ليس المنبر فحسب ولكن .. ربما هي الحياة بصورة عامة .. تلك الحياة التي نسلكها عاما وراء عام .. غياب تلو غياب .. موت وراء موت
ليس المنبر ولكن .. هو , بالاحرى, موات ذلك التوق العنيف لمعانقة سبورة بكري ابوبكر البيضاء من غير سوء حتى نسودها نحن بالسوء, بالحب, بالمشاكسات الاليفة والشتائم عابرة القارات ..
لاشيء من ذلك التوق القديم .. طعم البامية ما ياهو يا عملات تلك الدعاية ..
ثمة اصدقاء وصديقات غابوا فما غبنا .. وجاء آخرون .. بعضهم كالملائك طهرا ونقاء .. ولن اذكر اسماء ك .. كنت لو كتبتها لابتدرت القائمة ب ود ابوسن ولكن .. هناك الكثير من الاصدقاء .. زمبلك وتلبو وحموده وجلال و .. لكن لن أكتبها وهموا كثرً.. عند كل غياب تتمدد في دواخلنا انتماءات جديدة ..
لم يكن الغياب والحضور إذن ولكن .. طعم البامية ما ياهو ؟!
هو افتقاد تام لشهوة الكتابة .. للتفاعل الأنيق .. للخصومة الواضحة والنبيلة جدا على نحو مباغت .. لتلك المحبة بين الناس ..
شيء ثقيل على الروح يمتلكك وانت تقلب في صفحات المنبر .. لا تكاد تفهم تفاصيله ولكنك تحسها تهبط عليك ثقيلة جدا .. لا شيء مأمون الجانب هنا الا المشاركة في بوستات العزاء .. بالله الواحد ما فضل ليهو الا يشارك مرتابا من احتمال طعنة غادرة في بوست للعزاء ..
نحن شعب عاطفي جدا .. نثور ونخطيء كثيرا حين نثور .. سمها حماقه .. اسراف في المشاعر سالبها وموجبها ولكن .. كل ما يتنزل عن ذلك هو والى حد بعيد حميد جدا .. وجاءنا زمان الخبث يسعى .. تسمع دبيبه في دروب المنبر وارجاءه .. تحس سريانه فيك ككهرباء مميته يحتك بك في لزوجة كجلد ثعبان مخلوع للتو .. والثعبان قريب.
لا اعلم ولكن .. طعم الباميه ما ياهو !!
.
Post: #2 Title: Re: طعم الباميه ! Author: علي دفع الله Date: 10-23-2016, 08:51 PM Parent: #1
بامية شنو ؟؟؟ يا اخي حتى ام فتفت طعمها ما ياهو !!!!
وجاءنا زمان الخبث يسعى .. تسمع دبيبه في دروب المنبر وارجاءه .. تحس سريانه فيك ككهرباء مميته يحتك بك في لزوجة كجلد ثعبان مخلوع للتو .. والثعبان قريب. اول شئ الاداك الاذن منو عشان تغيير الدعاية الموضوعية من ( وش البامية ما ياهو ) لي ( طعم البامية ماياهو ) !!!! حقو يدفعوك دية هههههههههه . بعدين الاقتباس دا راجع فيهو نفسك شوية انت قاعد ليك في شارع سوداني اسمه سودانيزاولاين شارع وكمان عالمي يعني من كل دول العالم . واكيد المختلف بكون في اي شئ .. معتقدات مذاهب .. الوان سياسية .. الوان واشكال سلوك .. اها طعم البامية اقصد وشها موش مفروض يكون ما ياهو ؟
ولك الود .. والعتبي حتي ترضي وباقة ورود بعد الرضي .
معذرة يا ود المشرف بدل الاغنية ختيت صحن البامية بي وشها الصبوح دا للمارين بهنا .. وبالهناء والشفاء .
