Post: #1 Title: لم يتذكر منها سوى قول المطرب ( مساء الخير يا أمير ) ... Author: يحي قباني Date: 08-29-2016, 05:33 AM Parent: #0
05:33 AM August, 29 2016 سودانيز اون لاين يحي قباني-فى الدنيا العجيبة مكتبتى رابط مختصر الفرق عندي بين القراءة .. و إعادة القراءة ...
اما القراءة فهي عندي كما الصلاة ... و إعادة القراءة عندي كسجود السهو ...!
لذلك اعيد قراءة الكتب كثيراً .. و اتعلم في كل مرة ... ان كلما مضى بنا العمر ... ننظر الى الأشياء بعمق أكثر ...
بين يدي كتاب خفيف الظل ... رغم الم كاتبه و حزنه الشديد على فقد صاحبه ...
قرأت الكتاب اكثر من مرة منذ سنوات بعيدة ...
و لكن شاءت الاقدار مؤخراً ان تجمعني ( عبر الواتساب ) مع أبناء دفعتي ( العجيبة) في الخرطوم الاميرية ...
تلك الدفعة التي انجبت افذاذ ننحني لهم احتراماً ...
من ضمن الدفعة كان الاديب الاريب الفنان الدكتور حسن قطبي ...
منذ طفولتنا و حسن قطبي و العزيز نادر مصطفى المهدي من عشاق الادب و الفن ...
أرسلت للدكتور حسن قطبي نسخة الكترونية من كتاب البروف علي المك ( عبد العزيز أبو داود )
و طلب مني حسن إعادة قراءة الكتاب ... فقد قرأه هو 10 مرات ...!!
و قد كان ...
اترككم مع هذا الاقتباس الى ان اعود لنبحر سوياً في يم ( أبو داود ) ... و غناء أبو داؤود ( الاستعماري )
كتب البروف علي المك و يحكي عن عبد العزيز :
و مرة ذهب الى إلى عطبرة فسمع مطرباً مغموراً يغني أغنية بهره لحنها لم يتذكر منها سوى قول المطرب ( مساء الخير يا أمير ) ... و لكن اللحن استقر في حنجرته فلا يبرحها ، و حين لحظ المغني إنصات عبد العزيز المركز ، شعر ان الرجل بسبيل أن يختطفها و يستعمرها فامسك عن الغناء ، و لكن قضي الأمر ، استقر اللحن في ذهن عبد العزيز ، بقي النص ، ليست هناك مشكلة سافر عبد العزيز الى شندي ، و حمل قضيته لمؤلف الأغاني علي إبراهيم خليل ، و أسمعه اللحن و كانت الكلمات ، بعضها ( عار الصيد منك عيون ، أهدت ليك البانة لون ) ..
و اذا عدتم ... عُدنا :) ...
Post: #2 Title: Re: لم يتذكر منها سوى قول المطرب ( مساء الخير ي Author: بشير حسـن بشـير Date: 08-29-2016, 05:40 AM Parent: #1
. . . مساءك خيراً انت أيها الأمير . . . . . .
Post: #3 Title: Re: لم يتذكر منها سوى قول المطرب ( مساء الخير ي Author: محمد أبوالعزائم أبوالريش Date: 08-29-2016, 07:15 AM Parent: #2
كان داير ترجى آخرة ابوداؤود و علي المك ... واطاتك صبحت ...
ديل ما عندهم حد ...
بعدين دي ياها الرواية العرفناها من يوم ما فهمنا نسمع غنا ...
هل عندك رواية أخري ... ؟
Post: #5 Title: Re: لم يتذكر منها سوى قول المطرب ( مساء الخير ي Author: Fatima Alhaj Date: 08-29-2016, 12:46 PM Parent: #1
لم تخيب ظني ابداً أخي قباني ومساء الخير يا أمير.. " و اذا عدتم ... عُدنا " أكيد سوف نعود فافعل بنا ما تشاء.
