Post: #6 Title: Re: رحلة الى البطانة ... فيديو .... Author: اميرة السيد Date: 10-13-2016, 08:40 PM Parent: #5
أخونا صاحب الأيادي البيضاء ود البطانة عبد الله ود البوش، كانت فعلا سياحة رائعة في ربوع البطانة... والله يا ود البوش انا حسدت الجماعة الراكبين الإبل ديل حسادة من جوه قلبي...لأنهم عايشين فعلا حياة هانئة بدون توترات نفسية وبدون ضغوط نفسية تزيد ضربات القلب وتزيد ضغط الدم لحد انفجار الشرايين.. فهؤلاء لا يجدون ، عندما يفتحون صندوق البريد ، اكوام من الرسائل والمطالبات والفواتير والتهديدات، فهل تصدق يا ود البوش انا بلقى مرات 7 فواتير مرة واحدة وكل شركة تقول ادفع قبل بوم 15 في الشهر وإلا ....... ومرات ألقى رسائل من صاحب الشقة ، ومن شركة الكهرباء وشركة الغاز وشركة الكيبل...ونطلع الشارع نلقى خمسين مشكلة ونقيف ننتظر قطارات الأنفاق وما تلقى مرات حتة تقيف فيها... وأهلنا في البطانة راكبين الإبل في المساحات الواسعة وسط الخضار والمياه ,, والله جبارة ود ابراهيم ده اظنه اسعد سوداني... راكب الناقة ويقول الدوبيت بصوت ملائكي ولا عنده هم ولا غم.... والله اتمنيت اكون عايشة في هذا المناخ الصافي وفي هذه البيئة البرية وبدون كهرباء وبدون مواسير مويه واشرب من الترع والأنهار وناكل مما نزرع ( بس ما تقول ده من نشيد المؤتمر الوطني : ناكل مما نزرع زنلبس مما نصنع..) وجه ضاحك..) .. الآن عرفت أن حياة البادية والريف أجمل واروع حياة.... انا كنت مفتكرة البطانة شمال وجنوب شندي وبربر .. واليوم عرفت ان البطانة هي بالقرب من القضارف وعلى الحدود السودانية الاثيوبية... .. قرأت مرة بوست كاتبه ود شيقوق يرحب فيه بملكة الدوبيت سمية الحسن طلحة... وهي الآن عضوة في المنبر العام... يا ريت تجينا سمية بت الحسن وتقول لينا من روائع الدوبيت.. والله يديك الصحة والعافية
Post: #8 Title: Re: رحلة الى البطانة ... فيديو .... Author: عبدالله ود البوش Date: 10-15-2016, 07:59 AM Parent: #6
والله يا ود البوش انا حسدت الجماعة الراكبين الإبل ديل حسادة من جوه قلبي...لأنهم عايشين فعلا حياة هانئة بدون توترات نفسية وبدون ضغوط نفسية تزيد ضربات القلب وتزيد ضغط الدم لحد انفجار الشرايين.. ----------------------------------------------------------- انت بس يا الاميرة قولي عووووك ستجدين الركب في انتظارك وستكون اجمل ايام عمرك في بطانة ابو علي دعوة رسمية مفتوحة . . يا سلام على دعوتك الجميلة دي الله يديك الصحة والعافية لك مثلها واكثر مرورك دائما كالعليل مريح ومفيد تحية خاصة واحترام شديد مرفق طيه مع تحياتي لبسمات وامتثال سلمي عليهن عليك الله
Post: #7 Title: Re: رحلة الى البطانة ... فيديو .... Author: عبدالله ود البوش Date: 10-15-2016, 07:47 AM Parent: #5
كتر خيرك اتا يا الحبيب ابوبكر على مرورك العليل . . الله يدينا غفلتا تحية خاصة مرفق طيها
Post: #9 Title: Re: رحلة الى البطانة ... فيديو .... Author: نادر النور آدم Date: 10-17-2016, 06:45 AM Parent: #7
الليلة يا بطانة أب علي جاييك ربيع استقبلي ..... هنيئاً ليك والله يا شيخ العرب وانت تحقق أمنيتي المؤجلة وهي زيارة البطانة في الخريف ...... زمن السبعة خيل فوق المشمّش هزّن أضعافن خيول من المحاصات فزّن ناس علي واب علي عزوك سماحة عزّن أرووك بالدموم لامن شقوقك نزّن .... ربنا يمد في الايام ان شاء الله والأمنية قائمة والنية صادقة
Post: #10 Title: Re: رحلة الى البطانة ... فيديو .... Author: مني عمسيب Date: 10-17-2016, 09:55 AM Parent: #9
صباح خير البطانة ..
