Post: #13 Title: Re: اختلفت مشاهدتي هذه المرة في اجازتي للوطن � Author: MOHAMMED ELSHEIKH Date: 10-01-2016, 09:30 AM Parent: #11
سلام وتحية
وصلنا السودان قبلكم .نمت يوم واحد في السهلة مع ارتال البعوض والذي يستلم منه الوردية الذباب في السادسة صباحا. اصبت بالملاريا اللعينة في الحاج حفر مما اضطرني لاخذ 8 حقن زيتية بعد غياب 18 سنة من الملاريا. كادت الملاريا تلغي عيدي بفتوار ولكن الحمد لله وصلت يوم العيد الساعة 3 صباحا.
انا وصلت امس الأول وتركت خلفي اكوام القمامة الواحد الا يتزاوغ منها . بعدين ناس مجلسك التشريعي زاتهم قالوا الولاية غلبها
تجي تقول لي صحة بيئة.
في فتوار بريفي الباوقة الناس عايشة بدون حكومة طبعن. والله العظيم الشوارع في منتهى النظافة والله ثلاثا لم احس بمفرد بعوضة او ذبابة . لاتوجد كهرباء عامة ولكن كل البيوت بفضل الله وفضل شباب القرية منورة والحفلات الصبوحية ماتديك الدرب وقد قام هؤلاء الشباب ببناء مركز صحي نموزجي لايوجد في اي مكان في السودان ويقوم ابناء القرية من الأطباء والكوادر بالعمل فيه في اجازاتهم لانو الحكومة ماعندها كوادر.
ياخي ابعدوا عن ناس الخرطوم وخلوهم بدون حكومة والله العظيم يدبروا نفسهم زي ناس فتوار
Post: #14 Title: Re: اختلفت مشاهدتي هذه المرة في اجازتي للوطن � Author: MOHAMMED ELSHEIKH Date: 10-01-2016, 09:32 AM Parent: #13
لا ادري شيئا عن بقية احياء الباوقة مثل المخازن والحواشات والعمارة لانها احتمال تكون تابعة لحكومة جمهورية الكيزان
Post: #15 Title: Re: اختلفت مشاهدتي هذه المرة في اجازتي للوطن � Author: ود الباوقة Date: 10-01-2016, 09:48 AM Parent: #14
لا ادري شيئا عن بقية احياء الباوقة مثل المخازن والحواشات والعمارة لانها احتمال تكون تابعة لحكومة جمهورية الكيزان
ذهبت الى الباوقة ومستوى النظافة عال العال مع سريان الامداد الكهربائي
بصفة مستمرة
ذهبت الى الجول وسرني منظر اعمدة الكهرباء تمتد اليها والى فتوار
وحتى السليمانية وماهي الا اسابيع قليلة وينعم اهلنا في تلك الاماكن
بالكهرباء
ولله الحمد
وشكرا
Post: #16 Title: Re: اختلفت مشاهدتي هذه المرة في اجازتي للوطن � Author: حامد بدري Date: 10-01-2016, 10:11 AM Parent: #15
مرحبا ودالباوقة وكل سنة وات طيب مشيت الصعيد محل الاسهال المائي وملاح قشر البصل طبعا بضحك في الناس الجاية وفي بالا الباوقة حينتقد الحكومة نقوليهم الباوقة مبايع وطايع
Post: #18 Title: Re: اختلفت مشاهدتي هذه المرة في اجازتي للوطن � Author: ود الباوقة Date: 10-01-2016, 11:53 AM Parent: #16
حياك الله اخونا
حامد بدري
Post: #17 Title: Re: اختلفت مشاهدتي هذه المرة في اجازتي للوطن � Author: محمد مختار جعفر Date: 10-01-2016, 10:28 AM Parent: #11
سلام وتحية .. ود الباوقة وضيوفه الكرام