Post: #7 Title: Re: طعم الباميه ! Author: علي دفع الله Date: 10-24-2016, 07:54 PM Parent: #5
بما انو البوست ريلاكسي يا دوك خليني اعمل كومنت لي حاجتين اول حاجة بخصوص الفيديو بتاع العقد الارفقتو تتصور العقد مما غادرو الخير حسيت بانو فقد زول ما بتعوض ..مؤثر اكتر من النو من وجهة نظري الخاصة (وطعم العقد ما ياهو) الحاجة التانية بخصوص ام فتفت اصلا نحن شلة مطاليق اتصاحبنا من سنين طويلة موزعين في كل السودان وخارجه اها مرة عندي عربية فاكيها في المنطقة الصناعية سنار اتصلت على تلاتة من اصحابي وقلت ليهم تعالوا نفطر في المنطقة عند فايزة وفابزة دي اخطر زولة بتعمل شية ..على طول جوني اها الميكانيكي قال ساعة كدة والعربية بتجهز اها طوالي مشينا على المطعم وعلى طول خشوا في السياسة والوضع الاقتصادي الخ الخ في عمك متابع للحوار ونحن ننتظر الشية والحوار اتوسع ودخلوا فيه ناس ..الراجل المنتبه ومتابع لحوارنا قام واحد من اصحابي حاول يدخلوا في الحوار ..سالو صاحبي اها رايك شنو في الوضع الصعب دا ..الراجل على طول رد عليه قال ليه كدى خليه الوضع الصعب ام فتفت دي غلوها.... صاحبي اتلفت علينا وقال ديييييشك ... ومن يومها اصبحت ام فتفت تصاحبنا في معظم قفلات حوارانا زي قفلت شعبان عبد الرحيم بس خلاص... تحياتي ليك ولي بت عمسيب الجميلة
حليل المنبر يامحمدالمشرف وكت كان فاير زى قدرة الفول .. لمن كان ترسل البوست سكروو وتعمل رفرش تمشى تلحقه فى الصفحة التانية ...
الناس حياواتها بتتغير شديد ولذلك تلقاهم مرات ينشطوا ومراات يختفوا كلياً... أنا غايتو حاسى بنفسى ماشى بوتيرة واحدة رغم إنو حياتى تقلبت وتبدلت بإنتقال من بلد لبلد ومن مدينة لمدينة ومن شغل لشغل .. ومازلت لم أحصِّل الـ١٠ألف مداخلة رغم الـ١٤ سنة كتابة .. لكين بأمانة تعلمت كتير من هذا المكان .. وأهم حاجة إنو الواحد إتعلم إنو أى مداخلة لازم تتوزن كويس قبال ترسلها .. وبرضو يخيل لى أنى بقيت ريلاكس وكووول وما بنفعل شديد وما بندهش شديد زى زمان .. ::):):)
ترباس ياخ .. زول مفتري شدييييييد يا يحي ولكن .. مفتري بي حقو مافي زول بقدر عليهو .. لا صوت ولا لسان ..
مره كنا قاعدين مع خالد عمر مكانيكي المارسيدس الشهير بشارع الخور المنطقه الصناعية .. اها عمك ترباس جاء يصلح العربية وقعد يتونس .. زول وناااااس يا يحي ..
المهم .. بعد ما صلحو عربيتو خالد عمر حب يشاغلو لما ترباس طلب الحساب .. قال ليهو يا استاذ اعتبرها مجانا لكن عندي حفلة اختي تجي تغنى لينا .. ترباس ضحك مساااافه كده وقال ليهو: يا خالد قروش التصليح رميه وااااحدة ما بتجيبها ليك :)
بقينا نفتش الماضي يا صاحبي وعايشين عليهو ..
Post: #18 Title: Re: طعم الباميه ! Author: محمد حيدر المشرف Date: 10-27-2016, 11:53 AM Parent: #9
شكرا يا كوستاوي على هذه الصورة الجميلة .. طيفور وحدر وعماد وأميرة الحبر وشذى بله وتماضر وناجي الملك وحبيب نوره ابرز الغياب الحضور ولكن .. صورة نادية يا كوستا .. صورة نادية ياخ !! يا الله يا الله .. رحمها الله رحمة واسعة ..
Post: #17 Title: Re: طعم الباميه ! Author: محمد حيدر المشرف Date: 10-27-2016, 11:47 AM Parent: #8
فاير زي قدرة الفول !!!
طبعا يا منير دي ذاكرة جميلة بشكل ... شكلك كنت اساسي في شلة (البوش ) .. وشلة البوش دي شلة ممتدة من المدرسة للكورة للبوش وبين ذلك شارع المدارس وما أدراك ما شارع المدارس .. احلاه - اي شارع المدارس - ذلك الكائن جوار امدرمان الثانوية بنات .. كان ذلك قبل مجيء التتار يا منير .. قبل عسكرة الزي المدرسي يوم كن البنات وكأن أغنية ابراهيم حسين قد خلقت لهن: في الليل يا حبيبي .. نورك وانت ضاوي .. حليلك وانت جنبي .. بالزي السماوي
بالنسبة للمنبر, فأنت بالفعل ممن حافظوا على وتيرة واحدة .. وأما مسالة أنك لم تصل ل 10 الف مداخلة فأظن وبعض الظن اثم أن العداد فيهو مشكلة .. ياخ انا براي بكون قريت ليك 11 الف مداخلة :)
كن بخير ..
