تجربتي في الحصول على الإقامة الدائمة الأسترالية - مواقف ونصائح

10:50 AM October, 06 2016

سودانيز اون لاين
طارق عبد الله-السعودية
مكتبتى
رابط مختصر

السلام عليكم ورحمة الله وبركاته،،،،

الحقيقة ده أول بوست لي في سودانيز اون لاين مع اني متابع قديم للمنبر العام بس ماكنت حريص على الكتابة (غتيت خالص :) ، وهذا البوست عبارة عن تجربة شخصية حبيت اشاركها مع الإخوة الأعضاء، وأتمنى ممن وجد فائدة في هذا الموضوع أنو ما يبخل علينا بدعوة صالحة تنفعنا في الدنيا والآخرة. عذرا على الكتابة بالعامية لكن فضلت الكتابة بها عشان يبقى الموضوع more interesting بعيد عن اللغة الرسمية الجافة، برضو فضلت ان يكون السرد عام بدون تفاصيل كثيرة وأكيد عمنا قوقل بيديك كل الانت عايزو من التفاصيل. أيضا، التجربة دي تجربة شخصية ما أكثر فما بالضرورة الشخص البيعمل نفس الخطوات حيصل لنفس النتائج.

البداية:
زي معظم الشباب كان أحلام الواحد انو بعد التخرج من الجامعة (مجالي محاسبة) يجد العمل المجزي والبساعدك على التطور، وبرضو كان في أفكار لمواصلة التعليم فوق الجامعي وغيره وكنا نرى أن الذهاب إلى الدول الغربية كأمريكا وأوروبا خطوة ضرورية لعمل إنجاز مهم في الحياة وهنا لا أقصد الإنجاز المادي فقط وإنما الإنجاز المهني بالإضافة إلى التعرف على نمط حياة مختلف في مجتمعات متقدمة، الا انني وبسبب ظروف عودة الأسرة النهائية إلى السودان (نشأت في السعودية وأكملت المراحل الدراسية فيها) قد توارت هذه الفكرة، وفي نفس الوقت كنت قد بدأت حياتي العملية لدى أحد البنوك المعروفة بالسودان. العمل في السودان بالرغم من عائده المادي المتواضع والعديد من السلبيات الأخرى يبقى له نكهة خاصة من حيث بناء علاقات إنسانية جميلة مع إخوة وأخوات من كافة المستويات والخلفيات. بعد سنتين من العمل في السودان، حصلت على فرصة عمل بالسعودية لدى مكتب مراجعة دولي (توضيح للإخوة غير المحاسبين: مكتب محاسب قانوني) قبلتها لاعتقادي حينها بأنها خطوة أفضل لاكتساب الخبرة وتوسيع الآفاق إلا أن العمل بالسعودية على الرغم من العائد المادي الأفضل نسبيا من السودان يبقى مختلفا تماما حيث تسيطر أجواء تكتلات الجنسيات والحرص على التقرب من صانع القرار بشكل نعتبره نحن السودانيين رخيص ومبتذل في الغالب وغيرها من الأمور المعروفة لكل من يعمل هناك ، وهذا طبعا لايقلل من قيمة ماقدمته وتقدمه السعودية للسودان والسودانيين. عموما أمضيت فترة معتبرة في المكتب وانتقلت إلى عمل آخر لكن لاحظت بعد مرور فترة من الزمن انو للأسف الشركات بتنظر للموظف على انو مجرد رقم في بند التكلفة ما أكتر بالإضافة إلى عدم الأمان الوظيفي حيث ان من الممكن أن يتم إنهاء عقدك في أي لحظة بدون مبررات واتخيل كمية الخسائر المترتبة على الحكاية دي خاصة لو انت رب أسرة، ناهيك عن قيود نظام الكفالة وعدم المساواة مع المواطنين في الرواتب والتدريب وفرص الترقي وغيرها بالإضافة إلى عدم وجود ضمانات للمستقبل من حيث المعاش وفرص تعليم الأطفال وخلافه. من هنا بدأ حلم الهجرة القديم يراودني من جديد قبل مانتأكل لحم ونترمي عضم:) حسب اعتقادي خاصة وان بلدنا للأسف حالها يغني عن السؤال ولاتوجد بوادر ظاهرة لفرج قريب.

متابعين!

مراحل الهجرة:

بدون شك، قرار الهجرة ليس بالقرار السهل على أي إنسان وتتداخل فيهو عوامل كثيرة، بس ممكن نقسم العملية إلى ثلاثة مراحل رئيسية (الكلام ده بالمناسبة قيل في منتدى آخر واقتبست منه مع بعض التعديل):

• مرحلة التفكير واتخاذ القرار: بمعنى إنّو الهجرة كفكرة بتناسبك ولا لا؟ ودي بتفرق من شخص لآخر من حيث العمر والوضع المهني والأسري والمادي والالتزامات العائلية وخلافه، برضو خلفية الشخص بتلعب دور في هذا القرار فمثلا بعض الناس ماعندو رغبة في الهجرة لأنو ماعايز نشأة اطفاله في مجتمعات متحررة أو غير ناطقة باللغة العربية، وبعضهم حساباته مادية بحتة وعايز يجمع اكبر كمية من المال في اقصر وقت ممكن عشان كده بيفضل الاغتراب في الخليج على الهجرة وغير ذلك من الآراء. بصورة عامة، موضوع الهجرة نسبي جدا ومافيهو ضمانات نجاح أو فشل بس هي محاولة لتوسيع الخيارات وأمل بحياة أفضل والحشاش بعد كده يملا شبكتو والموضوع اولا وأخيرا توفيق من الله وما على المرء إلا السعي.

• اختيار مكان الهجرة: ودي برضو بتختلف حسب ظروف الشخص وحسب تواجد معارف في البلد المعني وما إلى ذلك. شخصياً، كنت بفاضل بين أمريكا، كندا، استراليا ونيوزيلندا والسبب الرئيسي انها جميعها دول ناطقة بالانجليزية فما حأخسر وقت في تعلم لغة جديدة على عكس حال الهجرة إلى الدول الإسكندنافية مثلا. السبب التاني هو عامل الزمن لأن الدول المذكورة عندها إجراءات هجرة واضحة ومحددة مازي دول أوروبا الغربية مثلا التي معظم المقيمين فيها اما كانوا طلابا فيها أو استقروا عن طريق برنامج اللجوء خاصة ايام ذروة بطش الحكومة السودانية في التسعينات وده بالنسبة لي درب طويل. بعد فترة استبعدت أمريكا على الرغم من أن الفرص فيها أكبر من غيرها ووجود عدد كبير من الأهل والمعارف فيها لأن حظي مع اللوتري كان زي الهباب على قول اخواننا المصريين وبصراحة حسيت بالملل من التقديم كل سنة والانتظار. كمان استبعدت نيوزلندا لانها ببساطة Mini Australia وبلد صغير وفرص العمل فيه قليلة نسبيا، أيضا المقيم الدائم في استراليا عندو مطلق الحرية في الدخول والعمل في نيوزلندا فبالتالي أحسن اضرب عصفورين بحجر واحد. المهم المقارنة في الآخر استقرت علي كندا وأستراليا والخلاني أفضل الثانية أسباب: ١- أستراليا كبلد بعيدة جدا عن أوروبا وأمريكا الشمالية والمواسم فيها معكوسة عن الدول شمال خط الاستواء وبالتالي غير جاذبة للخواجات (وده عنصر جذب لنا) ٢- البلد لسه جديد لو قورن بكندا وفرص العمل والرواتب أفضل نسبيا مع انها برضو أغلى ٣- الجو اجمل خاصة أنا من النوعية المابخارج معاها البرد الشديد زي مابنسمع عن كندا ٤- وده اهم سبب إنّو تقييم الخبرة والمؤهلات في استراليا بيكون قبل التقديم للهجرة عكس كندا بمعنى انك مابتقدم للهجرة الا بعد الحصول على تقييم الخبرة والمؤهلات بينما في حالة كندا تقدم طلب مبدئي وتنتظر في الدور لمدة ٣-٤ سنوات قبل مايطلب منك تقديم الشهادات والمستندات ولو ما طابقت المتطلبات أو حصل أي خطأ يفتح الله وموضوعك باظ خلاص (الوضع اتغير مؤخرا للأفضل في كندا مع نظام الهجرة الجديد express entry).

• مرحلة التنفيذ: واهم عامل في المرحلة دي هو السرعة، لأنو القوانين تتغير دائما وممكن جدا في غير صالحك عشان كده المبادرة مهمة قبل ماتحصل متغيرات تلخبط أمورك وممكن تأخرك لفترة طويلة أو تنسف الفكرة من أساسها. برضو المرحلة دي محتاجة لمستندات عديدة زي شهادات التخرج وخطابات خبرة من المخدمين وغيرها والبتحتاج لوقت طويل عادة عشان تكون متوفرة.

لا يتم التعامل مع موظف على أنه رقم يؤثر على التكلفة إلا في حالة ضعف معرفة الموظف

واصل

أخي الكريم طارق عبدالله
تحياتي لك كل الشكر علي هذا البوست أنه بالفعل ذو قيمة كبيرة للشباب ولي شخصيا واصل لكي تكون تجربتك نموذجا لنا لك كل التقدير

مرحب طارق
وحبابك في سودانيز
بوست جيد
اتمني بكري يعلقو فوق اسوة ببوست اللوتري
علمو الناس كيف يهربون من السودان

تجربتك يا طارق طازجة ومن نارها بدليل بروفايلك لا يزال محل الاقامة السعودية هههههه
متابعه سطر سطر

ياريت توضح وتجيب على الاتي :
- هل ال General skilled migration لاتزال محكومة بعمر محدد (45 سنة )
- الاعتراف بالشهادات الجامعية ا لصادرة من السودان عند الجهات البتعمل skills assessment
- هل امتحان الايلتس ضروري ؟ حتى لو الزول خريج بكالريوس انجليزي
- وهل تقبل صور المستندات عند ارسالها للاعتراف ولا لازم الاصل
- وهل توجد وسيلة للاعتراف بالشهادات غير Assessing Authority يعني كمثال لو راسلت جهة التقييم في استراليا ورفضت الاعتراف بالمؤهل
هل يمكن الاعتراف بالجلوس للاختبار خارج استراليا .

عليك الله يا طارق الحقنا الحكاية دي زنقت حتى في السعودية هههههه

أخونا أحمد الصاق، التجربة من الفرن ههههههههههه، ملاحظتك صحيحة أنا لسه في السعودية ومااستقريت نهائيا في أستراليا.

حاولت اقتبس أسئلتك، بس مازبط. ردودي بالأسفل حسب نفس الترتيب:
- العمر ممكن تقدم لحدي ٤٩ سنة بس خلي بالك مافي نقاط من ٤٥ سنة وانت طالع.
- الأفضل تشوف شروط جهة التقييم مباشرة لان كل جهة عندها شروط منفصلة، بس مافي قانون عام يستثني شهادات السودان من القبول.
- اختبار الايلتس ضروري للحصول على نقاط الانجليزي، بس برضو في اختبارات تانية مقبولة لدى دائرة الهجرة زي TOEFL, PTE كمان في جهات تقييم بتشترط امتحان إنجليزي وبعضها لا، عشان كدة الأفضل تتاكد من موقع الجهة مباشرة.
- المستندات لازم تكون certified copies من جهة معتمدة وعادة خارج استراليا بتكون السفارة الأسترالية في البلد.
- للأسف مافي طريقة للتقييم اذا لم تستوفي شروط جهة التقييم المعترف بها لدى دائرة الهجرة.

فوق للاخوة الاعزاء لتقديم التساؤلات والاستفادة من التجربة

بوست يلبي إحتياجات المرحلة

اقروا على رواقة بدون شفقة وبدون السؤال عن الاوراق المطلوبة على الأقل لحدى ما الراجل يحكى التجربة

تحياتي طارق

شكرًا جزيلا لجميع الإخوة المتداخلين على التشجيع والاهتمام وأكيد برجع اجاوب على الاستفسارات.

أخونا الصادق عز الدين، كنت أتمنى أوافقك الرأي لكن من منطلق تجربتي في السعودية لأكثر من ١٣ عام الموظف المجتهد والمتميز يكافأ بالمزيد من المهام فقط بدون تقدير مادي أو معنوي، خاصة وظيفتي كمراجع حسابات اتاحت لي العمل مع الكثير من الشركات والمؤسسات، طبعا هناك جهات تقدر الجهد ولكنها قليلة بالمجمل ولاتشكل نسبة كبيرة مقارنة مع عدد الشركات.

نظام الهجرة إلى أستراليا:

بالنسبة لهجرة أستراليا، فان دائرة الهجرة الأسترالية (www.border.gov.au) هي المسؤولة عن منح تأشيرات الهجرة وتوجد العديد من فئات التأشيرات المختلفة، لكن حأتكلم هنا عن التأشيرة التي حصلت عليها وهي هجرة العمالة الماهرة Skilled Migration. تأشيرة العمالة الماهرة دي زاتا خشم بيوت وفيها تفرعات مختلفة، فمثلا في تأشيرة independent ودي أفضل واحدة وفي تأشيرات تسمية nomination من الولايات والمقاطعات الأسترالية المختلفة ودي غالبا بيكون فيها التزام بالإقامة في الولاية لفترة محددة.

طيب السؤال كيف أبدا؟ والجواب إنّو لابد تعرف ما إذا كنت مؤهل eligible للهجرة في تلك السنة أو لا وذلك عن طريق: ١- مهنتك موجودة في جدول الوظائف السنوي Skilled Occupation list والمطلوبة للهجرة ٢- انك مستوفي عدد النقاط المطلوبة للحصول على تأشيرة الهجرة والمحسوبة بناء على عمر الشخص ومستواه التعليمي وخبرته العملية ومستوى اللغة الانجليزية ومؤهلات الشريك (الزوج أو الزوجة) وغيرها (جميع التفاصيل موجودة في موقع دائرة الهجرة المذكور في الأعلى). طبعا النقاط ممكن تتغير بشكل سنوي أو تظل كما هي (النقاط المطلوبة لسنة ٢٠١٥م القدمت فيها كان ٦٠ نقطة) ودائما القانون الجديد بيكون نافذ مع بداية السنة المالية الجديدة في ١ يوليو من كل عام. ولو اتكلمنا عن فرص تحسين النقاط، فاكتر عامل ممكن يخدمك هو مستوى اللغة الانجليزية لأنو الحصول على نقاط منو اسهل من الباقي وده الحصل معاي بالضبط. أما بالنسبة لباقي العوامل فأكيد العمر الصغير بيساعدك على الحصول على نقاط اكثر وايضاً المستوى التعليمي بيعمل فرق فمثلا شهادة الدكتوراة تمنحك ٢٠ نقطة مرة واحدة مقابل ١٠ نقاط للبكالوريوس (لاتوجد نقاط إضافية على الماجستير).

طبعا الصبر وطول البال ضروري خلال المرحلة دي لأنو على سبيل المثال اخد تقييم الشهادات والخبرة حوالي ٥ أشهر وايضاً احتجت إلى مايقارب من السنة للحصول على الدرجة المطلوبة في امتحان اللغة الانجليزية وحوالي الستة أشهر للحصول على شهادات خبرة بالصيغة المطلوبة ناهيك عن التكاليف المادية.

النقطة التانية المهمة انو هل أقدم بنفسي أو عن طريق مستشار هجرة؟ والجواب طبعا حسب وضعك وظروفك مع الأخذ بالاعتبار ان مستشار الهجرة ده دوره زي المرشد السياحي للرحلة يعني بيديك some insights بس ماعندو عصا سحرية وماممكن يساعدك على تجاوز القانون وإلا وقع تحت طائلة المساءلة. أهم حاجة لو قررت تستعين بمستشار انك تتأكد انو مرخص في استراليا عن طريق موقع دائرة الهجرة، وبرضو حاول تتفق معاه على كل التفاصيل وبالذات المالية وحاول تربط الدفعات بعمل خطوات ملموسة في التقديم. بالنسبة لي، فقد اخترت التقديم بدون مستشار والحمد لله الأمور مشت تمام بس عايزة شوية بحث واطلاع وبرضو الكويس انو جميع الجهات اللي اتعاملت معاها كانت متعاونة وبترد على اي استفسارات في وقت معقول.

نواصل،،،،،

التقديم على الفيزا

وتبدا هذه المرحلة بعمل حساب إلكتروني لدى دائرة الهجرة وتملأ فورم إبداء رغبة Expression of Interest بمعلوماتك ومعلومات المرافقين، والفورم ده ببساطة معناتو انك راغب في التقديم على الفيزا وأنك حققت مستوى النقاط المطلوب للتقديم على الفيزا، بعد كده لو امورك في السليم وكنت محظوظ بتجيك دعوة من دائرة الهجرة للتقديم على الفيزا Invitation والدعوة بترسل مرتين شهريا للطلبات المختارة وخلي بالك بان تحقيق النقاط ما معناتو الدعوة مضمونة لأنو في عوامل تانية داخلة في الموضوع زي السقف الممنوح لكل مهنة، يعني من غير المسموح إنّو مهنة واحدة أو مجموعة مهن مثلا تشكل نسبة كبيرة من التأشيرات الممنوحة.
لمن تصلك الدعوة للتقديم معناتها انك وصلت للمرحلة الحاسمة، فلازم تاخد وقتك بالكامل وخليك حريص جدا لأنو ممكن طلبك يترفض بسبب تافه، واتاكد إنّو جميع المستندات موجودة في كمبيوترك بالصيغ المطلوبة زي PDF والوثائق الصادرة بغير اللغة الانجليزية مترجمة وانو حجم المرفقات ضمن الحدود المسموح بها وأحسن ماترسل الطلب طوالي بعد تعبئته، ممكن تديهو قراءة تانية وطبعا التقديم مابيكتمل الا بعد دفع الرسوم وكانت تقريبا ٣ آلاف دولار استرالي للمتقدم الرئيسي وحوالي ١٨٠٠ دولار للشخص البالغ لباقي المتقدمين.

بعد تقديم الطلب شيل الفاتحة وامسك في الصبر :) لانك حتحتاج شهرين أو ثلاثة قبل ما دائرة الهجرة تعين ضابط الحالة Case Officer المسؤول عن طلبك، وعادة لو أوراقك مكتملة مابيطلب شي إضافي بس في كل الأحوال حيطلب منك السجل الجنائي من كل بلد عشت فيها سنة فأكثر بالإضافة إلى فحص طبي لجميع المتقدمين من مراكز محددة من دائرة الهجرة، كمان بيطلبو اَي متقدم فوق ١٦ سنة غير المتقدم الرئيسي يثبت إلمامه باللغة الانجليزية أو بتدفع مبلغ إضافي.
بعد الكلام ده كلو لو ربنا سهل بتجيك الموافقة على الفيزا بخطاب رسمي في رسالة الكترونية فيها رقم التأشيرة وبيانات اخرى وكمان بيحدد ليك تاريخ الدخول الأول first entry أو اللاندينج ليك ولكل المرافقين المذكورين في طلبك عشان تفعيل الفيزا وكدا بتكون خلاص بقيت مقيم دائم استرالي!!