Post: #8 Title: Re: لم يتذكر منها سوى قول المطرب ( مساء الخير ي Author: علي دفع الله Date: 08-29-2016, 02:58 PM Parent: #5
المايشترو الفنان يحيى قباني تحياتي واحترامي بالجد الاغنية دي سمعتها من ابو داؤود ومحمود عبد العزيز حا اقول ليك رايي كمستمع وليس متخصص او باحث والله محمود اداها بصورة اجمل من ابو داؤود. واتمنى انك ترفد البوست مساء الخير من اداء محمود عود فقط ... مع ودي وتقديري ..
Post: #17 Title: Re: لم يتذكر منها سوى قول المطرب ( مساء الخير ي Author: يحي قباني Date: 08-30-2016, 05:34 AM Parent: #8
Quote: المايشترو الفنان يحيى قباني تحياتي واحترامي بالجد الاغنية دي سمعتها من ابو داؤود ومحمود عبد العزيز حا اقول ليك رايي كمستمع وليس متخصص او باحث والله محمود اداها بصورة اجمل من ابو داؤود. واتمنى انك ترفد البوست مساء الخير من اداء محمود عود فقط ... مع ودي وتقديري ..
عصرت على اخوك شديد يابو علوة. :)
انا قايل خلينا مع ( التلاوة ) حقة ابو داؤود دي ...
Post: #15 Title: Re: لم يتذكر منها سوى قول المطرب ( مساء الخير ي Author: يحي قباني Date: 08-30-2016, 03:26 AM Parent: #5
Quote: لم تخيب ظني ابداً أخي قباني ومساء الخير يا أمير.. " و اذا عدتم ... عُدنا " أكيد سوف نعود فافعل بنا ما تشاء.
اختنا الحبيبة فاطمة ...
ان شاء الله ابدا ما نخيب ظنك ... :)
و لك الوعد ان افعل بكم ما اشاء دون استحياء .. :)
مش بقولوا اذا لم تستح فاصنع ما تشاء ! ههه
Post: #9 Title: Re: لم يتذكر منها سوى قول المطرب ( مساء الخير ي Author: أبوذر بابكر Date: 08-29-2016, 03:30 PM Parent: #1
اسموك يحيى لنحيا
كيفنك
عارف اتذكر فى بداية التسعينات اتلملمنا نحن كم نفر من "المرضانين" ب ابوداود ومشينا لى على المك فى دار نشر الجامعة الايام دبك الفكرة كانت انه نعمل جمعية او رابطة او حتى ان شاء الله دولة لعشاق ابوداود ضحك البروف الله يرحمه ويتقبله وقال لينا بصوته العميق العجيب داك
والله كان باريتو الزول ده واطاتكن اصبحت
ضحك وضحكنا و اتواعدنا اننا نتلاقى تانى عشان قال انه عنده سفريه قصيره و برجع
وما رجع تانى
داير اقول ليك شنو
والله يا يحيى تعرف انا بعدين فى الجنة
بكون بس متلح ليك ابوداود و برعى
الاتنين ديل بس ما داير اسمع ولا اقعد مع اى زول تانى
عليك الله قول لى اخونا على ده
يا زول استغفر ما تقول كده
الله بوديك النار
هههههههههههههه
مافى كائن بغنى زى او احسن من ابوداود
لا فى الانس ولا فى الجن
والله جد
Post: #10 Title: Re: لم يتذكر منها سوى قول المطرب ( مساء الخير ي Author: معاوية الزبير Date: 08-29-2016, 03:35 PM Parent: #9
Quote: والله محمود اداها بصورة اجمل من ابو داؤود.واتمنى انك ترفد البوست مساء الخير من اداء محمود عود فقط ...
