حكاوي معادة

10:45 AM August, 17 2016

سودانيز اون لاين
عبدالحفيظ ابوسن-no where
مكتبتى
رابط مختصر

يا ولدي الدروب شقاقا بحر التيه
كما قال بكري
دون اقتباس
تعمل ليك جمبة ترجع ليها تشحنك حبة دفء
وكما قال عبدالحفيظ ابوسن
الذكريات وقود ليالي الشتاء والمطر

جدي النبارك وزوجته عشة كانا من ألطف الناس واطرفهما
مرة جدي ولدو جاتو نزلة والتهاب .. وقرروا ليهو خمسة حقن بنسلين بالعضل
حقنة البنسلين في العضل زي العود . تكتل اليد عديل . البنسلين تقيل ..
اها خالنا اخد الحقنة الاولي . وعرف البيهو والعليهو
لامن مواعيد الحقنة التانية جات . والممرض عبا الحقنة . خالنا حلف ستين يمين ما ياخدها
قدر ما ابوهو حنسو الولد ابا
وجدنا دة ساكن حواتة وزول معاصر
نادي العصرنجي المعاهو
تعال يا فلان اخد الحقنة دي ما تبوظ ساي
دي حقنة بنسلين بتنفعك وتودر ليك تعب العصارة
العصرنجي ابا
جدي اتحايل عليهو .. وقت شافو ما متراجع منو لفح عراقيهو ودقش الحلة
جدي اتوكل وحل تكت سروالو وقال للتمرجي
عشان ما تبوظ اديني ليها

ازيك يا عبد الحفيظ ياجميل
تحياتي لكوستى من الكوبري لقوز ابوشريف

الحبيب عبد الحفيظ

السلام عليكم والاسرة الكريمة ولكل احبابنا فى كوستى

ذكرتنى حقنة البنسلين .. عندنا جارنا زمان فى السوق ..

زول صعب شوية فى القروش يعنى مرّة كدا كان طالب ليهو واحد خمسة قروش

وساكن ربك .. المهم الراجل اتاخر من السداد قام صاحبنا مشى السوق الشعبى

ركب الحافله بخمسة قروش ومشى ربك واخد من الراجل الخمسة قروش اللى طالبا ليهو وجاء راجع بخمسة قروش ههههههههه

..........
المهم كان طالب واحد ممرض عشرة قروش والممرض شغال فى العياد قدام بيتنا

قام جاء للممرض وقال ليهو وين العشرة قروش حقتى

الممرض قال ليهو والله ما معاى الان .. الاّ كان اديك حقنة

قال ليهو خلاص ادينى حقنة بنسلين .. ههههه صاحبنا ادّاهو ليك حقنة زى السم

جاء طالع عينو طالعة ويقول الله لا يكسّبك ولا يبارك فيك الملعون يا ريتنى لو خليتا ليك

.......

كامل الود

اها عباس جاك ولا لا ؟؟

مرحبا محمد الهادي
وحبابك
يصل سلامك
اخونا حسوبة
دينكاوي اتي به النزوح لكوستي وصار كوستاويا اصيلا
ومدربا لكرة القدم
رجل طريف لطيف يتحلق حوله الناس مودة وحب