ستة أسباب رئيسية تمنع المغتربين السودانيين من تحويل اموالهم عن طريق البنوك

05:44 AM November, 12 2016

سودانيز اون لاين
أيمن محمود-etganonline.com
مكتبتى
رابط مختصر

1. البطء
2. التعقيد
3. الخطورة
4. عدم وجود خدمات تشجيعية
5. سعر الصرف
6. لاسباب سياسية

كيف تهيئ لفشل مشروع؟
انك ما تهيئ ليهو ظروف النجاح!

1. البطء
السوق "الموازي" بوفر امكانية انو المغترب يحول قروشة خلال دقائق معدودة
المغترب "من موبايلو" خلال دقيقتين يحول المبلغ في حساب "السوق الموازي" - يتصل عليه يمليه بيانات المستلم - المستلم يستلم طوالي (الصباح، الضهر، العصر، المساء) ... حار حار!

ماهي الفائدة التي اجنيها في التحويل عن طريق البنوك،،،،
حتي من ناحية وطنية ماذا يستفيد وطني من ذلك،،،

تحياتي وتقديري

ماهي الفائدة التي اجنيها في التحويل عن طريق البنوك،،،،
السؤال ده كلنا نوجهو لاصحاب الفكرة - انحنا كمغتربين نستفيد شنو؟

حتي من ناحية وطنية ماذا يستفيد وطني من ذلك،،،

يمكن ان تكون تحويلات المغتربين أهم مصادر الدخل القومي والداعم الأكبر للاقتصاد السوداني - كحال العديد من الدول - لكن في السودان الكلام ده ما حاصل - الحكومة بتستفيد من الضرائب باشكالها المختلفة، وده برضو بقود لسؤال: انا كمغترب بدفع ضرائب وخدمات وزكاة ..الخ مقابل شنو؟

2. التعقيد

فتح حساب في السودان بالعملة الاجنبية براه موضوع
قبل شهرين مشيت افتح حساب بالعملة الاجنبية لموضوع معين - مما وروني المتطلبات جليت الفكرة تماما واستخدمت حساب صديق - رغم اني كان ممكن اخد يوم يومين اوفي المتطلبات لكن في الحقيقة اعتبرتها مضيعة للزمن
اما مسألة ربط الحسابين مع بعض فده شعر ما عندهم ليهو رقبة!

تحية طيبة
يا زول فتح حساب جارى عادى بالجنيه فيهو تلتلة
انا لظروف اقساط جامعات اضطريت افتح حساب جارى
قسما إلا جبت واسطات ومعرف وادخل المدير و.. و..
دفتر الشيكات بعد اسبوع وطلع بعد 10 يوم
بطاقة الصراف الالى اسبوع ولحدى 20يوم والاجازة انتهت وما استلمتها
بصراحة البنوك هناك لسه فى العصر الحجرى..

3. الخطورة
اهم حاجة بتهم المغترب مسألة انو يضمن قروشو - يسحبها او يحولها بالعملة العايزها في الوقت العايزو وبالمقدار العايزو ،،، غايتو الدخل في قدامى المغتربين من تجربة مشروع سندس وخلافه لهسا ما طلعت
القرارات في السودان بتتغير في اي لحظة - يعني ممكن تخسر جزء من قروشك في لمح البصر
مافي اي ضمانات

cbos.gov.sd
دة موقع بنك السودان المركزي
لو فتحته بتلقى معلق فوق سعر الصرف للدولار 6 جنيه ومكتوب عليها آخر تحديث الخميس 10/11/2016 علماً بأنه يوم الخميس ما كان يوم 10 ذاتو

دة موقع بنك السودان المركزي لو فتحته بتلقى معلق فوق سعر الصرف للدولار 6 جنيه ومكتوب عليها آخر تحديث الخميس 10/11/2016 علماً بأنه يوم الخميس ما كان يوم 10 ذاتو
الخميس 10 ياخ - لكن موقع بنك السودان المركزي ده يعتبر مرجع رسمي واظن قانوني ذاتو!

تحياتي اخي ايمن ..

بتذكر في بداية اغترابي في نهاية التعسينيات ، كنا نحول عن طريق السفارة في الرياض ، وخاصة انو كان الخميس اجازة ..
نمشي السفارة منها تعارف ومنها تحويل ..
كان سعر التحويل مشجع فعلا واحسن من السوق الموازي ..
والتحويل سريع جدا ، مرات في نفس اليوم عن طريق بنك البركة ..
واتذكر انو رسوم التحويل فقط كانت 10 ريال ..
كما توجد خدمات تانية منها شراء ادوات كهربائية عبر السفارة والإستلام في الخرطوم وبدون جمارك ولا يحزنون ..