Post: #16 Title: Re: طعم الباميه ! Author: محمد حيدر المشرف Date: 10-27-2016, 07:00 AM Parent: #7
على بن دفع الله .. كومنتاتك في السلك كما يقولون .. والخير صديق قديم (صديق قديم هذه تذكرني بدعاية بنك الخرطوم !!) ..
ميزة عقد الجلاد الاساسية انهم اصحابنا وقاموا من بيناتنا ... الجيل الاول يسبقنا بسنوات قليلة والجيل الوسيط انداد لذلك الزمن البهي في الذاكرة ..
غياباتهم مؤثرة جدا لانو كل زول بي لونيتو .. وقد لا ينتبه الناس لفداحة غياب حمزة سليمان على سبيل المثال .. ربما لقصر فترة وجودو في المجموعة .. ولكني سمعت من الخير او ابوذر لا اذكر أن غيابه آنذاك لا يعوض في مسائل تخص التوزيع او التلحين (ضعفت الذاكرة يا صاحبي !)
ثم خذ ذلك الغياب الوجداني جوانا لآمال النور ومنال بدرالدين .. هو غياب فني كبير ولكنه وجداني بصورة أكبر ولا اعلم كيف استطيع شرح ذلك ولكن ,, هناك اشياء تعلق في الوجدان بل وتساهم في تشكيلو ومنها آمال ومنال وهن يغنين ضمن مجموعة عقد الجلاد تحديدا زبذلك الزي الاخضر بصورة أمثر تحديدا ( شفت كيف ؟! )
عمر بانقا وابوذر يا صاحب .. أنور ويااااا ليلى ليك جنً .. معشوقك أوًهْ وأنً.. ياااا لذلك الغناء المشجون .. والسحيق جدا في الروح وكأنه منذ الأزل.
دمت بخير ..
شايف رسول الاستنارة الأخير بروف أمين قد طلع علينا من ثنيات الغياب .. ليك وحشه يا صاحبي مقدما وحتى آتيك أنهل من معين مداختلك العامرة
Post: #12 Title: Re: طعم الباميه ! Author: محمد مجيدو Date: 10-25-2016, 08:20 AM Parent: #1
يا دكتور .... سلام ... ولضيوفك الكرام ..
اعتقد المنبر دا يشبه لحد كبير السوق ... اذا دخلتو ممكن تلقى فيه كل ما تتوقع ... تجد كل الوان الطيف السياسي .. وكل الملل الدينية ... وتلقى المهذبين والصعاليق ... المثقفين والمسطحين ... ممكن تستفيد .. وممكن تتعوق ... عشان كدا ... الناس بقت تعمل الف حساب قبل الدخول لهذا السوق خوفا من يجيك واحد سكران يسمعك فارغة لسوء فهم منه... ========
قالو الفنان فلان .. دون ذكر اسمه .. الله يرحمو .. جاء السعودية ... والجماعة طلبو منو يعمل ليهم قعدة خاصة .. اها بقو يعملوا احتياطاتهم خوفا من المطاوعة ... الذين يمنعون مثل هذه القعدات ... وبقى كل واحد يقول سكرو الشباك .. والتاني يقول سكرو الابواب .. بقصدو اقفلوا الشبابيك و الابواب ... قام الفنان قال ليهم .. كدي الاول سكرو الفنان .....
عالم بطاالـــــــــــــــــــــــة
Post: #13 Title: Re: طعم الباميه ! Author: محمد الهادى عبد الرحيم Date: 10-25-2016, 12:47 PM Parent: #12
طالما فيها باميه اتوقع عمده بوسطن محمد النيل يشرف في بوستك ده يا ود المشرف
Post: #14 Title: Re: طعم الباميه ! Author: أمين محمد سليمان Date: 10-25-2016, 04:00 PM Parent: #13
الدوك ... حبيبنا الذي ... ياخي لعلك بخير .....
و شنو هو يا دوك اللي وشو زي ما ياهو ؟ ما ياهو ده حالنا و حال بلدنا ... ما عندنا أي شي سمح بستمر... و خليه المنبر ... تاريخنا ذاتو ... كل جيل يتحسر على الماضي !!!
