جنوبيات جامعة القاهرة

05:34 AM November, 01 2016

سودانيز اون لاين
Hassan Farah-جمهورية استونيا
مكتبتى
رابط مختصر

جنوبيات جامعة القاهرة
قبل فترة حصلت قصة فرحتني جدا في جامعة القاهرة ،طالبة سودانية اتناقشت مع طالبات مصريات واحتد النقاش وصل مرحلة هجموا عليها مجموعة من البنات وضربوها ، اللحظة ديك كانت السمراء الصامته الجنوبية بتراقب من بعيد في الشلتر ، كوركت لي طالبات جنوبيات إنو في سودانية بيدقو فيها وجو هاجمين على البنات ديل وكسروهن كسر الجن 😂😂لغاية ماشردوا 💃💃 ، ساقوا البت السودانية اللي هي من بنات عطبرة واسعفوها ،،
القصة المدهشة وين 👌
قبضو كل المجموعة المتشاكلة في القسم الضابط المصري سأل البنات الجنوبيات عن علاقتن بي ست الشكلة البت السودانية الشمالية ، قالوا ليهو مابنعرفا ولا بنعرف إسما ولا دفعتنا ولا ساكنين سوى 😕
الضابط استغرب وقال ليهم وهي من دولة تانية إنتو الدخلكم شنو ؟
السمراء القلبا حار بي نهرة ردت على الضابط :👇👇👇👇
( مابنعرفا لكن دي سودانية عارف يعني شنو سودانية )؟ 😠 نعاين ليها بتتدقا ونسكت ؟!! حتى لو فصلتونا من الجامعة مابنرضى الحقارة😠 ✌✌✌
برضو في رومانيا حكى لي طبيب درس هناك في التسعينيات والحرب في اشدها بين الشمال والجنوب والعلاقة متوترة بين الاخوان الشماليين والجنوبيين ، حصلت شكلة في ديسكو بين اتنين جنوبيين اخوان مع رومانيين ، السودانيين عرفوا انو ديل سودانيين ، برضو دوروا البنية ولمن ودوهم قسم الشرطة لقوا انو مافي اي علاقة بينن 💪
السودانيين ، جنوبيين ، شماليين فيهم حاجة كدا من كرم النيل و صمود التاريخ في الاهرامات النوبية ، فيهم من شراسة الغابة والصحراء ، ماتحقر بيهم لأنو التمساح مابيهددوا بالغرق ✋كل الشكر بناتنا الجنوبيات الشجاعات شكرا شباب رومانيا لأنكم #سودانيين
جغمة أخيرة : الإنفصال دا سياسي بس بالمناسبة ، شعب واحد متعدد وصرتو مدفونة في حفرة واحدة✌👌 💝💝
سوارالدهب
منقول

الواقع يقول أن هذا الأمر ليس على الإطلاق !!!!!

(الواقع يقول أن هذا الأمر ليس على الإطلاق !!!!!)
الاخ الصادق عزالدين سلام
لم افهم شيئا... ماذا تعنى بأن هذا الامر ليس على الاطلاق؟

كنا نعاني كثير عندما نتحدث اليه ، نرفع اعيننا حتى نطال قامته الفارهة حتى نرى وجهة الابنوسي والاسنان البراقة الناصعة البياض ، وابتسامتة لا تفارق محياه ، كان من المميزين في الدراسة ومن الاوائل في كل شئ دراسة رياضة اخلاق كل شئ ،، ومع ذلك كان يجلس في (الكنبة) الاخيرة وذلك لطوله الذى يبلغ مقدار اثنين متر ،ولن انسى ولن ينسى اولاد دفعتنا عندما اتى معلم جديد في المدرسة واثناء ما هو يلقى الدرس قال له (الزول الورا دا اي انت اقعد في الكرسي ما تقيف على حيلك) فضج الفصل بالضحك وايضا هو ضج بالضحك بصوت عالي واكتشف المعلم انه يجلس على المقعد ولكن هو طوله الفارع ،، كان من اميز الطلاب في مادة اللغة العربية وبل في كثير من الاحيان كان يتحصل على الدرجة الكاملة في اللغة العربية مما جعله مصدر فخر للمعلمين ومضرب مثل في المدرسة لتفوقة ونبوغة في كل المواد وبالاخص اللغة العربية مع ان هذه اللغة ليست لغته ومع انه يتحدثها بالكاد وبصعوبة ، لم نحس ابدا معه باي تفرقة او نوع من انواع العنصرية كنا ناكل (فتة الفول) مع بعضنا وكنا نمزح في كثير من الاحيان بان نساله لماذا تقومون بخلط البسكويت والطحنية مع الفول ، كان يضحك ويابى ان يخبرنا وذلك بتعلله بان هناك سر لن يخبرنا به ، لم يكن يغضب منا ومن اسالتنا الساذجة في ذلك الوقت ، كنا صغار في العمر ولكن كنا في قمة الفهم والادراك بان العنصرية شئ بغيظ ،، كان يحب العلم والتعلم وفي سبيل ذلك كان يركب الصعاب حتى يصل للمدرسة ، كان يسكن في اطراف (الحاج يوسف) ولكنه كان اول الطلاب حضورا للمدرسة ، لم اتذكر قط بانه تم عقابة لتقصيرة في اداء واجباته ، كان محبوبا من كل المعلمين ومن جميع الطلاب كان صديقنا ، كان يشجعني على تعلم اللغة الانجليزية وقام بتسجيلي في الكنسية لدراسة اللغة الانجليزية في الفترة المسائية وهناك تعرفت باخته تريزا كانت مثله في الطيبة ، كنت اسمع اهازيج وترانيم الكنيسة كنت اشاهد هذه الاهازيج وهذه الرقصات الجميلة
انه كوال الفتي الدينكاوي ، لم اراه منذ 30 عام ، تذكرته عند انفصال الجنوب وتذكرت اخته تريزا وتذكرت مئات والوف من اخواننا الذين تقاسمنا معهم كل شئ حتى السماء
اخواننا الجنوبين اتمني لكم من كل قلبى دولة مزدهرة متطورة ديمقراطية واتمني لاخي كوال واخته واسرته كل خير