مابعد التأشيرة
بقدر فرحة الحصول على التأشيرة، بتبدا مخاوف تانية جديدة خالص فالموضوع الكان مجرد ورق ومستندات بقى جد جد وعايز حسم مواضيع كتيرة زي امشي وين في البلد وكيف القى شغل مناسب ومدارس الأولاد .....الى آخره.
بالنسبة لي قررت آخذ الموضوع حبة حبة وبالتدريج وانو امشي اعمل اللاندينج باعتباره اجازة اشوف فيها البلد واعمل الحاجات الأساسية زي فتح حساب في البنك وفتح ملف الضرائب والتأمين الطبي. السفر إلى استراليا من الشرق الأوسط متعب والمسافة بعيدة وأسرع الخيارات هي طيران الاتحاد والخطوط الاماراتية والخطوط القطرية، بس اخترت اسافر من السعودية إلى ماليزيا على الخطوط السعودية وآخذ راحة يوم ومنها اسافر إلى استراليا عن طريق طيران Air Asia بسبب سفر الأطفال معي وكمان برضو طلعت اوفر ماديا بفرق كبير عن الخطوط الاماراتية والقطرية واخترت النزول في سيدني لوجود عدد من المعارف فيها.

نجي لموضوع تاني، هل اسافر استقر مرة واحدة ولا أمشي وارجع تاني؟ وأكيد الجواب كل زول وظروفه بس الشي الكويس إنّو تأشيرة الإقامة مدتها ٥ سنوات قبل ماتحتاج تجديدها وده بيديك متسع من الوقت عشان ترتب أمورك ومامحتاج تجي البلد كل فترة عشان الإقامة زي نظام أمريكا مثلا. النقطة التانية، وين مكان البداية؟ طبعا كلنا عارفين أستراليا بلد مترامي الأطراف بس عموما أحسن مكان تبدأ هو محل وجود معارفك لأنو المهاجر الجديد في أمور كتيرة غائبة عنه ومحتاج التوجيه فيها، وبرضو أحسن المحل يكون واعد لفرص العمل يعني في حالتي غالبا سيدني هي أفضل خيار لان مجالي هو مراجعة الحسابات وسيدني هي العاصمة المالية لاستراليا وفرص العمل أفضل من غيرها بالنسبة لي على الرغم من انها مدينة غالية جدا وبعدها تأتي مدينة ملبورن كخيار ثاني مفضل. النقطة الأخيرة هنا، إنّو هل تأتي لوحدك اولا أو تأتي الأسرة كلها؟ والاجابة طبعا بتتفاوت من شخص إلى شخص حسب الظروف خاصة المادية لأنو الاستقرار في استراليا بيتطلب صرف مادي ضخم، وكمان وجود الأسرة من الأول قد يحد من حركة الشخص خاصة لو أراد البحث عن عمل في ولاية أخرى. عموما أنصح بحضور رب الأسرة فقط في المرحلة الأولى حتى تترتب الأمور وبعد ذلك تأتي الأسرة على مهل.

الأخ طارق سلامات.. متابع معاك من أول نقطة في البوست
.تعرف المعادلة صعبة جدا.. ل الواحد لمن يعاين للمستقبل بلقى مافي حل غير الهجرة.
أنا في اوائل الثلاثينات شغال في الخليج براتب جيد نسبيا لكن طبعا زي ما عارف مافي امان وظيفي هنا العرب ديل في لحظة ممكن يقولوا ليك مع السلامة وبلدنا ما بتتشكر!
عندي شوية أسئلة:
-هل ممكن الواحد يبدأ الاجراءات من غير امتحان توفيل او ايليتس ولا أحسن تكرب روحك لأول.
- قلبت بسرعة في الموقع المذكور في البوست ما لقيت منو وين أشوف اذا مؤهلاتي مطلوبة ولا لا (هندسة شبكات الكمبيوتر)
- سؤال تعجيزي شوية ويتخيل لي بكون خطر ببال كل المهاجرين السابقين خاصة مغتربي الخليج. الواحد كيف في الترانزيشن بيريود يقدر يجازف بالوظيفة المضمونة الحالية والمسئوليات ومصاريف الاولاد والاهل خلال فترة الجهجهة ما بين الانتقال والاستقرار؟

لو سمحت زودنا باللينك الممكن الواحد يشوف فيه عدد النقاط.

جزاك الله خيرا على المعلومات القيمة / حقيقة أنا خضت تجربتين فى السفر بقصد الهجرة لأستراليا واحدة عن طريق قنصليتهم فى دبى قبل أن يكون لهم قنصلية فى الرياض وعن طريق مكتب سياحى ( ضرب الريالات ) وعمل نايم ورجع لينا الأوراق المحاولة التانية عن طريق القاهرة ودى كلها نصائح من معارف يقيمون هناك بأستراليا المهم ماأطول عليك واحد أخ سودانى يحبك قصص زبطنا لينا قصة ب100 دولار رسلتها ليهو وأنا قنعان منها بس جانا رد عليها للأسف لم أحتفظ به وضاع وسط الزحمة نصحونا المعارف بالتقديم عن طريق مستشارين هجرة مكتنب متخصصة فى أستراليا لكنى فضلت أن أتريث حتى آخذ فكرة عن الخدمات التى يقدمونها إتصلت بأخت سودانية أسترالية محامية فى أستراليا ( أميرة صلاح) أظن هذا إسمها ونورتنا مشكورة بس حكاية الدفع بدون ضمانات دى صعبة عشان كدة الواحد بعد مرور 8 سنوات على التجربة مافى مانع يعيد البرنامج دا تانى بس هل ماتم تقديمه من مستندات فى السابق يكون ليهو تأثير بمعنى لو إختلفت القصة السابقة مع الوضع الراهن كيف تكون النتيجة تعرف ياأستاذ طارق الجماعة ديل مطولين الإجراءات دى ياريت الواحد لولقاها كدة بطريقة خذ وهات يعنى تأشيرة عمل زى بتاعت ( تربية مواشى ) أو تربية كنغرو) إن شا الله ياخى أحييت لينا الأمل فى الهجرة بعدما نسيناها وبلغنا من العمر عتيا الله يديك العافية

Up

الاخ طارق

فرمل شويه

العاوزك اجيك في الخاص

الأخ طارق

تحياتي ,,,

بوست موفق جداً .. وكأنك قرأت أفكار أغلبية الزملاء هنا

**

الأخ/ أحمد محمد موسى أنت ماشاء الله في عمر كويس، أشجعك تمشي قدام في الموضوع قبل القصة ما تصعب.
إجاباتي على استفساراتك:
- ممكن طبعا تبدأ قبل الايلتس، وأعتقد أنه من الأفضل التركيز على عمل التقييم قبل امتحان الانجليزي لانه بيحتاج أوراق وزمن وعايز مجهود منك، وكمان مايضيع تعبك ساي في الايلتس لو ماقدرت تستوفي شروط التقييم.
- شوف اللنك ده حق جدول الوظائف المطلوبة للهجرة لسنة 2016م (صالح لحد 2017/06/30):
https://www.border.gov.au/Trav/Work/Work/Skills-assessment-and-assessing-authorities/skilled-occupations-lists/SOL
- ده سؤال عايز بوست براهو :) بس زي ماقلت التأشيرة بتديك خمس سنوات ترتب وضعك قبل الاستقرار النهائي وأعتقد أنها كافية لعمل مدخرات معقولة لبدء حياتك هناك (يعني ماضروري تفك شغلك طوالي بمجرد الحصول على التأشيرة).
- ده لنك قياس النقاط: -https://www.border.gov.au/Trav/Visa-1/189
بس خلي بالك اللنك ده لفيزا 189 وهي independent visa لو النقاط قصرت معاك بحد أقصى 5 نقاط لازم تحاول تاخد sponsorship من ولاية عشان تعوض الفرق.

باقي الإخوة سوف أرجع لكم بإذن الله.

الاستاذ/ حسن محمد عمر
شكرًا كتير على ردّك الجميل وربنا يقدرنا نساعد الناس.

أعتقد ان ماذكرت كان محاولة تقديم طلب لجوء، وللأسف ماعندي معلومات عن التأشيرات الأخرى غير هجرة العمالة الماهرة. بس غالبا ممكن تحاول تقدم والورق المذكور في ردك ما اعتقد إنّو بيأثر في حاجة.

لو عندك الرغبة في التقديم عن طريق مستشار، ممكن أساعدك.

ولكم الود،،،،

طارق
بوست موفق ومفيد جدا..
وعندي تعليق بسيط من تجربة شخصين احدهما في كندا
والثاني في امريكا....وسمعت منهما رايا وقالا بالحرف الواحد
انهما قضيا سنوات عديدة في الغربة ...ولكنهما ندما في النهاية
لسبب معقول...وسوف اتي لكم بالتحليل عن سببهما وفيما اذا كانا
محقين ام لا..
والله يديك الصحة والعافية

لك الشكر والتقدير أستاذ / طارق وإن شاء الله نستفيد من تجربتك وإذا إحتجت لأى إستفسار سأتواصل معك وبارك الله فيك

مرحب طارق
و مرحب بيك فى حوش بكرى
اتمنى كل من له تجربه مماثله يدلى بدلوه
و اخوانا فى استراليا ممكن ينوروا الناس اكتر امثال خالد العبيد و بقيه العقد الفريد هناك.

اما عن تجربة الشخصين فهي كما يلي:
سوف لن أذكر الأسماء ولكنها الحقيقة التي سمعتها منهما:

الشخص الأول يقول :
انه وصل الولايات المتحدة قبل 15 سنة ومكث فيها سنة واحدة فقط
وسافر إلى كندا لأن الحياة في امريكا كانت قاسية جدا ونصحه اصدقاؤه في كندا
أن ياتي لطندا لأان الحياة سهلة ومريحة والناس طيبين.. ولذا سافر الى كندا
وطلب اللجوء السياسي وتحصل عليها بسهولة شديد وتحصل على الإقامة الدائمة
وبعد سنوات قليلة اصبح مواطنا كنديا له كل الحقوق والواجبات.. وانه ظن انه
سيعيش بعد ذلك معززا كريما وانه أتى بأسرته من السودان إلى كندا ..
وقرر ان يزور الولايات المتحدة لزيارة اصدقائه هناك ويحكي لهم سهولة الحياة في كندا
وفي اول تجربة له للسفر خارج كندا اوقفه سلطات الهجرة الأمريكية ..
وساله ضابط الهجرة الأمريكي.. ودار بينهما الحوار التالي:
س: ما جنسيتك؟
ج: انا كندي الجنسية..( وطبعا هو استغرب ليه يسأله عن جنسيته وجواز سفره الكندي بين يدي ضابط الهجرة..
س: واين ولدت؟
ج: في السودان

وهنا قال له ضابط الهجرة الذي كان يسأله من كشك صغير تصطف السيارات من خلف كل ينتظر دوره
بان يوقف سيارته امام مكتب ضباط الهجرة وان يذهب إلى داخل المكتب.

وذهب إلى داخل المكتب وانتظر ساعة كاملة قبل ان يناديه ضابط آخر وبدأ يسأله نفس تلك الأسئلة من جديد واضاف:
س: ومتى زرت السودان آخر مرة منذ ان اتيت إلى كندا؟
ج: لم أزر السودان .
س: ومتى ستزوور السودان؟
ج: لا اعرف ولكن قريبا.
س: ولماذا تزور السودان؟
ج: لان والدي ووالدتي واخوتي يعيشون هناك.
... ويقول هذا المغترب انه مكث في المكتب ساعة أخرى وفي النهاية سمحوا له بالدخول..
وقال انه شعر بمرارة شديدة وهو يعامل هكذا .. ولكنه بدأ يفكر بان الأامريكان لهم الحق في ذلك
لأنهم يريدون حماية الشعب الأمريكي من الهجمات الإرهابية .. وبدا يسوق الأسباب لتصرفات
ضباط الهجرة الأمريكا في الحدود البرية بين كندا وامريكا..
ويقول ان الشئ الذي جعله يندم ندما شديدا بانه هاجر من السودان هو عندما عاد من زيارته إلى وطنه
كندا... ولم لا .. فهو الآن كندي الجنسية ...
وعندما وصل لضباط الهجرة الكنديين حدث له مفاجأة لم يتوقعها ابدا....
يا ترى ما ذا حصل له ؟ وما الذي فوجئ به اما ضابط الهجرة الكندي....
ونواصل بعد البريك..
والله يديكم الصحة والعافية

مرحب بيك أختنا أميرة، وشرفني مرورك على البوست.

حكاية الغربة دي فعلاً مامعروف حتودينا وين طوالي الواحد يقول الجابرنا على كدة شنو ولحدي متين، غايتو الله يجازي الكان السبب.

متابع قصتك باهتمام، وأعتقد الخواطر الفيها موجودة في ذهن كل سوداني مغترب.

ربنا يرد غربة الجميع والله يديك العافية.

نواصل ما انقطع من حديث المهاجر الذي هاجر إلى كندا..
وعندما وصل بسيارته إلى بلده كندا واوقف سيارته قبالة كشك ضابط الهجرة
الكندي دار الحوار التالي:
-س: - ما جنسيتك؟ وسأله هذا السؤال وهو ممسك بجواز سفره الكندي..
- ج: انا كندي الجنسية.
س: كم من الفترة غبت عن كندا؟
ج: اسبوع واحد.
س: ما هو عنوانك في كندا؟
ج : واعطاه عنوانه ورقم تلفونه.
س: اين كنت تقيم خلال زيارتك للولايات المتحدة الأمريكية ؟
ج: واعطاه العنوان في ولاية فرجينيا ، وهو العنوان الذي يسكن به صديقه.
وهنا أمره ضابط الهجرة الكندي ان يوقف سيارته بجانب مكتب الهجرة والدخول
لداخل المكتب ايقابل رئيس الوردية..
ونزل من سيارته ودخل مكتب الهجرة وهناك ايضا جلس نصف ساعة حتى جاءه رئيس
المكتب وبدأ يسأله نفس الأسئلة .. وامره ان يجلس مرة اخرى وبعد نصف ساعة ناداه مرة
اخرى وبدأ يسأله عن الشخص الذي زاره في فرجينيا وماذا يعمل .. واسئلة اخرى
سخيفة...
والشئ الذي حز في نفسه انه لم ير اي أحد آخر امروهو بان يدخل المكتب...
فكان هو الوحيد الذي تم إنزاله من السيارة والتحقيق معه بصورة سمجة جدا....
وكان يعتبر ان كندا اصبح وطنه وانه سيدخل عائدا لبلده من دون اي استجوابات او تحقيقات
لان كندا وطنه..
| وقال لي هذا الشخص انه شعر باستياء شديد ومرارة قاسية .. وأن الندم بدأ يداخله لأنه ترك السودان
الحبيب حيث كان يشعر انه مواطن درجة أولى .. وليس مواطن درجة ثانية او قل ثالثة او رابعة في كندا...
وقلت له وانا احاول ان اخفف عنه هذه المرارة التي يشعر بها:
" لا تحمل الأمر أكثر مما يجب .. لان سلطات الهجرة في مطار الخرطوم ممكن يعاكسوك ويحققوا معاك
على الرغم من انك سوداني ومولود في السودان وحتى اذا كنت مشلخ شايقي او محسي او دنقلاوي او كنت
لابس جلابية انصارية.. وخاصة اذا كنت من المعهارضين السياسيين.. وسلطات الهجرة الكندية عاوزة تحمي
المواطنين الكندينن المولودين في كندا... من الارهابيين المولودين خارج كندا.. وعشان كده ما نزعل نفسك كتير..
ولكنه لم يقتنع و قرر قرارا سنحكيه بعد عودتنا ..
اما قصة المهاجر الآخر الذي هاجر إلى امريكا فقصته قصة ومرارته قربت تنفقع...
وواصلوا معانا..
والله يديكم الصحة والعافية

تحية لصاحب الوست وضيوفه الكرام
متابع
تجربتي في الحصول على الإقامة الدائمة
و
وحكي الاخت اميرة السيد
تحياتي

القرار الذي اتخذه هو انه قرر العودة للسودان نهائياً مع اسرته..
وقال انه فكر مرة ثانية بعد أن نصحه اصدقاؤه ان يرسل اولاده اولا للسودان
والاولاد يستمروا في المدارس هناك ويبقى هو حتى يجمع راس مال كاف يستطيع
به ان ينشئ عملا خاصا به وليكن هذا في خلال ثلاثة او اربعة سنوات .. ومن ثم يعود
نهائيا... ويترك للأولاد الخيار في ان يعودو لإكمال الدراسات الجامعية في كندا لو ارادوا...
وقال انه لا يستطيع ان يعيش مدى الحياة منحني الرأس ويعامل معاملة الأجنبي في بلد يحمل
جنسيته....

أما الشخص الآخر والذي يحمل الجنسية الأمريكية فقصته امر واصعب .. فسوف اكتب هنا بلسانه
فماذا قال:-
هاتفني اصدقائي في كندا ان اقضي معهم راس السنة في مدينتهم في كندا وذلك العام الماضي.. وقررت
ان أذهب بسيارتي ومعي زوجتي واطفالي الثلاثة، وكلهم يحملون الجنسية الأمريكية وليهم جوازات
سفر أمريكية....ولم أكن اتووقع اي معاكسات او مشاكل سواء داخل الحدود الكندية او الأمريكية عند عودتنا..
وقدت سيارتي من ولاية فرجينيا ، حيث نقيم، ووصلنا الجسر الذي يربط بين مدينة بفلو الأمريكية بالمدينة
الكندية الأخرى وهو جسر اسمه جسر السلام، وفي الحقيقة عرفت ، عند عودتنا من كندا والتجربة التي خضتها
مع مسؤولي الهجرة الأمريكيين ، ان هذا الجسر ليس بحسر سلام ولكن العكس تماما لأنه جسر حرب ...
عبرت بسيارتي حسر ( السلام) ووصلت داخل الأراضي الكندية ومددت جوازات السفر الأمريكية لضابط
الجوازات الكندي .. وفي الحقيقة وجدت معاملة ممتازة منه ، وحيث دار الحوار التالي بيني وبينه:
- س: ما جنسيتك؟
ح: امريكي الجنسية
س: وما سبب زيارتك لكندا؟
ج: البي دعوة من اصدقائي في مدينة تورنتو لقضاء راس السنة معهم.
س: وكم من الزقت تريد ان تقضيه في كندا؟
ج: اسبوع واحد فقط
س: وماذا اشتريت من امريكا من هدايا كي تقدمها لأصدقائك في تورنتو؟
ج: لا شئ.
س: اليس معك سجائر او خمور او مبلغ اكثر من 10 ألف دولار.
ج: لا.
والتفت إلى زوجتي وسألها عن جنسيتها ، وكذلك سألأ اطفالي الثلاثة نفس السؤال.
وحينئذ قال: مرحبا بكم في كندا وارجو ان تقضوا وقتا ممتعا، ويومكم سعيد.
ودخلنا الأراضي الكندية ، وفي الحقيقة شاهدنا المناظر والطبيعة الخلابة من
اشجار وبحيرات ومزارع ولم يكن هناك أي إزدحام في الطريق السريع
في المسافة بين الجسر الفاصل بين كندا وامريكا وحتى وصلنا إلى مدينة تورنتو والتي لا
تختلف كثيرا عن المدن الأمريكية الكبرى...
وقد ندمت اشد الندم لهجرتي من السودان عند عودتي من كندا وعبرت جسر السلام ووقفت
اما ضباط الهجرة الأمريكيين..
نواصل معه لنعرف ماذا وجد عند ضباط الهحرة الأمريكيين وهو أمريكي الجنسية ، وما الذي جعله
يندم بانه ترك السودان ..
وخليكم معانا..
والله يديكم الصحة والعافية

الإقامة في بلاد الكفر لا بد فيها من شرطين أساسين:

الشرط الأول:
أمن المقيم على دينه بحيث يكون عنده من العلم والإيمان، وقوة العزيمة ما يطمئنه على الثبات على دينه والحذر من الانحراف والزيغ، وأن يكون مضمراً لعداوة الكافرين وبغضهم مبتعداً عن موالاتهم، ومحبتهم، فإن موالاتهم ومحبتهم، مما ينافي الإيمان بالله..أن من أحب قوماً فهو منهم، وأن المرء مع من أحب" ومحبة أعداء الله من أعظم ما يكون خطراً على المسلم لأن محبتهم تستلزم موافقتهم واتباعهم، أو على الأقل عدم الإنكار عليهم ولذلك قال النبي صلى الله عليه وسلم: "من أحب قوماً فهو منهم".

