عزيزي المغترب امسك دولارك عليك لا ينشلك الكيزان

07:33 PM September, 04 2016

سودانيز اون لاين
abubakr salih-
مكتبتى
رابط مختصر

هنالك تلاعب يتم هذه الايام باسعار الدولار من قبل عصابة الكيزان. السبب الرئيس لانهيار العملة السودانية هو قيام بنك السودان بطبع عملات بلا تغطية حقيقية لها و يتم استخدام هذه العملات فى شراء الذهب من الناس العاملين فى التعدين الاهلي و غيره. بنك السودان يحتكر تصدير الذهب يحصل علي عملات صعبة لتغطية حوجة الحكومة المختلفة من العملات الصعبة (الحكومة تحتاج لعملات صعبة لاستيراد القمح، الادوية، الاغراض العسكرية المتخلفة، الامن، الرشاوي الخ). و يترك بقية الموردين للشراء من السوق الاسود. كل ما طبع بنك السودان عملات اضافية من دون غطاء حقيقي كل ما زاد عرض العملة السودانية فى السوق و تهاوت قيمتها (التضخم هو زيادة الكتلة النقدية). الفرق بين سعر الدولار فى السوق الاسود و سعره فى البنك يمثل تقريب جيد لحجم التضخم في البلاد، الان التضخم يفوق الــ 50%.

كالعادة هذه الايام يحاولون السيطرة و التلاعب بالاسعار عن طريق الاشاعة. هذا السيناريو مكرر بحذافيره. حكومة الكيزان من اغرب الحكومات فى العالم و هى فى الحقيقة عصابة اكثر من انها حكومة. لانها تتصرف بالضبط تصرف العصابات و تطلق الاشاعات لتضليل الناس و التلاعب بالاسعار فى الاسواق. تخرب الاسواق باغراقها بالعملة المضروبة (طباعة العملة بهذا الشكل لا تختلف عن عملية تزوير العملة) و من ثم محاولة السيطرة على السوق بنشر الاشاعات بدلا عن الاجراءات الاقتصادية!

عزيزي المغترب: امسك دولارك عليك هذه الايام حتي يعود السعر الحقيقي. هذا المال انت تتعب و تتغرب من أجله فلا تدع اللصوص المتسربلين باسم الدين ينشلوك!

سلام أبوبكر،

الحاصل الأيام دي هو البيعمل فيهو ود الباوقة كل يوم
الفرق إنو المرة دي الحكومة هي القالت كع .... إنبهلت.

أنا ما إقتصادي، بل بعيد كل البعد عن لغة الأرقام والإقتصاد، لكن ....
لما واحد يقول لي الدولار سعرو إتراجع (الصحيح الجنيه هو السعرو إرتفع)، بسأل سؤال بسيط ... الحصل شنو؟ هل في إنتاج يدعم الخزينة العامة؟ هل تم اكتشاف موارد طبيعية جديدة دعمت الإقتصاد؟
لو مافي إنتاج أو زيادة في إنتاج، يبقى خبر الجريدة زي بوستات ود الباوقة.

Quote: أنا ما إقتصادي، بل بعيد كل البعد عن لغة الأرقام والإقتصاد، لكن .... لما واحد يقول لي الدولار سعرو إتراجع (الصحيح الجنيه هو السعرو إرتفع)، بسأل سؤال بسيط ... الحصل شنو؟ هل في إنتاج يدعم الخزينة العامة؟ هل تم اكتشاف موارد طبيعية جديدة دعمت الإقتصاد؟ لو مافي إنتاج أو زيادة في إنتاج، يبقى خبر الجريدة زي بوستات ود الباوقة.

