الريد الوسيم

02:53 PM November, 02 2016

سودانيز اون لاين
فاروق أبوحوه-UNITED ARAB EMIRATES
مكتبتى
رابط مختصر

فايتاني ليه ..
وانا دابي فاتح شرفتك
نيلين من الريد الوسيم
انا لسه بيك دارة غناي
مشحونه بالشجن الرحيم
ما ساور الإحساس ندم
أو عتمة الليل البهيم
يا نفحه من روح الدعاش
أدبِّي في الجسد السقيم
هبّابه في الزمن الغباش
صبّابه بالخير العميم
يابت سماح نيلين وقاش
فوّاحه يا كل النسيم
لسه العصافير التغني
ما فتر فيها الشروق
ما نتف ريشه التجني
ولا غِشا الصمت الحلوق
لسه المكان بيك إتساع
القِبلَه و المطر ..البروق
ضرع الأناشيد المتاع
سعياً حثيثاً للمروق
شكراً نزيفاً يا يراع
والحبر أشبه بالحروق
تلك المِفَصِّده للورق
تلك المشربكه في العروق
فايتاني ليه؟
والحجوه فيك ما أتنسَمت
ما أرتد طرفها من نعاس
فاطنة القصب و إتقسَمت
لون الحَمَار وجع اليباس
لسه الشِعَب ما أتعسَمت
حمل المروق الحيله حاس
رغم الوجع إتوسَمت
فيك يا سما يا دهشه ساس
فايتاني ليه؟
لسه الأناشيد إنتظار
واللحن أصدق ما يكون
طَرَد العصافير النهار
كتَّف جناحه مع السكون
صنَت مزامير الهزار
جنَّت دروبك بالظنون
الحله والشوق المزار
في حاله أشبه بالمنون
سيف الرقاريق الهَتَك
سقف الرواكيب التخين
لا حجّتِك لا بجَتِك
حبوبه زي باقي العوين
في نومه سابعه إتلقّتك
كف الحلم سايقها وين؟
أنا لسه حارس هبتّك
فاتح ضراي نيلين
فايتاني ليه؟
لو قلت إمكن ترجعي
ما بضمن المني يستجيب
كم مره لوليتك أهجعي
رضعتك الوجد الحليب
أرجيني فيك ما تنجعي
أبقيني ضد ظني السليب
شيلي القري تيجان وقار
فوق الجبين قُبلة رِضا
مُدُنِك مدنكّله بالنضار
عاصي الصحاري ترِوضه
رشّاها حِنك ونخّلت
قُنديل وجاو طلعاً نضيد
لا بير معطله نصّلت
دلو الغنا قصرو المشيد
يا شفع الشوق الغُبش
إتلموا فيها من الضلام
باكر بنتلاقي ودُغُش
نضحك سوا عز الوجع
عز السكوت عز الكلام
ضرع الملامات الجِسام
سِعن المنامات الغمام
نملاهو ضي
يدينا ري
وكّايو كل الإحترام
ويبدا المطر نيلك يخُش
الريده والشوق والسلام
الريده والشوق والهيام
فايتاني ليه ؟..
_______________
فـ__ـاروق أبحُـ__ـوّهـ.

و اتا فتنا ليه ؟

يا سلام يا ابحوه ياخ

صحيت فى الفجه الوجود
ورجعت ل اللحظة الطعم

عارف
ده نوع النضمى والكتابة الما بشبع الزول منها

يمين بالله هسه انا كان مرقت بعد الارتواء ده
غالبا الناس ياهن المغازلنى فى الشوارع

على قول أستاذنا بشرى الفاضل

ياخ اقول ليك

شكرن

الحبيب النضير
أبوذر بابكر

آلاف التحايا المشرقه مثلك يا صديقي

ممتن علي الحروف السوامق

غيابنا ليس (بالخاتر) ..

- إن شاء الله داااااايماً (رويان) سماحه و عافيه

- يا مُغَازَل

(شكرن) و إنت تشد من أزر النشيد


يا صاحبي

" لسه الأناشيد إنتظار
واللحن أصدق ما يكون
طَرَد العصافير النهار
كتَّف جناحه مع السكون
صنَت مزامير الهزار
جنَّت دروبك بالظنون
الحله والشوق المزار
في حاله أشبه بالمنون"

دخلت ، دفعني فضولي، فحسب علمي
قد فارقت الوسامة دروب الريد منذ زمن،
فوجدته ريدً وسيما فعلاً.
سلم يراعك أخي فاروق.