سبقت إجازتي قبل العيد بأسبوع أحاديث وكلام كثير عن كمية الذباب والباعوض والحالة الصحية المتردية في العاصمة وسافرت على مضض أتحسب لما ألاقيه من ملاريا وإصابات بالمعدة من جراء مياه الشرب وكان ما لم يكن في الحسبان ... نزلت بمنزلي بالصافية بمنطقة بحري الهادئة أكثر المدن شهرة في نظافتها ورقي أهلها ولم أجد ما تحوطت عنه ... بل ترددت على الثورة ( المهدية ) بأم درمان ولم أحفل بشئ من جحافل الذباب والباعوض المفترى عليه ويبدو أن حربا ضروس نشبت بين طائرات الرش ومكامن جيوش هذه الآفات الضارة وتمت الإبادة وأماكن توالدها بالرغم من أن الأمطار كانت لا تزال تهطل بالعاصمة ولم ينضب معينها ... الشئ الوحيد الذي أتمناه أن يلتفت ويقضى على ظواهر ستات الشاي الآتي يبعن ويوزعن كاسات الشاي دون أدني شرط في صحة الإنسان سألتكم بالله ، كيف تغسل هذه ( الكبابي ) أليس من جركانة قابعة من وقت العصر دون تغييرما ؤها وحتى لو غيرت أين الصابون والمطهرات كم الذين يرتادون ويشربون وتعدد إستعمال ( الكباية ) الواحدة طيلة هذا اليوم .. كم من مرضٍ وأصحاب أمراض مزمنة تحسبهم أصحاء وهم يرتشفون من نفس الكأس ويوزعون أمراضهم دون مبالاة من السلطات المحلية ... هل صعب الأمر في تنظيم هذه المهنة الهامشية غير الصحية بل المميته بأمراض آجلة ، هل صعب أمر معالجة الجانب الصحي ..لاحول ولا قوة إلا بالله كم عدد غير السودانيين الذين ملؤوا البلاد بطولها وعرضها وأتوا بأمراض لا نعرفها وظهور الكوليرا ذلك المرض الذى ودع البلاد من جراء الأوساخ وعدم النظافة في الأبدان والممارسات اليومية غير الصحية منذ مطلع الستينات ... ، أتي بوجه مدمر لحياة الإنسان في البلاد ونحن لازلنا نقول تعاطفا .. إنهن يربين الأيتام وأنهن مطلقات وأنهن يعلمن طلابا في الجامعات و.. و.. الخ .. وصحة الإنسان في بلادي تهوى الى درك سحيق جراء عدم اللا مبالاة وجراء العواطف المغلقة الضيقة .....: ولا حول ولا قوة إلا بالله .. بعافية وفتكم .. محمد مختار جعفر
Post: #19 Title: Re: اختلفت مشاهدتي هذه المرة في اجازتي للوطن � Author: muntasir Date: 10-01-2016, 12:00 PM Parent: #17
الحبرتجي خليك من البيعة الكونتينر وصل
Post: #20 Title: Re: اختلفت مشاهدتي هذه المرة في اجازتي للوطن � Author: MOHAMMED ELSHEIKH Date: 10-01-2016, 12:47 PM Parent: #19
طيارة الرش دي انا شفتها مرة واحدة في الحاج يوسف .يبدو ان هناك مسعول اتحادى او ولائي بحيكم في الصافية كان بسبب معارككم الجوية مع البعوض.
Post: #21 Title: Re: اختلفت مشاهدتي هذه المرة في اجازتي للوطن � Author: سيف النصر محي الدين Date: 10-01-2016, 03:11 PM Parent: #20
يعني برشوا الاحياء السكنية بالمبيدات الحشرية بالطيارات؟؟ كده تبقى مزاعم استخدام الأسلحة الكيماوية ما في دارفور بس.