لو متذكر كلام سعيد صالح في مسرحية "العيال كبرت" : ساطالب بتحرير المرأة ...ثم القضاء على المرأة ؟!! أها دي عملها حبيبنا بكري ابوبكر .... صنع البتاع ده ثم قضى عليه بنفس الصباع !!!
ياخي البورد ده كان فيهو و - ما زالو طبعا - أعضاء ممكن يديرو السودان ده علما و أدبا و فهما ...البورد ده كان قبلة الناس في السودان و بره السودان و كان حبلنا السري الرابطنا بالبلد .... فما الذي حدث ؟!! الحدث - في ظني - الذي لا يغني عن ألحق شيئا - إنو سيدنا بكري ابوبكر قدس الله سره و سر صلعته الشريفة أدار المكان ده بدون قانون أو لائحة أو حتى منطق سوى منطق فهم صلعتو الشريفة المذكورة آنفا !!!
ياخي ما ممكن أكبر موقع للحوار في السودان - و في فترة كان من الأكبر في المنطقة كلها بالمناسبة - يشتم فيه الناس و يبهتو و يساء لهم و بدون أي سبب سوى إختلاف الرأي و يكون مافي قانون يعاقب المخطئي !!! ما ممكن تفتح المنبر الصباح تلقى روحك أو زول ممن تحب و تحترم مشتوم و مأزوم و لاعنين أبو أهلو لانو في زول مختلف معاه أو معاك .... الجو بقى ما صحي عشان الزول يكتب و يتواصل و يتحاور مع الناس ... و الفلم ده مدور لحدي هسي و ح يظل مدور ليوم ألدين ... ياخي قبل كوم لقيت معاوىة المدير صحبي ...قال لكبر صاحبي يا كلب ... أي والله زي ما بقول ليك كدا ... قال ليه يا كلب تقربا لله بعدين ده كلو كوم ... و كونو بكري عندو ناس هنا لا يسألو عما يكتبو ...بل هم يسألون ... ده كوم تاني !!! يبقى طبيعي إنو ناس كتيرة تفر من المنبر فرار السليم من الأجرب !!! طبيعي الناس تتسرب من محل ما آمن للكتابة و تبادل الأراء !!
لكن هل بكري وحده لا شريك له هو المسؤل عن إنو البورد بقى في حالتو الهسي دي ؟! اللهم لا ... فكلنا شاركنا و بمقادير مختلفة في التدهور بل الموت البطئ الحاصل ده .... كلنا شاركنا بالشين... ببساطة لاننا كلنا سودانيين ... سودانيين يا دوك ... ظراف و لطاف و حبوبين طالما متوافقين في الرأي ... لكن لمن نختلف ما بنفرز الزول من رايو ... بننفش من طرف !!! طبعا ده غير أسباب موضوعية تانية ما عندها علاقة بالبورد أساسا منها توفر البدائل كدار ابننا مارك و وسايط التواصل الاجتماعية التانية !!!
تعرف يا دوك ...أنا لي سنين ما كتبت هنا ... مرات بمر شهور ما بجي اقرأ ذاتو ... لكن المكان ده عجيب جدا ...طوالي في البال و في الخاطر !! س. أونلاين ده أنا عرفت فيه ناس لو انفقت كل ما في الأرض ما كان عرفتهم براي ... عرفه بقت علاقات حقيقية ما إنتهت لمن طلعت من هنا لكنها مشت على الأرض كما يمشى السلام و الحمام و و الحاجات السمحة كلها !! ياخي شهر خمسة الفات مشيت السودان إجازة .... قعدت تلاتة اسابيع ما بمر يوم ما فيني حتة بتحس بالوجع على فقدان العوض .... السودان بدون العوض المسلمي نقص نصو يا عمك !!!
