السوري مزور العملات الذي تم القبض عليه في الخرطوم يرشد المباحث لشقته (صورة)

08:17 AM November, 03 2016

سودانيز اون لاين
Adam Youssif-Jeddah, Saudi Arabia
مكتبتى
رابط مختصر

دة دمر اقتصاد البلد كله برواهو
الحكومة حتحفزو بمنح الجنسية السودانية وبس

دا تأطير للمثل الشعبي "عايره وأدوها سوط"
خمسين مليار ، عشرة مليار إتوزعت في البلد زول واحد يكتشف العملية دي مافي ، يعني في عشرة مليار جنيه سوداني مزورة حايمه في السوق والله أنا شخصياً قروشنا دي لا بعرفها مزورة ولا بعرف شكلها مرة يقولو ليك دي ألف جنيه ومرة يقولو ليك دي عشرة جنيه وصعبوها علينا شديد لدرجة إنه عشرة في عشرة بقت خمسة وثلاثين.
المهم السوري الشقي دا عتر ليهو طمعو فتمادى في غيه ولا أحسب أن ليقظة رجال الأمن عندنا دور في إكتشاف الجريمة يعني الحكاية جات كده بالصدفه والحال كذلك يكون في كم واحد زور وأكل وإتخارج ، قالو البلد الما فيها تمساح يقدل فيها الورل لكن يبدو أن التمساح لم يعد بتلك المهابة فعادي تلقي التمساح في أي خور وجمبو جداده وتيس وجريوات وبعض القطط العجاف في تعليش سلمي وتسامح في أبهي حلله ، بس تحت تحت عرفت إنه الحكاية ما بي مزاجهم وقديماً قالو الأسد لمن يعجز الغنماية ممكن تضرب ليهو منكير.

ههههههههههههه عجبنى منكير الغنمايه ده يا الملاعمر .. تحياتى لك و صاحب البوست..

الملاء عمر
تحياتي
دا تأطير للمثل الشعبي "عايره وأدوها سوط"
اضحك الله سنك
ههههههههههههههههههههه

Quote: المهم السوري الشقي دا عتر ليهو طمعو فتمادى في غيه ولا أحسب أن ليقظة رجال الأمن عندنا دور في إكتشاف الجريمة يعني الحكاية جات كده بالصدفه

الأخ الملا عمر,
رجال الأمن يقظين جدا في السودان بس المشكلة الفساد, هسي أي جريمة يمكن يكشفوها بسرعة جدا لكن المحسوبية.

مرة واحد بحكي ليك في رائد في الشرطة مشى السوق وكان لابس ملكي وترك الجوال في العربية وزجاج الراكب الأمامي فاتح جاء واحد بي إتجاهو وقال لا حولة ولا قوة إلا بالله اللستك نزل وأختفي على طول, الرائد نزل من العربية عشان يشوف الحاصل شنو واحد بي باب الراكب الأمامي سحب الموبايل وأختفى. الرائد لمن عرف بأنه موبايله إتسرق مشى لي أقرب مركز بسط الأمن الشامل, وبدون يعرف هويته قال ليهم عن السرقة التي تعرض عليها. العسكري قال ليهو إنتو الواحد فيكم يهمل ولمن يسرقوه يجي داير يشتكي. المهم عرفه بي نفسه وطلع ليهو بطاقته وقال ليهو أنا عارف إنتو هنا بتعملوا في شنو, انا داير موبايلي بس لا حتشوف. المهم مشوا قبضوا واحد جابوه وقالوا ليهو جنابو ده موبايل إتسرق. الحرامي قال ليهم دقيقة أتصل وفعلا إتصل على واحد وبصوت منخفض قال ليهو: يا فلان القنبلة المعاك إتفجرت رجعها جيبها وفي خلال دقائق الموبايل رجع لي جنابو.

يا زول ناس المباحث والأمن عارفين كل شيئ لكن المشكلة استوعبوا معاهم الحرامية وعديمي الذمم.