ألف حمد الله على سلامتك أخي في الله عمر ود الباوقة
Post: #23 Title: Re: اختلفت مشاهدتي هذه المرة في اجازتي للوطن � Author: وضاحة Date: 10-01-2016, 03:54 PM Parent: #22
تصدى لها ابني الصغير هاشم ليرديها قتيلة
بمضرب البونق بونق
------------------------------ ولد دا بالله بمضرب البونق بونق و اطفال الباوقة الباقين عندهم مضارب بونق بونق ولا ناس طيييين سااااى اولاد ترابلة على قولة شيقا بقً بقً ما مريت بي نمرة 2 و 3 في خور في شارع الصناعات بتاع موية مليان غازورات الناس شكت وبكت لى ناس المحلية علشان ينظفوا بتعبن جدا وخاصة فى الخريف علشان بلم الباعوض والضفاضع بتعمل حفلة باليل بتحمى الناس النوم خاصة لو الكهرباء قطعت والناس نامت فى الحوش بتعرف الحوش بقً يقً هههههههههها لكن مافي زول هبببوا ليهم حتى رفضوا يخلوهم ينظفوا بالعون الزاتى هاك استمتع يا بقً بقً بالمناظر دى يمكن تبطل كذب
سبقت إجازتي قبل العيد بأسبوع أحاديث وكلام كثير عن كمية الذباب والباعوض والحالة الصحية المتردية في العاصمة وسافرت على مضض أتحسب لما ألاقيه من ملاريا وإصابات بالمعدة من جراء مياه الشرب وكان ما لم يكن في الحسبان ... نزلت بمنزلي بالصافية بمنطقة بحري الهادئة أكثر المدن شهرة في نظافتها ورقي أهلها ولم أجد ما تحوطت عنه ... بل ترددت على الثورة ( المهدية ) بأم درمان ولم أحفل بشئ من جحافل الذباب والباعوض المفترى عليه ويبدو أن حربا ضروس نشبت بين طائرات الرش ومكامن جيوش هذه الآفات الضارة وتمت الإبادة وأماكن توالدها بالرغم من أن الأمطار كانت لا تزال تهطل بالعاصمة ولم ينضب معينها ...
Post: #36 Title: Re: اختلفت مشاهدتي هذه المرة في اجازتي للوطن � Author: أحمد عزالدين Date: 10-01-2016, 07:19 PM Parent: #1
التحية ليك اخونا ود الباوقة ولضيوفك الذين إتفق معظمهم علي أن ما اوردته لا يمت للحقيقة بصلة .
ولا أدري لماذا الإصرار علي الكذب الصريح والكذاب ملعون ملعون ملعون والواقع شئ مؤلم مزري مقرف لدرجة يصعب معها الحياة. رجعت أسرتي من الإجازة وهم مصابون بالملاريا التي وصلت بهم لدرجة الهذيان والهضربة والإغماء والغياب عن الوعي . وولاول مرة أشاهد شخص مصاب بالملاريا منذ 16 سنة لأنني لم اطأ أرض هذا السودان منذ 16 سنة. حتي اولادي أقسموا قسماً مغلظاً بأنهم لم ولن يذهبوا للسودان مرةً اخري وهو بهذا السوء والبلاء والعفن . إلا أن يعجل الله بفرج الامة السودانية بذهاب هذا النظام البئيس الذي أذاق الناس كل أصناف العذاب. لا حول ولا قوة إلا بالله , لا حول ولا قوة إلا بالله , لا حول ولا قوة إلا بالله العلي العظيم.
