Post: #1
Title: محاولات قصصيه
Author: مها عبدالمنعم
Date: 11-05-2016, 07:11 AM
06:11 AM November, 05 2016 سودانيز اون لاين
مها عبدالمنعم-
مكتبتى
رابط مختصر بديت اشوف الرئس كل يوم ،اشرب معاه شاي الصباح،الراجل شدة ما انه متواضع الشاي بشربو باللقيمات بس. اول مره لاقيتو كنت مارق من الشغلومستعجل شديد وهدومي ملانه صدا وريحته بوهيه وحديد شغال صنايعي مع عم علي قريب المنطقه الصناعيه في كشك صغيروني بتاع حداده،ضرب اخوي احمد قال امي تعبانه وقعت في السوق وودوها المستشفي جريت قبل اغيرهدوم الشغل وجيبي فيهو تلاتين جنيه عشره حقتي وعشرين ناولني ليها عم علي وانا مارق ،الحمدلله طلع ماعندها شي بس ارهاق وضعف دم شديد دمها وصل عشرين الدكتور اتحير او انه متعود ماعارف شلت باقي القريشات اشتريت لي تلاته قريبات وبلح بسبعه ،وطلعنا البيت ونحن في الطريق وقفت عربيه بيضاء فيها زول ابيض ووجه مالوف شديد بس ما استحضرتو سلم علينا وقال لامي اتفضلي ياحاجه نوصلك ماشين وين ؟انا سريع قلت لا شكرا بنركب المواصلات نهرني المعاه اسكت ياولد اسمع كلام الكبار حتي عرفت انه دا ياهو ركبت بعد وصفت بيتنا سالني شغال وين ات في المنطقه قريت شنو المدرسه الصناعي وتاني مرقت بعد ابوي مات وجا عرس اختي سعاد ،خير ان شاء الله انت ولد مكافح امسك الظرف دا فيو عشره الف بتحل ليك عوجتك؟ ايوه امي بتطيب تب وماني داير شي خلاص انت كل يوم تجي تاني تشرب معا شاي الصباح في بيتنا بتقدر؟ بقدر بقدر الراجل عاوز يعرف الاخبار قال ،المهم اشرب الشاي ويشيلوني كيس خضار الحمدلله امي صحتها اتحسنت ودمها استعدل وخلت بيع الكسره في السوق ورطبت عديل ،يوم مشيت مادخلوني الحارس ماسكني يازول فوت من هنا احسن ليك ، يازول ات مجنون امشي ماتجيب لي الكلام من الدقش، رئس شنو الساكن هنا وانا بقول ليه بكل هدوء اسالو لو قال ليك ما يدخل بمشي يازول اسال منو انت مجنون والا مخرش والاضارب شنومن الصباح ،ماضارب شي انا كل يوم بجي اشرب الشاي هنا واشيل كيس خضاري انت كل يوم بتجي تشيل ليك كم طوبه وحجر وتتسهل اهلك وين مخلنك في الشوارع كدي !الراجل دا جادي معاي! وصلت البيت اول شي عاينت لروحي شديد في المرايا لقيت زول تاني دا م انا لابس شورت وشعري تقول طلعت من الغابه بسم الله الرحمن الرحيم وصرخت امي امي جاني احمد مالك يازول بتكورك امي وينه انت ما نصيح امي ماتت تمت سنه بكيت والا مابكيت ماعارف فجاة اتذكرت كل شي وصلت المستشفي امي مستحضره وعندها فقر دم حادقبل يدوها الدرب مشت لله الراجل اللابس ابيض كان معاي منو يا احمد جا معانا عم علي ورجعت بتكسي بعد بقيت تكورك معناه انا زحلقتعديل ياعمك انا ماشي للدكتور تمشي معاي ايوه بمشي معاك دكتور الابوابي وصلنا اول شي اتفاجات انو شاب صغير يقابلك باابتسامه كبيره ويطمنك لمن تصاحبو والعلاج في امان الله لكن مابثق في طبيب غيرو مقابلتي كل احد في القسم بتاع الصحه النفسيه ،اخدت فتره طويله م مشيت والحبوب كملت لازم يكتبه هو مشيت القسم لقيتو اعتقلوناس الامن ؟مشيت تاني يوم وتالت يوم وانا هسي معاد حبوبي فاتت وقطعت ليها ثمانية ايام وعرفت انه معتقل في بحري ماشي ليهم في السياسي اقول ليهم يخلو يكتب لي الدواء وارجع!
|
Post: #2
Title: Re: محاولات قصصيه
Author: عبد العزيز محمد عمر
Date: 11-05-2016, 07:38 AM
Parent: #1
.
.
عودة أنيقة يا مها ...
|
Post: #3
Title: Re: محاولات قصصيه
Author: عبدالله ود البوش
Date: 11-05-2016, 10:39 AM
Parent: #2
ما أروعك
لا تطولي الغياب
عودة سمحة
|
Post: #5
Title: Re: محاولات قصصيه
Author: مها عبدالمنعم
Date: 11-19-2016, 08:00 AM
Parent: #3
عبدالله ود البوش
باذن الله ربنا يبعد العوارض
|
Post: #6
Title: Re: محاولات قصصيه
Author: مها عبدالمنعم
Date: 11-19-2016, 08:02 AM
Parent: #5
http://mahamonem.com/http://mahamonem.com/
|
Post: #4
Title: Re: محاولات قصصيه
Author: مها عبدالمنعم
Date: 11-19-2016, 07:58 AM
Parent: #2
عودة أنيقة يا مها ...
شكرا عبد العزيز محمدعمر
|
|