Post: #1
Title: راجل الدكتوره
Author: عباس الدسيس
Date: 10-20-2016, 02:00 PM
Parent: #0
01:00 PM October, 20 2016 سودانيز اون لاين
عباس الدسيس-Saudia
مكتبتى
رابط مختصر
اخوانا المغتربين وجايين مرافقين لزوجاتهم الطبيبات بواجهو عدة مشاكل وعدم استقرار عائلي الموضوع ما استبيان يوضح النسبة الاعلي هنالك من تختلف ظروفهم انا غايتو لاقتني كم حالة بقول منها واحدة.
زول بسيط متزوج قريبتو طبيبة بلاقيهو دائما في المدرسة رفقاء توصيل للاولاد فرق الدقايق بنتناول الاحاديث عن الحياة ومعاناتها حكمة الله ما حصل لاقيتو ما خاتي السفة ((الصعوط))
وانا بطبعي من الشخصيات المتقلبه في الكيف مرة سجاير ومرة تمباك حصل لي التهاب قررت اخلي السجاير وابقي علي التمباك صادف اخونا راجل الدكتوره خلي التمباك
الراجل كل ما إلاقيني اديني محاضره عن التمباك بعمل السرطان وحرام وكلام كثير عن اضرار التمباك وكنت ممشي ليهو الموضوع
يوم جاء لقاني زهجان بدأ معاي الموال بتاع توبة التمباك بهدؤ سألتو أنت يا فلان كنت بتسف كم سنة ؟؟؟
قال لي 35 سنة.
قلت ليهو عليك الله ما تبقي لي زي بتاعين الهيئة المطوعه انا بعتبر دي ثقالة منك وعدم زوق ياخ انا زول صغير مالك ومالي انشاءالله اشرب بنقو ولا امشي في الشارع ميطي كرهتنا المدرسة وكرهتنا البلد ذاتا.
الراجل فتح خشمو اندهش ما اقدر ارد لي .
بعد مشيت منو حسيت اتصرفت معاهو بطريقة ما جميلة لازم اعتزر ليهو تاني يوم انا واقف تحت الشجرة حسيت بيدو في كتفي واعتزار منو قال لي :
انا ما لي حق ادخل في خصوصياتك .
فعلا اكبرت الحاجة دي فيهو بس خربها بعد ما اعتزر قال لي ((برضو الصاعوط حرام ةبجيب السرطان مفروض تخليهو)) ... يا ديني النبي الزل دا اقصد شنو ما حا اتفعل المرة دي حا اتعامل معاهو حسب طريقتو.
قلت ليهو ولا اهمك الصاعوط حرام ربنا اهدينا زي ما هداك بس يا اخونا شايفك زهجان مالك تحمد الله متزوج ليك دكتوره راتبا دقشه توصل الاولاد وتمشي تشتح كرعيك في الحيطه وتنوم.
رد... يا زول انت ما عارف ساكت انا خليت الشغل في المكتب العقاري ما جايب حقو اشتريت لي عريبة موية ((وايت)) مليتو واقف ليهو ثلاثة اسابيع زول ما اشتري مني الموية والله مكلفنا أنا والمرأ 130 الف ريال.
طيب يا زول الموية ما بتكون عفنت امشي دفقا واملاها تاني؟؟
يا زول انت ما نصيح انا ماليها بستين ريال كيف ادفقها انت قايل دا السودان والله ان تقوم فيها نجيله ما ادفقا.
بيع عربية الموية وشوف ليك شغله أحسن ؟؟؟
عملت لي مخبز بتاع رغيف يا زول بجاي بجاي لقيت نفسي خسران عشرين الف ريال عشان افكو قلته الروب
انت في دا ولا المصيبه الكبيره الشغل خليهو الشفع عشان التربية جبنا لينا شغالتين اندنوسيات طلعن ما نافعات
مشيت طلعت تاشيرة بتاعت اثيوبيه من طلعتها الجرايد قابلني ليك اثيوبيه ضبحت اطفال كفيلها اثيوبيه حرقت شقة كفيلها
والله العظيم التاشيرة ذاتا محل ختيتها بقيت ما اهوب عليها من خوفتي من عمل الشغالات الاثيوبيات
وصلنا لي قرار انا والمرأة نجيب من السودان طلعنا عاملة منزليه وجبتا اختي كبيرة قاعده مع الاولاد بعد سنة قلنا ننزل اجازة جانا خبر العاملة المنزلية ما بخلوها تجي راجعه تاني
قلنا ليها اقعدي هنا نمشي ونجيك حلفت ستين يمين كان تمشي معانا حسي لينا ثلاثة سنين ما نزلنا اجازة
اطقسنا قلنا نعرف العاملة المنزلية ليه ما بخلوها ترجع تاني رجعنا للجرايد وكمان المرة دي معاها صعاليق في الانترنت قالو عاملين حملة عشان بنات السودان ما اشتغلن شغالات
عليك الله ديل عندهم شغلهم قاعدين في المكاتب والعبو بالكمبيوترات مالهم ومال بنات السودان انشاءالله ادردقن في الواطه ما حسي قاعدات في السودان ابيعن الشاي والخرشه الكاروشه التمسكهم كلهم ناس النت ديل.
يتبع...............
|
Post: #2
Title: Re: راجل الدكتوره
Author: ادريس خليفة علم الهدي
Date: 10-20-2016, 02:20 PM
Parent: #1
ركس يا حبيب .. متابعين
ماشي اجيب البنبر والعبار ...
|
Post: #3
Title: Re: راجل الدكتوره
Author: ناصر حسين محمد
Date: 10-20-2016, 02:24 PM
Parent: #1
ههههههههههه
عبس ياطاعم
مناظر متكررة وياها ذاااتها
حنك التمباك
وسبت الشغل لانو ماجايب حقو
وعملت فرن او حلاق
والشغالة خسرانة معانا
وجلبطة
|
Post: #4
Title: Re: راجل الدكتوره
Author: عباس الدسيس
Date: 10-20-2016, 02:39 PM
Parent: #3
Quote: ركس يا حبيب .. متابعين
ماشي اجيب البنبر والعبار ... |
ادريس يا صديق اخبارك مشتاقين
البنبدر والعبار والليلة خميس ايامك يا جميل
|
Post: #5
Title: Re: راجل الدكتوره
Author: عباس الدسيس
Date: 10-20-2016, 02:42 PM
Parent: #3
Quote: ههههههههههه
عبس ياطاعم
مناظر متكررة وياها ذاااتها
حنك التمباك
وسبت الشغل لانو ماجايب حقو
وعملت فرن او حلاق
والشغالة خسرانة معانا
وجلبطة
|
ناصر يا وجيه اخبارك
في ناس عشان الترطيبه عندهم مليون عذر كلو بتمنو يا حبيب
تحياتي وتقديري
|
|