الشرط الثاني:
أن يتمكن من إظهار دينه بحيث يقوم بشعائر الإسلام بدون ممانع، فلا يمنع من إقامة الصلاة والجمعة والجماعات إن كان معه من يصلي جماعة ومن يقيم الجمعة ، ولا يمنع من الزكاة والصيام والحج وغيرها من شعائر الدين ، فإن كان لا يتمكن من ذلك لم تجز الإقامة لوجوب الهجرة حينئذ.

http://www.ajurry.com/vb/showthread.php؟t=11357http://www.ajurry.com/vb/showthread.php؟t=11357

عزيزي سيف الدين:
اود ان أؤكد لك ان حرية العقيدة مكفولة في الولايات المتحدة الامريكية
وليس هناك اي حجر على حرية العبادة....وانا شاهدة على ذلك .. على الاقل
في نيويورك وفي كونتيكات... ترى المسلمين يصلون جماعة حتى في الشوارع..
وتجد سائقي التاكسي يوقفون سياراتهم بجانب الطريق ويصلون جماعة..
بل ان ولاية نيويورك اصدرت قرارا بقفل المدارس يومي عيد الفطر وعيد الأضحى
لتكون عطلة رسمية ....
من الناحية دي اطمئن....
ولكن الشئ المزعج بالنسبة للمهاجرين من جميع الجنسيات في أمريكا هو معاملتهم كأجانب
حتى ولو تحصلوا على الجنسية الامريكية، .. ...
وعندما تتم قراءة ما حصل لهذا الشخص الذي نحكي قصته في الحدود بين كندا وامريكا ، وعند
وصوله لنقطة تفتيش ضباط الهجرة الأمريكان فسوف تعرف كيف يعامل ضباط الهجرة
الأمريكان المهاجرين الذين تجنسوا بالجنسية الأمريكية والعيونهم ما عيون زرق.....وستعرف
العنصرية الكامنة والخافية في النفوس،، وربما يجد البعض بعض العذر في تصرف هؤلاء
المسؤولين بحجة انهم يريدون القبض على الإرهابيين.. ولكن ما حصل لصاحبنا هذا فاق
كل توقع .. فقد بهدلوهو بهدلة السواد....
وتابع معنا..
والله يديك الصحة والعافية

لحين ميسرة
لنواصل غدا باذن الله
غقع المرارة
والله يديكم الصحة والعافية

سلامات اخى طارق

اتابع خيطك الممتاز

الاخت اميره

سلامات

كتبت

Quote: " ولكن الشئ المزعج بالنسبة للمهاجرين من جميع الجنسيات في أمريكا هو معاملتهم كأجانب
حتى ولو تحصلوا على الجنسية الامريكية، .."

اقيم فى اميركا منذ 27 عام, وحصلت على الجنسية قبل 16 عام. عشت فى بوسطن, بروفدنس, ثم فى كارولاينا الشمالية والتى اعيش فيها منذ 20 عام.
بصراحة لااتفق مع ملاحظتك اعلاه, لايوجد تمييز قانونى يقف امام المتجنسين فى امريكا, ويوجد قضاء مستقل للنظر فى كل دعاوى التمييز العنصرى, الاثنى, الجندرى,الخ...
مع ودى

عزيزي الفاضل/المعز ود ابو نورة
وانا نفسي ايضا لم اشعر باي معاملة مختلفة وانا
اعيش داخل ولاية نيويورك وولاية كونتيكات..
ولكن اظن ، ومن ما قراناه من تجربة السوداني
الكندي والسوداني الامريكي، ان المعاملة المختلفة
ستشعر بها عندما تسافر وتعود...
وواصل معانا واقرا بقية قصة هذا السوداني الامريكي
الذي سافر الى كندا وعاد ...وكيف بهدله ناس الهجرة
الامريكان هو واسرته بهدلة السواد وهم يحملون جوازات
سفر امريكية...
ولكنك سوف تجد نفس المعاملة امام القضاء وفي معيشتك
اليومية ..
والله يديك الصحة والعافية

ود ابو نورة
( وبالمناسبة بسمات بتقول ان ابوها بيعرفكم )وعشان
كده وجهنا ليك الرد الخاص ده وتتابع معانا قصة السوداني الأمريكي
وعشان ما تتغشى في الأمريكان ديل وتشوف منهم الوش الكعب لمن تسافر
وترجع...سزاء كان في المطار أو في الحدود البرية مع كندا او مع المكسيك..

ونتابع معه::

" عبرت جسر السلام بسلام ووجدت صف طويل امام اكشاك ضباط الهجرة
وبعد زجف استمر قرابة الساعة الكاملة وصلت للكشك واوقفت السيارة:
وخرج ضابط الهجرة الامريكي من كشكه واستلم جوازات السفر الأمريكية مني
ودار الحوار التالي امام الكشك:
-س: ما جنسيتك؟
ج: امريكي الجنسية
س: واين كنت:؟
ج: كنت في زيارة لكندا
س: واي المدن زرت في كندا؟
ج: زرت مدينة تورنتو.
س: ألم تزر اي مدينة ثانية؟
ج: زرت مدينة نياجرا فولز لأشاهد الشلالات.
س: واين كنت تقيم في تورنتو؟
كنت أقيم مع اصدقائي الذين دعوني لزيارتهم؟
. ومن ثم إلتفت إلى زوجتي وسألها نفس الأسئلة.
_ وبعد ذلك أمرني بفتح ضهرية السيارة ليفتش
داخلها..
ودخل إلى داخل الكشك مرة أخرى ,, وبعد خمس دقائق:
واصل الحوار:
-س: هل هذه السيارة تخصك؟
ج: نعم هي سيارتي.
وهنا أمرني ان أذهب إلى المكتب وان اوقف سيارتي في موقف
السيارات..
وفعلنا ذلك ودخلنا إلى داخل المكتب ، وامرنا أحدهن ان نجلس وننتظر
حتى ينادونا..
وبالفعل جلسنا في غرفة الإنتظار .. أكثر من ساعة كاملة ..
( وفي هذه الاثناء كنت أفكر.. هل يا ترى هؤلاء يعاملون الأامريكان البيض
نفس المعاملة ويسألونهم نفس الاسئلة.. ولكني لم أر داخل غرفة الإنتظار سوى
أجانب من صينيين وفلبينيين وافارقة من مختلف الجنسيات وجنسيات أخرى
ولكن يبدو من سحناتهم أنهم كلهم أجانب تجنسوا بالجنسية الأمريكية ، وربكا يكون
بعضهم مولودين في أمريكا....
وعندما جاء دورنا ، ساقونا إلى داخل مكتب آخر ..
وجلس ضابط هجرة آخر غير الذي قابلنا في الكشك وبدأ اسئلته...
واكتشفت من السؤال الأول لماذا أدخلونا المكتب لمزيد من التحقيقات..
ونواصل لحين ميسرة
والله يديك الصحة والعافية

عزيزي الفاضل / طارق عبد الله
\ أرجو أن تعذرني فقد ب>ات اكتب في موضوع آخر
في هذا البوست ودن أن استأذنك.... حتى نبين بعض المآسي
التي يعيشها المهاجرون في اوروبا وامريكا وكندا...
فهل تأذن لي بالإستمرار .. أم تريدني ان اتوقف وافتح بوست خاص بذلك ..
وفي الحقيقة تجربتك ثرة ومفيدة جدا...

والله يديك الصحة والعافية

أخ طارق سلام وتحيه.. بالنسبه لشخص دارس محاسبه بكالوريوس وله خبره 10 سنوات وعمره 33 ، لغته الانجليزيه جيده بس ما قدر ينجز الدرجه المطلوبه في امتحان الايلتس هل عنده امل ؟ وكيف تكون صيغة شهادة الخبره العمليه المطلوبه؟ هل يتطلب التقديم توفر مبلغ مالي معين في البنك في رصيد الشخص المتقدم؟؟

شكرًاجزيلا لجميع الإخوة المتداخلين.

ده كلام شنو يا أميرة الموضوع ما محتاج إذن والدار ترحب بيك، ونحن كلنا هنا عشان نفيد ونستفيد، والبركة في أخونا الباشمهندس بكري.

متابع قصتك وبانتظار انتهائك منها عشان أعلق عليها، بس مبدئيا الجماعة ديل شكلهم ليهم فترة طويلة بعيدين عن السودان، لأنو مع تقديرنا لصعوبة المواقف دي بس ممكن تلاقي أسوأ من كدة بكتير جدا في السودان حتى لو انت مواطن أصل وفصل.

ربنا يصلح الحال ويديك العافية.

الاستاذ/ أمير فرح
انصحك تشوف عدد نقاطك ولو كانت اقل من المطلوب بخمس نقاط ممكن تعوض الفرق بترشيح ولاية بس شروط الولايات متغيرة بشكل مستمر وعايزة متابعة، عشان كدة الأفضل تتكرب أكثر في الانجليزي وممكن تجرب اختبار PTE اسهل من الايلتس بس مامتاكد اذا كان مقبول لجهات تقييم المحاسبين أم لا لأنو على وقتي كان بيقبلوا الايلتس فقط.

بالنسبة لشهادات الخبرة الوظيفية مافي نموذج معين ليها والأحسن تتاكد من المعلومات المطلوبة في موقع دائرة الهجرة، بس الشي الذي اذكره انها لازم تكون على الورق المروس للشركة Letter Head وتوضح إنّو عملك بدوام كامل full time وانه مدفوع الأجر وتحدد المرتب وتوضح عدد ساعات العمل الاسبوعي واهم المسؤوليات الوظيفية، ولازم يتوقع من شخص اعلى منك وعادة يا المشرف عليك أو إدارة الموارد البشرية أو مدير عام الشركة أو المؤسسة مع بيانات الاتصال الخاصة به وممكن طبعا يتصلوا عليه للتأكيد.

بالنسبة للمبالغ انت غير مطالب باثبات اي مبلغ بس بالمقابل ماعندك حق في المساعدات الحكومية لمدة سنتين.

انصحك بشدة وباقي الإخوة المهتمين بقراءة الأسئلة الشائعة FAQ's في موقع دائرة الهجرة لانها بتديك معلومات كتيرة جدا وحتما بتفيدك.

سلامات ياميرة
شكرا على تعقيبك. وتحياتى للعزيزه بسمات, بت حلتى السودنه فث عطبره الجميله.
بجى برواقه اعلق على تجاربى فى السفر الى ومن مناطق ساخنه مثل لبنان الى اميركا فى خلال السبعه سنوات الاخيره
مع ودى وتقديرى

بانتظار باقي قصة أختنا أميرة نواصل ماتبقى من التجربة،،،،،،،.

الموضوع الآخر المهم جدا هو موضوع العمل وكيف المدخل ليهو، قبل أي شي لازم الواحد يتيقن انو الشغل بكافة أنواعه رزق وقسمة من ربنا سبحانه وتعالى ومابتلقى غير المكتوب. وهنا طبعا كلامنا عن الشغل في مجال الدراسة وليس الأعمال الجانبية. أول حاجة لازم تجهز شعورك انو شهاداتك وخبرتك من بلدك والدول الاشتغلت فيها ماعندها اعتبار كبير عند الاستراليين خاصة الناس الجاية من الدول المسماة دول العالم الثالث، فلازم تتعب عشان تبني اسمك هناك وده بيتم في خطوات مختلفة ممكن نلخصها بالشكل التالي:

١- عمل سيرة ذاتية على النمط الأسترالي: ودي ليها نماذج كثيرة في الانترنت بس بيكون تمام شديد لو اخدت cv بتاعة زول شغال هناك وبنيت عليها، وحاول تكون مختصرة وواضحة بقدر الإمكان ويفضل يكون رقم الموبايل فيها رقم استرالي. وبرضو حاول يكون عندك بروفايل في مواقع وسطاء التوظيف والمواقع المهنية المعروفة وأشهرها LinkedIn. ويكون احسن وأحسن لو عملت حساب بريميوم في الموقع المذكور لأنو بيديك اطلاع على فرص اكتر. اضافة أخرى، موضوع المعرفين references من الأمور المهمة ويفضل انك تتكلم مع الشخص المعني مباشرة وتتفقوا على الكلام الحيقولو لو طلب منه ذلك والبيكون غالبا عن شخصيتك وسلوكك والناحية دي مهمة جدا في أستراليا ممكن اهم حتى من الشهادات والخبرة.

٢- الحصول على شهادة محلية أو عضوية مهنية من أستراليا برضو بتزيد فرصك في المقابلات.

٣- عمل الخبرة المحلية: ودي أعقد نقطة في الموضوع، لأنو المفارقة هي انك مطالب بالخبرة المحلية عشان تشتغل وفي نفس الوقت مافي زول عايز يشغلك عشان تاخد خبرة البلد! والحكاية دي حلها أنك تقدم في أماكن أبعد وعلى وظائف أقل شوية عشان تبدأ، وماتقلق كتير البلد كلها حلوة فالمنطقة مابتفرق وبرضو مافي قيود زي الخليج في حال لقيت عمل تاني أفضل، يعني المسألة دايرة شوية صبر وذكاء وبعد ما تنعرف في السوق أمورك بتمشي كويس. برضو من الأمور الممكن تساعدك هي العمل الطوعي والبيكسبك معارف ممكن تستخدمهم كمرجع لك وبيساعدوك على فهم البلد وتحسين لغتك الانجليزية البتعتبر جواز سفرك في ذلك المجتمع وممكن تلقى واحد فيهم عندو فرصة عمل ليك او يقدمك لأحد معارفو لنفس الغرض. النصيحة انو الواحد يتكرب في الفترة دي وينسى حكاية اكون قريب من الناس عشان الفترة دي بتأسس للمستقبل.

٤- النواحي الشخصية: وأهمها على الإطلاق موضوع اللغة الانجليزية للتواصل مع الناس وأرباب العمل المحتملين ودي تحسينها بيكون عن طريق مخالطة الناس والقراءة المستمرة، وما تخجل من الموضوع ده فمافي زول حيضحك عليك أويحتقرك عشان لغتك اقل من الناس بل بالعكس معظمهم متفهمين خالص وبتحس بالفرق في مستوى لغتك بعد فترة بسيطة خاصة في جانب النطق أو الاكسنت. برضو حاول تجاري اهتمامات الناس عشان تفتح باب تواصل يعني على سبيل المثال في أستراليا الرغبي والرياضة عموما من المواضيع المحببة لمعظم الاستراليين، وللأسف معظم اهلنا السودانيين محتاجين شغل كتير في الناحية دي حيث يغلب عليهم الانغلاق وعدم التفاعل مع المجتمع، كمان لازم تتجنب النقاش في السياسة والدين والإساءة للأعراق المختلفة عشان المواضيع دي بتعمل حزازات وممكن تدخلك تحت طائلة القانون، وبرضو ماتحاول تنتقد نمط حياة الناس ديل لأنو ببساطة انت الدخيل عليهم وليس العكس خاصة إنّو مافي زول فارض عليك تبقى زيهم أو مانعك من حقوقك.

تقييم التجربة
زي ماقلت قبل كده، قرار الهجرة قرار صعب وتتداخل فيهو عوامل كثيرة بس أهم الشي يكون الواحد مدرك هدفه من الهجرة ومقتنع تماما بالفكرة، برضو خليك ريلاكس واستمتع بالتجربة وابتعد عن التفكير السلبي. طبعا عارف ان ظروف ودوافع الناس مختلفة وانو كلامي ده قد لاينطبق على حالات عديدة. شخصيا، كانت اهدافي اتعلَّم حاجات جديدة في مجالي وأعيش فترة من عمري في مجتمع مختلف وبرضو الحصول على الجنسية البتديك خيار انك تستمر في البلد وحتى لو رجعت السودان أو الخليج بتكون خط رجعة ليك ولأولادك غير الفرص البيلقوها في البلد، بالإضافة إلى الاستمتاع بالطبيعة الخلابة ونمط الحياة الجميل التي نفتقدها في بلادنا. أكيد كل الأهداف دي على وضعي الحالي (بالمناسبة عمري ٣٨ سنة) وممكن تتغير لاحقا مع التقدم في العمر والتغير في الظروف، بس أفضل الواحد مايشغل بالو كتير بالمستقبل ويعمل خططه على المدى القصير والمتوسط ويقيم الوضع كل فترة.

دي بالمختصر تجربتي وآمل انها تكون ساعدت من لديه الرغبة في الهجرة إلى أستراليا، وبالتاكيد أكون سعيد جدا بتقديم أي مساعدة لأحبابنا أعضاء المنبر العام، وربنا يوفق الجميع ويصلح حال بلدنا وما يحوجنا لبلدان الناس.

زي ماقلت قبل كده، قرار الهجرة قرار صعب وتتداخل فيهو عوامل كثيرة بس أهم الشي يكون الواحد مدرك هدفه من الهجرة ومقتنع تماما بالفكرة، برضو خليك
ريلاكس واستمتع بالتجربة وابتعد عن التفكير السلبي. طبعا عارف ان ظروف ودوافع الناس مختلفة وانو كلامي ده قد لاينطبق على حالات عديدة. شخصيا،
كانت اهدافي اتعلَّم حاجات جديدة في مجالي وأعيش فترة من عمري في مجتمع مختلف وبرضو الحصول على الجنسية البتديك خيار انك تستمر في البلد
وحتى لو رجعت السودان أو الخليج بتكون خط رجعة ليك ولأولادك غير الفرص البيلقوها في البلد، بالإضافة إلى الاستمتاع بالطبيعة الخلابة
ونمط الحياة الجميل التي نفتقدها في بلادنا. (QUOTE)
>>>>>>>>>><<<<<<<<<>>>>>>>>>>>>><<<>>>>>>>>>>>>
شكرا طارق عبد الله على هذه الإريحية في تقاسم هذا البةست الدسم معاك...
وخليني قبل ما أتم قصة السوداني الأمريكي البتفقع المرارة وبهدلة السواد اللقاها في الحدود الأمريكية الكندية
أعلق على هذه الفقرة الكتبتها إنت في تعليقك..