الشاهد يا عزيزي ... إنو البورد ده فيهو سودانيين كتار عشان كدا ما ممكن كان يستمر ناجح ... نحن لعنه الله على أرضه يا دوك ... أنا و إنت و بابكر عباس و الناس البتكتب و الوقفت و الح تكتب و ألح تقيف...و كل متعلمي بلادنا إلا من رحم ربي ... و صدقني ... في الحته دي بالذات ما رحم كتير - نحن لا نعرف العمل الجماعي... نشخصن الخلافات و نسئ ببعضنا الظن ...نبرع في الدسائس و المؤامرات ... لنا في الحسد راية و في تبخيس أشياء بعضنا رايتان ...و القصة دي على كل مستوى و في كل مجال و إلا سمي لي انجاز سوداني واحد مستمر !! الفشل السوداني صار علامة مميزة نتوارثها مع "ديننا و اسمنا و قميص الفتن" ... يبقى مافي مشكلة لوالبورد بقى فاشل و وش البامية ما ياهو ... فالاصل في أشيائنا الفشل !! كن بخير يا عزيزي و اعفي لينا النقة الكتيرة دي
الأخ الصادق عبدالله الحسن سلام معطر.. ممكن ملاحظة خارج صندوق البوست؟ وهى بخصوص تلوين المداخلة بهذا اللون الأخضر الغامق .. طبعاً بنحب الخضرة واللون الزرعى وأى شى :) بس ملاحظتى على عمق اللون الذى يجعل الـcontrast عالى مابين الباكقراوند والكتابة، والذى ربما يرهق النظر لبعض ضعاف النفوس زى حالاتى كده :) .. فلذلك أقترح أن تخفف الـcontrast بإستعمال أخضر فــــــــــــــاتح ، أو لَبَنى فــــــــــــاتح زى لون علامة الإستفهام البتجى ناطة من صندوق بروفايلك ده .. والــلا رأيك شنو ؟؟ .. :):):)
Quote: فلذلك أقترح أن تخفف الـcontrast بإستعمال أخضر فاتح ، أو لَبَنى فاتح زى لون علامة الإستفهام البتجى ناطة من صندوق بروفايلك ده
تم تعديل لون الباك قراوند في المداخلة في الأسفل بناءً على رغبة الأخ (منير عبدالرحيم) وعلى الدكتور منير أن يشيل شيلته مع الدكتورة (فاطمة الحاج) التي سبق وأبدت إعجابها بالأخضر الليموني بحسب ما جاء في هذا البوست: أعيدوا لها حقها والقرار يا منير بيدك أنت وصاحب البوست إما أن تقنعوها باختياركم، أو أن تعيدو إليها حقها.
وحتى يتم فض الاشتباك ويحُسم الأمر بينكم والعزيزة فاطنة، نعيد إليكم في الأدنى نص مشاركتنا السابقة وهذه المرة ليس بلون فاطمة أو لون زينب، وإنما بلون منير (ضحححححكة).
أحسستُ بطعم ام فتفِت و"المرارة" في مداخلتكم الأولى ولحسن الحظ فإنني عندما تذوقتُ طعم البامية في مداخلتكم الأخيرة، شعرت به عاد طاعماً حُلواً:
Quote: ترباس ضحك مساااافه كده وقال ليهو: يا خالد قروش التصليح رميه وااااحدة ما بتجيبها ليك
فيا أخي مشرّف، والله أنا معجب كثيراً بمداخلاتك وحريص على متابعتها يا ود المشرف، وأحب ذوقك وأناقتك وبعيرك وناقتك، وأعشق بياض ولفّة عِـمّتك.
وعلى ذكر العِمة يا دكتور فأنا معجب أيضاً بعَمّتك الدكتورة إخلاص وقلبها الأبيض ومشاركاتها النشطة بلا تحفظ ولا تردد والحيوية التي أضافتها للمنبر، والتي شرفتني بزيارتها أكثر من مرة في بوستاتي المحدودة، بل وتحملّت عني – مشكورة– عبء أحد البوستات عندما نفد رصيدي لدى بكري، وأيضاً بعدما جف ونبض معيني في القدرة على المتابعة والكتابة، وسهِرتْ هي الليل كله مع البوست أمسية الانقلاب الفاشل على أردوغان.
فنأمل أن تحذو حذوها، وأن "تَـفْصِل" أنت شوية معنا (على قول الشماشة) وتشرفنا ولو بُنقطة أو حتى بفاصلة.
وإلا فإننا سوف نكون مضطرين إلى الذهاب وانتظار طلّتكم في ورشة ذلك الميكانيكي وبرفقتكم ذلك "المفتري الفنان" صاحب الصوت الرنان التريان – كما وصفه البليغ قباني- لنطلب منه أن يشنف آذانك بـ (ما بنمشي لي ناس ما بيجونا) ونتخذها دستوراً في تعاملنا معك.