وما تنسى كمان يا قباني ترفد لينا البوست بمساء الخير كبريتة فقط هووي يا ود دفع الله، الحاجات دي ما فيها هظار انا لو محل ابو اليا كان رفدتك إتا دا
تعديل لحذف حرف
Post: #12 Title: Re: لم يتذكر منها سوى قول المطرب ( مساء الخير ي Author: علي دفع الله Date: 08-29-2016, 04:10 PM Parent: #10
ود الزبير يا حبيب هههههه كفاية علينا رفد عرفات وفرانكلي من البوستات الباشمهندس قباني بتحمل وجهات النظر بس انت سيب التحاريش ههههه
Post: #22 Title: Re: لم يتذكر منها سوى قول المطرب ( مساء الخير ي Author: يحي قباني Date: 08-30-2016, 02:16 PM Parent: #10
Quote: وما تنسى كمان يا قباني ترفد لينا البوست بمساء الخير كبريتة فقط هووي يا ود دفع الله، الحاجات دي ما فيها هظار انا لو محل ابو اليا كان رفدتك إتا دا
تعديل لحذف حرف
رفدته لكن بي طريقة دبلوماسية ...
علي ده حبيبنا يا معاوية ...
Post: #21 Title: Re: لم يتذكر منها سوى قول المطرب ( مساء الخير ي Author: يحي قباني Date: 08-30-2016, 02:15 PM Parent: #9
Quote: والله يا يحيى تعرف انا بعدين فى الجنة
بكون بس متلح ليك ابوداود و برعى
الاتنين ديل بس ما داير اسمع ولا اقعد مع اى زول تانى
الله يديك العافية يا أبا ذر ...
بالجد بودر بيكم رحمة الله عليه كان يأسر الناس بي ابداعه ...
ذكرتني أيام مكتبه القريب من داخليات البنات ...
كنا نمشي نتونس و نسمع أي شي بقوله البروف ...
و كان ما لقيناهوا ... نديها خشم خشمين مع الأستاذة منى لغاية ما يرجع :)
Post: #11 Title: Re: لم يتذكر منها سوى قول المطرب ( مساء الخير ي Author: أبوذر بابكر Date: 08-29-2016, 03:42 PM Parent: #1
عليك الله اسمع وشوف واتامل بس
زرعوك فى قلبى يا من ملانى شجون و روك من دمى يا للادن العرجون
اسمعها بالعود بس مع برعى وانا ما مسئول من البحصل ليك
وكان سمعتها بالاوركسترا بالله لاحظ فى حتة صغيره جدا كده بعملها برعى مباشرة بعد نهاية كل مقطع بقوله عبد العزيز وثبل ما الفرقة تخش طوالى
لا ده كله هين
انت عارف انه دى اول اغنية رسمية يسجلها عبد العزيز للاذاعة واول لحن ل برعى المبدع
دى هسه بالله بداية ولا ختام ابداع الدنيا كله ؟
Post: #13 Title: Re: لم يتذكر منها سوى قول المطرب ( مساء الخير ي Author: امير الامين حسن Date: 08-29-2016, 06:03 PM Parent: #1
(كتب البروف علي المك و يحكي عن عبد العزيز :
و مرة ذهب الى إلى عطبرة فسمع مطرباً مغموراً يغني أغنية بهره لحنها لم يتذكر منها سوى قول المطرب ( مساء الخير يا أمير ) ... و لكن اللحن استقر في حنجرته فلا يبرحها ، و حين لحظ المغني إنصات عبد العزيز المركز ، شعر ان الرجل بسبيل أن يختطفها و يستعمرها فامسك عن الغناء ، و لكن قضي الأمر ، استقر اللحن في ذهن عبد العزيز ، بقي النص ، ليست هناك مشكلة سافر عبد العزيز الى شندي ، و حمل قضيته لمؤلف الأغاني علي إبراهيم خليل ، و أسمعه اللحن و كانت الكلمات ، بعضها ( عار الصيد منك عيون ، أهدت ليك البانة لون ) ..)