البطانة . البساطة وجمال التلقائية ..
سلام يا النشمي وضيوفك السمحين ,,,
وسلمت البطانة بما فيها .
مع وافر الحب ,,,
Post: #11 Title: Re: رحلة الى البطانة ... فيديو .... Author: اسامه العريفي Date: 10-17-2016, 10:13 AM Parent: #10
سمحتي ومن شنات الصيفه لونه اندس وجبالك لبس من الخضار واتكسى يا مرده التلين مع الجبال في الرسى فوقك زرقن الرزمى السحابو اتمسى
تواجد اختنا سمية بنت الحسن ود طلحة في البوست مطلب شعبي
Post: #14 Title: Re: رحلة الى البطانة ... فيديو .... Author: اميرة السيد Date: 10-18-2016, 01:11 AM Parent: #13
عزيزنا الفاضل صاحب الايادي البيضاء ود البوش التحيات النواضر دعوتكم السمحة لزيارة ارض البطانة مقبولة ...عشان نتعرف على الناس السمحين والرايقين والسعيدين ديل... ..وبرضه زي ما قال محمد علي الفكي حضور سمية بت طلحة مطلب شعبي.. والله يديك الصحة والعافية
Post: #15 Title: Re: رحلة الى البطانة ... فيديو .... Author: عبدالله ود البوش Date: 10-18-2016, 07:10 PM Parent: #14
تدريب
Post: #28 Title: Re: رحلة الى البطانة ... فيديو .... Author: عبدالله ود البوش Date: 10-23-2016, 08:30 AM Parent: #14
دعوتكم السمحة لزيارة ارض البطانة مقبولة ...عشان نتعرف على الناس السمحين والرايقين والسعيدين ديل... ------------------------------------------------ في اي وقت جاهزين يا الاميرة كان بقينا حيين في الدنيا والدعوة عبرك لبسمات وامتثال
Post: #27 Title: Re: رحلة الى البطانة ... فيديو .... Author: عبدالله ود البوش Date: 10-23-2016, 08:19 AM Parent: #13
الحبيب علي محمد الفكي حبابك وحباب اليوم الجابك والبكان بكانك تعال غني ودوبي ومعاك نطالب بعودة الراقية بت البطانة سمية الحسن طلحة ونتمناهو تكون بخير ومن هنا نرسل لها عاطر التحايا تجدها بخير ولك تحياتي الحبيب علي
Post: #19 Title: Re: رحلة الى البطانة ... فيديو .... Author: عبدالله ود البوش Date: 10-18-2016, 08:02 PM Parent: #12
انتسبت للبطانة ولا شنو يا حبيب ... -------------------------------- بل هي الاصل والجذور لكن المعايش جبارة يا الحبيب . . شكرا لمرورك العليل حبيبنا بقة ود شيخي الجيلي
Post: #18 Title: Re: رحلة الى البطانة ... فيديو .... Author: عبدالله ود البوش Date: 10-18-2016, 07:56 PM Parent: #11
غايتو انا مقدم ليك دعوة للترعة بتاعتنا مكان المرة الفاتت --------------------------------------- ما زي امنا البطانة لكن بتذكرنا ليها قول عووووك جاهزين لتلبية الدعوة
. . مع جزيل الشكر الحبيب اسامة العريفي
Post: #17 Title: Re: رحلة الى البطانة ... فيديو .... Author: عبدالله ود البوش Date: 10-18-2016, 07:52 PM Parent: #10
Post: #16 Title: Re: رحلة الى البطانة ... فيديو .... Author: عبدالله ود البوش Date: 10-18-2016, 07:48 PM Parent: #9
ربنا يمد في الايام ان شاء الله والأمنية قائمة والنية صادقة --------------------------------------------------------- النسيب الحبيب نادر النور ومعك تحلو الرفقة والوعد قائما أن مد الله في العمر . . الود والمحبة التي تعلم مرفق طيها
Post: #20 Title: Re: رحلة الى البطانة ... فيديو .... Author: مني عمسيب Date: 10-18-2016, 08:29 PM Parent: #16
مساء الجمال لاهل ارض الجمال البطانة ..
يا سلام عليك يا النادر ود النور الظبط لي راسي بسماحة المسدار دا .. زمن السبعة خيل فوق المشمّش هزّن أضعافن خيول من المحاصات فزّن ناس علي واب علي عزوك سماحة عزّن أرووك بالدموم لامن شقوقك نزّن سلمت يداك .. انا باقي بموت في المسدرة وناسها عقب كت في منتديات متخصصة في المسادير . وان شاء الكريم بجي برد علي البيوت من نور ديل ..
