اهداء الي جلالدونا ،عمرالتاج،كبر ،ودالبشري ، بلال اخو السمحة واخرون
بين زمنه وزمني 48ساعة تزيد احيانآ لتصل اسبوعيين
ارتشف باقي قهوته ونظر في المرآة ليري الحتل
المكان ماليزيا الطابق ال19 تحول الايفون الي اله الزمن اسمع باطراف الاصابع اصوات البشر اما الوجوه ف غير واضحة المعالم ، لو وضحت اذن لتحولت الي شهاب او احدي مخلوقات الله النورانيه ، لم اتحمل نزلت الي محل اعرفه curve مجمع تجاري به سلسلة مطاعم علي يميني ستاربكوس والموكا المثلجه اخذت اليسار والفروالة المثلجة وضعت الماصة وضغطتها بين الاسنان فهي كثيفة ومثلجة لمحت النادل يهمس لرفيقة ادرك اني قد رأيته فتبسم لقطة ثانية ج
الشفرة من يستطيع ان يفكها وذاك الماسك بتلابيب المدعي اعاد السؤال ثلاثة ولم يرد سأله ما حلك وتحول الي جعران ، ان ما رد وووب وغطاها بالنرفز
يا لطيف قد قلتها يومآ ما حتي خشيت الانجذاب ، وقد بوركت بعد هذا حتي خفت
Post: #2 Title: Re: بك نستنير. تقرأ ب ك Author: اخلاص عبدالرحمن المشرف Date: 11-03-2016, 06:56 AM Parent: #1
القهوة دي تبع ب ك انا من هواة الموكا اسع يجئ يقول قالت اسمي وحاة سيدي الحسن ( ما قته ) تقرأ حسب المزاج والزنقة
الجعران ده عند قدماء المصريين شئ سمح جدآ
قالو وقلنا له اهداء للقرأ وهي بتبين جمال عاميتنا
Post: #3 Title: Re: بك نستنير. تقرأ ب ك Author: اخلاص عبدالرحمن المشرف Date: 11-03-2016, 08:16 AM Parent: #2
دافنشي كود مرتين في الاسبوع سينما يا مفتري وانا في السعودية ، ابكي بس
احب اجاثا كريستي ذاك اليوم كنت اقرأ لغز ( قضية ضاحية ستايلرز ) المجرم في النهاية هو ذاااتو ال في البداية. ولكن اظن وليس كل الظن أثم ان اللغز الانسب هو المرايا ، في المرايا تشوت قدر ما تشوت كان ضفاري كان تنشين انت طاشي ، والمرايا فيها انعكاس الضوء وسرعة الضوء والسنين الضوئية بتشرح الفرق مع حفظ فرق الشمال واليمين اضافة الي الاختلاف حسب الجندر عشان كده في ناس مرايا
الاغنية الهدية كلميني يا مرايا
Post: #4 Title: Re: بك نستنير. تقرأ ب ك Author: د.محمد حسن Date: 11-03-2016, 08:31 AM Parent: #3
بت المشرف يا دوك
علو كعب الكتابة يغري بمتابعة التشفير هي كانها رحلة بين الشاطبي واسبوتنج بمحاذاة البحر وبيننا محمود درويش
Post: #5 Title: Re: بك نستنير. تقرأ ب ك Author: بله محمد الفاضل Date: 11-03-2016, 08:44 AM Parent: #4
"اسمع باطراف الاصابع اصوات البشر اما الوجوه ف غير واضحة المعالم ، لو وضحت اذن لتحولت الي شهاب او احدي مخلوقات الله النورانيه "
صباح الأصابع التي تعزف لشجن الروح...
