المستنير أبوبكر..

01:17 PM September, 05 2016

سودانيز اون لاين
محمد المرتضى حامد-
مكتبتى
رابط مختصر

روي عن برايانت ماكجيل قوله : الإخلاص والوفاء في قلوب الرجال أهم من النجاح
والزول دا كلامو ناقص لأنه في ظني أن الوفاء هو سنام أي نجاح غض النظر عن الجندر..
أشكر عزيزنا المستنير أبوبكر عباس فقد صدق وعده وهزم الظلمة وحده واستدعى ( الأرواح المسافرة )
متخطيا الوديان والسهول ممتعا الجسد عبر المحيطات والخلجان بممارسة الركمجة والروح عبر الأثير بالوفاء.



والله يا بكري أبوبكر صنعت شبكة تواصل فيها من الخيرين ما يكفي لإنجاز مدينة فاضله رغم الشر الينثال
تحت المقاعد وبين المراقد ويهدد الرئات والعباد.
مش قلت ليكم الأخيار كُتار ؟
محمد المشرف ، أراهن أن نسختك في الطريق،
أختنا Najma ، أقيفي في الصف..

سلام يا مولانا،
أنت تستاهل
تاني حاجة: العنوان لو خليتو المستنير بدون أبوبكر كان بكون أكثر وضوحاً.
تالت حاجة: نسخة صاحبنا دا، برسلها قطر، لكن ما ليهو هو

)تاني حاجة: العنوان لو خليتو المستنير بدون أبوبكر كان بكون أكثر وضوحاً.(

مبالغة، وكأنك تقرأ أفكاري يا هذا..
عارف يا شيخنا ، أنا كمان كنت ماشي أبعد من ذلك ، كنت سأكتفي ب (المس) بدون (تنير)
أصلو الزمن دا الناس بقت ما عندها صبر للحاجات الطويله والكتيره عشان كدا تلاقيهم شغالين:
مي، مها، كشه ، ميسي ، بشه ..إلخ،
الحياة بقت كلها ساندوتشات..
حليل المهله والسهله والناسا وناسه..

تسلم يا مس.

من زمن طويل ما قريت كلمة إطراء بحق المس خليك من بوست كامل..
نسخته التي سيرسلها إلى الدوحة غالبا تكون من نصيبي تقديرا للمجهود الذي أبذله في المنافحة عنه
وبدوري سأمرر النسخة إلى مستحقها ود المشرف
لأنو الشابين ديل متحاربين وما بتعاملوا مع بعض مباشرة

نسوي شنو يا مولانا، حركات مستنيرين.. هسي لو كانوا شماشه كان اتطالعوا الخلا وخلصوا الموضوع.. أها
أها دي "نص ضحكة" والقول للممثل العظيم يوسف وهبي وهو يسخر باللهجة المصرية من اسم مدينة قها المصرية
قال معؤول في مدينة اسمها نُصِ دحكه!!
وممكن برضو تعود إلى نصف عنوان بوستك اللذيذ داك (ههه)
غايتو يا ود المرتضى شوية شوية خلال العقد الأخير دا الواحد بكتشف سر إعجاب الناس بكتاباتك:
تصنع من الفسيخ شربات
وفي رواية أخرى من رواية لا أذكرها، هذا المعنى: انتظرَ منها مجرد ابتسامة فكافأتْهُ بنهر من الضحكات
(أوعى تكون الرواية دي موسم الهجرة، تكون عوجة)
والسلام

صدقت يا ود الزبير
المستنير الأكبر مولانا محمد المرتضى له قدرة فائقة في فتل حبال الدهشة من قصاصات المستحيل ..
أكيد الحتة دي أكتشفها في المستنير أبو بكر ..
وعلى قصة الترزي المختلس المستنير دا منه ما في في الحلم ..
المستنير أبو بكر دا يذكرني الموية المبردة في البراميل في مناسباتنا زمان لتبريد زجاج البيسبسي ..
مغرية للشراب هي نفسها في لحظات العطش القاتل
لكنها عكرة بالنشارة التي يحفظ فيها الثلج .
لا تملك الا أن تقلبها بحسرة .

لا تملك الا أن تقلبها بحسرة .
ـــــــــــــــــــــــــــــــــــــــــ

like!

Quote: المستنير أبو بكر دا يذكرني الموية المبردة في البراميل في مناسباتنا زمان لتبريد زجاج البيسبسي .. مغرية للشراب هي نفسها في لحظات العطش القاتل لكنها عكرة بالنشارة التي يحفظ فيها الثلج . لا تملك الا أن تقلبها بحسرة .

تحياتي للحبيب ود المرتضى و المِسْ

درديري يا ملك ...

