الجريف ... تجربة تستحق التأمّل

11:15 AM November, 06 2016

سودانيز اون لاين
جلالدونا-
مكتبتى
رابط مختصر

ف ... تأمّل

تجربة بسيطة فى ادواتها
قليلة تكاليفها
عظيم مردودها
ف ... تأمّل

اهل الجريف اهدونا خارطة طريق للخلاص
يجب علينا ....
التمّعن فيها و تطويرها و الالتزام الصارم بها
و كما قهرت الجريف جبروت النظام
سيلفظ اهل السودان نظام عصابة الانقاذ
ف .. حيّا الى العمل

الصعب شنو فى انو كل ناس حى يكوّنو لجنة لادارة الحى
من الاقوياء الامناء و هم ادرى بهم
التمويل .. ده ما اظن فيهو مشكلة
بالتأكيد كل حى بكون فيهو من 50 لى 100 مغترب او مهاجر
ممكن يساهم كل واحد فيهم بما يستطيع و اهو المال كان ما مشى لى اهلو بمشى للجيران
يعنى مافى ندامة و اسف
المهمة ... الاشراف على توفير الغذاء و الماء و الدواء
تجهيز بيتين كمستشفى واحد للرجال و الاخر للنساء
حماية الحى حتى يخر النظام صريعا

وحى مع التانى و التالت ممكن تحرر مدينة
و ممكن تتكون لجنة مدينة من مناديب الاحياء
و مدينة على مدينة ممكن تعتصم ولاية
و من مناديب المدن نعمل لجنة ولاية

و ولاية على ولاية يعتصم السودان كلّو
و من مناديب الولايات تتكون لجنة السودان
تهتم بتعيين الجهاز التنفيذى للدولة
و تعمل كمجلس تشريعى ثورى
بالطريقة دى من رحم الشعب تأتى قيادة جديدة
تقطع الطريق امام كل القيادات التقليدية القديمة التى تركب موجة الثورة ساعة النصر
يا اهل السودان رجاله و نساءهو شبابه و شاباته
شمروا ساعة الجد ساعد اليد

سلامات يا جلي
كدي فهمني انا مالقيت تفاصيل القضية بشكل وافي
ماهي مطالب اهل الجريف و ماذا تحقق منها بعد الإعتصام

اهلاً ود البشرى
من اهم مطالب اهل الجريف وقف التعدَى على اراضيهم
و اعتماد الخطة الاسكانية الخاصة بهم
وتحويل المستشفى الذى بنى علي املاكهم الى مستشفى حكومى
و اطلاق سراح احد قياداتهم
و قد اذعنت العصابة لمطالبهم
الاهم فى التجربة انها جاءت بحقوقهم من غير ان تروح روح
او تخريب فى ممتلكات و كانت ناجزة و سريعة
قدمت اسلوب سهل فى مقارعة النظام
قدمّت خطة عمل فى كيفية حفظ الامن بواسطة شبابها
و غلق الطرقات و مقاومة عسس النظام

Quote: و قد اذعنت العصابة لمطالبهم

متأكد يا زول؟
تم اعتماد الخطة الاسكانية و تحويل المستشفى لحكومي؟

ده الكلام الاتنشر فى الاسافير و هنا
و كلّنا قريناهو

Quote: #الجريف_تنتصر النظام يركع أمام صمود مواطني الجريف وافق النظام على إطلاق سراح المعتقلين إقرار الخطة الإسكانية تحويل مستشفى شرق النيل لمستشفى حكومي

ثم انو يا ود البشرى .. حذيثى هنا عن تجربة اهالى الجريف
بصرف النظر عى مردودها إلّا انها كانت وقفة قوية امام جبروت السلطة

Quote: بصرف النظر عى مردودها إلّا انها كانت وقفة قوية امام جبروت السلطة

وكذلك كانت تجربة المناصير و أهل أمري و كجبار و لقاوة!!
لا تصرف النظر عن المردود لعمل تقييم حقيقي لا يستند على العواطف

تمام

سيب العكلته يا ود البشرى، برانا حوضنا مكسور وما قادرين نتحرك ههه

الف سلامة يا ود الزبير اجر وعافية و الدعوات بالشفاء التام
بعدين انت كنت واقف شماعة ولاّ سايق أصلك :)

فعلا تستحق التأمل
وما لا يدرك جله لا يترك كله
حتى لو تحققت خمسين في المية من مطالبهم
كما انها تجعل الحكومة تفكر مية مرة قبل التعدي
انها مرحلة وقف التعديات بالقوة المنظمة الحكيمة بدل اللطم والتشكي
لان هذه الحكومة الظالمة اثبتت انها لا تستمع الا لغة القوة والصمود
لا الحوار ولا الصبر ولا الاحتساب ينفع معها

المردود المهم يا ود البشرى هو امكانية حدوث العصيان المدنى
و انّو سلاح فعّال و ناجز و ممكن بى كل بساطة يطيح بالنظام
و الحديث عن تعميم التجربة و ميلاد قيادات جديدة بتطورها من حى الى مدينة الى ولاية
الحتّة دى بتهمنّى شديد من حيث انى لا اظّن خيرا لا فى النظام و لا الحركات و لا المعارضة

عشان كده بتأمّل فيها و بحلم بيها

اهلا عيدروس
و شكرا لى ال تمام

ههه
يا هلا بى ود الزبير و الف حمدلله على السلامة و سعيد بالطلّة
هو داب عكلتة بس ..و معاها حراق روح كمان
شايل صورة البوليس القديمة و التى فيها احلى عكلتةو عارف محلّها وين
بس ما بقدر يمشى عليهو .. اسد علىّ و على فرانكلى نعامة
غايتو نقول شنو .. فرصة يا شامية ..
شكرا للتضامن

Quote: فعلا تستحق التأمل وما لا يدرك جله لا يترك كله حتى لو تحققت خمسين في المية من مطالبهم كما انها تجعل الحكومة تفكر مية مرة قبل التعدي انها مرحلة وقف التعديات بالقوة المنظمة الحكيمة بدل اللطم والتشكي لان هذه الحكومة الظالمة اثبتت انها لا تستمع الا لغة القوة والصمود لا الحوار ولا الصبر ولا الاحتساب ينفع معها

و ده واحد من مكاسب التجربة و الاهم انه لم تحدث خسائر فى الارواح
و دى عقدة التغيير الحقيقية

شكرا اهنا الجرّافة
فقد استلهمناها
و هى الان تسعى لتعم كل السودان