Post: #37 Title: Re: اختلفت مشاهدتي هذه المرة في اجازتي للوطن � Author: اميرة السيد Date: 10-01-2016, 07:52 PM Parent: #36
ان شاء الله يا ود الباوقة تكون زرت الخرطوم وزرت المستشفيات الخاصة الخمسة نجوم ...وشفت معاملة ادارات المستشفيات دي للمرضى ...وشفت الاهمال الطبي على الرغم من ان المريض بيدفع دم قلبه عشان يلقى العلاج المناسب..وفي النهاية يلقى حتفه...داخل حجرة العمليات.. وعندما يطالب اهله بالجثمان ليواروه الثرى...ترفض ادارة المستشفى حتى يدفعوا بقية رسوم العلاج....اتخيل ..بيقولوا العلاج يا ود الباوقة....والزول ميت... ..وما دمت قلت حتقول الحقيقة ولو على نفسك...فاتينا بالحقيقة عن الاحوال الصحية للمواطنين الغلابة.. والله يديك الصحة والعافية تخريمة.. بسمات بتقول ليك ضربت ليك تلفون مرتين وما بترد...اظنك نسيت وعدك بمساعدتها في طلب ما بقدروا عليه الا ذوي النفوذ من الرئيس عمر البشير وانت طالع...
Post: #41 Title: Re: اختلفت مشاهدتي هذه المرة في اجازتي للوطن � Author: Osman Musa Date: 10-01-2016, 08:48 PM Parent: #40
سلامات يا عزيزنا ود الباوقة . غايتو ذباب عاصمة الثقافة العربية أبو عضلات الشفناهو ده ما بموت بي رش طايرات . والباعوضة ديك ديك خليها و الحمد لله أنو بدينا تصدير العقارب يمكن تخف شوية ههههههها
Post: #42 Title: Re: اختلفت مشاهدتي هذه المرة في اجازتي للوطن � Author: اميرة السيد Date: 10-01-2016, 08:59 PM Parent: #41
ود قباني.... انت شايف في حاجة غريبة ولا شنو.. عشان انا عندي قطعة ارض في المعمورة في الخرطوم بسمات حاسداني وجارية عشان تكون عندها قطعة واطة في حي ارقى من المعمورة...يعني في المنشية او الطائف او الرياض..(وش ضاحك).وكلمت ود الباوقة للمساعدة...ولكنه طنشها وانت عارف الامور في السودان اذا ما عندك واسطة قوية زي ود الباوقة..ما ممكن تقضي امورك... ....انا طبعا عندي واسطات قوية...وايه رايك يا ود قباني انا بعرف سلفاكير، رئيس دولة الجنوب معرفة شخصية..
Quote: ود قباني.... انت شايف في حاجة غريبة ولا شنو.. عشان انا عندي قطعة ارض في المعمورة في الخرطوم بسمات حاسداني وجارية عشان تكون عندها قطعة واطة في حي ارقى من المعمورة...يعني في المنشية او الطائف او الرياض..(وش ضاحك).وكلمت ود الباوقة للمساعدة...ولكنه طنشها وانت عارف الامور في السودان اذا ما عندك واسطة قوية زي ود الباوقة..ما ممكن تقضي امورك... ....انا طبعا عندي واسطات قوية...وايه رايك يا ود قباني انا بعرف سلفاكير، رئيس دولة الجنوب معرفة شخصية..
دايرة النصيحة يا بتي ...
ود الباوقة اضحك معاهو هنا و اجامله و يجاملني في حدود المنبر ده ... و اتحمل اشياءه العجيبة الزي البوست ده ...
لكن وكت الجد ... كان داير قبر و الله ما بسألة ... لأنه محاباته للنظام القاتل ده بتخليني لازم أكون بيني و بينو مسافة ...
اها انا كاتب الكلام ده في البوست حقه شخصيا هنا ... و هو عارف و فاهم كمان ...
اما قصة الواسطات ... انا و الله الكلمة في عضمها بكرهها ...
انتي قايلة المرقنا آخر الدنيا شنو ؟ ما هي أمور الواسطات و المحاباة و المجاملات ...