سلام يا محمد،
طبعا ود الباوقة معذور، مرفوع عنه القلم. لكن الحكومة زاتها زيو كده. هسة شايف بروجوا فى اشاعة قالوا بنك السوق ح يوقف احتكاره لتصدير الذهب و يتركه الشركات تبيعه علي كيفيها و تضخ القروش فى السوق الموازي و تسقيهو دولار. طبعا دا كلام هبود ساكت لسببين. السبب الاول هو اذا تركوا الشركات ح تبيع و تلبد القروشات في الخارج لانو مافي زول عاقل برجع قروش ضخمة لاقتصاد منهار مثل اقتصاد السودان. السبب التاني هو انو الكلام من الاساس هبود لانو بنك السودان لمن دخل و احتكر تصدير الذهب لم يفعل ذلك فنكهة و قلة شغلة ساكت عشان يجي هسة يطلع بمزاجه. دخل عشان يقلع الدولار الجاي عن طريق الدهب و يغطي بيهو حوجات حرجة تخص حكومة السودان، مثلا الدقيق و الاغراض العسكرية و البعثات الدبلوماسية و السفر للخارج و رشاوي احتياجات جهاز الامن الخ. زمان لمن كان في بترول بنك السودان لم يحتكر الذهب لانو عنده دولار كافي من البترول. بعد ذهاب البترول دخلوا على احتكار الذهب. المصيبة التالتة انهم ما بيشتروا الدهب زاتو بقروش حقيقية، قروش من مداخيل الحكومة لانها مفلسة. بيطبعوا فى قروش ساكت و يمشوا السوق يشتروا بيها دهب (تزوير عملة).

سمعت إن حكومة الديكتاتور البشير
أنهت أو بصدد إنهاء إحتكار بنك السودان
لشراء الدهب من المعدنين
وهو قرار لو صح
في مكنته رفع سعر العملة المحلية
في مقابل العملات الصعبة
لكن بالمقابل ستفقد الحكومة مصادر دخل
هي بأشد الحوجة لها
(سفسفة وصرف علي الأمن مش خدمات للمواطنين )
الحكومة مخيرة بين زيادة دخلها وسؤ صحة الإقتصاد السوداني
أو نقصان دخلها وتحسن ولو طفيف في صحة الإقتصاد السوداني !!!!

ياربي الحكومة حتختار شنو؟؟؟؟؟؟؟

Quote: سمعت إن حكومة الديكتاتور البشير أنهت أو بصدد إنهاء إحتكار بنك السودان لشراء الدهب من المعدنين وهو قرار لو صح في مكنته رفع سعر العملة المحلية في مقابل العملات الصعبة

يا نصر كيف ممكن يرتفع سعر العملة المحلية اذا طلع بنك السودان؟ كمية القروش الداخلة البلد من العملات الصعبة ثابتة و الحوجات للعملات الصعبة ياها زاتها. يعني طلع بنك السودان و افترضنا انو الشركات البتبيع الدهب اعادت الدولار للسوق الاسود من مبيعاتها حقت الدهب فى الخارج (رغم انه دي فرضية مستحيلة) معناه بنك السودان ح يعجز عن توفير الدولار للقمح و الادوية و الاغراض العسكرية و الامنية المختلفة. ح يمشوا يشتروا حوجاتهم للدولار من السوق الاسود؟ دا بيخلق طلب على الدولار و معناة كانك يا ابو زيد ما غزيت.

اخبار عن عودة الدولار الي سعر 16 الف جنيه مساء اليوم.
ملعبة، احتمال يكونوا تلاعبوا بالدولار عشان دايرين يعوضوا شيخ صابر قروشه التى اخذها الفقراء.

صديقنا النجيري
كيف الصحة

أمس انخفض سعر الدرهم الاماراتي

في أشاعة أنو ناس الامن ضاغطين تجار العملة ضغط شديد

Quote: صديقنا النجيري كيف الصحة أمس انخفض سعر الدرهم الاماراتي في أشاعة أنو ناس الامن ضاغطين تجار العملة ضغط شديد

حباب الشامي، لك التحيات الطيبة
التجار تجارهم هم. مافي زول يقدر يشتغل تجارة عملة اذا ما كان مرتبط بيهم، لانهم زمان ارهبوا الناس و قتلتهم فى شوية دولارات. لمن يتلاعب بالسوق الناس تمسك قروشها بس. لمن الناس تمسك قروشهم عليهم السوق بينشف و بيرجع للسعر الحقيقي في لحظات. هم الاحوج دولار المغتربين و ليس العكس. حتي الزول لو محتاج لمصاريف سريعة، ممكن شوف طريقة يدبر اموره ان شاء الله يدين من سيد الدكان. لانو الفرق كبير سعر العملة السودانية الحقيقي (قوتها الشرائية فى السوق) و بين السعر الذي يتلاعبون به هذه الايام. في الالف ريال سعودي الناس خسرت مليون بعد تلاعبهم بالاسعار. و الهبود حقهم قيمته نازلة، وكت تشيلوا السوق ما بجيب شئ.