الكلام دا فيهو اثبات سرقة ولا انا غلطان ؟
Post: #16 Title: Re: لم يتذكر منها سوى قول المطرب ( مساء الخير ي Author: يحي قباني Date: 08-30-2016, 04:22 AM Parent: #13
كتب البروف علي المك : في مساء السبت الرابع من أغسطس 1984 مات عبد العزيز محمد داؤد ... كان بدأ رحلته في طريق الأبد مساء الجمعة ، و انطلق الموت يلهث الى قلبه الكبير ، فمصير القلب الكبير إلى لهاث ، و ارتاح الموت حين اسكته ...
ثم عاد البروف و كتب جملة ... كنت قد مررت عليها مرور الكرام في قراءاتي الأولي للكتاب ... كتب البروف :
وأنا أنظر اليه : أيمكن أم يخرس المرض هذا الصوت ، أو هذا الرجل الذي ما عهِدتْ نفسه صمتاً طوال حياته فهو إما يتكلم أو يغني ...
وقفت هذه المرة امام جملة ( فهو إما يتكلم أو يغني )
تلك هي شخصية عبدالعزيز محمد داؤود ... الفكاهة و المرح و النكات و القفشات ... اعتبر نفسي من المحظوظين الذين لهم مدخل لمعظم أغنيات و تسجيلات أبو داؤود ... لو استمعنا الى أغاني ( القعدات ) ... تجد تلك الشخصية مجسدة امامك ... يغني .. و يدندن باللحن ... و يشاغل و ينكت و هو داخل اللحن و الأغنية ... كم كان محظوظاً البروف رحمه الله بملازمته تلك الشخصية النادرة ...
هنا مثال لتلك الشخصية المرحة المعطونة بالفن و الجمال ...
جزء اول من جلسة فنية ( بالكبريتة ) جمعته مع الفنان صلاح محمد عيسى و المادح و المغني فيما بعد السماني فضل الله ...
غنّى عبد العزيز في هذا الجزء .. فؤادي معاك مأسور .. جسمي المنحول .. و دمعة الشوق ...
Post: #18 Title: Re: لم يتذكر منها سوى قول المطرب ( مساء الخير ي Author: muntasir Date: 08-30-2016, 09:51 AM Parent: #16
طالما قفلوا الفيس بوك عليك الله عاين الشيوعي علي دفع الله بقول في شنو انا لو محل قباني اتباهل معاك والله ما يفرزونا إلا بالتكك
Post: #26 Title: Re: لم يتذكر منها سوى قول المطرب ( مساء الخير ي Author: يحي قباني Date: 08-30-2016, 02:54 PM Parent: #18
Quote: طالما قفلوا الفيس بوك عليك الله عاين الشيوعي علي دفع الله بقول في شنو انا لو محل قباني اتباهل معاك والله ما يفرزونا إلا بالتكك
يا مونتي ...
بموضوع التكك ده ...
ذكرتني الجماعة المسافرين ما شين يشيلوا فاتحة و سير مروحة اللوري انقطع في نص الطريق ...
بالله احفظ النظام يا منتصر لو سمحت ...
Post: #24 Title: Re: لم يتذكر منها سوى قول المطرب ( مساء الخير ي Author: يحي قباني Date: 08-30-2016, 02:32 PM Parent: #13
كتب الأأخ أمير:الكلام دا فيهو اثبات سرقة ولا انا غلطان ؟ __________________________________
أمير يا عزيزنا ... القصة مبتداها ما كتبه بروف علي المك ...و مافي زول بعرف الحصل بعد داك ... و ابوداؤود و البروف في رحمة الله ... فما في زول نسأله ...ممكن أبو داؤود رجع و اتفق مع الرجل ... ممكن حصل تنازل ... ما في زول عارف ...
أبو داؤود ديك منطقته ... وهو من بربر و انت عارف وين عطبره ووين بربر و تداخل الناس ... انا اكاد اجزم انه ما ممكن أبو داؤود يكون ترك المسأله كده ... خصوصاً هو عايش بالناس و للناس ... فحقوا نستمتع بالمغنى الجميل و ندع الأمور دي جانباً ...