فعلا كما قلت أن قرار الهجرة قرار صعب .. وانا لمن أمشي إجازة في السودان بلقى اي زول اقابله يتمنى يسافر بره
السودان، وحتى في المطار وقبل مأ اصل البيت بلقى ناس يقولوا ليك والله بختكم العايشين بره السودان.. وطبعا ديل
ما عارفين الثمن الصعب الذي يدفعه البعض للتغلب على مصاعب الغربة والهجرة القاسية..ولكن الذي يضع هدف محدد
هو الذي يمكن أن يتغلب على كل مصاعب الغربة...
ولكن بصراحة وعلى الرغم من كل المآسي والمعاناة ، فإن الحصول على جواز السفر الاجنبي مهم جدا جدا جدا نسبة
للإجراءات الطويلة للمغتربين السودانيين للحصول على تأشيرة الخروج ( وطبعا السودان هي الدولة الوحيدة في الكرة الأرضية
البتطبق نظام تأشيرة الخروج).. ولمن حكيت لزميلة أمريكية ان المواطن السوداني يحتاج لتأشيرة خروج للسفر خارج وطنه
لهسع بتضحك.. وليها اسبوع بتضحك( وجه باسم).. جواز السفر الأجنبي مهم لأنه يسهل السفر لكثير من الدول والتي
يمكنك أن تدخلها بدون تأشيرة دخول .. ودي من أكبر فوائد الإغتراب...
والله يديك الصحة والعافية

عزيزنا الفاضل/ المعز ود ابو نورة
سأبلغ تحياتك النواضر لبت حلتكم بسمات أو كما تسميها
بت عمسيب نسمات، عندما تعود فهي قد ذهبت لمحاضرات المساء
في جامعتها العريقة قبل قليل..

ونرجو ان تأتينا بتجربتك في السفر خارج أمريكا وعودتك وماذا وجدت
عند ضباط الهجرة في المطار...وعلى الرغم من أنني سافرت كثيرا للسودان
وعدت ولم أجد مضايقات كثيرة في مطار جون كنيدي ، ولكن يبدو ان ضباط
الهجرة في الحدود البرية التي تفصل امريكا عن المكسيك وكندا من النوع العنصري
القاسي أو مدربين تدريب خاص لمعاملة الأاجانب بقسوة شديدة حتى ولو كانوا يحملون
الجنسية الأمريكية..
والله يديك الصحة والعافية

أخي طارق مبروك مجددا الاقامة الدائمة وانا واثق انك الهمت الكثيرين للهجرة
بس استفسار تاني واتحملنا شويه ههههه :
لو الزول وظيفته ماموجودة في SOL ، وموجودة في CSOL ممكن يقدم عادي ؟
وايهما اسهل للحصول على الاسكور العالي TOEFL ام IELTS
(ارجو مراجعة الخاص )

نواصل مع صاحب القصة :

بعد مرور دقائق وساعات ومرت وكأنها ايام وبدأت افكر أخماس في اسداس
عن سبب التحقيق معنا كل هذا الوقت .. واصابنا توتر نفسي..وكنا في هذه الأوقات
نسـتأذن منهم كي يستخدم الأطفال دورة المياه الخاصة بهم .. وفي الحقيقة لم يمانعوا
أبدا...
ونادني احد الضباط إلى داخل المكتب ، ولما أرادت زوجتي واطفالي ان يصحبوني
قال لي: دعهم يجسلسون هنا فأنا لا اريدهم الآن.
ودخلت المكتب ، وجلس هو أمام كمبيوتر:
وبدأ هذا الحوار:
س: هل هذه السيارة التي تقودها هي سيارتك"
ج: نعم هي سيارتي.
س: هل يمكن أن تخبرني ماهي موديلها وصنعت اي عام؟
ج: هي كرايسلر موديل عام 2007م
س: هل ممكن ان تعطيني رخصة القيادة واوراق السيارة وشهادة التأمين
ج: أوراق السيارة داخل السيارة ، ( وددت له برخصة القيادة.
وأمرني ان اذهب للسيارة لإحضار الأوراق.. وذهب معي ضابط هجرة آخر..
وعندما خرجنا لموقف السيارات لم تكن سيارتي في الموقف.. ولكن ضابط الهحرة
ذهب معي إلى مكان آخر قريب من المكتب وهو عبارة عن جراج سيارات
ووجدت سيارتي مرفوعة ، وكأنهم ميكانيكية يريدون إصلاح عطب بها.. ووجدت
ثلاثة ضباط يفتشون السيارة بأجهزة إلكترونية .. واخبرهم الضابط الذي أتى معي
( وكأنني مسجون) بأن ينزلو السيارة حتى يستطيع أخذ اوراق السيارة..
وأنزلوا السيارة ةأخذت أوراق السيارة ورحعنا للمكتب. واعطيت الأوراق للضابط
الذي كان يحقق معي.
ونظر الضابط في اوراق السيارة وقال لي:
- هذه السيارة ليست سيارتك وانما سيارة شخص آخر....لأن رخصة السيارة وشهادة التأمين
مكتوبة باسم غير اسمك.. فهل من تفسير.
( وتذكرت بانني عندما اشتريت السيارة سجلتها باسم صديقي وهو جاري في السكن لأنه يدفع
رسوم تأمين قليل جدا ، بينما طلبت مني شركة التأمين ان ادفع 150 دولار شهرياً .. ولذلك
طلبت منه ان يسجل السيارة باسمه.. وقد قعل .. ولذا فإن السيارة مسجلة باسمه على الرغم
من أن السيارة ملكي أنا..
وكنت قد نسيت كل هذه التفاصيل.. ولم أكن اعرف بانهم يمكن ان يدققوا في مثل هذه الجوانب..
ولذلك لم اتذكر هذه التفاصيل كي اقولها لهم .. ولكن عندما سألني هذا الضابط تذكرت
وشرحت له الأمر..
ودار الحوار التالي:
س: كيف نصدقك فيما تقول وانك لم تسرق هذه السيارة لغرض في نفسك؟
ج: يمكن ان تصدقوني بان تضربو تلفون لهذا الشخص وهو جاري كي تعرفوا
الحقيقة.
س: وهل عندك عنوانه ورقم تلفونه؟
ج: نعم عندي رقم تلفونه ، وعنوانه هو العنوان المكتوب في رهصة السيارة.
( وأعطيتهم رقم التلفون)
وكنت اظن ان الأمر سينتهي بمجرد علمهم بالحقيقة واملي ان اواصل السير
بعد ما بلغ مننا الإرهاق والتعب كثيراً.. ولكن املي كان كاذباً..
.. ملحوظة:
في الحقيقة هو لم يكتب لي الأسئلة والأجوبة كما اوردتها انا هنا. ولكني
سمعت القصة كلها واكتب ملاحظات وكأنني صحفية وكتبت هذا السيناريو
في شكل اسئلة وأجوبة حتى يسهل فهم فقع المرارة من تصرف ضباط الهجرة
الامريكان مع مواطن أمريكي... وكان هذا الشخص يحكي لنا هذه التجربة المريرة
التي مر بها وهو يتألم من الحسرة .. والغريبة كان بيشكر في السودان.. ويقول
يا حليل زمن العز والشرف .. وجينا للمذلة والهوان...
فهل فعلا وجد ذلة ومهانة ...
هذا ما ستعرفونه اذا تابعتم معنا( انا قاعدة أتدرب في مجال الصحافة حتى اذا رجعنا
للسودان نلقى لينا شغل نشتغله لاننا سمعنا ان الصحافة في السودان بقت وظيفة لمن لا وظيفة له
وخاصة وان عدد الصجف اليومية بقت أكثر من 10 صحف...
والله يديكم الصحة والعافية

الى حين ميسرة ومسرة
وسنغيب عنكم حتى يوم الاثنين
وسنسافر مع العزيزة امتثال لمدينة مونتريال الكندية لزيارة خالتها .
.وعند العودة نواصل وان شا الله ما نمر بالتجربة الصعبة ديِِ ...
والله يديكم الصحة والعافية

مرحب بيك طوالي اخونا أحمد

برجع ليك في الخاص بس على السريع كدة لازم تشوف ولاية عندها فرصة لمهنتك، ولو استوفيت النقاط اعمل ابداء رغبة EOI حتى تجيك الدعوة. بالنسبة للإنجليزي ماعندي فكرة عن TOEFL بس الاسهل منهم الاتنين PTE لكن لازم تتأكد اول من شروط جهة تقييم مهنتك عشان ماتضطر تمتحن اكتر من مرة.

ولَك التحية،،،،

الاخ طارق عبد الله
السلام عليكم ورحمة الله اشكرك على هذا البوست الرائع وضيوفك الكرام

حصلت على تقييم للشهادات والخبره يوم 10/10/2016 والحمد لله النتيجة كانت Positive من Vetassessوحاليا معركتي مع الانجليزي طبعا عندي حساب EOI من حوالي شهريين وظيفتي مدقق داخلي والحمد لله الوظيفة موجوده ضمن الوظائف المطلوبة الان
السؤال هل ممكن اقدم في وقت واحد على ثلاثة انواع من الفيز في وقت واحد ( 189 -190-489) لكي اوسع من الفرص

لك خالص الود
اخوك جمال الدين / ابوظبي

انا شايفة يا طارق ان الهجرة لامريكا اسهلبكثير من استراليا ودولاوروبا..وتجربتي لامريكا كانت بسيطة جداِِِ
دخلت بتاشيرة دراسية F1 ودفعت 3 الف دولار وقلب لي التاشيرة لتاشيرة هجرة..وبالمناسبة الحصول على التاشيرة الدراسيه ساهلة جدا جدا.. وجاياكم بشرح بسيط..وممكن اساعد وادفع القسط الاول لاي كلية وبعدما
بجي هنا ويشتغل يرجع لي القروش...لان الكليه هي
البتديك الجواب للسفاره للحصول على التاشيرة
ودمت بالف خير

الاخت بسمات سلام عليك
موضوع القبول ده عمليه حظ هنا في الخليج يتقدم للدراسة في امريكا سنويا حوالي 3000 طالب يتم الموافقة على 700 شخص او بالكتير 1200 والباقي يترفض
ممكن الواحد يجرب حظه و الحظ يضرب معها

الاخ جمال الدين
التقديم عن طريق الانترنت وموقع الجامعة ما بنجح الا اذا تاكدت الجامعة
بان الشخص المقدم للدراسة فيها عنده شرطين اساسيين وهما:
١~ الحصول على الشروط المطلوبة للقبول...يعني عندك كم كرديت (credit)
والحد الادنى ٤٤كرديت..وبما ان نظام الكرديت غير معمول به في السودان
فان المقدم من السودان بيرسل صورة من شهادة الثانوي وعلى اساس تسبة
النجاح بيتم القبول....وعادة الجامعات والكليات في امريكا بتقبل الطالب المقدم
من خارج امريكا بنسب اقل وبيسموهم International students ..
٢~الشرط الثاني ان يؤكد جديته في الحضور لامريكا وهذه الجدية يثبتها
الطالب بدفع رسوم القسط الاول مقدما قبل حضوره وبعد ذلك تكتب الجامعة
رسالة قبول للجامعة وفي الرسالة طلب من السفارات الامريكية منح تاشيرة دراسة
للشخص المعني...وفي هذه الحالة تمنح السفارة تاشيرة F1 فورا وبدون سين وجيم..
...ما عدا الجامعات الكبيرة زي كولومبيا ونيويورك وبيس وهارفارد وييل وبرينستون
التي لا تقبل الا النسب العالية جدا...
..اما الكليات الاخرى والغير مشهورة فهي تتغاضىةعن النسب الكبيرة عشان عينها على الرسوم
العالية التي يدفعها الطالب الدولي ولكنها لا تصدر رسالة القبول الا بعد دفع القسط الاول
وعادة الطالب الدولي بيدفع ضعف رسوم الطالب المقيم في امريكا...والكليات غير المشهورة
رسوم الدراسة السنوية فيها ١٤ الف دولار. والطالب المقيم ٧ الف دولار...وتطالب الكلية بدفع
القسط الاول وهو حوالي ٣٥٠٠ دولار لاستصدار التاشيرة...اما
الجامعات العريقة وبعد استيفاء شروط القبول فان رسوم الدراسة فيها اكثر من ٦٠ الف دولار
سنويا...واذا فكرت تدرس الطب ...فلا تفكر لان المبلغ خيالي..الا في حالة واحدة فقط
وهي ان تتحصل على نسبة تسمح لك بالحصول على منحة دراسية كاملةىمن الجامعة او
نصف منحة او ربع منحة زي الاتحصلت عليها اميرة بت مصطفى السيد..
ودمت بالف خير

الاخ جمال الدين
التقديم عن طريق الانترنت وموقع الجامعة ما بنجح الا اذا تاكدت الجامعة
بان الشخص المقدم للدراسة فيها عنده شرطين اساسيين وهما:
١~ الحصول على الشروط المطلوبة للقبول...يعني عندك كم كرديت (credit)
والحد الادنى ٤٤كرديت..وبما ان نظام الكرديت غير معمول به في السودان
فان المقدم من السودان بيرسل صورة من شهادة الثانوي وعلى اساس تسبة
النجاح بيتم القبول....وعادة الجامعات والكليات في امريكا بتقبل الطالب المقدم
من خارج امريكا بنسب اقل وبيسموهم International students ..
٢~الشرط الثاني ان يؤكد جديته في الحضور لامريكا وهذه الجدية يثبتها
الطالب بدفع رسوم القسط الاول مقدما قبل حضوره وبعد ذلك تكتب الجامعة
رسالة قبول للجامعة وفي الرسالة طلب من السفارات الامريكية منح تاشيرة دراسة
للشخص المعني...وفي هذه الحالة تمنح السفارة تاشيرة F1 فورا وبدون سين وجيم..
...ما عدا الجامعات الكبيرة زي كولومبيا ونيويورك وبيس وهارفارد وييل وبرينستون
التي لا تقبل الا النسب العالية جدا...
..اما الكليات الاخرى والغير مشهورة فهي تتغاضىةعن النسب الكبيرة عشان عينها على الرسوم
العالية التي يدفعها الطالب الدولي ولكنها لا تصدر رسالة القبول الا بعد دفع القسط الاول
وعادة الطالب الدولي بيدفع ضعف رسوم الطالب المقيم في امريكا...والكليات غير المشهورة
رسوم الدراسة السنوية فيها ١٤ الف دولار. والطالب المقيم ٧ الف دولار...وتطالب الكلية بدفع
القسط الاول وهو حوالي ٣٥٠٠ دولار لاستصدار التاشيرة...اما
الجامعات العريقة وبعد استيفاء شروط القبول فان رسوم الدراسة فيها اكثر من ٦٠ الف دولار
سنويا...واذا فكرت تدرس الطب ...فلا تفكر لان المبلغ خيالي..الا في حالة واحدة فقط
وهي ان تتحصل على نسبة تسمح لك بالحصول على منحة دراسية كاملةىمن الجامعة او
نصف منحة او ربع منحة زي الاتحصلت عليها اميرة بت مصطفى السيد..
ودمت بالف خير

شكرا الاخت بسمات على هذه المعلومات بخصوص دراسة الماجستير في المحاسبة او إدارة الاعمال هل هناك اي شروط مثل امتحان ال TOEFL او اي شروط احري وهل القبول بالنسبة للبكالريوس مربوط بعمر معين هل ممكن اي شخص عمره اكثر من 45 عاما ان يحصل على قبول لدراسة البكالريوس ؟؟تقبلي تحياتي

والسؤال الاهم كيف يتم تحويل فيزا طالب الي مهاجر وماهي الشروط ؟؟

الاخت بسمات الشيخ
كلامك سمح بالحيل ومشجع بس القبول ده حاولته فيهو كتير للدكتوراه
وانا ببحث عن قبول ودراسة PhD اونلاين
فياريت لو في أي جامعة القبول فيها سااااهل لميني فيها ينوبك ثواب
واكيد ما عشمان في منحة ، اصلا المنح دي خليناها للنوابغ زي ناس اميرة بت مصطفى السيد

شكراً ليك يا بسمات على إثراء البوست بالمعلومات القيمة حول الدخول إلى أمريكا، والحقيقة استفدت كتير من كلامك. حقو نغير المسار بعد كدة (وجه ضاحك).

فعلا أتفق معاك المداخل لأمريكا أسهل من غيرها بس عموما الدخول بفيزا إقامة دائمة أفضل في حالة الأسر بينما تأشيرة طالب مناسبة للشباب أكتر. على فكرة زرت أمريكا أكتر من مرة بس حسيت الحياة هناك قاسية وصعبة بالمقارنة مع أستراليا على قولة واحد من أصحابنا هناك عايش عشان تدفع الفواتير بس!

واصلي ومتابعينك،،،،،

الأخ/ جمال الدين

الواحد ما بيحدد نوع الفيزا الحيقدم عليهو وإنما بيتم التقديم حسب الدعوة من دائرة الهجرة والمحدد فيها نوع الفيزا. أنصحك تواصل عادي في موضوع الانجليزي، ولو ربنا وفق اعمل update على EOI حتى تجيك الدعوة بس حابي انبهك فيزا 489 مافيزا إقامة دائمة زي 189 و 190.

وربنا يوفقك

الأخ طارق سلامات..
شكرا على رحابة صدرك في الرد على كل الاستفسارات

- ممكن طبعا تبدأ قبل الايلتس، وأعتقد أنه من الأفضل التركيز على عمل التقييم قبل امتحان الانجليزي لانه بيحتاج أوراق وزمن وعايز مجهود منك، وكمان مايضيع تعبك ساي في الايلتس لو ماقدرت تستوفي شروط التقييم.