Post: #6 Title: Re: بك نستنير. تقرأ ب ك Author: Haytham Ghaly Date: 11-03-2016, 09:16 AM Parent: #5
تحياتي يا دكتورة
بعد قريت كلامك الفوق ما عارف ليه اتذكرت قصيدة عاطف خيري
سيناريو البحث عن اليابسة بالذات الحتة البقول فيها
مطر الحبش لو كان نبش جواك سقف .. الخ
ولك ولضيوفك مزيداً من التحايا
Post: #7 Title: Re: بك نستنير. تقرأ ب ك Author: اخلاص عبدالرحمن المشرف Date: 11-03-2016, 09:17 AM Parent: #5
د/ محمد حسن جادك الغيث اذا الغيث همي يا زمان الوصل بالشاطبي
يا اخ الابراهيميه كان فيها احسن محل منقه تسلم والمعاك يا صديق
Post: #8 Title: Re: بك نستنير. تقرأ ب ك Author: اخلاص عبدالرحمن المشرف Date: 11-03-2016, 09:52 AM Parent: #7
بله محمد الفاضل يا صديق قاعدة اساسق معاك بهناك كتابة حلوه بس رشفة رشفة
مخي قدري ما تغرق بي😄😄😄😄😄
Post: #9 Title: Re: بك نستنير. تقرأ ب ك Author: اخلاص عبدالرحمن المشرف Date: 11-03-2016, 10:04 AM Parent: #8
هيثم يا صديق افرحتني لاني ذكرتك ب نبي الشعر عاطف خيري
عاطف ده فلته في عمر الزمن يا اخ المحل بق نور من ذكره
تسلم يا هيثم
Post: #10 Title: Re: بك نستنير. تقرأ ب ك Author: اخلاص عبدالرحمن المشرف Date: 11-03-2016, 07:54 PM Parent: #9
سبحان الله العنوان كان همس الحنين تصالح يجعلك تغفر غفلتك ، تغسل مطر الرزايا ببسمتك ابوي الحنين وقعوا زولآ شاشو ابيض شف وشاف ما ابري بس ضوء ماس
وبس
Post: #11 Title: Re: بك نستنير. تقرأ ب ك Author: اخلاص عبدالرحمن المشرف Date: 11-04-2016, 02:42 AM Parent: #10
الاحتجاب والغياب لما النيجيري خت تحليلو سحبت منو جنسية نيجيريا هي. نيجيريا دي هينة ولا لينة 😄😄😄😄
اسع في دفتري هو لايص كل شئ ولا فقد الهوية ،. بعدها شغلت قرآن جمال الوالي سورة عزو هذا اضافة لما تعرفونه مما حصل مما لا اود التطرق له
Post: #12 Title: Re: بك نستنير. تقرأ ب ك Author: اخلاص عبدالرحمن المشرف Date: 11-04-2016, 05:43 AM Parent: #11
Post: #13 Title: Re: بك نستنير. تقرأ ب ك Author: عبداللطيف حسن علي Date: 11-04-2016, 06:59 AM Parent: #12
بعدها شغلت قرآن جمال الوالي سورة عزو ـــــــــــــــــــــــــــــــــــــــــــــــــــــــــــــــــــ
هههههههههههههههه رغم اني مريخابي لكن عجبني توقيت تشغيل الاسطوانة!(في كلمة بعدها طوالي)
تحياتي يا دكتورة اخلاص
Post: #14 Title: Re: بك نستنير. تقرأ ب ك Author: Kabar Date: 11-04-2016, 07:04 AM Parent: #11
كتر خيرك يا بت ابا..!!
(ب ..ك).. ياخي ليتك عاصرتي جامعة الخرطوم في نهايات عهدها الذهبي ، فهؤلاء مطاليق ، يعرفون القراية الذكاء/الطرفة/ المفارقة..الخ..!
النجيري ، كان الحتل ، والله صحي يا اخلاص.. عشان كده ما عارف يشوت وين ولا وين..!!
اما امينة عيسى ، اختي الصغنونة امينة..الله يسألها من الحردة/ الغياب ياااااااااااااااخ..!!
المحنة ، فضيلي جماع ، يجوعر بي طول حسو ويعيط: يا اخوانا الزول اسمو (حمدوك) ومافيش حد جايب خبر.. شفتي (ثقافة الدش سقطت حجرنا لوين، يا زهير همد..؟؟؟؟!!).. عرفة بالسنون ، اخير من عرفة بالليد يا صديقة..!
نفك شنو ولا شنو يا اخلاص..؟!!
