيتحرك في دوره بزمن معين ويقيف في موقف البوستة لزمن معين بعدها يتحرك ويتوقف في المحطات بزمن معين
مثلا
بص الثورة يتحرك من ميدان البوستة الغربي والى ان يصل السوق الجديد او سوق ودنوباوي في زمن معين
ويوجد في سوق ودنوباوي واحد بيراقب البصات وقبل مايص من بعيد بياشر اما رافع اصبع او اصبعين اوتلاتة او حتى الاصابع الخمسة
وتعني انه تاخر 5 دقايق عن الموعد الذي يجب ان يكونه في محطة سوق ودنوباوي
وعليه غرامة تاخير شلن عن كل دقيقة
وايضا عند العودة من الثورات يكون هذا الالفة ان صح التعبير ايضا يحسب زمن التاخير
لماذا الغرامة ؟
الغرامة لان التاخير معناها توقف في بعض المحطات اكتر من الزمن المجدول له بالتالي اخد ركاب من حق البص البعده
بالتالي حقوق جميع سائقي البصات الاهلية
يعني كان في انضباط عالي في الحركة المجتمعية
الجانب الاجتماعي في حرة البصات الاهلية انه في محطتين مسموح للسواق ان يتاخر فيهم اكتر من المحطات الاخرى
محطة مستشفى امدرمان
تحسبا لنقل مرضى
المحطة التانية سوق ودنوباوي لان كثير من امهاتنا كانو بيتسوقو من السوق الجديد وبكونو شايلين الخضار بتاعهم
اما الالفة ضابط الزمن فهو في الاصل سائق واصبح من غير بص
فبدلا من ان يبقى عاطلا ولانه ضمن النقابة لاصحاب البصات الاهلية فبيتم تعيينه
ضابطا للوقت وبذا يكونو اكفوه ذلة المسالة يا دكتورنا السفير بسويسرا
ويا حليل زمن الدقيقة بشلن
|
Post: #2
Title: Re: للما عارفين يعني ايه الدقيقة بشلن
Author: أحمد الشايقي
Date: 12-06-2016, 09:37 AM
Parent: #1
شكرا د محمد
كل شئ كان مظبوط
أحمد الشايقي
|
Post: #3
Title: Re: للما عارفين يعني ايه الدقيقة بشلن
Author: د.محمد حسن
Date: 12-06-2016, 11:46 AM
Parent: #2
ايوة يا مولانا
كل شي كان مظبوط
بدءا من طابور الصباح المدرسي
الجمعيات الادبية
المنازل والامنافسات الرياضية والثقافية بين المنازل
ناس عطبرة بظبطو مواعيدهم بحركة القطارات
قبل اخبار الثالثة كان الجميع في المنازل على صينية الغداء وبرنامج عالم الرياضة بعده النشرة الرئيسية
الناس تتغدى وتمشي كورة العصر ايا كانت روابط سنتر ليق او دار الرياضة
ما كان في شلهتة وجري ورا المواصلات والرزق
3 بيضات بي شلن
كان الكبريت انواع
كبريت المفتاح
والكبريت المشط ( هل حاج ادم سمع بالكبريت المشط؟) لو كان بمشي ال GMH كان بيلقاه مشتت
الكهربا التي يتحدث عنها النافع وان الناس كانو لايعرفونها قبل الانقاذ فليعلم ان خالي هو الذي صب قواعد ابراج الحمل من الرصيرص للخرطوم
من اينو اتو وماذا يريدون؟!!!!