Post: #44 Title: Re: اختلفت مشاهدتي هذه المرة في اجازتي للوطن � Author: جلالدونا Date: 10-01-2016, 10:53 PM Parent: #43
Quote: وبالنسبة للبعوض والذباب غير موجود والموجود منه مصاب باعياء شديد ويطير
اكيد عندو اسهال مائى .. ده لو ما ديك ديك .. للكوليرا ما لى بتاع الجدادة
Post: #45 Title: Re: اختلفت مشاهدتي هذه المرة في اجازتي للوطن � Author: اميرة السيد Date: 10-01-2016, 11:56 PM Parent: #44
تاكد يا ود قباني انا ما محتاجة لواسطات عشان اسهل اموري في الممكاتب الحكومية عشان اساسا انا ما من الخرطوم وقريتنا في الشمالية مافيها مكاتب حكومية.. لكن البكلم الديك منوِِِِ...اقصد الدجاجة (بسمات)..وش ضاحكِِِ...انا متاكده هسع حتجي جارية تنكرِِِِ... والله يديك الصحة والعافية
Post: #46 Title: Re: اختلفت مشاهدتي هذه المرة في اجازتي للوطن � Author: MOHAMMED ELSHEIKH Date: 10-02-2016, 05:33 AM Parent: #45
Quote: حتجي جارية تنكرِِِِ...
يعني عادت للمنبر ؟ الف مبروك .على العموم وريها انا ماخد تلااااااتة يوم في عطبرة . اعراس ماتديك الدرب (وضبان وبعوضة طبعن).
اها شنو ليك؟
Post: #47 Title: Re: اختلفت مشاهدتي هذه المرة في اجازتي للوطن � Author: اميرة السيد Date: 10-02-2016, 06:47 AM Parent: #46
يا محمد الشيخ انت يا دوب عرفت ان اختك بسمات الشيخ عادت للمنبر العام...هي رجعت من بدري وعندها مداخلات وتعليقات كثيرة... وهسع ما تقول ليها باعراس وبعوضة عطبرة ..حتقوم تغير رايها في اجازة الكريسماس وتسافر اتبرا...مع اننا اتفقنا نزور مدينة الاحلام لاس فيغاس... ولكن برضه اظنها بعد شوية حتنسى عطبرة لانها بتفتش في قطعة واطة في الخرطوم على الرغم من انو عندهم قصر منيف في اتبرا... والله يديك الصحة والعافية.. تخريمة.. ود الباوقة..لسه راجينك تكلمنا عن حقيقة الاوضاع الصحية للمواطنين في المستشفيات الخاصة الانعدمت فيها المروءة واصبح الطب تجارة رابحة... والله يديك الصحة والعافية
Post: #48 Title: Re: اختلفت مشاهدتي هذه المرة في اجازتي للوطن � Author: ود الباوقة Date: 10-02-2016, 07:12 AM Parent: #47
ود الباوقة..لسه راجينك تكلمنا عن حقيقة الاوضاع الصحية للمواطنين في المستشفيات الخاصة الانعدمت فيها المروءة واصبح الطب تجارة
الزيارة الوحيدة التي توفرت لي لمعاودة مريض من الاهل
كانت لمستشفى شرق
حقيقة دهشت جدا لرونق المبنى ونظافة غرف المرضى
وجودة الخدمات الصحية التي تقدم للمريض
هذا ما شاهدته ولمسته بام عيني
يا اميرة
اسف لتخطي رقاب المتداخلين
Post: #49 Title: Re: اختلفت مشاهدتي هذه المرة في اجازتي للوطن � Author: MOHAMMED ELSHEIKH Date: 10-02-2016, 07:21 AM Parent: #47
Quote: انت يا دوب عرفت ان اختك بسمات الشيخ عادت للمنبر العام...هي رجعت من بدري وعندها مداخلات وتعليقات كثيرة...