شوية أسئلة توضيحية لانه الفكرة دي كل يوم ماشة تربط زيادة:

التقييم المقصود في الكووت الفوق اي تقييم بالضبط؟ تقييم الشهادات ولا النقاط؟

عندك فكرة لو الواحد معاه شهادات مهنية من شركات عالمية هل ممكن تفيد في زيادة الفرص؟

أول خطوة بعد ال EOI شنو وقبل ال invite؟

شكرا لك اخي طارق على طوله بالك وردك لجميع المواضيع

الاخ طارق انا اعرف ان فيزا 489 انها فيزه تسمح لك بالاقامة المؤقته لمده 4 سنوات وبعدها بيكون لك الحق في التقديم للاقامة الدائمة لانني اخترت جميع الفيز لتوسيع الفرص والمهم عندى ان تصل اي نوع من الفيزا

والغريب انهم لم يقيموا شهادة الـــــــ CERTIFIED INTERNAL AUDITOR} CIA} وانما عملوا تقييم لشهادة البكالريوس فقط

الاخ احمد محمد موسي مرحب بك

من وجهه نظري اول خطوة هي عمل حساب EOI في موقع الهجرة الاسترالي وان تكون وظيفتك ضمن الوظائف المطلوبة لهذا العام
الخطوة الثانية ارسال عن طريق الاسكانر لشهاداتك الدراسية البكالريوس او الماجستير او الشهادات المهنية تكون بالانجليزي ومعها شهادات الخبرة بالانجليزي وتنتظر الرد خلال شهرييين او اكثر لو التقييم طلع Positive بتكون امورك تمام

جمال
واحمد
خلوني بالاول ارد على صاحب البوست طارق وبعدين نجيكم
برواقة للاجابة على اسئلتكم...لاني بحول الاسئلة لاميرة بت
السيد وهي عندها خبرة اكاديمية اكثر ...ولكنها في رحلة
قصيرة الى مونتريال في كندا وستعود مساء اليوم.....
...
والله يا طارق كلامك صاح بالنسبة لصعوبة الحياة في امريكا
واذا انت شفت الناس جارية كيف في مدينة نيويورك حتستغرب
..وفعلا بالنسبة للاسر الحياة صعبة شديد...وعليك الله اقرا
تعليق اميرة في بوست ود البوش العنوانه سياحة في ارض
البطانة .. وشوفهي بتلقى كم فاتورة في صندوق البريد...
...لكن نحن يا طارق قعادنا مؤقت بزمن الد اسة فقط...
وما عندنا النية نستمر في المعيشة في البلد دي...لكن
كفاية لقينا جواز السفر الامريكي لتسهيل السفر..واملنا
بعد القراية نلقى عريس في شهامة ومروءة عبد الله ود
البوش ..زي ما بتقول لينا اميرة...ونهرب لسودانا ولام
المدائن...
ولكن برضه في حاجة لازم تعرفها ..الما شاف نيويورك
ما شاف حاجة في الدنيا ..
ودمت بخير

ان شاء الله كلو بيتسهل يا بسمات بس المهم موضوع القراية ده ينتهي على خير، وبالنسبة لموضوع العرس الجواز الأمريكي ده زاتو بيجيب ليك العرسان (وجه ضاحك) وان شاء الله تلاقي ود الحلال.

لكن موضوع الرجعة للسودان ماتشغلي بالك بالفكرة دي لحد ما تخلصي الدراسة وبعدها لكل حادث حديث لانو ممكن تجي متغيرات فيما بعد سواء مع القرار أو ضده، فأحسن تخلي النقطة دي للزمن.

وربنا يوفقك ويرجع كل مغترب لوطنه.

شطب للتكرار

شطب للتكرار

الأخ جمال..حبابك ألف

Quote: لاخ احمد محمد موسي مرحب بك من وجهه نظري اول خطوة هي عمل حساب EOI في موقع الهجرة الاسترالي وان تكون وظيفتك ضمن الوظائف المطلوبة لهذا العام الخطوة الثانية ارسال عن طريق الاسكانر لشهاداتك الدراسية البكالريوس او الماجستير او الشهادات المهنية تكون بالانجليزي ومعها شهادات الخبرة بالانجليزي وتنتظر الرد خلال شهرييين او اكثر لو التقييم طلع Positive بتكون امورك تمام

الشهادات بنرسلها لكن لمنو؟ هل لجهة تقييم /معادلة شهادات ولا لمكتب الهجرة الأسترالي؟

ياتو جهة الما ختت اعتبار لشهادة المراجعة الداخلية؟ يمكن لانها اصلا شهادة انترانشيونال فما بتحتاج معادلة

أخونا أحمد، شوف الردود في الأسفل:

"شوية أسئلة توضيحية لانه الفكرة دي كل يوم ماشة تربط زيادة:

التقييم المقصود في الكووت الفوق اي تقييم بالضبط؟ تقييم الشهادات ولا النقاط؟

عندك فكرة لو الواحد معاه شهادات مهنية من شركات عالمية هل ممكن تفيد في زيادة الفرص؟

أول خطوة بعد ال EOI شنو وقبل ال invite؟"

- المقصود تقييم الشهادات
- للأسف التقييم بيكون على الشهادات الأكاديمية فقط وليس المهنية.
- بعد EOI مافي شي بيتعمل لحد ما تجيك الدعوة، وأحسن تعملو لمن تكون جاهز لأنو صالح لفترة معينة وبعدها بينتهي لو ماجاتك دعوة. بس أكيد ممكن تعمل واحد تاني لو الأول انتهى.

الاخ احمد محمد موسي

الشهادات بنرسلها لكن لمنو؟ هل لجهة تقييم /معادلة شهادات ولا لمكتب الهجرة الأسترالي؟

ياتو جهة الما ختت اعتبار لشهادة المراجعة الداخلية؟ يمكن لانها اصلا شهادة انترانشيونال فما بتحتاج معادلة
-------------------------------------------------------------------------------------------------------------------------------------------
الشهادات بترسل حسب طبيعة وظيفتك الي جهه الاختصاص فمثلا المدققون الداخليين بتم تقييمهم من Vetassess ادخل الي موقع الهجرة الاسترالي في الاعلي في بوست الاخ طارق ستجد جهة الاختصاص لتقييم شهاداتك وخبرتك

سلامات
بوست مهم وجميل للغاية

طيب بسأل من شهادات الخبرة المفروض تكون كم سنة؟ ولا لازم تغطي الفترة من التخرج ولغاية الان؟

السؤال المهم لو كنت ناوي اجي راسي عديل زول زراعة، يعني اجي واعمل مزرعة واشتغل فيها مزارع هل عندهم اي برنامج زي ده؟ ولا لازم تخش كموظف وبعدين تتصرف؟

الاخوان جمال الدين عبيد
واحمد الصادق...
ستقراون غدا اجابات كافية ووافية عن اسئلتكم..حتى ان
الاميرة قالت انها ستذهب بنفسها الى كلية بيركلي ،وهي كلية
معروفة في كاليفورنيا وعندها فرع في مدينة نيويورك ونيوجيرسي
Berekeley college ومعروفة بان شهاداتها في ال Business Administration

معترف بها في جميع دول العالم..وحتسالهم عن كل تساؤلاتكم...

...وكمان يا طارق حتسمعوا منها كيف عاملها ضباط الهجرة الامريكان عند الرجوع
الى وطنها الام ..الولايات المتحدة الامريكية ..ومسؤولي الهجرة الكنديين عندما
وصلت اليهم...وطبعا نحن بنقول ليها امريكا بقت ليها وطن ام..عشان نرفع ضغط
دمها....لانها لا تبدل بالسودان حتى سويسرا...
ودمتم بالف خير..

التحية ليك يا بسمات وللأميرة
ويا سلام على اهتمامكم وربنا يديكم الفي مرادكم (دعوة حبوبات وكدة )
وانا استفساري عن
PhD online in TESOL or linguistics

وفي انتظار أميرة وتجربتها الشخصية مع ضباط الجوازات

شكرا الاخت بسمات على هذا الاهتمام ومعك الاخت اميرة
لو وجدت قبول لدراسة ماجستير إدارة الاعمال في هذه الجامعة يكون عمل رائع ومستعد لدفع المصروفات الخاصة بهذا القبول

ده مجهود عظيم منكم يا بسمات انتي وأميرة، متابعين التفاصيل بشغف.

طارق صاحب البوست وضيوفه الكرام
... اولا نكمل قصة المهاجر السوداني الأمريكي .. وبعدين نحكي تجربتنا عندما عبرنا من امريكا إلى كندا وبعد يومين فقط من كندا إلى أمريكا.. وقربنا ننسى ما حصل له في الحدود الامريكية عندما وصل إلى ضباط الهحرة الأمريكيين.. وبعد أن تم سؤاله .. احيل إلى داخل مكاتب الهجرة هو واولاده...
.. وسأله ضابط الهحرج الذي يحقق معه
:س: هل هذه السيارة التي تقودها سيارتك؟
ج: نعم سيارتي. ( وبعد أن أحضر له اوراق السيارة من السيارة التي
كان ضباط هجرة آخرين يفتشونها تفتيشا دقيقا) اكتشف انه كان
مسجل السيارة باسم احد اصدقائه الذي يسكن معه في نفس العمارة. وذلك لأن
صديقه كان يدفع تأمين أقل لشركة التأمين . وكان قد نسي هذا الأمر خلال استجوابه
ولم يذكر تلك التفاصيل لأن احدا لم يسأله..
وهنا أعطاه ضابط الهجرة شهادة تسجيل السيارة وقال له : أقرأ ما هو الإسم المكتوب هنا.
. وقرأت الإسم : وقلت له ان السيارة سيارتي ولكنها مسجلة باسم صديقي وذكرت له الإسم والعنوان
.. ولكني اضفت من عندي انني اشتريت السيارة منه ولم اتمكن من تسجيلها حتى الآن باسمي ولكني سوف أفعل عندما أعود
.. وبالطبع لم أقل له إنني سجلت السيارة باسم صديقي عشان أتهرب من دفع رسوم تأمين عالية....
وطلب مني ان أجلس مرة أخرى مع أولادي في الإستقبال... وقبل أن أجلس جاءني ضابط هجرة آخر وطلب مني ان اعطيه الهاتف الجوال وكذلك طلب من زوجتي ان تعطيه هاتفها الجوال... وكان أحد اولادي يمسك بحهاز بشبه الهاتف الجوال ولكنه ليس بجوال
ولكن للعب ألعاب أطفال... وهنا طلب منه أن يعطيه الجهاز .. وشرحت له ان هذا الجهاز ليس هاتف.. ولكن جهاز تسلية.. وترك الجهاز ولم يأخذه معه..بعد ان فحصه.
وبعد مرور ساعتين أو أكثر جاءني احدهم وطلب مني ان أذهب مرة اخرى للضابط الذي كان يحقق معي.. وقال لي:: سوف لن تستطيع أن تذهب الآن .. ولكن بإمكان زوجتك واطفالك ان يذهبوا وتبقى انت معنا .. لمزيد من التحقيقات.
وهنا تضايقت جدا.. وقلت له لا يمكن لزوجتي واطفالي ان يذهبوا وحدهم وهم سيظلوا معي هنا حتى نذهب سويا.. وهنا جاء ضابط آخر واقترح لي ان تذهب زوجتي واولادي لفندق قريب من مكاتب الهجرة وان يبيتوا هناك حتى ننتهي من التحقيقات .. . لأننا لا نعرف متى سننتهي من التخقيقات..
وبالفعل استصوبت الفكرة وطلبوا تاكسي .. وقلت لهم اعيدوا الهاتف الجوال لزوجتي حتى تستطيع الإتصال والتأكد بان التحقيقات انتهت حتى تعود هنا.. واعطوها الهاتف الجوال... واعطوها كذلك رقم تلفون المكتب كي تتصل قبل الرجوع .. وقبل ان تذهب قلت لها ان تتصل ، عندما تصل الفندق، بصديقي وتخبره بالحاصل وان ضباط الهجرة سيتصلون به...
وجلست في الإستقبال وكنت جائعا .. ولم اتحدث عن هذا الموضوع.. وبعد أن مكثت في غرفة الإستقبال أكثر من خمسة ساعات كاملة ، كان ضباط الهجرة ينادونني خلالها لمزيد من الأسئلة عن صديقي والذي سجلت السيارة باسمه.. وكانت أسئلة سمجة وسخيفة .. وقالوا لي انهم حاولوا الإتصال به على الرقم الذي اعطيته لهم ولكنه لم يكن يرد ، وتركوا له رسائل ... وعرفت انهم ربما اصابهم شكوك انه او انني لنا علاقة بالإرهاب.. ولا أدري من اين اتت هذه الشكوك فهل من إسمي أو من شكلي أو من جنسيتي الأصلية - السودان- والسودان موضوع عندهم في قائمة الدول الراعية للإرهاب..
. .. وفي تلك اللحظات لعنت اللحظة التي فكرت فيها للهجر لأمريكا.
.. وفي حوالي الساعة الثالثة صبحا اطلقوا سراحي وقالوا لي يمكنك ان تذهب الآن....
ودزن ان يفسروا لي لماذا حجزوني كل هذه الفترة..
وذهبت للفندق وبتنا ليلتنا هناك .. واخبرتني زوجتي بانها كانت قد اتصلت بصديقي عدة مرات ولم يكن يرد ،
واتصلت بزوجته ولكنها ايضا لم ترد.. وتركت له رسائل.. واخيرا وقبل ساعة فقط اتصل بها صديقي.
وقال ان هاتفه الجوال لم يكن به كهرباء وانه كان قد تركه في البيت في الشاحنة ، وانهم كانوا في مناسبة عرس وعند عودتهم وجد رسائل من ناس الهجرة ووجد رسالتها واتصل بمكتب الهجرة واجاب على اسئلتهم ...
...هذه هي قصته.....أما قراراته وتعليقاته وملاحظاته فنتركها لوقت آخر...
.. وهذه هي معاملة ضباط الهجرة لأمريكي الجنسية اذا كان هناك اي شك بانه يمكن يوضع في دائرة شك الإرهابيين...
فهل مررت انا وامتثال بنفس هذه التجربة...عند دخولنا لكندا او عند عودتنا لنيويورك...
مع فارق اننا سافرنا بالبص وليس بسيارة خاصة...تابعونا لتعرفوا الحقيقة..
... والله يديكم الصحة والعافية

شكرا الاخت بسمات على هذه المعلومات بخصوص دراسة الماجستير في المحاسبة او إدارة الاعمال هل هناك
أي شروط مثل امتحان ال TOEFL او اي شروط اخري وهل القبول بالنسبة للبكالريوس مربوط بعمر
معين هل ممكن اي شخص عمره اكثر من 45 عاما ان يحصل على قبول لدراسة البكالريوس
؟؟تقبلي تحياتي والسؤال الاهم كيف يتم تحويل فيزا طالب الي مهاجر وماهي الشروط ؟؟))( Quote).
.................................
.....................

.اولا نرد على جمال الدين ... الجزء من السؤال البيهمني وخضت تجربته.. هو تحويل الفيزا الدراسية إلى مهاجر..
نعم طبعا ممكن.. ولكم بشرط أن تقدم قبل مرور سنة بعد ووصولك أمريكا.. يعني نفرض انك وصلت مطار جون كيندي يوم 1 نوفمبر 2016م ..
لازم تقدم لطلب الهجرة قبل بوم 30 إكتوبر 2017م... وإلا فسوف لن يتم قبول الطلب ..وبالمناسبة المحامي الشاطر الذي سيتابع طلبك بياخد 3 ألف دولار
.. ولكن بالأقساط...
. والسؤال الثاني: جوابه : ما في اي عمر محدد للدراسة في امريكا... وممكن تدخل الجامعة وعمرك 70 سنة.. وتعمل ماجستير ودكتوراة وعمرك 90 سنة..
. وانا بحاول اجيب ليك صورة إمرأة عمرها أكثر من 75 سنة تخرجت من الجامعة ولابسة روب التخريج ومدير الجامعة يسلمها الشهادة ويهنئها على حصولها درجة البكالريوس.
.. .. بالنسبة للأسئلة الأكاديمة عن دراسة الماجستير في إدارة الأعمال أو المحاسبة..
فالرد التالي من الأميرة أميرة بت مصطفى السيد.. والتي ذهبت بنفسها لإدارة القبول بكلية بيركلي Berkeley College وادوها معلومات كاملة ..
ولغاية ما تجيكم بالتفاصيل الدقيقة فهذه هي المعلومات الأولية....
نعم ممكن تعمل ماحستير في إدارة الأعمال او المحاسبة في هذه الكلية... وإذا لغتك الإنجليزية ضعيفة لازم تدخل كورس لغة انجليزية لمدة 6 اشهر داخل الكلية ، قبل
أن تبدأ دراسة الماجستير عشان تكون مصطلحات كورس إدارة الأعمال أو المحاسبة معروفة ومألوفة لديك...
وأخبرها المسؤول عن إدارة قبول الطلاب الأجانب والبيسموهم الطلاب الدوليين الذين يأتون من خارج أمريكا International Students
أن طلاب أجانب كثيرين جدا يدرسون في الكلية هنا في نيويورك وفي نيوجيرسي... ولازم تنجح في نهاية الكورس الإنجليزي عشان تبدأ دراسة الماجستير..
والإمتحان على حسب قوله بسيط جدا ويتركز في المصطلحات التي ستجدها في مراجع إدارة الأعمال .. لأنهم بيطلبوا منك خلال دراستك للماجستير تكتب مقالات
عن اسئلة معينة تجدها في مرجع معين ويحددوا ليك 10 صفحات تقراها وتجاوب على الاسئلة في شكل مقال,,, وإذا ما بتعرف المصطلحات ما حتعرف تجاوب...
ودمت بألف خير وصحة وعافية

بابسمات هل يمكن الحصول على تأشيرة طالب بقبول من ال
community college ؟ انا راسلت أحد الكليات واستوفيت شروط قبول اسمه (القبول المشروط) وهو بدون توفل على اساس عمل كورس لغه لمدة 6 شهور قبل بدء الدراسه في نفس الكليه ، لم اكمل وتخوفت من رفض التأشيرة لأني لم أسمع بها من قبل واسعارها اقل بكثير من رسوم الجامعات

لحين ميسرة
وغدا نرد على احمد الصادق وجمال الدين وامير فرح...
ونحكي تجربة السفر الى مدينة مونتريال الكندية
وكيف استقبلنا ضباط الهجرة الكنديين وكيف استقبلنا
ضباط الهجرة الامريكان عند عودتنا الى نيويورك...
وبعد ذلك نقدم شكرنا وتقديرنا وامتناننا الى صاحب
البوست السمح طارق عبد الله الذي اتاح لنا هذه الفرصة لنشارك معه
في بيان وجهة نظرنا ووجهة نظر غيرنا حول مصاعب الهجرة
والغربة...ونرد على اسئلة من يريد القدوم لامريكا...
...والله يديكم الصحة والعافية

يا أميرة النحكي ليك شوية عن ضباط الهجرة السودانيين
سنة 2006 تقريباً كنا ماشين من الخرطوم لمدني بحافلة اتحركت بينا زي الساعة 8 ونص
بعد طلعنا من التفتيش بي شوية لحقتنا عربية شرطة فيها عسكري عندو شكلة قديمة مع سيد العربية
اتلموا العساكر وقالوا ليه تتحرك معانا هسة بي عربيتك لقسم الشرطة وساقونا كلنا معاهو
دخلوا بينا قسم شرطة لي جووووووة كدة في سوبا وبقينا قاعدين متفنين في الواطة منتظرين السواق يطلع يودينا اهلنا
ساعة مرت .. ساعة واكتر .. والوقت روح تأخر
واحد كورك في عسكري قال ليه نحن ذنبنا شنو جايبيننا هنا العساكر قالوا ليه جابت ليها لماضة ! أطبلوهو
طبلوهو في الحراسة وطبلوا السواق في حراسة تانية ونحن راقدين في التراب في حوش القسم
الوضع دة استمر لحدي 1 صباحاً وفي الشارع مافي عربية تدخلنا الخرطوم جوة .. الزمن داك مافي ركشات وأمجادات بتتحاوم بالليل زي هسة
بعديها بقينا شغالين تحانيس واسترحامات للعساكر وعمك بقول ليهم عندي سكري وزمن الانسلوين جاء وناس يقولوا ورونا لو عاوزين كفالة للسواق بندق شيرنغ ندفعها وعييييييك
فجأة طلع لينا الضابط مدير القسم كان مقدم أظنه استبشرنا خير قلنا الله فكانا من العساكر الوهم ديل وجاب لينا البفهموا
جاء نهرنا ليك كلنا : عاملين لي جوطة هنا مالكم ؟ قلنا ليه ما لاقين عربية توصلنا إن شاء الله جوة الخرطوم ذاتو .. مدني خليناها
قال وأنا مالي ومالكم .. توصلوا ما توصلوا ما شغلتي والسواق دة ما طالع الليلة يلا كلكم برة ما داير أي مواطن جوة القسم بتاعي وإلا حأبيتو في الحراسة

جرجرنا كرعينا وطلعنا تمينا قعدتنا في الشارع ولولا إنه الباعوضة كانت شديدة كان بيتنا في واطاتنا ديك
واحد قال عندي صاحبي ضابط شرطة العندو رصيد يديني تلفونه نتصل بيه يمكن يلقى لينا حل
طلع الضابط صاحبة شديد بالإضافة لي بكاء الركاب الكتير بالسماعة الخارجية
جانا في القسم ودخل اتفاهم مع العساكر شوية كدة وطلع لينا السواق بي حافلته زي 2 صباحاً كدة حتى مشينا أهلنا

طارق وجمال الدين انتو 100%

الايام الفاتت دي الواحد نص يومو في موقع الهجرة ويا غرقت يا جيت حازمها !!