وان الكريم ملمومين في السمح ,,
Post: #21 Title: Re: رحلة الى البطانة ... فيديو .... Author: مني عمسيب Date: 10-18-2016, 08:32 PM Parent: #20
شاء جيت الحقكم كلمة شاء باقي وقعت في طرفي وما شفتها ههههههههه .
ان شاء الكريم ملمومين في السمح .
Post: #22 Title: Re: رحلة الى البطانة ... فيديو .... Author: نادر النور آدم Date: 10-19-2016, 05:36 AM Parent: #21
يا سلام عليك يا النادر ود النور الظبط لي راسي بسماحة المسدار دا .. -------------- الملكة بت عمسيب حبابك لامن تتكفي الدوبيت والمسادير ديل ياهم جونا البنحب نعيش فيهو ونتنفس هواه
أها الكلام العجبك دا كلام عمنا يوسف ود الشوبلي في دار البطانة.. له التحية والتجلة ------ وانا بقول: حباب الملكة بت عمسيب حباب الرايقة حباب اخت الرجال البيها المكارم لايقة للجود والكرم يوماتي ايدك سايقة حباب بت الكرام البلحقو المتضايقة ------ ابشري بالخير
Post: #23 Title: Re: رحلة الى البطانة ... فيديو .... Author: عبد العزيز محمد عمر Date: 10-19-2016, 06:18 AM Parent: #22
طالما اتلموا مشايخ العرب ها هنا .... فلا بد من ( قعدة وهيطة )....
تحياتي للجميع
Post: #24 Title: Re: رحلة الى البطانة ... فيديو .... Author: ابراهيم تون Date: 10-19-2016, 08:34 AM Parent: #23
Post: #26 Title: Re: رحلة الى البطانة ... فيديو .... Author: عبيد الطيب Date: 10-20-2016, 06:37 AM Parent: #25
تحياتي وسلامي ومحبتي الصادقة الأخ العامِر الفنجري حامل جينات الزينين الأول ونفلهم السمح الأخ عبدالله ودالبشوش البطانة هي مطمَّة الإبداع، وهي شجرة خلود الشعر الشعبي والأدب الرصين، وهي ضُلنا الرهين ،أدام الله عليها نعمته نحبها كما نحب كردفان وكذا كما نحب السودان كله أهديك هذه المربوعات لشعراء البطانة عبدالله ودعبدالرحيم: ضُهريك صَابَق السَّارية وصبيبو إنحتَّ وقِبْليك ساوَق أم بَرَدْ البِرمِّي سقطَّا سُحْبِك دودا فوق علاَّو ضُهورك وختَّ جبَّالِك جَبَد كُجر التِّعول وإتغتَّي ودشوراني: الضحوي إندفق صابْق المِزر ماوطَّه رخَّي جِناحُو باهْلَة أصفاحو دور ماوطَّه عمَّ فَديرة النّوق والدِّقاقة بسطّه
إلا قلوبنا من جِهة فلانة مرضتَّه ودالبلال: برقك يا أم شُروفاً شابَّة علاَّ ووطَّه شرفت لي ملامحتو أم شِلوخن سِتَّة أسيادِك بِسِنْدُوا التَّالي زمن الشِّطّه بِعشُّوا الضيف كُباد وبروك دَعول مو فتَّة ودسند: مطراً مو شَحاح كُلّ القِبل قابضَّا عبَّادِي الشِّمال سُحبا كبار بيَّتَّه مِزرك صبَّ ضحوي والتِّلوج جمَّدها خلاّ الفيخة بِتعَقْب اللَّباط غزَّتها ياخ ناس البطانة ديلا مهولين ، وأحسب إلي الآن لم يُسبل غور إبداعهم بعد، المرابيع الفوق دي لوحات من الطبيعة،عصية حتي علي ريشة الرسَّام (جبَّالك جبد كُجر السِّحاب وإتغطَّي) (خلَّة الفيخة بِتعَقْب اللَّباط غزَّتها) ثم أنظر للرِبعة الزينة والقيم السمحة (أسيادِك بِسِنْدُوا التَّالي زمن الشِّطّه) أفرحتنا أخي ودالبوس مع إنَّك شاشيت بينا، وكلَّنا ودالفكي حمد الكبير: رِكوب