وبالعودة لطعم البامية يا مشرّف، فكثيراً ما تفلت في مداخلاتنا بعض (التعابير حمّالة الأوجه) كما سبق لكم وأسميتها في البوست الخاص بـشبكة وزير المالية: والحشاش يملأ شبكتو
تلك التعابير والكلمات يا مشرَف تخرج من كيبورداتنا كالرصاص الطائش، لا يدري الواحد منا أحياناً أين أصابت، وما هي ردود فعلها في نفس حبيبه في المنبر إن كانت قد صابت أو خابت، وما قد تكون أحدثته من خدوش وأحياناً جروح في نفس ذلك الزميل الحبيب. فأغفر لنا يا أخي إن كنا قد هفونا أو نسينا أو أخطأنا.
سلامات ياالصادق وشكراً لتجاوبك مع ملاحظتى المتواضعة.. وياسلام على اللون الأزرق السماوى الصافى .. ذكرنى قميص الإبتدائى بتاعى الزمان فى أيام السبت ــ غسيل ومكوة صاح 🙂ــ وأظن الأستاذة فاطنة الحاج ستوافق أن اللون الجديد أكثر جاذبية وراحة للعيون ــ وآسفين لو خربنا مزاجها ــ .. ده لا يمنع إنو حسب مزاجك الرايق تعمل تنويع بين الأزرق والأخضر الفاتح وحتى البنفسجى والوردى .. بس أبعد من اللون الظلامى المنير ، يقوم يطفش االقراء 😎..
عزيزي دكتور المشرف تسلم يا صديق وهون عليك، حال المنبر يا هو من حال السودان كما قال بروف أمين.. واصل وثابر في فتح منافذ الحوار كلما تسهلت، وتأكد أن مجموعة كبيرة من الزملاء والاصدقاء هنا حامياهم المعايش بدرجة من الدرجات. بنتاوق مرة مرة وكان عندنا كلمتين مفيدات بنساهم بيهم. التحية لك وللقابضين على جمر القضية. مودتي إبراهيم
تشكر يا صاحب كما يشكر الاصحاب بي هناك هيثم وصحبه وش البامية ما ياهو في حاجة مااياها صعود تلك الروائح المنتنة كما قال صنع الله ابراهيم تلك الرائحة في حاجة ما صحيحة قال ليك الماعاجباهو ماهية الحكومة يخش سوق الله اكبر ..هسة زي دة تقول ليهو شنو . بي الله دة منطق زول جاهل !! يعني الحكومة كلها عملوها سوق الله اكبر والسوق قدح النبي انت قايل يا ودالمشرف الناس هنا بتموت بالمرض بس تموتو ساكت ناقصين فرحة
Post: #30 Title: Re: طعم الباميه ! Author: محمد حيدر المشرف Date: 10-29-2016, 11:18 AM Parent: #14
تعرف يا بروف !! جيتك بالدنيا يا صديقي .. هذا الكلام لا يحتمل ادنى قدر من المجاملات الفارغة ديك .. ده كلام حقيقي جدا .. وجودك في هذا المكان -في حد ظاتو- مسألة جمالية باذخة جدا يا عزيزي ..
وكما ذكرت أنت .. تلتقي في هذا المكان بكائنات لطيفة جدا لم تكن لتلتقي بها على الاطلاق .. ما إحتمال أن ألقاك خارج جدران هذا الحوش المتهالكة وكأروع ما تكون الجدران متهالكة في أي زقاق امدرماني حميم ؟!
ما إحتمال أن التقي ب عماد عبدالله .. حبيب نوره .. ود جبرين .. خدر .. خضر .. دكين والخ مساخيت العالم السمحين في غيابهم القريب بمضارب مارك بن زوكيربيرغ ..
لهذا المكان يد سلفت ودين مستحق بالتأكيد وبغض النظر عن ادارته وملكيته يا عزيزي .. شخصيا قبل كم يوم كده براي قررت انو اعمل دي-آكتيفاشن لصفحتى في الفيسبوك .. وما ذلك الا لعدم قدرتي على التعامل المريحي (الاريحي) مع تلك الصفحة .. تزعجني الرسائل الكثيرة وطريقة عرض المداخلات واستباحة حياتك الشخصية لاقصى الحدود.
هذا المكان -كرأى شخصي- يحتاج لمراجعة عميقة جدا لطريقة ادارته بالتاكيد ويمكن أدارته بطريقة افضل مافي ذلك شك ..