@أحمد محمد عمر

دا الزيت

يا أحمد موسى أنا متفائل ليك .. شهادتك دي ما هينة بالذات لو خلصت الـ lab exam
بتلقى بيها شغل in no time
3 شهور بتظبط ليك الانجليزي ولو قاعد في السودان أمشي نادي المخاطبة الأمريكي في السوق العربي أدخل IELTS preparation course مع استاذ (أبوبكر لو) وبتجيب درجة كويسة بإذن الله

الاخت بسمات
تحياتى
بالنسبة للجامعات الاقل تكلفة ( ناس 14000 دولار و3500 دولار قسط اول )
هل الشهادة الثانوية العمرها اكثر من 5 سنوات على سبيل المثال مقبولة للتقديم فى هذه الجامعات ؟
بالنسبة للدراسات العليا ( دبلوم عالى / ماجستير / دكتوراة ) تكلفتها كم اى رسومها كم وشروط التاشيرة برضها بنفس خطوات البكالريوس ؟
فى حالة تحويل اقامة طالب الى اقامة هجرة , ماهى الامتيازات التى ستجدها وهل يمكن له العمل بطريقة قانونية وبدوام كامل والدوام الكامل اقصد به العمل اكثر من 24 ساعة فى الاسبوع حتى يستطيع الصرف على نفسه فى معاشه ودراسته ؟
شكرا مقدما
والشكر ايضا لاخونا طارق صاحب الدار الذى اتاح لنا فرصة السؤال مع تحياتى له

الأخ طارق وبقية رواد البوست

معليش على كترة الطلة البتمسخ خلق الله

لو في تفاعل انا حاعمل ابديت على البوست بالخطوات العملية ونتائج البحث المكثف عن الموضوع.. حتى لو الواحد ما اتوفق يمكن يقدر يساعد زول تاني بمعلومة

أول أبديت:

Quote: للأسف التقييم بيكون على الشهادات الأكاديمية فقط وليس المهنية.

على الاقل لناس الآي تي الشهادات غير الأكاديمية من مايكروسوفت و سيسكو ممكن تقيم

https://more.acs.org.au/__data/assets/pdf_file/0020/7319/Skills-Assessment-Guidelines-for-Applicants.pdfhttps://more.acs.org.au/__data/assets/pdf_file/0020/7319/Skills-Assessment-Guidelines-for-Applicants.pdf

دا ملخص:

Quote: 9. VENDOR CERTIFICATIONS The following vendor certifications are accepted by the ACS as comparable to graduate outcomes of an ICT major Microsoft Certifications: Microsoft Certified Solutions Expert - All certifications Microsoft Certified Solutions Developer - All certifications Cisco Certifications: Cisco Professional: Cisco Certified Network Professional (CCNP) Cisco Certified Design Professional (CCDP) Cisco Certified Voice Professional (CCVP Cisco Certified Security Professional (CCSP) Cisco Certified Internetwork Professional (CCIP) Cisco Expert: Cisco Certified Internetworking Expert (CCIE) Cisco Certified Design Expert (CCDE) Cisco Architect: Cisco Certified Architect Cisco Certified Network Associate (CCNA) certification is not accepted by the ACS

سؤالين:

1: سيرتيفايد كوبي للشهادات دي هل من السفارة الاسترالية؟ نورنا يا طارق
2: هل ينصح بانو الواحد يقيم شهادات الزوجة كمان ولا كيف؟

الاخ خالد حاكم
في معلومة لازم اصححها قبل ما تجيكم اميرة بت السيد بالتفاصيل..
وهي ان مبلغ ال ١٤ الف دولار ما بيعتبر القسط الاول ولكن رسوم الدراسة
للسنة كاملة..لفترتين 2semesters ..وهي الفترة من سبتمبر وحتى ديسمبر والفترة الثانية
من شهر يناير وحتى شهر يونيو من كل عام...واذا كنت بتدفع في كل فترة
سبعة الف دولار...الجامعة ممكن تقسط ليك رسوم الفترة الاولى لاقساط
يعني هلى اربعة شهور فمثلا تدفع في القسط الاول ١٥٠٠ دولار...في شهر سبتمبر
و١٥٠٠ دولار في شهر اكتوبر و ١٥٠٠ دولار في شهر نوفمبر وفي شهر ديسمبر
تدفع باقي الفترة الاولى وهو ٢٥٠٠ دولار ...وهكذا ايضا للفترة الثانية..
يعني القسط الاول المفروض الطالب الدولي يدفعه عشان الجامعة تكتب ليه
جواب استصدار تاشيرة الدخول لامريكا هو مبلغ ١٥٠٠دولار فقط..
..وستعود اليكم اميرة بتفاصيل اكثر....وهي بتعتذر عن التاخير لظروف
اسرية خاصة..
والجامعات الامريكية بتقبل كافة الشهادات حتى ولو مضى عليها خمسين سنة..
والمراة العجوز التي تحدثت عنها والتي تخرجت من الجامعة وعمرها اكثر من ٧٥ سنة
كانت قد قدمت شهادة الثانوي التي حصلت عليها قبل اكثر من خمسين سنة..
ودمت بالف خير

للفائدة

الاخ احمد محمد عمر
انت ما قصرت ابدا...وهذا الفيديو الذي اتيت به مفيد جدا
جدا حتى للناس المقيمين في امريكا...
ولقد كفيت ووفيت...
..مش كان تحيب لينا الفيديو ده قبل ما ندفع دم قلبنا في جامعات بقولوا عليها عريقة...والجامعة
دي اظنها اعرق جامعة..لانها ما جامعة بتاعة تجارة..
وازيد من عندي انه اذا استعطت تحويل تاشيرة الطلبة الى تاشيرة هجرة وتحصلت على الاقامة
الدائمة ممكن تكلب قرض من البنوك ..كما ان ا حكومة الولاية التي تعيش فيها ممكن تديك مساعدة
مالية غير قابلة للاسترجاع على حسب قدرتك المالية ..
ودمت بالف خير وصحة وعافية...

الأخ أحمد موسى

مرحب بيك طوالي وكلنا هنا للفائدة، اول حاجة يا أخوي ورينا الاقتباس quote ده بيتعمل كيف :)

شكرًا للتصحيح بخصوص التقييم ولازم الواحد يتأكد من الشروط من الجهة مباشرة قبل اي خطوة.

بالنسبة لأسئلتك:
- فعلا السفارة الأسترالية هي الجهة الوحيدة المخولة لعمل certified copies خارج استراليا.
- بالنسبة لتقييم شهادات وخبرات الزوجة هو ما اجباري بس بيديك ٥ نقاط في التقديم، بس لازم تكون مهنة الزوجة مطلوبة للهجرة وبيتعمل التقييم بنفس طريقة المتقدم الرئيسي. عموما أنا شايف إنّو سكة طويلة والخمسة نقاط دي ممكن تعويضها بالتركيز على احراز درجة اعلى في الانجليزي.

ومتابعين،،،،،،

الأخ احمد محمد عمر
شكرًا على الفيديو المفيد وكويس ذكرتني انصح الإخوة المهتمين بمواضيع الهجرة والتعليم إنّو يشتركو في قناة الراجل ده واسمه د. ابو بكر ادريس علي اليوتيوب لانها فعلا كانت احد مصادر المعلومات المفيدة بالنسبة لي بالذات في مجال المقارنات بين الدول والجامعات سواء لأغراض الهجرة أو الدراسة.

والله يديك العافية،،،،،

سلامات تاني ياطارق

عندي اسئلة فوق ما جاوبت عليها!

طيب
انا محاسب برضو خريج جامعة النيلين بكالوريوس، شهادتي الجامعية موثقة من وزارة التعليم في السودان وموثقة في الامارات، عندي خبرة عملية حوالي 10 سنوات، اعتقد اني قد احتاج ارسل ليك صور من شهادات لخبرة دي عشان توريني لو كانت مقبولة بالصيغة الحالية ولا بحتاج اغيرها
بخصوص النقاط الرابط الفوق مافتح معاي بشكل كويس ياريت تجيب منو كوت او توضح بالتفصيل عدد النقاط لكل حاجة والمطلوب كم من النقاط وكده

عموما انا ناوي اخوض التجربة دي نية شديد، ياريت تكون قايد لي خطوة بخطوة

تحياتي

عذرا أخي خالد عَلى عدم انتباهي لأسئلتك
بخصوص الخبرة الحد الأدنى المطلوب للتقديم هو ثلاث سنوات وكلما زادت بتاخد نقاط اكثر.بالنسبة للحضور للبلد كمزارع أو غيره انت لك مطلق الحرية طالما إقامتك قانونية بس بصراحة ماعندي فكرة لو في برنامج بالشكل ده لان معرفتي تنحصر في تأشيرة العمالة الماهرة. ممكن أساعدك لو عايز تاخد رأي مستشار تأشيرات.بخصوص شهادة الخبرة أحسن تشوف المتطلبات مباشرة من موقع جهة تقييم مهنتك عشان تكون في السيف سايد بس عموما هي مافي شكل معين ليها بس لازم تكون على ورق الشركة المروس وبتوضح المرتب وعدد ساعات العمل الاسبوعي وانو العمل بدوام كامل واهم المسؤوليات الوظيفية ولازم تتوقع من شخص اعلى منك وظيفيا مع تقديم بيانات الاتصال لأنو ممكن يسألوه.

رابط النقاط -https://www.border.gov.au/Trav/Visa-1/189 أتأكد علامة الشرطة - بعد الرقم 189 وبيفتح الرابط معاك.

وتقبل التحية،،،،،،،

الاخت بسمات
تحياتى مجددا
شكرا كتير على الاجابة وعلى المعلومة لكن الاسئلة الباقية ادناه ما رديتى عليها والا دى من اختصاص اختنا اميرة بت السيد ؟
بالنسبة للدراسات العليا ( دبلوم عالى / ماجستير / دكتوراة ) تكلفتها كم اى رسومها كم وشروط التاشيرة برضها بنفس خطوات البكالريوس ؟
فى حالة تحويل اقامة طالب الى اقامة هجرة , ماهى الامتيازات التى ستجدها وهل يمكن له العمل بطريقة قانونية وبدوام كامل والدوام الكامل اقصد به العمل اكثر من 24 ساعة فى الاسبوع حتى يستطيع الصرف على نفسه فى معاشه ودراسته ؟

الاخ خالد
الاسئلة الباقية من اختصاصات اميرتنا بت السيد..
..وبمجرد محكمة الهجرة وافقت ليك بطلبك ...حيطلبو منك
البصمات ..وبعد اقل من سهر تفتح صندوق البريد تلقى كرت العمل
وتسمى employment authorization وبعد داك تقدم لكرت
بيسموه رقم الضمان الاجتماعي...social security card واظنه
في السودان اسمه كرت الرقم الوطني وطبعا كان من المفروض يسموه
كرت الضمان الاجتماعي عشان الحكومة توفر سبل العيش الكريم والحياة
الاجتماعية الكريمة للمواطن....ب دجاج ل ما يسموهو الرقم الوطني
عشان يغشوكم ويقولوا لكم اثبتوا لينا انكم وطنيين وادفعوا ....
وفي امريكا فعلا هذا الكرت ليه حقوق وواجبات لانه بيسمحوا ليك بموجبه
تشتغل دوام كامل وتدفع الضرائب..واذا مرتبك ما بيكفيك تمشي مكتب الضمان
الاجتماعي وتقدم للمساعدة المالية ويتموا ليك حق المعيشة لغاية ما تلقى العمل
المناسب...
ودمت بالف خير

بالنسبة للاقتباس اكتب quote بين قوسين مربعين [ ]والصق الكلام العاوز تقتبسه
ثم كرر كتابة quote بين القوسين المربعين [] لكن المرة دي قبل حرف الـ Q ضع علامة /يعني القوس المربع الفاتح ثم الباك اسلاش / ثم quote ثم القوس المربع القافل
اكتبهم بالتكرار دة

حتظهر ليك الشرطة الخلفية / بعد حرف الـ e .. يعني كدة

لكن ما تشتغل بالموضوع دة من اعدادات العربي بتاعة المتصفح والمنتدى لكن بس تأكد إنك كاتبها صاح



.

Quote: بالنسبة للاقتباس اكتب quote بين قوسين مربعين [ ]والصق الكلام العاوز تقتبسه ثم كرر كتابة quote بين القوسين المربعين [] لكن المرة دي قبل حرف الـ Q ضع علامة /يعني القوس المربع الفاتح ثم الباك اسلاش / ثم quote ثم القوس المربع القافل اكتبهم بالتكرار دة حتظهر ليك الشرطة الخلفية / بعد حرف الـ e .. يعني كدة لكن ما تشتغل بالموضوع دة من اعدادات العربي بتاعة المتصفح والمنتدى لكن بس تأكد إنك كاتبها صاح

أها الشغل كدة كيف يامعلم؟ الله يديك العافية

خالد عبد الوهاب، سلامات..
اولاً: انت خالد الفي بوست النصري أمين بتاع نقصان الوزن ولا تشابهت علي الخوالد؟
ثانيا: شوف اللينك التحت فيه نموذج لشهادات الخبرة المطلوبة من موقع ACS الجهة المسئولة عن تقييم المؤهلات الليها علاقة بالكمبيوتر.
اتوقع النموذج صالح لكل المجالات.

http://more.acs.org.au/__data/assets/pdf_file/0019/7570/Skilled-Employment-Reference-Example.pdfhttp://more.acs.org.au/__data/assets/pdf_file/0019/7570/Skilled-Employment-Reference-Example.pdf

Quote: عموما انا ناوي اخوض التجربة دي نية شديد، ياريت تكون قايد لي خطوة بخطوة

انت في ياتو بلد في الدنيا الفانية دي؟ ممكن نتشارك الخبرات واتحداك انا ناوي اكتر منك وابتديت خطوات عملية كمان

=========


@طارق
الكووت أحمد محمد عمر ما قصر في الشرح وانت نفذت 100%
بالمناسبة انا لاحظت لانو التكاليف ابدا ما بسيطة لكن زي ما بقول الخواجة It’s worth it

=========

@أحمد محمد عمر

أنا برة السودان وشكرا على التفاؤل والنصيحة 

=========


@ جمال الدين عبيد

وصلت وين بعد تقييم الشهادات. انا اقتنعت بكلام طارق انو PTE اسهل من ايليتس وشكلي حاديهو طلة في اسرع وقت ممكن.
بالنسبة لشهادات الخبرة هل واجهتك مشاكل في استخراجها واعتماد النسخ من السفارة يا ريت تنورنا


أحمد

السلام عليكم ورحمة الله
عزراً للغياب وذلك لظروف قاهرة عن هذا البوست المفيد جدا
الف شكر للاخ احمد محمد عمر على هذا الفديو المفيد وايضا نشكر الاخوات بسمات واميرة على معلوماتهم واجاباتهم عن استفسارات الاخوة الزملاء

-----------------------------------------------------------------------------------------------------------------------------------------------------------------

الي الاخ طارق بخصوص الاقامة في استراليا هل سيتم لصقها بالجواز السوداني او انها عبارة عن ورقة عادية تحملها معك السؤال الثاني المكان الانسب للاقامة في استراليا او المدينة او المنطقة (الحى السكني)

الاخ احمد محمد موسي سلامات ياحبيب

الشهادات الدراسية (البكالريوس ) بالنسبة لي لم اوثقها من السفارة الاسترالية بالامارات ولا حتى شهادات الخبرة لم يطلبوا مني ذلك شهادة البكالريوس موثقة من الحارجية السودانية والتعليم العالي وسفارة الامارات في السودان والخارجية الاماراتية فقط ولازم تكون بالانجليزي بالنسبة لشهادات الخبرة فقط تحتاج ان تكون في ورقة رسمية (كما زكر الاخ طارق في هذا البوست ) letter head الخاصة بالشركة التي تعمل بها او الجههة الحكومية وبها ختم الموارد البشرية ولازم تذكر فيها الراتب وعدد الساعات في الاسبوع وبعض المهام التي تقوم بها ولازم تكون بالانجليزي وإذا اسخرجتها بالعربي لازم تترجمها الي الانجليزي عن طريق مترجم قانوني معتمد ولازم تختمها من خارجية الدولة الي صدرت منها الشهادة

انا حاليا عاوز امتحن الانجليزي IELTS وهذه هي الخطوة الاخيرة بالنسبة لي

شكرا ياطارق على الرد

الرابط فتح معاي ، حسبت النقاط لقيتها بتعمل 60 بالضيط لو قدرت ظبطت الانجليزي وتم اعتماد شهادات الخبرة حقتي
لكن انا زي ماقلت ليك فكرتي اني امشي استثمر في مجال الزراعة بالتالي اظن اني حا اقدم عن طريق نوع الفيزا البتكون انو ولاية معينة تتبناك واقوم اشوف ولاية فيها زراعة كويسة، كده دي بتزيدني كم نقطة؟ واظن برضو المنافسة بتكون اقل مش؟

سلامات يا احمد محمد موسى

ايوة ياهو ذاتو خالد بوست النصري
وين الراجل الجميل ده ياخي اتمناهو بخير حال
انا في الامارات، ولسة قاعد اهابي ساكت وماعملت اي خطوات عملية
لكن اي منطق في الدنيا دي بيقول لازم نفتش وطن بديل
المهم تعال نتقاود سوا عسى ان يتكيء احدنا على الاخر في وقت الشدة

تحياتي

مرحب بيك اخونا خالد
ترشيح الولاية بيزيدك خمسة نقاط، بس برضو ماساهل لانو كل ولاية عندها شروطها والمهن الطالباها والبتتغير بشكل مستمر. أنا أفضل انك تقدم عادي طالما نقاطك وصلت ٦٠ وهو الحد المطلوب ولو فيها نصيب ودخلت البلد بتكون حر في البتعملو بعدين.