التَّيس منانات الجوالْس الجَضَن والْعت دُرْتِهِن شَفت الليالي إتعدَّن عسي ياعُنَّس الرَّيل الوجوهن ندَّن نازلات زَمزم العالية وقوالب ردَّن شكري للصديق دُخري البوادي الأستاذ علي كريز لإهدائي مربوعة ودالفكي حمد *والعْت دُرتهِن، والع من الموالعة وهي أكثر الشوق والحنين ، البتقوِّم شرف القلب....! *زمزم ربوة عالية، وقوالب أرض /سهل منخض،وإذا هطل عليها المطر الوَخري،تظل مخضرة طول الشتاء"بتجازي" حليل يا المَكِّي قيزانها ورعدها الكرَّة طريت الليلة عُربانها المهيلة الغرَّة شارفت ليها شاشيت وبساسِق برَّة مطبوع ريدها في أعضايا شامة وغُرَّة معزتي بلا حدود
Post: #32 Title: Re: رحلة الى البطانة ... فيديو .... Author: عبدالله ود البوش Date: 10-23-2016, 08:51 AM Parent: #26
الرائع دوما ودائما عبيد الطيب الخبير المتمكن باحوال البطانة والخلا والصي في حضرتك يطيب الجلوس نربع ايدينا نسمع وبس . . معزة شديدة ياخ مرفق طيها بكل الاحترام
Post: #31 Title: Re: رحلة الى البطانة ... فيديو .... Author: عبدالله ود البوش Date: 10-23-2016, 08:43 AM
اها معزومين امش اعمل رايح -------------------------------- ود اختي الولد السمح ابراهيم عبدالعزيز تون عاد اتا بدور ليك عزيمة يا سيد البيت لكن برضو حلف عليك كل الود والمحبة لك وللاسرة الجميلة تحياتي لك وللوالدة تحية خاصة جدا
Post: #30 Title: Re: رحلة الى البطانة ... فيديو .... Author: عبدالله ود البوش Date: 10-23-2016, 08:34 AM Parent: #23
الحبيب عبدالعزيز الشغيل ابقى داخل لا جوة واتوهط طااااااب حباب الطل الود والمحبة المعلوم شأنها مرفق طيها برفق
Post: #29 Title: Re: رحلة الى البطانة ... فيديو .... Author: عبدالله ود البوش Date: 10-23-2016, 08:32 AM Parent: #22
منى عمسيب _ نادر النور ..... تؤامة رائعة في المسادير ننتظر منكما الكثير المدهش يلا تعالوا غنوا ودوبو حبابكم
Post: #33 Title: Re: رحلة الى البطانة ... فيديو .... Author: مني عمسيب Date: 10-23-2016, 10:25 AM Parent: #29
حباااااب النشمي ود البوش اخوي الحبيب ..
ومشكور علي الترحاب . ننتظر منكما الكثير المدهش يلا تعالوا غنوا ودوبو حبابكم
عاجبني الكريم ,,, (( بعد الهجعة للضيفان بتوقد نارهم )) .
Post: #34 Title: Re: رحلة الى البطانة ... فيديو .... Author: عبدالله ود البوش Date: 10-23-2016, 11:05 AM Parent: #33
ما بتصاقعي في المسادير يا بت عمسيب كان حفظ حفاظة وكان قطع اخدر عجيب وانا زول عرضة ومالي في المسادير نصيب وعرضت زين مع اولاد البنا الغناهم خاتي عيب لحدي هنا كويسين ما يقوم علينا الضرس فرنيب اقوم اقع فوق رقبتي دي اكسرا كع كركيب وانبهلت هههههههههه ارحكاكي
Post: #35 Title: Re: رحلة الى البطانة ... فيديو .... Author: مني عمسيب Date: 10-23-2016, 11:11 AM Parent: #34
لحدي هنا كويسين ما يقوم علينا الضرس فرنيب احمد الكريم ضرسي قلعتو زماااانك . ارحكاكي تقلع ضرسك ؟ جاااهزة . هههههههههههههههههههههههههههههههههههههههههه .