م على سبيل المثال .. ما الذي يمنع الادارة من الاستعانه بمولانا محمد على طه الملك ومولانا ود شيقوق ومولانا كبر ومولانا محمد المرتضى حامد في مراجعة لوائح وعقوبات المنبر مستلهمين في ذلك تجربة ال15 سنه الفاتو وطبيعة الصراعات ومقدار الضرر الواقع على المنبر وعلى الاعضاء بالضرورة .. لاسيما وأن هناك -كما سمعت- محاولات لتقنين ما يتعلق بالمجال السايبيري وما ينشأ فيه من نزاعات الخ ..
هذا الامر لا يتعارض -حتى- مع الادارة الصمدية لسيدنا بكري قدس الله سره كما تقول .. أكرر كما يقول أمين
اعتقد انو اقتراحي ده وجيه جدا جدا وعميق جدا جدا .. ذلك العمق الذي رميتني به في اول تداخل بيننا اذ الحقتني عنوة كده واقتدار منك بالناس العميييييقه .. ههههههههههه
ياخي تعال !!
Post: #28 Title: Re: طعم الباميه ! Author: محمد حيدر المشرف Date: 10-29-2016, 06:35 AM Parent: #13
الاخ العزيز محمد الهادي عبدالرحيم كيفك وكيف كيفك يا صديق ..
يبدو أن عمدة بوسطن مولع بالبامية .. لست كذلك .. أنا من أنصار أم رقيقة .. وتلك سلسلة غذائية وثيقة الصلة ب "الشًيًة والضلع وحسن أولئك طعاما" .. وأما البامية فتنتمي -نوعا ما- لقبيلة القراريص وأنا كسرابي على السكين كما هم اهل أمدرمان
Post: #27 Title: Re: طعم الباميه ! Author: محمد حيدر المشرف Date: 10-29-2016, 05:52 AM Parent: #12
عالم بطااااله !!
أذكر الآن فداحة سوء الفهم الذي قاربت به عبارتك المحكمة هذه يا سعادة اللواء مجيدو ...
كنت قد شرعت في كتابة رد على مداخلتك أول البارحة .. وكانت العبارة حاضرة, بيد شواغل الحياة شغلتني عن اكمال الرد ..
البارحة كنت مع السيد الوالد في حوار ... وكنا قد قد قدمنا العزاء للعم فيصل كبلو في وفاة اتننين من أبناء عمه عوض كبلو (محمد وخالد), رحمهما الله رحمة واسعة, المهم في نص الحوار قال لي الوالد: ديل ناس كويسين ... وكان يشير نحو نفر خصهم بتلك العبارة
ديل ناس كويسين !!
تفكرت في العبارة فوجدت أنها تجيء في مقام التخصيص والاستثناء .. وكانت عبارتك حاضرة في الذهن ( عالم بطااااله ) .. فتمتمت معك (عالم بطاااااااله ) .. وتمتمت مع الوالد في مقام الاستثناء (ديل ناس كويسين) !!! ..
أتمنى أن تزداد رقعة الذين قد تحتملهم هذه العبارة (ناس كويسين) في هذا المكان على الاقل !!!
وجاءنا زمان الخبث يسعى .. تسمع دبيبه في دروب المنبر وارجاءه .. تحس سريانه فيك ككهرباء مميته يحتك بك في لزوجة كجلد ثعبان مخلوع للتو .. والثعبان قريب.
لا اعلم ولكن .. طعم الباميه ما ياهو !! >>>>>>>>>>>>>>>>>>>>>>>>>>>>> سلامات ياود المشرف الفهم كمل تقبل المرور
Post: #31 Title: Re: طعم الباميه ! Author: هشام كمال عبادي Date: 10-29-2016, 11:58 AM Parent: #29
التحية لأخي ود المشرف وجميع الاخوة الافاضل..
فعلا تبدل حال المنبر كثيرا خلال الثلاث سنوات الماضية ، ودخل نفر ليس بقليل معرك الكتابة في المنبر ، وأقول معترك وفي بالي كلام اخي منير ان الكتابة في المنبر تحتاج إلى حصافة ومراجعات لكل مداخلة تكتب هنا .. ولا ابرر ان ظاهرة الاختفاء الجماعي لبعض رموز المنبر واصحاب الاقلام المحترمة كان بسبب نقاشات غير مثمرة او بسبب بعض التعديلات في القوانين المنظمة للمنبر والايقونات التي تسببت في اختفاء المداخلات ، ناهيك عن صعوبة تطبيق اللوائح في بعض الاحايين .. الذين تركوا المنبر لديهم اسبابهم الخاصة والموضوعية في وجهة نظري ، ولكن والله يعلم لا زلنا نتواصل معهم عبر الاسافير في غيرما موقع اجتماعي او عبر الرسائل والاتصال الهاتفي ..