من اتعس اللحظات تلك التي تصل فيها الى مكان ( المشروبات ) و تجد البرميل ( منكفئاً ) على جنبه و الثلج متناثر على النجيل او الرمل ...

Quote: المستنير أبو بكر دا يذكرني الموية المبردة في البراميل في مناسباتنا زمان لتبريد زجاج البيسبسي .. مغرية للشراب هي نفسها في لحظات العطش القاتل لكنها عكرة بالنشارة التي يحفظ فيها الثلج . لا تملك الا أن تقلبها بحسرة .

هههه ... لكن ما كتلتو كتل يا درديري

سلامات يا مولانا كيف الحال و الأحوال

درديري يا ملك ...

من اتعس اللحظات تلك التي تصل فيها الى مكان ( المشروبات ) و تجد البرميل ( منكفئاً ) على جنبه و الثلج متناثر على النجيل او الرمل ...
-------------------------------------------------

هههههههههههههههههههههه والله يا هندسة في إجازتي الفاتت حضرت مناسبة في نادي الغريبة خلف جهاز المغتربين .

في نهاية الحفل نفس وصفك دا بالظبط حصل قدامي

البرميل منكفي في النجلية

وقطع الثلج متناثرة

والحر يلهب ليلا

أحسن حل تقف حافيا على قطع الثلج

فتبرد بها عروق رأسك

يا اخوانا والله الزول ده خالي نكهة وبتاع ملاوزات ساكت ...
اقولها بكل حكمة تواترت عن ارواح اشياخي العركيين وتلبستني بمنتهى الزهو والاعتداد ذات صرخة ميلاد مجيد..
وما كنت الفرد الصمد ولا روح الأزل ولكن , تتطلسمت فيني المعاني
وانبتتني محنة الوجود فاكهة للحكمة وسمسما وسيم ..

مولانا وجملة المستنيرين الصحاح هنا ..
تعلمون ان نهاية العالم ليست خلف خلاف عابر ..
الأشياء تبدو أكثر قربا من الحقيقة كلما ابتعدنا عنها .. أكثر حميمية كما أظن ..
ذلك سر التأريخ وسحره . وآخرها ليست كومة من تراب كما يروج مدعي الحكمة المافيشة ..
شيء ما سيبقى حتما ..
فليكن, اذن, شيئ جميل..

قد لا يكون خالي نكهة على اية حال ..
بيد انه بتاع ملاوزات على اقل تقدير !!

من زمن طويل ما قريت كلمة إطراء بحق (المس)

تحياتي للحبيب ود المرتضى و (المِسْ)

ههه ،

عُمِّدت واعتُمدت وتم تطويبها من قِبَل أعمدة وبابوات المنبر..

الله أكبر

-

يا مس ، قباني براهو عمل التشكيل دا..

حتى لا يساء الفهم

خلوني أعبر بطريقة ثانية بعد أذن مولانا

المستنير عنده ميزات ثلاثية نادرة ينشدها كل المبدعين

وهي السلاسة في السرد

والعفوية

ثم التلقائية أي الأرتجال

وهذه الميزات عرف قيمتها كل المبدعين في شتى المجالات من يقدم أبداعا لقراء أو مزيع لمستمعين أو الشعراء والممثلين وغيرهم . وأصبحت مدرسة قائمة بذاتها

في التمثيل على مستوى العالم العربي عرف بهذه الميزة الراحل أحمد ذكي .. والممثلة عبلة كامل ومن جيل الكبار حسن حسني ..

ومقصود أن الانسان يكون كما هو دون تكلف يجعل دواخله تخرج أبداعها بدون غربلة ..

حتى شركات العصائر والكافتريات عرفت أن هذه ميزة وأصبحت تعلن أن عصائرها مع الحب واللب أي بدون غربلة ..

لكن المستنير تاركنا جارين خلف هذه الملكة ننتظر سرده

وهو مشغول في التداخل ومناكفة الآخرين في مواضيع ليس له فيها مما يعكر علينا الاستناره بما يتعرض له من ردود فتشبه موية تبريد البيبسي التي جرى ذكرها .. مغرية ولكن لا تصلح للشرب .