ابراهيم عبدالوهاب
نوفمبر2011م

أثرتم الشجون..
وبعد ما قلنا نسينا الكلام دا،خليتوا الهرمونات تتدفق في السكك القديمة..
هناك وجوه، أراها تتقافز أمامي الآن..
أشخاص شحنوا المكان بالصدق والحيرة معا..وبإحساس المرارة من القدوم في التوقيت الخاطئ..
وأيضا ثمة آمال خديج ،مثل الطفل الذي لايترك للأطباء سوى تنبوء واحد بمصيره،
وأحلام مثل طيور الليل لا يمكن أن تميزها ،لكنك ترى لمعتها عندما يصطدم بها ضوءٌ ما..
بصرف النظر عن دقة الأخبار،فاليقين ثابت في مرجله..ينتظر بصيصا من فرصة جديدة..
لكن انتهى زمان الفرص التي تأتي..
وهذا زمان الفرص التي تنتزع..
الظعن،والكسل عند الأقامة،والتسويف..هي الأشياء التي تمنعني من فتح بوست مثل هذا..
أنا مؤهلٌ جدا ،للكلام عن مثل هذا

الأخ عليش الريدة لك التحية
نحلم ونتمنى ان يلمع فى نهاية نفقنا المظلم بريق ضوء وان تنطلق فى آفاقنا فرص جديدة

والله يا عليش الناس ديل طيبين طيبة عجيبة
ولكن نقول شنو بس

الاخ ابراهيم عبدالوهاب لك التحية.
شكرا لك على هذه الكلمات الصادقة الدافئة فى حق صديقك كوال وشقيقته تريزا وبالتأكيد ان هذا هو شعور كل شخص عايش الاخوة الجنوبيين عن قرب لما يتميزون به من نبل واى شئ آخر مناقض هو نتاج لفتن الكراهية المصطنعة التى خلقتها ونشرتها بعض الدوائرلكى تبرر لسياساتها وحروبها القذرة
ادعو الله ان يجمعك مرة اخرى بصديقك كوال واخته تيريزا

الاخ ابراهيم عبدالوهاب لك التحية. شكرا لك على هذه الكلمات الصادقة الدافئة فى حق صديقك كوال وشقيقته تريزا وبالتأكيد ان هذا هو شعور كل شخص عايش الاخوة الجنوبيين عن قرب لما يتميزون به من نبل واى شئ آخر مناقض هو نتاج لفتن الكراهية المصطنعة التى خلقتها ونشرتها بعض الدوائرلكى تبرر لسياساتها وحروبها القذرة ادعو الله ان يجمعك مرة اخرى بصديقك كوال واخته تيريزا

الله يخليك يا حسن
اللهم امين
والله متمني اشوف الزول دا تاني

تحياتى يا حسن والزملاء

انا قبل كده كتبت كتير عن الاحباب من جنوبنا الغالى
ولسه مصر على أنه جنوبنا ونحن شماله

وبعيد عن أمور السياسة البغيضة واحزانها المقيتة

تانى عايز اقول وعن تجارب شخصية ومعايشة لصيقة وقريبة

انى طويلة حياتى ما لاقيت ولاشفت أنبل وأرقى وأطيب وأشجع وأكرم من الجنوبيين

ولا أظن ح الاقى احسن منهم

الاخ ابو ذر بابكر لك التحية
تجارب الكثير من الناس الذين تعايشوا مع الاخوة الجنوبيين عن قرب وانا منهم تؤكد ما قلته انت
ابتعاد الناس عن بعضهم البعض يسمح بنمو مشاعر الكراهية وسوء الفهم و ونشؤ الاحقاد بين الناس وعلى العكس من ذلك كلما تقارب الناس من بعض وتعايشوا نمت بينهم علاقات الاخوة والمحبة وامدرمان خير مثال لذلك.... لقد فهم المستعمر هذه المعادلة لهذا فقد عمل على انشاء المناطق المقفولة ...
للاسف فات هذا على حكامنا بعد الاستقلال ثم طبزها النميرى عام 1983 باعلان قوانين سبتمبر واتى هؤلاء ليتموا الناقصة باعلانهم الجهاد فى جنوب السودان

العنوان لافت للنظر ..ينفع يكون مشروع بتاع عمل أدبي عظيم على شاكلة (أحدب نوتردام) :)
مداخلة إبراهيم عبد الوهاب تنفع تكون هى البوست الأصل (مع تذكير ما هو مؤنث والعكس طبعا) :)))



تحياتي،،

تحياتي،،
ـــــــــــــــــــــــــــــــــــ

مداخلتك واضحة بالنسبة لي،لكن (تحياتي) دي غلبتني..
تحياتي

حسن فرح سلامات لك ولضيفك الكريم الموقف جميل والله منهم .. ذكرتني مرة في سوداني جا متخطيني ووقف في باركن انا كنت منظرو وفي زحمه شديده كانت .. طواليي نزلت وكفكت جلابتي قت الليله بدقو ههههههههه لقيتو سوداني طوالي قت لي يازول الموقف حلالك هههههههههه السودانين جميلين والله