فالشفرات ، امرها باتع يا صديقتي..!!
يا ريت اليوتوب يفتح معاك..!!
كنت ح اضيف غنيات من مالي ، النيجر ، بوركينا فاسو ، تشاد ، ولكن..!!
اهو..شغل بتاع مزيكا البلوز ، لزولة سودانية اسمها (شادن محمد حسين) ، وعنوان الشغل : غنية اسمها (كوري)..!!
كوري ، يا اخلاص ، هو الأسم الشايع، في ثقافة البقارة ، لسلالة ابقار يختص بتربيتها اهلنا ( امبررو).. فلاتة عديل يا اخلاص.. شفتي النجيري ضايع ككيف وما جايب خبر؟!!
شادن اشتغلت على مستويات عديدة (نم دار البطانة ، الجرداق في دار الجمع بالنيل الأبيض ، المسيرية ، الرزيقات ، الهبانية ، التعايشة ، لغاية تشاد والكاميرون ..الخ)..
الكلام ده يا اخلاص ، الحزب الشيوعي السوداني ، ما عندو اي فكرة عنو ، اما الكيزان ، فشنو، عملوا نايمين وفتحوا القنوات عشان ناس شادن تغني ، حتى لو كانوا ما فاهمين الفكرة شنو..!!
وي (كوري ) ام درقات ، وي دي (كوري) عجيلة الصُرة ، وي (كوري) البارة الحُرة..
والبارة يا اخلاص ، تعني (البقرة)..!!
يا ابكر الطويل ، نعمة بالله ياعم ، اهلي ديل ما هينين يااااااااااااخ..!!
خليك من النجيري وجلالادونا ، يا ابكر الطويل ، احكينا عن سلالة بقر امبررو (بقر فلاتة ياعمك) ، ومستعد اجيب ليك خريطة التواجد لغاية (العفر) بتاعين جيبوتي..!!
كتر خيرك يا اخلاص.. ومرات في حاجات كده.. اسكتي ساكت خليها..!! عرفتي ليه ناس امسودان ، وفي الألفية التالثة لسع ضايعين بين هويتين ، وربما هويات عديدة ذاتو..!!
جلالادونا ، يا اخلاص ، راس مالو..اشغال عبد الرحمن بلاص ، وليته يتأملها بصدق ، ناهيك عن حسن خليفة العطبراوي ، مصطفى مضوي (اول مرة اشوف لي حمامة تتكلم) ، لغاية خوجلي هاشم.. ولو كنت املك عليه امرا ، أي على جلالادونا ، لكنت قلت ليهو ارجع اقرا اشغال اسامة الخواض ، فقط (خسوف القمر الأتبراوي) ..علي بالحلال ، لو قراها بصدق ، ينكر صحوبية معاوية المدير ، والهادي الشغيل ، وسارة الجاك (لو استطاع اليها سبيلا) وطلعت الطيب وعادل عبد العاطي ، وقاسم امين في ذات نفسو..!!
كتر خيرك يا اصيلة ، فسماحة امسودان وجمالها ، اعجزت الليجند محمد عبد الله حرسم ، لدرجة انه بادلها بالإختفاء ، خوفا من تأمل ملامحها الجميلة القاسية..!!
كل المحبة يا اخلاص المشرف.. وياريت تفتشي كتابة زينب بليل..!!
بالعدم ، رواية عائشة حسن ، او آن الصافي..ياخي ديل بنات اللذينا ذاتو.. اما استيلا.. بت اللذينا يا استيلا..اقول ليك شنو.. احبك ذاتو..وانا عاجز عن الدفاع عن دار نشر (رفيقي)..رووووب عديل يا استيلا.. وعزائي: الكتابة الحق ، الكتابة النضوح ، ح تبقى ، ونحن من نفنى يااااااااااااااااااااااااااااخ..!!!
ودمت..
