مطارحة شعرية بين الخروف والغنماية

08:39 AM August, 18 2016

سودانيز اون لاين
almulaomar-WALO SAFAR
مكتبتى
رابط مختصر

حوار الخروف والغنماية اليكم القصة:-
أنا ام قران انا الدغايه
أنا المابنضبح لا في عرس لا سمايه
أنا أم لبنا بشيلو جمادتو بالكبايه
أنا الساعيني نايم ومنبسط للغايه
********
قال ليها :
أنا النطاح رئيس الجيل
أن الكرعيني مابتحوم وخشمي بشيل
أنا الفوق الشناكل وزني ديمه تقيل
أنامعروف فديت نبي الله إسماعيل
********
قالت ليهو :
أنا بنت ابدقون تيس الخلا المامشيت
وأنا الفوق الزرايب بستريح وببيت
أنا العند الرغيف والكسره خشمي بخيت
أنا مازي فلان الاصلو ميت ميت
********
قال ليها :
أنا عز النعاج وأنا الفي الجزاره قديم
وأنا الفوق البوادي الهابه شامي نسيم
أنا ماجعت لمن أكلت صفق النيم
أنا شبعان علايق وضارب البرسيم
********
قالت ليهو :
أنا ست الجمال الفطري ما الكوفير
أنا الغنمايه من كل البهائم أخير
أنا لا بعرف السكينه لا الفرفير
أنت مفارق الدنيا وملاقي نكير
********
قال ليها :
أنا ود الكباش البحملو الدفير
أنا الشحمان أنا الفي لحمي للكل خير
أنا الشبعت ناس بيتي ومقضي الغير
أنا مازي تيسك أب ريحتا بترمي الطير
********
قالت ليهو :
راجل النعجه مهما يعيش نهايتو العيد
وقدر ماشحمت سعرك في الزريبه بزيد
قلبك مكفي تاكل يومي ماشي غليد
الراغبين شراك شله وكتار يابليد
********
قال ليها :
قلب سيدك حجر عليك مابلين
والناس كلهم من خلقتك شاكيين
خشيتي البيوت خشمك مليتي عجين
وكرعيك التقول شغاله بي بنزين
********
قالت ليهو :
ساعيك كان بقي زول ضيوف ياحليلك
بتفارق النعيم وبتنضبح في ليلك
بكره العيد بجيك أرجاهو شايل شيلك
دوام بيتعد من ضمن اليتامي حميلك
********
قال ليها :
تخشي وتدفري الباب ان لقيتي متاكي
هدمتي المطابخ من صحون لي جكاكه
الناس كارهه طبعك وخشمك الكراكه
فوق راسك كتير متكسره المفراكه
ود العبد

رابط الموضوع
http://www.nadus.de/index.php/ar/diversities-ar/short-stories-ar/939-2016-04-04-16-55-18.html

حبيبنا الملا عمر .. مودتي ..
يا سلام ده زول موهوب ومتمكن ما شاء الله ..
إبداع وجمال رغم صعوبة تنظيم هذا النوع من الشعر الفكاهي ..
أنا طبعاً من جماعة الخروف رغم أني لا آكل اللحوم الحمراء ..
ولكن الغنماية مشكلتها أنها مخربة ومدمرة عكس النعجة طيبة وعلى نيتها
الغنمائة تأكل الاشجار من فوق عكس النعجة من تحت .. في سواقينا زمان كنا نعمل الف حساب للغنماية
لأنها تأكل البراعم وتقطع الحتة الفيها فايدة ..
بالاضافة إنها تدمر حيطان بيوت ( الجير) بحك ظهرها ..
لكن رغم ذلك هي ( المربية ) بفضل الحليب وهي مربية الكثير من الاجيال

كلام رائع جداً .. مما جعلني أرجع أيام الصغر ورعي البهائم
وأقارن بين النعجة والغنماية ..

مودتي .. ملا عمر

الأخ علي عبد الوهاب عثمان
تحياتي
سرني مرورك
يا زول إنت أتاريك زميل في المهنة وزول سعيه زينا وأكيد بتعرف الصرار. يا أخي هي حياة حلوة بكل ما فيها من تعب.
الغنماية أو العنز دي مصيبة كبيرة وخاصة في الزراعة فهي كما ورد في المسدار بتاعت لولوه وعينها زايغة وتاكل من دا وتجري تهبش دا وحتى خدار الجيران ما يسلم منها لمن سوا ليها سجن (سوكره) وهي من أصعب الحيوانات في المرعى لأنها بتنطط وما بتاكل من حته واحده وخشمها بالله التقول فيهو موية نار والله يومها التضوق ليها شدرة ساكت تلحقها الغتس تاني كان جبت ليها سماد اليوريا وعامدت الشمش عليها ما تبتق. وفي البيوت كمان شغلها براهو يا أخي دي من جنها بترضع نفسها يعني في نوع غنم إلا تركب ليك علبة حديد في رقبتها عشان تحول بينها وبين اللبن.
لكين في المقابل الضان لتخ بالرغم من إنه سهل القياد في المرعي
أكرر شكري لمرورك من هنا

حبيبنا الملا عمر ..
النعجة فيها طيبة .. حتى الزول الطيب الذي يتنازل عن حقه
ويكون زاهد يطلق عليه عندنا بالنوبية ( إيقيد ) أو نعجة بالمناسبة
هي ليست شتيمة .. لأن التربال الذي يطلق هذه الصفات على الناس يأتي بها
من خبرة ومعرفة لتجاربه مع الحيوانات .. لأن التربال يقضي معظم
وقته في الساقية مع البهائم .. ولا يدخل في التعاملات اليومية كما الانسان المديني
يعني بيع وشراء واسواق ... إلخ أحياناً الزوجة هي التي تقوم بهذه الواجبات ( التربالة)
وخاصة بيع المحصول قطاعي ( بالقفة ) وشراء حاجيات البيت .. لذا تجد التربال لديه خبرة وعمق في الحيوانات
ويشبه بالحيوانات الاليفة .. حتى البنت الجميلة تشبه في عالم التربالة ( بالعجل )

أما مشكلة النعجة إنها عفوية لا تخاف ولا تقدر الخطر في إتخاذ القرار .. إذا رأت ( قش ) أو نبات
تتجه نحو الهدف وبسرعة فائقة جداً وتقتحم حوض الذرة أو البرسيم ..
مما كان يجلب لنا العقاب ( الجلد ) ... وفي نوع من النعاج تكون لها القيادة وعندما تركض
يكون جميع القطيع خلفها .. وكان ذلك يترتب عليها عقوبة كبيرة حتى الفلقة ..

رغم ذلك النعجة طيبة وعلى نياتها ..
حبيبنا الملا عمر .. مودتي
رحم الله ذلك الزمان وأهله .. لأن الناس وحتى البهائم كانوا على سجاياهم
ما عارف نعاج اليوم كيف !!!!!!!!!!

سلامات ..
الأخ الملا عمر الأخ على ..
لكم الشكر الجزيل على هذا الأنس الجميل .. فوالله لقد إستمتعت أيما متعة ..
وسبحان الله كيف لكل مخلوق فى الدنيا ما يميزه عن الآخرين ...
لكما الشكر ...