يجب على الدولة "وزارة المالية وجهاز المغتربين" ان تفكر بجدية في كيفية توفير طريقة آمنة لجذب تحويلات المغتربين إذا كان فعلا جادة في توفير الحوافز ..

بتذكر في بداية اغترابي في نهاية التعسينيات ، كنا نحول عن طريق السفارة في الرياض ، وخاصة انو كان الخميس اجازة ..
نمشي السفارة منها تعارف ومنها تحويل ..
كان سعر التحويل مشجع فعلا واحسن من السوق الموازي ..
والتحويل سريع جدا ، مرات في نفس اليوم عن طريق بنك البركة ..
واتذكر انو رسوم التحويل فقط كانت 10 ريال ..
كما توجد خدمات تانية منها شراء ادوات كهربائية عبر السفارة والإستلام في الخرطوم وبدون جمارك ولا يحزنون ..

...............................................................................................................


الان يوجد مكتب تحويلات في السفارة

وسريع جدا

ومضمون

انا يوم الخميس حولت فيهو

ماشاء الله

تبارك الله

وشكرا

ود الباوقة انت بتكون مشيت تلم غلة الاسبوع وبالمرة حولت
انا البوديني لحدي السفارة احول شنو؟
اضيع زمني ومجهودي وبنزين عربيتي ليه ياخ؟
ما افتح موبايلي واحول - يستلمو طوالي؟!!

يجب على الدولة "وزارة المالية وجهاز المغتربين" ان تفكر بجدية في كيفية توفير طريقة آمنة لجذب تحويلات المغتربين إذا كان فعلا جادة في توفير الحوافز
احنا محتاجين جسم غير حكومي يراعي مصالح المغتربين - نقابة مثلا - عشان تراعي حقوقنا - ليه الناس تدفع بدون مقابل؟!

احنا محتاجين جسم غير حكومي يراعي مصالح المغتربين - نقابة مثلا - عشان تراعي حقوقنا - ليه الناس تدفع بدون مقابل؟!

في الأساس نحن ندفع لتجار السوق الموازي ايضا بدون مقابل !!
ولكن لو استطاعت الحكومة ان تهتم بشريحة المغتربين التي هي في الغالب اكبر مورد اقتصادي لجميع الاسر في السودان ، ولكن بالمقابل نجد ان المغترب يشتري أرض من الحكومة نفسها وبالعملة الصعبة ويجد انها لا تساوي ربع القيمة التي دفعها ناهيك عن انها لا يمكن بأي حال من الأحوال ان تعمر في السنوات العشر المقبلة ، فالحكومة إن أرادت ان تجذب المغتربين لكي يسهموا معها في الاقتصاد ان تهيء لهم وسيلة مناسبة او قنوات محددة تعود على المغترب ببعض النفع ، كضمان اجتماعي عائد اضافي "كالحوافز التي ذكرتها" او حتى تسهيلات في ادخال البضائع او الادوات الكهربائية او تخفيض الجمارك او غيرها ، فهنا يمكن ان يسهم المغترب في رفع الاقتصاد بتحويل امواله عبر هذه القنوات بشرط ان تكون ذات موثوقية عالية .
الهدف الاساسي يا اخي ايمن هو رفع المعاناة عن أهلنا في الوطن ..
زمان كنا نحول 1000 ريال بما يعادل 600 جنيه سوداني وكان يغطي 90% من احتياجات البيت .. الآن نحول ضعف المبلغ بما يعادل 8 مليون ولا يغطي 60% من احتياجات البيت ..
اذا الوضع الاقتصادي في البلاد يحتاج إلى تعديل ، ولا اهمية للتحويل بسعر السوق الموازي ما دام ان الاسعار ترتفع بإرتفاع الدولار خارج البنوك .

صالح حبيب الله يحييك
يا اخي ناس الحكومة دي بس لو قعدو قصاد تطوير القطاع البنكي وجعلو مواكب للعالم الاقتصاد بتصلح شوية - تخيل معاي كل المعاملات الحكومية وشبه الحكومية بتتم بنكياً - توفير زمن ووقود براه يصلح الاقتصاد!