كبر
Post: #15 Title: Re: بك نستنير. تقرأ ب ك Author: عبداللطيف حسن علي Date: 11-04-2016, 07:42 AM Parent: #14
وياريت تفتشي كتابة زينب بليل..!! ــــــــــــــــــــــــــــــــــــــــــــــــــــ سلامات يا كبر ، شكرا علي التذكير بالروائية المجيدة زينب بليل
رغم ارتفاع اسعار الكتب ، استطاع الشباب المهتمين تصوير رواية (كش ملك)
وتوزيعها للاصدقاء والمعارف فحظينا بمعرفة وجود الواقعية السحرية لدي نخبة
من الروائيات السودانيات .....قرات هذه الرواية قبل سنوات لكنها لم تصبح نسيا منسيا
وذكرك لها اوجد في دواخلي رغبة قراءة اخري في نسخة pdf شوف الزمن شن بسوي
من تصوير واهتراء للنسخة وتبادلها الي حفظ للابد !!
Post: #16 Title: Re: بك نستنير. تقرأ ب ك Author: Kabar Date: 11-04-2016, 09:12 AM Parent: #15
هههه..! كتر خيرك عبد اللطيف ، وعليكم السلام يا خي..!! حالتي انا كنت ، ومن غرور ، قايل زينب بليل دي بقت زي لغة مروي الما قادرين نفكها حتى الآن..! وانت بكل بساطة بتقول لي بتقرا ليها شغل؟.. ياخي ، ادفع مائة دولار امريكي ، لو اقرا أي حاجة لزينب بليل..!!
ما يسمى ، بمعرض الكتاب في الخرطوم ، بتاع اول امبارح ، الرقابة قامت منعت كتاب لإستيلا قاتيانو.. من جنس ادب الأطفال ، وفيهو صور كمان.. بحجة انو غير مناسب لأطفال امسودان (جنوب وشمال)..!! ياخي قربت اقول للرقيب بتاع الخرطوم: اخير تلحق تسد الثغور في الموصل يا عمك..!!
كبر
Post: #17 Title: Re: بك نستنير. تقرأ ب ك Author: عبداللطيف حسن علي Date: 11-04-2016, 09:50 AM Parent: #16
حالتي انا كنت ، ومن غرور ، قايل زينب بليل دي بقت زي لغة مروي الما قادرين نفكها حتى الآن..! وانت بكل بساطة بتقول لي بتقرا ليها شغل؟.. ياخي ، ادفع مائة دولار امريكي ، لو اقرا أي حاجة لزينب بليل..!! ــــــــــــــــــــــــــ
دا شنو يا ول ابا ......
بتتريق علي ول ايه ول اكون انا قريت حاجة لزولة تانية واصابني الزهايمر !!
Post: #18 Title: Re: بك نستنير. تقرأ ب ك Author: أبوبكر عباس Date: 11-04-2016, 09:54 AM Parent: #17
يا لطيف، يا كيشة، الراجل محتفي ب ك
Post: #19 Title: Re: بك نستنير. تقرأ ب ك Author: اخلاص عبدالرحمن المشرف Date: 11-04-2016, 10:49 AM Parent: #18
البوست ده يتعلق في استار المنبر.
لطيف نحن محتفلين ما تغلط في القرأة
Post: #20 Title: Re: بك نستنير. تقرأ ب ك Author: عبداللطيف حسن علي Date: 11-04-2016, 11:36 PM Parent: #19
ورب المجرات يا ابوبكر واخلاص ، العارفو عن كبر انو عميق لدرجة كبيرة ، عشان كدة افتكرتو بتريق علي !!