وربنا يوفقك،،،،

أولا آسفة للتأخير في الرد لظروف خارجة عن الإرادة..
وقبل أن أرد على أسئلة خالد حاكم، نجي في عجالة سريعة ونتم
معاملة ضباط الهجرة الكنديين والأمريكان عند سفرنا انا وامتثال
لكندا في زيارة سريعة ، وذلك حتى لا نخرج من موضوع البوست
ولذلك سأختصر بقدر الإمكان ( عشان طارق ما يزعل مننا)..
.. عند وصولنا لنقطة التفتيش في الجانب الكندي نزل جميع المسافرين من
البص السفري ووقفنا صف طويل داخل مكتب الهجرة الكندي ..
وعندما جاء دورنا انا وامتثال ، ذهبنا سويا إلى ضابط الهجرة
.. وفي اول لمحة وجدنا أسوأ معاملة: وكان هذا الحوار:

س: لماذا وقفتما انتما الإثنان امامي ، هل توجد صلة قرابة بينكما؟
ج: ( وقد جاوبت امتثال لأن لغتها الإنجليزية بدون لكنة أجنبية: لا نحن صديقتان
ولكن صديقتان حميمتان كالاخوات تماما:
س: وقال الضابط الكندي بسخافة وصرة وجه: ارجعي انتي للصف ودعيها وحدها
أمامي كي تجاوب على اسئلتي واذا كانت لا تعرف اللغة الإنجليزية فسوف نأتي لها بمترجم
ولكن عليها الإنتظار ساعة كاملة حتى يأتي المترجم لمساعدتها.
ج- إنها تعرف اللغة الإنجليزية كمعرفتها باللغة العربية ..\
س: إذن عودي لمكانك وانتظري دورك..
.. ووقفت انا وحدي : ودار هذا الحوار:
س: ما جنسيتك؟
ج: أمريكية الجنسية
س: وأين ولدت؟
ج : في السودان
س: ومتى زرتي السودان آخر مرة؟
ج: العام الماضي( وسألته انا إذا كانت اسئلته لها علاقة بزيارتنا لكندا
.. وكنت قد تضايقت من اسئلته حول مكان ميلادي ومتى زرت السودان.
فرد قائلاً: هذا أمر لا يخصك.. فقط جاوبي على الأسئلة وإلا منعتك من الدخول
وطلبت منك العودة..
.. فسكت حتى لا افقد صحبتي لإمتثال لزيارة خالتها..
س: ما سبب زيارتك لكندا؟
ج: زيارة أهلي؟
س: ومن هم أهلك وفي أي مدينة يسكنون؟
ج: في الحقيقة ليس لي أهل في كندا ولكن خالة صحبتي تشكن مدسنة مونتريال
وانا جئت برفقتها لزيارتها والتعرف بها .
س: وهل تعرف عنوانها؟
ج: لا.. ولكن صديقتي تعرف.. ولذلك جئناك سويا أول مرة حتى تجتوب على الأسئلة
التي لا أتمكن أنا من الإجابة عليها..
.. وهنا رايت علامات الإستياء على وجههه..
س: هل اشتريت لها اي هدية مثل الكحول او السجائر؟
ج: لا.. لانني لا اشرب الكحول ولا اشرب السجاير وكذلك التي سنزورها لا تتعاطي الخمور
ولا السجائر..
س: ولماذا؟
ج: لأن ديننا يمنعنا من ذلك.
س: وما هو دينك؟
ج: الإسلام.
س: حسناً وكم من المال تحملين؟
ج: ليس كثيرا.. معي 500 دولار..
س: كم من الوقت ستمكثين في كندا.
ج: من المفروض نعود يوم الأحد مساءاً
ولكن ربما نغير الحجز ونفود غدا السبت صباحا..
وقلت له هذا حتى أشعره بانني تضتيقت من اسئلته السمجة
( وحمدت الله في نفسي انني لا اقيم في كندا...
- وتركني اخيرا بعد أن سألني اسئلة أخرى سمجة ايضاً..

وعندما جاءت امتثال.. وجدتها ايضا متذمرة ....لأنها كانت تحمل معها
آلة الساكسفون، وكانت الآلة داخل حقيبة سميكة وتشبة من الخارج بندقية سريعة
الطلقات... وأخذها ضابط الهجرة إلى تربيزة اخرى وفتح الحقيبة وكذلك فتش
حقيبتها .. وسألها اسئلة أسخف من الأسئلة التي وجهت لي..
.. وهذا هو معاملة الأجنبي في كندا حتى ولو كان امريكي الجنسية..
...
اما المفاجأة فقد كانت عند عودتنا يوم الأحد إلى امريكا عند نقطة التفتيش
الأمريكية ..
فقد كانت المعاملة جيدة جدا جداً ومعاملة كريمة جدا جدا .. ولم يسألونا
إلا سؤال واحد فقط وهو : إلى أين تتوجهون؟ فقلنا لهم : إلى نيويورك
.. وكنا قد ذهبنا الاثنتان/ انا وامثال معا إلى ضابط الهجرة الأمريكي
ولم يطلب مني او من امتثال ان تعود للصف، كما فعل ضابط الهجرة الكندي
السمج..وكان ضابط الهجرة الأمريكي مبتسما .. بل بدأ يهظر مع امتثال وهي
تحمل معها آلة الساكسفون، وقال لها : هل انت ماهرة في عزف الساكسفون؟
ووقلت له: نعم إنها تعزف جميع الألحان، حتى أغاني مايكل جاكسون ...
( وحمدنا الله اننا نقيم في امريكا ونحمل جنسيات أمريكية..)..
ونعود للإجابة على اسئلة خالد..
والله يديكم الصحة والعافية

الأخ أحمد محمد موسى فعلا الموضوع مكلف، بس ياهو على قولتك ماف حلاوة من غير نار.

الاستاذ جمال
تأشيرة الهجرة الكترونية بالكامل وما بيتختم شي على جوازك الا ختم الدخول لمن تدخل استراليا، لكن انصح بالاحتفاظ بنسخ مطبوعة واون لاين في قوقل درايف او ابل ايكلاود من خطاب منح التأشيرة visa grant letter والفيهو كل تفاصيل تأشيرتك عشان تعرف تصل ليها تحت اي ظروف لأنك بتحتاج ليها في معاملاتك في استراليا.
بالنسبة إلى مكان الاستقرار في استراليا بيختلف حسب مهنتك ووجود معارف، عموما المهن المرتبطة بالمالية والمراجعة والخدمات بشكل عام مزدهرة في سيدني وملبورن وبريزبان على الترتيب. بالنسبة لي عندي معارف في سيدني بس حبيت ملبورن اكتر وبصراحة لسه ما حددت استقر وين. بالنسبة الى سيدني مدينة جميلة جدا بس غالية وأفضل مناطق السكن باستثناء قلب المدينة CBD الغالي جدا هي شمال وشرق المدينة بينما يتركز العرب ومن ضمنهم السودانيين في غرب المدينة. بينما ملبورن تتميز باللايف استايل الجميل والهدوء وكمان المجتمع المسلم فيها عموما كويس ومتماسك اكتر من سيدني. آما بريزبان فهي أرخص من المدينتين السابقتين وتقع في ولاية كوينزلاند وميزتها الاساسية قربها من أماكن الترفيه المشهورة زي مدينة الجولد كوست المعروفة بكثرة وتنوع الأنشطة وبكونها قلب استراليا السياحي. لكن الشي الكويس ان كل المدن جميلة وتتمتع ببنية تحتية محترمة وأحسن شي في استراليا إنّو البلد آمنة ومافي مظاهر تفلت او حمل سلاح او غيره. بالمناسبة في مواضيع كتيرة جدا عن العيش في استراليا والفروقات بين المدن وانصحك تتابع منتدى expats forum على الرابط

http://www.expatforum.com/expats/australia-expat-forum-expats-living-Australia/http://www.expatforum.com/expats/australia-expat-forum-expats-living-Australia/

حتلقى فيهو كم كبير من المواضيع المفيدة.
أتمنى من بورداب استراليا وأهل العلم ينورونا في هذه النقطة.

سلامات طارق

كدى اتكلم لينا عن الجو في استراليا
بيقولو حر شديد
وكمان قالو في كميات هائلة من الحشرات والعناكب

كدى احكي لينا عن النقطة دي

يا خالد
السخانة الشديدة بقت في كل مكان في الدنيا..وحتى هاواي صاحبة اجمل جو في العالم بقت سخنه ورؤساء الدول بيحاولو يحلوا مشكلة تغير المناخ واسبابه عشان الخبراء بقولو بعد كم سنة السخانة حتذوب جليد القطبين والعالم حتغرق ودي حتكون نهاية العالم
يعني بالعربي الفصيح يوم القيامة
.ودمت بالف خير..

لازمن تكون استراليا دي تكون سمحة والحياة فيها مرفهة...
وكل الناس بتحب تسافر الى استراليا....مع اننا بنقرا في الصحف
العالمية ان افضل الدول الممكن تعيش فيها حياة سهلة ومرفهة
هي السويد والنرويج وايسلندا وامريكا وكندا والكويت...
مع اني شايفة ان في بعض الناس في امريكا شقيانين شقاوة اليابا
فضيل....ومع ذلك مصرة اقول ان الما شاف نيويورك ما شاف
اي حاجة في الدنيا دي...
....واكيد بعد البوست الروعة سنفكر في زيارة استراليا عشان نتاكد
ان المعلومات القريناها في المدارس عن استراليا صحيحة...
ودمتم بالف خير وعافية..
....
وبالنيابة عن اميرة بت السيد اعتذر لكم عن تاخرها لاسباب وظروف
عائلية وصحية...وستعود اليكم بعد يومين لتسمعوا منها عن زيارتها
هي وامتثال لكندا...وكيف قابلهما ضباط الهجرة الكنديين ..وكيف
استقبلهما ضباط الهجرة الامريكان...والفرق بينهما...ولازم تسمعوا
كمان قصة الساكسفون الشايلاها امتثال مع ضباط الهجرة...
ودمتم..

البلد يا بسمات سمحة فعلا والعيشة فيها حلوة، هي بالمناسبة ما زايدة عن أمريكا في الأمور المادية زي التطور العمراني والتسوق وغيره بالعكس ممكن أمريكا أحسن، بس الفرق الأساسي نمط الحياة وراحة البال peace of mind وتوازن العمل والحياة work and life balance يعني عموما الاستراليين ريلاكس اكتر من الامريكان ومستمتعين بالحياة اكتر لانو الوضع ما ضاغط زي امريكا ولافيهو نفس التوتر (ماشفت حكاية 2 jobs دي في استراليا ولا فيها انواع التأمين الإجباري الماعندها اول ولا اخر زي أمريكا على سبيل المثال) بالإضافة الى ان نظام الرعاية الصحية والاجتماعية الأسترالي أفضل من نظيره الأمريكي وأعتقد ان السبب هو قلة عدد السكان بالمقارنة مع أمريكا (٣٠ مليون مقابل اكتر من ٣٠٠ مليون). الحاجة التانية البتفرق إنّو مابتلاحظ التفاوت الطبقي الكبير زي آمريكا يعني معظم الناس في استراليا يا متوسط يا غني ومافي علامات فقر ظاهرة بينما في امريكا بتلقى كل شي من homeless الى دونالد ترامب (وجه ضاحك).

خالد
الفصول في استراليا معكوسة يعني ديسمبر عز الصيف ويوليو عز الشتاء، بس وقتي المشيت في شهر مايو الجو كان معتدل عشان كدة ما بقدر احدد حارة شديد ولا لا. بس بيني وبينك مامصدق إنّو في بلد أحر من السعودية الا يمكن الكويت والعراق.

بالنسبة للحيوانات فعلا بتشوف حاجات مابتلقاها في اي مكان في العالم وبالذات الحشرات والزواحف اضافة الى حيوان الكنغر الشهير والبيعتبر رمز وطني للبلد. لكن التماسيح هناك ضخمة جدا وبالذات البتعيش في المياه المالحة لدرجة تماسيح النيل بتاعتنا جنبها صغيرة، لكن على الأقل عندهم التماسيح الواحدة دي بس ونحنا عندنا زيادة عليها التماسيح البشرية (وجه ضاحك).

والله يا طارق تماسيح البشر اخطر من تماسبح البحر يالف مرة
ودمت

سلامات للجميع

@خالد
بوست النصري الله يطراه بالخير داك كان Life changing experience كان من العوامل الخلتني امنبه لوزني وفي ظرف شهرين بعدو نقصت 22 كيلوجرام
صاح في حوالي 8 كيلو هسه رجعت لكن لسة الواحد بشكل عام محافظ.

يا زول الهجرة دي برضو قطع شك life changing انا قررت اتعامل مع الموضوع كمشروع متكامل وبعمل في بروجيكت بلان حانشرها هنا لمن تكون جاهزة


@ جمال الدين وطارق

بالنسبة لشهادات الخبرة والشهادات الجامعية حكاية سيرتفايد كوبي دي كيف طيب اذا هم ما بطلبوا التوثيق في السفارة بتاعتهم؟

سلامات يا بسمات

امريكا انا حسب تصوري عنها انها بلد غير آمن بالاضافة لانو مرهق والحياة فيها صعبة
بالنسبة لي ما خيار هجرة ابدا، ممكن اسعى لاني اخد الجواز لكن ماممكن اعيش فيهو

يا طارق التماسيح والكنقر والحيوانات الكبيرة ابدا ما مشكلة المشكلة في العناكب والحاجات الكيف كيف دي هههههههههه

احمد موسى انا برضو بوست النصري الهمني وفعلا قدرت انقص 10 كيلو في خلال شهر
حاليا رجعت العشرة كيلو زي ماكانت وزدت عليها كيل بعير ههههههه

اسمع انت في ياتو بلد؟ حقو ترسل لي تلفونك وايميلك للتواصل

انا برضو في الامارات

ahmed-musa (at) live.com
التليفون في الخاص

كترة الطلة البتمسخ خلق الله
أنا تاني جيت LOL

الصورة دي محاولة سريعة لتخطيط مشروع الهجرة



سؤال :شهادة التفاصيل نظامها شنو؟ لازم تتوثق ولا لا؟

Quote: @ جمال الدين وطارق بالنسبة لشهادات الخبرة والشهادات الجامعية حكاية سيرتفايد كوبي دي كيف طيب اذا هم ما بطلبوا التوثيق في السفارة بتاعتهم؟

أخونا أحمد موسى نحيي الاجتهاد وربنا يوفق.

بالنسبة لحكاية السيرتيفايد كوبي لازم تفرق بين حالتين: تقييم المؤهلات والعندو جهات مهنية معينة والتقديم على التأشيرة المسؤولة عنو دائرة الهجرة يعني زي ماذكر اخونا جمال احتمال جهة تقييم المهنة ماتطلب سيرتيفايد كوبي بس عند التقديم على التأشيرة لازم ترفق صور الشهادات وخطابات إثبات الخبرة بالاضافة إلى نتيجة تقييم المهنة الحصلت عليهو، وغالبا في الحالة دي الصور لازم تكون سيرتيفايد عشان كدة لازم تشوف طلبات دائرة الهجرة كمان بخصوص الورق.

الاخوة والاخوات المتداخليين
تحية طيبة
اظنه هذا البوست من اجمل البوستات والاكثر فائدة في الفترة الاخيرة حيث اصبح الموقع
يعج بالهباب كما يقولون الأن الحال في الخليح تبدل ونحن مقبلين على تغييرات كبيرة واصبح
الحال يغني عن السؤال و المخارجة الآمنة اصبحت مطلب قبل ما تجي الطردة ،بالنسبة للدخول
لامريكا لعمل الدكتوراة وتحويل التأشيرة الى هجرة هذه فكرة ملهمة وجديرة بالدراسة
وانا مثل اخونا Ahmed Elsadiq نفس التخصص المطلوب فياريت نجد دعم معلوماتي وافي
في هذا الأتجاه فيما يتعلق بالدرسات العليا من الاختين بسمات واميرة السيد واللتان لم يتوانى ابداً
ولم يألو جهداً في دعمهما وعكس تجاربهم والتي ربما تكون ملهمة للبعض ويحذوا الراغبين
حذوهما في المخارجة او مواصلة الدراسة وفي إنتظار النصائح والدعم المعلوماتي الفني فيما
يتعلق بالجامعات الامريكية.
تقبلوا تحياتي وسلامي

احمد عمر
..شكرا على الثقة والدعم...
واميرة بت السيد عندها معلومات وافرة عن هذه المسالة..
.وحتجيكم بعد يوم يومين وتوريكم التفاصيل الدقيقة المملة..
وبالمناسبة هل انت شقيق ود الشغيل ود عطبرة؟
..وما تقول انا عنصرية..لكن اذا انت اخو ود الشغيل ود عطبرة
انا بدفع ليك القسط الاول وبسجلك حتى في جامعة هارفارد كان داير..
(وجه باسم) وناس عطبرة ناس عزيزين على وهم اهلي واقرباء دمي..
..ولكن حتى اذا لم تكن من ام المدائن فسوف نواليك بكل المعلومات ونسهل
ليك رحلتك الى عاصمة عواصم العالم نيويورك...ونقابلك في مطار جون كنيدي
...بس خلي عندك صبر لغاية ما تجيك اميرة بت مصطفى..
ودمت بالف خير وصحة وعافية

( اذا انت اخو ود الشغيل ود عطبرة
انا بدفع ليك القسط الاول وبسجلك حتى في جامعة هارفارد كان داير..
(وجه باسم) وناس عطبرة ناس عزيزين على وهم اهلي واقرباء دمي..
..ولكن حتى اذا لم تكن من ام المدائن فسوف نواليك بكل المعلومات ونسهل
ليك رحلتك الى عاصمة عواصم العالم نيويورك...ونقابلك في مطار جون كنيدي )

سلام يا ابتسام

انا اخوه من امه
رايك شنو بستاهل العرض ده ؟ ههههههههههههه

مرحباً مجدداً

الأخت بسمات الشيخ

قربت طبعاً انتحل شخصية واستمتع بالعرض المغري لناس عطبرة ( وجه ضاحك)
بس اتراجعت لانه اتذكرت السيد بكري ابوبكر يهد المعبد على رأسي بابراز المستندات
وممكن كنت افشل في اختبار الاثبات اذا كنت خضعت لاسئلة عن عطبرة برغم زيارراتي لها 3 مرات
ربنا يبارك لك في سعيك و دي دعوة لو في واحد من ال الشغيل يرغب باللحاق بامريكا يلحق العرض الخرافي ده
على فكرة يوجد عضو بأسم / احمد محمد عمر و آخر يحمل اسم / احمد عمر
اما انا احمد عمر محمد ليس من عطبرة الحديد ولناس عطبرة مكانة كبيرة في نفوسنا
زاملنا بعضهم في الجامعة ومن خلال الحياة العملية
انا من بورتسودان وقريبين لعطبرة جغرافياً ممكن القرب ده بيديني 50% من العرض المطروح

عموماً نحن في إنتظار الاخت اميرة و ربنا يجيبها سالمة وغانمةويديها ويديك الصحة والعافية


الاخ طارق

كنت تواصلع معك في الخاص لاني لم استطع فهم طريقة التقييم، لكن في النهاية الحمدلله
اهتديت للجدول الذي من خلاله يستطيع الواحد تقييمه موقفه وحسب المطابقة حصلت تقريباً
65 برغم اني كنت اضع الحد الادنى من الدرجات لي واعتقد إذا امتحنت الايلتس الفترة القادمة
ربما ارتفع معدل التقييم الى 80 واعتقد الواحد محتاج وقت للتفكير والإقبال على هذه المحاولة
فربما كانت مناسبة وواحدة من الحلول في سبيل البحث عن مخارجة من صيف الخليج القادم

تقبل تحياتي انت وضيوفك الاكارم

يا أحمد عمر بختك عرضك مغري يقابلوك في مطار جون كندي عشان ما راسك يتقطع (وجه باسم )
بسمات دي اصيلة ، أصلاً الناس الاكلو (زونية) السودنة متفردين من يومهم
بالمناسبة يا بسمات بتتذكري الزونية ؟

يا استاذ احمد العرض مغري ومشجع للتحرك بس مشروط للاسف
والاخت بسمات كتر خيرها انسانة خدومها وهميمة ويبدو ذلك
من حراكها الملموس بالمنبر ربنا يديها قدر نيتها وزيادة

ارسلت لك رسالة في الخاص الرجاء مراجعتها

تحياتي للجميع

والله فعلا أخوي أحمد عمر بوست طارق ( وبرعاية كريمة من بسمات واميرة ) افيد بوست حاليا
وزي ما قلته الخروج الآمن من الخليج هو شعار المرحلة القادمة
وربك يسهل

راجع الخاص

.
.
.

