من مثيرات الغبن و الحنق و الحزن كمان فى بلدنا، حصول انصاف وارباع المغنيين واشباه الفنانين على كل شى و اى شى بريق اعلامى و ظهور مكثف و اهتمام مبالغ فيه من وسائط الاعلام كلها بمختلف انواعها، ويا ريت ده كله كان مقابل مردود ابداعى و عطاء فنى حقيقى والنماذج كتيره و الامثلة عديدة
وفى المقابل قناعة مطربين و فنانين حقيقيين بمعنى الكلمة وبكل مقومات الخلق الجميل و الابداع الأصيل، قناعتهم من غنيمة الفن بالإياب وإياب هم فيه خالين الوفاض من كل شى ولو فى الحد الأدنى
على رأس ديل مطرب جميل وصوت اخاذ و مؤدى بارع اسمه عثمان الأطرش
مطرب بمعنى الطرب و الله وواحد من اسمح الأصوات فى غنانا
لكن وللأسف الشديد ما لقى ولا حتى مجرد التقييم المعنوى و الإهتمام المطلوب اولا من وسلئل ووسائط التشر و الذيوع و البقت فى زمنا ده هى المحرك الفعلى و الناشر الحقيقى لكل عمل فنى
حالة عثمان الأطرش قريبة جدا و مشابهة لحالة المبدع الآخر و الراح فى غياهب النسيان و الاهمام اللهم الا عند نفر قليل وقليل جدا من عشاق الأصوات الطروبة و هو ابراهبم موسى أبا
عثمان الأطرش انسان بسيط لدرجة مبالغ فيها و متواضع حد الحد وربما يكون من نوعية الناس الما مدركين لحجم وقيمة ما يمتلكوه من كنوز ابداعية ما متوفره عند غيرهم واعيب عليه شى واحد وهو الانزواء بعيدا وعدم السعى لمواصلة واستمرار ابداعه بالبحث عن نصوص شعرية متنوعة ومن شعراء جيدين و متمكنين وملحنيين و موسيقيين مقتدرين عشان ما يضيع صوته الفريد و اداءه العالى
عثمان الأطرش نجم وهاج لكنه بعيد و فى اغوار قصية
تحية ليك يا عثمان وين ما كنت
وتأكد يا فنان انه عندك ناس عاشقين لصوتك البديع وحافظين حقك فى الصميم
وكل التقدير و الاجلال و المحبة ليك يا زول يا مطرب
Post: #2 Title: Re: عثمان الأطرش --- النجم البعيد Author: اباذر عبد العال Date: 08-29-2016, 03:03 PM Parent: #1
وين يا حبيب السلام عليكم ورحمة
كيف اخبارك..يا مبدع
Post: #3 Title: Re: عثمان الأطرش --- النجم البعيد Author: الامين محمد علي Date: 08-29-2016, 03:12 PM
أولا : يا سلام عليك انت البتتذكر فنانين زي عثمان الأطرش...
و يا سلام على الأطرش صاحب اجمل الأغاني والالحان والأداء..
بعد الليالي المرة ديك** في انتظاري العشتو مر عليك حناني تعيدني تاني ليك أعيش باقي العمر...
فنان كبير وقدر اشتر ودنيا قسمتها ضيزي..
يا ريت لو في واخد انزل اغنية (( بعد الليالي))
Post: #5 Title: Re: عثمان الأطرش --- النجم البعيد Author: أبوذر بابكر Date: 08-29-2016, 04:01 PM Parent: #3
تحياتى با الأمين
وشكرا على تشريفنا بحضورك ياخ
الاطرش فنان حقيقى و الله بس زى ما قلت انت الدنيا موازينها كلها بقت مقلوبة
اغنية بعد الليالى عمل بديع و ساطع و باهر
وبالمناسبة دى الاغتية الفاز بيها الاطرش فى المركز الاول فى مهرجان الثقافة التالت لو ما تخونى الذاكرة
شكرا ليك تانى
Post: #4 Title: Re: عثمان الأطرش --- النجم البعيد Author: أبوذر بابكر Date: 08-29-2016, 03:50 PM
ازيك يا اباذر
كيف الحال
عليك الله العاجبك فى الاسم المزالف ده شنو ؟
هههههههههههه
يمشى وجده و يعيش وجده و يموت وحده
اخبارك شنو
Post: #6 Title: Re: عثمان الأطرش --- النجم البعيد Author: hassan bashir Date: 08-29-2016, 05:08 PM Parent: #4
الأخ أبو ذر بابكر
يا سلام على عثمان الأطرش المطرب المظلوم وأحد أجمل الأصوات في السودان قاطبة.
فاز عن جدارة واستحقاق بجائزة ليلة الواعدين في مهرجان الثقافة متفوقاً على أسماء معروفة مثل الراحل مصطفى سيد أحمد (الشجن الأليم) والخالدي (اتعودنا من ريدها) وتاور (منو القال ليك) والراحل الأمين عبد الغفار (أشيل الريد) وغيرهم.