معناها " أكن انا الماجيت"
Post: #50 Title: Re: اختلفت مشاهدتي هذه المرة في اجازتي للوطن � Author: طه داوود Date: 10-02-2016, 08:54 AM Parent: #49
كلام في الصميم اخونا محمد مختــار جعفــر.. (( الشئ الوحيد الذي أتمناه أن يلتفت ويقضى على ظواهر ستات الشاي اللاتي يبعن ويوزعن كاسات الشاي دون أدني شرط في صحة الإنسان سألتكم بالله ، كيف تغسل هذه ( الكبابي ) أليس من جركانة قابعة من وقت العصر دون تغييرما ؤها وحتى لو غيرت أين الصابون والمطهرات كم الذين يرتادون ويشربون وتعدد إستعمال ( الكباية ) الواحدة طيلة هذا اليوم .. كم من مرضٍ وأصحاب أمراض مزمنة تحسبهم أصحاء وهم يرتشفون من نفس الكأس ويوزعون أمراضهم دون مبالاة من السلطات المحلية ... هل صعب الأمر في تنظيم هذه المهنة الهامشية غير الصحية بل المميته بأمراض آجلة ، هل صعب أمر معالجة الجانب الصحي ..لاحول ولا قوة إلا بالله))
Post: #52 Title: Re: اختلفت مشاهدتي هذه المرة في اجازتي للوطن � Author: اميرة السيد Date: 10-02-2016, 08:22 PM Parent: #50
شكرا ود الباوقة على الرد.. وكمان اقرا رد محمد مختار جعفر عن ستات الشاي والتنظيم المطلوب.. ..وما عندنا نية نقطع رزق ستات الشاي...لانهن بكافحن لاعالة الاسرة ..لكن كلام محمد مختار فيه منطق بالنسبة لصحة المواطنين وغسيل الكبابي...وممكن يعملو توعيه لستات الشاي فيما يتعلق بضرورة نظافة المكان ونظافة الكبابي....عشان صحة المواطنين... والله يديك الصحة والعافية
Post: #53 Title: Re: اختلفت مشاهدتي هذه المرة في اجازتي للوطن � Author: السنجك عثمان Date: 10-02-2016, 08:40 PM Parent: #52
الله ينتقم منكم يا كيزان ويامطبلاتيه على الحد السواء لعنة الله عليكم فى المذاهب الاربعه
Post: #54 Title: Re: اختلفت مشاهدتي هذه المرة في اجازتي للوطن � Author: ود الباوقة Date: 10-03-2016, 07:24 AM Parent: #53
بالنسبة للطرقث الداخلية تحتاج الى مراجعات
وصيانة دورية
حيث تجد الكثير من الحفر وهذا بدوره يؤثر على
سلامة السيارة
ووقوع العديد من الحوادث
Post: #55 Title: Re: اختلفت مشاهدتي هذه المرة في اجازتي للوطن � Author: ود الباوقة Date: 10-03-2016, 07:27 AM Parent: #54
مستوى النظفة بشكل عام واقصد داخل الاحياء
والطرقات
دون الوسط تقريبا
ما زالت جهود الولاية اقل من الطموح في هذا الشان
اخيرا تمت معالجة مؤقتة بان تجمع النفايات
من البيوت الى الشوارع الرئيسية
وهو حل في نظري غير موفق
Post: #57 Title: Re: اختلفت مشاهدتي هذه المرة في اجازتي للوطن � Author: ود الباوقة Date: 10-03-2016, 07:30 AM Parent: #55
مررت على العديد من مطاعم السمك حيث انه وجبتي المفضلة
وحقيقة الاسعار غالية بعض الشي
كيلو البلطي بي 100 ج وفي اماكن اخرى 90 ج
وهو مبلغ كبير جدا
في بلد به ثروه هائلة من الاسماك
Post: #65 Title: Re: اختلفت مشاهدتي هذه المرة في اجازتي للوطن � Author: ود الباوقة Date: 10-04-2016, 10:03 AM Parent: #57
تمام