|
Post: #4
Title: Re: للما عارفين يعني ايه الدقيقة بشلن
Author: محمد أبوالعزائم أبوالريش
Date: 12-06-2016, 01:21 PM
Parent: #3
يا دكتور ما تبالغ،
معاك ناس الشلن في رقبتو عايز ليهو شرح 
|
Post: #5
Title: Re: للما عارفين يعني ايه الدقيقة بشلن
Author: د.محمد حسن
Date: 12-06-2016, 01:29 PM
Parent: #4
(معاك ناس الشلن في رقبتو عايز ليهو شرح )
والله على قولك
الشلن بداخلك شعب
والريال بدخلك وسطى
والخكستاشر بتدخل بلكونة
والعشرين قرش لوج وتشرب بيبسي صاح ولو شايل معاك سنويتش انت ملك
|
Post: #6
Title: Re: للما عارفين يعني ايه الدقيقة بشلن
Author: محمد المرتضى حامد
Date: 12-06-2016, 01:50 PM
Parent: #4
(ونحن في زمن الحاج ادم بتاع الكبريتة ونافع بتاع
قال ما بنعرف الكهربا ومصطفي عثمان الطلعنا شحادين )
والله يا حبيبنا ديل ما مزعلني زي القال علمنا الهوت دوج،
أولا هو يعتقد أن الهوت دوج حاجه كويسه ولا يدري
شيئا عن تاريخها أو من أين جاء الإسم واي طبقة كانت تستعمله،
وهذا ليس عيبا في الطبقة، أهو ناس مساكين يأكلون ما تيسر
من رخيص الغذاء.
ثانيا، كنت أتمنى أن يمتن علينا سيادتو بأن يقول نحن الذين أنزلنا
أول مركبة فضائية على زحل، أو حتى في بسكليته في الدروشاب،
هوت دوج؟
ومستورد؟
يا للفاجعة.
|
Post: #7
Title: Re: للما عارفين يعني ايه الدقيقة بشلن
Author: يحي قباني
Date: 12-06-2016, 02:08 PM
Parent: #6
سلام دكتور ...
الشلن ده شنو ياخوانا .؟
_______________
زمان لما رفعو الطراحة لي اربعه قروش و نص ...
اسياد الطراحات اعتبروا التعريفه الباقية من الشلن دي حقتهم ...
و لا يعاين ليك و انت نازل .. يتناول الشلن بي قفاهوا ...
صاحبنا شيوعي لايوووووق ...
ناول سيدالطراحه الشلن و انتظر ...
سيد الطراحه داير يعمل نايم ... صاحبنا قال ليهو وين الباقي يابن العم ؟
الراجل عمل قاعد يفتش في جيوبه و عاين لي صاحبنا و قاليو ما عندي فكه و الله ...
صاحبنا اتكل بي اباطه كده في الباب .. نص جوه و نص بره ... وقال ليهو :
اها تفتكر الحل يكون شنو ؟
|
Post: #9
Title: Re: للما عارفين يعني ايه الدقيقة بشلن
Author: د.محمد حسن
Date: 12-06-2016, 02:22 PM
Parent: #7
يحي قباني الجميل
حليل زمن الطراحة
احد اخوتنا من دولة جنوب السودان حينما كا ن السودان من حلفا لي نمولي
ركب طراحة الخرطوم من امدرمان
في المحطة الوسطى امدرمان بعد اكتمل العدد السواق سال بالنيل والا بالادارة
اخوني الجنوبي قال ليه بالادارة
وجات الادارة واخونا ما نزل
وجات صينية الحركة وما نزل
سواق التاكسي قال ليه يازول لما انت ما نازل جايبنا بي هنا ليه
فرد عليه بكل براءة
ونان زراف ده بشوفو ليك منو
بالمناسبة الزراف ده وينو؟
|
Post: #8
Title: Re: للما عارفين يعني ايه الدقيقة بشلن
Author: د.محمد حسن
Date: 12-06-2016, 02:15 PM
Parent: #6
الحبيب ود عمنا حامد عبد الله
لما كان عمر البشير وثلته بين الضهاري
كنا نحن اولاد الطبقة المتوسطة بنركب البص نمشي الخرطوم نشتري سندويتش من اتيني
وميلك شيك من زكي
ما عنطزة
لكن القوة الشرائية للعملة كانت عالية
كان كل شي متوفر
قزاز حليب كافوري موجود في جدران منازل المشتركين ما في زول بسرقو
والله هسة تخت جمكسين في الحيطة قبل ما تلف تلقى لفحو
يا مرتضى
داك عهد فيه الكلمة المفقودة الان تماما
اليقين
|
|