Quote: الان يوجد مكتب تحويلات في السفارة

السفارات بقت تفتل؟

صاحب البوست تحياتي ...
كلامك منطقي جدا بس مافي زول ح يجاوب على استفساراتك تعرف ليه ؟
لانو اصلا مافي زول بتهموا مصلحة البلد او مصلحة زول .

انا عندي حساب في بنك الخرطوم فتحتو من السعودية .. لما مشيت هناك عشان اصرف قروشي تعال شوف البهدلة .
الحساب مجمد ، واعمل طلب عشان نفتحوا ليك .. عملت الطلب وقدمتو .. الموظف اداني درس في الاخلاق وقال لي تاني لو اتجمد ما بنفتحوا ليك .
سحبت قروشي وقلت ليهو غلطان انا البفتح حساب عندكم .



قبل فترة في اعلان في التلفزيون عن صندوق ضمان او تأمين البنوك في حال اتعرض البنك لي هزة او سرقة .
عندي صاحبي قال لي : ياخ الخوف تمشي هناك الصندوق زاتو ما تلقاهو .. تسأل منو عن قروشك ؟
القروش ادهن (التكة ) ارحم ليك هههههه

سلامات ..
فى أحدى البنوك كلما أصرف قروش بلقى 50 جنيه ناقصة .. الزبائن بدو يشتكو والصرافة قدمت أستقالتها. المشكلة مستمرة حتى الان ..
اى موظف فى الصالة حجتو أنو القروش دى بتجى ناقصة من جوا .. جوا وين ما معروف ..
عند أيداع القروش يحسبوها بالالة فى ثوان .. وعند السحب مافى اله عند الصراف عشان الزبون ما يحسب قروشو ..


..

فؤاد سلامات
غايتو في فرع من فروع بنك ام درمان الوطني ختو زول معاهو آلة عد جوه الصالة - بيحسب ليك قبل ما تودع وبيحسب ليك بعد ما تسحب مجانا - ومرتبو ماشي طبعا

ما حصل ادوك قروش زايدة؟

الكيزان زاتهم ما بحولو عن طريق البنوك
الكيزان مصلحتهم السوق الموازي
بعيد عن الرقابة ويمكن استخدامه في عمليات غسيل الاموال
السودان مركز رئيسي لغسيل الاموال في افريقيا
والفساد سبب رئيسي لاستخدام القنوات الاخرى

السلام عليكم ورحمة الله وبركاته
أيمن
إجراءات تعملها الحكومة لكسب ثقة المغترب
- إلغاء جهاز المغتربين و إغلاق مكاتبه
- إلغاء تأشيرة الخروج
- تسهيل إجراءات البنوك للتحويل السريع
- تحديث سعر الصرف لحظة بلحظة مع السوق السوداء
- تحفيز المغتربين عن طريق إعطاء تسهيلات لمن يقوم بالتحويل عن طريق البنوك
بعدها نفكر نحول أو لا نحول

Quote: الخميس 10 ياخ

أبو عدم التركيز ذاتو

4. عدم وجود خدمات تشجيعية
"ناس السوق الموازي" ممكن يوصلو ليك لحدي البيت مثلا، او في كتير منهم بعد تتوثق المعرفة ممكن يحول مسبقاً ( قبل تديه ذاتو) !، وممكن يودع ليك في حساب طرف تاني .. الخ

آخر تحديث الخميس 10/11/2016
علماً بأنه يوم الخميس ما كان يوم 10 ذاتو

الخميس كان فعلا يوم 10 نوفمبر ، ولا يوجد خطأ في التاريخ ...

عماد الدين الطيب عمر
- إلغاء جهاز المغتربين و إغلاق مكاتبه
- إلغاء تأشيرة الخروج
- تسهيل إجراءات البنوك للتحويل السريع
- تحديث سعر الصرف لحظة بلحظة مع السوق السوداء
- تحفيز المغتربين عن طريق إعطاء تسهيلات لمن يقوم بالتحويل عن طريق البنوك بعدها نفكر نحول أو لا نحول

جهاز المغتربين ده تضخيم مبالغ فيه للمسألة - اعتقد ممكن يتعمل سيستم يمكن المغترب يعمل اجراءته الكترونيا بدون ما يقابل زول ذاتو!
التأشيرة حتى لو ما اتلغت مفروض تتحول الكترونية - تدفع اونلاين وتطلع تأشيرتك فورا زي ما معمول بيه في اغلب دول الجوار