Post: #56 Title: Re: اختلفت مشاهدتي هذه المرة في اجازتي للوطن � Author: الشريف احمد يوسف Date: 10-03-2016, 07:30 AM Parent: #1
اخي الهميم ... ود الباوقة
تحايا واشواق بلا حدود ... حمداً لله على السلامة ... الاخبار والصحة
اها الخبر النجيييض؟
Post: #58 Title: Re: اختلفت مشاهدتي هذه المرة في اجازتي للوطن � Author: ود الباوقة Date: 10-03-2016, 07:34 AM Parent: #56
الطرق السريعة ايضا تحتاج الى معالجات فورية
بعد ان كثرت حوادث السير وارتفع عدد الضحايا والمصابين
وهناك ملاحظة لفتت نظري وهي مراكز الجبايات
ففي ولاية نهر النيل توجد 7 مراكز بعدد محلياتها
والملاحظ عند نقاط العبور يقف السائق في منتصف الطريق حتى يتم فحص اوراقه
وتحصيل الرسوم المقررة مما يتسبب هذا الاجراء في تاخر الكثيرين
من العابرين .. اتمنى ان يتم هذا الاجراء على جانبي الطريق
وهو ليس بالامر الصعب
Post: #59 Title: Re: اختلفت مشاهدتي هذه المرة في اجازتي للوطن � Author: ود الباوقة Date: 10-03-2016, 07:37 AM Parent: #58
ساواصل باذن الله بقية المشاهدات
متى ما توفر لى الوقت الكافي
وشكرا
Post: #60 Title: Re: اختلفت مشاهدتي هذه المرة في اجازتي للوطن � Author: حيدر حسن ميرغني Date: 10-03-2016, 07:56 AM Parent: #59
بكل صراحة انا ماعانيت من ضبانة واحد في اجازتي الانتهت اول يوم في العيد لكن الشوارع غرقانة بمياه الامطار واكوام الزبالة ماتديك الدرب رغم ان ناس النفايات يتحصلوا على رسومهم على داير مليم
Post: #61 Title: Re: اختلفت مشاهدتي هذه المرة في اجازتي للوطن � Author: ود الباوقة Date: 10-03-2016, 10:19 AM Parent: #60
داخل على القيلولة
اخونا حيدر جر الباب دا معاك
لو تكرمت
وارم الترباس الخارجي
وشكرا
Post: #62 Title: Re: اختلفت مشاهدتي هذه المرة في اجازتي للوطن � Author: MOHAMMED ELSHEIKH Date: 10-03-2016, 12:56 PM Parent: #61
ابو النسب
حسب العنوان اختلفت مشاهداتك هذه المرة
نرجو عقد مقارنة لمشاهداتك السابقة والحالية والفرق بينهما.
Post: #66 Title: Re: اختلفت مشاهدتي هذه المرة في اجازتي للوطن � Author: Mustafa Mahmoud Date: 10-05-2016, 01:37 PM
ولكن تبيّن أنهم ما أتوا لرأي ولا لحوار ولا لنقاش بل أتوا لأجندات أخرى
1-التجاهل 2- التجاهل 3- التجاهل
يجب فضح جميع الكيزان وبعض المندسين الجبناء.
أنه لمخجل جدا أن يدعي البعض الوطنية وهم يقفون مواقف المتفرجين
ومعا لكشف عصابة مافيا الانقاذ وجميع المأجورين
ولا نامت أعين الجبناء والعار للذين ينشرون أكاذيب الكيزان في هذا المنبر
د مصطفي محمود يونيو 2006
Post: #67 Title: Re: اختلفت مشاهدتي هذه المرة في اجازتي للوطن � Author: Mustafa Mahmoud Date: 10-05-2016, 01:42 PM Parent: #66
وصلنا من مصدر مؤكد ان كل بوستات ود الباوقة تصدر من شعبة الجهاد الاكتروني التابع لجهاز الامن
ترسل البوستات جاهزة و يقوم ود الباوقة بانزالها في المنبر
في بعض الاوقات يقوم جهاز الامن بانزال البوستات مستعملا باس ويرد ود الباوقة
