Post: #4 Title: Re: حقو رجال السودان يستخدموا فير اند لاڤلي ع� Author: almulaomar Date: 10-04-2016, 10:55 AM Parent: #3
يحي تحياتي البياض بياض الوش بس يا عمك لو شفت باقي الجسم ما عندو أي علاقة بالوش ، يعني الجلد بقى زي إتين في واحد شامبو وكوندشنر أو بينسون أند هدجز لا فرق. طرفة من باب البياض: إتنين طاشمين لط وماشين في الشارع شافو واحده ماشه قام واحد سلم عليها وردت عليهو السلام. أها يقوم صاحب السلم دا يقول ليهو يا زول بتعرف البت دي من وين ، صاحبو قال ليهو دي ما بت فلانه البتبيع الهناي الفي رأسك دا ، قال ليهو لا حولا والله تصدق قايله قبطيه لابسه شرابات
Post: #5 Title: Re: حقو رجال السودان يستخدموا فير اند لاڤلي ع� Author: عثمان الأمام Date: 10-04-2016, 03:48 PM Parent: #4
سلامات يحيى والزوار
البياض بياض الوش بس يا عمك لو شفت باقي الجسم ما عندو أي علاقة بالوش
ده كان زمااان هسه ما بتقدر تحدد اللون الا بالمقارنة والمقاربة مع افراد الأسرة :)
Post: #6 Title: Re: حقو رجال السودان يستخدموا فير اند لاڤلي ع� Author: احمد حمودى Date: 10-04-2016, 04:50 PM Parent: #5
يا زول بتعرف البت دي من وين ، صاحبو قال ليهو دي ما بت فلانه البتبيع الهناي الفي رأسك دا ، قال ليهو لا حولا والله تصدق قايله قبطيه لابسه شرابات الله يجازى محنك يا almulaumar [/B ازيك ياخى ]
Quote: ده كان زمااان هسه ما بتقدر تحدد اللون الا بالمقارنة والمقاربة مع افراد الأسرة :)
عثمان سلامات ...
و الله صدقت ... و انا والله ما بعرف ليه الناس ساكتة على الموضوع ده ...
يعني الرجل او رب الاسرة المارق مع اسرته ما شايف زوجته او بته عاملة في روحها شنو ؟
ما في زول قرا انو المسألة دي عواقبها قاتلة ؟
التجار البجيبو الأشياء دي ... زول حاسبهم مافي ؟
Post: #7 Title: Re: حقو رجال السودان يستخدموا فير اند لاڤلي ع� Author: يحي قباني Date: 10-05-2016, 00:21 AM Parent: #4
Quote: يحي تحياتي البياض بياض الوش بس يا عمك لو شفت باقي الجسم ما عندو أي علاقة بالوش ، يعني الجلد بقى زي إتين في واحد شامبو وكوندشنر أو بينسون أند هدجز لا فرق. طرفة من باب البياض: إتنين طاشمين لط وماشين في الشارع شافو واحده ماشه قام واحد سلم عليها وردت عليهو السلام. أها يقوم صاحب السلم دا يقول ليهو يا زول بتعرف البت دي من وين ، صاحبو قال ليهو دي ما بت فلانه البتبيع الهناي الفي رأسك دا ، قال ليهو لا حولا والله تصدق قايله قبطيه لابسه شرابات
lol بس يا هو ده ...
سلامات يا مُلّا ...
و الله المضحك المبكي ... بقت مسألة مؤلمة ...
و ما عارف عدم الوعي ده جانا من وين ...
Post: #8 Title: Re: حقو رجال السودان يستخدموا فير اند لاڤلي ع� Author: Kabar Date: 10-05-2016, 09:32 AM
عارف يا صاحب.. الواحد خايف يتلح خيوطك..وتاني لحظة يلقاك..في عقاب حرسم..!!!
المهم..حتى لا نلعنك معانا يا حبيب..!!
البتاع ده (فير اند شنو كده ماعارف)..تصدق..تلاتة روايات كتبتها وحبيسة الأضابير، فيها سيرة البتاع ده.. مرة مقاربة هوية تايهة ، مرة جمال ، مرة مساحيق تكتل من يستخدمها..غاز خردل ، عدييل ، زي بتاع جاكة منظمة العفو الدولية الحايمة بيها اليومين ديل..!! ولكن..! مرة يا يحي ، صديقنا عصمت العالم ، عامل فيها سكاب حنين شديد وانو من عيال ناس امدرمان وشنو كده ما عارف.. اها قمت خطيت ليهو الغنية التالية..عارف صاحبنا عمل شنو؟..عرد عدييل يا يحي.!!
المهم..
لول..اندياح شديد يا عمك.. والباقي باقي..!! قرط علي حكاية: يوم قالوا لي الأقمار عليمة.. انك تراها وتلمس لي ليمها
الليم خضار الشفة يا صديقي..قبال احمر شفاه ولاوردي الشفاه ولا بنفسجي الشفاه ذاتو..!!
نصيحة لبناتنا البيستخدمن احمر الشفاه: احمر الشفاه ، داخلة في صناعتو زبالة دم بقر بتنضبح في مكان ما..والله صحي..!!!
اما فير اند لفلي..ياخي دي حكوة طويلة خلاس..!!
ياخي انا مالي بيكم..انشاء الله تقوم ليكم بقاقات زي صور ناس جبل مرة الجابوهو ناس العفو الدولية..!!
اسمع يا يحي ، لمن الشفيع يقول: ده الفل يحكي لونا..!! ضحك ناس الفرقة المصاحبة.. والونسة المستمرة بعد الفقرة دي..!! بعد: ايه التجني وانا راقي فني..!! في حليفة طلاق حايمة..!!!!
Post: #9 Title: Re: حقو رجال السودان يستخدموا فير اند لاڤلي ع� Author: فدوى الشريف Date: 10-05-2016, 10:21 AM Parent: #8
بالمناسبة انتوا ذاتكم الرجال السبب الدفع البنات يقعن فى الكريمات وما خلن بوتيك ولا خلطة جديدة ديل الرجال والله صحى خصوصا الواحد لمن يجى يعرس من ضمن مواصفاته اغلبها دايرا صفرا وطويلة اها كيف ما يبقن بيض ويفوزن بفارس الاحلام اهم شي ينضفن .
Post: #10 Title: Re: حقو رجال السودان يستخدموا فير اند لاڤلي ع� Author: أمير فرح Date: 10-05-2016, 11:22 AM Parent: #9
ده عدم ثقه بس يا يحيى ، السودانيه لا تعلم انه ربنا وهبها اجمل لون وهو لون البرازيليات اجمل نساء العالم والاثيوبيات اجمل نساء افريقيا علما بأن السودانيه تتفوق على الاثيوبيه في الطول وعيونها اجمل. بالعكس يا فدوى ده اعتقاد خاطئ والرجل السوداني يفضل اللون الطبيعي للمرأه السودانيه أي كان.
Post: #11 Title: Re: حقو رجال السودان يستخدموا فير اند لاڤلي ع� Author: صبري طه Date: 10-05-2016, 11:45 AM Parent: #10
قبل فترة يا يحيى كُنت عايز أفتح لي بوست بي نفس الموضوع ..