سلامات يا بكور
ياخي إنت ختيت يدك في جرح كبير خلاص

موضوع الإقتصاد والسياسة النقديه في دوله زي السودان
من سابع المستحيلات نجاح أي خطة في ظل وجود هذه العصابة
من الصعب إنجاز أي إصلاح في ظل وجود نراكز القوة حول السلطة
جهاز الأمن / طبقة الإنتهازيين من الإسلاميين/ المليشيات العسكريه والمرتزقه
ديل كلهم تتقاطع مصالهم مع إصلاح الإقتصاد في السودان ....

في نقطة ثانية مهمه جدا .. الدولار تحول الي سلعه تجاريه وسلعة مضارية
زيه ويه أي سلعه ثانية .. والكيزان إحتكروا تجارة الدولار .. في بلد زي السودان
فيه أكثر من 5 مليون مغترب ودا حيوفر سوق رائجه من حيث العرض والطلب
أي دولار تحوله للسودان غصب عنك حيمر عبر مافيا الكيزان
عشان كدا دا موضوع من الصعب نهايته الا بسقوط هذه الحكومة
حتي اذا هم زاتم قنعوا وعاوزيـن يوقفوا التجاره دي ما حيقدروا ...
الحل هو تغيير هذا النظام برمته حتي يستثني إصلاح الإقتصاد

يا أبوبكر
"يا نصر كيف ممكن يرتفع سعر العملة المحلية اذا طلع بنك السودان؟ كمية القروش الداخلة البلد من العملات الصعبة ثابتة و الحوجات للعملات الصعبة ياها زاتها. يعني طلع بنك السودان و افترضنا انو الشركات البتبيع الدهب اعادت الدولار للسوق الاسود من مبيعاتها حقت الدهب فى الخارج (رغم انه دي فرضية مستحيلة) معناه بنك السودان ح يعجز عن توفير الدولار للقمح و الادوية و الاغراض العسكرية و الامنية المختلفة. ح يمشوا يشتروا حوجاتهم للدولار من السوق الاسود؟"

الحكومة ممثلة هنا في بنك السودان
هي خصم وحكم في العملية الإقتصادية المعنية
والتي هي شراء الذهب
وهي لا تدع قوي العرض والطلب تعمل بحرية في السوق
الحكومة تتدخل وتفرض سعرا جزافيا للدهب وأعتقد أنه بالعملة المحلية
وفي ذلك ظلم وتعطيل للعمليات الاقتصادية المرتبطة بالدهب والإقتصاد عموما

بمعني آخر
عملة أي دولة تتقيم بإنتاجها
وإذا كان إنتاجنا في الوقت الجالي هو الدهب
فكل ما وصلت اسواق العالم كمية منه كلما نهضت العملة المحلية
ولكن تدخل الدولة كمشتري وحيد يعطل هذه الميكانيزمات
خاصة لو علمنا أن الدولة تصرف أكثر ما تصرف علي السلاح
والأمن والصرف البذخي للحاكمين
تصرف علي ما يضر الإقتصاد لا ما ينفعه

منتجو الدهب لو لقوا فرصة وحرية حركة وشوية عدل وحماية وخدمات
ربما أسهموا في دفع عجلة الإقتصاد بإنفاقهم هم أولا
وبالدخل الذي يعود علي المنتجين ( لا الحكومة) ثانيا

بنك السودان هو أداة حكومة الحرامية
وهم ذاتهم تجار العملة الكبار
ويستغلون قرارات البنك لمصلحتهم الذاتية لا مصلحة البلاد وإقتصادها

ودا (رفع أيديهم من شراء الدهب ) ما حيحصل أبدا
بس الفيهم إتعرفت