Post: #21 Title: Re: بك نستنير. تقرأ ب ك Author: جلالدونا Date: 11-05-2016, 04:02 AM Parent: #20
يا سلام يا دكتورة بوست نفسو بارد و تصالحى لى ابعد مدى اختلف تماما مع من قال تشفير هيثمنا القهوة قهوة استاربكس و الظعن ظعن ب ك س __ د/ محمط حسن كان تسوق المشوار من هناك المنتزه - المعمورة - ايتانلى و جليم لىحد محطة مصر بس اطنّك ما مشيت مينا البصل و الحواتة و رزق الله اكبر هناك فى مطعم .. سمك بس .. و ما احلاك يا بورى .. اجمل ايام الشقا عشتها فى الابراهيمية يا دكتور __ نكتب ذاتنا ... و ما فى الجبّة الا الوطن الاولى ليك يا كبر و التانية للمشرف حسيت بالمقاس قدرى .. و احتفيت أيّما احتفاء بالمقولتين ديل قبل الاستاذ بلّاض كان المرحوم بندة و غنّى غناهو استاذنا النعام ادم و فى البال محمد الحويج و مين احلى من حبيبتى مين الحاجات جميلة و ساكنة جوّوه جوّة العصب الما عارف كم و كمين داك كدى عاين دة الصيد العوّام يازول و مالو جنيهى العوموهو يعوم كيف و هو ما بعرف يعوم و شكلو الغرق حاصل و معاهو الحوار كمان ما علينا .. هو نحنا فى ايدنا حاجة ___ الاتبراوى يا كبر عمل جميل متجدد و خيال جميل يسرح بيك لى حد من بف نفسك يا القطار بس قولنا فيهو انه ليس بشعر .. حتى و لو عستوهو بالحداثة و ما بعد ما بعدها هو فى حسابى نثر فنى و يجب ان نحسه من الحتّة دى نرجع للصيد العوام يا زول هاك ليها بى صوت نصرة و خلينا ال ننقرض قرض و نمرض مرض
Post: #22 Title: Re: بك نستنير. تقرأ ب ك Author: جلالدونا Date: 11-05-2016, 04:38 AM Parent: #21
معقولة يا كبر لمّا تحدثنا عن السنين الضوئية و محمد مسكين مثال لذلك ياخى الهلالاب فى جزئية من موسيقتا بقولو حلاوة جكسا و المريخاب بقولو حلاوة ماجد بتعرف جكسا يا كبر و بتعرف ماجد يا كبر لو بتعرفم .. اكيد بنعرف استاذنا محمد مسكين خت السنين الضوئية وا طا هاك دى عنوة بى اسم ابقو عشر ة على البنية قوقلا و قوقل قوقل ذاتو لو يأتيك بخبر يقين و فيها ما فيها تتغزل فيكم تأمّل تتكتب جوّه القوافى و تبقى ليكم ارتعاشة فى تواشيح الاسية و ابقو عشرة على البنية ياخ شوف الحتة دى الامل منّو و عليهو ما بكلّمك بالباقى عشان داير افوتك بى خمسة شهور ضوئية بس نفس الزول ال غنّى دى بغنى لقيت الناس حزينة وجوها و بلّاص برضو ربّنا يديهم و يدّيكم الصحة و العافية
Post: #23 Title: Re: بك نستنير. تقرأ ب ك Author: عمر التاج Date: 11-06-2016, 06:57 PM Parent: #22
+
Post: #24 Title: Re: بك نستنير. تقرأ ب ك Author: محمد على طه الملك Date: 11-06-2016, 07:31 PM Parent: #23
عجبتي ب ك بتاعت د. إخلاص .. بس لو زادت ليها ألف ؤ با ء كان ضافت لاسكنر مصطفى مدثر ميزة جديدة .. انا المستغرب ليها هو مصر يوقفوا معانا في صف واحد ليه؟ طيب قول وقف معانا مين البكون على راسنا ؟ اتحداه يطلّع في الكون دا كلو حاجة ما عندها راس .. من ذرة الرملة لحدت ناس غاليلو وبسكال و اينشتاين و ستيف هوكينغ وفوكو ونظارئهم ؟ مافي ريبوتات تطلع مظاهرة محتجة على ساعات العمل في يوم من الأيام .. ولا في بشر يطلعوا مظاهرة محتجين على الموت المقرر عليهم ولو في بروج مشيدة.. ولا في حمير تطلع مظاهرات محتجة ضد تمييز الخيول عليهم .. بس الحقيقة لله تصاويرو القال عليها بتاعت الخف دي مقاربة كدا .. بتخليني لسه متمسك بى رويسو دا.. التحية كاملة ليكم ما فيها فردا ناقص.
Post: #25 Title: Re: بك نستنير. تقرأ ب ك Author: اخلاص عبدالرحمن المشرف Date: 11-07-2016, 02:25 AM Parent: #24