حادثة مستشفى امدرمان: الطبيب المشرف يحكي ما حدث!

10:00 PM October, 02 2016

سودانيز اون لاين
المعز ادريس-Canada
مكتبتى
رابط مختصر

دا منشور كاتبه د.عبدالله قرشي نائب طوارئ بمستشفي ادرمان وأحد الاطباء الكانوا مباشرين لحالة المتوفي اللي أهله قاموا بالإعتداء علي طاقم وأجهزة الطوارئ
ياريت تقروه عشان نسمع كلام من زول من قلب الحدث

***

الانهيار العام للمؤسسات الصحية ورفع يد الوزارة تماما عن الخدمة الطبية
هو السبب الاول لتنامي ظاهرة التهجم على الاطباء.

المرافق الغاضب يعتقد
ان عدم توفر اسطوانة الاكسجين او سيارة الاسعاف هو من مسؤولية الطبيب الواقف امامه.
الناس هنا بتتكلم كلام
بعيد جدا عن الواقع.
انا نائب اخصائي طوارئ ما حصل ولا أي واحد من زملائي رفضنا نشوف مريض دون اورنيك 8 .
وانا كنت المشرف على حالة المرحوم في امدرمان
ونحن مزعلنا انو اكتر مريض اجتهدنا معاهو، صراحة بالرغم اني مشرف على اقسام حوادث الباطنية والجراحة والانعاش لكني
مع اخصائي الطوارئ
د. حسين ابوعكر وقفنا في المريض ده حوالي ساعتين عشان نركب ليهو انبوب الصدر وانا شخصيا ركبت ليهو كمان فراشة وركبت اكتر من 5 دربات لرفع الضغط. مع انو جزو كبير من ده ما كان مهمتي بل واجب الممرض.
وكذلك شرحت الوضع لأهلو من بدري انو رتبو حالكم الموضوع ده بحتاج عملية. ووريتم انو متوفر فقط في مستشفي الشعب ووصفت ليهم مستشفى خاص كمان عشان لو عندهم طريقة لانو عامل الزمن مهم في الحالات الزِّي ذي .
وانا عارف تماما انو
لو مشو مستشفي الشعب المريض ما حيتم انقاذو .
كنت بفتش في اكسجين
انا و(بتاع اسوار) ومشينا بنضرب لمسؤول الاكسجين ما رد. (كل ده ما عندي بيهو علاقة خالص) وده بيحصل يووومي اشتغلنا بتاعين اكسجين واشتغلنا شغل تمريض وبنشتغل شغل ادارة واشتغلنا حجازين ومشينا قبل كده الصيدلية نجيب لعيان دوا ودقينا شير لعيان دي حاجات يومية عايشنها في المستشفى .
وبتشوف في 3 دقايق 5 عيانين بقيفو مع مرافقنهم وكلهم عايزين تشوفم اسي ولو في زول تعبان مشيت عليهو بسمعوك كلام فارغ. الطبيبات بيسمعن الفاظ نابية بشكل يومي وتعامل
لا اخلاقي ونصبر ونقول انسانية المهنة.
حكى لي امس مستر هيثم مدير مستشفى امدرمان لمن اضطر يسد هو براهو في الاصابات نسبة للاضراب - انو قرب يشتبك مع مرافق اساء ليهو.

القضية عامة
وللاسف الموضوع بقى زي جمهور تيم العباسية زمان. غالبين مغلوبين بدقو الحكم.
اي زول جاي المستشفى عايز يدق الدكتور. في حين لو مشى مستشفى الامل او السلاح او الشرطة ممكن يطردوهو عديل ما بفتح خشمو.

بالنسبة للصحفيين المتحاملين على الاطباء اغلبهم .. الصحافة بالنسبة ليهم اكل عيش للأسف . والناس ما بتلعب في اكل عيشها. قاتل الله الفقر
(كما قال الامام علي بن ابي طالب )..
وبعضهم كسول . الصحفيين في مناطق اخرى بسافرو مناطق الحرب وبتعايشو مع المتحاربين عشان يصلو للحقايق ويوثقو .
نفسي صحفي يقول الليلة انا حاسد نبطشية مع اطباء حوادث مستشفى امدرمان. ويجي يكتب بعد داك .
قبل كده وزير الصحة
خش غرفة حوادث امدرمان
ووضع منديل في انفو عشان الريحة ومرق طوالي .
تعالو شوفو ما تكتبو ساي عشان نحترم قلمكم.

عبدالله القرشي
عضو لجنة الاطباء المركزية

�من قروب الطبيب طبيبك
29/9/2016

#صوت_الطبيب

شئ مؤسف و محزن ما يضع مهمة الطبيب في السودان
في موقع محرج و مرعب بل مخيف..
كامل تضامني مع اطباء بلادنا..

.