تحياتي ...
Post: #19 Title: Re: لم يتذكر منها سوى قول المطرب ( مساء الخير ي Author: أبوذر بابكر Date: 08-30-2016, 10:38 AM Parent: #1
شفت يا يحيى
بعد تكون فاضى شويه و تنتهى من السرد
فتش اغنية
يا عين بتخافى مالك
بتاعة عمك عبيد عبد الرحمن
فى تسجيل بالعود مه الساحر برعى والمفاجأة انه معاهم على المك كورس
كان لميت فيها
اهديها ل روحك وتانى اهديها لكل عشاق ابوداود
Post: #20 Title: Re: لم يتذكر منها سوى قول المطرب ( مساء الخير ي Author: محمد أبوالعزائم أبوالريش Date: 08-30-2016, 12:20 PM Parent: #19
Quote: والله محمود اداها بصورة اجمل من ابو داؤود.
علي دفع الله ياخ والله لحدي ما قبل المداخلة دي كنت شايفك أكتر واحد الزول ممكن يصاحبو ...
خربتها تب.
يا يحي، أنا قصدت أقول إني من ما عرفت الأغنية بستمتع بيها وبي كمية التطريب المهولة الفيها ... بدون ما أعرف عنها أي قصة. قبل بوستيك ده ما سمعت بي قصة الأغنية السمعها أبو داؤود وبنى عليها أغنيته ...... يمكن لأني ما قريت كتاب علي المك.
Post: #23 Title: Re: لم يتذكر منها سوى قول المطرب ( مساء الخير ي Author: يحي قباني Date: 08-30-2016, 02:21 PM Parent: #20
قبل ما نرجع ...
اهدي يا عين بتخافي مالك لي رقبتي و للحبيب اباذر ...
يا اباذر ... ما ده التسجيل القال فوقه علي المك انه جاي يسمع التلاوة ...
التسجيل ده ما بفارقني ... تقول لي لو لميت فوقه .؟ :)
Post: #25 Title: Re: لم يتذكر منها سوى قول المطرب ( مساء الخير ي Author: أبوذر بابكر Date: 08-30-2016, 02:35 PM Parent: #23
تتبارك أن شاء الله و تلقى الدايرو فى مراد
ياهو التسجيل العجيب الفتاك
غايتو الغنا يا يكون كده يا بلاش منو
انا برضو مبتلى ب الاغنيه دى بسمعها لامن أكون براآآآآآ كل يوم مرتين طبعا عندى يو إس بى خاص بس ب ابوداود بسمعها الصباح فى العربية و انا طالع من البيت ونفس الشى لامن أجى راجع من امدرمان آخر اليوم
شكرا يا نعيم الدنيا
Post: #27 Title: Re: لم يتذكر منها سوى قول المطرب ( مساء الخير ي Author: يحي قباني Date: 09-02-2016, 01:58 PM Parent: #25
كمونية أخت العذارى
كتب البروف :
و ذات يوم و كنا على أطراف سوق الموردة قطع علينا الطريق قطيع من الخراف ، فأوقف السيارة احتراما للقطيع و اعجبه خروف فتسمرت عليه عيناه و سط القطيع ، و كان خروفاً بني اللون ، تمعن في ذلك اللون ، و نبهني عبد العزيز إلى انه ( خروف كموش ) ! ضحكت وهو صاحب تشبيهات لا تنسى ... أذكرها في ما يخص صنوف الطعام ، مثلاً كان يشبه الكستليتة بمضارب البنق بُنق ، و يقول عن الكومنية ( كمونية أخت العذارى ) ! لا أعلم لماذ اسماها كذلك ، و لم أسأله عن ذلك أبداّ .. لعلي أكتفيت بطرفة التعبير !! _____________________________________________________________________________________
سأعود للتحدث عن علاقة ابوداؤود مع بشير عباس ... و المقرن عند الصباح ...