Post: #2 Title: Re: و بعدين مع هؤلاء الناس؟! Author: المعز ادريس Date: 09-22-2016, 03:50 PM
ارجو المساعدة بالله في جلب الفيديو!
Post: #3 Title: Re: و بعدين مع هؤلاء الناس؟! Author: احمد حمودى Date: 09-22-2016, 03:55 PM
Post: #4 Title: Re: و بعدين مع هؤلاء الناس؟! Author: المعز ادريس Date: 09-22-2016, 03:56 PM
الي حين ظهور الفيديو نتونس ب"الهترشات" دي!:
😩 *(هترشات واحد مجنون)* 😛
🔷 *سؤال وجيه جداً* *صحي الكلام دا بحصل في السودان ؟*
1/ لما تشتري عربية بي مية مليون والجمارك تشيل منك مية وعشرين مليون يعني الجمارك تكسب اكتر من المصنع والوكيل
*إنت في السودان أيوة*
2/ لما يكون كل مؤهلات وزير الصحة انو قائد سابق في العدل والمساواة والبلد فيها ألف بروفسور وبروفسور
*إنت في السودان أيوة*
3/ لما يكون عداد ندى القلعة في حفلة واحدة 10 اضعاف مرتب بروفسير سمية ابو كشوة مدير جامعة الخرطوم
*إنت في السودان أيوة*
4/ لما تشتري كهرباء وتدفع مقدم ويدوك ليها بالتقسيط
*إنت في السودان أيوة*
5/ لما الوالي ومدير مكتبو يلحسو كل الاراضي في العاصمة ولما يمسكوهم يقولو خلاص بنتحلل
*إنت في السودان أيوة*
6/ لما تلاقي ليك بت الوش لون والايدين لون ويقولو ليك هو السرطان مالو انتشر كدا
*إنت في السودان أيوة*
7/ لما صحن سلطة الفول يكلفك 50 الف جنية كمان بدون بصل لانو شوال البصل بقا بي 80 الف
*إنت في السودان أيوة*
8/ لما نفشل في حل مشكلة المواصلات وبدون خجلة نشارك في معرض دبي للطائرات
*إنت في السودان أيوة*
9/ لما البت تقوم تتعاور وتقول لخطيبة دايرة حفلة في صالة و شيلة 8×8 يكون فيهم توب ابو القنفد
*إنت في السودان أيوة*
10/ لما الفساد يوصل ديوان الزكاة وهيئة الحج والعمرة
*إنت في السودان أيوة*
11/ لما وزير خارجية سابق يرجع لدرجة سفير
*إنت في السودان أيوة*
12/ لما تشوف ليك في شارع واحد خرتمية حفرة وحفرة وفي نفس الشارع كميرات مراقبة لقطع الاشارة
*إنت في السودان أيوة*
13/ لما كل المسوؤلين يجو من الولايات متزوجين بنات أعمامم البقطعو الخميرة من البيت ، ولما يرطبوا يعرسوا ليهم واحدات عمرهن 18 سنة
14/ لما *(المتعافن)* يقلع أراضي الناس *"ملك حر"* 20 فدان جنب جامعة أفريقيا *قال للصالح العام* ويبنوها أبراج سكنية وتجارية ليهم ويدي أهلها قطعتين كتعويض في المجاهًدين دا غير الأراضي الزراعية الشالوها بالغصب من أهلها وباعوها للأماراتيين عملوا فيها *(مدينة النخيل)* ولي هسا ما عوضوا أصحابها ..
*إنت في السودان أيوة*
15/ لما واحد تمرجي في بحري يعملوهو مراسلة بالموتر وبعدين يرقوهو لي سكرتير مكتب الرئيس ومسئول عن إحتياجات نسوانو ويدوهو رتبة فريق ومدير عام مكاتب الرئيس وسمسار الصفقات المشبوهة !!
😡 *والله العظيم إنت في السودان*🙄
Post: #5 Title: Re: و بعدين مع هؤلاء الناس؟! Author: المعز ادريس Date: 09-22-2016, 03:58 PM Parent: #4
تسلم كتير عزيزي حمودي.. جزيت خيرا مودتي و تحياتي،
Post: #6 Title: Re: و بعدين مع هؤلاء الناس؟! Author: عمر سعيد علي Date: 09-22-2016, 05:17 PM Parent: #5
(1/ لما تشتري عربية بي مية مليون والجمارك تشيل منك مية وعشرين مليون يعني الجمارك تكسب اكتر من المصنع والوكيل )
*إنت في السودان أيوة*
دي غايتو مبالغه . .
(3/ لما يكون عداد ندى القلعة في حفلة واحدة 10 اضعاف مرتب بروفسير سمية ابو كشوة مدير جامعة الخرطوم )
*إنت في السودان أيوة*
لكن دي ما اظن خاصة بالسودان بس . .
Post: #7 Title: Re: و بعدين مع هؤلاء الناس؟! Author: معاوية الزبير Date: 09-22-2016, 06:02 PM Parent: #6
الرسالة وصلت يا بت الناس ولقد اسمعتي لو ناديتي حيا ولكن لا حياة لمن تنادي لكل شيء نهاية وسيأتي يوم الحساب و زي ما قلتي محل ما يخشوا ما يعرفوا
شكرا يا المعز لحمل الرسالة ونرجو من بكري ابوبكر يرفع البوست لمكانه المستحق
Post: #8 Title: Re: و بعدين مع هؤلاء الناس؟! Author: جلالدونا Date: 09-22-2016, 06:14 PM Parent: #7
المفارقات كتيرة لامن تطمم البطن اتخيل لما على عثمان محمد طه و هو يعتلى منصب النائب الاول يقول الانقاذ ما جات عشان قفة الملاح .. جات عشان المشؤوع الحضارى و الفاروق عمر بن الخطاب على ايام المجاعة يعطل شرع الله حتى لا يقيم حدا على من سرق ليقتات
Post: #9 Title: Re: و بعدين مع هؤلاء الناس؟! Author: المعز ادريس Date: 09-23-2016, 07:15 AM
عمر سعيد معاوية الزبير جلالدونا
عميق التقدير لدعمكم و تضامنكم مع هذه البنت المعبرة بمرارة شديدة عن معاناة الناس هناك.. مودتي،
Post: #10 Title: Re: و بعدين مع هؤلاء الناس؟! Author: Fatima Alhaj Date: 09-23-2016, 12:38 PM
" لما واحد تمرجي في بحري يعملوهو مراسلة بالموتر وبعدين يرقوهو لي سكرتير مكتب الرئيس ومسئول عن إحتياجات نسوانو ويدوهو رتبة فريق ومدير عام مكاتب الرئيس " عليك الله أخي معز الكلام دا صحي؟
Post: #11 Title: Re: و بعدين مع هؤلاء الناس؟! Author: المعز ادريس Date: 09-23-2016, 12:53 PM
الاخت فاطمة لك التحية الكلام دا نقلا عن الواتساب اعتقدت انه مر على بعض الناس هنا لكن كله جائز هناك!