لعلكم طيبة والعقاب السمح ؟
Post: #36 Title: Re: رحلة الى البطانة ... فيديو .... Author: عبدالله ود البوش Date: 10-23-2016, 11:33 AM Parent: #35
احمد الكريم ضرسي قلعتو زماااانك تقلع ضرسك ؟ جاااهزة . ------------------------------------ قلع الضرس ولا النتحي ههههههههههه منتظر حسن ولدي يخلص
Post: #37 Title: Re: رحلة الى البطانة ... فيديو .... Author: اسامه العريفي Date: 10-23-2016, 12:00 PM Parent: #36
ربنا يتم ليك ال في مرادك كلنا منتظرين حسن
Post: #38 Title: Re: رحلة الى البطانة ... فيديو .... Author: عبدالله ود البوش Date: 10-23-2016, 12:09 PM Parent: #37
ربنا يتم ليك ال في مرادك كلنا منتظرين حسن ----------------------- آمين يا رب العالمين الاخ برضو ضرسو بتاورو ول نتحي ساكت ؟ . . العريفي يا حبيب .... العروب ديل كلامن كلو تلاويح ما تقوم تجيب ليك رقبة في صمة خشمك ساهي
Post: #39 Title: Re: رحلة الى البطانة ... فيديو .... Author: عبدالله ود البوش Date: 10-23-2016, 12:12 PM Parent: #38
نادر النور اديتنا الليل ارح
Post: #40 Title: Re: رحلة الى البطانة ... فيديو .... Author: خالد المحرب Date: 10-24-2016, 05:08 PM Parent: #39
ود البوش سلام وكل زوار البطانه شددت الرحال فى اجازة العيد الاضحى المبارك الى البطانه برفقة صديقى محمد البلوى سعودى من هواة البرارى والابل وقضينا فيها اسبوع كان رائع جدا لان السنه دى الخريف كان مكتمل وواسع
Post: #41 Title: Re: رحلة الى البطانة ... فيديو .... Author: خالد المحرب Date: 10-24-2016, 05:20 PM Parent: #40
Post: #42 Title: Re: رحلة الى البطانة ... فيديو .... Author: عبدالله ود البوش Date: 10-24-2016, 09:32 PM Parent: #41
خالد المحرب يا صديقي الجميل تحية وشوق هههههههه لكن باظك انقلب طاااااااب عشان تعرف انا اهلي قروني اكتر منك ح انزل ليك الفيديو من بداية البوست كان في خاطري فيديوك من واتساب لي قناتي باليوتيوب ( اتا عندك قناة ) ههههه ثم هنا اتا قايل الحكاية حسبو شتت قصبو ساكت الحكاية دي صعبة بتعمل ليك وجع نوايط والسلام مرفق طيه للاسرة الكريمة
Post: #43 Title: Re: رحلة الى البطانة ... فيديو .... Author: عبدالله ود البوش Date: 10-25-2016, 06:25 AM Parent: #42
خالد المحرب في البطانة
Post: #44 Title: Re: رحلة الى البطانة ... فيديو .... Author: مني عمسيب Date: 10-26-2016, 10:28 AM Parent: #43
قلع الضرس ولا النتحي ههههههههههه منتظر حسن ولدي يخلص ربنا يحقق الاماني والفي المراد وتفرح بيهم كلهم عيالك .. قادر يا كريم ..
بلغلي السلام لي الكلس المحراب والحبيبة بت ابو حريرة .
ولكم وافر شوقنا ,,,
Post: #45 Title: Re: رحلة الى البطانة ... فيديو .... Author: Basamat Alsheikh Date: 10-26-2016, 01:57 PM Parent: #44
ود البوش ود البطانةو د شيخ القبائل ذو المروءة . والسوداني الأصيل .. بصراحة .. بصراحة.. نحن حسدنا خالد ود المحرب عديل كده.. ونقول اللهم لا حسادة... وان شاء الله الله يديم عليه نعمة الصحة والعافية والسعادة والهناء.. .. ونحن بننظر للخلفية في الأرض الواقفين عليها دي بنشوف ارض شاسعة خضراء ومن بعيد ابل ترعى .. ونشوف الطبيعة الخلابة,, ونحن بنسأل الواطة الخضراء دي عندها سيد ولا ارض البطانة كلها بهذه الروعة والجمال الخلاب...و من الصورة بس شمينا روائح النسايم والهواء الصافي العليل ونحن هنا كل يوم بنشم دخاخين السيارات المكتظة في شوارع نيويورك والدخاخين الطالعة من الانفاق... ودمتم بألف خير وصحة وعافية
,ودي أغنية ود شيوخ القبائل من اسرار بابكر هدية لود البطانة ود المحرب..
Post: #47 Title: Re: رحلة الى البطانة ... فيديو .... Author: عبدالله ود البوش Date: 10-29-2016, 07:15 AM Parent: #45
بسمات بت الشيخ صباحك خير وزين مجرد وجودك هنا له طعم خاص خليك من اي حاجة تاني وياريت تشرفي البطانة عشان تجدعي جوازك في نهر عطبرة مودة ومعزة خاصة وكل الاحترام مرفق طيه برفق
Post: #46 Title: Re: رحلة الى البطانة ... فيديو .... Author: عبدالله ود البوش Date: 10-29-2016, 07:11 AM Parent: #44
صباحك خير وزين منى بت عمسيب وتحياتك وصلت الاحباب آل المحرب وتقبلي تحياتي واحترامي