وين يا سادة؟

لاحظت في جولاتي على تجمعات المهاجرين والراغبين في الهجرة على الانترنت رأي عام:

معظم الناس بتتحمس في البداية وتبدأ تتمنى لكن ما بتاخد خطوات ايجابية في سبيل تحقيق الرغبة دي. في رأيي المتواضع الملاحظة دي تنطبق على حاجات كتيرة مش الهجرة وبس

الواحد عشان ينجح في أي شي لازم يجتهد ويتعب و للأسف مرات يسمع كلمتين ما يعجبوه.

سؤال :

بالنسبة للأسماء بتاعتنا الرباعية دي كيف الواحد يتعامل معاها لمن يملأ الفورمات؟

مثلا في الEOI:

بقول ليك دخل Given name و Family name

أنا اسمي أحمد محمد موسى محمد احمد. عندي شهادات خبرة وشهادات مهنية طالعة باسم Ahmed Musa من غير اسم الوالد او الاسم الرابع

هل الغي الاسم الرابع واعتبر الاسم الثالث هو اسم الاسرة ولا اخلي اسم الاسرة Mohamed Musa Mohamed Ahmed ؟ علما بانو الجوازات والشهادات الاكاديمية طالعة بالاسم الرباعي الكامل

@خالد عبد الوهاب التليفون في الخاص
@ جمال الدين عملت شنو في امتحان الانجليزي؟
@ احمد محمد عمر وين الخطوات العملية انت شكل زول "نجيض" ومن عندنا في الآي تي

Quote: مثلا في الEOI: بقول ليك دخل Given name و Family name أنا اسمي أحمد محمد موسى محمد احمد. عندي شهادات خبرة وشهادات مهنية طالعة باسم Ahmed Musa من غير اسم الوالد او الاسم الرابع هل الغي الاسم الرابع واعتبر الاسم الثالث هو اسم الاسرة ولا اخلي اسم الاسرة Mohamed Musa Mohamed Ahmed ؟ علما بانو الجوازات والشهادات الاكاديمية طالعة بالاسم الرباعي الكامل

شوف ياحبيبنا زبط أمورك على الجواز لأنو الأساس، يعني Given name اسمك الأول و Family name الاسم الرابع ودي البركزوا عليها والاسم الاوسط (الثاني والثالث) مامهمة كتير وطبعا كلامي عن التقديم للفيزا، برضو في EOI في خيارالأسماء الأخرى Other names يعني لو اسمك مكتوب باسبلنق مختلف في مستند مهم غير الجواز ممكن تكتبه كزيادة خير بس اطمن مابيأثر على فرصك. كمان لو لقيت تعدل الاسم في شهاداتك المهنية وشهادات الخبرة حسب الجواز بيكون أحسن.

Quote: @ احمد محمد عمر وين الخطوات العملية انت شكل زول "نجيض" ومن عندنا في الآي تي

هدي الخطوة العملية الشغال فيها futurelearn.com/courses/understanding-ielts

عزيزي الفاضل/ احمد محمد موسى محمد احمد
وزيادة على كلام طارق بالنسبة للإسم الأول واسم العائلة
فإن سلطات الهجرة في امريكا وكندا ودول اوروبا ، واظن ايضا استراليا
ونيوزيلندا لا تهتم كثيرا باالإسم الذي تختاره كإسم العائلة وهو يقبلون الإسم الذي تختاره
انت من الإسم الرباعي المكتوب في جواز السفر... فمثلا في حالتك فإن اسمك الأول
حتما لازم يكون أحمد .. ولكن الإسم الأخير ممكن تختار الإسم الرابع كما قال لك طارق
وهو محمد... ولكن لكي لا يتلخبط اسمك الأول مع الإسم الأخير محمد ، فمن الأفضل
اختيار اسم موسى كاسم العائلة والإسم الوسط محمد لأنه في العادة وفي الأرانيك ما بيطلبوا
منك تكتب الإسم الوسط ولكن فقط الحرف الأول من الإسم :
First name: Ahmad
Middle Initial: M.
Last name: Musa
ودمت بألف خير وصحة وعافية

عوداً حميدة والحمدلله على السلامة بنت السيد
رحلة ممتعة وزيارة موفقة
وهانا نحن في انتظارك للادلاء لنا والافاضة بخصوص الفرص المتاحة في الجامعة
فيما يتعلق بالجامعات والرسوم والطرق الممكن في الحصول على فرصة خاصة
لمرحلة الدكتوراة وقد بشرتنا الاخت بسمات بكل خير
تحياتي لك وللاخوة المتداخلين

الاخ طارق صاحب البوست
مبروك
تستحق اوسكار في الصبر الجميل

حبابك أخي حاتم وشرفنا مرورك الجميل

عودا حميدا يابت السيد وكفارة على الحصل في كندا، غريبة الكنديين ديل ناس راقين والحركات دي مابتشبهم، الظاهر زولك ده عامل مشكلة في بيتو وداير يتفشى فيكم :) بركة الوصلتو بلدكم سالمين ومنتظرين تفاصيل تقديم الجامعات في أمريكا، ما معروف ممكن نقلب هناك، ولا رأيك شنو 😅.

ودمتم بود،،،،

احمد موسى سلامات

ماجاتني رسالة في الخاص، لكن رسلت ليك رقم تلفووني في الايميل

عزيزي خالد حاكم
اسهل حاجة او اسهل دراسة في امريكا هي الماجستير والدكتوراة..
وخطوات التسجيل للماجستير والدكتوراة هي نفس خطوات التسجيل
للبكالريوس...ولكن الرسوم الدراسية للماجستير والدكتوراة بتختلف من جامعة لأخرى
وعلى حسب عدد الكورسات التي ستدرسها وعدد الساعات.. فهناك جامعة بتديك الماجستير
في سنة واحدة فقط ,, وجامعة أخرى في سنة ونصف واقصى مدة في سنتين.. ولذا فإن
الرسوم تختلف من جامعة لأخرى...ولكن يبدو ان اقل رسوم للماجستير هي 5 ألف دولار
وأعلاها 27 ألف دولار للطلاب الدوليين( يعني الزيكم).. ولكن الشئ الجيد انه هناك
جامعات بتديك الماجستير online وبرسوم مخفضة شديد....ودائما الجامعات التجارية
بتقبلك سريع وبتطلع ليك جواب السفارة سريع بعد ما تدفع القسط الأول ، وهي ما كتيرة ..

وحتى اذا كانت كثيرة فإنت بالذات ما عندك مشكلة ما دام انت أخو ود الشغيل ،ود عطبرة ، من أمه..
لأن بسمات برجوازية وعندها محنة خاصة لناس أنبرا.. وممكن تدفع ليك رسوم السنة كلها
ومدير الجامعة يجبك لغاية السودان ويسوقك معاهو في طيارة واحدة...( وجه ضاحك)..

أما تحويل تأشيرة الدراسة إلى تأشيرة هجرة ، فهذا يتوقف على شطارتك وفهلوتك وحظك..
فأولا لازم تقدم قبل مرور سنة من وصولك إلى أمريكا ... واسهل وسيلة للحصول على كرت العمل بسرعة
هو أن تقدم لجوء سياسي ، لأنك وبعد الحصول على الموافقة من محكمة الهجرة سوف تتحصل على كرت العمل في اقل من شهر
وهذا الكرت يتيح لك العمل دوام كامل... وبعد الحصول على الكرت الأخضر( الإقامة الدائمة) فإن رسوم الدراسة بعد كده ساهلة
شديد....( وبعدين ما تتعقد من التقديم للجوء السياسي لان هناك اعضاء في المؤتمر الوطني وكيزان عديل بيقدموا للحصول على الإقامة
عن هذا الطريق) .. وحتدفع للمحامي مبلغ 3 ألف دولار ... وما تشيل هم لأنك وبمجرد وصولك هنا حتشتغل في اليوم التالي
مباشرة، وبدون أي كرت عمل وحتلم رسوم المحامي في فنرة قليلة جدا .. وحتدفع للمحامي بالأقساط المريحة...وقصتك
خليها علينا.. وإذا إنت من دارفور فالقاضي ما حيسألك ولا سؤال واحد.. وإذا انت من قريتنا في الشمالية ( أرض النوبة) فالقاضي
ايضاً ما حيسألك سؤال واحد. وبعد ربع ساعة حتستلم الموافقة وتعمل عزومة لأصحابك وتحتفل بالخطوة الأولى للإقامة الدائمة في امريكا)
(.. وطبعا الاسباب معروفة)..
.. وبعدين زي ما قلت انت الجواز الأمريكي مهم لتسهيل السفر إلى كل دول العالم ، ودول كثيرة بتدخلها بدون تأشيرة..
ولكن الجواز الأمريكي فيه سوالب ايضا ، وهو أن السلطات الأمريكية ممكن تجري وراك إلى اقصى الدنيا عشان تدفعك الضرائب
وإذا عندك حساب في البنك وفيه اكثر من 10 ألف دولار .. لازم تزري ناس الضرائب ( وبسموهم هنا IRS ) انت جبت القروش
دي من وين واذا دفعت عليها ضرائب أم لا... وإلا اعتبروك متهرب من دفع الضرائب.. وإذا حصل حاكموك وأدانوك .. فحتقعد
سنين طويلة وراء القضبان وكأنك قتلت زول..
والله يديك الصحة والعافية

يا ناس الهجرة معليش نطلعكم بره الموضوع شوية .. بوست النصري البتتكلمو عنو دا واحد يدلنا عليهو بالله و كتر خيركم

اما حكاية امريكا ما امنة دي...فالامر هنا مسالة نسبية..
لان اي مدينة في العالم فيها الاحياء التي تكثر فيها الجريمة
وفيها الاحياء الامنة...ونيويورك التي كنا نسمع من قبل انها
موبوءة بالعصابات والسرقات والقتل اصبحت الان امنة
وكانها الحجاز في عهد عمر بن عبد العزيز حيث كانت المراة
تسير من الشام وحتى مكة دون ان تخشى شيئا ولا يتهجم
عليها احد...(هذا ما قراناه في التاريخ).
.وانت عارف بسمات ساكنة في حي امن جدا وبنسمع ان نصة
الناس الماشين في الشارع من ناس المباحث...
كمان بنقرا في صحف الخرطوم ان الخرطوم نفسها اصبحت
غير امنة وان الحرامية بينطوا ليك جوه البيت...وكمان مش حرامية
عاديين ولكن من رجال القانون ومسلحين ومتنكرين في شكل حرامية
..بس انت اتوكل واصل امريكا ..فالحياة اصبحت امنة هنا...ولكن فقط
حتسيب الكسل ومافي شغل لغاية الساعة اتنين ظهرا وترجع البيت ..وحتى
اذا كنت طالب وبتدرس في الجامعة فممكن عادي جدا تصل في يوم
الجامعة الساعة ٨ صباحا وترجع البيت الساعة ١٠ مساءا...
والله يديك الصحة والعافية..

شكراً اميرة على هذه المعلومة الوفيرة وهذا التشجيع القوي
لم يتبقى لمن يرغب الا ان يفكر كيف ينفذ خارطة الطريقة
علاما يبدو ان الامر ممكن و يحتاج لوقت لاجل تنفيذه
وسيكون تغيير رائع خاصة لمن يفكرون في اكمال دراساتهم العليا
انا واحداً منهم و افكر بجدية في هذا الموضوع وسنعتمد عليك في توفير
المعلومات وانتِ اهلاً لذلك وسوف لن تقصري في هذا الشأن معنا
اعانك الله و يسر امرك انتِ والاخت بسمات على مجهوداتكم الرائعة
تحياتي لكما ولكل الاخوة الراغبين في الانضمام لهذا المشروع والجاهزون للمغامرة

احمد عمر

مشكورة الاخت أميرة على المعلومات الوافية
ويبدو ان الطريق الى أرض الاحلام عن طريق الدراسه أسهل لمن رغب

طارق وبسمات شكرا على التوضيح بخصوص الاسم وما نعدمكم

@ بسمات أحييك وصديقاتك على المجهود المبذول لتوضيح بعض فرص الهجرة لامريكا

@ وليد عكاشة:

بوست النصري دا لا يوصف انا متأكد اني قريتو على الاقل 3 مرات رغم عدد الصفحات

بوست النصري

Quote: يا ناس الهجرة معليش نطلعكم بره الموضوع شوية .. بوست النصري البتتكلمو عنو دا واحد يدلنا عليهو بالله و كتر خيركم

نقصان 20 كيلو في 16 اسبوع كويسة معاك ؟
وصفت ليك الدرب في الخاص

الأخت اميرة بت السيد
خالص التحايا
أولا ناسف على التاخير لانو البوست ده كنت فاقده واليوم لميت فيه
ثانيا حمدا لله على سلامة عودتكم انت والصديقة امتثال من الشقيقة كندا ( طبعا مفردة الشقيقة دى ما مستخدمها عند الخواجات هم بيقولوا أصدقائنا وحلفائنا )
ثالثا شكرا ليك كثير على الإجابة على اسئلتنا والاستفاضة فيها ..
يا ريت رقم تلفونك في الخاص لو ما عندك مانع وشكرا ليك مقدما

الأخ طارق عبدالله
تحياتى
يا ريت تقدر ترسل لى رقم تلفونك في السعودية في الرقم ده 0543534043 سوى في الواتساب او في رسالة لانو في نقاط محتاجة ندى وناخد فيها شفاهة
وشكرا ليك مقدما

الاخت اميرة
الاخ طارق
لكما التحايا
انا فى انتظار ارقام تلفوناتكم واسف على الازعاج والاستعجال
حاولت ارسل ليكم رسائل فى الماسنجر لكن اتضح عندى مشكلة فى الماسنجر مطلوب حلها من الاخ بكرى

يا اهلنا البوست ده مالو مات ؟
وين طارق صاحب البوست ؟
وين اميرة ؟

يا خالد
انت وين...
انت ما سمعت الاخبار ولا شنو...
ما سمعت دونالد ترامب اصبح رئيس الولايات المتحدة الامريكية
وانه حالف ما يخلي مسلم يدخل امريكا وعاوز يطرد جميع المسلمين
والمكسيكان من امريكا...وهسع بنسمع ان جمع غفير من المسلمين بزاحموا
في الحدود الكندية ليهاجروا لكندا...
وامشي اقرا البوستات المكتوبة عن ترامب...وهي كثيرة جدا
وما تنسى تفتح قناة السي ان ان تعرف اخر الاخبار..
والله يديك الصحة والعافية

https://youtu.be/Wt1Lz8qRTUAhttps://youtu.be/Wt1Lz8qRTUA

السلام عليكم، مرفق فيديو شيق بعنوان الهجرة هل هي الحل؟ مشاهدة ممتعة

وده كمان يا طارق فيديو لابوبكر ادريس ، وهو متخصص في مواضيع الهجرة في العالم ومسائل الدراسات الجامعية في دول المهجر
وبالمناسبة عنده دكتوراة ،، وله قناة ثابتة في اليويتوب وبها كثير من المعلومات عن الجامعات الأمريكية والجامعات الكندية... وطرق الهجرة
ووسائلها المختلفة,,
وهو في هذا الفيديو بيتكلم عن الفرق بين الهجرة إلى كندا والهجرة إلى امريكا...
وحتعرف من الفيديو من هو الشعب الأكثر تقبلا للأجانب والأقل ترحيبا بالأجانب... هل هو الشعب الأمريكي ام الشعب الكندي؟؟
والله يديكم الصحة والعافية

الاخت اميرة
تحياتى
متابع والله .. بس عايز اعرف بعض المعلومات وبعدها ننتظر ونشوف ماذا سيحدث للطلاب الاجانب فى عهد ترامب وماهى الشروط الجديدة التى ستاتى بها ادارته

سؤالى ليك عايز اعرف تكلفة دراسة ( MBA (Master of business Administration ومدتها والاقساط السنوية ؟

وشكرا ليك مقدما

شكرا يا أميرة على الفيديو....... الراجل بيشكر في كندا ساكت الظاهر عشان عايش هناك ههههههههههه.

عليك الله ورينا كيف تنزل الفيديو مباشرة في الرد بدون الحاجة للروابط.

والله يديك العافية،،،،،

فعلا هو عايش هناك..
وعايش في اجمل منطقة خلابة في العالم كما نقرا وهي
ولاية بريتيش كولومبيا...ويقال والعهدة على الراوي ان هذه
الولاية الكندية فيها ما لا اذن سمعت ولا عين رات ولا خطر على
قلب بشر...
وعشان كده اظنه بيشكر في كندا
والله يديك الصحة والعافية

Quote: عليك الله ورينا كيف تنزل الفيديو مباشرة في الرد بدون الحاجة للروابط.

افتح الفيديو .. خت الماوس جواهو واضغط الكليك الأيمن
اختار نسخ شفرة التضمين أو copy embedded code وتعال لصقو هنا

شكرا احمد
.... نعم اتبع نفس هذه الخطوة وستجد المسألة جدا..
والله يديك الصحة والعافية

منكم نستفيد يا سادة، شكرًا جزيلا.

تحياتي يا أستاذ طارق
ارجوا ان تكون طيب وبصحة جيدة
الرجاء مراجعة الخاص
احمد عمر

تغييرات هامة في قانون الهجرة الأسترالي لعام ٢٠١٧

http://www.sbs.com.au/yourlanguage/hindi/en/article/2017/04/18/dibp-announces-major-changes-skilled-occupation-list

ملخص التغييرات:
١- الغاء تأشيرة العمل 457
٢- تخفيض عدد الوظائف المؤهلة للتنافس على تأشيرة العمالة الماهرة من 651 الى 435
٣- حصر بعض المهن وخاصة الزراعية والفلاحة على المقاطعات المحلية فقط وليس على المستوى الفيدرالي.

الجماعة ماشين على خطى ترامب في التضييق على المهاجرين.