المنبر فقد بعض شخوصه ولكنه لم يفقد رونقه وعبق الكتابة فيه .. ومثلي كثيرون ممكن نعتبر انفسنا اصحاب كتابات موسمية .. ولكن متابعين كل ما يدور في اروقة المنبر العام..
لك التحية مرة اخرى ، ودعواتنا معك لعودة بقية الاخوة البورداب ..
بالنسبة لإدارة المنبر يامحمدحيدر ــ رغم أنى لا أدرى ما يدور خلف كواليس هذه الصفحة الصفراء إلاّ أنى أقر بأن الأخ بكرى توفق كثيراً فى إبقاء هذا المنبر حياً، وبقائه هو بعيداً عن الواجهة لا يتدخل فى خير أو شر إلاّ فى التهنئة فى الأفراح والعزاء فى الأتراح .. والله أنا مستغرب كيف إنه ماسك نفسه من إقحامها فى أى نقاش قد يؤدى بحياده فى مهب الريح وومن ثمّ يودى بمن تبقى من الأعضاء.. وأنا مقدِّّر صعوبة التحكم فى الأسافير إذ أن الآراء والشتائم ترسل عابرة للقارات فى أى لحظة من الزمان ومن أى بقعة من المكان ومن أى كائن كان ــ واعى أو سكران ــ وبمجرد إرسالها تصبح كما الرصاصة لا يمكن إيقافها بعد إطلاقها .. إذن بكرى لن يستطيع صد هذه الكتابة التى ليست فقط مباغتة ــ لا ينفع معها درع صاروخى ــ بل أن حتى الناس ربما اختلفوا فى إدانتها فمنهم من يتضرر منها شخصياً ومنهم من تسره عديل كده .. ده غير إنو بكرى لمن يصحى من نومه فى غرب الأرض عشان يقرأ إساءة مضمنة فى مداخلة مرسلة من شرق الأرض وتكون محشورة فى ثنايا بوست مغمور من كاتب مغمور ، وتكون الإساءة ذاتها فى شكل إيحاء أو تورية أو إستعارة أو أو أو .. فمتابعة مثل هذه الإشكالات سوبرمان ذاته ما بيقدر عليها .. أها لمن بكرى يصحا ويدعك عيونه من النوم يكون سبق السيف العذل .. المهم أقول إنو أى زوول دخل الإنترنت دى بكامل إرادته وبياناته وطفق يجهر بآرائه فهو يكون قد وضع نفسه عرضة للنقد والهجوم أو حتى القتل .. فليشيل شيلته .. إن لم تخنى الذاكرة فأعتقد أنك قلت ذات مرة إنو أفضل تكتب فى الفيسبوك، مثلاً، بين أصدقائك وغير اللايكات ما بتجيك الحبة ــ العبارة عجبتنى حينها :)ــ لكنى أقول بيئة المنبر أكثر حيوية لأنك تكتب آراءك فى مواجهة أصدقائك وأعدائك وللذين تعرفهم ومن لا تعرفهم ، وبذا فكتابة الرأى فى هذا المكان أقوى ألف مرة من الفيسبوك والواتساب والصحف السيارة .. وأضيف لملاحظة الأخ هشام كمال عبادى أن المداخلة حول تمحيص المداخلة قبل إرسالها، برضو إما أنها ستكون صدقة جارية فى ميزان الحسنات، أو كمان سيئة تلاقيك مكتوبة باليوم والساعة والدقيقة فى صحيفتك يوم القيامة حيث لا هاكر يمسح الارشيف ولا بكرى ولا يحزنون .. 😑
Post: #33 Title: Re: طعم الباميه ! Author: قسم الفضيل مضوي محمد Date: 10-29-2016, 06:48 PM Parent: #32
قيل أن الشيخ فرح ود تكتوك قال في وصفه للدنيا (انه الدنيا دلوكة وكل زول بياخد فيها عرضته وبتخارج) ... بناء عليه يمكننا اعتبار سودانيزاونلاين دلوكة وكل عضو بيجي ياخد فيها عرضته وبتخارج
؟!! أها دي عملها حبيبنا بكري ابوبكر .... صنع البتاع ده ثم قضى عليه بنفس الصباع !!!
مع الدكتورة (فاطمة الحاج) التي سبق وأبدت إعجابها بالأخضر الليموني