الله لي وصولك يهون
Post: #7 Title: Re: عثمان الأطرش --- النجم البعيد Author: أبوذر بابكر Date: 08-30-2016, 10:26 AM Parent: #6
تحية و سلام الأخ حسن
تهافت الإعلام على أشباه الفنانين و المتغولين على الفنون هو السبب فى أنزواء واختفاء أصحاب المواهب الحقيقية الجميلة
لكن فى النهاية سيذهب الهباء ويبقى البهاء
Post: #8 Title: Re: عثمان الأطرش --- النجم البعيد Author: عمر السلمة Date: 08-30-2016, 12:29 PM Parent: #1
شكراً ليكم كتييييييير والله
Post: #9 Title: Re: عثمان الأطرش --- النجم البعيد Author: أبوذر بابكر Date: 08-30-2016, 04:53 PM Parent: #8
الشكر ليك انت يا عمر
و للاطرش
للمطرب الاصيل الجميل
Post: #10 Title: Re: عثمان الأطرش --- النجم البعيد Author: أبوذر بابكر Date: 08-30-2016, 04:55 PM Parent: #8
عذرا
مكرر
Post: #11 Title: Re: عثمان الأطرش --- النجم البعيد Author: Osman Dongos Date: 08-30-2016, 05:34 PM Parent: #10
الفضلاء أبو ذر بابكر و ضيوفه، السلام عليكم،
حقيقة إنقلبت الموازين و قل الوفاء في هذا الحين الأغبر من الدهر. مبدعون زي عثمان الأطرش ذو الريشة الرقيقة الخفيفة و الصوت الشجي و الأداء المتميز لإنتاج فني حقيقي يملكه، لا يجدون أي تقدير و لا لمحة وفاء. و أصحاب و صاحبات الغث من الموسيقى الغناء ملئ السمع و البصر.
لكم الود، عثمان دنقس
Post: #12 Title: Re: عثمان الأطرش --- النجم البعيد Author: عبدالعظيم عثمان Date: 08-30-2016, 06:44 PM Parent: #11
سلامات يا أبو ذر يا فنان" صائد المبدعيـن "الفنان عثمان الأطرش فنان كبير
Post: #14 Title: Re: عثمان الأطرش --- النجم البعيد Author: أبوذر بابكر Date: 08-31-2016, 09:33 AM Parent: #12
العزيز الأخ عبد العظيم
كيف الحال و عساك بخير
الأطرش مبدع متفرد بالجد لكن نقول شنو مع عدم الذوق والتذوق والمعرفة المالى البلد
شكرا ياخ على الهدية السمحة
Post: #13 Title: Re: عثمان الأطرش --- النجم البعيد Author: أبوذر بابكر Date: 08-31-2016, 09:08 AM Parent: #11
تحياتى يا دنقس
ما جديد على الناس الماسكين الإعلام وأجهزته انهم يهملو ويجهلو قدر و معنى أصحاب الفن الأصيل الحقيقى و الجميل بقو جارين خلف انصاف وأرباع المواهب الضعيفة لكن فى الآخر ح يبقى الشى الحقيقى فعلا ويتلاشى الغثاء
شكرا ليك على الحضور و المشاركة
Post: #15 Title: Re: عثمان الأطرش --- النجم البعيد Author: محمد فضل الله المكى Date: 09-04-2016, 07:31 PM Parent: #13
واعيب عليه شى واحد وهو الانزواء بعيدا وعدم السعى لمواصلة واستمرار ابداعه بالبحث عن نصوص شعرية متنوعة ومن شعراء جيدين و متمكنين وملحنيين و موسيقيين مقتدرين عشان ما يضيع صوته الفريد و اداءه العالى. ............................................................................... ( نزار ابوبكر ) . بابتسامة واسعة على وجههه ، استقبلنا الفنان عثمان ( الأطرش ) أمام داره بسورها غير المكتمل بمنطقة ( صالحة ـ جادين ) ثم أصرَّ والفرحة تتدفق من وجهه على ان ندخل لنرى غرفته الجديدة الوحيدة بالمنزل التي استطاع اكمالها الجمعة الماضية ، وبالتالي انتقلت إليها زوجته السيدة نعمات عوض ـ الكريم من العريشة المسقوفة بالزنك لترتاح من عناء خمسة سنوات قضتها تحتها !! بين حرٍ لاهِب وشتاءٍ قارِس !! ....من زيارة لجريدة ( حكايات ) ولقاء مع عثمان الأطرش .... الأربعاء 18 / 11 / 2015 . العزيز نزار ابوبكر لم أورد كلامك عن فنان تحبه وعتبك عليه لغيابه عن الساحة وذلك لفرط احترامك له وتقديرك لإمكانياته الفنية ... ولكن قصدت أن تجد له العذر !!!!!! من خلال يوم في حياته دون أن أتعرض للمقابلة بكاملها فهي محبطة إن لم تكن مأساوية : . ....................... يوم في حياة عثمان الأطرش ........................ * زوجته المعلمة السابقة والمربية الفاضلة أصيبت بالشلل منذ 13 عاماً حيث لزمت السرير .. ويسكنان حيث لا ثالث لهما في المنزل آنف الذكر . . * يصحو عثمان باكراً وبعد أن يؤدي صلاة الصبح يقوم بغسل ملابس زوجته وملابسه ، ويقوم بكل واجب حيال زوجته ( دون شرح ) . مطبقاً كل القيم والفضائل التي تغنى بها في ( بت بلدي ) و ( يا والدة يا أمي ) . . يقوم عثمان بعمل طعام الإفطار والشاي ويجلس بجوار زوجته يؤانسها ويطعمها . ويسقيها ، ويشرب معها الشاي ... ثم يخرج ليتسوق بعد أن تأتيها إحدى جاراتها الوفيات ، فيعود عثمان سريعاً ليصنع الغداء . . * دائما يأمل أن تكون الحفلات التي يحييها قريبة حتى يبقى حتى صلاة العشاء لتبقى احدى الجارات مع زوجته ليعود إليها سريعاً ، فهو لا يبتعد عن زوجته إلا لضرورة ، وبعد حضور إحدى الجارات لتؤانسها. . * أظنك قد وجدت العزر نزار لفنانك الإنسان عثمان الأطرش الذي ضرب مثلاً لكل قيم الوفاء والإخلاص لزوجته الفاضلة والمربية التي كانت مِلأ السمع والبصر فسقطت فجأة مشلولةً فلم يتخلى عنها ولم يتركها حتى لآهلها ليقوموا بخدمتها وآثر أن يخدمها بنفسه تقديراً للعشرة الطيبة والحب الذي كانت تكنه له ويكنه لها .. . * ذلكم هو الفنان الإنسان عثمان الأطرش . . لك التقدير نزار
Post: #16 Title: Re: عثمان الأطرش --- النجم البعيد Author: أبوذر بابكر Date: 09-05-2016, 08:32 AM Parent: #15
تحياتى يا محمد المكى
فعلا شى مؤلم ومحزن والله معاناة مبدعينا الحقيقيين وتعبهم ومكابدة قسوة الظروف والحياة فى بلدنا بدون اى التفاتة من أقرب الجهات الفنية ناهيك عن عناية الدولة بيهم وهم كتار بالمناسبة وأتذكر قبل فترة انا برضو كتبت عن معاناة الشاعر المتفرد محجوب سراج
وفعلا ممكن الزول يلقى لعثمان الأطرش العذر فى ابتعاده وقلة إنتاجه بعد ما عرفنا منك كتر خيرك ظروفه واحواله
نسأل الخالق القدير يلطف ب الأطرش ويعينه ويديه حسب نيته الطيبة وأخلاقه النبيلة وفنه الجميل
وشكرا تانى ليك يا محمد
Post: #17 Title: Re: عثمان الأطرش --- النجم البعيد Author: Ashraf El Bagir Date: 09-06-2016, 06:35 AM Parent: #16
التحية للفنان الانسان عثمان الاطرش
وبرضو ما ننسي المبدع المنسي اعلاميا والنجم البعيد ايضا - الفنان احمد شاويش .. بتذكرك وقت الكلام يصبح صعب. قمة الابداع
Post: #18 Title: Re: عثمان الأطرش --- النجم البعيد Author: أبوذر بابكر Date: 09-06-2016, 06:47 AM Parent: #17
تحية و سلام يا أشرف
وكل المحبة والتقدير للأطرش الفنان السمح
أحمد شاويش حالة خاصة فى غنانا ما بشبه الأنفس بس و شاويش شاغلاه الوظيفة فى الإذاعة وماخده وقته كله وبرضو بعانى من مرض السكر اللعين
قبل فترة انا اديت شاويش خمسة نصوص شعرية عشان يحاول تلحينها لو كانت ممكن تنفع تتغنى وفعلا وعدنى انه يبدأ فيها وقال لى بالحرف الواحد أنها دايره ليها قعده وهجسه لكين وين ألقاها
Post: #19 Title: Re: عثمان الأطرش --- النجم البعيد Author: أبوذر بابكر Date: 09-06-2016, 06:47 AM Parent: #17
تحية و سلام يا أشرف
وكل المحبة والتقدير للأطرش الفنان السمح
أحمد شاويش حالة خاصة فى غنانا ما بشبه الأنفس بس و شاويش شاغلاه الوظيفة فى الإذاعة وماخده وقته كله وبرضو بعانى من مرض السكر اللعين
قبل فترة انا اديت شاويش خمسة نصوص شعرية عشان يحاول تلحينها لو كانت ممكن تنفع تتغنى وفعلا وعدنى انه يبدأ فيها وقال لى بالحرف الواحد أنها دايره ليها قعده وهجسه لكين وين ألقاها