وبس

وملحوطة أخيره هذه المادخلة تقرأ ممزوجة مع بوست معاوية الزبير عن الألحاد المدغمس للمستنير

لكن ترج جيدا قبل الاستعمال

حتى تعم الفائدة

Quote: لكن ترج جيدا قبل الاستعمال

أنا غايتو جغمتها بي نشارتها
الفهمتو منها : ابوبكر لذيذ وكتاب لكن معاااااااااط




_____________
عشان تاني تكتبو وسط العنقالة

افسدتها يا درديري
ياخ بالغت وابدعت
عندي تعليق خطر بي ذهني لامن قريتها قربت اكتبو ثم تراجعت
خفت يلصق وبكري يزعل
مثل تشبيهك دة لا يتأتي بي اخوي واخوك
نكتو من وين وكيف تداعت لي الذكري السحيقة

مولانا محمد المرتضى سلام وتحية 👐
واقفة في الصف انا ومنتظرة الرواية 😂😂😂كنتة مستنياها تصل بالDHL😤

وحات شنو كدا يا أبسن، ما بزعل
قولو التشبيه خليهو يلصق
عليك عرقي الرديف تقولو

هههه صعب يا بكري
ياخ
اشكرك والله
تعرف عرقي الرديف انتهي زماااااان ظهر عرقي جديد
صار في اطراف المدينة مع خدمة التوزيع بالركشات . تستلم زي البيتزا

(وبدوري سأمرر النسخة إلى مستحقها ود المشرف
لأنو الشابين ديل متحاربين وما بتعاملوا مع بعض مباشر)

عارف يا ودالزبير، وفقا لذاكرتنا لايمككنا رسم راكيل ويلش و ب ب في
دور الراهبه..عشان كده لا يمكن لخيالي حتى لو كانت مجنحة مثنى وثلاث
تصور المشرف والمس جلوسا على أرصفة الزعل. خليهم يشوفوا
ليهم دور تاني، حتى لو استشاروا صوفيا لورين..
كما قال أحدهم، التسامح أعلى درجة الثقافة..

لكن دا حصل وين يا معاويه؟
ياخ موسم تنزيلات زي دا يفوت وما تناغمني؟

هههه

(انتظرَ منها مجرد ابتسامة فكافأتْهُ بنهر من الضحكات)

(لا تملك الا أن تقلبها بحسرة )

(وما كنت الفرد الصمد ولا روح الأزل ولكن , تتطلسمت فيني المعاني وانبتتني محنة الوجود فاكهة للحكمة وسمسما وسيم ..)

(عليك عرقي الرديف تقولو )

شايف صدى خيرك ؟
والله يا المس كتابك أغدق أيادي الإحسان علينا بما لاقِبَل لنا به فجودك تبعه شلال المستنيرين كما ترى
ولعمري لمثل هذا تُصنع المنابر يا بن معديكرب.

-

(فأحسن وجه في الورى وجه محسن .. وأيمن كف فيهم كيف منعم)

واقفة في الصف انا ومنتظرة الرواية 😂😂😂كنتة مستنياها تصل بالDHL😤

نجمتنا سلام..
ستاتيك الأرواح المسافرة حتى تغرقك إنصافا زي ما قال عبدالرحمن الريح..
إن كنت فهمت كلام المس محمولا على حسن سجاياه فهو لاشك باعث بنسخة لودالمشرف
فجرير معني بالفرزدق بدءا والأخطل انتهاءا في صف الهجاء والرغيف..
وطالما الشاب القيافه المشرف هناك فلن يطول وقوفك على الطلول.
أرقدي عافيه ..

يا نجمّة، لي كم يوم أترصد زقاقات الكتابة عشان أعرفك قاعدة وين؟
قاعد أمني نفسي انك تكوني في بلادا يصلها ساعي البريد
المهم، بعد شفتننات كتيرات عرفناك وين
وأصلا باقيات نسختين واحدة كتبت فيها:
نحمّة نجمّة الليل نعدو
أخوك أصلا البنات ديل ما قاعد يرفض ليهن طلب
لمان دينا جاتنا لدبي؛ أخدت ليها إجازة محلية، وقبل ما تتم أمانيها؛ تلقاني متكبكب وجايب ليها طلباتها
فشنو؟
لو دايرا أي حاجة مع الكتاب دا أحسن تستغلي بتاع الصيدلية

قالوا، واحد دخل ليهو صيدلية، لقى الدواء بتراب القروش، قال للصيدلي:
عندكم بناطلين؟

أيها العضو القدير والقلم المنير د.ابوبكر عباس يسعدني و يشرفني أن أزف إليكم أجمل معاني الشكر والثناء مغلفة بأريج الزهور وعبق العطور🌸🌹🍀
سيدي الكريم ادهشنى كرمكم فعجزت عن شكركم شكرا لاهداءك لشخصنا الضعيف نسخة من الرواية مزينة باهداءك
يااخ احساس جميل ان امتلك نسخةمن الرواية
كفانى الرواية الصيدلية مااظنى دايرة اشترى منها حاجة 😅😅😅
مولانا محمد الجميل ان تشوقنا لقراءة الرواية والاجمل كرم المستنير في ان تكون احدى النسخ من نصيبي شكرا ليك مولانا
وفي انتظار وصول ساعى البريد