- إلغاء جهاز المغتربين و إغلاق مكاتبه

-----------------------------------------------


إلغاء ما يسمي بجهاز المغتربين سيكون أكبر حافز للمغتربين


ظللت أردد سؤال فى هذا المنبر منذ سنوات ولم أجد إجابة, وهذهـ سانحة سأكرر فيها سؤالي

ماذا ستنقصنا فى حالة إلغاء ما يسمي بجهاز المغتربين ؟

وأرجوا أن تكون الأجوبة مباشرة وبدون ردود إنشائية




هذا مع التحية لصاحب البوست وبقية المتداخلون

شكرا أخ باشمهندس أيمن

المغترب ممول للدولة وهو ممول .... بالدولار الغالي دا .... ومع ذلك فالدولة تضع عشرات العقبات أمام اجراءاته في الدخول والخروج هل تصدق أن زيارة لبنان أو ماليزيا بالنسبة للمغترب السوداني أسهل من زيارة بلاده حيث لا يتطلب خروجك من لبنان أو ماليزيا سوى الاتجاه للمطار

بينما في بلادك تحتاج للمرور بجهاز المغتربين ... وما أدراك ما جهاز المغتربين ...

ذلك يعني تحديداً أن الدولة بدلاً من أن تسهل خروج ودخول المغترب وتقدم له خدمات متقدمة .. الكترونية مثلاُ .... ومن على البعد تجعل دخوله وخروجه مرهوناً ببوابات المطار داخلاً وجهاز المغتربين خارجاً ...

ازيلوا البوابات وافتحوا الحسابات وتعلموا من الدول المجاورة التي تعلمت منا في السابق حينما كان لنا دولة وطنية .. من أجل بناء الثقة ومن بعدها نتحدث في ادماج (اقتصاد الهجرة في اقتصاد الوطن ) ....

أحمد الشايقي

- إلغاء جهاز المغتربين و إغلاق مكاتبه
تعرف يا احمد: الفلبينيين ما عندهم جهاز مغتربين نهائيا - مش كده وبس, ما بيدفعو اي شكل من اشكال الضراب للحكومة
لو كنت مغترب فلبيني بتمشي اجازتك وترجع بدون ما تدفع للحكومة لا تعريفة واحدة ولا حتى رسوم فيزا خروج ولا في فيزا خروج من الاساس!، في المقابل بتلقى جميع المغتربين الفلبينيين بحولو قروشهم عن طريق القنوات الرسمية للبنوك في الفلبين (8 مليار دولار سنويا)، في السعودية اي فلبيني عندو رقم تلفون معين تابع للسفارة - لو حصلت ليه اي مشكلة بيتصل عليها وبشوفو موضوعو .. الشغالات الفلبينيات في السعودية مثلا سنويا تجديد العقد لازم يكون في السفارة ولازم السفارة تتأكده انها اخدت كل حقوقها بتاعة السنىة الفاتت وعندها رغبة في تجديد العقد.
السفارة الفلبينية عندهم مناديب بلفو على مدن السعودية بشكل دوري عشان يجددو جوازات الفلبينيين ويعملو لأي زول اجراءاته

وهناك أسباب جوهرية تجعل المغترب رافداً أساسياً للدولة من العملات الصعبة ومنها على سبيل المثال :-
* إعتبار المغترب السوداني مواطناً وله وعليه من الحقوق ما يجعله متساوياً مع مواطن الداخل في فرص توزيع الأراضي السكنية والاستثمارية بأشكالها المختلفة وإتاحة الفرصة ومساواة أبناءهم في فرص القبول للدراسة الجامعية .
* منح المغترب حزم من الجوافز التشجيعية منها إعفاءهم من رسوم الجمارك ولمرة واحدة طيلة إغترابهم من المستلزمات الضرورية التي تمكنهم في الاستقرار بالوطن من اثاث وأغراض متزلية وسيارة خاصة ، ويمكن تقسيم هذه الحوافز بعدد سنوات الاغتراب ومدى التزام المغترب بسداد المساهمات التي (فرضت عليه فرضا) كما سموها (الالزامية) .
* يجب على المسئولين إعادة النظر في أفكارهم بأننا ( أبقار حلوبة) أو بمعني أننا (كاتلين الدجاج وخامين البيض) .
* جهاز تنظيم العاملين بالخارج يجب أن يخرج من دائرة ومفهوم الجباية وتحصيل الأموال لآفاق أرحب لرؤية تطلعات المغتربين ورعايتهم بأفكار وأهداف تفيد المغترب بعد سنين الاغتراب الطويلة .