تسريييييييييييييييييييييب جلسة مجلس الوزراء بخصوص التعليم الاليكتروني

01:37 PM September, 19 2016

سودانيز اون لاين
د.محمد حسن-
مكتبتى
رابط مختصر

- الرئيس : السلام عليكم
- الوزراء: وعليكم السلام واللحمة
- الرئيس : هههههه والله الشربوت خلا دمكم خفيف
- وزير رقم 10: (بضحكة وسرور) الشغالات الله يجزيهم خير النسوان علموهم يعملو الشربوت الرسالي
- الرئيس كيف يعني شربوت رسالي
- وزير رقم 75 : ( بزهو) يعني يا ريس شربوت فيه حبة البركة
- نائب الرئيس : طيب ما جبتو منه للرئيس مالكم
- المجلس ياخد صنه
- نايب الرئيس : انتو ما عارفين البياكل براه بخنق والبشرب براه بشرق
- وزيرة رقم 4: والله انا كنت عايزة ارسل ليك جردل يا ريس بس بصراحة كدة لاوزت
- الرئيس : ليه لازتي
- الوزيرة 4 : نحن نسوان وبنعرف بعض
- الرئيس ضاحكا : ما علينا نشوف موضوع خفيف نناقشه بس ابعدونا من الكوليرا والحاجات البايخة دي
- الرئيس: يا وزيرة التعليم اها الموقف كيف ؟ زعتو الكتب ؟
- الوزيرة : لا يا ريس لا وزعنا كتب ولا كراسات
- الرئيس : معقول؟ وحتوزعوها متين ؟
- الوزيرة : ما حنوزعها
- الرئيس : ليه؟
-الوزيرة : لاننا ما طبعناها من الاساس
- الرئيس : وليه ماطبعتوها الحاصل شنو ؟ المطبعة ما شغالة ؟
- الوزيرة : ما المطبعة ، قروش ما في يا سعادتك
- الرئيس : كيف قروش مافي ؟ بعد الرسوم والضرايب الشلناها السنة فاتت دي كلها والدهب الكتير ده كلو قروش مافي
- الوزيرة : اسال وزير المالية
- الرئيس : يا وزير المالية قروش الدهب وين
- وزير المالية : ياريس دهب شنو ؟ دي ماسورة ساي فكيناها نخدر بيها الشعب هي كلها طني والا طن نص اتقسمناها مع الشركات ما فضل فيها شي
- الرئيس: طيب قروش الاضرايب والرسوم ؟
- وزير المالية : قروش الرسوم والضرايب وكافة الجبايات قسمناها كالاتي نصها مرتبات لينا ولقوات الدعم السريع والنظامية
- الرئيس: طيب والنص التاني؟
- وزير المالية : يا سعادتك النص التاني اديناه ناس مؤتمر الحوار الوطني
- الرئيس مندهشا : كللللللللللللللللللللللللللو؟!!!!
- وزير المالية: ايوة سعادتك ، لانو ناس الخارج تمنهم غالي قالوا ما بضيعو نضالهم في الفاضي واديك سر يا ريس؟
- الرئيس : اديني
- وزير المالية : اديناهم بالعملة الصعبة والله زي كريتسيان رونالدو قاو لو ما قبضو ما بجو
- الرئيس: طيب والحل؟
- وزير 110: انا عندي فكرة
- الرئيس : فكرتك شنو؟
- الوزير 110: مش يا ريس نحن اخترعنا العملة الاليكترونية عشان ما عندنا قروش؟
وادينا الناس مرتباتهم رصيد؟
- الرئيس: ايوة
- وزير 110: خلاص يا سعادتك نحن نحمل المناهج دي من الكومبيوتر في فلاش ونوز الفلاش لمراء المدارس عشان ما في قروش
ونامر اولياء الامور يجيبو لاولادهم لاب توبات ، طبعا في ناس ما حيقدرو خلاص البقدرو ديل اكيد بكون عندهم اهل مغتربين والا مهاجرين يرسلو ليهم
المنهج في الايميل ويقولو ليهم اطبعو لينا في ورق4 Aهناك رخييييييص يا سعادتك 10 ورقات بريال وهكذا نستفيد من المغتربين والمهاجرين يكونو طبعو لينا المناهج مجانا من غير ما يشعرو ورسلوها لاهلهم
طبعا 90% من الشعب الفضل ده عنده مغترب بره فلما كل واحد يطبع من المنهج زي 5 نسخ بنكون غطينا كل الطلاب وعندنا فايض
- الرئيس : ياخ دي فكرة عبقرية
رايك شنو يا وزيرة التربية والتأليم
الوزيرة : والله البنشوفو يا سعادتك
الرئيس : خلاص نوجه بتحميل المنهج على فلاش
ونرقي الوزير 110 الى 220
الوزير 110: شكرا سعادتك بس ما فهمت 220
الرئيس : يعني حتبقى المستشار الخاص لرئيس الجمهورية
رفعت الجلسة

عميق التحايا يا دكتور على الجلسة المعبرة
يعجبني جدا اسلوب جبرا الساخر في التعبير عن الجلسة
ولا ادري كانت الفكره منه أم منك فهي راقية وسلسة
الغريب ان الموضوع حيوي ومهم ، ورغم فداحة النقاش إلا أن الخطوة العملية نحو التعليم الالكتروني مطلوبة وبشدة في هذا الوقت
ولعل هناك تجارب سابقة في المناهج الالكترونية في السودان لم تجد حظها من الدعم اللازم لتوصيل المعلومة الكترونيا لكل باحث عنها
وطبعا هذا الاتمتة والتقنية لتغني عن الكتاب الورقي بل توازي تطوره ونموه.
مع فائق ودي وتقديري


..
كسرة: نفتقد لكتابات الاستاذة مريم، ولا أجد أفضل من هنا لأنقل لها التحايا عبرك والشكر على ما قدمت من دعم ومناصحة.

شكرا لك اخي عمر التاج
الفكرة والتنفيذ لشخصي الضعيف
مع وافر الاحترام للاستاذ الفاتح جبرا
التعليم الاليكتروني شي
وتحميل المناهج لبلد تضربه الكوليرا شيء اخر

تحميل المنهج